رواية ضحية لمن لايرحم الفصل الرابع وستون 64 - بقلم زهراء الحسناوي

البارت 47

ضحيه لمن لايرحم

بقلم زهراء الحسناوي

،،،،،،،،،،،،،،،،،،

كافي اريد انسئ واضل بعيد
ذكرى منك بعد ماااريد
حلم رجعتنه صعب
عشت وياك برعب
اختلف وضعي ونشف دمعي
وبعد متهزني بكلام 💔

،،،،،،،،،،،،،،،،

صباح الخير على الجميع
صباح الورد والياسمين على احلى متابعات
اولا اعتذر ع التأخير هاي اول مره اتهاون بعملي بسبب وضع ايدي
وانشاءالله بعد ماتتكرر ومن اريد اكتب روايه اكملها يالله ابدي بتنزيلها
اشكركم على تفهمكم ربي يحفضكم ولاتشوفون شر انشاءالله بحق النبي اشكر كل الاندعولي
وهم اشكر الاتجاوزو وعلى راسي
ادري لومامحروگ گلبهم ع البنات ماجان تجاوزو
وايضا اشكر
اصحاب البيجات الي كانو ينقلون ادق التفاصيل
واتمنى اتابعون بيجاتهم وتنطون لايك للبيج لان يستاهلون 🌹
،،،،،،،،،،،،،،،،،،،،،،
زينب،، جمدت بمكاني ماكدر اتحرك احس اعصاب حلگي ماجاي اكدر اسيطر عليها ترجف رجف موطبيعي
واكفه مصدومه بي حنان ابد ماحجت واگفه على صفحه وهو مدنگ

اجه عمي يركض سامع صوتي واني اصيح
وحسن فتح الباب واجه يمي
ضل صافن على اخو الضاهر هم مصدوم مثلي

اريد احجي
اريد اصيح
اريد الطم
مااگدر احس كلشي بيه جامد بس عيوني يتحركن
اباوعله ماامصدگه
ردت اگله ليش هيج كسرتني وذبحتني بهاي سوايتك؟
ماكو شي صعب بگد هذا الموقف بحيث تحس كلشي مر عليك لاشي جدام هيج شي

ابلع بريكي ودموعي عشره عشره خانگتني العبره
ردت احجي زمخ بيه عمي

شيخ منهل،، كاافي خبصتي الدنيا عليش؟؟
ماگنالج گلنه خطيه مانريد نكسر خاطرهاا
تاالي سويتيلج هوسه بتوالي الليل شكوو؟؟

اخذهااا حسسن طلعهاا بره وخلل اسمع الها صووت

حسن،، وشكوو تزمخ بيهاا؟؟
مخلياتك وصله مسح بسحوورتهن وانوب اندارن عله ابننك خاافو ربكم وخلوو بين عيوونكم
مو راح تغسلكم غسسل دمعتهااا فوگ ماالله غاسلكم
لاحض ولابخت من دووون البشررر

ياالله زينب اطلعي لاتبجين ع المايسوه

زينب،، عمي ابد ماحجه يخاف من حسن
باوعت على لواء اتمنيته يحجي ساكت حسن سحبني من ايدي فاصله مااحس بيهم عيوني متشكله الصوبه
تمنيت يطلع حلم مثل مساع واگعد واكول الحمدالله ماصاير شي بينهم

سحبني حسن طلعني وحنان باوعتلي مبتسمه كانه اتگلي اخذته منج غصب عنج
سدت الباب بوجهنه عمي قبل لاينزل
ضل يحجي بصوت عالي يصيح فصليه ومحد گادرلها

ماادري اشلون وصلت الباب غرفتي حسن لازمني
يريدني اهدئ بس شهدئ؟؟
واني النار تلهب بروحي

حسن احتار شيسوي ومايگدر يفوت الغرفتي
ضل يصبر بيه واني ساكته عيني الباب غرفة حنان
تالي تركت حسن ودخلت الغرفتي سديت الباب وراي

نزعت حجابي واتمددت ع الكاشي هادئه تماما من الخارج بس من الداخل مهشمه لاجزاء مستحيل تنجمع من جديد

حطيت ايدي جوه راسي دموعي تنزل صافنه
اتذكر من جان يشعرلي لو دائما جان يسميني بنيتي وحبيبتي
وين صرت اني هسه؟؟

اتمنيت ابجي بصوت عالي يمكن اخلي اليسمع صوت نحيبي يبجي وياي
اتمنيت اركض حافيه بالشارع
اتمنيت اروح المكان فارغ واصرخ بصوت عالي اريد اطلع القهر المكبوت بداخلي

