ضحية لمن لايرحم الفصل الثاني وتسعون 92 - بقلم زهراء الحسناوي

ضحيه لمن لايرحم

(مابعد الألم)

،،،،،،،،،،،

أحياناً يأتي الألم على شكل موجه قوية جداً
لدرجة نخاف أن تقتلنا
تودون الهروب لكن دون جدوى
يأتي الألم يمسككم ويقطعكم تقطيع
ويرمي كل قطعه لمكان بعيد
والاسوء انه يوجد شخص واحد
يستطيع ان يكوئ قلبنا لهذه الدرجه
اكثر شخص تحبونه
ولاتعرفون لما قام بفعلته؟؟
وكيف استطاع؟؟
كيف استطاع أن يرميكم في وسط جهنم
رغم انه كان بالنسبه لكم هو الجنه بحد ذاتها 💔

زينب،، احس اكو هوسه حجي ومن ضمن الاصوات العاليه صوت مثنئ
فتحت عيوني بالكوه راسي مسطور سطر

صارت بوجهي عمتي لازمه ايدي هي واكفه واني نايمه

درت وجهي شفت عمي ورجال مبين الممرض من الزي الازرك الابسه حسن يدفع بلواء يريد يطلعه خارج الردهه ولواء

يحجي بصوت مسموع يكلهم اشوفهن
ملامحه مبين عليهن القلق والخوف

فطومه نايمه بالسديه البصفي مايفصلنه غير متر واحد
عمي وجها محتقن دم بسبب وجود لواء وحسن
مثنئ يريد يهد عليهم يتعارك عمي يدفعه يرجعه يمنه يگله اهدئ منا وادم فشله لاتفضحنه

حسن اخذ لواء كدامه ماسمعنه شنو يحجي وياه اخذه وطلع
ومثنئ يهد وينفلت يريد يروح يتعارك بس الحمدلله عمي موجود

عدلت كعدتي عمتي ماقبلت كالت ضلي متمدده عندج هبوط مدت ايدها ع الميز مخليه بطل لبن صغير كالت اشربي عمج طلع اشتراه الج وحط بي شويه ملح حتى يستقر ضغطج

اخذته من ايدها التفتت الفطومه مفتحه عيونها مبينه منتبها اجت الدكتوره الخفر جيكت وضعها كالت بس يخلصن المغذيات تكدرون اطلعون زين وضعها كتبتلنه تحاميل مال صخونه كالت الساعه ب4انطيها وحده هاي هم مال صخونه وهم مسكن الالم وتخلي عظامها تفك ماتنشمر

انتهئ المغذي وفطومه من نحجي وياها نسالها شي تهز راسها يعني منتبها وضعها زين
صارت الساعه 2ونص بليل الدكتوره كالت طلعوها استقرت حالتها

دخل حسن مااعرف شنو حجه ويه عمي بس شفت عمي هز راسه بعدها طلع حسن صاح اللواء

مثنئ راد يحجي عمي اخذه وطلع وكف بره بالطوارئ

عمتي من شافت لواء دارت وجها الي تعمدت تكول حسبي الله ونعم الوكيل بصوت عالي حتى يسمعها

رفعت راسي شفته دنك على فطومه ايده على راسها يبوس بگصتها عيونه تتفحصها يحجي وياها بصوت ناصي

شفتها رفعت اديها تريده ياخذها نزل ايدها كالها بابا لترفعين ايدج بيها كانوله من شافها تريده يشيلها
كالها ضلي يم امج باجر اجي اخذج

بكلبي كلت دامك تعرفني امها ليش سلبتها مني؟؟

رفع راسه صارت عيني بعينه ماعرفت افسر نضرته شنو دنك باس فاطمه وطلع وحسن هم بوسها ولحك اخو

رجعو عمي ومثنئ

ردت اشيل فطومه ماقبل مثنئ كال شيلي روحج اول شي

دنك شالها الدكتوره گالت اتركو الكانوله بيدها حتى لاسامح الله خاف يصير شي مانضل ندور على وريد

نهضت لبست عباتي افترت الكاع بيه لزمت متن عمتي بعدني دايخه

طلعو عمي ومثنئ كدامنه وعمتي لازمتني لااوكع
اباب المستشفى شفناهم لواء واكف يم باب السياره عينه الي وحسن فتح الباب وصعد

دنگت مااريد اشوفه ولااباوع بوجها

صعدنه بسياره مثنئ رجعنه للبيت
كلت الغصون ضلي يمي لان وجودها يمي يريح گلبي
ويطمني شكد حاولت انام ماكدرت حسبالك عيوني بيهن فص ملح

ثاني يوم اتصل حسن كال العصر اخذها للطبيب حسبالي يريد بس فاطمه ياخذها بس كالي تعاي وياها

