رواية ضحية لمن لايرحم الفصل السادس وخمسون 56 - بقلم زهراء الحسناوي

البارت 40

ضحيه لمن لايرحم

بقلم زهراء الحسناوي

،،،،،،،،،،،،،،،،،،،،،،،،،

أكتب إليكِ ويتملكني شوق قاسٍ، شوقٌ أشعر به كوخزات متتالية، لا تنفك وخزة إلا أن تُسلم أخرىٰ، أجد متعة في تقبل ذلك، الألم القاسي لُعبة مُسلية تنتهي بالوجع، ثم تبدأ لعبة التعافي كلعبة بديلة ،ليس هُنالك ألمٌ واحد دائمًا، نتألم مرتين، مرة نتذوق فيها العذاب ومرة ثانية لنشفىٰ منه...
أشتاقُ لكِ وأنتِ تعيدين سبيبة شعرك المتمردة لشعرك الأسود الكثيف، وحدها تكرر التمرد ووحدكِ تعيدينها لأسْرِك، بينما يحدث هذا بقصدٍ أو بغيره تواصل هي نضالها، بالطبع أشعر إزاء ذلك بالمتعة ، وبالرغم من أن المشهد هذا يحدث كل مرة إلا أنه يختلف عندي دائمًا، يختلف حين ينتهي المشهد بابتسامتك الفاتنة، تورد خديك، و إكتناز شفتيك..
أشتاقُ لكِ وتتمدد المسافة بيننا، أجدني أطارد ذكرياتك عِوض الإمتلاء بك، أطاردُ البُعد عِوض اللقاء، أحتضنُ الليل ويفضحني النهار...
أشتاقُ لكِ ويبدو الوقت بطيئًا حينما يتعلق الأمر بلقائكِ، بدأ لي ذلك كأمنية وحيدة يتيمة، تتخلل ثناياه، تنتهي كل الأمنيات حينما تكون هي الحقيقة...
أشتاقُ لكِ، ليديكِ الباردتين، أجدني اَحتضنهما بكفيَّ، أحسَّهما، يسري فيهما حبٌ عظيم، يمتلئان، يرتجفان، أفرد أصابعي بينما يتسرب الهواء منهما كأن شيئًا لم يكن يحدث،
ابتسم بفتور!!!،
رباااه ، كيف لكل هذا المشهد ألا يحدث؟؟

ذياب

غصون،، جمدت بمكاني واني اشوفه اشلون سد الباب واتقرب مني بكل هدوء كانه هذا الهدوء الي يسبق العاصفه

الموبايل بيدي وجاري الاتصال
بدون كلام مدلي ايده بمعنى انطيني الجهاز
وبدون تردد بدون وعي من الخوف مديت ايدي سلمته الموبايل رفعه يستمع للطرف الثاني فتح سبيكر
انرفع الخط

غريب،، هلا بسورها ونورها يابه ليش غالقه الجهاز موشليتي حالي

غصون،، ذياب عاگد حواجبه ويباوعلي بنضره تشتعل غضب
نزل الجهاز ونهئ المكالمه بدون اي كلام

مشكلتي من اشوفه كل جزء بجسمي يفقد السيطره من الخوف لان ذياب مايتفاهم وسريع الغضب
توني ردت احجي وافهمه بس ماحسيت غير راجدي نزل على خدي وگعت بالگاع احس توازني اختل

لزم شعري ورجع وكفني كدامه ومره الثانيه ضربني
وهاي اول مره ارفع صوتي بوجها اريد افهمه
صرت اصيح والله ماااعرفه بسس ردت اشووفه منوو

ذياب،، ووولج كااافي شنووو ااانتي؟؟
ابوووج ماانطااج تربييه؟؟
تخلينيي اطلع تصعدين ادورين ع الجهااز

وللج كم يووم اختبررج واكوول هسه تبطل وتخيب ضني تگعد وتسكت
بسسس ماابطللتي

غصون،، كل كلمه يحجي يضربني بهذلني
على صوتنه صعدت عمتي تركض
تريد تسحبني من ايده ماتگدر

