رواية ضحية لمن لايرحم الفصل الاول 1 - بقلم زهراء الحسناوي

ستعلمك الحياة
انها لاتقف على احد
وستجد نفسك
تستطيع العيش
بالجميع او بدونهم 💔
................................

///ضحية لمن لايرحم ////

//زهراء الحسناوي//

................

مساء الورد بنات
حبيت انوه على شغله الراح تقرو بالبارتات راح يصدمكم لان القصه هاي صار اشهر ماخذة عقلي حتى مالي واهس اكتب قصه غيرها من كميه المصايب البيها
لتعتبرون احداثها خياليه لان كل واحد بينه عندة قصه تشيب الراس ولتنسون احنه بالعراق العضيم كلشي وارد بي
وحتى اني ك كاتبه يشهد الله لو اكتب قصتي والمرار العشته حتنصدموم وتكولون معقوله اكو هيج بشر؟

اتمنى من كل بنيه مراهقه تقرة الروايه وتعتبرها درس يوعيها من احلامها الورديه الي عاشتها بسبب الروايات الرومانسيه

فياريت اتسوون تاكات المتابعيكم واني حتابع التعليقات واليسوي اكبر عدد من التاكات حيتم نشر حسابه بداخل الروايه
وشكرا للجميع
...............................

زينب..رجليه بادن ردت اوكع
امي الواكفه بالباب مامفتهمه شي منو الوكع ومنو المات
مصدومه ماتكدر تتحرك
اجه طفل يركض علينه كالها خاله الحكي ابنج كتل حسين ابن الشيخ

كلمات نطقها الطفل بس كانت عبارة عن كارثه وكعت على روسنه
امي وكعت بالكاع صافنه لاتحرك. ايد ولارجل
الجيران والعالم كلها طلعت تركض

شخطت من يمنه سيارة عمي صاعد بيه مثنى يسوق ويمه احمد يتلفتون خايفين

عرفنه احمد سوة المصيبه وانهزم
اني ومريم سندنه امي دخلناها للبيت فاصله بس تهمس بصوت خافت
رراح احمد رااح احمد

قفلنه البيبان وكعدنه نتراجف خايفين ندري بيت الشيخ مايسكتون عن الصار ب ابنهم
رغم سمعنه الناس تصيح مات
بس ضلينه نندعي كون مابي شي وكون مجرد جرح بسيط

نص ساعه واندك الباب بقوة مريم لازمه ثوبي تصيح ااجونه راح يموتونه
كتلها بس انطيني مجال اشوف منو بلكت ابوي
وفعلا من وصلت للباب سمعت ابوي يصيح افتحو

ركضت فتحتله الباب اسمع جوشه مال عالم بالشارع وسيارات
سديت الباب ردت افوت كبت العيطه مال صايح النسوان ابيت الشيخ

اختض جسمي صريخهن مال سمعن خبر موزين
دخيلك ربي كون تفكيري غلط
دخلت اركض شاردة لكيت ابوي يصفك ايد بيد بحركه

مايحجي بس دموعه تجري
دقايق وانهجم باب بيتنه واشتغل الرمي
مانعرف يرمون علينه لو بالجو
كل النعرفه وحدة ختلت بظهر الثانيه خايفين
ابوي كعد يم امي ادي على راسه وامي دخلت ب انهيار عصبي تهذي بكلام مامفهوم
تريد تكوم تطلع وابوي لازم ايدها يدري فقدت

ابو احمد..يابه زينب اكعدي يم امج انه طالع الهم

زينب ..اتقربت هزيت راسي بمعنى اي
لزمت ايد امي ترعش
بقت عيني ورة ابوي
اصوات الزلم اتعالت بجيت كتله دخيلك ربي ابوي مريض دخيلك التفت النه بمصيبتنه

رمي
وهوسه
وصريخ
واحنه نتراجف كاعدين بزاويه الغرفه مافاهمين شراح يصير
ابوي مارجع صار الفجر وهو ماكو

الساعه ب السته رجع بس حالته تبجي
هلمرة روحه الانكسرت مو بس ظهرة
دخل حلكه يابس عبالك وجها كله اتراب
كعد بالكاع تعبان

