البارت 20
ضحيه لمن لايرحم
بقلم زهراء الحسناوي
،،،،،،،،،،،،،،،،،،
وهذاك انت
الولا حسبالك مفارگ
الولاكلفت نفسك تعرف اشلوني
طاحتلك الفرگه
وهاي صار سنين
تشتم الهوى بدوني
واذا جيت اعله بالك لاتود مرسال
انه بخير ماطول انته بعيوني
،،،،،،،،،،
غصون،،تركني ونزل عافني احترگ بناري
نزلت لگيته گاعد يمها الابنيه تحجي وياي واني مطنشتها
حتى التفتت الها ابتسمت بااستهزاء
بينت الها اني مامرتاحه الوجودها
شويه ودگ موبايل ذياب
رفعه جاوب
ذياب،، ها ولك سگط
مو گلت اكمل شغل والحكم نتغده سوه
غصون،، سكت ينتضر الطرف الثاني يحجي رجع كمل كلامه
ذياب،، ولك خطيبتك جرشت راسي بسوالفها تعال اخذها
غصون،، فتحت عيوني على وسعهن وبنفس الوقت احس العرگ اخذني
فشلانه من الابنيه طلعت مخطوبه وتربطهم فقط صداقه
ابد ماتصرفت وياها مثل الاوادم انتر نتر بالحجي
هي ضحكت اخذت الموبايل تحشش ويه خطيبها على ذياب
عرفتهم تجمعهم علاقه صداقه ومبينه الابنيه سبورتيه خرب بحضي
دقايق واندگ الباب حتى مالحگت اعتذر منها
اجه خطيبها من الباب مادخل للبيت طلعتله ام ذياب
مبينه تعرف صاحب ذياب من زمان
واكيد خطيبها عنده ثقه بذياب ويعرف اخلاقه الدرجه يأمن خطيبته تجي البيت صديقه
الابنيه راحت اباوع نور توه رد الدم بوجها وضحكت ومبين اني وياها فضحتنه الغيره
دخل ذياب بعد ماراحت الابنيه باوعلي ابتسم بطرف شفته
حسيت جاي يلعب بااعصابي
رجع صعد الغرفته وعذراء ونور الضحكه شاگه حلوگهن هنه هم راحن واني دخلت للغرفه
ابالي ابتسامته عرف اشلون يستفزني ويحرگ اعصابي
كاعده بالكاع اغم بروحي شبييه موجنت شارده منه شبيه هسه اركض وراه؟
ذياب طبعه صعب موبالساهل ينسه
افكر اروحله واحجيله كلشي بس خايفه
لان هواي صدني
خايفه يفشلني مره ثانيه
يوم يجر يوم وذياب نفس طبعه ماتغير لايحجي وياي ولا يعبرني
نور كثرت جياتها هي وعذراء
والعجيب نور ولاهامها وجودي عبالك ماتشوفني
تلبس وتتعطر عبالك عروس
صرت اضوج منها
العصر كاعدين اني والحجيه اجن هي وعذراء
سوويت جاي وأخذته يمهن
عمتي مره من اهل الله فقيره كلش تحسها خرسه مالها شغل بشي ابد
حتى عذراء من تجيب طاري احد تسكتها اتكلها لتحجين على العالم تشيليون ذنوبهم حرام
صبيتلهن جاي ونور منطلقه تحجي على دلال امها وابوها احسها تتعمد هيج تحجي كدامي
صعب واحد يحجي هيج كدامك
حسيت روحي يتيمه بس الفرق اهلي عايشين لكن محرومه منهم
لاجت الدمعه بعيني خنگتني العبره واحسها اتكسرت بروحي
التفتتلي نور
نور،، غصون الله يساعدج اشلون تاركه اهلج كل هاي المده؟؟
غصون،، ردت اجاوبها بس عمتي سبقتني
ام ذياب،، اي والله يمه صدك شو لاكلتي اروح لهلي لافد يوم سمعتج كلتي عمه خل اخابرهم
ليش هيج عمه؟
تره لاتشوفيني ساكته والله مو ابالي السالفه وهمزين نور ذكرتني
نور،، اي روحي يم اهلج فتره
غصون،، اعرف تريد يخلالها الجو بس فعلا مشتاقه لحضن امي وابوي مشتاقه لخواني الزغار
حتى هيثم مشتاقتله
انكسر خاطري عفتهن وكمت رحت للغرفه
