رواية ضحية لمن لايرحم الفصل الرابع وخمسون 54 - بقلم زهراء الحسناوي

البارت 39

ضحيه لمن لايرحم

بقلم زهراء الحسناوي

،،،،،،،،،،،،،،

هلي مامش للحزن رداد
حتى ارتاح من حزني؟؟
هلي گام الكلشي يوجعني

اهداء من احدئ متابعاتي الورده 🌹
،،،،،،،،،،،،،،،،،،،،،،،،،،،،،،،،،،،،،،،،،،،

قبل البارت كل عام وانتو بخير يااجمل شي صار بحياتي متابعاتي الورده
ربي يحفضكم من كل سوء بحق النبي محمد
سنه سعيده يارب عليكم وعلى امة محمد اجمع
احبكم كلش اهوايه 🥰 🌹🌹

وهذا البارت كثير منكم طلبو مني هديه راس السنه وماحبيت اكسر بخاطركم ف باذن الله باجر ينزل بارت غصون
،،،،،،،،،،،

زينب،، طلعت صارت بوجهي نذيره مبتسمه فكرت يمكن فرحانه بروحتي لان ماتحبني
طلعت لبره طلع حسن وراي يلبس بقمصلته صعدت وهو صعد يسوق

حسن،، ليش ترحين؟؟

زينب،، كتله بصوت ناصي تعبتك خيي
عاد اهناك امي واختي يدارني

حسن،، شاكيلج انه؟؟

زينب،، لابس

حسن،، بس شنو؟؟ تره روحتج خايف منها
بس انشاءالله مايصير الابالي

زينب،، ماعرفت شيقصد حرك السياره اكو محل بطريق بيتنه مره جبيره تبيع بي دائما من نرجع من المدرسه اني وغصون ابوها ينطيها الف لو 500 نشتري بيهن من هاي المره
حسن وگف السياره ونزل

ماعرفت شيريد كل ضني يشتري باكيت جكاير اله
شو هذا اشتره جيس جبس من هذا الاكبار يمكن بي 30جيس صغار واشتره صندوگين عصاير من كل شغله اخذ علاگه لان المره ماعدها اهواي غراض

حطهن بالجنطه گتله المن ذني شتسوي بيهن؟؟

حسن،، الج غير

زينب،، شكرا خيي والله ماكو داعي

حسن،، لاتاكليهن اني جبتهن البنت اخوي اكليهن وگليلها الخاطرج جاي اكلهن ذني من عمج

زينب،، ضحكت وصلت لهلي نزل الغراض الباب مفتوح دفعته وفتت هو ماقبل يدخل

من راح دخلت للبيت لگيت امي تعجن ويمها امير فرحت بجيتي خطيه
نزعت عباتي اخذتها مني وكعدت يم امير ابوس بي
فرحان
اخواتي اثنينهن ماهنه يرحن الصبح يحشن للهاشه
لان هذا مصدر رزقهن يحلبن ويبيعن حليبها لو يخثرن روبه ومرات يسون مكانس وطوابگ للخبز من خوص السعف

امي سوت ريوگ وراحت جابت الغراض دخلتهن للغرفه كتلها حماي اشتراهن لخواني ماكتلها الي شويه واجت مريومه صايره مره دخلت 13وكل ماتكبر ملامحها تحلئ اني وهي اكثر شي نتشابه بينه شبه من ابوي بس زينه تشبه امي
شمرت روحها بحضني الفرحه ماسايعتها

مريم،، بس اروح انزع ملابسي اندمرن طين عثرت بالبزل

زينب،، راحت بدلت شويه واجت شايله نساتل وجبس امي ضحكت گالتلها ضامتهن بعيد ادري تشميهن انتي؟؟

مريم،، خشمي وحده يركض يدور شي حلو اكله

زينب،، كعده بسيطه بكلشي بس بيها روح وتردلك العافيه نسيت حتى الالم
امي سألتني على حملي كتلها اخذت سونر وبيه بنيه
والدكتوره گالتلي ارتاحي لاتتحركين

