رواية ضحية لمن لايرحم الفصل الثلاثون 30 - بقلم زهراء الحسناوي

البارت 22
ضحيه لمن لايرحم

بقلم زهراء الحسناوي

،،،،،،،،،،،،،،،

اذيتني
شگد جنت محتاجك ردت بس تسأل
بذاك الوكت لو جاي كتال اقبل
تموتني بيدك مره وحده وارتاح
احسن ولاكل يوم اموتن واعدل

،،،،،،،،،،،،،،،،،،،،،

زينب،، اثنينهم طفرو من مكانهم
لواء زمخ بصوت عالي شجااي يصيرر اهنا؟؟

جنه وجها غده ينطي الوان ترجف خايفه
واني هم مثلها لان لواء بيده اسلاح خايفه يكتلهم ويروح بالرجلين بسبب وحده ماتسوه

احسه فقد جرها من شعرها الولد راد ينهزم وكف كدامه اشرله بالمسدس بمعنئ ارجع
لازم جنه من شعرها يعت براسها ويصيح بصوت عالي رج البيت
ركضت وكفت بالزوايه يم الكنتور القديم اخاف من اشوف عركه كدامي حيلي يضل يرجف

الولد من الخوف راد ينهزم
ماحسيت غير لواء ضرب طلقتين يم رجله وگعن بالحايط
الولد ارتد للخلف خايف مثل الجريذي المحصور
ومايعرف اشلون يخلص نفسه

على صوت الصايح مال لواء وصوت الطلق
كلها اجت تركض واولهم نذيره وبعدها الشيخ وحسن
كلهم فاتو مخبوصين مايعرفون شكو

نذيره عيونها على جنه تباوعلها بخوف مافاهمه شي وليش لواء لازمها وجاي يضرب بيها

لواء،، گ،،، ه ملفييييي
ولج ساقطططه ماوكفنه بعييينج تتختلين ويه الزززلم بنصاص اليالي

جنه،، خ خالي افهمك و والله افهمك

زينب،،لواء مايشوف شي كدامه
هوسه واصوات عاليه وصريخ
غير الولد اليصيح بصوت عالي هييي صاحتلي
بتكم صاحتلي

لواء من سمعه هيج هد جنه وركضله انطا لطمه على وجها
من شفت لواء هيج فاقد احس بعد مااكدر اسيطر على اعصابي ارجف من الخوف
عفتهم وركضت ختلت بالمطبخ

اسمع بس صوتهم العالي
ام لواء بعربانتها كاعده اباب المطبخ ماتكدر تنزل لان ابدايه المطبخ درجات لازم تنزلهن حتى تطلع للمخزن
فضلت معلكه ماتعرف شكو
واني ماكاتلني جنه واكفه بمكاني خايفه على لواء
اسمعه يشحرج ويصيح بصوت عالي

شويه ودفعو نذيره بره وضلو بس الزلم بالمخزن

اسمع بس صوت صايح الولد وجنه
عرفت جاي يضربوهم
شويه وطلع حسن يدفع بلواء ولواء حتى فالينته
مشگوگه
امه تلطم على خدها ماتعرف شكو
شويه وطلعو حسن والشيخ وقفلو الباب وراهم حبسو جنه والولد بالمخزن

دخلو للمطبخ واكفيت مخبوصين لواء فقد اعصابه يفشر ويغلط على نذيره

لواء،، هيلگتيهااااا انطيتيهااا مجااال
ولج بنتج نكست روسنه بالطططين ياحيف تربيتنه بيهااااا

زينب،، كعد لواء ايده على راسه وحسن منتجي ع الكاونتر ولايمه السالفه بس مبين ضايج على لواء لان محروگه اعصابه

الشيخ طلع موبايله اتصل ب ابو الولد حجاله مختصر كاله هسه تجي
سد الموبايل اندگ الباب لواء خطيه طفر
من مكانه اشرلنه بمعنى اسكتو

لواء،، اكيد الجيران من سمعو صوت الطلق والصايح اجو اكعدن كلشي لاتحجن انه طالع

زينب،، طلع لواء شويه ورجع شايط يريد يفوت يذبح جنه بس ابو لزمه كاله لواء بويه الوادم تسأل شكو شعدكم بهليل؟؟
كتلهم طفر علينه حرامي وبناتنه شافنه كامن يصيحن
جا شريد اكول؟؟
اتصخمت وجوهنه بسبب الساقطه

