رواية ضحية لمن لايرحم الفصل التاسع وثلاثون 39 - بقلم زهراء الحسناوي

البارت 28

ضحيه لمن لايرحم

بقلم زهراء الحسناوي

،،،،،،،،،،،

اچذب واضحك ويه الناس
وانسئ همومي واتحسن
وبس اختل وظل وحدي
مدري منين يلتمن 💔
،،،،،،،،،،،،،،،،،

زينب،، دخلت البيت اهلي
اخواتي بعدهن نايمات ذبيت عباتي وحجابي ودحست روحي بنصهن
حضنت مريم جريت گصيبتها اشم بعطر شعرها

عيوني غورگن بالدموع واني اتذكر نومتنه قبل
اني ومريم وزينه انام وحده بضهر الثانيه من البرد بالشته حتى ندفه
اذا فارشين ثلث دواشگ الصبح تلگاني كلنه محصورين بدوشگ ونص من نبرد وحده تنام بسد الثانيه

عندي هاي الايام ايام العوز والجوع والبرد ارحم الف مره من دفو بيت الشيخ ع الاقل ابيت اهلي انام مطمنه بدون ماافز خايفه لاتدفر عليه الباب نذيره

مريم تدفع بيدي حسبالها زينه حاضنتها
رفعت راسها تريد تعيط صميت حلگها واني مبتسمه
فتحت عيونها مصدومه
التفتتلي نامت صفح وحطت راسها بصدري
اشوف متونها تنهز عرفتها تبجي
متحاضنات بقوه نبجي بدون صوت

بستها براسها وبعدها عن صدري تمسح بدموعها
اشرتلها بمعنى گومي

نهضت وانطتني ايدها گومتني امي تسوي جاي بالمطبخ هو مو مطبخ مثل باقي المطابخ لا
مكان مايتجاوز مترتين ونص طول بمترتين عرض
طباخ ارضي بريمز واشياء بسيطه اني واخواتي كنه نسويهن من صناديگ الطماطه الفارغه الكان يجيبهن ابوي الله يرحمه من جان حارس بالعلوه واهل المخضر ينطو الصناديك الفارغه فيجيبهن النه
نسويهن طوابق ونربطهن بسيم حديد نسويهن خانات للمسواگ نحط بيهن بتيته بيذنجان بصل

امي تسوي ريوگ تفور حليب من الهاشه
واحنه گاعدين بالباب لان المطبخ مايتسع النه كلنه دوب امي صايره بي هي والصناديگ

مريم،، والله والله حلمت بيج ومن شفتج حسبالي حلماانه ماادري انتي اهنا من صدگ

زينب،، ابتسمت الها سالت امي يمه وين حطيتي الاغراض؟؟

ام احمد،، بغرفتي روحي تلگيهن مغطيتهن بالبطانيه عن امير بس يشوفهن لازم يفتحهن كلهن

زينب،، مريم طفرت من مكانها ركضت الغرفة امي
شويه واجت محمله بحضنها عصاير ونساتل وتفاحه وموزه

مريم،، يمااااا اليوم نااكل مووز

زينب،، بلعت الغصه گوه الضاهر اني واخواتي مكتوبلنه ننحرم من ابسط الاشياء

گعدت مريومه تفتح وتاكل الضحكه شاگه حلگها مامصدگه

مريم،، بااجر مدرسه اتررس جنطتي نسااتل وعصايرر

ام احمد،، انجبي يوميه تاخذين حاجه وحده

مريم،، والله مااا باجر اخذ وياي موزه وتفاحه وعصيره ونستله واكلهن گدام البنات حتى مايعيرني الفگر
يوميه يجيبن اشكال والوان وياكلن گدامي
واني اضل مقهوره لان امي ماتنطيني افلوس اشتري