فقد يضرب وين مايلوحني بااي مكان
اخر شي ضربته اجت بخاصرتي وگعت مختنگه بس ارمش بعيوني متمدده بالگاع اباوعلهم
فاتحه عيوني نفس ماكو اشهگ اختنگت

ام ذياب،، يبووو مااتتت البتتت سود الله وجهييي

ذياب،، يطبهااا مرررض ماااتبتييي؟؟
وولج مااتبتي؟؟
الله شحااط برااسج فهمينييي؟؟؟

غصون،، اسمع وارمش بعيوني ويه كل رمشه توگع دموعي شويه شويه اتنفست لان الضربه بخاصرتي بجهة كليتي

رجع راد يضربني عمتي وگفت بوجها دفعته

ذياب،، ماااريدهااا اهنااا خلل ترروح يمم ابووهاااا تخابرر. زللم اهناااك موويمي خللتني طرررن بسوالفهااا
اططلع مناا تصعد تخابر منااا

ييمه مااريدها اهناااا من اليوم ترروح لهلها

ام ذياب،، ياايمه ولك وليدي استهددي برحمانك يمه خل نفهمم شمسوويه مرتتك

ذياب،، لاتگوللين على وحده مثلهاا بدون اخلاقق مرتك لان مااريدها
اطلگهاا وتولي لهلهاا

غصون،، لميت روحي بالگاع مثل الطفل الخايف
ابجي حتى النفس كتمته من الخوف
اخر كلماته كفيلات يخلني اغمض بقوه
، دفع عمتي وجرني من ايدي اوگع ويرفعني يسحل بيه سحول امه تريد تخلصني ماتگدر تحسه مايشوف شي من عصبيته

نزلني الدرج يسحول بيه دفر باب غرفتي
وشمرني

ذياب،، ثوااني ثوااني الج تلبسين عباتج اخذج لبوج الانطاج خبز وماعرف يربيج اريد اشوفه يقبل بسوالف بنتتته؟؟

غصون،، اديه ترجف مستحيل بهاي عصبيته ينطيني مجال ادافع عن نفسي
جريت عباتي لبستها وعمتي ركضت لبست عبايتها مخبوصه ماتعرف شتسوي
رگع الباب بيده وطلع جدامي للسياره
عمتي اجت اتخرمش بخدودها تگلي ماتبتي من بسطج ذاك اليوم؟؟
تالي عافتني وراحت

طلعت واني بدون روح تايها اشلون اكعد وافهمه واشرحله؟؟
لو احجي عمر ماراح يفهمني ولايصدگني لان تركت نقاط على روحي اهواي
بسبب غبائي وسذاجتي وعدم معرفتي وخبرتي

حرگ الدنيه يدگ هورن عمتي طلعت صعدت يمه واني مشيت خطواتي ثگيله كل شويه احس راح اوگع
زمخ بصوت عالي

ذياب،، امششيي حييل فضيهااا

غصون،، فتحت الباب وصعدت دموعي يجرن
اول ماصعدت شخط السياره تحسه راح يگلبها بينه
سأل عمتي بعصبيه على بيتنه گالها بيتهم يم بيتت افلاان؟؟
الضاهر يعرف جيرانه معروفين قريب بيتهم علينه
وصلنه البيتنه صرنه يم الجيران اليعرفهم التفت العمتي گالها وينه بيتهم؟؟

ام ذياب،، ذاك الجدامه حديقه

غصون،، وگفنه اباب اهلي نزلنه كلنه دگ الباب حيل
اسمع صوت امي تصيح اجيينه لان ذياب فلش الباب

من فتحت امي الباب وشافتني اخترعت ماتعرف شتحجي وجهي احس اكو شي يحرگني من دموعي بس وين الجرح ماادري

خطيه امي ماتعرف شتسوي من ارتباكها ابوي اجه يلبس بدشداشته مفزوع

ابوي لونه انخطف من شافني ارتبك
ذياب گاله
حجي هاي بنتك مارهمت عندي

ابوي حط ايده على ضهر ذياب گاله فوت وگلي شنو سوت بنتي واني اكسرلك ضهرها
دخلنه كلنه للمضيف مال ابوي حتى امي اجت يمنه
عمتي ام ذياب شفايفها صارن بيض من الضغط اعرفها صارت تشرب ماي كل شويه تبلل حلگها وهو گعد يهز برجله مبين گاعد على اعصابه.