واني هم مااكدر اعوفها تروح وحدها صارت ساعه 5ونص العصر مريم لبست فطومه ومشطتلها واني لبست عباتي وحجابي وكعدت انتظر حسن وره دقايق اتصل كال اني بره اطلعي

فطومه طلعت تمشي جدامي كانولتها انفتح الاسق مالتها ف اضطرينه نشيلها الها

فتحت باب الصدر وكعدت يم عمها واني كعدت بالوره الطريق كله نسولف عن وضع فاطمه وعن الصار البارحه

حسن،، تدرين من سمعت صوت صرختج طفرت ردمت الحايط تيهت حتى الباب مدري اشلون نزلت اركض تلكاني لواء كتله امشي وياي فاطمه مدري شبيها كلت لازم ابوها يدري لان لاسامح الله خاف يصير شي لازم ابلغه

يشهد الله اسوق ورجليه يرجفن كلساع وردت اگلب السياره بالف ياعلي وصلت بيتكم اختج كالت اخذوها للناحيه

زينب،، الحمدالله والشكر صارت سوالف لو صاير ببنيتي شي اموت مااتحمل

حسن،، مابيها شي فطيمه عمها

زينب،، مد ايده كرص خدها

جله صوته عرفته عنده حجي

حسن،، ابوها من شافج وكعتي راد يتخبل كوه دفعته حتى اطلعه بره

زينب،، يادكتور تاخذله فاطمه؟؟

حسن،، زينب لاتغيرين السالفه ماكافي صاركم سنين هذا وضعكم حاولو تنطون فرصه تصلحون الانهدم

زينب،، الانهدم عمره مايتصلح

حسن،، حاولو زينب الخاطر هاي الطفله البينكم والله علعلتوها

زينب،، خل يرد اخوي وانه ارجعله من عين باجر

سكتنه لان وصلنه باب الطبيب نزل حسن والتف الجهت فاطمه فتحلها الباب نزلت لزمت ايده ومشت وياه واني وراها نزلت

دخلنه للدكتور ماتاخرنه لان حاجزين من وكت
فحصها وكتبلها علاج حبوب مال شمره كال يوميه تاخذ حبايه
وشراب وابر بس كتبلها تخطيط للقلب وللدماغ انطانه ورقه كال الاحد جيبوها الي للمستشفى اخذلها تخطيط ومفراز حتى اجيك وضعها لان بالمستشفى بلاش موبفلوس

احنه من وصلنه لللدكتور جانت الساعه ب 6 صارت 7 كملنه وطلعنه فطومه كالت اريد اروح للحمام

حسن،، اكو حمامات بنهاية الممر مال العياده اخذيها وروحي اني رايح اشغل السياره

اخذت فطومه للحمام ماقبلت انزعها لو اساعدها دخلت وسدت الباب وراها شويه وطلعت ماتباوعلي تمشي مدنكه عينها ادور على حسن

كتلها تعاي عمو بره ينتضرنه طلعت جدامي واني وراها شفت حسن بيده موبايله يتصل من شافني نهئ المكالمه فتح الباب وصعد اني هم فتحت الباب الفطومه صعدتها يمه ودرت للكشن الوره صعدت وسديت الباب اباوع حسن مدري شبي

وكل شويه وجاب طاري لواء واني اسد الموضوع
تالي صرنه بشارع عام سايدين سيارات قليله كلش كل كم دقيقه تمر سياره صادفت كورونا كلش منتشره وقليل الناس تطلع

واصلا هذا الطريق مااجينه بي حسن دك تليفونه شاله جاوب يتلفت للطريق مثل اليدور على شي تالي كاله ماشي ماشي ماعرفت شكو وكف علئ صفحه كتله خيي ليش وكفت؟؟

بهل اثناء وكفت سياره ورانه قريبه كلش تفاجئت من شفته لواء احس كلشي بجسمي صار يرجف اكره وجوده واخاف منه مو هين تشوف شخص يقتل جدامك وماتخاف منه

حجيت بصوت عالي عيوني على حسن

حسن شكوو؟؟

حسن،، زينب بس يحجي وياج والله
انطي فرصه بس يحجي العنده

زينب،، جحضت عيوني مامتوقعه حسن يحطني بهيج موقف ابد

ايدي لزمت تجوه مال كشن حسن فتحت الباب اريد انزل لواء بجهتي ماخلاني انزل

صعد كعد بصفي بلوره ولزم ايدي

لواء،، حسن اخذ فاطمه وروحو بسيارتي من اخابرك ارجع

زينب،، ردت اتخبل صحت بحسن
حسسن لاتروح مو هااي المرجيه منك حسسن

اريد اهد ايدي لازمني حيل حسن نزل شال فاطمه واخذها لسياره لواء شغلها ومشه عيني للسياره وهي تبتعد نفسي يصعد وينزل اريد اهد ايدي وانزل مجلب بيه بكل قوته