الف فكره وفكره اجت براسي
باسها؟
حضنها؟
اقترب منها؟

وكل فكره تخليني اموت الف موته بمجرد ماافكر بيها

نهضت من مكاني بدون وضوء مااگدر اطلع
سحبت القران حطيته بحضني احتضنته بقوه الصدري
كانه جاي اگله برد گلبي وشافي كسره روحي ياالله
واجبر بخاطري يارب

للفجر اني متمدده والقران على صدري
نهضت من مكاني گوه اسحل بروحي كانه خارت كل قواي ماعندي حيل ولاطاقه حتى افتح حلگي

بست القران وخليته ع الميز
طلعت من الغرفه التفتت الجهة غرفة حنان غمضت عيوني حيل ودموعي نزلن
همست بحسبي الله ونعم الوكيل

توجهت للحمام توضيت ورجعت للغرفه
فرشت سجادتي وگفت بين ادين رب العالمين
مدنگه وابجي وگلبي يشكيله حالتي موالساني
لانه يعلم مافي الصدور

كملت صلاتي واتمددت بعباتي ع السجاده
بجيت من كل گلبي
إلى متى ابقئ اهناا؟؟
قبل جنت باقيه الخاطره متحمله وساكته
بس هسه راحلها وتركني
شنو اليخليني ابقى وحتى هو عافني

ادري فصليه ولازم اتحمل واسكت
بس الفصليه بشر مو نازله من كوكب ثاني وماتحس
كانه عبالهم اني حجر مااعندي دم حاالي حالهم خلوني اشك بروحي موبشر مثلهم

نهضت من مكاني اسحل بروحي
فتحت الجراره طلعت دنبوس
عصرت اصبعي ونغزته بالدنبوس
طلع نقطه دم بجيت وكعدت بالكاع

يرربي دمم ولحمم مثللهم
جااليش محسسيني اني مووبشر؟؟

گمت رحت يم فطومه اباوعلها نايمه تمنيت ارجع بعمرها
لا اهم ولاغم
هي هاي الحياة الجنه نتمنى نعيشها من نكبر؟؟

هذا حدي وياه لو اعرف احرگ روحي بس مااتحمل اشوفه يفوت يمها كل يوم تعبت ماعندي حيل حتى اتحملهم
توجهت للكنتور طلعت علاگه نايلون عندي جبيره
خليت بيها ملابس فطيم موكلهن لان العلاگه انترست
خليت تليفوني فوگ الهدوم بنص العلاگه
اخذته لان بي صور فطومه من جبتها محفوضات بالجهاز
باوعت للساعه ب 5الفجر

لبست عباتي وشلت بنيتي والعلاگه بيدي الثانيه
فتحت الباب وطلعت
وصلت يم باب غرفتهم التفتت عليها

بجيت بقهر بدون صوت
تركتهم ونزلت الحوش هدوئ كلهم نايمين

التفتت على البيت كانه جاي اتذكر كلشي صار بالفتره العشتها داخل جدرانه
اليشوفه من بره مايتوقع بشاعته من الداخل
كانه جمال بنائه الخارجي طغئ على بشاعه العيشه بداخله

درت وجهي وطلعت من البيت كله
بنيتي نايمه على متني وعلاگتي بيدي
امشي وابجي بعدها الدنيا ضلمه توها بيها خيط ضوه

،،،،

عندما قررت أن اتحمل وأن لااهرب
كانت الضربات تتوالى على رأسي
عن يميني وعن شمالي
والنتيجه إنسان خائف
ينكر ذاته يائس يتمنى الهروب
،،،،،،،،،،،،،،

امشي ودموعي تجري اتذكر منضرهم البارحه
كرهته بگد حبي اله
عندي استعداد لويخيروني بين الموت والرجعه للعيشه وياه افضل اختار طريق الموت ولاطريق الذل والمهانه

دگيت الباب على اهلي من صوت الدگ فزت فطومه
بوستها ولزمت راسها رجعتها تنام على متني
انفتح الباب طلعت امي مخترعه تلف بشيلتها
من شافتني ضلت صافنه

ام احمد،، يمه زنييبه شجابج؟؟

زينب،، بجيت ودخلت كتلها جابتني الذله يايمه
اخذت بنتي من ايدي ودخلتني للبيت
اخواتي نايمات رحت الغرفه امي
فطومه كعدت خلتها امي بحضنها واني ذبيت علاگتي وعباتي وگعدت ابجي امي تريد تفهم مني
بس ماعندي طاقه احجي شي
فطومه من شافتني ابجي فحطت

ام احمد،، اسم الله بنيتي ولج يمه راح تسودنين بنيتج استهدي برحمانج واحجيلي شصاير وياج؟؟

زينب،، سكتت مسحت ادموعي مختنگه گتلها رحمه الروح ابوي احجيلي ييمه
بيوم الحبلتي بيه بشنوو تنسيتي؟؟
بالقهرر؟
بشلعان الگلب؟؟
مو والله تعبت وفاض الصبر وتبده

