رواية ضحية لمن لايرحم الفصل السادس والعشرون 26 - بقلم زهراء الحسناوي

البارت 19

ضحيه لمن لايرحم

بقلم زهراء الحسناوي

،،،،،،،،،،،،،،،،،،،،،،،،
خسرنه اول خساره وگلنه تتعوض
وخسرنه الثانيه وگلنه العتب ع الحض
ماظلت بعد حجه
شبعد ياروحي نترجه؟؟
هاي الثالثه وبيها السكوت افرض

،،،،،،،،،،،،،،،،
زينب،، جسمي كله يختض من المنضر الشفته
الولد عدل نفسه درا وجها وانطاني ضهره مدنگ وحاط ادي اثنينهن على وجها فشلان مني

اما جنه عدلت نفسها ولاكأن اني شفتها بهذا الوضع
دارت وجها للولد لزمت يده اطمنه مااعرف شتحجي وياه
دفع ايدها وراح
من شافته عافها اجتني بسرعه جرتني من اردان ثوبي اريد اسيطر على اعصابي مجاي اكدر موهين تشوف هيج شي كدامك وخاصتا هاي اول مره

جنه،، شكوو اجيتي

زينب،، لي ليش؟
ردت اگلها ليش هيج تسوين واهلج ناس معروفين والهم سمعتهم بس الساني متخشب مااكدر احجي
ماحسيت غير جرتني من شعر راسي منوره الحجاب
قربتني يم وجها

جنه،، اسمعي وللج
الشفتي تنسي مااشي؟
اذا فكرتي تحجين لو تفتحين حلگج بحرف
وروح جود الوف السالفه عليج واكول لكيت واحد وياها
وانتي تدرين بمنو راح يصدگون؟
اكيد يصدكون بيه
وانتي تدرين بخالي لواء اشلون عصبي ومايتفهم ابسط شي يسوي يدفنج وانتي عدله ف الاحسن ياحبابه صمي حلگج ولاتفتحي ابد مفهووم؟

زينب،، دفعتني عدلت حجابها وصدر ثوبها ولاجن مسويه مصيبه لا والمصيبه الاكبر منها عدها استعداد تتهمني وتشمر مصيبتها براسي

عدلت حجابي بس وضعي فد نوب متخربط صرت حتى اخاف من جنه أكثر من قبل بقاطات
لان التسوي وتخون ثقت اهلها كلشي اتوقع منها
انوب خفت لاتكول لكيت واحد ويه زينب وساعتها اني اليذبحوني بسبب هاي النجسه

هي مشت جدامي للحوش واني وراها اخط برجليه منضرها تارس دماغي
معقوله اكو هيج بنات ينطن نفسهن بالحرام بدافع الحب؟

هو لواء زلمتي استحي ابدل جدامه ولحد الان مااحس روحي عندي مشاعر اكنها اله
احسه شخص عادي فقط احتمي بي
مو انوب هاي لاهو خطيبها ولازلمتها واليشوف وضعهم بذيج الحاله يفكرهم متزوجين

وصلنه للبيت هي راحت البيتهم واني صعدت للغرفه
اريد اسبح وارتاح
دخلت الغرفتي كعدت بالكاع حاطه ايدي على حلگي
يعني شوصف مااحس يوصللكم شعوري بذيج اللحظه رفعت اديه كدام وجهي اثنينهن يرجفن
دخيلك ربي طلعها من بالي

نهضت للحمام سبحت وطلعت
فتحت الثلاجه اريد اخذ ماي
وجان الگاها تصفر كلشي مابيها
فااارغه

ضليت صافنه المسواگ وين راح؟
زين اني اذا انزل المن اسأل؟
كعدت وسكتت بمكاني بس مقهوره
هم مقهوره من سالفه جنه وانوب ذني الماخذات مسواگي

رحت للكنتور اتذكرت لواء گال من اوصل اخابرج
طلعت الجهاز لگيت ٦مكالمات لم يرد عليها
رحت قفلت الباب خاف وحده تجي
ورجعت دكيت على رقمه ماكو ماجاوب
خمس دقايق ورجع هو اتصل
جاوبته