لواء،، اهدي بس احجي وياج وداعت بنتي

زينب،، نترت ايدي بقوه بس ماكدرت احررها من قبضته كتله ماابينه حجييي وخرر عني لاافضحك والله هسسه اصيح واكول خطفنيي

لواء،، صيحي اكلهم مرتي

زينب،، غصب عني بجيت واختنك صوتي جسمي واديه وكل جزء بروحي يرجفن

لواء،، زينب وحق محمد تعبان بدونج انطيني فرصه اشرحلج

زينب،، احس روحي فصلت مااريد لااشوفه ولااسمع صوته ردت افتح الباب البجهتي لزمني يمنعني مد ايده الثانيه لجيبه طلع موبايل اتصل بحسن كاله ارجع

دقايق وصارت سياره لواء جدامنه بيها حسن
نزل ونزل فاطمه وياه عيونه بيهن قلق يريد يعرف شصار اجه من جهة لواء فتحله الجامه

لواء،، ماتريد تسمعني ماانطتني فرصه اشرحلها
اصعد حسن

زينب،، حسن ضل واكف ماقابل

حسن،، كافي فضحتونه عوفها لواء ماتريد تحجي لاتجبرها

لواء،، سنين ساكت عنها وصلت حدها وياها اصعدد كتلك

زينب،، حسن صعد فاطمه يمه بالصدر ونزل راح السياره لواء قفلها ورجع

حسن،، خويه تفاهمو اهنا وخلني اردها لهلها

لواء،، ماكو رده اذاا ماتسمعني اني همم تعبان اكثر منهاا

حسن،، هسه وين تريد تره خبلتونيي

لواء،، اخذذنه للبيت

زينب،، شهكت لا حسن لا على بختك

حسن ماقبل و صارت هوسه بالحجي بينه وبين لواء تالي عاط بي لواء كاله راح انزل وانزلها وياي اخذها للبيت كوه

حسن من شاف اخو فاقد شغل السياره وتوجه بينه لاكثر مكان اكرها
لاكثر مكان جان حلمي اتحرر من قيوده وانهزم من داخله

الطريق كله هو لازم ايدي حيل لان حلفت افتح الباب واشمر روحي اذا ماوكف السياره
فاطمه بسبب صريخنه وصوتنه العالي كامت تبجي

و حسن يلعن ويسب ماقابل وهو لازمني حيل عبالك راح اطير
وصلنه لبيتهم لو احس الكون على كبره مابي هوا
ردت بس اتحرر من لزمته ماكدرت
حسن نزل فتح باب البيت ودخل السياره

التفتتله وروحي خلصانه مابيه حتى افتح حلگي

هددني

لواء،، موقبل ماتسمعيني

زينب،، صرنه بداخل البيت نزل وجرني من ايدي
ماتحملت صحت بي بصوت عالي

هددددني

ماجان يسمع فاطمه شالها حسن يسكت بيها تباوعلنه خايفه
اسمع حسن يگله على كيف موهيج

جان فاصل مايشوف كدامه يسحول بيه تسحول كرهته قاطات كرهي اله

عبالي يدخلني البيت اهله بس تخبلت اكثر من شفته جرني البيت نذيره

فتح الباب ودفعني اتعثرت بعباتي ردت اوكع على وجهي بس تلاحكت روحي لزمت بالكاونتر

قفل الباب واجاني كتله وخر عني لاالم امة محمد عليك وخررر

لواء،، لميهمممم

زينب،، لزمني من من زندي وجرني وراه حجابي تخربط واحس الدنبوس نام براسي

بيت نذيره اني اذكر بي غرفتين كلشي مااشوف جدامي فتح باب الغرفه ودفعني وكف وره الباب

صحت ملخت روحي وهو على نفس مكانه ماتحرك يباوعلي

تعبت وكعدت بالكاع ابجي اختنك منهم ومن وجودهم دمروني وخلوني شبه انسان كانه ميته سنين وراجعه للحياة

گلبي صار يوجعني حيل مديت ايدي المكان البطاريه من اتوتر تزيد قوه ضرباته ف احس انو اختنك

تعبت من البجي وهو كعد كدامي ضهره للباب اسمع باب بيت نذيره يدك بصوت عالي مااهتم ولانهض

كتله بصوت تعبان كافي خلي اروح ماكفاك السويته بيه

راد يتقدم رجعت لوره رفعت ايدي امنعه ماانطاني مجال كعد ركبه ونص جر راسي الصدره حضني بكل قوته دفعته ماابتعد كارهه حتى عطره وقربه