احسها صارت بيت احزاني
كعدت عيوني يصبن احس دموعي حاره تجوي خدي
حلو الوحده عدها اخ تحتمي بي وتحسه سند الها
بس اني من دون البنات اخوي كسرني وخله الرايح والجاي يذلني
اتذكرت زينب اخيتي ورفيجه دربي صار خمس شهور ماشايفتها اتمنى طير وعندي جناح افتر على اهلي وعليها اشوفهم ويرتاح گلبي
نهضت من مكاني مبينه عذيران ونور يتعشن اهنا اتعجب على اهلها منطيها مجال كل يومين ونطت النه مثل القرد لاسداد ولارداد عدها يحاسبها
مسحت دموعي خشمي احمر من ابجي تنگلب خلقتي بحيث بسرعه يعرفوني باجيه
من طلعت يمهن نور گالت ياا ذكرناج ب اهلج وبجيتي
ام ذياب،، يمه روحي يمهم كم يوم شوفيهم وتعاي وهذا تلفوني يمج كل ماتشتاقيلهم خابري
غصون،، اباوع النور التفتت العذراء مدري شبيهن
غلست عنهن وهم ضلت ابالي بلكت اروح يم اهلي
صار المغرب گمت گليت كباب وكبه حضرت الزلاطه والطرشي واللبن وعذراء ونور خانسات ماكامن
وام ذياب من تصلي تتاخر كلللش بحيث ساعه تقريبا ياالله تكمل لان تصلي لرجلها وتهدي بثوابه
حتى كل جمعه تروحله واهواي تقراله قرران بحيث كل فتره تختمله ختمه وتهديها اله
عرفت منها حتى حجه البيت الله مكلفه شخص يحج بمكانه ودافعه فلوس كامله عبالك هي الرايحه
حبيتها لان عدنه الميت بس يطلع الاربعين نسينا كل سنه ياالله نروح نزوره اما هي طول هاي السنين وماتركته ابد
كملت تحضير الاكل داانقل احط بالصينيه انفتح الباب فات استاذ غضبان
مغندب عاقج الگصه عبالك يريد يتعارك
حتى ماسلم واني هم مااهتميت بالي يم روحه اهلي
صعد گبل للغرفه
نور من شافته اجه
بسرعه اجت يمي صارت نادره تنقل ب الاكل عجيب امرها ولاعدها ذره خجل
لابيت عمها ولابيت خالها والنهار كله يمنه
عوود تصير حماة عذراء مثل المثل اليكول اني ابن عم الخياط الخيط بدله العريس
شلنه العشه وهي عينها علي كل مايطلب شغله حطت روحها وانطتها اله
اني كاعده على صفحه بس عيوني تنتقل بينهم
شويه وكالها اشلونج بالدوام؟
رفعت راسي يباوعلها
هي موعبالك سالها
لاعبالك كالها باجر اجيب اهلي واجي اخطبج
الحلگ انفتح اذراع وضلت تناقشه وتجيب منا تحط هنا ماادري اشلون هاي المايعه راح تصير دكتوره؟
يمكن المريض اليجيبو الها حتى لوكان بي امل يعيش من يوصل يمها راح يفطس على ايدها
من يصير هيج موقف كدامي تجنبا للقهر انهض اعوفهم براحتهم
ام ذياب،، يمه وين كايمه ماكلتي شي
غصون،، شبعت عمه رايحه اسوي جاي
عفتهم وطلعت كملت تخدير الجاي وهذا طبعهم
يحبون الجاي كلش صبح وضهر وعصر وبليل كون القوري ع النار لان غضبان افندي يشرب جكاير ف يحب الجاي كلش
شويه ودخلت عذراء شايله صينيه بيها المواعين لحكتها نور بيدها السفره لامتها
وگفن غسلن اباوع نور نفخت روحها عبالك طااوس
ردت اكلها خايبه هو سوال ونفشتي ريشاتج
راحن ولحگتهن بيدي الجاي والقوري والاستكانات
يحبون اكعد واصبلهم كون القوري يمي
صبيت ودفعت الصينيه يم عمتي وهمه اخذوها
فاجئتني عمتي من حجت
