ضحية لمن لايرحم الفصل الرابع وتسعون 94 - بقلم زهراء الحسناوي

مساءالوردوالياسمين عليكم
مثل ماوعدتكم شوكت ماادز غصون احداث انزلها الكم
دزتلي حاليا احداث قبل زواجها بكم يوم
وانشاءالله يومين ثلاثه انزللكم باقي الاحداث بعد زواجها
..............

مابعد الألم

(ضحيه لمن لايرحم)

بقلمي زهراء الحسناوي

*******************

أين يذهب الحب عندما ينتهي؟؟

اخبروني لأني محتاجة لجواب أين يذهب؟؟

أيختبئ خلف الدموع التي نذرفها ليلاً وخفية عن الجميع؟؟
أم يشد رحاله لأبعد نقطة في الوريد ليذكرنا نحن
الذين لم يساعدنا الحظ في النسيان بأن ذاك الحب
الذي ظنناه باقيا
قد تحول لوجع دائم لا ينزاح ولايقل ولاتتغير لسعة المه
اخبروني بربكم اين يذهب؟؟؟؟؟

لأنني بحثت عنه خلف الستائر وبين الرفوف وتحت

المنظدة بحثت عنه في كل مكان وما وجدته قط

اتراه لم يكن موجودا من الأساس؟؟؟؟؟

دائما اكو جمله تتردد براسي
(المرء على قدر طيبته يهان)
خسرت هواي أشياء بسبب طيبتي وسذاجتي وغبائي الزايد عن حده
بسبب عدم معرفتي لهواي امور كان المفروض اتعلمها حالي حال البنات حتى مااخسر
اني متاكده كل انسانه مثل حالي خسرت هواي أشياء

قبلت بمستقبل مجهول ويه امجد
بالماضي ماكنت اعرف شنو راح يصير
بس هلمرة قبلت اعيش الألم مرة ثانية
واني على يقين بالخسائر مسبقآ

علقت نفسي بحبال جديده
قبل مااتخلص من الحبال القديمه
الحبال التربطني بماضي ذياب

حاولت اثبت لنفسي قبل مااثبت لهلي
اني تحررت من ذكريات الماضي الأليم
بدل مااتخلص من هلشي واتركه وره ضهري تماما
وافقت على بديل
قبلت اخاطر بگلبي ومشاعري واخوض معركه احسها خسرانه من قبل لاتبتدي

بدون تفكير او وعي للراح يصير الي بالمستقبل
وافقت بزواجي من امجد حتى انعتق من حبي القديم لذياب

قبل مااتشافئ تماما قبلت بشخص هو نفسه يحتاج
شخص يساعده حتى يتجاوز محنته ويشفئ من جرحه

كاعده بغرفتي وصافنه ع الذهب مالتي جهزت كم شغله
وباقي الاغراض امي
من تطلب مني اروح اشتريهن وياها ارفض

اگلها يمه روحي انتي مالي خلگ
وفعلا تروح تجيبهن وتجي
مرتين راحت اشترتلي فساتين ومن تجيبهن واقيسهن يطلعن لو كبار لو صغار وتضل امي ترزلني لان ماقبلت اروح وياها

ماضل شي عن موعد العرس قدمو الموعد قبل رمضان
بخمس إيام يعني الزواج حيصير بااخر ايام من شهر شعبان

اجت امي ومبين على ملامحها ماقابله على تصرفي

ام مثنئ.. يمه تره والله شلعتي گلبي اني وابوج
اذا ماتردي ليش قبلتي؟؟

بالله هذا شكل عروس عرسها بعدله كم يوم؟؟

من البداية كتلج يمة فكري لاتستعجلين اخذي وكتج حتئ مابعدين تتندمين

غصون،، كعدت امي تحجي بحركه
تحجي واني بالي مو يمها ابد تايها روحي مااحس بطعم اي شي
زينب اجت وكفت يم باب الغرفه عينها علينه

تركتهن ونهضت اخذت ملابس من الكنتور بدون كلام طلعت من الغرفه وبوجهي للحمام قفلته وشغلت الماي

تركت ملابسي وكعدت ابجي بحرگة گلب
بجيت بجي احس بدم ينزل من عيوني مو دموع

شنو ذنبي هيج يصير وياي؟؟
عمري 24وهاي ثاني مرة اتزوج
وبالمرتين ماحسيت بفرحه ابد

شوكت ارتاح؟؟
شوكت افرح؟؟
شوكت اتجاوز الصار واكمل حياتي؟؟

ماجاي ابجي على ذياب
بس جاي ابجي على روحي
موسهله ولاهينه بهذا عمري ومطلگه وراح اتزوج للمره الثانيه ويمكن هم افشل وارجع هذا الجان مخوفني

اكو شي بدماغي مقتنعه بي التطلگ مره مايگعد حضها ابد وهاي الفكره مسببتلي خوف ورعب
وخاصتا امجد وبرود تصرفاته وياي حتى اتصال ميتصل