امي باوعتله بنظرة تريدة يطمنها انو ابن الشيخ مابي شي
بس للاسف كلام ابوي خله صوت بجينه يعلى
من كال مات الرجال

امي اغمى عليها ركضت مريم جابت ماي غسلنه وجها
ونبجي ماساكتين لان مصيبه وطاحت على روسنه

ضلينه كاعدين للساعه 9الصبح لا اكل ولاشرب
مانحس غير رمي رصاص على بيتنه
ختلنه بظهر ابوي نتصارخ
حط ادي فوكانه يحمينه لان الرمي على بيتنه الرشك مال الطلق بالحايط عرفنه بيت الشيخ سوو دكه عشائريه علينه

استمر الرمي دقايق بعدها هدء الوضع طلع ابوي بس قبلها ماخلينا خاف تجي طلقه
بس كال لازم اطلع مايصير اختل وابني كاتل ابنهم

بجيت على ابوي الخلص عمرة يركض ورة طلايب احمد
مرات اسمعه يشكي الرب العالمين
يكله يالله ماجنت ابن عاق ولااذيت امي وابوي
ولازنيت ولا اكلت حرام
بشنو عصيتك حتى تجازيني بولد عاق ؟

اجه عمي عادل كال لبوي لازم ناخذ شيخنه ونروح البيت الشيخ نطلب عطوة لو نشوف شيطلبون شيحجون بعد هاي بلوة وطاحت على روسنه
لان مثنى ابني مشارك بالمصيبه وهو الي مهزم احمد ولو لازميهم بساعتها بيت الشيخ يكتلوهم
هسه الوادم محتارين بمصيبتهم على ساعه يجتلونه ويجتلون حتى الطفل البعده يرضع عدنه

وفعلا عمي اخذ ابوي والشيخ وكم واحد وياهم البيت شيخ منهل بس جوابهم كان يخلص عزا ابنهم ورة الثالث يكعدون ويكولون شنو اليطلبو من ابوي

عشنه ثلاث ايام برعب حتى نوم ماانام اذا غفت عيونه عقلنه يضل صاحي خاف يهجمون علينه واحنه نايمين

امي اكثر وحدة متاذيه دمعتها مانشفت ابد
تهذي بكلام مسموع
ساعه اتكول ابني كتل عريس حتى ماشبع من مريته ولا شبع من الدنيه

وساعه تكول لو كاتلين احمد ولا القهر الجاي يشوفه ابوي

مرت ايام الفاتحه واحنه لازمين كلوبنه خاف يطلبون فصل جبير وحالتنه تعبانه شيريد يفصلهم ابوي وهو شهريته 200الف دينار يستلمهن منا يروح يوزعهن للديانه منا لان نتسوك بالدين ع الراتب نسددهن

اليوم الرابع وصار وكت المشيه
راح ابوي وعمي واخذو بني اجوادهم وياهم شيخ عشيرتنه والناس الخيرة حتى يشوفون مطالب بيت الشيخ شنو

المشيه كانت محدديها الساعه ب 4العصر
ضلينه كاعدين اني وامي واخواتي بالحوش
ذابحنه القلق تمر على السانه ادعيه ماداعيهن قبل بساع بلكت الله مايطلبون شي غالي
بلكت الله مايطلبون من ابوي يجلي من المنطقه (يجلي يشيل او ينتقل)

للساعه 6يالله رجعو بس وجوهم مكدرة مبين المطالب ثكيله لان شكلهم مايطمن

امي طفرت لزمت ايد ابوي تريد يفهمه شنو مطالبهم؟
بس ضل مدنك مابي يحجي
عمي كالها ابنج السكط ضيع نفسه وضيعنه وضيع ابني وياه
والله لو ادري راح يكتل جان حطيت طلقه براسه وخلصنه منه
دمر ابو ودمر عائلته بسبب استهتارة ودمرنه كلنه وياه مو بس انتو

زينب..امي تحجي وتبجي سالت عمي
ام احمد ..خيي احجي شرادو وشطلبو منكم

عادل..طلبو فصل 50مليون واثنين نسوان

زينب..امي لطمت على وجها وكعدت تملخ بروحها كالها عمي احمدي ربج واشكري ادخلت الناس الخيرة وغيرو قرار اولاد اخو الشيخ