لواء،، هابويه وين جنتي؟

زينب،، ج جنت بالكاع نخوفر

لواء،، ومنو گالج اطلعين؟

زينب،، ام جنه هي كالت

لواء،، واذا گالتلج ااام نعااله
اكووو عمال يطلعوون انتي شكووو؟؟

زينب،، م موبس اني
جنه وغفران وبعد اثنين نسوان

لواء،، مرره الثانيه لو ابوي يكلج اطلعين لااطلعين مفهوووم؟؟

زينب،، نهئ المكالمه خلاني بحيره
هو يرعد واخته ترعد فوگ راسي احتاريت شسوي

تالي رحت اتمددت اريد انام اغمض تصير جنه كدام عيني منضرها ماجاي يفاركني

غمضت حيل تعبانه وضهري كتلني لان اهواي اشتغلنه بالكاع كلت بلكت انام ارتاح
تالي ماحسيت غير الباب اندفر طفرت عبالي هجوم
فاتت نذيره

نذيره،، شنو عيني شو صايره لاابالي؟
بس موصوجج صوج اخوي الانطاج مجال وكوه عينج

زينب،، ردت اكلها بدل مامتناصبه وياي روحي اقري قران واهدي بثواب ابنج بلكت الله يكفرلج عن اخطائج
بس سكتت ادري بيها اذا حجيت تذبحني

كتلها والله تعبانه ضهري كتلني

نذيره،، ويطبج مرض كومي سوي عشه وردي انخمدي كون نومه بلاكعده انشاءالله
بومه مامنوراج بس المصايب

زينب،، سبحان الله بنادم يشوف بس اخطاء غيره ومايلتفت لاخطائه وعيوبه
بدل ما ماحاطه گورها وگوري جان شافت بتها شتسوي من وراها بس هذا بنادم گدرته ع الوادم وعياله مايگدرلهم
طبعه بس يشوف عيوب غيره ومايلتفت لعيوبه
وكل شخص يعيب ع الناس تلگاه مليان عيوب من ساسه الراسه ومثل مايخذ عرض العالم
الله سبحانه وتعالى يسلط علي ناس تاخذ عرضه

نزلت رجليه بالكاع كالت
نذيره،، تره اني اخذت المسواگ البثلاجه ثلاجتنه فارغه ونسيت اوصي يجيبون مسواگ

زينب،، عافتني وطلعت
لبست حجابي ونزلت وراها
لكيت جنه بالمطبخ وحدها

وكفت بصفي

جنه،،سوي نواشف اكل واكو كاسه روبه اخبطيها بدولكه مشتهيه لبن

زينب،، متخوصره وتتامر تحجي وياي باستهزاء كوه كاتمه ضحكتها اعرف بيها تريد تستفزني حتى اتعارك وياها وساعتها اتكول شفت واحد ويه زينب
اتعجب علئ ملتهن دخيل الله
اتكفيت شرها وسكتت لان مااضمن اذا حجت يمكن حتى لواء موبعيده يصدكهن

عبرت من يمي مشيتها مبينه مال وحده مستخفه
ابد ماتعجبني تصرفاتها
الابنبه الموراحه مع احترامي للزينات من تصرفاتها تبين ذيج وينها اتگلك اني موراحه
اجت نذيره فتحت المجمده كوه تنسد مليانه مسواگ مجمد بس هي بعنادي اخذي المسواگ من ثلاجتي حتى ارجع مثل قبل بحصره الخبزه

طلعتلي علاگه لحم مثروم حطتها يمي ع السنگ
وراحت فتحت الثلاجه طلعت بتيته

نذيره،، سوي مخلمه لحم وبتيته وموتكثرين ملح

زينب،، سويت مثل ماگالت بس من كملت طبخ
صعدت اصلي لان دنيه مغرب
من كملت صلاه ونزلت شفتهن يصبن عشه همه هيج حالتهم يتعشون بعد صلاه العشه
اباوع نذيره ترست المواعين ترس
والطاوه فارغه
والله تعشيت بس الحكاكه مال المخلمه الاجعه بجعب الطاوه وياها خبزه
خليتهن بصينيه وصعدت الغرفتي

