رواية ضحية لمن لايرحم الفصل الحادي وثلاثون 31 - بقلم زهراء الحسناوي

البارت 23

ضحيه لمن لايرحم

بقلم زهراء الحسناوي

،،،،،،،،،،،،

كيف نخبرهم أولئك الذين تخلو عنا
انهم اصابونا باذئ شديد لايرئ
كيف نخبر الذي افلت يدنا في منتصف الطريق
واختفى بخيبة الامل التي شعرنا بها
حين وجدنا انفسنا لوحدنا تماماً؟؟
الذين خيل لنا انهم سيقومون
بحماية ظهرنا من الطعنات وتقبيل ندوبنا
كيف نخبرهم ان الخذلان لاينسى؟؟

،،،،،،،،،،

غصون.،، ضليت واكفه بمكاني مصدومه
لزمت المحجر وكعدت على اول بايه
رجليه ماعادن يشيلني
النفس تسارع مثل الينازع باانفاسه الاخيره
اسمع كلامهم مومستوعبه شي
معقوله ذياب وصلت بي الهاي الدرجه يعاقبني هيج عقاب؟؟

ام ذياب،، شنو هلحجي يمه ومرتك شبيها؟
والله جنها ورد شو خرسه ماينسمع الها صوت
ومريحه گلبي الله يرضه عنها
بشنو مقصره وياك؟؟

غصون،، سمعته ضحك مستهزء بحجي عمتي

عذراء،، احسن قرار هو هذا اصلا هو وياها مالايقين البعض
وين هي اوين نور شجاب الجاب
شو فرق بينهن بعد السما عن الكاع

ذيج واصله ومتعلمه وحلوه
وهاي لاحض ولاحمصه

ام ذياب،، عذراءء
خافي ربج يمه خاف يجيج يوم تجيني تععوين رجلج ماخذ عليج مره
لتگولين امي وراح تاخذ بخاطري
لاوترابات ابوج اتشمت بيج لان كل شخص ياذي الناس الله راح يضمله خوش ضمه
وراح يضوگه من نفس الكاس
اتقو الله بالفقير

ذياب،، يمه وروح ابوي اذا ماوافقت نور هسه اخطب منين ماجان خليها اصلا ماحاسب عندي مره
وفوگ كلشي تعاندد
گلت ماتروووح لو ماگلت؟؟

ام ذياب،، وانت اعله هاي تريد تاخذ اعليها مره؟؟

ذياب،، كافي حجيه القرار واخذته وانتهينه

ام ذياب،، ياقرار وليدي؟؟
من شوكت المره تتحاسب على روحه اهلها
مالها دخل البت
انه الخذتها وانه الوديتها لهلها هي مارادت تروح بس انه الحلفتها تمشي تشوف اهيلتها

ذياب،، هذا هو حجيه انتي وياها اتصافن حتى تصيرلها عبره
انه نهايها عن روحة اهلها وجنت مقرر يومين واني اخذها بيدي واروح لبوها وانه الممنون
بس هي ثبتت سالفه على روحها

ام ذياب،، سالفتيش وليدي؟؟

ذياب،، رحمه لبوي يمه كافي السالفه وخلصانه خصم الحجي راح اخطب نور

ام ذياب،، وانه جدامك اكولها اليوم وباجر وبعد سنه مااروح ولااخطي خطوه وحده واخطبلك
تريد نور؟؟
ذولاك اهلها وروح اخطبها
بس خل اگلك شغله وداعت حيلي
اذا صدك صارت السالفه اخلي غصون تحرم عليك اليوم الدين
وساعتها خلي تسرعك وعصبيتك يفيدنك من تعضعض اصابيعك ندم

غصون،، اسمع وعيوني يجرن مختنگه
طلع ذياب صارت عيني بعينه
مااهتملي اتعده من يمي صعد الدرج

اسمع امه وعذراء يتحاجن عمتي ماراضيه وعذراء الفرحه ماسايعتها مبينه من صوت ضحكاتها

نهضت من مكاني ركضت للغرفه اتمنى انهزم من البيت ومن كلشي
اتوقعته يعاقبني بس موبهاي الطريقه
صح مااعرف شي بس اكو احساس بداخلي اريد ذياب بس الي
احب نضراته وشقا ورزانته
اني الخسرته واني الضيعته من ايدي
وقدمتله الدليل على طبق من ذهب
من كسرت حجايته ورحت لهلي المفروض انتضره يهدئ ومثل ماگال هو راد ياخذني بيده
يمكن لو مارايحه جان فعلا هو اخذني لهلي ويمكن ساعتها تتغير كثير امور بيناتنه بس اني غبيه
وبعد ماينفع الندم