زينب،، نزلت دموعي مسحتهن

ام احمد،، كافي الوكحه اطفري منا گومي گعدي اخوانج ولمي الافراش حتئ نتريگ

زينب،، التفتتلي امي وكملت كلامها

ام احمد،، ييمه والله ماملحگه العيشه صعبه ابوج جان خيمه فوگ روسنه المگرود ضهره محني ويشتغل ويچد ويجيب واحنه گاعدين
هسه حسينه بعازته من مات وصرنه نباوع للدرهم
بس شنگول غير
الحمدالله على كل حال عايشين احسن من غيرنه ع الاقل نايمين جوه سگف يسترنه
اكو ناس بحصره هذا الشي واكو ناس مالاگيه تاكل

زينب،، گعد امير اجه يزحف على بطنه هو مايحجي بس من يفرح يضل يضرب بالكاع ويضحك
من شافني مايعرف يعبر عن فرحته ساعه يضرب الكاع بيده وساعه يضحك نهضت كمت يمه كعدت حضنته

امير صح معوق بس نضيف بشكل وشالع گلب امي
لازم من يزحف وتندمر بجامته يضل يبجي لازم تبدله وتلبسه بجامه غيرها نضيفه

انفتح الباب وطلعت زينه ضلت صافنه
صاحت

زينه،، ززززينب زي زينبببب

زينب،، اجت تركض حضنتني رغم جنونها بس حست الفراق شگد صعد من ردت فعلها لان مامصدگه
دفعت امير تريد تگعد يمي لان بالجها الثانيه كاعده مريم وهمه اثنينهم يخافون من مريم تبسطهم

اجت امي بيداها الصينيه بيها استكانات وطاوه مگليه طماطه جابت قوري جاي وكتلي مفوره بي حليب لان اخواني بيهم اليحب يشرب حليب وبيهم اليحب يشرب جاي ويغمس بالطماطه

ام احمد،، ميلوو عن اختكم لاادفروهاا ابطنها وتطلع خوش جيه لهنا
وانتي الوكحه وخري خل زينب تكعد بالنص بين امير وزينه ماتشوفيهم يتمالخون عليها كل واحد يريد يكعد بصفهااا

مريم،، هو انتو كدرتكم على مريم
وخرررت ارتاااحو

زينب،، نسكت واحد يزعل الثاني تالي غمزتلها وهمست بصوت ناصي
كتلها الضهر تنامين يمي
ضحكت واقتنعت بسرعه
اجت ادنت تاكل

اباوع كلنه ملتمين بگلوب طيبه مابيها حقد
تاكل اللگمه تحس بيها طعم يختلف
رغم هي بس خبزه تغمسها بالجاي بس من فرحتك تحس نفسك تاكل اطيب والذ اكل تاكله بحياتك لان داخلك مرتاح وفرحان

كملنه ومريم شالت الصينه كعدنه نسولف وامي. تسالني اشلونهم وياج؟؟
كان جوابي كلش زينين ويحبوني ويحترموني
ماحجيت لان مااريد اضيف ضيم جديد لقائمه القهر الموجوده عند امي
حتى ماتشيل همي فوگ الهم والحمل الشايلته على متونها

طول ماكنت احجي كلامي جان بلواء وحنيته وسوالفه لگيت روحي ماكو شي على الساني غير طاري لواء وطول ماجنت احجي بي مبتسمه احس روحي اشتاقيتله من هسه
لواء مدرستي الماكملتها المدرسه التعلمك كلشي المدرسه التفهمك هذا صح وهذا خطأ

رغم فارق العمر بيناتنه بس من يحجي وياي يحسسني اني وياه نفس العمر
مرات جنت اساله شعجب عمرك جبير وماتزوجت؟؟

يجاوبني كل شخص اله نصيب بالحياة وانتي نصيبي وقسمتي من الله عز وجل
يمكن خلاني رافض فكرة الزواج لان ضاملي الافضل
ابتسم واخجل من كلامه يگرص خدي
يگلي مو گتلج الله ضاملي الافضل؟؟
لان عوضني بمره گلبها نقي مثل نقاوه الماي