نذيره بيها حاله لان يتعشون من وقت يجوعن نص الليل مثلا ب 11بليل يرجعن يتجوعن
يحمن الاكل وياكلن ف اليزود من عدنه تاخذه كله البيتها

كملت عشه ونزلت لگيت المواعين فارغه ع السنگ ياكلن ويعوفنهن اني اغسلهن
هم رجعت صرفنت ارداناتي وبديت اغسل بالمواعين احس رجليه غدن خيوط مامرتاحه من ال6الفجر لسه افتر هي بس شغل الگاع يهلك هلاك

كملتهن وصعدت حطيت راسي ع المخده وبسرعه غفيت نعسانه
مافزيت غير ويه صلاه الفجر
طلعت توضيت وصليت سمعت صوت نذيره
بمجرد اسمع صوتها گلبي ينقبض
فتحت الباب وفاتت

نذيره،، زين كاعده المسعده
زينب،، لميت سجادتي ونهضت
نذيره،، ياالله الشمس راح تطلع والمره وبتها هسه يجن
همن اديجن راح يفلت الشلب ونحصد وانتن بعدجن مامكملات

زينب،، بداخلي گلت هو احنه ششتغلنه هو يوم واحد وبنتج ماشاءالله مبينه الكاع على عينها السنه واردها خير وبركه بسبب جنه

كتلها بس بعد وكت خل يكشف الضوه حتى نشوف زين
نذيره،، والله اني كلبي حاس السنه يردون الشلبات على گلوبنه من وراج

زينب،، عافتني وطلعت ركضت بسرعه عندي وصل من الثياب الشگگنهن طلعتهن وطلعت ابره وخيط
خيطت بيدي نگبه (نقاب) لوجهي

حطيت بالگاع وصله فرشتها وحطيت ايدي فوگها اقيس كفوف بسرعه خيطتهن اشلون ماجان بس حتى اديه ماينجرحن
ربع ساعه كملتهن ولبست اتحزمت بعباتي لبست النگبه ونزلتها على وجهي
لبست كفوفي ونزلت بعدها المره ماجايه هي وبتها
فتحت الثلاجه طلعت طماطايه
التفتت محد اكو اخذتلي خبزه
رفعت الخبان مال العبايه حطيتهن بي
حتئ مايشوفنه رفعت الخبان عبيته بحزامي

ادري ذني حقيرات ماراح يخلني اكلي خبزه قبل ماانزل للزرع
شويه واجت المره هي وبتها
طلعت وياهن للكاع والشمس بعدها موكلش طالعه
هنه راحن الجها واني بجهتي مدنگه مايشوفني طلعت الخبزه خليت بيها الطماطايه سويتها لفه وكلتها
امد ايدي جوه النگبه احط اللگمه بحلگي مايشوفني من اكل
كملت احس روحي شبعت بس عطشانه همزين المره جايبه وياها ترمز ماي بارد حاطته ع الفرك(المعبر)

شويه واجو الشباب انتبهت الولد وياهم
بمجرد ماشفته لعبت روحي منه ومن منضره ويه ذيج الجلبه

درت وجهي ودنكت اشتغل نارهم تاكل حطبهم شلي غرض بيهم عزا مايجيبون توائم بنص الكاع طبهم مرض
هي الكاع مبينه راح تنرزق على عين سوالفهم المكسره

لمن كشف الوكت وطلعت الشمس اجت جنه عبالك طالعه عزيمه مونازله للزرع وراح تطمس بالطين
تلهث من النضافه والعطر يهف وراها
نزلت للزرع تتمضحك والشباب يتشاقون وياها

اني محد اتجرأه يرفع عينه ويباوعلي لان محترمه نفسي ومامطيه واحد مجال يتشاقه وياي
بس هي ماخذه راحتها تتشاقه ويه هذا وتغلط على ذاك والله زلم مشوربه تغلط عليهم
وهمه يتمضحكون ردت اروح يمهم واگلهم زينو شواربكم احسن لان مره تهينكم وانتو مكيفين