زينب،، اندك الباب اتصل ابو الولد كال اني بالباب
راح الشيخ فتحلهم دخل الرجال هو ومرته والله المره من كد مامرتبكه وماشايفه دربها انعالها تك وتك وشعرها طالع من الحجاب ورجلها يمشي جدامها

اخذهم الشيخ ودخل للمخزن حتى يشوف بعينه ويتاكد

بداخلي ادعي يارب خلص هاي السالفه على خير
كلشي ولا الفضيحه
سمعت صوت ام لواء زمخت بيه لان واكفه واشوفهم
اكيد خافت اتشمت بيهن

زمخت بيه كالت اصعدي فوك لاتضلين تتصنتين

اني هم عفتهم وصعدت الغرفتي بس كاعده على نار بالي يم لواء على ساعه ينجلط من العصبيه

للصبح الهوسه مستمره تالي الساعه 5الفجر يالله صعد لواء
عبالك يريد ينفجر من عصبيته
فتح الحرار طلع شريط حب اخذله وحده بدون ماي

خفت احجي وياه لو افهم منه شنو صار
خطيه يفتر بالغرفه مثل طير المذبوح ويصفگ ايد بيد

اجه كعد يمي

لواء،، زينب راسي راح ينفجر وعلي
ولج طفللله لعبت على شواربنه؟؟

زينب اتقربت منه اريد اخلي يهدئ شويه
لزمت ايده اعصابه ترجف
نهض من مكانه عافني ونزل

نزلت وراه لكيتهم بالصاله منجمعين نذيره تبجي وتلطم والشيخ حالته حاله لان فعلا موقف صعب
ماشفت لواء يمهم رحت للمطبخ اسمعه يشحرج
على جنه

الافتهمته الولد ماخذي اهله والصبح يرجعون لان الصوت مسموع بليل

ضليت بالمطبخ للساعه 8اجو ابو الولد وامه واخته الجبيره
دخلوهم لجوه بالصاله

وكفت بالمطبخ اسمع الحجي

احس روحي عرگت من الفشله
نذيره ابد ماحجت عبالك خرسه بس ام لواء حجتلها كلمتين عود تعاتب جارتها ع السواه ابنها
بس المره خوش جاوبتها

كالتلها المايدني زبيله محد يعبيله
شو المنطقه متروسه نسوان مايوم ابني شال عينه على وحده منهن
بس بتجن هي التهامص تريد زلمه
ورطت ابني وياها

مبينه ام الولد السان ماينكدرلها بحيث شبعتهن رزايل والكل ساكتين لواء ماموجود مدري وين راح
ابو لواء كالها ماعدنه خل غير نعقدلهم ونلم السالفه احسن ماننفضح

المره رادت تجاوبه بس سكتها رجلها مبين فقير مايدور مشاكل
كاله تدلل شيخنه شتفصل احنه نلبس وابنه العايل

نطت المره من يمها كالتلهم احنه ناس فقره على كدنه واخو الجبير بعده مامتزوج لان حالتنه ماتسمح
اشلون نزوج الزغير واحنه حتى ماعدنه فلوس نعرسه

واذا اخذنه بتكم حطو ابالكم شغله لا اكو مهر ولاافلوس ولاغرفه اخشاب
جا هي شعرفت من ابني؟؟
قابل عنده فلس عانه؟؟

جانت المره تشرط شروط تعجيزيه حتى مايقبلون بس المصيبه وكعت على روسهم ومستعدين ينفذون كلشي في سبيل ماتطلع السالفه

اهواااي كلام وهوسه تالي اتفقو يعقدولهم ويزوجوهم بااسرع وقت
دخل لواء يمهم انكسر خاطري علئ حالته

بنادم ماعنده غير سمعته جدام الناس
صعب واحد من اهل بيتك يكون سبب فضيحتك جدام الكل

ابو الولد كالهم ابني جامع مليون و300الف دينار من شغله
والله شاهد ماعدنه غيرهم عود ردنه نرمم بيتنه بيهن
بس راحد ندفعهن البتكم والعرس بعد عشر ايام