حسباله اذا حضني راح يحن گلبي وانسه جتله لخوي
حسباله اذا هيج سوه راح انسه اسنين عمري الخلصتهن بالتعب والقهر بهذا البيت

استجمعت كل حيلي ودفعته كعد على حيله يباوعلي بقهر

عيونه حمر يريد يبجي

لواء،، مشتاقلج والله
مشتاق الكلشي بيج
انطيني فرصه وحده وبس

زينب،، نهضت على حيلي كوه احس ماعندي كل قوه
جريت الدنبوس البراسي شمرته بالكاع ولفيت حجابي اشلون ماجان مااباوعله شلت عباتي حطيتها على راسي

وخر اريد اطلع

لواء،، وعلي علي جثتي اطلعين اذا ماسمعتيني

زينب،، رفعت راسي اباوعله باشمئزاز وخوف وكره كل مشاعر الحقد نجمعت بداخلي

شتحجي؟؟
ليش انت شنو الخليته ينحجييي؟؟

واكف متخوصر والايد الثاني مخليها على عيونه تحس دمارات گصته تريد تنفجر
جر نفس وباوعلي محتار شيحجي

لواء،، مستعد اسوي كلشي تردي

زينب،، توجهت للباب اريد اطلع صاير الباب وره ضهره ساده عني

جاوبته بدون مااباوعله
كلشي مااريد بس وخر عن دربي

لواء،، كتلج ماكو روحه اذا ماتسمعيني
مستعد اسوي كلشي لخاطرج

اعقد عليج محكمه واسجل بنتج بأسمج
وبيت اشتريلج وحدج يم اهلج
بس ارجعي

زينب،، رفعت راسي اباوعله بعد كل السواه يريدني ارجع لجحيمهم

كتله والله وحق كل كلمه بالقران ماارجعلك لو تنطبگ السما ع الارض

لواء،، تخسرين زينب

زينب،، قهرني بهاي حجايته وبنفس الوكت ضحكت بصوت عالي رغم الألم البروحي

اخسر؟؟

ليش هو شنو البقئ عندي حتى اخسره؟؟

ابوي ومات بحرگه گلبه وانحرمنه منه ومن حنانه بسببكم

وبنتي وسجلتها بأسم مرتك وحرمتني منها خليتها تنفر مني

وعافيتي وابشرك ماعندي كل عافيه هلتشوف مخلفات جحيم عيشتكم شسوت بحالي خلتني شبه انسان اليشوفني يخاف

واخوي واخذت ثارك منه وخلصنه ببببح
ماكو شي اخسرره بعد

لواء،، زينب احلفلج بكل كتب الله ماجنت اعرف شنو اسوي ليش ماجاي تنطيني فرصه
اذا مو الخاطري الخاطر بنتج

زينب،، لتكووول بنتج

حجيتها ماتحملت بسبب العبره الخنگتني بجيت وصوتي يرجف كعدت بالكاع رجليه ماتشيلني بعد
رفعت راسي اباوعله دموعي مااكدر اسيطر عليهن لاتكوول بنتج لان مالي حق بيهااا

سلبتهااا مني وخليتها تكرهني
خليتني بحسررره كلمه يممه منهااا

جااي بعد كل السويته انته واهلك بيه تريد تردني ليك؟

والله وحگ اترابات ابووي واخووي ماارجع لو اعرف احرگ روحي وماارد لظلمكم برجليه بعد ما الله خلصني منكم

تعررف شنوووو
اني مالگيت محكمه عادله بالدنياا تاخذ حققي منكم
لذلك رفعت امري وقضيتي لمحكمة الاخرررة
لأن الشهوود على ظلمكم الملائكه
والقااضي احكم الحاااكمين
الا لعنننة الله عليكم يا ظالميين

انتووو اخذتوو دنياايه منييي
وأني راااح اخذ اخرتكمم منكم
جهنم تنتظركم وتنتظر كل ظالم

واتذكرر دائما
كل من عليها فااان
كلنه راح نمووت وعند الله تجتمع الخصووم

فقدت اعصابي صرت اصيح وادعي عليهم بصوت عالي هو ماطلع منه اي صوت بس عيونه يصبن دموع بدون ولا كلمه

كملت كلامي واني فاقده احس الساني يحجي حجي مااعرف منين يطلع

كتله
انشاءالله الله يجبر كسره گلبي وخاطري
بكسره گلبك وگلب اهلللك

الله يكسر گلبكممم كسرا لايجبر
اسأل الله العظيم ان يجبر كسره قلبي جبرا يتعجب له اهل السماوات والأرض

وانشاءالله رب العالمين ماينساني
لاني انظلمت
وحسبيي الله ونعم الوكيل عليكم يااا ال منهللل