سالفه تجر سالفه ناسين الدنيا وناسين الوكت نضحك ونسولف نستذكر ايام قبل

اندگ الباب راحت زينه تركض فتحته
شويه وجان نسمع صوت عمي يصيح

ابو مثنئ،، يهل الدار

زينب،، امي لفت شيلتها عدل ولبست عبايتها صاحتله فوت خويه البيت بيتك

دخل عمي محمل مسواگ حط العلاليگ بالكاع
تفاجئ بوجودي
گمت من مكاني رحتله شفايفي يرجفن اشوف بي ابوي لان فعلا يشبه بالوجه شمرت روحي بحضنه

زلمه شكبره حضني يبجي الكل ييجيون ويانه

ابو مثنئ،، يابوويه يازنييبه

زينب،، بعدني عن حضنه سالني شوكت اجيتي ومنو جابج جاوبته رجلي جابني والتحق للدوام

كعد يمنه يسالني عن عيالي فرحان
بعدها سالت عن غصون گال غصون عدها بخت الله حطها يم ناس تخاف الله وعمتها خوش مره معدله
وقبل فتره جابتها واجت واني اشتريتلها موبايل اخابرها اطمن عليها

كيفت من عرفت غصون عدها موبايل كتله عمي انطيني رقهما حتى اخابرها مشتاقتلها كلش

راحت مريم جابت جهازي من الجنطه وعمي ردلي الرقم كتبته وحفضته بالجهاز

شويه واترخص گال اليوم عشاج يمي انتو كلكم معزومين يمنه
امي ماقبلت گالتله تسلم نريدك طيب
من راح عمي الساعه ب 1الضهر تقريبا دگ موبايلي
شفته لواء يتصل عبالك جاي يشوفني بسرعه ابتسمت

فتحت خط اجاني صوته الينطي طاقه ايجابيه للروح

لواء،، مريتي اشلونج؟؟

زينب،، فاتحه الحلگ اذراع مااكدر اسيطر واسد حلگي لاارادي ابقئ مكشره من يحجي وياي

جاوبته زينه وصلت؟؟

لواء،، اي بويه وصلت الحمدالله اهلج اشلونهم اخوانج؟؟

زينب،، زينين وماتتصور شگد فرحو من شافو انته جايب ذني الغراض

لواء،، كله مسجل يم الله
امانة زينب شيحتاجون تحجيلي من انزل بااذن الله اجيب التردو

زينب،، كتله كلنه نريدك طيب ومانريد غير سلامتك

لواء،، بعد حيلي ام حسين ولج لاتحجين هيج تره هسه ارد بعدني توني وصلت والبين الضلوع خبصني خبص عليج مشتاقلج من هسه

زينب،، انثولت گتله منو البين الضلوع؟؟

لواء،، ماتعرفي منو؟؟

زينب،، لا

لواء،، وين تحطين راسج من تنامين؟؟

زينب،، على گلبك

لواء،، جا هو الخابصني عليج

زينب،، تعالو دوروني سحت ومعت وتسرسحت اعصابي جريت المخده اتمددت ردت اگله هل من مزيد؟؟
بس استحيت فشله الزلمه بالواجب وين ينطي وجها

لواء،، ياالله بويه انه رايح فشله الجنود يباوعولي وانه اوزع ابتسامات عود الثجيل مالتهم لاتفضحينه

زينب،، نهئ المكالمه واني الابتسامه لازمتني يربي گلبي يصعد لسمه يرفرف من اسمع صوته معقوله صرت احبه؟؟ مااعرف شنو الحب ومامجربته قبل

بليل امي ماقبلت تروح وياي البيت عمي گالت فشله الزلمه فوگ خسارته ويانه نروح نكلفه بالعشه
روحي بس انتي

وفعلا رحت بس اني بيتهم بصف بيتنه بس بيناتنه حديقه
اتلگتني مرة عمي بذاك الملگه الحلو اكيد سبب فرحها لان عرفت غصون مرتاحه الله يسعدهن