دخلت للغرفه جريت البطانيه والمخده شمرتهن بالكاع اتمددت واتغطيت غطيت حتى راسي
ابجي بحرگه وبدون صوت
بداخلي نار مشتعله
مجرد حجايه حجاها احس راح اموت من الحرگه والقهر
جا اشلون لو صدگ سواها وخطب نور؟؟

ماطلعت يمهم ابد ضليت بالغرفه
شكد اجت ام ذياب خطيه ورادت بس تخليني اكل كتلها والله مااشتهي اني من اجوع اكل

كالتلي

ام ذياب،، ولج بنيتي والله حچه هيج حتى يقهرج وادري مايسويها بس يريد يعاقبج
ابني واعرفه كلش زين هو لو يريد نور جان من زمان كال روحي اخطبيها
مو يجي هسه من صارت عنده مره الله يحبني حطها ابيتي لان فقيره انطاني على نياتي ورزقني بجنه مثلج

اتركي يمه يومين ويهده من يحس بغلطه

غصون،، كلامها ريحني
شويه احس الالم البصدري خف

ثاني يوم الصبح ماطلعت انتضرته يروح للدوام يالله طلعت يم عمتي
افتر بالبيت واشتغل بس بدون روح مالي خلگ
للضهر اجت عذراء وياها نور
ماصدگت ذياب حجه وياها بخصوص نور انوب تجزعنه بجياتها

فاتن سلمن نور مبينه واصللها الخبر الضحكه شاكه الحلگ
ام ذياب خزرة عذراء لان تدري بيها متعمده تجيبها
نور انتبهت بس غلست

اني ضليت على گعدتي مامهتمه
شويه ودخل ذياب اول مادخل باوعلي ودار وجها سلم على نور مبتسم وهاي اول مره يسويها

هي هم ماقصرت سحلت روحها بالسلام تالي عافها وراح يبدل
كملنه الغده واني كاعده وياهم وذياب يسولف وياها ومنطلق وكل شويه يطگها بضحكه
احس دمي فار ردت ارگعهم اثنينهم بالماعون

بس ماگمت ضليت بمكاني مسويه روحي مامهتمه
صعب تبين مامهتم وانت بداخلك بركان على ساعه ينفجر

التفتت العمتي اسالها اسأله ماادري منين اجيبهن واضحك في سبيل يشوفني مامهتمه
الحجي عادي بس اضحك ضحك عجيب
يمكن مرات نضحك من قهرنه

حتى هو ضل صافن اني اريد اسد حلگي ماينسد
تالي ضاج عافنه وصعد للغرفه

نور حسبالك تريد تاكلني لان تركها وراح
لان الاخت جانت مرتاحه وماخذه راحتها بالسوالف

شويه ولحگته عذراء صعدت يمه
ربع ساعه هي فوگ من نزلت مبينه فرحانه غمزت النور

بعدها راحن اثنينهن لميت المواعين غسلتهن
بس جسمي حار احسه من النار الشابه بروحي
اتمنئ اروح المكان فارغ وابجي بحرگه

بمجرد اشوفه يضحك وياها اموت قهر
اشلون لو صارت صدگ وانسد عليهم باب؟؟

كملت ورجعت للغرفه اتمدددت اتذكرت كلامه ويه عمتي بموضوع نور واتذكرت ضحكه وياها
صرت اقوي روحي مااهتم
صرت اگل الروحي لاتهتمين وتبينين نفسج ضعيفه
خل شيريد يسوي خل يسوي
بس راح اعاملك بالمثل
مثل ماتتعمد تحرگ اعصابي راح العب على اعصابك

العصر دخلت للحمام سبحت ولبست دشداشه مرتبه
طلعت مشطت ورشيت عطر خليت شويه كحل لعيوني
طلعت يم عمتي تباوعلي وتغمز كل شويه
سويت وياها العشه نزل استاذ غضبان

بالبدايه ماانتبهلي بعدين من درت وجهي اله شافني
التفتت اصب عشه مامهتمه الوجوده ضاهريا
بس لو يشوف گلبي اشلون يرجف من الارتباك