اله امي مرات اسمعها تلمح لحوراء يالله يتصل
كل اتصاله مابي دقيقه بمجرد يسأل اشلونج شنو محتاجه مامحتاجه

محد يحس بيه
احس ضجيج وصراعات بداخل عقلي
يمكن يشوفوني قويه وثابته من الخارج
بس من الداخل احس بنار مشتعله محوله كلشي بيه إلى رماد

احس راسي صار شكبره من البجي وعيوني ورمت بعد مااشوف بيها
امي صارت كل شويه ادك الباب تستعجلني اطلع حتى نتغده

لبست ملابسي وطلعت تايها مااعرف شسوي
كانه ادور بالفراغ ماعندي لاوجهه ولا توقيت هيج ضايعه رغم اهلي داير مدايري

لفيت شعري بالخاولي لوره ورحت اكعد يمهم
حسيت بالكل منتبه لشكلي ولعيوني بس رغم نضراتهم الاحسها متوجها الي مارفعت راسي بقيت مدنكه

حطت امي ماعون تمن كدامي لزمن الخاشوكه وسرحت بتفكيري حتى مانتبهت على صوت ابوي وهو يحجي وياي
ولاحتى عرفت شنو جان يحجي

الخوف بداخلي كلش جبير
الف فكره وفكره تتزاحم بعقلي
ها راح اكدر اتأقلم ويه امجد!؟؟
بناته راح يحبوني؟؟
راح انسى الماضي واعيش المستقبل براحه؟؟
راح اتجاوز الصار وابني عائله مبنية على الحب والتفاهم؟؟
وبعد كل هلتفكير اكول خاف اجرب وارجع انصدم وانفصل مره ثانيه؟؟

رجعت للغرفه بدون مااكل شي شويه ولحگتني امي وزينب
شكد يحجون عليه بس اني نفسي مااعرف شجاي يصير وياي
قلق فضيع ندم على خوف

حتى امجد
دائما احس حاله من حالي
هو قبل بيه الخاطر بناته
واني قبلت بي خاطر اتجاوز الماضي

واثنينه مانعرف اشلون راح نتراهم ونعيش حياتنه سوه تحت سگف واحد

احد اسباب تقديم العرس كان مرض عم امجد واصابته بكورونا رجال كبير ويخافون بوقتها لاسامح الله يصير شي

فكالو العرس حيكون مختصر هو حنه وهو زفه بيوم واحد وماكو هوسه وعزيمه فقط عمامهم وخوالهم
مايعزمون غريب

امي تلح عليه حتى اروح وياها اختار كم فستان لان مااشتريت غير ملابس مال بيت وكم شغله
بعد اصرار منها هي وزينب اقتنعت

بدلت و لبست عباتي وطلعت من الغرفه
شكد توسلت بزينب تروح وياي بس ماقبلت
لان من تمشي هواي تتعب وتضل كل خطوتين تكعد بنص السوگ بسبب البطاريه
لذلك اخذت مريم ع الواهس تروح وياي امي تاخذنه

مثنئ يوصلنه للسوگ ويتركنه يكمل شغل وتتصل بي امي من نكمل
امي تمشي كدامنه واني ومريم وراها مريم كل شويه وكالت شوفي هذا الفستان شكد حلو اذا لبستي يطلع احلى
امي تأيدها واني بس عيوني تفتر بيناتهن

تالي امي طكت روحها صارت هي تختار
كل شويه وكالت لو ماجايبتج وياي احسن

تركتنه ومشت كدامنه اخذها الواهس واني مريم لازمه ايدي وتحاول تقنعني بفستان عجبها
توني دااحجي وياها سمعت صوت وراي

التفتت وتفاجئت من شفتها سارة هي واثنين نسوان وياها وحده جبيره بالعمر تقريبا بعمر امي والثانيه بنيه شابه
اول ماشافتني احتضنتي بقوة فرحانه ومتفاجئه بشوفتي ماكنت اضن راح تجمعنه الصدفه بهيج يوم

بعد السلام والسؤال عن احوالي واحوالها عرفت منها هاي المرة زوجة حماها وهاي بنتها والمفاجئه انو البنت هم زواجها بنفس يوم زواجي الخميس
وساره جايه وياها يختارن كم شغله

اول ماسألتني شسوي هنا مريم حجت
وفهمتها انو اني هم عرسي الخميس وجاي اختار فساتين
وبدت تحجي انو خطيبي يحبني ومامصدك شوكت نتزوج لزمت ايدها بقوة اريدها تسكت ماتسكت مستمره تحجي
كانت اقل الدقيقتين وكفتنه سوه

تالي المرة كالت اعذرونه خاله ورانه فرة وراح يصير وقت المغرب
مبين من ملامح سارة ضاجت من كلام مريم يمكن لحد ذيج اللحظه وهي عدها امل ارجع لذياب

تمنيت ماشفتها رغم حبي واحترامي الها بس احس شوفتها زادتني خنگه وتفكيري رجع للماضي
اكبر جريمة نرتكبها بحق نفسنه هي احتفاظنه بالذكريات