ابو مثنئ،، احجيلي شنو المسويته بنتي حتى تستاهل كل هذا الضرب؟؟

ذياب،، ليش هي شنو الماسوته؟؟
حجي سوالف بنتك ماتتسولف
سامع انت بالفصليه شلون يعاملوهاا؟؟

غصون،، ابوي دنگ گاله سامع

ذياب،، مايوم حسسناها هي فصليه لان وادم نخاف الله
بااذني سمعتها تگول اني مجبوره على هذا العرس لان احب ابن عمي

غصون،، اني مدنگه ابجي بسكوت بس رافعه عيوني لبوي ولاهمني ذياب خفت ابوي يصدگ وينجلط

ذياب،، سمعتها ترس اذني وسكتت غلست عنها گلت بعدها طفله وموراهقه وماتعرف شنو الحب لان تكون مشاعرها مامستقره
تالي الگاهاا تتصل بي وبينهم رسائل ومكالمات وكلام لو واحد غيري چيله يحط براسها بس اكتفييت بضربهااا لان ماكو زلمه يشوف مرته تحجي وتتراسل ويه غيره ويگدر يلزم اعصابه ويفكر بعگل

رغم هذا الشي وهم گلت تابت يجوز ضالمها اخذت الجهاز وضميته وقفلت غرفتي
صرت اسويلها كمين اشوفها تصعد ادور
يوميه اتاكد هي صاعده تريد الجهاز
تالي اليوم كشفتها وهم لگيتهاا تتصل بي

لا انه زلمه شادلي گرون ولاانه زلمه ماعندي غيره على عرضي
مرتي واشوفها تخابر من وراي شتريد اسووي؟؟

غصون،، ابوي مدنگ يستمع لذياب
رفع راسه گاله

ابو مثنئ،، شوف ابني واسمعني زين
راح احجيلك سالفه مو لان هي بنتي اريد ابرأ صحيفتها جدامك بس انه مربيها احسن تربيه
لاهي من البنات اليعرفن كلشي ولاهي من البنات الوشرات ولاهي من البنات الينزلن روس اهلهن
لان اعرف هي شنو واعرف ومتاكد من تربيتي

بالنسبه لحبها ل ابن عمها
گعدت وياها وسالتها ليش هيج حجيتي؟؟

غصون،، ذياب ساكت بس يهز برجله هاي حركته من يصير عصبي

ابو مثنئ،، ليش تسكت يابويه؟؟
كعدت وياها وسالتها منو هذا ابن عمج واشلون تحجين هيج شي؟؟

اني راح اجاوبك
اولا غصون ماعدها اختلاط ب اي واحد من اولاد عمامها
اخوي الجبير اني اخو ماشايفه ولاشايف اولاده ولامختلطين بيهم هاي نقطه
اخوي الزغير ماعنده غير احمد وهذا رابين سوه هو وبت عمه ابصملك بالعشره مابيناتهم شي
بس بنتي واعرف اطباعها من تنقهر تجفص وتحرگ الاخضر واليابس
هاي النقطه الثانيه
اما بالنسبه للرقم والاتصالات والرسأئل
هسه انه وياك نروح نزور ابو الحسن علي
وناخذ غصون ويانه وامك وامها ونروح واريد اشمرها جدامك يم الشباج مال امير المؤمنين تلزمه وتحلف واني ابوها اريدها اذا تجذب كون ماتطلع عدله وتمشي على رجليها اريد ابو الحسن يسطرها وهي يمه