كملنه صب عشه اتعمدت اگعد گدامه احجي ويه عمتي واضحك مامهتمه الوجوده اصلا
كل ماانتبهله يباوعلي
تالي ضاح دفع الماعون ونهض

شويه ونزل مبدل كال يمه اني اتاخر
اني مدنگه اكل
طلع ورگع باب المطبخ وراه حييل

بليل الساعه 12تقريبا طلعت للحمام
فاجئني گاعد بالمطبخ جكارته بيده

عبرته وكملت طريقي للحمام
بمجرد اشوفه كدامي وضعي كله يتخربط خوف ارتياك توتر ومااعرف شنو السبب

ضليت خاتله بالحمام منتضرته بلكت يصعد حتى مااشوفه من اطلع
عشر دقايق وطلعت اتلفت ماشفته موجود ارتاحيت
طكيتها ركضه للغرفه فتت وسديت الباب واني مغمضه كلبي يركض حطيت ايدي على گلبي احسه راح يسكت من الخوف
فتحت عيوني تفاجئت بي گدامي
مكتف ادي ومنتجي ع الميز لازم موبايلي بيده
ضليت صافنه

هو مايدري عندي موبايل بس عمتي تدري
اني موضامه عنه بس ماصارت فرصه اگله

ابتسم بطرف شفته
وهذا هم جايبته من وراي؟؟
يوم عن يوم تصدميني بيج وتبنيلي شگد جنت مخدوع بيج

غصون،، اقترب مني بيده الموبايل مضيگ عيونه يگلب بالبرامج اخر شي دخل ع الاسماء
اني ماعندي بس اربع ارقام
رقم عمتي ورقم مثنئ ورقم امي وابوي

ذياب،، زين محيطج موواسع بس شعجب مامحتفضه برقم ابن العم؟؟
خاف كاتبه علي بابا لو ماما؟؟

غصون،، يحجي بااستهزاء مبتسم بطرف شفته
استفزني اسلوبه
گتله لا مايحتاج اكتبه ويه الارقام لان حافضته حفض مثل اسمي

فتح عيونه منصدم من كلامي ماحسيت غير جر ايدي لواها وره ضهري احسها طگت

ذياب،، صلفه صلللفه
ولج العصر منتبهلج متعمده تلبسين وتترتبين جدامي
فهميني شنووو تردين بالضبط؟؟

اعوفج تتعمدين تحرگين اعصابي
اقترب منج تتفننين بصدج الي

شترردددين؟؟

غصون،، جسمي يرجف بيده
خنگتني العبره
همست بصوت ناصي
عوفني وخر عني

مااتحملت نزلت دمعتي سحبني الصدره حضني بكل
قوته
اثنينه تصرفاتنه متناقضه واثنينه مانعرف شنو نريد بالضبط

غمضت عيوني حيل بده يبوس بوجهي بلهفه
حضنته من خوفي
اسمعه يهمس يم اذني

ذياب،، ليش هيج وياي؟؟

غصون،، جسمي يرجف احس بي جاي ياخذني للمكان الانام بي
احسه فاقد من يشوفني هادئه

نسيت الشهريه اليوم اجتني وبسرعه دفعته من صدره
ارتديت للخلف لميت روحي

ذياب،، ليش هلصد؟؟

غصون،، استحيت احجيله ضليت ساكته
رجع اقترب مني يريد يبوسني دفعته حيل

عدل گعدته ايده على عيونه جر نفس

ذياب،، مالج عذر يمي بعد

غصون،، نهض من مكانه تركني وطلع

متت قهر جنت مقرره خلص ماامنعه من شي بس لسوء حضي اجتني الشهريه وهلمره مو اني السبب بس استحيت احجيله

ماگدرت انام بس بداخلي شي فرحان لان بينلي بعده يحبني ورايدني
اتذكرت جفصتي غميت روحي مااتوب ابد

ثاني يوم جمعه ماكو دوام كعدت من وكت طلعت غسلت وسويت ريوگ كعدت عمتي تتريگ
عيني للدرج شوكت ينزل

شويه ونزل كاشخ الدشداشه الخليجي والغتره لافها على راسه بيده السبحه والعطر يهف

گلبي نغزني مااعرف شنو السبب
صبح على عمتي بدون مايباوعلي
حتى ماگعد يتريگ عافنه وراح
مارجع للضهر

كاعده انضف بالصاله سمعت صوته بالمطبخ
يحجي ويه عمتي بصوت عالي
احس گلبي انعصر من سمعت كلامه ويه امه