كل ماارفع راسي اشوفها هي والولد لو واحد يضحك للثانيه لو يتغامزون
طبعا كل الموجودين منتبهيلهم موبس اني لكن الكل مغلس عنهم الضاهر يعرفون اخلاق جنه شنو

للساعه 11هم راح واحد منهم جاب اكل همه وحدهم واحنه وحدنه
اتغدينه ورجعنه للزرع للساعه ب1الشباب طلعو والمره اخذت بتها وردت البيتها لان الشمس تصگع عموديه تحس دماغك ذاب من الحراره وانوب لابسه نقاب ومنزلته على وجهي احس ماكو اوكسجين اختنكت
اني هم گلت دام كلهم راحو خل ارجع للبيت
اتلگتني جنه

جنه،، وين موليه؟؟

زينب،، للبيت

جنه،، والسبط منو يلمه؟؟

زينب،، حاره دخت خلي باجر نلمه

جنه،، ياالله ردي حتى اخلي امي تجي تغط راسج بالزرع
ردددي لمييي

زينب،، رديت للكاع وهي وياي شويه وعافتني هم مدري وين ختلت رفعت راسي شفت نفس الولد عبر من الجها الثانيه
عرفتهم ختلو سوه نفس البارحه ردت اتقيئه

ومنا الدنيا تسمط عفتهم ورجعت للحوش
اتلگتني نذيره بالباب

نذيره،، ياا جا وين جنه؟؟

زينب،، توني فتحت حلگي ردت اكلها بالكاع
اتفاجئت جنه وراي تلهث وجها مطعون احمر
مبينه من شكلها من شافتني ماموجوده اجت تركض خايفه لان تدري امها راح تسألني عليها

عدلت وكفتها جرت نفس وضربتني على متني

جنه،، ادبسززز عافتني وراحت وحدي الم كلبه

زينب،، اشلون لافت السالفه اباوع نذيره عضت اصبعها تتوعد اتكلها ماحطيتيها وكتلتيها جدام الوادم وفوختي گلبي بيها

زينب،، جنه تريد تغير السالفه طلعت بسالفه جديده تسال امها
تالي عفتهن وصعدت للغرفه ذبيت هدومي بالكاع كلهن طين
طلعت ملابس غيرهن اخذتهن وسبحت

مرت الايام واحنه على نفس الوضع
اطلع وياهم من الفجر ومن يحلون العمال جنه تتعمد تضل وتخليني وياها بحجه تلم السبط
حتئ تختلي ويه الولد

14يوم احنه هذا وضعنه نوم ماشبعانه وارجع من الشغل اطبخ الهم واغسل مواعين وانضف
هذا غير العجين والخبز كل يومين اخبزلي معجانه شكبرها واقسمها بعلاليگ ياخذنهن يجمدنه يوميه يطلعن علاگه خبز
لواء اتصل گال اخروني سبوع ثالث لان الاوضاع موزينه وانذار عدنه وبس يخلص هذا الاسبوع انزل انشاءالله
عده. على روحه ذياب 21يوم

احس وضعي تعبانه مدري شبيه
من اكعد الصبح حتى لو ماماكله شي تضل تلعب نفسي واتقيئ بس ماي لان معدتي فارغه
اني ماعندي كل فكره عن المره شلون تعرف نفسها حامل لذلك مافكرت بهذا الاحتمال
گلت يمكن لعبان نفس من التعب والارهاق
ابد مااعرف انو اذا تاخرت الشهريه للمتزوجه معناها اكو حمل والنبي ولا اعرف هيج شي

الضهر اتصل لواء كال اني جاي بالطريق
صعدت رتبت الغرفه حتى لومابيها شي رتبتها
وهويتها فتحت الباب سمعت صوت نذيره تصيحلي يردون اسويلهم غده ردت انزل صار بوجهي حسن مغندب مدري شبي
هو هذا طبعه ماله شغل بواحد عازل نفسه عن الكل