ام احمد،، كولي يالله ييمه

زينب،، والله يايمه صرت اكول الله نساني وماجاي يشوف الظلم الي انظلمته

ام احمد،، استغفرالله بنيتي هذا يسمو جزع
الله كاتبلنه هيج امتحان يريد يختبر صبرنه

زينب،، امي تحجي واني فاصله منضره ماجاي يطلع من بالي
احس جمره بنص صدري تلهب لهب بروحي

امي سوة حليبه لفطومه وبدلتلها للساعه ب 8
گعدت مريم اخذت فاطمه بحضنها تبوس بيها
اسمع صوت موبايلي يرن عرفته هو گتلها مريم جيبي موبايلي

اخذت فطومه منها وهي گامت راحت جابته واجت
فصل ورجع اتصل مره ثانيه اخذت الجهاز شفت رقمه غمضت عيوني مااريد اسمعه

دزلي رساله

لواء،، وحگ علي ثواني واوصل يمج اذا ماطلعتي
تجنين على نفسج

زينب،، بجيت مابيه بعد حيل للقهر
هي ثواني وسمعت صوت هورن سياره اباب بيتنه
نهضت من مكاني اسحل بروحي

امي لبست عبايتها وطلعت جدامي واني وراها
راحت امي فتحتله الباب اسمع يصيح صيحيلي ببنتج

وكفت وره امي شافني

لواء،، جيبي بنتج وتعااي بسررعه

زينب،، اختنگت من شفته يمكن لويموت جدامي ماتحترگ روحي علي
گتله واني ابجي بصوت عالي
ماااروح كاافي تعببت ارحمووني ياابشر

لواء،، ززينب الج دقيقه وحده اذاا ماتجين انطيني بننتي ورووحي

زينب،، اني سمعته لو تخبلت صحت
مااانطيهااا بننتي هااي ماانطيهااا

اجه بسرعه دفعني وگف اباب بيتنه صااح
انطووني بنتيي جيبووهاااا

امي فاتت للبيت من شافته هيج جابت فطومه شايلتها
ركضت عليها لگفتها من ايد امي اخذنها لميتها الصدري
ودرت وجهي عنه انطيته ضهري
ارجف وابجي
كتله ماتاخذهااا محدد يااخذهاا

حجه بصوت ناصي وهو صاك أسنانه

لواء،، عندج خياارين؟؟
لووتنطيهااا الي
لوترجعين ويااهاا
وانتي اختااري

زينب،، فطيم من الصوت والصايح فحطت تبجي
عوينتها بسرعه تورم من تبجي

گتله ماانطيهاا رووح كلشي مااريد منك بس عووف بنيتي

لواء،، الضاهر نسيتتي روحج شنوو انتي؟؟
كللج فصليه الج السكته ماتفتحين حلگج
اببددد

زينب،، احتضنت فطومه حيل مااريد انطيها
ومااريد ارجع عندي الموت اهون من الرجعه الذاك البيت الاسمي بيت الاشباح من بشاعته

ماحسيت غير جرهااا بقوه من ايدي
اتخبلت اخذها وراد يمشي
مامهتم لالدموعي ولا للتفرفح امشي وراه وصيح بنتييي لواااء بنييتي حررام عليكم

لواء،، ترديهاا تعااي ويااها

زينب،، ماعندي بعد طاقه للتحمل حتى ارجع وياه
تعبت احس روحي جاي انازع اريد امووت ومحد حاس بيه
اخذها للسياره فتح الباب شمرت روحي جووه رجلي لزمتهن

رفعت راسي روحي تشب اللله وترد تنطفي
كتله ابووس رجلك برروح اخووك لاتااخذهااا
امووت بدونهااا لواااء
ذبحتتني مررره لاتذبحنني مرره ثااانيه

كانه مايسمعني سحب رجله بقوه صعد وحطها بحضنه
اخذها وراح واخذ رويحتي ويااها
صرت ادگ والطم بصوت عاالي
لزمتني امي واختي كل وحده سندتني من جها گومني هدومي كلها تراب

دخلت للبيت ماكو فطومه ماكو السبب اليخليني عايشه
فطومه كلشي الي من اشوفها روحي تردلي
لو اركض. من الصبح لليل
بمجرد اشوف ضحكتها يروح التعب كله
مرات من ابوسها اشم رگبتها
احس روحي بالجنه
احجي وياها اگلها افييش ياريحة الجننه

تالي حتى هي حرموني منها ولاجن هذا نفسه
لواء صرت اخاف منه اكثر واحد بيهم ارتعب من اشوفه
ماكفا الضرب والمهانه رجع اخذ بنيتي مني