غصون،، ذياب دنگ لزم راسه اباوعله خشمه يجري دم
عمتي انخبصت نست روحها جدام ابوي تلطم
ذياب رفع ايده كالها مابيه شي
ابوي جر باكيت الاكلنس حطه جدام ذياب سحب منه وحطه على خشمه يوقف النزف عمتي وگفت فوگ راسه خايفه
حجه بصوت تعبان گالها امشي نروح

ابو مثنئ،، ابني مال اخليك تروح بدون مااثبت برائة بنتي مستحيل
انه ماارتاح ولا انت راح ترتاح

تريد مانروح واحلفها جدامك بكلام الله هاي بقت يمك تريد ناخذها نحلفها لو تريد اهنا؟؟

غصون،، وقبل لايسمع ابوي جوابه نهض جاب القران
واجه باسه وحطه بحضنه

ابو مثنئ،، تعاي بويه اهنا

غصون،، گمت اتعثر بعباتي گعدت گدامه هو وابوي باوعلي بنضره مااعرفت افسرها شنو

ابو مثنئ،، احلفي بنيتي خلي الزلمه يرتاح

غصون،، وگعن دموعي موخايفه لان واثقه من روحي والواثق مايخاف لان يدري نفسه على حق ومضلوم

مديت ايدي حطيتها فوگ القران

ابو مثنئ،، احلفي على سالفه ابن عمج

غصون،، غمضت وحجيت بصوت ناصي لان العبره خانگتني گتله وحق القران لا احب ابن عم ولاعندي علاقه ويه اي شخص وصاحب الرقم لااعرفه ولادازتله صوري ومااعرف منين جابهن

نزلت ايدي هو صافن بوجهي

ابو ذياب،، سمعت بااذنك؟؟
كلام الله مو. شويه واذا اتجذب اريد الله مايخليها الباجر وهي وحيدتي وشعرة گلبي بس انه ادري بيها ماعدها هاي السوالف

غصون،، ذياب تركنه ونهض متخربط كلش بحيث اول مانهض لزم الحايط
دنگ جر كلنس جديد اخذه وطلع عمتي طلعت تمشي وراه المره مدوهنه تبجي

من راحو شمرت روحي بحضن امي ابجي بحركه جسمي كله يون
ابوي طلع وراهم وصلهم للباب ورجع
عدلت كعدتي گتله يابه وداعتك ماكو هيج شي

اجه كعد يمي جرني الحضنه

ابو مثنئ،، تره ادري بيج شنو لان واثق منج بس ردت ابرد گلب زلمتج من حلفتج
انه خليتج اهنا بين مايهدئ وبيدي اردج اله
تدرين ليش؟؟

غصون،، مسحت دموعي ورفعت راسي

ابو مثنئ،، لان اريد اشوف فرحتج من تجيني اتكولين الله طلع حگي من الاتهمني باطل
وساعتها لاهو ولاعشيرته يگدرون يقنعوني اخليج عده اطلگج منه واخلي يتندم ع. السواه اريده يحس بقيمتج من يخسرج

غصون،، ابوي گال ل امي اخذيها تغسل وترتاح
امي تبجي وتدعي على احمد لان هو الوصلنه الهاي الحاله

رحت للحمام امي جابتلي ملابس من ملاتي القديمات انطتني رادت تفوت وياي كتلها مابيه شي اني اسبح

دخلت للحمام وسديت الباب وره الباب مخلين مرايه جبيره اباوع وجهي شفتي مشخوطه وجوه عيني وارمه
انهضمت من ذكرت اشلون ضربني بدون رحمه
مااعرف اشلون غسلت وطلعت فتت الغرفتي القديمه امي لگيتها فارشتلي

اتمدتت وامي نامت بصفي حطتني بحضنها
بجيت من كل گلبي لمن تعبت وغفيت
ماگعدت غير الساعه 3الضهر كعدتني امي كالت اكعدي اتغدي
هزيت راسي كتلها مااريد

ام مثنئ،، بنيتي لاتشلعين گلبي والله كاعده على اعصابي كومي يمه اكليلج لگمه ويه ابوج كاعد ينتضرج