اباوعله كعد بمكانه منتجي براسه ع الباب يباوعلي ويبجي
اول مره اشوفه هيج منهار يبجي بحرگه عيونه حمر وجها تعبان دنگت مااريد اباوعله
اسمع بس صوت شهگاته وبين لحظة ولحظة يجر حسره مصحوبه بأوووف رببي رحممتك

لواء،، هيج تكرهيني؟؟

زينب،، اكرهك وحاقده عليك بكد شعر راسي

همس بصوت مخنوك

لواء،، مااذيتج بيوم وحبيتج اكثر من روحي

زينب،، هذا حب وهيج سويت بيه لوتكرهني مثل اهلك شتسوي؟؟

لواء،، كتلج خلينه ننسه ونگلب صفحة الماضي
ونبدي حياة جديده خاليه من المشاكل والثأر والتعب

زينب،، غمضت عيوني وصوتي يرجف
همست
ننسى الماضي؟؟
اشلون انساه؟؟
اشلون انسئ دموعي وتعب گلبي ومرضي وكل الحزن السببتو الي ولعائلتي؟؟

لواء،، متاكد بعدج تحبيني مثل مااحبج

زينب،، كل كلمه يحجيها تخنكه العبره كوه تطلع منه الحجايه
كتله
لو اعرف هيج راح يصير بحالي من البدايه جان ماسمحت لگلبي يفتحلك بابه

لواء،، گلبج مايحبني بعد؟؟

زينب،، يعز عليه احجيلك شنو يگلي گلبي بهاي اللحظه

لواء،، اعرف شنو يگول لان هذا گلبي البين ضلوعج مو گلبج
متاكد يگلج اكتلي واخلصي منه بعد كل السواه بيج

لواء،، تدرين شنو اتمنى؟؟

زينب،، سكتت

لواء،، اتمنى اخذج واخذ بتنه ونطلع من العراق كله
نعيش ابيت زغير على كدنه المهم ننجمع سوه
والله حلمي هذا

زينب،، انت البيدك كطعت كل خيط امل وماخليت خط رجعه

كل صلاتك وصومك ماواصلات دامك مااطلكني

مد ادي اثنينهن فرك وجهه ونهض تحس شرايينه تريد تنفجر

لواء،، دام هيج معانده طلاك مااطلك تموتين وانتي على ذمتي
اكثر شغله ندمان عليها هي لان ماعاقدج محكمه
جان عرفت اشلون اجيبج

زينب،، ضحكت على سالفته كتله ليش اكو شي ماسويته بيه وتريد تسوي؟؟

لواء،، راح اخليج ترحين بس تندمين زينب
بنتج تحلمين تشوفيها

زينب،، نهضت من مكاني التفتت له واتمنى يمي سجينه احطها بنص گلبه
عبالك تلوي ذارعي بيها؟؟
تره هي بسببك حب ماتحبني
يممه ماسامعتها بصوتها

باجر تكبر بنتي والدم يحن وهي التجيني برجليها

ابتعد عن الباب فتحته وطلعت هو يمشي وراي وصلت باب المطبخ مقفول والمفتاح بجيبه

صار وراي مد ايدع فتح الباب اباوع من الجامه مال باب المطبخ حنان گبالي من انفتح الباب شفت وجها بوضوح صاير حالها اخس من حالي نضراتها تريد تاكلني

امه وابو ونذيره وبتها كلهم شفت وجوهم المغبره
واكفين محد حجه ولا كلمه
حسن يمشي جدامي واني وراه ولواء من وراي يصيح بصوت عالي

لواء،، تندميين زينب وخلي ابالج مااطلكج لوتبجيين دم

زينب،، تركتهم وطلعت احس اريد اتقيه هي دقايق دخلت يمهم وهيج تخربط وضعي
اشلون لو ارجع لسجنهم مره ثانيه

التفتت لجهتهم واني اصعد سياره حسن
كلهم واكفين مثل الوحوش سبحان الله هي گطره ماي الله يحطها بگصه كل انسان
من توكع هاي الگطره

يوكع ملح وجهك ويصير شكلك يخوف

فاطمه واكفه يم ابوها لازمها بيده
واني صعدت ويه حسن الي لجم گلبي بهذا تصرفه ماجنت متوقعتها منه

صعد حسن وطول الطريق يعتذر ويحاول يفهمني هو سوه هيج الخاطر فاطمه
بس جنت فاصله مااسمعه ولااريد اسمعه

وصلنه لبيت اهلي الساعه تقريبا 10اله ربع
لكيت امي ومرت عمي وغصون كاعدات بالباب
نزلني حسن وراح امي تسالني وين جنتي من العصر رحتو للدكتور
اكو دكتور لسه كاعد لهذا الوكت؟؟؟