شيخ منهل وافق كاله ميخالف بس كون العرس سكتاوي لان احنه عدنه اثنين ميتين حسين وجود واثنينهم ماطالعه دورت السنه مالتهم
وفشله من الوادم هسه شيگولون؟؟

احسن حل يكون العرس سكته حاله حال الزعلانه وردت لعيالها

وفعلا يومين احنه مخبوصين وجنه حبستها امها ابيتهم بس كل شويه امها تكفخها

عشنه كم يوم برعب البيت كله متوتر حتى اكل ماياكلون
ونذيره خاتله هي وبناتها ابيتهن

اهل الولد جابو الفلوس ونذيره راحت للسوگ وحدها بدون متاخذ جنه وياها لان هذا كلام لواء منعها من الطلعه

راحت امها جهزتلها شغلات بسيطه ورجعت
لواء گالهم الف ماادفع الهاي الجلبه النزلت راسنه
والله لو طالعه باادبها واخلاقها ورافعه راسنه بيها جان شلعت عيوني وانطيتهن الها بس المثلها انعال ماتسوه

بيوم العاشر نذيره اخذت بتها للصالون حفتلها
وصبغت شعرها
من نسوان المنطقه سمعن الخبر اجن يتاكدن اذا فعلا جنه راح تتزوج واخوها توه مات ماصارله ثلاث اشهر

جان جواب نذيره اجت قسمتها وحرام نوگف بطريقها
وعلى اساس عيال جنه الخاطرنه لان عدنه ميت ماراح يسوون عرس
هيج قنعتهن

بيوم العاشر العرس اجت سيارتين وحده مال الزفه والثانيه لهل الولد والعرفته حتى امه ماجايه
جنه اخذوها من بيت اهلها بدون كلشي لاحنه ولاعرس ولازفه
حالها حال الفصليه
بس الفرق بينها وبين الفصليه

جنه اخذوها بصخام الوجه وبالعار والفضيحه
واني اخذوني بكرامتي لازانيه ولامنزله راس اهلي الحمدالله

قبل ماتطلع جنه اجت نذيره مدري شتريد من امها
وگفلها لواء كالها اسمعيني زين
بناتج من زغرهن ربن عدنه واحنه مسؤلين عنهم وكل اليصير احنه المسؤولين جدام العالم
اليحجي ماراح يكول غير هاي تربيه خوالهن

اسمعيني زين من اليوم جنه تنبسط تنكتل تشبع ضيم
لاتجين وتشكيلي ابد لان كل اليصير بيها من ايدها
نذيره ماكان جوابها غير تبجي ماتعرف شتحجي

بيوم الزفه بليل صعدت عشه اللواء الي صارله اسبوعين مجاز اخذ اجازه بفلوس
حتى اكله قليل ودائما عصبي
اكل لگمتين ونهض اتمدد ع الجربايه
رحت يمه اكو بداخلي اساله
بس خايفه اساله
اخر شي كال

لواء،، احجي

شنو؟؟

لواء،، من وجهج مبين عندج سالفه احجيها

زينب،، ابتسمت كتله والله ماكو شي
بس بذاك اليوم خفت عليك لاتكتل الولد

لواء،، زينب تدرين راسي يريد ينفجر؟؟
ولج لسه متندم مادفنتهم اثنينهم بدل هاي الفضيحه

زينب،، الله يحبك برد اعصابك مارادك تتورط
الحمدالله على كل حال جنه تزوجت ونسدت السالفه

لواء،، وداعتج ماتنسد وراح تكبر والنسوان ماتسد حلوگها راح تصير السالفه علج بحلوگ الوادم على ابو اگلج ولاتگولين وتصبح العشيره كلها تدري

والله لو ماابوي جان ذبحتهم بدل القهر هذا
بس الوادم ماترحم

لو كاتله خلاص جان حطو بالسالفه الف علامه استفهمام واكيد تثبت السالفه علينه هسه يگولون بيت الشيخ لگو واحد ويه بتهم وكتلو
وهيج السالفه تكبر ماتزغر

لليوم اگول الحمدالله انتهت السالفه على هيج وماكتلته لوكتلتها
ولج زعطوطه جنه طفله وطلع منها كل هذا
ادري وكحه ورعنه والسانها طويل
بس مامتصور بيوم راح تسوي هيج سوايه اكبر من راسها
زلم وخلتنه مانندل دربنه مدوهنين نريد نلم السالفه قبل لاتفلت من ادينه ونصير علج بحلگ اليسوه والمايسوه