غصون،، دفعت الغطه ونهضت رحت يم ابوي شفته كاعد ماماكل باوعلي ابتسم

ردت اكعد كدامه اشرلي كال كومي اكعدي بصفي
نهضت كعدت بصفه صار يسويلي لفات صغار وينطيني كل لگمه اكلها ابلع الغصه وياها

ماكدرت اكمل لكمتين امي لحت حتى اكل بس ابوي كالها خليها براحتها
نهض وكال الحگيني للمضيف

رحت وراه لگيته يم الميز مالته ميز صغير يخلي بي كتب ابوي يحب يقرأ بس اني مااحب القرايه والكتب واكره المدرسه كتلت روحي اريد ابطل ومن شافوني مالي رغبه ادرس بطلني ابوي مع العلم اني ناجحه من الثالث متوسط

ابو مثنئ،، اسمعيني بويه بغض النظر عن كل الصار
ومن كلام زلمتج الغلط راكبج من ساسج الراسج

غصون،، ردت احجي قاطعني

ابو مثنئ،، غصون بويه تره انه موغريب عنج ومااعرف تصرفاتج؟؟
اكو مره تكول الزلمتها احب واحد غيرك؟؟

خل اسولفلج سالفه
انه گبل بشبابي جنت احب بنت عمي واموت عليها
خطبتها الف مره وبكل مره ترفضني إلى أن صارت شغلت اعناد لو اني لوهي
اريدها بكل الطرق گلت اجيبها يمي وبمرور الوقت تتعلم عليه وتحبني
وغصب عنها نهيت عليها ماخليت واحد يوصلها
كتلهم اليوصل حدها اكتله بنت عمي الي وماانطيها

وفعلا اخذت السيد وابوي والتمو عمامي وعقدت عليها ب اذني اسمع صوت شهگتها من وره الباب تبجي مارايدتني

من عصبيتي ماكعدت وياها وعرفت وفهمت منها شنو سبب رفضها
من عقدنه اتندمت لان اتسرعت لان الزواج مولعبه عشرة عمر

اسبوع كامل ماعندي اي لذه بالفرح جان المفروض اكون بقمة سعادتي لان واخيراحصلت ع الانسانه الحبيتها
رحتلها بعد اسبوع لمن هدأت
كتلهم اريد اگعد وياها وحدنه وفعلا اجت كعدت جدامي

كتلها راح اسألج سؤال وجاوبيني ليش رافضتتي؟؟

سكتت ماجاوبت بس بجت وشگت گلبي
رفعت راسها گالتلي اذا حجيت اخاف تكتلني

گتلها صح عصبي بس مااتوصل بيه السالفه امد ايدي عليج لان ماجنت متصور الشي الراح تحجي
حلفتني انطيها الامان حتى تسولف
حلفتلها وطمنتها

حجت كلمه كفيله تخليني انسان ثاني مايشوف جدامه نسيت الحلف ونسيت كلشي
من گالت احب واحد ثاني

وحدنه والمضيف خارجي بعيد عن البيت
محد يسمعنه فقدت وضربتها لان ماكو رجال يحب بصدق وعنده غيره على مرته يگدر يسمع منها بلسانها اتكول احب واحد غيرك لان هلشي يحسسه بنقص برجولته

جزت روحي منها وربي بنفس اللحضه خلاني ندمان لان خطبتها واتسرعت تركتها وطلعت وبنفس اليوم كتلهم مااريدها وفعلا طلگتها وراحت بحال سبيلها
لان موسهله اجيبها يمي بس گلبها عد واحد ثاني ماكو زلمه يقبلها على روحه
بنيتي السالفه موسهله من تگليله اني مااحبك واحب واحد ثاني
اكو زلم تتصرف غير تصرف واهواي يكتلون نسوانهم خلاص بسبب غيرتهم يصير مايشوف جدامه

ادري جذب ماتحبين واحد بس ردتي تقهرين الشخص الغثج وهاي النقطه بالذات اريدج تفسريها الي ليش هيج حجيتي حتى افتهم