ام احمد..صخام وجهي وشرادو اكثر بعد؟

عادل..طلبو ياخذون الكاع مالتكم وتجلون من المنطقه ويهدرون دم ابنج ونفصلهم مربع اربع نسوان
واذا صار هذا الشي معناتها نعيش بثارات من جيل الجيل يوعون ع الدم والثار وتصير بحر دم
ومو فقط ابنج يروح بيها حتى ولدي ينكتلون
بس الحمدالله من لهنا واتراجعو عن كلامهم لان السادة والمشايخ ادخلو يهدون النفوس

زينب..نسمع ونبجي مابيدنه غير دموعنه نواسي روحنه بيهن

ام احمد..وهسه خيي كلي شراح تسوون

عادل..المصيبه مصيبتنه كلنه والله حتى ماجاي اشوف دربي وسكري معلك منشده باالي ومثنى السكط هم شارد وي احمد والله بس يطيح بيدي اشرب من دددمه

زينب..بعدها عمي كال انطونه مهله ثلث ايام نبيع كاعنه وننطيهم افلوس
ونسوان
اعرف وافهم كلامهم بس عقلي رافض يصدك لو يستوعب
دائماً جنت احلم اتزوج شخص يدللني يعيشني بيت دافي بيت مااشوف بي العوز والجوع ولا اشوف بي ليالي الشته الباردة
اهواي احلام بلحظة صارن سراب
من سمعت ابوي كال ننطيهم زينب ومريم

ضليت جامدة ماعندي اي ردة فعل عكس مريم الدخلت بنهيار عصبي اتفرفح من البجي
اباوعلها طفله وينها وين اتروح فصليه؟
خلتها امي بحضنها وهي متهسترة تصرخ مااروح والله مااروح

اهنا والدي اطلق العنان لدموعه بجه بصوت عالي شك كلبي شك

حتى عمي انهضم من شاف بواجي ابوي ونحيبه بس ماباليد حيله الفاس وكع بالراس ولو نبجي دهر ماراح نكدر نغير شي

امي كالتله على بختك خيي مريم حتى ماتنحسب مرة طفله بعدها

عمي افتهم من كلام امي انو مريم حتى شهريه متجيها لان بعدها صغيرة
نهض على حيله بخطوات كلها تعب راح بدون مايحجي اي شي
لان ابنه هم يعتبر مشارك بالجريمه

بليل ماغمضت عيني ابد ولاشفت النوم
حتى امي تفتر بالحوش كل شويه تشمر شيلتها وتندعي بلكت الله مايخذون نسوان فصل

ثاني يوم من غبشه ابوي راح هو وعمي على ناس يعرفهم يردون يشترون قطعه ارض اتكون موقعها ع الشارع العام
وكاعنه مكانها مثل مايردون موقعها ع الشارع
ف اشتروها ب ٤٠مليون
يعني ماجابت سعر يسد مبلغ الفصل

عمي عادل كال عندي مبلغ ضامه للوكت
وانته اخوي ومصيبتك مصيبتي ف الافلوس العندي فوك افلوسك ندفعهن الهم

بقت بس سالفه فصل النسوان واشلون مريم تروح فصليه وهي زغيرة كلش
والمعروف بالعادات والتقااليد
انوالياخذوها فصليه معناتها دمها بمكان دم ابنهم ولو يموتوها اهلها مايدخلون

يوميه ناس رايحه وناس جايه واتقرر اني ومريم ياخذونه جنت هادئه بشكل فضيع حاسه روحي بحلم على ساعه اصحه منه
بس مريم وضعها تعب كلش
صخنت وبس تتقيى من الخوف واسهال لزمها
بحيث ساكنه الحمام وفوك الضيم لاتاكل ولاتشرب
لمن وكعت بنصنه
اخذها عمي وامي يركضون للمستشفى وبعد التحاليل طلع عدها جفاف وفقر دم ايام انكلبت بيها حياتنه رائسا على عقب