كعدنه اني وعمي اجه مثنئ خجلان اشوفه يفتر بالمطبخ يستحي يفوت يسلم لان يحس بالذنب
تالي عمي زمخ بي حتى يجي دخل مدنگ
اجه سلم الدمعه بعيونه شفت بي احمد
اختنگت

الاخت شتريد غير اخو يصيرلها عون وسند وحزام ضهر تتحامه بي بوكت الشده
اله اخوي شالني وشمرني بالنار بيده وانهزم لسه محد يعرف عنه شي

من سالت امي گالت والله ييمه هذا تعبي وشيب راسي كله بسبب احمد لان مادام مات ابو بسبب المصيبه السواها عمره ماراح يرتاح ولايشوف الراحه
يوم اسمع بي يشتغل حمال ويوم يشتغل يصيد سمج ويوم عامل بالبلديه
شوفي دام ابو ماراضي عنه الله مايخلي يرتاح بحياته

مثنئ كعد يمنه ومرة عمي جهزت العشه المره وحدها ماقبلت اكوم اساعدها صبت ومثنئ ينقل ب الاكل

كعدنه نتعشه ونسولف بغصون وكل مايحجون بيها اريد ابجي ميته وعطشان گلبي عليها صويحبتي واخيتي ورفيجه دربي بكلشي حتى بمصايبي

عمتي جابت صينيه مليانه اكل واكو فواكه وخضره حطتهن بالصينه ويه التمن والمرگ والدجاج
انطت الصينيه لمرتضئ گالتله اخذها البيت عمك

اخذها مرتضئ وراح لهلي شگد احبها حنينه وغصون طالعه عليها
من ودت الاكل ياالله اجت كعدت تاكل

بعدها كملنه وسالفه تجر سالفه للساعه 9بليل يالله رجعني عمي للبيت يتمشئ وياي

دخلت للبيت بس اخوتي كاعدين يباوعون للتلفزيون ونص الشاشه طايره لان گاص اسود قديم حيل
سالت مريم علئ امي گالت بغرفتها
فتحت الباب وفتت لگيتها فاتحه باب الكنتور وكاعده مدنگه
بيدها ستره مال ابوي حاضنتها ودموعها تنزل من عينها توگع ع الستره

گعدت يمها بستها بمتنها ودموعي نزلت وياها

ام احمد،، مشتاقتله يزينب
المره بدون زلمتها ماتسوه فلس
گضينه اني وياه عشره عمر سوه اخذني طفله ربيت علئ ايده مايوم زمخ بيه ولايوم رفع صوته عليه ولايوم غثني بحجايه ودائما محمل نفسه اللوم بسبب عيشتنه اوضعنه دائما يگلي اندعيلي الله يرزقني واعوضج
تالي خوش عوضني بفراگه عافني وراح
خلالي هدومه يواسني على فراگه

زينب،، مسحت دموعها وقرتله الفاتحه من كملت حجت حجايه زرفت گلبي

ام احمد،، واصل ثواب سوره الفاتحة الك ياحبيبي

چنه صغار نگعد وكت الغروب
اباب الدار ننطر جيت ابونه
يرجع مبتسم بس وجها متعوب
ومن يشوفنه يضحكن عيونه
يجي محمل ابونه اشكال والوان
وتضل تلوم بي امنه الحنونه
تعبك هذا تعبك لايبو افلان
تتعب والجهال يضيعونه
لكن يبتسم ودموعه بالعين
ويگل ل امي التعب يستاهلونه

زينب،، بهذا اليوم نمت بحضن امي للصبح
ولاول مره انام مرتاحه ماافكر اباجر ولاافكر من اگعد شراح يصير وشنو اليستقبلني

ثاني يوم الضهر كعدنه وامي تسف سعف تسوي مكانس واني اعرف اسوي مهفات بالسعف من اني زغيره احب اسوي المهفه