غصون،، كعدت احجي ل ابوي كلشي بخصوص الصار
اهلي عدهم علم ذياب عقد على نور من زمان اتصلت باامي وحجيتلها بس لان مجتمعنه يصادر حقوق المره فقط لان هي مرأه مالها حق الاعتراض وخاصتا اذا فصليه تكون حقوقها متصادره من جميع النواحي

ابو مثنئ،، مبينه مؤامره منهن بس لتصدگين الله ينسه عبده ولابد يجي يوم تنكشف بي الحقيقه وتطلع الشمس ع الحرامي

الاطلبه منج تبنين نفسج بنفسج هسه انتي مره متزوجه كل كلمه محسوبه نقطه عليج الصالحهن

غصون،، نهض ابوي جاب مجموعه كتب اختارها من بين كثير كتب عنده
حطهن گدامي شلت اول واحد كان كتاب لزياده الثقه بالنفس وكتب عن كيفية التعامل وبناء شخصيه قويه
واكو كتاب للامام علي عليه السلام اسمه نهج البلاغة واكو كتاب اسمه ميزان الحكمه

گتله يابه تدري مااحب اقره

ابو مثنئ،، اقريهن بنيتي وراح تشوفين الفرق بتفكيرح وراح تعززين ثقتج بنفسج
انتي جوهره مايقدرج غير اليعرف قيمتج
ناسنه ماترحم يابويه يردون المثلهم ملوثته الدنيا بس المثلج يتنمرون علي لان بعده خام وابيض گلب مو مثل گلوبهم
انتي احسن من ناس اهواي يدعون المثاليه وهمه بالاصل لا شي

ديري بالج تقارنين نفسج بغيرج واتگولين هذا يفهم واني لا
لان اذا قارنتي راح تخسرين اعتزازج بنفسج
لتتصورين اكو شخص حياته كامله وحتى اليدعون الكمال والكمال لله وحده عز وجل ذوله تلگيهم يحسدوج على بساطه تفكيرج وصفاء نيتج وفطاريتج

خلي عندج ثقه بنفسج وخلي هدف جدامج يحفزج توصليله وتنجحين اني راح احطلج الهدف وانتي اسعي حتى تحققين هذا الهدف
هدفج راح يكون برائتج اثبتيلهم انتي عكس الشافو تماما وساعتها وداعتج عندي لو تثالث الدنيا مااخليج عنده لو ادفع حالي ومالي مااتركج يوم واحد على ذمته حتى خسارتج تكون اله عبره ودرس يتعلم منه مايتسرع وموكلشي ينحل بالضرب وعدم التفاهم
اذا خليتج يمي وطلگج حاليا شوفي شراح الناس تحجي؟؟
نفسهن السببلج المشكله راح يشوهن صورتج جدام الناس وراح يكولن طلگها لان شافها تخابر غيره وتخونه
اني اريدج اطلعين من ذاك البيت ورايتج بيضه

غصون،، اهواي شرحلي ابوي احس نفسيتي ارتاحت لان فعلا اريد اتغير اريد اثبتله ماكو هيج حجي
مو حبا بي لان ماعدت احس اكو مشاعر اله بداخلي كلشي مات بسبب ضربه وتصرفاته

بيومها للصبح مانمت جسمي كله يوجعني رفعت ثوبي الضربات صايره بنفسجي جسمي مليان منهن
غصب عني نزلت دمعتي وحلفت ادفعه ثمن كل ضربه واهانته

ثاني يوم الساعه ب 10ابوي گال حضري روحج اخذج لعيالج ولتنسين اقري الكتب حتى تستعدين المواجهتج وياهن حتى تكونين قويه مومن اول نزاع تنهارين

امي ابد ماقبلت بجت كالتله خل يطلگها
جاوبها

ابو مثنئ،، ترضيها يطلگها والوادم تگول عني ابو مثنئ ماعرف يربي بنته عدل؟؟
اني اريدها ترفع راسي بروحتها هاي ولتنسين غصون بنيتي الوحيده وعزيزه گلبي موهين عليه اردها الهم