نسيت الموبايل عفته بالكنتور مكشوف يعني التجي وتفتح الكنتور وراي تشوفه

رجعت ضميته بجيب الستره مال قاط لواء

نزلت صارت غرفه ام لواء جدامي كلهم گاعدين بيها الشيخ وام لواء ونذيره وبناتها
عفتهم ورحت للمطبخ اشوف شنو. اسوي غده الهم
سمعت صوت حسن من وراي

حسن،، وين الجداحه

زينب،، مالتفتت بس يمي الجداحه شلتها ودرت وجهي خليتها بيده
انتبهت شايل جلكان صغير وبسرعه اشتميت ريحة نفط

اخذ الجداحه مني وبيده الثانيه شايل الجلكان
فات على الغرفه الگاعدين بيها اهله
دخل وسد الباب

،،،،،،،،،،،،،،،،،،،،،،،،،،،

غصون،، بمجرد ماسمع كلامي رفع راسه متفاجئ
وبلحضه ضحك بصوت عالي
ضليت صافنه مصدومه الهدرجه كلامي يضحك؟

اجه بااتجاهي بهدوء

ذياب،، بشرفج عيدي شنو اتفضلتي؟؟

غصون،، الحجايه لطشت ماتطلع
ماادري ليش من اوگف گدامه اضيع الاول والتالي
حتى كلمتين مااعرف اجمعهن واحجيهن
گتله
ط طلگني

اقترب مني اتراجعت خايفه كل ضني يضربني
صفيت ويه الباب
مايفصلنه شي
انحصرت بين جسمه والباب
رفع ايده يم راسي انتجه بيها ع الحايط
عيونه بعيوني دنگت احس گلبي راح يسكت

رفع وجهي بيده

ذياب،، من بجيتي وگلتي كل الحجي جذب بداخلي اكو شي يريد يصدگج
بس بطلبج هذا ثبتيلي العكس
ثبتيلي فعلا تحبين ابن عمج العار
لوصدگ زلمه جان ماشافج جدام عينه ينطوج فصليه

غصون،، ردت احجي رفع اصبعه حطه على شفتي

ذياب،، اششش
كلشي لتحجين
بس وداعت كل حجايه حلوه سمعتيها مني
تعيشين وتموتين هنا عقابج راح يكون عسير

غصون،، الدمعه بطرف عيني بلعت الغصه ابتعد عني لزمني من ايدي وخرني عن الباب
فتح الباب واشرلي بمعنى اطلعي

صار يتفنن ب اهانتي
طلعت روحي شايطه مايتفاهم ويتعمد يفشلني

نزلت ابجي بقهر ماجاي ينطيني فرصه اشرحله

مرت الايام وذياب ابد مايباوع بوجهي حتى عمتي اتگلي ميخالف وانتي حاولي وياه بلكت تتراضون والمره اصلا ماعدها علم احنه على شنو متزاعلين

ذياب يوم عن يوم يختلف طبعه صرت احس ماطايق وجودي بالبيت

بس مرات يحسسني بعده يحبني

مره اختنگت وانقهررت لان حيل متجاهلني رحت گعدت بالحديقه ع المرجوحه
شفت الجو يخبل اتمددت
نص ساعه تقريبا اني متمدده
اتذكرت تصرفاته وياي مقهوره دمعتي نزلت
اني كاعده بمكان بي ضوه شمعه بالطارمه
رفعت عيني للستاره مال السطح

السطح ستارته ناصيه كلش وبيها مثل حدايد الشباك يعني اليگعد فوك يشوفك ماتشوفه لان انته يمك ضوه والفوگ ضلمه

انتبهت اكو جمره مبينه واضحه بالبدايه خفت كلبي يركض حسبالي دااتخيل لو فد شي ثاني
بس من سمعت نغمت موبايله اتأكدت هذا ذياب بالسطح كاعد يراقبني

من شافني انتبهتله جاوب على موبايله
عدلت گعدتي ونهضت دخلت للبيت
صار بوجهي نازل من الدرج