ام ذياب،، يمه يبعد امك ماتاخذ هاي المگروده لهلها كم يوم
غصون،، رفعت راسي هو يشرب جاي استكانه بيده ولاكأن سمع كلام امه
ام ذياب،، شبيك يمه ماتحجي ماتاخذ مريتك لهلها تره حرام الله يحاسبك ترضاها انته ماتشوفني خمس شهور؟؟
ذياب، اكيد لايمه بس هي وضعها
غصون،، راد يكول فصليه عرفت قصده بس هو سكت ماحجه
ام ذياب،، دامك ماترضه جا اخذها لهيلتها يومين ثلاثه
ذياب، ماكو روحه
غصون،، عفتهم وگمت لان صدگ انهضمت يتعمد يفشلني ويتعمد يقهرني
رحت للغرفه سديت الباب وكعدت بس احس اعصابي تفور
ماطلعت يمهم بعد ضليت بالغرفه خانسه
سمعت صوت نور تسلم على ام ذياب عرفتهن راح ينگلعن لبيتهن
فاتت عمتي يمي تكلي لاتزعلين منه وذياب وضعه صاير متغير مدري شبي مومثل قبل يضحك ويسولف والمره الحوك هي التتحمل زلمتها
ماحجيت اني لان مخنوگه بعبرتي
بالنسبه اله مايگدر يفارگ امه
بس بالنسبه الي فصليه عادي مااشوف اهلي عنده
عبالك مودم ولحم مثله
حلفت مالي شغل بي ولاحتى اخلي يلمحني
وفعلا صار من يجي وقت رجعته للبيت افوت الغرفتي مااطلع ابد
ومن هو بالبيت احاول مااخلي يشوفني
اسبوع لااني شايفته ولاهو شايفني
من يكملون عشه مرات يصعد الغرفته اروح اتعشه وراه ومرات من يروح يم بيت عمه اكعد يم الحجيه
الساعه 12بليل متمدده بفراشي سمعت صوت سيارته
مثل كل يوم يدخلها للكراج ويصعد ينام
دقايق انتضرته بين مايصعد اريد اطلع للمطبخ
من تاكدت ماكو صوت نهضت فتحت الباب وطلعت على كيف
اتفاجئت بوجوده طلع من الاستقبال حتى هو ضل صافن بوجهي
دنگت وعبرت من يمه بدون ولاحرف
احسه بعده موجود يراقبني درت وجهي مالگيته
جريت نفس براحه بمجرد وجوده يتخربط وضعي اديه وجسمي يضلن يرجفن غير دگات گلبي الي احسهن يوصلن الالف من سرعت نبضاتهن
شربت ماي ورجعت مااحس غير ايدي انجرت
انسحبت للضلام بالاستقبال
ردت اصيح بس عرفته هو من صوته دفعني ع الحايط ايده على حلگي والثانيه وره ضهري لازمني
راد يغمئ عليه حجه بصوت ناصي
ذياب،، اهدي لتخافين
غصون،، اني من الخوف راح انجلط وهو يگلي لتخافين
ذياب،، لان گتلج ماترحين صار اسبوع حاجره روحج بالغرفه؟؟
تتصورين جاي تعاقبيني بهاي تصرفاتج؟؟
غصون،، درت وجهي عنه و لزمت ايده الوره ضهري بعدتها عني
ممكن توخر رجائا
ردت اطلع رجع لزمني ودفعني للحايط
ذياب،، غصوون
غصون،، دنگت احاول مااباوع بوجها ضوه خفيف يجي من الصاله
ذياب فهمني شتريد مني؟
احس حتى هو مثل حالي اثنينه مانعرف شنو نريد
وبلحضه سحبني اله فقط احس بحراره انفاسه وشفايفه
مامستوعبه غمضت عيوني بكل قوتي ردت ابتعد رفع ايده ثبت راسي
مالگيت روحي غير دفعته من صدره
بس تحسه فاصل مااشوف ملامح وجها كلش
شعور غريب اول مره احس بي
اول مره يبوسني هيج
ابتعد مني احس روحي اختنگت
مثل الجان فاقد مايعرف شيسوي
تركني وطلع صعد للغرفه
گعدت بمكاني رجليه يرجفن يرجفن احسهن اثگال مايشلني
حطيت ايدي على شفايفي مامصدگه عبالك بحلم معقوله ذياب الصار ايام مايحجي وياي
باسني؟