امي كعدت تهدي بيه اتگلي
ام احمد،، احمدي ربج انتي اجيتي برجليج اكو فصليات بس تجيب ياخذون ابنها ويشمروها
هسه بعده عصبي من يهدئ ويشوفها تبجي تريدج
راح يجيبها ويجي لاتخافين

ماعندي صبر الحجي سهل مومثل الفعل
اخذت التليفون اديه يرجفن على ساعه اوگع
ماعندي غير حسن اتصلت بي جاوبني واسمع صوت هوستهم يمه

گتله واني ابجي وگوه يفهم مني
خييي دخيل الله ودخييلك
حسسن بنيتييي اخذهااا اخووك

اسمع الصوت اليمه صار بعيد عرفته طلع من يمهم

حسن،، صدگ تحجيين زيينب؟؟
لييش رحتي؟؟

زينب،، گعدت بالگاع روحي تفرفح
كتله وشعندي باقيه والمن ابقه مو ماخليتو بيه غير بس النفس يصعدد وينززل

حسن،، زيينب يعني اني مااعرف من زمان اگلج اخذي بنتج وروحي؟؟
ماحجيت لان متاكد راح ياخذون فاطمه منج
سامعه بالفصليه لو احجيللج؟؟

زينب،، مااكدر اسيطر على دموعي كتله الفصليه هم بشر مثلكم

حسن،، منهللل الدثوو وعائلته يعتبرروج خدامه
يعتبرون دمج بمكان دمم حسين
بيوم الي تجيبين ولد تكدررين تتحررين منهم

تدرين شنوو اتمنى؟؟
ومحمد اتمنى اجمعهم كلهم بغررفه وارجمهم بالحجار
ولج ذووله حلاالل بيهم الرجممم

زينب،، كلشي ماابالي غير فاطمه
گتله خيي اني بشااربك بنيتي بأمانه الله وامانتك

حسن،، كافي لاتبجين اشتعل ابو حسن
لاتخافين يمي راح اخذها هو تالي عمري اخض ممات للزعاطيط

زينب،، يحاول يخليني اهدئ بس جنت فاصله ادگ وانوح على بنتي للساعه ب 10ابجي واون لازمه ثوبها حاطته على گلبي اريد بنيتي
اندگ باب الحوش احس روحي طارت كل ضني جابها
بس خابت امالي من دخل عمي ابو مثنئ وياه مرتضئ ابنه من شافني ضل صافن متفاجئ
شفته صحت راااحت بنيتييي يعممييي

خطيه اجه احتضني يبجي وياي
صاح بمرتضئ

ابو مثنئ،، رووح صيح ل امك واختتك

زينب،، ماجنت منتبها كلش الكلامه
لان گلبي وعقلي وروحي يم فطيم

دقايق وانفتح الباب دخلت عمتي وغصون وجانت هاي اول مره اشوفها
لااراديا ابتسمت الشوفتها من بين دموعي وهي هم ابتسمت

شهگت وحجيت من بين دموعي

هلا بالشااركتني همووم دنيااي
وهلا بالضلمهااا الوكت وياااي

اجت شمرت روحها بحضني
بجينه بصوت عالي
كلها بجت ويانه وعلينه وعلى حالنه

ابتعدت عني تمسح بدموعها كاعده على اركبها مگابلتني

رفعت اديه انعيلهااا

گتلهاا

خذووهااا يغصوون خذوهااا
وخذوو سبااح گلبييي خذوهااا

جرتني حضنتني وتبجي

ابو مثنئ،، كافي بنيتي راح تموتين
لاتخافين عليها عد ابوها موعد غريب

زينب،، ادري عمي يريد يحجي بس خايف عليه
وادري لازم من اجيب اني اسلمهم بنتي بيدي
والمفروض جان لازم اجيب ولد يالله يعتقوني
لازم ابني بدل دم ابنهم

بس تعبت ورجعت مدمره مااكدر ارجع للضيم والقهر من جديد واروح برجليه

لليل غصون كاعده يمي ماراحت
واني من عشه امس ماماكله شي بس اشرب مااي اهواي احس گلبي يابس مو ريجي

شگد حاولو امي وغصون يخلني اكل ماكدرت مالي نفس
حاطه هدومها وكاعده اشمشم بيهن
حتى اهلي محد اكل يبجون عليه

الساعه ب 9تقريبا غفيت بمكاني من التعب
والبجي

يوميه من انام افز على صوت بواجيها من تجوع وتريد حليبه تكعد تبجي تخليني مااندل دربي
مرات توگع الممه من ايدي مرتين ارتبك من صوتها من تجوع ماتتفاهم ولاتنطي مجال
تخليني بعد مااشوف دربي

حلمت بيها تبجي تريد حليبه فزيت اتلفت منا ومنا ادور عليها كل ضني يمي وجاي اسمع صوتها
امي وغصون يصيحن اسم الله واني بعده صوتها بااذني عبالي اكعد الكاها يمي