تركته ورحت للغرفه
بداخلي گلت خلي براحته دامه مامصدگني
اهواي حاولت افهمه وهو قافل
حتى امه اتگول ذياب زعله ثگيل
يشلع الگلب بس بعدين من يهدئ يتندم

عفته براحته اني هم بشر والي كرامتي
حاولت وياه مره واثنين وثلاثه ماحاول يفهم مني لذلك بعد مستحيل انزل كرامتي اكثر

كاعدين نتغده اني وعمتي دخل هو كال السلام عليكم
جاوبت لان السلام لله
تركنه وصعد للغرفه

ادري مايكعد يتغده لان اني كاعده

وره يومين الساعه تقريبا ب 12الضهر
اني وعمتي بالمطبخ هي مشتهيه كسور مال غنم
حاطتهن يفورن ع النار
اندگ الباب راحت هي تفتح لان ذياب منبها محد يفتح الباب غيرها
دخلت للمطبخ وراها عذراء واتفاجئت نور جايه وياها
عجيب امرها ذياب طردها واجت بكل عين صلفه

ادري هاي سوالف عذراء من عرفت اني وياه كل واحد ينام وحده رجعت تحاول تقرب نور من اخوها

ماسلمن عليه اثنينهن ضليت بمكاني گدامي صينيه بيها تمن انضف بي

عذراء،، يمه لعد وين ذياب؟

ام ذياب،، بالدوام بعده مااجه هسه على جيه
انتي اشلونج يمه نور اهلج اشلونهم؟

نور،، زينين خاله وامي تسلم عليج كلش اهواي

غصون،، تتنغوص بالحجي احس الجالي يصعد عندي من اسمع تمضيگها
شويه وجان سمعنه صوت سياره ذياب
نور انخبصت اتعدل بشالها وتاشر العذراء على وجها بمعنئ شوفيني مرتبه
عذراء انطتها الاوكي
هاي كلها كدام عيوني
دخل ذياب بس تفاجئنه بدخول بنيه وياه
وكف بالباب كال اتفضلي
يمه اجاج خطار

دخلت بنيه مبينه خجوله من شكلها
نهضت من مكاني مااعرف هاي منو
حتى هنه ضلن متفاجئات
بس ام ذياب اتلگت الابنيه بملگه حلو وهي ماتعرفها

ذياب،، وهاي الحجيه خبصتيني اريد اشوف امك
هل جبتج ل امي
يمه نازك صار كم يوم تريد تجي يمج

ام ذياب،، ياا يمه هله بيج بعد كلبي

نازك،، تسلمين خاله فدوه الگلبج

غصون،، الابنيه اخذتها ام ذياب للاستقبال وعذراء ونور عبالك واحد ضاربهن على وجهن مثلي تماما كاعدين مثل الاطرش بالزفه
مااتحملن نهضن يردن يعرفن الابنيه شنو علاقتها بذياب
راحن كعدن يمهن اني ضليت بالمطبخ على گعدتي

شفته صعد للغرفه شويه والتفتت نزل لابس اتراك اسود
التفتلي شافني اباوعله دار وجها راح يمهن

اجت ام ذياب وهو اجه وراها

ام ذياب،، يمه فشله روح جيب اكل جاهز
ماادري عندك خطار

ذياب،، انتي شمسويه غده؟؟

ام ذياب،، كسور مال غنم

ذياب،، اووو كلش تمام نازك تحبهن

غصون مدنگه بس اذني يمهم الاخ طلع حتى يعرف شتحب ست نازك

ضلو يتناقشون ع الغده وشنو الترتيبات تالي عافنه وراح يمها للاستقبال اسمع صوت ضحكاته العاليه
احس روحي متت قهر

تركت البيدي غسلت ورحت يمهم لان علئ ساعه انفجر اذا ابقه گاعده
دخلت شفتها ذابه العبايه بس لابسه حجابها
مرتبه نازك واسمها عليها
نازكه الابعد الحدود ترتيب وقيافه وشخصيه