اخذني الواهس اسوي بالمهفات ومريم وامي يسون مكانس وزينه مكافش هي وامير

ماحسينه بالوكت اجه الليل واني مامتصله ب لواء

حاجيت مريم تجيبلي موبايلي لان ابد مريم مامطيتني مجال لازمته وتلعب

اجت بيدها الجهاز

مريم،، خابري بسرعه وانطينياه

زينب،، يااا انووب مانه عليه
احجي واضحك طلعت رقم لواء اتصلت ماكو مغلق
رجعت اتصلت مغلق

ام احمد،، هاا يمه شبيج؟؟

زينب،، شو اتصل جهازه مغلق

ام احمد،، يمه زلمه بالدوام خاف شبكه ماكو يمه

زينب،، تركت التليفون بس گلبي مامرتاح
وصارت سولتي كل شويه اتصل مغلق

احس واحد فتح گلبي وحط جمره بصدري
هيج احسها تلهب نارها
لزمت صدري دخيلك ربي

للساعه 2بليل اني كل شويه اتصل مغلق
مانمت غير الفجر

فزيت الشمس طالعه موبايلي جوه راسي جريته طلعت رقمه واتصلت هم مغلق

عدلت كعدتي بمنو اتصل حتى اطمن علي و گلبي يرتاح؟؟

مر اليوم واني الوب حتى اكلي قليل اريد بس اسمع صوته حتئ روحي تهدئ شويه

واجه الليل وهم ماكو وكل مايمر يوم روحي تنقبض اكثر

تالي رابع يوم العصر مريم راحت تجيب الهايشه بالبستان اني كاعده بالصاله وجدامي باب الحوش مال اهلي يعني اشوف اليجي
امي بالمراح مال الهايشه تحطلها ماي بالسطل للصبح خاف الهايشه تعطش بليل

انفتح الباب دخلت مريم مدري شبيها باوعتلي وركضت للمراح مال الهايشه

مدري ليش حسيت گلبي لچمني دخلتها موطبيعيه نهضت من مكاني متوجها للمراح
بعدني ماوصلت للمخزن سمعت شهگت امي

ام احمد،، يممه ماااات؟؟؟

زينب،، حطيت ايدي ع الحايط اسند روحي حسيت الگاع افترت بيه
باب المخزن اشوفه ياخذ وينطي لان لزمتني دوخه
وصلت للباب امي شافتني ضلن هي ومريم وحده تباوع بوجه الثانيه

گتلهن بصوت خاوي منو هو المات؟؟

ي يمه بروح ابوي احجي منو المات؟؟

اهنا بعد ماگدرت لان امي ساكته كعدت حيلي مهدود اجت امي ومريم

كتلهن والعبره خانگتني والحجايه ماتطلع
م منو الم المات؟؟

ام احمد،، اسم الله يومه شو گومي بنيتي

زينب،، حسبالك رجليه مصبوبات بالگاع مايتحركن
ونفسي ضاگ من شفت دموع امي
لزمت ايد مريم زمخت بيها
احجييي شكووو؟؟

مريم سكتت
كتلها اذا ما ماحجيتي راح اتسوودن واطلع مفررررعه بالشااارع ولج احجيييي

مريم،، رحت ا اجيب الهايشه وشفت ه هوسه يم باب بيت عيالج من بعيد والزلم طلعت تتراكض
اني من شفت الهوسه رحت اركض البستانهم اريد اعرف ش شكو شبيهم
لگيت ام جابر واگفه وتصفگ ايد بيد
سالتها شبيهم بيت الشيخ؟؟
گالت خطيه ابنهم البلحشد مفجوره علي عبوه

زينب،، هي تحجي واني احس روحي انسحبت مني
گتلها ي يمه مااگدر اگوم رجليه ميتات

سمعت صوت مال صيحه مره بالمنطقه
سجينه حاره اخترقت گلبي
نهضت حسبالك صارت بيه قوه عجيبه
صحت لواااااااء

يتتتبع

ادري البارت قصير بدون ماتحجون بس ماهان عليه اتركم بدون بارت وانشاءالله البارتات القادمه اطول
بس بارت غصون حاليا ماكامل اذا خلصته من وقت انشره واذا لا ف التمس منكم العذر 😫