غصون،، لبست عباتي وشلت علاگة مال الكتب اخذها ابوي مني طول الطريق اكو خوفه بداخلي بس من اذكر كلام ابوي اتشجع

وصلنه للبيت من بعيد شفت سيارته بالباب موجود رجع تملكني الخوف وبين على وجهي

ابو مثنئ،، دائما خليج قويه لتخافين اني وياج خطوه بخطوه

غصون،، جر راسي باسه وصلنه الباب بيت عيالي
نزل ابوي واني وراه مدنگه دك الجرس دقايق طلع ذياب
ما تفاجئ من شافنه لان يدري ابوي راح يردني
ابوي سلم علي بكل احترام ولا كأن صاير شي
گاله هاي بنيتي جبتها الك بيدي لان ادري هي الغلطانه بس خلي ابالك شغله بيوم الي ربك يكشف الحقيقه راح اسحبها منك ولو تترس مضيفي شيوخ مااردها

ذياب سكت وابوي اشرلي ادخل للبيت دخلت وتركتهم لان ابوي ماقبل يفوت للبيت
اول مادخلت صارت بوجهي ساره وعمتي

تفاجئن بجيتي عمتي مدنگه تشتغل باوعتلي ودارت وجها بس ساره سلمت عليه وهم وجها ثگيل لزمتني من ايدي دخلتني الغرفتي اول مادخلت غمتني

ساره،، ارتاحيتي من عميتيها للسالفه؟؟

غصون،، دنگت كتلها جا سوي ردت دليل اقدمه لخوج

ساره،، خوش دليل زين مامات البارحه
والله للصبح كاعدين كل شويه ونزف خشمه من وره غبائج كتلج مالج شغل اني انبشها واطلعها شكو رحتي ادورين ع الجهاز وفوگاها
ثبتي السالفه علئ روحج؟؟

غصون،، عمتي صاحتلها تركتني وطلعت
ابد ماطلعت يمهم
ضليت خاتله بالغرفه

ساره جابتلي غده مااكلت كتلها مااشتهي
الوحيده التعرفني ساره تحسها تباوع وتحس شنو بداخلي بدون مااحجي

بليل جابت عشه كعدت وياي كالت اكلي ولاتهتمين
باجر ربج يضهر الحقيقه المهم انتي مظلومه موظالمه دائما اذكري هذا الشي

بس ارجع واگول انتي الغلطانه
من البدايه انطيتي مجال يستهان بيج
ولج صيري قويه الدنيا تريد واحد ذيب لان الفقير المثلج ينوكل
غصون انتبهيلي وشيلي المطي الاثول المدد بدماغج

ودائما قبل لتحجين اي كلمه ادرسيها عدل وفكري بيها زين ادرسيها من كل الجوانب حتى ماتتسجل نقطه ضدج
الامام زين العابدين عليه السلام يگول اتمنى ان لي عنق كعنق البعير حتى افكر بالسالفه قبل ماانطقها
يعني الكلمه قبل لاتطلع من عدنه لازم ندرسها نفكر بيها ونفهمها يالله نحجيها

والله انقهر عليكم انتي ثولج دمرج واخوي غضبان على گولتج عصبيته راح ادمره
كون تصعدين تشوفين غرفته ماخلئ شي صاحي بيها ذياب مدمر دمار ضايع بين الصدق والشك
والله هو حجالي ولج انقهرت علي موعليج لان انتي مضيعته من ايدج بسبب سوالفج
هسه شتكولين تصعدين تتفاهمون؟؟

لا عزاا الافضل لاتصعدين لايشمرج من فوگ السطح
ولج يمصگوعه زين ماحط طلقه براسج بساعة شيطان شيرحمج من حجي الوادم؟؟
وخاصتا وادمنه صارت عدها القال والقيل اهم من الاكل والشرب عدهم يمكن حتى من تموتين هسه يكولون الله اعلم يمكن شاف واحد وياها وكتلها