اتذكرت اشلون اخذها مني الصبح بجيت ودنگت افرك بوجهي وبرگبتي مختنگه
دگ الموبايل لگفته بسرعه اتمنيت يگلي اني بالباب اطلعي اخذي بنتج

رفعت الموبايل اسمع صوتها تبجي انعصر گلبي
طفرت من مكاني احجي وياها اريدها تسكت

لواء،، سمعتيها اشلون تبجي تريدج؟
زينب اذا ترديها تعاي يمها هسه اجي اخذج

زينب،، ارررجع؟؟
ووين اررجع؟؟
الضلمكمممم؟؟
لو تررديدني ارجعع اشوفكك من تفووت يمهاا؟؟

حسبييي الله ونعم الوكيل على كل ضالم

سده بوجهي گعدت الطم صرت مثل طير المذبوح
لااگدر ارجع واتحمل قهر من جديد لان بعد ماعندي طاقه حتى بنسبه واحد بالميه ماعندي
تعبانه كل جزء بجسمي وبروحي ياذيني
اتمنئ اغمض ماافتح بعد

اول يوم جان هذا انام بدون مااحضن الجنه واغفه على ريحتها
اول يوم انام بدون فطومه

تعبت من البجي كتلها يمه اريد اروح ل ابوي اخذوني الصبح الله يخليكم

غصون اتصلت بعمي گالتله يابه زينب تريد تروح الصبح للمقبره گاللها ميخالف الصبح تحضر روحها اخذها

غصون باتت يمي بس تواسيني تبجي وياي
كلشي ماحجينه لاشكينه ضيمنه بسوالف ولا جبنا طاري القهر لان دموعنه كفيلات يشرحن القهر الجنه عايشين بي

للفجر اتگلب مثل السمجه المطلعيها من الماي
الساعه ب 6اخذنه عمي اني وامي للمقبره

اول ماوصلنه ونزلنه يم الفتحه المدفون بيها ابوي
اباوع ملاييين الگبور وابد مااجيت قبل حتى اندل ابوي وين مدفون

حسيت بي حس بيه من اجيته
وگفت بنص الگبور لان مااندل گبره
صحت بصوت عالي
بووووويه اگعد اتلگاااني

عمي وامي مشو جدامي يبجون واني وراهم امشي واتعثر
وصلو يم القبر عمي مسوي صوره ل ابوي ومجومها بإطار جام
مخليها يم القبر عبالك يباوعلي
شمرت روحي ع الگبر ابجي واگله
بويه طررر گبررك واكعد احجي ويااك

بوويه سويلي مجان يمك ارد انام
اريد اشردد من الوادم العدلين واگابل المووته واگعد
لان العدلين مابيهم رحمه بعد
بوويه البنت بدون ابودها تنذل
وانه لا ابو ولا اخو عندي

بجيت اهواي لمن احس راسي انتفخ من البجي
عمي گال كافي كومي نزور
من گمت بست الصوره كتله بويه اذا عندك بخت اخذني يمك خل ارتاح

عمي حط ايده على متني يبجي سحبني ضلت عيني ل ابوي
مادرت وجهي منا لمن ابتعدنه كلش
اخذنه بعدها زرنه الامام علي عليه السلام
جاي نمشي جدامنه المناره
احجي وياه من بعيد وابجي
حتى لوادم الغربه كسرت خاطرهم

من وصلنه شكيتله كتله يبوووو الايتاام علللي
اانتت مووكاافل لايتااام؟؟
اانه يتيمه واعتنيتك

كعدت اشكيله كلشي صار بيه نسوان لااعرفهن ولايعرفني مكابلتني يبجن وياي
تالي امي كالت كافي راح تموتين كومي

كوه طلعتني رجعنه للبيت عمي بالطريق اشتره
ريوگ صمون وگيمر النه والهم حلفني اكل
من رجعنه للبيت كتلهم اريد بس انام
مالي خلگ الكلشي

رغم عمي حلفني اكل بس مااشتهي ومالي نفس

جريتها نومه للضهر يالله كعدت بس الحمدالله احس گلبي شويه برد الله واهل بيت النبوه مايقصرون

ام احمد،، يمه اكليلج لگمه شوفي وجهج اشلون صاير

زينب،، هزيت راسي بمعنى اي

خطيه امي فرحت كالت المريم بسرعه كومي جيبي كيمره وصمونه وجاي ل اختج خل تاكل

راحت مريم بسرعه دقايق وجابت الاكل
حطته كدامي امي سوتلي لفه وانطتنياها اول ماخليتها بحلگي اتذكرت فطومه من تشوف الاكل تضل تهمش تخبص روحها من تشوف صينيه جدامها تريد تجيت تاكل
غصيت بعبرتي ابلع اللگمه والف عبره تنبلع وياها
اكلتلي كم لگمه ودفعت الصينيه مااريد
امي كالت اكلي والله يومين ثلاثه يردها الج لان محد يتحمل بزر موبزره