ماادري اشلون كدرت اجذب بهذا وضعي لشتي كلها ترجف كتلها يمه سرانه اتاخر والدكتور قبل شويه دخلنه
اهلي يعرفون بهذا الدكتور مال الاطفال يتأخر بعيادته للساعه 12بليل ودائما مثنئ ياخذ ابنه اله لان خوش دكتور

غصون،، وبنتج وين؟؟

زينب،، اخذها عمها ماقبلت تجي وياي

تركتهم ودخلت شمرت جزداني وعباتي ودخلت للغرفه كعدت مديت رجليه حيل ماعندي ابد
رفعت اديه اباوعلهن لسه يرعشن

دائما جنت احلم اواجها وجه لوجه وجنت هواي احضر حجي اعاتبه على كل السواه بيه

ليش من صار الاريده ماعرفت احجي؟؟

مريم جابتلي عشه كتلها مااريد
غصون رادت تبات كتلها روحي وحتى مريم كتلها روحي انتي وزينه نامن يم امي خلني وحدي اليوم

تمددت وبيومها بجيت بجي بس الله يعلم بي
للصبح دموعي مانشفن اتذكر الصار
حسباله يحضني واسامحه
حسباله يبجي وانسه السواه

للفجر واني كاعده صليت وبجيت على سجادتي
يربي شوكت اتحرر منهم؟؟
خلصني منهم ياالله
البارحه دخلتهم بعد سنين ولحد الان مااسيطر على اعصابي احس نفسي بعدني عايشه بذاك بيتهم مجرد دخولي اله خنكني وخلاني ارجع بذاكرتي لليوم الدخلتهم فصليه

شبعوني قهر وضيم شوفوني النجوم بعز الضهر
حرموني وجوعوني وضلموني واخذو حتئ عافيتي

مااعرف شوكت غفيت بس مانمت هواي فزيت الساعه ب8 ونص
كمت غسلت ولفيت حجابي اخذت عباتي بيدي وطلعت امي كاعده بالمحل صاحت وراي وين تردين؟؟

كتلها عندي شغله يم عمي هسه اجي

فتحت باب عمامي ودخلت لكيتهم كلهم كاعدين يتريكون عمي سوالي مجال يمه وكال لغصون صبيلها كلاص حليب

كتله مشكور عمي مااريد بس جايتك بشغله

ابو مثنئ،، كولي بويه خير

زينب،، عمي ابوس ايدك روح على شيخهم مره الثاني بلكت يخلصني منهم

ابو مثنئ،، بنيتي حسبالج ساكت عنج؟؟
والله ماخليت واحد مارحتله واخر شي قبل كم يوم رحت لشيخ وسالته گلت بلكت نطلك غيابي

بس الشيخ كال اذا مايحضر رجلها ويرمي عليها يمين الطلاگ ماتطلگ

زينب،، انهضمت وصرت امسح بدموعي بحجابي
كتله عمي خلصني الله يخليك

ابو مثنئ،، لاتبجين بويه اليوم العصر اروح لكباريتهم بلكت يخلصونه ثارهم وخذو بعد شكو مجلبين؟؟

زينب،، وفعلا للعصر راح عمي واخذ مثنئ وياه لشيخهم العام

للمغرب رجع عمي وحجالنه اشلون الشيخ متصل بلواء حتى يحضر ويقنعو يطلك
الشيخ فاتح حاكيه ولواء يحجي يسمعو عمي ومثنئ

گايله شيخنه طلاك ماكو خليها هيج معلكه
رجعت لهلي دكيت ولطمت لمن تعبت

بليل اجه عمي يمنه
كعدت يمه وجهي وعيوني وارمه من كثر البجي

ابو مثنئ،، بنيتي اليوم ابو امجد حجالي شغله هسه جنت يمه واجيت
بلكت الله تصير نذر اذبح ذبيحه لوجه الله اذا صارت

زينب،، شنو هي عمي؟؟

ابو مثنئ،، صديق ابو امجد يشتغل بمكتب وكيل سيد علي السيستاني ربي يحفظه

كال باجر جيب بنت اخوك وتعال اخذك للمكتب بلكت يشوفولنه حل هناك نحجي ويه حاكم الشرع خل يشوفلنه صرفه بدل ماضالين معلگين

وصدك ثاني يوم اخذنه عمي بس اني وياه وابو امجد لمكتب الوكيل
استقبلنه رجال معمم مبين سيد من عمامته السوده بعدها عرفنه انو هو هذا حاكم الشرع اسمه سيد حسين
بعدها بدينه نحجيله كلشي صار بخصوص الفصل وهجره الصار بيناتنه لان صارلنه من نهايه 2016مهجوره

