ضحية لمن لايرحم الفصل الثالث وتسعون 93 - بقلم زهراء الحسناوي

ماحچينه بس بچينه

وبقت بس ترجف ادينه

مانسينا بس تجاهلنا ومشينه 💔

مساء الخير على ارقئ متابعين

طبعا اني راح احجيلكم عن الصار خلال الشهور المرت
تقريبا هذا شهر الخامس من انتهت القصه
بدايه شهر شعبان اتصلت بيه زينب وشرحتلي
سالفه حاكم الشرع جانت كلش خايفه

مانزلت احداث لان كالت خاف يجي لواء ويخرب السالفه وماااطلگ وابقه معلكه ف لتنزلين كلشي
كتلها تدللين من عيوني وفعلا مانزلت اي خبر عنها

فقط نزلت طلب بالكروب طلبنه من البنات انو يهدن صلوات محمديه لتسهيل امر زينب ماگتلهن شنو هو الطلب

بس جان هو هذا الموضوع والحمدلله البنات ماقصرن

بالنسبه للاحداث النزلتها هاي اول مره اتعاطف ويه لواء انقهرت كلش لان هو هم ضحيه مؤامرات اخته ومرته حنان

من استلمت الروايه وسردنها الي كتلها تره موبس انتن انضلمتن لا حتى همه
انتو الاربعه ضحايا انتن ضحايا عادات وتقاليد تعسفيه مجحفه تبخس حق المره

ولواء وذياب ضحايا اخواتهم لان عذراء خبثها نفس خبث بنت عمها نذيره واثنينهن دمرن حياة اخوتهن

بالنسبه لشبيه لواء من البدايه من دزتلي صورته زينب يمكن شهرين اني ادور على شبيه اله تالي اخر شي من شفنه صوره لعبدالله الشيخ حسينه اكو شبه بيناتهم ك صوره تقريبيه ال لواء

بس بهذا الفيديو النشرته ع الانستا جان الشبه بينهم كلش جبير حتى زينب تكول من شفته يبجي تصورته لواء
مرات احنه من نتعلق بشخص ندور على ملامحه بكل الوجوه التصادفنه وتمر علينه بحياتنه
الدرجه اي شخص نشوفه نكول عيونه تشبه عيون فلان
ملامحه تشبه ملامح فلان
والهذا السبب زينب من شايفه الفيديو تكول حسيته يشبه لواء بصوره كلش جبيره

ماكدرت انزل الفيديو اهنا ف نزلته فقط بحسابي ع الانستا ف اخذت سكرينات

شفت اكو تعليقات بخصوص طلاق زينب كاتبين ماكو هيج حجي والطلاق باطل
طبعا والقران الكريم اني هم مثلكم كنت اكول الطلاق باطل ولازم زوجها يرمي عليها اليمين يالله تطلك

عمري ماكتبت روايه بيها طائفيه تتكلم عن السنه والشيعه لان اتعقد من هيج روايات
اني عراقيه انتمي لكل الطوائف والاديان

بس موضوع طلاق زينب موجود بالمذهب الشيعي اذا مااطلكت وشرحت حالتها لحاكم الشرع راح يطلكها بالطريقه الي شرحتها زينب

عدنه محادثات وتسجيل صوت هذا غير قاضي الجنائية استاذ عدنان العنده علم بحالة زينب اوضعها واول شخص قدم مساعده هو
كال بس لو عاقده محكمه جان اخذت حقها وزياده بس للاسف هي عاقده عقد سيد وبس

بالنسبه لاحداث غصون الابنيه متزوجه حاليا وزوجها مايدري ولاحتى عنده فكره بنشر القصه
لان عيب حاليا هي على ذمه رجال ثاني
والروايه تشرح كلشي صار بينها وبين طليقها مو من الائق انو يقره كلشي صار بينها وبين ذياب

وهم عدها مسؤولية بيت وعيال وبنات اثنين الي هنه بنات زوجها ف گتلها المتابعين بس يردون يعرفون اخبارج على فراغتج دزيلي احداث الصارت وياج بالجديد واني انزلهن شوكت متفرغين

اعتذر ع البارت يمكن مانزل بالصوره المطلوبه الي تعودتو عليها دائما لان هلمره المنعني من الكتابه ايدي
وغير النفسيه التعبانه بسبب كورونا الي طاحت للناس حصاد
يوم اقاربك ميت يوم عمك يوم خالك
يوم جارك

الله يجيرنه ويبعد الوباء عنا وعنكم بحق النبي محمد

احبكم ❤️

هذا حسابي الثاني

Zahra036