ام احمد،، فدواتك ربي على عطاياك وهداياك الحلوه
ابوج الله يرحمه يحب البنات جان يكول لوعشره عندي مااملهن لان كل وحده تجي يجي رزقها وياها

زينب،، اتذكرت سوالفه من جنت اسوي شي يفرحه واني جبيره موزغيره بس جان يصفگ بيده الاثنين ويغني يمه البنات عشره واگول اگليلات

دمعت عيني ترحمتله وقريتله الفاتحه امي گالت نامي مددي موزين عليج تضلين كاعده مددي وارتاحي يمج اخواتج كلشي لاتسوين وتعبين

وفعلا اخواتي مثل الحمامات داير مدايري زينه صح مجنونه بس عدها نسبه من الفهم بحيث من اريد اگوم حتئ لوللتواليت ماتقبل تضل تصيح
لااااا دا داادا موزين
معناها مزين ع الطفل تتحركين
بليل يتصل لواء احسه مهموم مااعرف شبي
اسأله يگول كلشي ماكو بس مشتاقلج

حتى اني رغم مرتاحه يم اهلي بس مااحس روحي كلش مرتاحه لان بالي يمه
صح من اني اهناك نذيره مالها دخل بينه لان تتعاند وياي وتريدني اني اخدم روحي واخدم لواء
بس من اروح لهلي هي تقوم بواجبه هي تغسل ملابسه وتنطي اكل

وره اربع ايام تمرضت الهايشه كلش
لاتاكل ولاتشرب
امي وجها غده اصفر عليها لان هاذا مصدر رزقهم

تالي عمي راح جاب البيطري كشفها گالهم كلش تعبانه اذبحوها قبل لاتموت ويحرم اللحم مالتها
عاد اذبحوها وبيعوها للگصاب

بس امي ماقبلت وطول الليل حاجه ويه الهاشه بالحويه والله گمت للحويه اريد اشوف امي يشهد الله لگيت الهاشه متمدده ماتتحرك بس عيونها يرمشن امي حاطه راس الهاشه بحضنها وتذب عليها ماي لان البيطري گال عدها حمئ

امي بس دموعها تجري كل شويه ورفعت اديها للسما

ام احمد،، ربي رحمتك التفت النه ياالله

زينب،، امي تمسح بدموعها بشيلتها
وتمسح على راس الهايشه والله كانه تحجي والهايشه تفهمها
امي گلتلها اعذرينه تعبناج بس مالنه غيرج صارلج خمس سنوات موكلتنه خبزه حلال
امي تحجي وتبجي قسما بالله انتبهت دموع الهايشه تجري تفاجئت گتلها يمه شوفي عيون الهايشه تجري

گالت ييمه بينه روح وبيها روح والروح عزيزه
عبالج ماتفهم؟؟
لاتفهم بس ماتگدر تحجي
تفهم وتشوف المانگدر نشوفه وتحس

گتلها يمه جا ماذبحتيها واستفاديتي منها خاف تموت وحرامات

گالت بعدني عندي امل برب العالمين وتصحئ الهايشه

رجعت للغرفه لان تعبت وبارده الدنيه امي ماخذه بطانيه شامرتها ع الهاشه ادفيها

للفجر سمعت صوت بجي خفيف يم راسي رفعت راسي مفزوعه شفت امي ماده سجادتها تصلي وتبجي
بجيت وياها بس انتضرتها تكمل صلاه

كملت ولمت السجاده

عدلت گعدتي اجت يمي تمسح دمعه توگع الثانيه
كتلها شببج يمه؟؟

ام احمد،، ماتت الهايشه يزينب

زينب،، حجتها ونحبت بصوت مكتوم
شهگت كتلها يمه سوده بالوجه جا اشلون راح ادبرون عيشتكم؟؟

ام احمد،، لاتحجين هيج يمه الله مايرضه
الله سبحانه وتعالى ولي التدبير
مااگول غير (فوضت أمري إلى الله)

زينب،، رفعت اديها بالدعاء ودموعها تجري

ام احمد،، اللهم أني استودعتك أمري وما حاك في صدري وما انت اعلم به مني دبرني يا الله فأني لااحسن التدبير