انتجيت ع الحايط ورجعت وضعي مخربط
للصبح مانمت اذكر شنو صار وليش هيج سوه اذا مايحبني؟
ثاني يوم الساعه ب 1الضهر عمتي اسمعها بالمطبخ تحجي وياه على روحه اهلي هم رفض مايقبل
شگد حاولت وياه بس رفض گالها سدي الموضوع هسه
شويه وصعد الغرفته ينام لان رجع من الدوام
انفتح الباب دخلت عمتي
ام ذياب،، ييمه مدري شبي صاير مايتفاهم
ادري بيج گلبج طاگ على اهيلتج
والله يبنيتي حطيت روحي بمكان امج الله يساعد گلبها
اني اذا مااشوف وحده من بناتي يومين اضل كلساع مخابرتهن اسمع صوتهن
مو عاد امج صارها اكثر من خمس شهور ماشايفتج ولامحاجيتج
غصون،، هي تحجي واني الدموع اخذتني
اريد اسكت عيوني مايسكتن
صدك مشتاقه احط راسي بحضن امي
مشتاقه اشوف ابوي واخواني
المره من شافتني احس ضغطها صعد انقهرت
ام ذياب،، حضري روحج باجر الصبح من يروح للدوام اني ازتج لهلج واريد اشوف زلمه اليحجي وياي والله اغضب علي اليوم الدين
غصون،، مسحت دموعي مامصدگه وبنفس الوقت خايفه من عواقب هاي الروحه وخاصتا راح اروح بدون علمه
بس خلي هو الجابها الروحه صار ايام نتوسل بي وهو قافل مايقبل
اتفقنه اني وعمتي الساعه ب 9الصبح توديني
هي طلعت واني طايره طايره من الفرح حسبالك باجر عيد عندي
ركضت لميت علاگه خليت بيها تبديلتين الي وكم شغله لان عندي ملابسي يم اهلي
للصبح ماگدرت انام من الفرحه التارسه روحي
صارت الساعه ب5الفجر عيوني ثگلت نعست
بس اني علاگتي مجهزتها وحطيتها بالكومدي
اخذتني النومه لان نعست
حسيت احد يگعدني فزيت شفتها ام ذياب يم راسي
ام ذياب،، اسم الله يمه يالله اكعدي هم ياالله نروح الساعه صارت 9اله ربع
غصون،، طفرت من مكاني بسرعه لميت فراشي وشلته ع الميز
رجعت طلعت العلاگه وعباتي وحجابي حضرتهن
رحت غسلت ام ذياب تضحك اتگلي على كيفج لاتوگعين
رديت للغرفه لبست حجابي وعباتي اخذت العلاكه بيدي وطلعت
ماحاطه ابالي غضبان اذا عرف اني طالعه بدون علمه شراح يسوي؟
اخذتني المره وطلعنه اجرت سياره من راس الشارع
سالتني بيتنه شكد يبعد مسافه عن بيت الشيخ؟
كتلها بالفرع بيت الشيخ صاير ورانه بكم بيت يعني بس نوصل المنطقتنه اندل اهلي
وفعلا بمجرد ماوصلنه للمنطقه احس روحي ترگص
مو مسافه كم دقيقه واوصل لا عبالك بعد ساعات ياالله التقي ب اهلي
اشرت للسايق بمعنى منا فوت وصلنه باب اهلي
ام ذياب اتفقت ويه السايق كالتله ربع ساعه وردلي
الرجال قبل وراح
نزلنه رجليه يرعشن اتمنئ اروح اركض
بس عمتي وياي فشله اعوفها وحدها وادخل
دگيت الباب وگعن دموعي عمتي تباوعلي وتبتسم
سمعت صوت مرتضئ اخوي الزغير بصف خامس ابتدائي يصيح منووو!؟
اريد اجاوبه مااگدر جاوبت ام ذياب
فتح الباب صارت ام ذياب كدامه ماانتبهلي
دار وجها شافني شهگ
صاح يمممممه اجتتت غصووون
ذبيت هدومي من ايدي واخذته الحضني يبجي يبجي ابوس بوجه واثنينه نبجي
امي طلعت مخترعه من باب المطبخ وابوي وراها
جان اللقاء جدا صعب
اداوروني اخواني وابوي وامي كاعدين بالكاع ابوي يحضني يشمشم بيه ويبجي