السيد،، بويه يصير تطلگين بحاله وحده غيابي

اني راح اكتب رساله لزوجج اطلب منه يحضر حتى يطلگ
مدة الرساله 15يوم تعتبر بلاغ اله اذا مااجه خلال ذني ال15يوم
راح ادزله رساله ثانيه كتنبيه حتى يجي يطلك
اذا اجه وكال مرتي اريدها مااريد اطلكها هيج يبطل الطلاق لان هو رايدج وحضر

بس اذا مااجه خلال الرسالتين راح تطلگين غيابي لان ماحضر

زينب،، صار عندي خيط امل من خلال كلام السيد
رجعنه للبيت طول الطريق عمي وابو امجد يحجون ب ال منهل ابو امجد ضاج على وضعي كلش وكل شويه. وكال الله يفرح گلبج يابويه وتخلصين منهم

دز السيد البلاغ لبيت منهل كل يوم يمر اندعي كون مايحضر لواء وكون تعدي ال15يوم ومايجي بلكت الله يخلصني منهم

اليوم يمر شطوله اتمنى امشي باقي الايام ماصدكت تمر الفتره المحدده والحمدالله لواء ماحضر جنت فرحانه بس بنفس الوقت خايفه لان بعد بس بلاغ واحد ادعي من الله واهل البيت كون مايجي

ودز السيد البلاغ الثاني جنت مرعوبه وخايفه اتخيل باخر لحظه يجي لواء ويكول مرتي رايدها وهيج راح اضل معلگه ب ال منهل طول عمري

ماصدكت انتهت المده ولواء ماحضر وقرر السيد يطلگني غيابي
شعور ماينوصف بين فرح وخوف وبين شعور غريب ماعرفت بشنو اوصفه لان صعبه

طلگني السيد غيابي وانطاني الورقه بيدي لزمتها ايدي ترجف مامصدكه وبنفس الوكت دموعي بدت يتسابقن

خلصنه لواء وهذا حدنه من اليوم اتحررت منك ومن ظلم اهلك للابد
بنتي؟؟ على الله العوض بيها
يجي يوم وتكبر والدم يحن وترجع الحضني

رجعنه للبيت واني مرتاحه اتمنيت شي واحد
تمنيت اشوف ردت فعله من يعرف طلكنه غيابي

حسن اخذت منه موقف شكد اتصل ماجاوبت وهاي اول مره نزعل اني وحسن بسبب لواء

وره يومين يوم گلت فشله مااجاوب يبقى هو الشخص الوحيد الوكف وياي
من جاوبته اعتذر وضل يبرر الموقف لان لواء محلفه بس يريد يحجي وياي وحسن مصدگه

محسباله راح اخو ياخذني غصب عني لبيتهم اكثر مكان اكرها
عندي بيتنه القديم البارد ارحم الف مره من قصر ال منهل وجورهم وطغيانهم وظلمهم

من حجيتله عن الطلاك تفاجئ كال اذا سمع لواء يتخبل لان من كناله روح احضر البلاغ گال مااروح لان مايكدرون يطلگونها اذا مااني موجود اله بموافقتي يالله نطلگ

وفعلا ثاني يوم اتصل حسن وفهمني لواء گالب الدنيه ورايح لشيخنه كايله اني ماحضرت والطلاك باطل
دزو على عمي وراحلهم شرح للشيخ كلشي وانطا الورقه لواء رايد يكوم يطگ عمي بنص الديوان بس الناس مفاككتهم

رجع عمي شايط كال راح انفض عليهم گوامه لان ابنهم راد يطگني جدام الوادم
بس عمتي ومثنئ حجو علي وهدوء كالوله سالفه وخلصت

اكيد هيج يسوي من شاف روحه بعد ماله سلطه عليها عباله تبقاله معلگه طول عمرها

بنفس اليوم اتصل بيه حسن بليل
من فتحت خط اللحضه ردت اسده بوجه من عرفته لواء

لواء،، وربج يازينب خاف حسبالج اطلگتي
اعوفج الغيري وشرف محمد ماصارت هاي السالفه

ومادام هيج سويتي تحلمين تشوفين فاطمه
اذا مااخليج انتي برجليج تجيني مااطلع اببن امي وابووي

زينب،، مااتحملت صوته وتهديده البيه مكفيني بسرعه سديته بوجه

حسن قللت اتصالي بي مومثل قبل
بااخر مره اتصل حجالي اشلون لواء تعبان واشلون يخلص اليوم عصبي حتى البلبيت كرهو من عصبيته
بعدها حجالي عن جنه كال شايفتها وحده من اقاربنه بايران ومن راجعه حجت لااهلها اولاد عمها رايحين وراها يدورون مالاگيها
ولحد هذا اليوم مالاگين جنه

نذيره قبل فتره شايله الجدر مال التمن تريد تبزله وحجابها مشكل بعين الطباخ مختل توازنها وفالت الجدر من ايدها متبدي عليها اكثر شي علئ جها وحده من صدرها ورجليها اكثر من شهر يفترون بيها للاطباء