تسولف ويه ذياب ومنطلقين يحجون ويضحكون
دخلت باوعتلي الابنيه بنضره سريعه ورجعت تحجي ويه ذياب

نازك،، ذياب فدوه موگلت نطلع سفره نتونس

ذياب،، اي والله محتاج هاي السفره روحي لعبانه من البيت

غصون،، كاعده واسمع صدگ احس الدم صعد الراسي
احس گمت انفخ نار مو هوئ عبالك تنين وگاعد بنصهم

عذراء ونور بس صافنات نور غدت حمره من القهر مايباوعلها ولامعبرها ابد واني هم نفس حلاتها

كاعدين وصافنين على ذوله الاثنين عبالك بس هَمه بالاستقبال ضحك وسوالف وشقه

صدگ مااتحملت اليندسني ابجي
تالي عفتهم ورجعت للمطبخ
وماادري ليش طلعت حرگتي بالجدوره
بحيث يسمعون بس رگع الجدور طاب وطيب

دخل ذياب

ذياب،، شنو هلصوت علكيفج منا المره فشله

غصون،، درت وجهي بس اريد اتعارك روحي انطحنت طحن
كتله نعتذر ازعجناكم وازعجنه حضره الاميره
اباوعله رفع حاجبه ماعاجبه كلامي

عافني وراح اجت عمتي وعذراء نحضر الغده بس نور بقت يمهم حاشره روحها
حضرنه الغده وصبينه وهلمره اتعمدت اگعد كتلني الفضول اشوف حركاته ونضراته الها
معقوله هاي حبيبته الجديده؟
طلع حبه كله جذب ساعه نور وساعه نازك مدري كوكب خوش عنده گلب تگول تكسي كل شويه مصعد وحده

هو براس السفره كاعد وبصفه الابنيه ونور وعذراء ع الجها الثانيه واني وام ذياب كاعدين مقابيلهم يعني صايرين كدامي
عيوني تشكلت عليهم الابنيه هواي تحشش وتضحك منطلقه
وهو فاطس ظحك اني مدنگه بس احس شعواطي ترس الاستقبال من كثر مامحتركه روحي

نازك،، غصون ليش ساكته من اجيت لسه احجي شاركينه

غصون اني واصله وياي الخشمي وهي تريدني اناقشها رفعت راسي جاوبتها بحده مبينه ضايجه من نبره كلامي
كتلها انتي مكفيه حبيبتي

دارت وجها لذياب رفعت راسي خزرني

نور ابد مافتحت حلگها وعذراء تنافخ ومبينين كلنه ضايجين من الابنيه وبس ام ذياب تسولف وياها وتناقشها

ذياب،، باجر انتي تفصليني غده بمطعم

نازك،، تدلل عيوني الك

غصون،، ماتحملت عفتهم وطفرت من مكاني
درت وجهي يباوعلي

نازك،، غصون وين رايحه اكعدي اتغدي

غصون،، جاوبتها بنبره حاده مبينه اني وصلت وياي حدها منها
كتلها اتغدي انتي اشبعي اني مااريد
عفتهم وطلعت
رحت خليت القوري ع النار جسمي يرجف يرجف
ماحسيت غير دخل ذياب
الباب من دخلت للمطبخ رديته وراي يعني يبين مسدود
دفع الباب بيده بقوه
دخل وسده وراه