ذياب،، يمه حجيت ويه محمد رجل عذراء بموضوع
نور وباجر اخذج ونروح نخطبها

ام ذياب،، جاا اسمعني زين
دامك رحت تتخطب الروحك وانت عندك مره تسوه نور وعشيرتها
وروح ابوك رجلي ماتعتب باب الحوش ولاااروح وياك ولااخطب
روح كمل سالفتك وحدك

غصون،، اختنگت بس مابينت نهضت من مكاني رحت يمهم
واكف يشرب ماي خليت المكناسه بمكانها
وكعدت يم عمتي دنگت كتلها روحي وياه عمه

ام ذياب،، حلفت بالغالي مااروح ولااخطي خطووه وحده
دووم المره والزلمه تصير بينهم مشاكل
إذا كل مشكله والزلمه يركض ياخذ مره فوگ مرته
جا گول زلمنه كل واحد عنده ثلاثه واربع نسوان

اني بالنسبه الي مااروح خل نشوف منو ينطي بدون مااروح وياه

ذياب،، خلص حجيه اني اروح وعذراء مدبره كلشي
الابنيه يوميه يجوها خطابه
اذا راحت وين الگه مثلها فاهمه وحبابه وحلوه

غصون،، ادري يتعمد يحجي هيج گدامي
صح بداخلي اكو كسره خاطر بس مابينتها
رفعت راسي كتلها عمه اني اروح وياه اخطبله

ام ذياب،، عمه مسودنه انتي؟
وين اكو مره تخطب الزلمتها؟؟

وانت يمه ادريبك دوم مستعجل وبعدين تندم
اذا اكو مشاكل انته ومرتك اكعدو وحلوها بالتفاهم لاتضلون واحد داير وجها عن الثاني

ذياب،، حجيه ماكو شي نتفاهم علي
وخلص هي تريد تروح وياي هذا هو
باجر اخذها واروح لهل نور

غصون،، ضليت گاعده متعانده وي دمعتي مااريدها تنزل
جنت مقرره بس تنتهي الشهريه اني الاروحله واخلي حد الكلشي بس الضاهر هذا طبع ذياب دوم مستعجل بقراراته

كتله اروح وياك حتى ابين هو مايهمني
وفعلا ثاني يوم بليل
بدلت ورتبت نفسي وحجابي لبست عباتي وطلعت

عمتي ماراضيه نهائيا حتى غمتني من حرگه گلبها
ذياب متصل بعذراء منطيهم خبر بجيتنه
نزل متأنق صدگ طالع عريس
شعور حيل صعب احسه الي وحدي
صعبه تنطي شي غالي عندك
انته الخسرته بسبب غبائك وقلة فهمك

عمتي ضلت تحجي ماراضيه بس ولاتهتم
طلع كدامي واني وراه
شغل السياره گعدت بالكشن الوره

طول الطريق السكوت سيد الموقف لااني حجيت ولاهو
وصلنه البيت نور بيت راقي مبين من بنائه
نزل هو واني نزلت وراه طلع اخوها ورجال جبير وياه مبين ابوها
استقبلو ذياب الولد گال تفضلي منا

مشه كدامي واني امشي وراه احس راح اعثر بعباتي
ذياب فات من باب يمكن دخلو للاستقبال
واني فتت من غير باب اتلگتني مره يطلع عمرها بگد عمتي ام ذياب ونور وعذراء وبعد وحده وياهن

عذراء سلمت سلام عادي بس نور اجت بوستني مااعرف شبيها مبينه الفرحه ماسايعتها
دخلني للبيت كعدني بغرفه حتى ماانتبهت شنو بيها
حايره بضيمي

اجن كلهن گعدن يمي بس نور مرتبه نفسها حسبالك اليوم عرس مو مجرد خطبه

حجت امها گالت والله يااخاله انقهرنه عليجن انتي والفصليه الثانية وهاي نتيجه التروح فصليه لاهي تريد زلمتها ولاهو يريدها واثنينهم مجبورين
مثل حالتكم انتي وذياب واحد مجبور ع الثاني

فهمتني عذراء كلشي وانقهررت عليج

غصون،، ضليت مصدومه بكلام المره لان عذراء حتى مفهمتها اني وذياب كل واحد ينام بغرفه وحده
بلعت الغصه وسكتت