زينب،، رجعت كملت كلامها گالت ابوج قبل جان من تضيگ بينه الدنيا وماعدنه نصرف يقره هذا الدعاء والله بيومها انام مرتاحين لان يرزقه من حيث لايحتسب

اتذكرت كلام ابوي عن النمله الجانت بنص البحر بين صخرتين يكول الله سخر اللها ضفدع يغوص القاع البحر يخذلها اكل بحلگه
يختم كلامه
اذا الله مانسئ نمله بنص البحر؟؟
حاشه لله ينسئ عبده

الصبح اجه عمي جاب سياره حمل اخذو الهايشه مااعرف وين ودوها
بيومها كلنه نبجي عبالك ميت شخص عزيز
بس امي الوحيده رغم دموعها تهدي بينه اتكول الرازق حي واني خليت عيني بيعين الله مالي غيره

اسبوع مر وجان يجي خالي اخو امي
بمجرد ماحجه انصدمنه
من گال طلع ل امي ورث
ضلينه صافنين وامي مصدومه گالتله خيي ورثيش؟؟
هو ابوي الله يرحمه جانت حالته تعبانه انوب امي منيلها ورث؟؟

جاوبها خالي گالها جدج ابو امج عنده قطعه ارض قديمه حتى ناسيها مانعرف عنها شي والبارحه اجه ابن خالي گال قسمنه القطعه مالتنه وطلع بيها ورثه ابوي واخواته الورث من امه

وامك الها بالورث 200متر والارض ع الشارع العام
اباوع ل امي من صدمتها ماتعرف تبجي لوتضحك وكل شويه رفعت راسها للسما تبوس ايدها وترفعها للسمه مثل اليدز بوسه بالهوئ من فرحتها

انوب فهمها لازم باجر تروح توقع حتى تاخذ حصتها
وهم اقترح عليها اقتراح گالها اشتريها منج ب10مليون دينار

امي كيفت من سمعت بالمبلغ بس بسرعه لگفت السالفه عبالك واحد نبهني غمزت ل امي هي فهمت السالفه مني كالتله لا خل اشوف ابو مثنئ وباجر هو ياخذني اوقع

رجع خالي لح عليها حتئ تبيعه اذا تم التوقيع بس الحمدالله امي رفضت

بيومها ماشفنه طعم النوم لان بحياتنه ماصاير ويانه هيج شي ومن فرحتنه ماگدرنه انام

عمي عرف بالموضوع كالها الصبح اخذج ونروح للقسام الشرعي ونشوف نتاكد من السالفه

وفعلا ثاني يوم اخذها عمي من الصبح
للساعه 12الضهر يالله رجعو بس عمي وامي وجوهم تضحك
امي عيونها حمر مبينه باجيه
عمي ابو مثنئ بالباب ماقبل يدخل للبيت كالها فوتي بشريهم وبالخير عليكم

امي دخلت نريد نفهم مانفهم من ضحكها ودموعها فرحه ممزوجه بحزن وامتنان لله تعالئ لان فعلا هو ولي التدبير يقلب الموازين كلها بلحضه وحده
قبل اسبوع كنه نبجي حايرين بالعيشه واليوم فتحلنه باب رزق حتى ماكان بالحسبان
يعني قطعه ارض حتى اصحابها ناسيها
بامر من الله تنكشف ويطلعون يذرعون المساحه وتطلع ل امي واخواتها واخوتها ورث سبحانك يارب العالمين

كتلها يمه بشري؟؟

ام احمد،، ولج يمه فرحاانه فرحاانه
الارض 200متر عبالي صدگ تنباع ب 10مليون

زينب،، لعد شكد سعرها؟؟

ام احمد،، عمج يكول الناس ادور على هيج موقع دواره حتى يفتحون بي محلات
زين اذا انباعت ب40مليون عمج قدرها تقدير يكول تجيب اكثر

زينب،، والله من فرحتي احس الطفله لعبت بحالي لعب
حطيت المخدة وره ضهري واتمددت بطني شكبرها كدامي سحبت الدشداشه لزكتها على بطني حتئ اشوف حركتها
ساعه تروح من هاي الجها وساعه ترجع للجها الثانيه ومن تدفر تخرعني تخليني اضحك ومريم تحط ايدها على بطني تفز عبالك متكهربه
صدك جانت فرحه كلش حلوه اول مره نحس بيها