ذياب،، شنو تصرفاتج هااي؟؟

غصون،، اغسل بالاستكانات ماباوعله من يحجي من عصبيتي يفلت الاستكان من ايدي بالسنگي

ذياب،، موويااج؟؟

غصون،، التفتتله بغضب
وشسويت؟؟
لازم ازعجت حضره البرنسيسه؟

جرني من ايدي بقوه دفعني ع الباب

ذياب،، لازم غاثج وجودها؟

غصون،، ابتسمت ب استهزاء
وعليمن انغث باالله؟؟

ذياب،، اشوفج مالج خلگ وتحجين معلگ وتشمرين بالحجي گلت خاف مزعوجه حضرتج

غصون،، هه وعليمن انزعج؟
وشلي شغل بيكم اصلا انته وياها ماتهموني

اتقرب مني اكثر بحيث مايفصلنه شي

ذياب،، ادري ماهمج اني وين وحبيب الگلب ابن عمج الساقط وين؟

غصون،، من انقهر اصير اجفص في سبيل ماابين للطرف المقابل انو اني ضايجه

گتله رجائا لتحجي علي
ماحسيت غير شفتي الجوه انجرت بقوه

ذياب،، ماتقبلين علي مو؟
اذكري مره ثانيه وشوفي اشلون اشلعهاا الج

غصون،، احس شفتي خدرت من الالم دفعني عن الباب عافني وطلع
مااتحملت ركضت للغرفه اريد اسكت مااكدر
عيوني يجرن اهفي على وجهي اريدهن يبطلن راح افضح روحي من غيرتي
صرت اريد اذكر شي يضحكني حتى ماابجي

ضليت دقايق مسحت عيوني خشمي احمر مبينه باجيه
رحت للمطبخ غسلت وجهي كملت الجاي اخذته يمهم
الابنيه تحاول تحجي وياي واني مطنشتها

وكل ماارفع راسي اشوفه يباوعلي ضايج من تصرفاتي ومبينه حتى هي حست اني ماطايقتها

نور كل شويه وگالت اني اداوم بكليه الطب الفلانيه
اني هيج واني هيج وتمدح بروحها ونازك ساعه تناقشها وساعه تغلس عنها لان تلغث اهواي

صبيتلهم جاي وانطيته الهم وصلت يمه خليت الصينيه جدامه اخذ الاستكان صارت عيني بعينه
التفت يكمل كلامه وياها

اتمنيت اكوم افشخهم اثنينهم
الابنيه رجعت تحجي وياي واني ابد مويمها مدنگه اصب جاي اسمعها تسألني شمخلصه دراسه
غلست عنها هي مهندسه شگلها اني ثالث متوسط مامكمله؟؟
تركتها تهذري وحدها

صارت الساعه 2ونص الضهر احسها گاعده على گلبي
وفكره وحده براسي شبسرعه حبها لهاي الاسمها نازك؟
احس اعصابي تفور اتمنيت انهض اسحلها من شعرها
كملو شرب جاي اخذت الصينيه لميت الاستكانات وصلت يمها شالت الاستكان مالتها تريد تنطي الي
اخذته من ايدها بقوه لمن وگعت الخاشوكه مال الجاي بالكاع

عفتهم وطلعت بيدي الصينيه
وصلت للسنگ خليتها حيل بحيث سمعو صوتها
رجعت للغرفه مالتي ماعدت اتحمل
ضليت افتر بمكاني
الباب مفتوح شفته صعد للغرفه مالته

مالگيت روحي غير لحگته
فتحت الباب وفتت بسرعه اتفاجئ بدخلتي عبالك شانه غاره ع العدو

حط ادي بجيوبه وانتجه ع الميز

ذياب،، شكو؟

غصون،، رحت وكفت كدامه
بداخلي اريد اكطعه
شفايفي يرجفن من كد ماعصبيه
كتله دير بالك مره ثانيه اتكلي احبج

ذياب،، بااحلامج

غصون،، مبينه الغيره طالعه من اذاني
وكلامه وبروده ينرفزني اكثر
جاوبته تتهنون انته وياها حجيتها بعصبيه
ودرت وجهي اريد اطلع لزم ايدي جرني اله

ذياب،، لازم غرتي منها؟

غصون،، ضحكت بستهزاء
اني اغار منها؟

دنگ المستواي

ذياب، غيرتج فاضحتج

غصون،،اتقرب همس يم اذني

ذياب،، وداعتج لسه ماشفتي شي

يتتتبع

لاشكيت ولاگلت

ولامبين للخلگ ملچوم چني

انه ذاك الضمضم جروحه ويغني 💔

ممكن متابعه للكاتبه ساره
روايتها كلش حلوه اسمها رنس وسياده العقيد

sarahalmajid