شويه واجت الابنيه الثانيه گالت عمي يريد يفوت يحجي ويه غصون

عدلت عباتي دخل الرجال كعد كدامي بعد ماسلم كال بويه اني اعرف كل السالفه
واني البارحه مارجعت خبر لذياب كتله اخذ موافقه مرتك ياالله انطي بنتي
والعرفنا كلنه انتو مجبورين وزواجكم شكلي لااكثر

والله يعز عليه انطي بنتي لرجال متزوج
هل اجيت اريد اشوفج قابله لو لا؟؟

غصون،، گلبي انعصر عذراء فاضحه علاقتي بذياب كدام كل عيالها بحيث ابو نور بنيلي هو عنده علم بسالفتنه

هزيت راسي كتله اني لو ماموافقه مااجي

ام نور ونور وعذراء الضحكه شگت حلوگهن
بس الابنيه الثانيه مبينه جنتهم تباوعلهن صفح مامقتنعه

طلع الرجال وام نور تمدح ابتها جدامي اتكول الف واحد يتمناها واهواي اجوها خطابه وماانطينها سبحان الله مكتوبلها تاخذ ذياب

اباوع الام فرحانه اكثر من بتها
شويه وصاحلها وجلها عشر دقايق ورجعت فرحانه
كالت الحمدالله ابو محمد وافق لان اجيتي بنفسج تخطبين نور لان جان شايل همج يكول خاف مرته ماتقبل بس من اجيتي اتاكد كلام عذراء صحيح

وإنشاء الله عگب باجر يعقدون بس سيد
واذا يردون هم يعقدون محكمه
بس العرس ذياب كال موهسه بعد كم شهر يكون دايره سنه ابن عمه لان يگول فشله اسوي زفه وعمامي عدهم ميت

عذراء،، اي والله وهم جود خطيه ماصارله كم شهر من مات
هو احسن شي نسوي الخطبه سكته بس بالعرس وداعتج العب لعب

غصون،، اخذ ذياب الموافقه من اهل نور شويه وكالت عذراء ذياب يگول يالله نروح

نهضت دايخه احس راسي شكبره
طلعن وياي للباب شفت ذياب واگف بره وياه ابوها واخوها واگفين
سلم عليهم وصعد سيارته وقبل لااوصل يمه مد روحه فتح باب السدر ودفعه بمعنى اصعدي
ماردت افشله صعدت يمه وسديت الباب

من اتحركت السياره جر حسره
التفتلي باوعلي بنضره ماعرفت افسرها
درت وجهي عنه للجامه

اتمنه احجي البداخلي بس شيفيد الحجي بعد

وصلنه للبيت اتلگتنه عمتي شاده راسها ذياب صعد للغرفه واني رحت الغرفتي نزعت عباتي فاتت عمتي وسدت الباب

ام ذياب،، ها يالخوثه خطبتيله؟؟

غصون،، مااتحملت كعدت بالكاع ابجي
اجت يمي كعدت

ام ذياب،، ليش هيج يمه؟؟
والله لومارايحه محد انطاه مره
ليش رحتي وكسرتي روحج

غصون،، ردت اگلها حتى لو مارايحه ينطو نور لان عذراء حاجيتلهم ومفهمتهم هو مارايدني وحتى مالامسني
بس سكتت لان مايفيد الحجي

المره هم سكرها وضغطها صعدن جرت مخده ونامت يمي بالغرفه ماطلعت ولاعافتني
وحتى ثاني يوم ذياب يحجي وياها ماتجاوبه اسمعهم من غرفتي اخر شي كالها ضلي زعلانه
كون اموت واخلصج مني

من راح طلعت يمها سكتت ماحجيت
لكيتها كاعده وايدها على راسها
وقبل مااسالها كالت

ام ذياب،، ابني ورط روحه ورطه الله يستر منها

غصون،، ضليت صافنه كتلها ليش

ام ذياب،، ولج يمه نور وكحه اني اعرف بنادم من وجها
ونور مبينه من تصرفاتها وكحه وعرمه
الابنيه الحبابه تتخطبها الناس عبر بحور تجيها قسمتها لان اخلاقها ادلي الوادم عليها

ونور طالبه كليه وصيدلانيه وحلوه
ليش ما خطبها واحد من الكليه؟؟

غصون،، ماجاي افهم شتحجي
كتلها ليش عمه شسامعه عنها؟؟

ام ذياب،، استغفر الله بنيتي ماجاي اگلج سامعه عنها شي
بس جاي اسأل ليش ماانخطبت وهي ببها مواصفات يتمناها اي شاب
اكيد شافوها وكحه وعرفوها بزر دلال وعرفو شنو طينتها