يوميه اتصل بلواء مايعجبني صوته مختنگ يجر حسره وره حسره احسه مهموم وبين كل كلمتين يسألني تحبيني؟؟

اذكر اول مره گتله احبك كل شويه يگلي عيديها لويحلفني صدك تحبيني وراح تضلين وياي مهما يكون؟؟
اجاوبه بكل حب مايفرقنه غير الموت

كملت عشرين يوم يم اهلي دخلت عشر ايام بالثامن
اتصلت بي كتله لواء بعد مااتحمل مشتاقتلك عيوني عطشانه الشوفتك
احسه بهت صوته ورجع سالني زينب مهما يصير لاتعوفيني

خفت گتله اسم الله لواء وليش اعوفك؟؟
سكت ماحجه
جر حسره اتحسها طالعه من روحه

لواء،، ابقي كم يوم بعد

زينب،، اذا مااجيتني هسه اجي مشي هنه خطوتين بيناتنه

لواء،، هذا هو

زينب،، يحجي كلمه ويسكت

لواء،، العصر ادزلج حسن تعاي وياه

زينب،، نهينه المكالمه لميت غراضي وملابسي بجنطه مريم بجت وامير لازم ثوبي مايريدني اروح
ماادري ابجي على اهلي لو على لواء الميته على شوفته

للعصر اجاني حسن بس مانزل ضل كاعد بالسياره امي سلمت علي من صعدت جنطتي
جاوب ومبين من نبرت صوته ضايج

اول ماسديت الباب التفتلي

حسن،، اشلونج؟؟

زينب،، جاوبته زينه الحمدالله

رجع دار وجها للطريق تحسه عنده حجي مايگدر يحجي
وصلنه للبيت هو نزل الجنطه بيده واني نزلت عفته ودخلت وهو رجع للسياره

دخلت البيت هدوء ماكو صوت
بوجهي رحت الغرفة لواء طايره اريد احضنه حضنه مال واحد مشتاق الحبيبه بگد رحمة الله

فتحت الباب تفاجئت ماموجود
طلعت موبايلي اتصلت بي
اجاني صوته اليرد الروح كتله وين انت اني بالبيت؟؟

لواء،، ويه ذياب

زينب،، سده قبل مااحجي صوته يرجف
احس گلبي انهبط
بداخلي گلت اشلون يطلع والدكتور مانعه؟؟

حسن من نزلني شغل سيارته وراح
انفتح باب غرفة عمتي طلع عمي سلمت علي رد السلام وسالني شلونه حملي وخو وضعي زين احسن من قبل

جاي نحجي وجان تنزل نذيره شايله طفل ع الدرج والمصيبه نزلت وراها حنان
عيوني ضلت صافنه عليهن

عمي تركنه وطلع
نزلن اثنينهن وگفن جدامي مبتسمات
انتبهت حنان لابسه دشداشه عاديه الوان وبطرگ ثوبها بس لافه حجابها على رأسها
عيوني صارت تنتقل بيناتهن اريد افهم شجابها واشلون هيج لابس الوان وتمشي جدام عمي وحسن ولواء بدون عبايه؟؟

نذيره،، شبيج صافنه؟؟

زينب،، هزيت راسي مامفتهمه كتلها شبيه؟؟

حنان،، شو بس تتصفنين خاف ماعاجبيج؟؟

نذيره،، عوفيها حبيبه روحي سوي عشه الزلمتج على جيه هسه

زينب،، شايفين؟؟ لا ماشايفين لان مايحس بالنار غير المحترگ بيها هيج احس
حسيت روحي
بين الوعي والاوعي
بين الصدمه وعدم التصديق
همست زلمتتها؟؟

نذيره،، اي يبعد روحي زلمتها

زينب، لحد هاي اللحظه ماجاي استوعب شي
بصوت يرجف وخنگه سدت مجرئ التنفس صرت اتنفس بصعوبه كتلها حسن قصدج؟؟