تسحبني امي الحضنها
تنحب بصوت عالي
نسينه حتى المره العفناها واگفه بالباب
گومني ابوي وهو حاضني وامي تبوس بيدي
كتلهم المره بره فشله
طلعت الها امي خطيه مامصدگه
دخلت ام ذياب اهلي استقبلوها خطيه مايعرفون شيحجون لو اشلون يشكروها
ماضلت اهواي ربع ساعه واجه مرتضئ كال رجال بالباب يصيح للمره
عرفناه السايق ابوي راد يوصلها ماقبلت كالتله ضل يم بنيتك ومو تعطلوها يمكم تره غصون بنيتي ومااعرف اگعد وحدي وهي ماموجوده يمي
ابوي يحجي ويه المره مرتاح من شافها اشلون مره تنحط بالگلب بااسلوبها
راحت عمتي والله ابوي نام وحطني بحضنه مثل الطفله واني بطوله
حاضنته ومامصدگه اني اليوم يم اهلي وبنصهم گاعده
بس تبقى فرحتي ناقصه لان بالي يم زينب
اني من مات عمي ابو احمد وره كم يوم ياالله عرفت من عمتي ذياب حاجيلها لان لواء مايضم عن ذياب شي
بيومها بجيت لمن تعبت عمي فقير ومات بحسرته على زينب
اسبوع مامرتاحه احس ابوي راح يصير بي نفس عمي بس الحمدالله من اجيت وشفته صح مبين تعبان بس من شافني روحه ردت
كاعده بنص اهلي ع الغده بس تفكيري يم الراح يرجع ومايلگاني شراح يسوي؟؟
بمجرد ماذكرته گلبي انقبض
بليل اخذت تليفون امي اتصلت بعمتي لان انطتني رقمها كتبته الي بورقه من اجينه گالت خاف تردين تخابريني
اتصلت بيها جاوبتني بس من صوتها المره مبينه متخربطه الصبح كلشي مابيها
سالتها عمه شبيج؟
خاف ذياب متعارك وياها لان جابتني لهلي
گالت مابيه يمه كلشي مابيه وذياب يزعل ويرد لاتشيلين هم
عرفت من كلامها ذياب گالب الدنيا وراي
بيومها نمت بين امي وابوي خطيه اثنينهم حاضنيني
امي كل شويه تسالني شصار ويانه
واشلون حال زينب
كتلها زينب مااعرف اخبارها من يوم الاخذتني ام ذياب بعد كلشي مااعرف عنها
ثاني يوم رحت شفت مرت عمي ام احمد
شصاير بحالها
وانوب حاده لازمه عده على عمي ماتطلع
واحمد العار ابد ماوصل لهله يخاف لان سامع بس يرجع للمنطقه ينقتل
وضاله امه واخواته حال الضيم حالهن بس ابوي مامقصر عنهم لكن يبقئ بنادم من يشوف الناس تتصدق علي يحس نفسه ثگيل
ضليت يمهم للضهر انتبهت للطارمه متروسه سعف يابس
گتلها عمه شتسوين بالسعف؟؟
ام احمد،، ييمه نسوي مكانس ونسوي طوابگ خوص
للخبز تشتري النسوان مني
يبنيتي العيشه صعبه صح ابوج مامقصر الله يرزقه بس عندي جهال يردون خو ماكل شغله يردوها يرحون العمهم هم فشله
عاد فلوس المكانس نتصرف بيهن
غصون،، الله يساعدها جابت عمرها بالضيم والقهر
عود خلفت ولد يساعدها تالي الولد طلع عاق لاحض ولافايده بي مااجتهم من وراه غير المصايب والطلايب حتى احنه عم علينه
مثنئ اخوي طاح الفصل مالته لان حسبوني بمكانه لذلك رجع للبيت بس متغير ابوي. صارم وياه
وهو حس بغلطه حتى من اجيت ماشفته
بايت يم بيت خالتي
اتصل بي ابوي حتى يجي لكن رفض يگله اشلون احط عيني بعين اختي؟
الحمدالله من عرف غلطه بس بعديش؟؟
كعدت عمتي تسالني عن زينب كتلها والله ياعمه ماادري بيها وماشفتها