بسبب الاسهال الحاد صابها جفاف عيونها صارت بنكرة عبالك افريقيه

عمي من شافها كال حتى اذا انطيناهم مريم فصليه راح يرجعوها لان طفله وبعدها مابالغه
حجه كلمه ونحب وياها
كال انطيهم عزيزة كلبي وامرنه لله
كان يقصد غصون

موقف عمي ويه ابوي مستحيل اكو شخص ثاني يسوي نفسه
الافلوس عادي بس مال ينطي بزرة فصليه وهو ماله ذنب هذا الشي ماصاير قبل حتى لو مثنى الساعد احمد ينهزم

اتجهزت الفلوس بس اني اهنا يالله صحيت على نفسي وفزيت من حلمي على واقع مر
واقع راح يدمرني الاخر عمري راح اعيش بالذل بسبب ذنب مااقترفته وغصون كذالك شنو ذنبها تدفع ثمن غلطة موغلطتها

ثاني يوم كان الموعد حتى ياخذون الفلوس وياخذونه وياهن
بليل اتعشينه بقهرنه ودموعنه بس اليوم نلتم
وباجر انروح فصليات
حياة تختلف ناس حادة اسنونها علينه
دخلت للغرفه البيها انام اني واخواتي واخوي الزغير مختنكه اريد ابجي اريد الطم بس اخاف ابوي ينجلط وايموت
التمس بعيونه نظرة مااكدر افسرها ممزوجه بدموعه وكسرته
شكد راح اتكسرة الدنيا اكثر ؟

امي اجت يمي بيدها علاكه
فتحت الدولاب مالتي طلعت كم هدمه الي حطتهن بالعلاكه تبجي بسكوت وتمسح دموعها بشيلتها

اطلع بملابسي وادندن بنحيب

ام احمد..امسه المسه وهاي هيه
وبنت بطني انطيها فصليه

زينب ..كملت وجرتني الحضنها
بهاي الليله فقط دموعنه تشكي حالنه
دخلت مرت عمي عادل تبجي وتطلم على بتها وفعلا شنو ذنبها تنطي بتها فصليه وهي مالها ذنب بس عمي اجه وراها اخذها يجر بيها كالها
اذا ماانطيتي غصون اقري على روحي وروح اولادج الفاتحه لان ابنج العار يعتبر مشترك بالجريمة زين راح لهنا وتنسد السالفه وينتهي الثار احسن مانضل طول عمرنه عايشين ابحر دم
امرنه لله انضحي بوحدة احسن مانضحي بالكل

كعد بالكاع لازم راسه كالها عبالج مامحروك كلبي؟
هاي وحيدتي وعزيزتي ومدللتي
ماجاي انطيها اني جاي انطي روحي وياها

مرت عمي فقدت وحقها محد يلومها
تالي اخذها وطلع كوة جرها

الصبح لبست ثوبي ولفيت حجابي بدون روح احساسي مثل احساس المسبيه
دخل ابوي مدنك بالكاع حضني ويبجي

اتمنيت يحجي شي بس عبرته خانكته
باسني براسي وطلع امي كذالك
رحت اسحل بروحي يم مريم نايمه والكانونه بيدها
دموعها تجري دنكت بستها
لاول مرة احس روحي خايفه ومرعوبه كل جزء بيه يختض ويرتعش من الخوف موقف موسهل ولاهين واصعب واكبر الكتب ماراح تشرح جزء من الاحساس والخوف البداخلي
حتى زينه اختي الي ماعدها عقل ومافاهمه شي تبجي ولازمه ثوبي
انفتح الباب دخل عمي وراه تمشي غصون تتعثر بعباتها وجها احمر من البجي

البيت صار عبارة عن اصوات نحيب كلها ضجت بالبجي
اخذنه عمي وطلع اتلكانه باالباب مال بيتنه اخو شيخ العشيرة مالتنه هو الراح ياخذنه الهم
كان المفروض ينتهي اربعين ابنهم يالله ياخذونه
بس من استعجالهم مبين راح ياخذون ثار ابنهم من اثنين مراهقات