غصون،، سكتت ماحجيت
سالتني شوكت اتفقو ع العقد كتلها عگب باجر

سكتت المره ماحجت عافتني وطلعت
يومين ذياب حتى مايرجع للبيت
بيوم موعد العقد اتصل بساره تجي تروح ويانه

خطيه من اجت ضلت صافنه ماتعرف شكو
ومبينه من كلامها هم مارايده نور مثل امها

الساعه ب 12الضهر وهمه مواعديهم نروحلهم ب 4العصر
كاعده بغرفتي مااريد اطلع انفتح الباب دخلت ساره

ساره،، كاعده غصون الفطيره

غصون،، ابتسمتلها اجت كعدت يمي

ساره،، عفه گلب عندج اني لو منج والله والله
عندي انيمه بالمقبره ولااشوفه يم وحده غيري

غصون،، دنكت كتلها بالعافيه علي

ساره،، كون افشخج بلكت شويه يخف الغباء
ولج النسوان ماتنطي زلمها لو يموتن وانتي رايحه برجلج تخطبيله
ادري بينكم مشاكل بس جان حاولتو تحلوها مو تصلحون الغلط بغلط اكبر منه
يعني انتو دخلتو طرف ثالث بعلاقتكم وهلطرف ماله ذنب والله اني اشوف انتي واخوي واحد اخبل من الثاني

غصون،، هي تحجي واني. ساكته مالي نفس الكلشي
تالي عافتني وطلعت

العصر لبست فستان جابته اليه ساره
ورتبتني الفستان حلو مال محجبات

خلتلي مكياج كلش خفيف مبين وجهي طبيعي
لبست عباتي وطلعت
لگيته ينتضرنه طلع كدامنه واني وساره وراه عمتي هم ماقبلت تروح

طول الطريق كلنه ساكتين وصلنه البيت نور
اتلگتنه عذراء تضحك مبينه داخله صالون من ترتيبها

ساره سلمت عليهن عادي مارادت تجي بس استحت من اخوها

دخلنه للصاله مالتهم اهواي نسوان عازمات وكلها لابسه احلئ لبس
فاتت نور لابسه بدله وردي قصيره كلش حلوه طالعه لعابه

النسوان ياهي الاباوعلها اشوفها تباوعلي ويتهامسن بيناتهن

اتمنيت ابجي واني اشوف نور محضره روحها لذياب
خلص راح تصير مرته براضاتي

مرتبات ميز وكيك شغلن الديجي عود ذياب گالهن العقد سكته شو ذني مسويات حفله كامله ديجي ورگص واغاني

حتى نور گومنها وياهن رگصت
بس الابنيه الشفتها بيوم الخطبه كاعده حالها حال الخطار مبين من شكلها ماعاجبها الجاي يصير حالها حال ساره

بعدها كالو السيد راح يعقد
حطن كرسي يم الباب ولبسنها حجاب ابيض حطن على راسها كعدت والسيد بده يحجي
وهي تردد
وكل كلمه يحجوها خنجر ينام بروحي

كمل عقد نور وهلهلت امها وبده يعقد لذياب
بمجرد ماانطه موافقته خانتني دمعتي ونزلت غصب عني
درت وجهي امسح دموعي قبل لاافضح روحي
سويت روحي اضحك ويه ساره مامهتمه

كالت عذراء راح يفوت ذياب يلبس مرته الحلقه

كلمه مرته ذبحتني بس سكتت وحقدت عليهم اثنينهم

دخل ذياب بس ماشافني لان هواي نسوان اني وراه كاعده بركن الصاله يم ساره
هنه لبسن عباياتهن ونور كعدت خجلانه مبين الخجل ينزل من اذنها ولاجنها قبل دقايق ذابحه روحها بالرگص

صار وجها مقابلي نهضت نور حتى يلبسون الحلقات
فتح العلبه طلع الحلقه مبتسم ادري يريدني اشوفه فرحان
لبسها انطش الجكليت صاحت عذراء حبها ولك حبها ولتخاف من امها

لزم راسها باسها اجت عينه بعيني
ابتسمت بااستهزاء على منضرهم

يتبع

شو حسيتها تنطق عليهم