حنان،، يااا شوف هاي استغفر الله حسن حماي

زينب،، وگعت دمعتي بلعت الغصه همست
لواء؟؟

نذيره،، اي جا منو غيره وشبيج تتبجبجين؟؟

زينب،، ماتحملت ضحكت من بين دموعي لان اعرف لواء مايسويها كتلها لتجذبن عليه

تركتهن وطلعت للحديقه ادور علي اريد افهم شنو السالفه
مالگيته رغم اتصلت بيه وگال طالع بس حسيته موجود بس مايريد يواجهني

تركتهن وصعدت شايطه روحي تلهب نار
نسيت حملي ونسيت كلشي صعدت الدرج ركضت الغرفتي فتحتها مالگيته
صحتت لواااااء

افتر بالغرفه مثل المخبله دموعي تنزل حاره حرگتني حرگ گلبي احسه راح يسكت

طلعت من الغرفه صارت بوجهي غرفة حسين القديمه مسحت دموعي ورحتلها فتحتها مغيرين كلشي خشاب جديد كلشي مبين يختلف متغير

اهنا اتاكدت اكو شي صح بس عقلي جاي يرفض التصديق
امشي واصيح واهذي بصوت فاقده ماعرفت شحجي ولااجاي اشوف احد گدامي اريده بس هو
اريد اشوفه اريد اكعد واعاتبه واكله ليش هيج سويت؟؟
،،،،،
أني اكتب لألتقي بألمي في روح غير ساكنه جسدي
اكتب لأرئ ماذا يفعله ذلك الوجع بغيري؟؟
تمنيت أن اجهش بالبكاء على صدر من تسبب لي بهذا الوجع
لارتمي بين احضانه واعاتبه على فعلته
ارتمي بحضن من كان شاهد على كل معاناتي
من كان يشهد كيف كانت البشر تنام والليل يمر على اعيني مرور الكرام
هو وحده الذي يعرف حجم هذا الوجع القاتل
الذي اامر به الآن

،،،،،،،،

نزلت كلي ارجف احس ماجاي اسمع بس اشوف الدرجه احجي بصوت عالي مجاي اسمع روحي فاصله
اباوع عمي بيده تليفونه ياشر عليه مااعرف شبي او ويه منو جاي يحجي
نذيره وحنان واكفات يم ام لواء يضحكن

رجعت دخلت الغرفتة اهمس باسمه كانه گلبي وعقلي فقط اليسمعوني احجي

التفتت شفته دخل هميت روحي واتقدمت الجهته
راد يحط ايده على راسي دفعته

شهگاتي علت وخلتني تيهت روحي وماعدت قادره ع الكلام
حجيت بصوره متقطعه

ل لو لواء ص صد صدگ ا انت ا انت

اريد اجمع الكلمه واحجيها حتى الساني خالف وياي مايقبل ينطق الكلمه

اشوفه يحاول يحتويني يلمني لو يهديني بس وين اني احس روحي صعدت السابع سما
ورجعت

لواء،، زينب بسس خليني احجي وياج
بس افهمينني

دفعته ودرت وجهي عنه مااشوف شي جدامي صعدت الغرفتي فوگ وقفلت الباب

ختلت بين الكنتور والحايط اكو مسافه متر تقريبا
گعدت بالگاع لميت ابجي بحرگه عيني للباب

دقايق سمعت صوته يدگ الباب بقوه صرت اسمعهم بس مااگدر احجي

لواء،، زينب افتحي الباب

نذيره،، وشبيها خبصت نفسها عشتوو

لواء،، نذيرره اسكتي رحمممه للخلقج اخذيها وانززلن

زينب،، عرفتهن اثنينهن واگفات بره وطردهن
صوته سجاجين تنغرز بروحي
بهاي اللحظه اتذكرت كل كلمه حلوه حجاها الي
تذكرت ضحكنه وسوالفنه
من ينيمني بحضنه يضل يشم بشعري

دگ الباب بقوه

لواء،، ززينب دخيلج افتحي الباب راح انجلط
بس افتحيلي احجي وياج والله وعيونج بس كلمتين