صرت اتامل بلكت الله يردها الي
يوم
يومين
اسبوع
وفطومه محد جابها اتصلت بي ابجي كتله دخيلك رجعها راح اموت
كان جوابه

لواء،، اذا ترديها ارجعي يمها

زينب،، سديته لو اموت ماارجع اعيش يمهن
ماعندي طاقه اتحملهم بعد

يوم يجر يوم وكل يوم يمر بسنه
اشبع بواجي تعبت احس روحي ميته
اباوع على روحي بالمرايه صفين شبه انسانه ميته على قيد الحياة
حتى شعر براسي ماكو ينحسبن احساب
وخاصتا من مقدمه راسي شبه فارغه
بحيث صرت من امشط
امشط صفح اشيل من المكان البي شعر احط فوگ الفارغ
الهاي الدرجه وصلت صرت مااحس بطعم الاكل والشرب
واذا انام كل شويه افز من نومتي اسمع صوتها بااذني تبجي

افكر
هاا اكلت؟؟
شربت؟؟
لبسنهاا؟
نومنها؟
ومن افكر خاف ضارباتها انتهي من البجي
لان مره عفتها ساعه يمهن اجيت لگيت جهال حسين يبسطون بيها وهنه مكيفات

امي تهدي بيه تكلي اول وتالي بزرهم ياخذو
الله يعوضج
لطمت على وجهي كتلها يممه شيعووضنيي؟؟

رفعت ثوبي شوفتها رجليه الجلد متشوه من فوگ الركب بشويه ولحد جعب رجلي الجلد معكمش
شكله موحلو

نزعت حجابي شمرته كتلهااا شووفي الكداامج
محسووبه بشرر تعبت يمه والله تعببت

خطيه ماعدها غير تحتضني تواسيني
على بلوتي

وره كم يوم بليل اخواتي نامن واني وامي كاعدات
غصون تجي من الصبح لليل وترجع لهلها
وهي هم سالفتها سالفه الضاهر كل وحده من عدنه متحزملها الوكت احزام
مرات افكر اكول معقوله كل الانولد ويانه بنفس اليوم
ضلمته الدنيا مثلنه؟؟

راحت غصون ب 11بليل اني وامي وصلناها البابهم
ورجعنه بيناتنه بس حديقه
من رجعنه كعدنه شويه لمن صارت الساعه ب 12
سمعنه صوت دبجه بالحوش احنه قافلين البيبان

امي طفرت واني فزيت خايفه
كتلها يممه حررامي

ام احمد،، انتضري بنيتي حررامي شعدنه حتى يجي يبوگنه؟؟

زينب،، امي نهضت من مكانها اخذت بيدها توثيه
دائما تحطها وره الباب
جرتها وطلعت جدامي واني وراها خايفه
اول مافتحنه الباب انصدمنه بزلمه ملثم بوجهنا
اني عطت جرني سد
حلگي ومد ايده نزع الشماغ

انصدمنه من شفنا اخوي احمد بعد ايده عن حلگي
اباوع بوجها صافنه
وامي گلب والده كعدت بالكاع ماتكدر توكف هم هبطه وهم صدمه

دخلت وامي لزمها احمد من متونها گومها يكود بيها اثنينهم يبجون بس اني كانه اشوف شخص غريب جدامي لا بجيت ولاحجيت بس اباوع
دخل احمد قفل الباب ورجع يم امي
اثنينهم يبجون بصوت ناصي
دنگ باس ايد امي ودنگ على رجليها

احمد،، يممه اعتذر والله اعتذر

زينب،، يتباجون اثنينهم امي كالتله على شنو. تعتذر؟
علئ دمار حياة اختك وبنت عمك؟
لو على موت ابوك بسببك؟؟
لو على دمارنه؟

احمد يبجي منهار كالها يمه والله اتندمت جنت طايش ماخذ الدنيا بحيل صدر
مانايم يايمه ولاشايف الراحه

ام احمد،، شتسوي اجيتت؟
تدري دمك مهدور بس يسمعون بيك اولاد الشيخ يجتلووك

احمد،، خل يجتلوني بلكت يرتاح ضميري
تعبت والله يمه تعبان

ام احمد،، ليش هيج وليدي؟
دمرتنه انته ودمرت روحك

ام احمد،، ييمه وروح ابوي هو الاستفزني
صح جنت ضايج منهم لان محتقرينه
بس هو الابتده
اني جاي امشي بطريقي وهو الزل بسيارته اعليه دمرني طين
نزل وصار يغلط واني هم غلطت
اشتدت العركه بيناتنه بس من فشر على اخواتي فقدت فشر على عرضي يممه اشلون ترديني اسكت عننه؟؟