خطيه ظلت تصفگ ايد بيد محروگ گلبها على بتها
حجتلي اشلون اجت فازعه من مات عمي
ارتاحيت لان لحگت بي قبل مايدفنو
لو ماجايه جان ضلت بحسره شوفته طول عمرها
رجعت للبيت اول مادخلت اجه ابوي ومثنئ وراه يمشي مدنگ
رغم السواه بس يبقئ اخوي والاضفر مايطلع من اللحم
حضني خجلان يبجي بصوت عالي والله حتئ باس ايدي ودنگ يريد يبوس رجلي مع العلم هو اخوي الجبير
ضليت يم اهلي اربع ايام ابوي احتار شيسوي
كل شويه وماخذني المكان ماخله شغله مااشتراها الي اشترالي اهواي ملابس وشغلات حتى موبايل
وخط وعبا رصيد
حفض رقمه ورقم امي ورقم مثنى
امي من اول يوم سالتني عن وضعي ويه ذياب كتلها تمام وخوش زلمه سالتني اتقربلج
هزيت راسي بمعنى اي كل ضني باسج حضنج ذني السوالف
ردت احجيلها استحيت مهما يكون امي هاي عيب اسالها هيج شغلات
دخلت الغرفه امي مليانه جنط عبالك راح اسافر
ابوي يبوسني يگلي شسوي مقصر وياج
اتمنيت ازفج عروس اطلعين من بيت ابوج
بس هذا امر الله والحمدالله طلعو عيالج خوش ناس يخافون ربهم
اتصلت بعمتي من رقمي گالت اني الضهر اجي اخذج حضري روحج
بداخلي خايفه من روحتي بس ارجع واگول قابل شراح يسوي شو هو مايحجي وياي من زمان
للضهر اجت عمتي استغربت مااجره سياره موذياب جايبها
دخلت سلمت على اهلي جلبو بيها ع الغده ماقبلت
كالتلهم غير مره
مثنئ نقل الغراض للسياره سلمت عليهم امي بس تبجي
ابوي خطيه فوگ ذيج الخساره الصارله اربع ايام ينگل غراض الي
طلع افلوس حطهن بيدي ماقبلت أخذهن بس خزرني
اخذتهن وطلعت وره عمتي بس اهلي الحمدالله مرتاحين من اجيتهم وعرفو وضعي
طول الطريق مقبوضه روحي ساعه اكول شيريد يسوي خل يسوي
وساعه بمجرد مااذكر عصبيته جسمي يرعش
وصلنه للبيت سيارته واگفه بالباب بمجرد ماشفتها انمغصت بطني
نزلت اني وعمتي نزلنه الغراض حطيناهم بالطارمه لان اهواي
راح الرجال واني نقلتهم للغرفه بس لحد الان ماشفت ذياب
جاي احط بالجنط بالغرفه اسندهم على صفحه شفته نزل ع الدرج
رجليه لااراديا ثگلن وصرت ارعش
باوعلي بنضره احسه يريد يذبحني ومايبرد گلبه
بس ماحجه شي نزل فات للاستقبال
هادئ احس هذا هدوء ماقبل العاصفه
ماتوقعت راح تكون هاي رده فعله
مجرد باوعلي كانه ماشايفني
ضليت بالغرفه اعزل بالغراض طلعتهن من الجنط رتبتهن
تقريبا الساعه ب 2اجت عذراء اني واكفه يم عمتي بالمطبخ جنت احجيلها على بيت عمي ابو احمد واشلون وضعهم تعبان بعد وفاه عمي
دخلت عذراء
سلمت على امها بس ماسلمت عليه
فاجئني كلامها
عذراء،، شكو يمه؟
شو اتصل بيه ذياب قبل ساعه كال تعاي عندي موضوع وياج
غصون،، مااهتميت الها يمكن عدهم سالفه ماتخصني شعليه بيهم
عافتنه وراحت يمه للاستقبال
شويه وصاح ل امه تروح يمهم
صار عندي فضول اعرف شكو
باب الاستقبال مفتوح وصوتهم واضح
رحت وكفت قريب ع الدرج
احس واحد وضربني سجين بصدري من سمعت كلامه
ذياب،، عذراء اريد اخطب نور
يتتبع
ممكن متابعه للكاتبه الورده
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!