والله على ساعه انجلط مامرتاح من اذكر الصار نار تشب بصدري
ولج مات ابوهم اطفال جود توه يزحف وجنه طفله هي وغفران كلش ازغار
اعتبرتهم اطفالي ماحرمتهم من شي وخاصتا جنه
رغم نشاكلها وطوله السانها محتويها ودوم اعبر سوالفها واسامحها اكول يتيمه مااريد اكسر خاطرها
تالي كسرة رگبتي بعملتها هاي

زينب،، كل اليعرفو انو جنه لگوها هي والولد بالمخزن بس مايدرون متقربلها
حتى الافتهمته من كلام لواء حسباله جانو بس يحجون ومامتقربلها

وره يومين لواء التحق وقبل لايروح اتسوگ مسواگ كامل راح ويوصي لاتعبين لاتشتغلين
لاتضلين صاعده ونازله للدرج

طول ايام مشكله جنه اني مرتاحه لان محد تصخرني لو يشتغلن عليه
بس من راح لواء كانه نذيره لگت شخص تذب حرگتها بي

ماتضربني بس تغث بحجيها وعلى اقل شغله تسودني بسوالفها غلط ومسبه
كانه مااتعضت من الصار بيها

كاعده بالمطبخ اثرم كباب للعشه وهمه مجموعين بالصاله
اسمع نذيره تحجي ويه امها وابوها

نذيره،، يابه كل الوادم عدهم حلال ليش ماتشتريلنه هاشه

ابو لواء،، شتسوين بيها؟
والحلال يتعب يرادله واحد كون يحشله علف النهار كله

نذيره،، نتساعد بيها اني وزينب وغفران
والله يابه اتخبل حليبتها الصبح من تشربها
والبيت المابي حلال مابي بركه

زينب،، اسمع ومتعجبه بيها فوگ الضيم تريد تجيب هاشه

حجايه منها وحجايه من امها قنعن الشيخ وخلنه يخابر واحد يعرفه يبيع حلال

الافتهمته باجر الصبح الشيخ يدزله واحد يروح يشوف الهايشه لان اكو بيهن مريضات

وفعلا ثاني يومالساعه ب 10الصبح انفتح الباب الرئيسي دخلت سياره حمل
نزلو منها هايشه وياها عجل صغير ابنها

اجه الحدقجي وياه واحد يشتغل بفلوس
الشيخ كاللهم ابنو حويه (بيت للبقره)
جابو غراضهم وبنو حويه الهاشه من السعف والبواري
تحميها عن الشمس

بس جابولها علف الشيخ اول يوم مشتريلها علف من صاحبها الشتراها منه

ثاني يوم من غبشه انفتح الباب ولنها نذيره فوگ راسي

نذيره،، كومي يالمسعده انهضي حشي علف للهايشه

زينب،، ضليت صافنه توني فازه من النوم حسبالي حلمانه
اباوعلها تبغگ يم راسي شويه وصحيت استوعبت احنه صدگ اشترينه هايشه

لبست حجابي ونزلت وراها اخاف منها حتى لو لواء ينبهني مااشتغل بس انجبر لان نذيره شرانيه اتجزعني اذا مانفذت كلامها ومن يلتحق لواء تتگابل وياي مگابل

اخذت عباتي بيدي اتحزمت بيها
هي لبست عبايتها وطلعت جدامي للبستان
اكو بحيره مال سمج مسويها الشيخ قديمه
وناشفه مابيها سمج لذلك طالع بيها گصب

وگفت يمه اشرتلي بمعنى حشي الگصب
شمرت المنجل يم رجلي
نزلت بطرف البحيره وبديت احش واخلي يمي
اني اعرف قبل اشلون احش للهايشه مالتنه
ونذيره جابتلي احزام مال گونيه (گونيه مال طحين مشگوگه مثل الحبل)

كل ماابطل عن الحش تگلي كمل شويه ذني

صرت احش واسفط يمي
سويت نگله مال حشيش شكبرها
ردت اشيلها ماتنشال
اجت نذيره شيلتني على راسي احس رگبتي طگت لان ثگيله نذيره مشت جدامي واني وراها گوه امشي