زينب،، ضلينه صافنين على كلام احمد
گعد يحجي ل امي اشلون حسين يگله تنطيني وحده من اخواتك ليله وحده وانطيك بمكانها افلوس؟؟

امي لطمت على وجهاا
گالتله لليش شردت وضيعتت حگك بيدك
لو حاجي جاان احننه صرنه اصحاب الحگ لان اتجاوز على اخواتك
جان هسه احنه الناخذ حگنه مربع من عيونهم
ومايصيرون همه اهل الحگ سبو اختك وبنت عمك
ليش هيج وليددي؟؟

احمد،، خفت بساعتها وانهزمت وريتني لاانهزمت
لو جاتليني ولا العيشه الوصلتو الهاا
والله ييمه هو الجان وين مايشوفني يفشر
وريت بس هيج
حتى مره سمعت اخو رايد بنيه وهو الصار يطلع اشاعات عليها
جان ينطي فلوس لاثنين شباب اعرفهم حتى يشوهون سمعت الابنيه لمن انفضحت بالمنطقه وانتقلو همه الحچولي وغيرهاا وغيرهااا اخس واحد بيهم هو
ولو يرجع بيه الوكت واسمعه يجيب طاري اخواتي بالموزين هم ارجع اكتله

زينب،، مصدومه بكلام احمد صافنه بوجها
طلع حسين نفس تصرفات اخته نذيره وهو مشارك بفضيحة العلويه دمر اخو وبسببه ماتت الابنيه
وهو السبب بضياع الكل لو مامتجاوز على احمد ماجان اتهور وقتله
اجه يمي كعد جدامي راد يجرني يحضني سحبت روحي امنعه
بجه

احمد،، سامحيني بعد اخووج
ذنبج بركبتي اليوم الدين
يمكن لان جنت ابن عاق مابار باامي وابوي الله عاقبني

زينب،، همست ماعاقبك
عاقبنه بسببك

احمد،، ولجنن انتن اخوااتي عررضي
اكبرر غلط سويته انهززمت

زينب،، رجع راسه لوره يبجي
صار يحجيلنه اشلون صارت العركه ومثنئ اصلا ماجان موجود بساعه الصارة الهوسه بين احمد وحسين بس احمد من كتل حسين انهزم وبالصدفه مثنئ جان صاعد بسيارة عمي وهو الهزمه

كعدت على صفحه لامه روحي ابجي يباوعلي بقهر
امي كالتله كوم روح يمه لا يسمعون بيك والله يجتلوك اهنااا

احمد،، خليني يمكم ساعه بس اريد انام مرتاح

زينب،، مد ايده الجيبه طلع فلوس مصرفهن ورق دولار بس كلش قليلات مايتجاوزن ال 10اوراق گالها يمه ذني جبتهن بتعبي كلهن حلال والله
جنت اشتغل بالسمج اصيد ويه ولد اتعرفت علي نصيد ونبيع والاحصلهن احولهن ورق اريد ادزهن الكم بس مااعرف ويه منو ادزهن

ام احمد،، ردهن افلوسك الجيبك يمه
الرازق حي حاشه لله يترك عبده محتار
رزقنه من حيث لانحتسب
بيبيتك طلعتلها قطعه ارض ورث واتوزعت عليه وعلى خوالك كل واحد حصته وانشاءالله بس ابيعها نشيل منا نروح المكان بعيد محد يندلنه بي
اريد ترجع لمتنه مثل قبل

زينب،، حجتها امي وبجت صارت تمسح دموعها بشيلتها دنك احمد باس ايدها وحط راسه بحضنها تمسد بشعره واثنينهم يبجون تالي گالتله ناملك شويه حتى تروح لاتضل اهنا

تركته امي ينام بس ابد مااجانه نوم
امي مناطره خاف واحد يسمع بوجود احمد ويجي يكتله من بيت الشيخ

كل شويه ودنگت امي باسته براسه
مهما يكون گلب والده

مره حجتلنه سالفه عن حنان الام
گالت اكو بزمان قبل ام وليدها الوحيد انسجن

امه تسودنت اعلي خلت وراحت تشوفه للسجن
كالتلهم كلشي مااسوي بس اشوف وليدي

وكفت جدام ابنها شافته اشلون متغير من حراره الشمس يطلعوهم يفلشون صخر حفاي بدون احذيه
مدت ايدها الصدرها
طلعت منجل وگصت ثديها وشمرته جوه رجلين ابنها
گالتله وليدي من تطلع بالشمس اخذه وياك دوس اعلي لان الگاع حاره
بعدها وكعت ميته بمجانها جدام ابنها