غصون،، وين شاف واحد وياي؟؟

ساره،، شوفيلي اكو شي يمج وراج؟؟

غصون،، هزيت راسي كتلها مثل شنو؟؟

ساره،، طابوگه افشخج بيها وانعل ابو الحمار الفاطس بعقلج

ولج بابا قصدي رجال غريب يمج
اني مره مامتحمله تفكيرج الله يساعد اخوي عليج

بس صدگ شعجب رجعج ابوج اني گلت بعد مايرجعوها من حجتلي امي

غصون،،سكتت ماحجيت

ساره،، مبينه وراج سالفه شكلج مايطمن

غصون،، اني متاكده يجي يوم وتنعرف السالفه ومنو جان وره الرقم
بس بذاك الوكت مستحيل ابقى دقيقه وحده يم اخوج

ساره،، قصدج يطلگج؟؟

غصون،، هزيت راسي بمعنى اي

ساره،، ماطلگج البارحه وهو بقمة غضبه
تردين من تثبت برائتج تطلگين؟؟

غصون،، ماجاوبت اكتفيت بالسكوت
بعدها اجه رجلها اخذها وراح

ابتعدت نهائيا هلمره عن ذياب لااشوفه ولايشوفني
من يطلع للدوام الصبح اطلع اساعد عمتي
صح وجها رجع ثگيل بس مرات من احجي تجاوبني

من يجي وقت رجعته للبيت ادخل غرفتي مااطلع ابد
بس عمتي گالت كل شي يخص ذياب عليج ملابسه تنضيف غرفته وكلشي يخصه

مااحجيت وصرت انفذ من يطلع عمتي اتگلي اصعدي
للغرفه نزلي ملابسه اغسليهن ورتبي افراشه

اسبوع ماشفت لانور ولاعذراء اسمع عمتي تحجي
بالتليفون ويه عذراء ومبينه اكو مشكله وماتكدر تجي يمنه

الضهر وره الصلاه عمتي راحت تشوف اختها
دخلت غرفتي لان وكت رجعته ومااريد اتصادم وياه وتالي تصير عركه شكبرها

شويه وسمعت صوت سيارته
من يكون بس اني وياه بلبيت ارتبك
رجعت المكاني اخذت كتاب نهج البلاغه وگعدت اقره الهي روحي حتى ماافكر بوجوده

انفتح الباب رفعت راسي شفته دخل وسد الباب

يتبع

اشلونجن بعد عويناتي
بنات وربي وداعت بناتي ايدي فد مره ذبحتني الدرجه اعصابها تتحرك واني نايمه
مااصدگ تنتهي الروايه واخذ ريست كللللش طويل بسبب التعب التعبته بهاي الروايه
انشاءالله راح انزل بارت لغصونه اختي ساعدتني نصه هي كتبته لان مااكدر
تره اذا اتفكرون احنه مااخذنه استراحه بين الجزء الاول والثاني غير خمس ايام ورجعنه من جديد الشد الاعصاب

اذا تحبون ماعندي مانع اختم الروايه ابارت طويل اذكر بي فقط الاحداث المهمه واترك الباقي اذا تشوفوني دااطول عليكم
واذا تتحملون اخيتكم انتضروني كم يوم بين ماترتاح اعصابي وارجع اكملها وياكم وهي مابقالها غير يمكن 15بارت وتنتهي
فحرامات اضلمها بالسرد خلونه نغوص باادق تفاصيلها حتى مانترك ورانه علامه استفهام على مشهد مبهم وماله تفسير او ماذكرنه خلال السرد
احبكم اهوايه اهوايه ربي لايحرمني منكم واندعولي كون ماعندي تليف بعصب ايدي لان اذا تلف معناها عمليه واني اجبن من اسماعيل ياسين 😭

وربي اذا استعجلت وختمتها راح تروح عليكم متعة كشف الحقيقه اريدكم تستمتعون باادق التفاصل الحلوه بس انطوني مجال وحاليا كلفت وحده من الكاتبات تساعدني
لان هذا البارت اختي كتبت نص الاحداث
وهي هم عدها طفل ماتلحگ