اذكر بعيد رمضان كاعده بغرفتي بليل عمي اخذ عياله وراح يزور الامام علي عليه السلام واخذ مريم وياهم
شكد توسل حتى اروح بس ماقبلت مالي خلگ لكلشي مشتاقه لبنتي

جريت موبايلي وصرت اگلب باليوتيوب
اطلع مقاطع مال اطفال يحن گلبي وابجي عليها اتمنى العب وياها
اتمنى اسمعها تكول يمه
شكد احلم بيها تجي تركض وتكلي ماما جوعانه سويلي لفه
شكد احلم انيمها بحضني واشم ريحتها

يمكن اشياء بسيطه بس عندي صعبه تتحقق يرادلها معجزه من الله سبحانه وتعالى

من طلگني حاكم الشرع غيابي من لواء احس روحي تحررت من قيود الماضي

قبل كم يوم احس روحي نفذ صبري اتمنى اطير واروح اشوف بنتي حتى لو من بعيد اشوف شكلها والمح ضحكتها

صليت صلاة المغرب كملت وكمت جبت القران قريت سوره الانشراح بلكت يبرد كلبي
شلته خليته على صدري

رببي بجاه كتابك برد گلبي
ربي بجاه كتبك وسماواتك حنن گلبها خليها تبجي
تريد تشوفني

تعبت تعبت كلش
لاتعشيت ولاطلعت يم امي واخواتي

جريت موبايلي دخلت ع اليوتيوب صار كدامي مقطع
فيديو للطفله فرح الله يرحمها

احس روحي اشبها كلش
الفرق الوحيد هي ماتت جوه التراب واني ميته على قيد الحياة فوك التراب
اسمع مقطع الفيديو واحس روحي بمكانها

ويلي ويلي
ويلي ع الماعدها ابو يسأل عليها
ويلي ويلي
تموت مهضومه ولا واحد يجيها
تبقئ تتلفت بأخير انفاسها
بحضنه تتمنى توسد راسها

https://www.youtube.com/watch?v=dmkj-WBhmAg

من يوم الركبولي البطاريه لليوم
يوميه احلم اشلون اموت اشلون يوكف كلبي
اشوف لواء شيصير بحاله وراي
هم يبجي؟؟
هم يحزن؟؟
هم يعذبه ضميره ع السواه بيه؟؟

هلمقطع من اشوفه اتذكر حلمي

واحس هذا لواء لان يشبها حتى بالشكل

من اشوف المقطع اتخيله اذا سمع بيه متت هيج يسوي يوميه نفس الحلم ينعاد عليه اتخيل اشلون يبجي على گبري
نفسيتي تحت الصفر اشوف تعليقات تكول حاولي ترحين لدكتور نفسي بلكت يتحسن وضعج
مااعرف شنو اليمنعني احسها صعبه وغير كلشي امي ماعدها تكاليف جلسات وعلاجات
والله اتمنى الموت من كلبي اتمنى اغمض ماافتح بعد
كل ماانام اتوضه واتشاهد يالله انام
محد يحس بيه اذا انتو قريتو احداث قصتي وهيج تأثرتو

شحال اني العشت كلشي
عشت التعب والقهر والجوع والذل والضرب والخيانه والحرمان من بنتي
ماكو احساس ماعشته ابيت منهل الدرجه مرات اگله ربي اخذ امانتك وريحني
ربي اذا بعثتني بحياة ثانيه بجاهك كون حياة تختلف وارتاح بيها

اكثركم يگول ليش دافنه نفسج هيج
وليش انتي هيج ضعيفه
بس اليشرب من الكأس الشربته راح يكون اهش بهواي مني
اصلا مستغربه اشلون اني عايشه لسه

ولحد هذا يومنه ماتخلصت من هلعنه
لعنه ال منهل بشكل تام رغم الطلاگ
لكن تبقى بنتي يمهم وبسبب هلشي صحتي مدهوره

اتمنى تندعولي ترجعلي بنتي بيوم من الايام

لهنا تنتهي احداث قصه زينب
اشكركم جزيل الشكر واعتذر ع تاخير البارتات ❤️

البارتات ذني بدون تعديل لان مااكدر اكتب
من يتحسن وضعي ارجع اعدلهن ❤️❤️

تصويتكم غوالي🌹

بالنسبه للفيديو القصدته زينب ماكدر انزله اهنا لان الرابط ماينسخ لذلك حنشره بحسابي الانستا

Zhrlhsnwy34

ممكن متابعه للكاتبات ❤️
Kawther-mohammed

وايضا تابعو الكاتبه وئام الشيخلي ❤️روايتها في ضريح العشق يمامه
Wyaam1990