زينب،، جامده بمكاني رفعت اديه سديت اذاناتي مااريد اسمع صوته
حسيت من رجفة البصوته خايف اكون سويت بروحي شي
سمعت هوسه بالباب ومن ضمنهن صوت حسن يتعارك وياه

حسن،، كاافي عوفها ترتاح

لواء،، انزلوو كلككم بس احجي وياها

حسن،، شجنت متوقع تباركلك؟؟

شيخ منهل،، عوفها بويه تهدئ وتفتح الباب لاتخاف

حسن،، كللله من وراااك هم معتبر رووحك اب؟؟

تصلح الغلطط بغللط اكبرر منه
رييت الله لاخالقني يمممككم

زينب،، هوسه واحد يعتب ع الثاني حتى عمتي اسمعها تصيح كل هاي الهوسه بالمغربيه الخاطر الفصليه!؟؟؟

اخر شي هدئو بس ناري ماهدئت ابد
تزيد ماتنقص

لاساعه ولاساعتين اني بالغرفه وحدي قافله الباب مااريد اشوفه

اسمع صوته گاعد بره ادري بي اذا نزل مايگدر يصعد مره ثانيه
تالي وره شويه سمعته يهددني اذا مافتحت الباب يكسره
بحة صوته رجفته وخوفه وقلقه واضحات بس كل ذني ماشفعله عندي
تمنيت احط خنجر من نار بصدره واگله شوف شنو جاي احس؟؟
نفس الخنجر البصدرك بصدري ذابحني

مددت بالكاع اريد بروده الكاشي تبرد ولو جزء بسيط من النهار التلهب بروحي
مااعرف شگد بقيت على هذا وضعي

غمضت عيوني فتحتهن شفت ابوي يم راسي يبجي وياي
مالي طاقه احرك روحي ولاانهض واحضنه واشكيله من ضلم البشر
بس فاتحه عيوني اباوعله وابجي

حسيت بلمساته على راسي
شويه شويه صحيت ماشفت ابوي هذا هو
الذبحني نفسه گاعد يمي يمسد بشعري
دفعته

وخ وخرررر

لواء،، زينب ولج ذبحتيني كاافي الخاطر الله
بس خليني احجي ويااج

زينب،، عدلت گعدتي مااعرف اشلون فتح الباب سديت اذاناتي رفعت راسي دخل حسن ومن كد ماجنت فاصله حتى ماادري بروحي حجابي واگع

حسن،، لواء كافي عوفها تهدئ رحمه لخووك

لواء،، اطلع حسن خلي بس افهمها

زينب،، حسن صفگ ايد باايد استغفرالله طلع وسد الباب وراه
لواء گاعد گدامي عيونه تعبانه وجها تعبان

لواء،، زينب راح احجي وافهميني وروح حسين ماجاي اعرف شنو جاي يصير وياي
وداعة عيونج ماادري ولج تايه

اني متفاجئ بروحي اشلون قبلت واشلون اقتنعت وعقدت عليها

زينب،، راد يلزمني دفعته
درت وجهي سندت راسي ع الكنتور وبجيت ضايعه مااعرف شتصرف لو شحجي وياه

لواء،، زينب احجيلج كلمه وريحي گلبي
وعلي مالمستها ولا اتگربت الها ولاراح اتگرب منها
اشلون الي نفس ادنه المرت اخوي ولج مانايم من يوم العقدت عليها ولليوم حسين گبالي بكل مكان

زينب،، رجع يريد يلمني الصدره دفعته
احس اريد اضربه اريد يحس بلوعة گلبي
عدلت گعدتي وباوعت بعيونه وجان لازم
احجي هلكلمتين

گتله وداعة بنيتي الماشافت النور من اليوم تحلم تلمسني
من اليوم اني وانت رجعنه غرباء

يتتتبع

هاي الاغنية من زينب تگول جانت اول اغنيه اخلي يسمعها احسها الها تاثير خاص بروحي
وخاصتا من يگول

ياما طبيبك كنت
اسهرلك وارعاك
اتمسكنت واتمكنت
واجرحت من داواك
شكرا حبيب الگلب
هاذي جزات المحب؟؟