الله وصه بالام ثلاث مرات لان الام حنانها على اولادها يفوق حنان الاب بقاطات
هي التحبل
وهي التتعب
وهي التربي
وهي التسهر
ماكو احد يصير احن من الام على اولادها

صارت الساعه ب 3الفجر امي كعدته كالتله يمه انهض كوم لاتضل اهنا
كالها يمه مشتهي اتريگ من ايدج
وفعلا راحت امي سوتله ريوگ اكل كانه اول مره يشوف اكل ياكل ويبجي كالها يمه اول مره من يوم الانهزمت احس اكو طعم بالاكل

امي بجت وياه تالي كالتله كوم لاتضل اشرد ولاتجي بعد

وفعلا قبل لايطلع حضن امي راد يحضني ماخليته ابتعدت عنه غمض عيونه بتعب
صاير كلش ضعفان ولحيته شكبرها

خله وراح
انقهرت من شفت امي اتمددت بفراشه تشم بالمخده
كعدت ابجي وياها

ثاني يوم هم الساعه ب 12 بليل اجه متلثم
امي ضلت تلطم گالتله روح لاتجي ولك ييمه دمك مهدوور مابيه حييل للشوغات بعد

جان جوابه خلي يكتلوني حتى ارتاح

صار احمد يوميه يجي من 12بليل ل5الفجر تكعده امي حتى يروح
اسبوع هو على هاي الحاله

سابع يوم امي گالتله ولك يمه لاتجي
الشباب بليل يفترون ع الشارع وخاف واحد يشوفك ويروح يفتن اعليك يم اولاد الشيخ
بس ماسمع كلامها بليل هم اجه ب 12
گالتله امي لاتنسئ توقت موبايلك ويه الصلاه حتى تمشي لاتضل اهنا

كالها اي يمه راح اوقته هسه
تركتهم ودخلت الغرفة اخواتي مااحجي وياه گلبي شايل منه موهينه اسامحه بعد كل القهر الصار بيه بسببه

اول ماحطيت راسي ع المخده غفيت
اباوع هذا گبر ابوي جدامي
وبصفه گبر محفور بس محد مدفون بي
بس الگبر جاهز عبالك واحد راح يندفن بي

فزيت من النوم اباوع الدنيا بيها خيط ضوه الساعه عبرت ال5
طفرت من مكاني فتحت الباب احمد نايم
نسيت كلشي وركضتله اندس بي
احمدد احمدد اكعد كوم راح تطلع الشمس

اول ما كعدته ماانحس غير صوت طلقتين انرمن بالجو اباب بيتنه عرفنه احمد شايفه واحد ورايح مخبر عيالي

خطيه طفر من مكانه متيه مايندل دربه حتى تيه الباب
امي انتهت اتخرمش بخدودها
رجع ليها باسها براسها وراد يمشي التفتلي باوعلي بعيون مليانه دموع

احمد،، ابرني الذمه

زينب،، حجاها وطلع يركض ماكدر ينهزم من باب الحوش
عبر السياج وطفر ع البستان بصف البستان گاعنه الانطيناها للشيخ

امي لبست عبايتها وطلعت الباب الحوش
واني هم لبست عباتي ولحگتها جسمي يرجف
اخواتي كعدن من صوت الرمي مفزوعات
لحضات اشبه بالرعب

امي فتحت الباب اجاني صوت لواء جمد جسمي
وهو يصيح

لواء،، اططلع جباااان

زينب،، احس روحي كلي اختض امي گالتله ولك يمه وليدي مواهنا

اكو وادم ويه لواء واكفين كلمن لازم سلاحه وعمي من ضمنهم بس حسن ماشفته
عمي گالها

شيخ منهل،، نددري خااتل جووه خللل يطللع
كلهاا الوادم شاايفته يجي يمكمم بليللل

زينب،، واحد من الواگفين افتر وره الحوش مالتنه واجه يركض صاح
ولكممم ذاااك النذللل انهززم بجهة الگاااع

اول واحد سحب اقساام وركض هو لواء
رجليه ماتت وامي ركضت وراهم شايطه احسها تريد تفتح صدرها وتضم احمد وتحمي عنهم

الزلم صارت ترمي بالجو عمي ابو مثنئ واكف يردون يطگو دفعو على صفحه
لواء ركض بجهة البستان نسيت الزلم الواگفه
ولحگت امي اركض
من بعيدد
وجان اشوف احمد يركض والموت يركض وراه

لواء لازم سلاحه ويركض بسرعه يريد يلحگ ب احمد
المسافه موكلش بعيده بينهم
لواء وگف

رفع سلاحه وصوبه الجهة احمد
مثل صياد مركز الصوب الفريسه مالته
اول طلقتين رماهن

وگع احمد

يتتتبع