لمن وصلنه للبيت راسي يريد ينفجر
وهنه مو هاشه وحده لا اثنين هي وابنها واثنينهن ياكلن

صرت يوميه انزل للبستان من غبشه احش علف
ومن ارجع لازم انضف مراح الهايشه عن الفضلات
صرت اتعب فوگ شغل البيت
لواء من يتصل يسالني مااكدر احجي لان مااريد مشاكل اخاف منهن

نذيره تحترگ روحها على جنه لان عشر ايام وره عرسها ماشافتها امها وحتى بصباحيتها محد وصللها لان لواء گالهن التوصل الجنه خل تضل يمها لان تحلم تفوت لهنا بعد

وصدگ محد راح الها والسالفه تقريبه هدئت مو مثل قبل تحس الوادم كلها مكهربه ياهو التكضه ينتلك من العصبيه

يوميه انزل للبستان احش وارجع ضهري مكسور
وبطني توجعني مااذيتني
تقريبا بدايه الشهر الثالث توني مكمله شهرين
ضهري احسه مكسور بالنص من التعب

اتصل لواء گال اني اليوم راجع كيفت لان من يجي معناتها ارتاح اضل نايمه اكثر الوقت

العصر فتت للحمام اسبح لان الهايشه الله يسلمها تگول مشغله جاروشه النهار كله تعلف احط العلف كدامها بساعه وحده تاكله وتريد بعد
صرت اتذكر هاشة اهلي المكروده جنت احشلها بين يوم ويوم لان مرات امي تروح خطيه بمكاني
وبيوم نوبتي اطلع العلفات سم وزقنبوت عليها اضل ادرم واشمرهن جدامها
مرات غصون اتكلي والله لو عدها السان جان كالتلج انام جوعانه ولا اكل علفاتج المسممتني بيهن

من سبحت انتبهت اكو شي جوزي استغربت شنو هذا؟
بعدين گلت يمكن هاي لان بدايه حمل شغله عاديه
كملت سبح وطلعت صعدت للغرفه گوه ضهري ماذيني

المغرب اجه لواء اول مافتح الباب ابتسم دخل وسد الباب
من اشوفه يبتسم لااراديا اضحك لان عنده رصعه بخده من يبتسم بطرف شفته تبين اكثر

نهضت من مكاني اتلگيته

الله يساعدك

لواء،، هله باام حسين مشتاقلج

زينب،، جرني الحضنه باسني وباس راسي
كعد ع الجربايه ينزع بسطاله يباوعلي والضحكه مرسومه على شفايفه رفع راسه غمزلي وكمل نزع ملابسه العسكريه

رحت حضرتله ملابسه سبح اكل ونام
نزلت سويتلهم عشه وصعدت ولواء نايم
ماكعد غير لل10بليل اني هم عفته نايم خطيه جاي تعبان

اتمددت يمه ضهري ذبحني ذبح فتح تك عين يباوعلي جرني الحضنه
صح ماكو مشاعر بس حلو الاحساس من تشوفين اكو شخص يحتويج اكو شخص يعامل بما يرضي الله بهذا البيت بينما الكل يكرهج وحاقد عليج

صعبه تعيش بين ناس بداخل بيت وانت منبوذ من الكل هذا يكرهك وهذا يضربك وذاك يشتمك
كل صعبه مايحس بيها غير المجربها

نمت بحضنه مستسلمه المشاعره واشتايقه
رغم الم ضهري بس مااشتكيت تركته براحته

بليل رحت سبحت انتبهت نفس الشي الجوزي بس اهواي صدگ خفت والساعه تقريبا راح تصير 1 بليل

اكو عندي بيرغ ماادري ال يااامام لگيته بشباك الاستقبال محطوط اخذته شديته على بطني
رفعت ايدي لله عز وجل اندعيت كون الطفل مابي شي
صح بالبدايه جنت خايفه منه بس بمرور الايام احسه قطعه مني رغم هو بااحشائي بس اخاف علي

رجعت للجربايه اتمددت گلت بلكت من انام وارتاح يخف الالم وبعد ماينزل شي

بطني توجعني بس لان تعبانه غفيت
فزيت على الم قوي واحس اكو شي
لمن نهضت وشفت روحي احس ردت اوگع واني اشوف الدم

يتتبع