اهنا ودعنه اهلنه وحياتنه واحلامنه وكلشي ورحنه برجلينه للمجهول
اخذنه الرجال البيتهم بيت ال منهل كبال بيت عمي بكم بيت
وحدة من شروطهم يتغير طريقنه قبل اذا نريد نطلع من المنطقه لازم انمر على بيتهم لان صاير بطريقنه
غيرو وصار لازم نروح من الجها الثانيه للشارع
لان كالو اليمر من يم بابنه من بيت جليل انموته

بيناتنه مسافه يمكن ٣٠٠متر موبعيدة
بس الرجال صعدنه بسيارته
نزلنه ابابهم طلعلنه واحد منهم وبعدها طلع الشيخ اعرفه
اتشكرو من الرجال وراح زمخ واحد بيهم بينه اني وغصون
غصون شهكت خايفه بس الشيخ ماقبل كاله موهيج بويه

دخلو واحنه وراهم وهاي اول مرة ادخل بيت الشيخ
منهل جنت اشوفه قبل من اروح للمدرسه انمر على بابهم اكول هنيالهم بيتهم ايخبل قابل مثلنه
مرات امي ماتقبل على كلامي وتزمخ بيه اتكلي هذا يسمو حسد عيشه كولي الحمدالله وبالعافيه عليهم الله يمهلهم بحلالهم

دخلنه للبيت صار اكبالنه مضيفهم متروس زلم
طلعو جهال اثنين يباوعون بوجوهنه واحد منهم كال للثاني روح كول ل امي جابو الفصليات

كلام الطفل كفيل يدخل الرعب النص روحي
كلمت فصليات ترن ب اذني

ثواني وطلعت جوكه مال نسوان لابسات اسود
شافنه كامن يلطمن ويتصارخن وحدة منهن هدت علينه تبجي تريد تضربنه بس وحدة لزمتها تمنعها
من كلامها عرفتها العروس مرت حسين المات
بعدها طلعت مرة وياها اثنين بنات يطلع عمرهم بكدنه وحدة من البنات اتقدمت علينه جرت حجابي احس فروة راسي انشلعت مرت حسين دفعت المرة الازمتها وهم اجت هادة علينه هوسه نسمع بس مانشوف وحدة اتجرنه والثانيه تحمينه
مرت حسين. تفرفح وكل شويه تتفل علينه

دنكت ابجي عليها مو على روحي
بعدها باايام عرسها ماصارلها شهرين من اتزوجت تالي تترمل

اجت وحدة منهن ضخمه جرتنه من اهدومنه الداخل البيت
طببنه الصاله بيتهم
نترتنه للكاع بقوة كعدنه اني وغصون وحدة تباوع بوجه الثانيه

اهنا وجان انتبه على مرت الشيخ جابها طفل يدفع بيها بعربانه جسمها الفوك كلشي مابي يتحرك يمكن ضاربها شلل نصفي

بكلبي دعيت على اخوي الي حرام اسمي اخوي بعد مادمرنه انهزم ولاكان هو السبب
كلنه رحنه ضحيه بسبب طيشه واستهتارة
قتل شاب بعمر الورد ماشاف شي من حياته

شنو ذنب امه ذاك اليوم فرحانه بعرسه
واليوم مشلوله بسبب موته

غصون لزمت ايدي لان المنظر مفجع ويرهب بكل معنى الكلمه

اصوات الصريخ اتعالت بجي ولطم وصايح
هاي تنحب وذيج تندعي ع الكان السبب
واني وغصون مانعرف شنسوي
كاعدات بزاويه الغرفه نتراجف مافاهمين شي

صار ياهو اليجي يضربنه كبار صغار اتكفخ بينه
غصون من الخوف والرهبه وكعت ترعش بمكانها
رغم حالتها وخوفي عليها بس محد اتقرب
صرت اهمش مثل الغركان
اريد واحد بكلبه رحم يشوف حالتها
بس احنه واكعين بنص بشر ماترحم
بشر نسو قول الله تعالى
(ولاتزر وازرة وزر اخرى)

يتبع

تابعو الحسابات

user68433270

awl_xi

Fatima19989

--55na--

suj_20

صور شبيه الابطال

لواء

زينب

ذياب