هنه راحن واحنه طلعنه من المحل شفت امي من بعيد راجعه ادور علينه بعيونها
اول ماوصلت يمنه رزلتنه لان ضيعتنه تكول هبط گلبي من التفتت ومالگيتجن

مااعرف شوكت كملنه لان فكري تايه
اتصلت امي بمثنئ
رجعنه للبيت

اليوم ثلاثاء
اخذتني امي بعد صلاة الظهر للصالون هي وخالتي
صبغن شعري وحفتلي بعد ماكملت اتفقن وياها ياخذني الها الخميس من وقت لان عدها عرايس غيري

رجعت للبيت وبوجهي لغرفتي اجت حوراء تصفگ شايله ابنها وتهوس بي فرحانه وزينب تضحك واني اريد بس ابجي مخنوگه

شيصير لو هسه اني فرحانه حالي من حالهن؟؟
صرت احس مامكتوبلي الفرحه ولاراح اعيشها بيوم من الايام

ماجاي يصير اي شي مثل مااريد
احس كفة الفرح خاسرة بالمقارنه ويه كفة الحزن

بعد ماتعبن من المحاوله وياي حتى يخلني اشاركهن
اسمع حوراء تحجي بصوت عالي

حوراء،، والله العظيم راح يجي يوم اتوسل بيج حتئ تباتين هنا يمنه وانتي ماتقبلين تكولين مااعرف انام
اذا مابحضن مجودي

غصون،، شلت المخده شمرتها عليها صارت تضحك بصوت عالي تركتنه وطلعت

اجت زينب كعدت كبالي

زينب..شبيج غصونه؟؟

غصون،، بمجرد ماسألتني هذا السؤال حسيتها فززت كل جررحي النايمه ارتميت بحضنها ابجي بحركه بصوت وشهگات مكتومه
ماكان بيد زينب شي غير تلمني لصدرها وتمسد على راسي

زينب،،حاسه وره دموعج ذني سعاده وفرحه جبيره بس گولي يالله

غصون ياالله،،
بس خايفه زينب خايفه لان مهما يكون هذا زواجي الثاني حتئ لو الاول مو بارادتي وغصب وفصل
بس خايفه هلمرة ماانجح واطلگ مره ثانيه

شديت اديه عليها بقوه احجي من بين شهگاتي اليتكسرن بروحي قبل صدري

ليش هيج صار ويانه؟؟
ليش ماكتوبلنه نعيش الفرح؟؟

تدرين شنو اتمنى؟؟

زينب.. امم

غصون.. اتمنى ارجع طفله
اتمنى ارجع انام بحضن امي من اخاف من الظلمه
انام بحضنها مطمئنه بدون لاخوف ولاتفكير بالمستقبل
اتمنى ارجع طفله اقصئ سعادتي من اشتري لعبه
اتمنى ارجع طفله افرح لأبسط شي ماكو لاحزن ولاغم بصدري
اتمنى ارجع بريئه مثل قبل اعتقد الناس كلها تحبني مثل مااحبهم
اتمنى گلبي ماتعلق بذياب ولاحبه بيوم من الايام حتى ماينكسر واحس بوجع مثل الجاي احس بي بهاي اللحظه
اتمنى ارجع مثل قبل مااعرف شنو معنى الحب تفكيري طفولي كل همي العابي وبس

كبرت يازينب كبرت بمافيه الكفايه

بعدتني زينب عن حضنها مسحت دموعي ودموعها تجري بدون صوت
همست بصوت ناصي

زينب،، تأمنين بتدبير الله سبحانه وتعالى؟؟

غصون،، هزيت راسي ونعم بالله

زينب،، كل المرينه بي تدبير من الله عز وجل
كل المرينه بي اعتبري عسر ولابد يجي بعده اليسر بأذن الله
بس خلي ايمانج بالله جبير

غصون،، ونعم بالله العظيم

احس نفسي واكفه على حافة مرتفع عالي
اذا خطيت خطوه راح اوكع وتكون وكعتي هلمره بأرادتي
وخايفه اتراجع واتكون الخطوه الماخطيتها بيها سعادتي وراحة بالي

اكدر اطلع هسه لابوي واگله يابه بطلت مااريد
بس اول تفكيري راح يجي بي هو
انطئ كلمته للناس وماضل شي غير اسبوع للعرس
العالم جهزو كلشي
تكون انانيه مني اذا هسه اتراجعت

زينب،، واني اگلج سلمي امرج بيد الله
وبعدها راح تشوفين ايد الله بكلشي زين بحياتج

غصون،، ونعم بالله

زينب،، يالله هسه كافي بجي ودموع انتي عروس
ساعدي عمتي خطيه تركض من مكان المكان وحدها
شوفي فرحتها بيج شوفيها اشلون تشوفج عروسه وتجهزلج لان انتي بنتها الوحيده

عيشيها هاي الفرحه التتمناها كل ام
لاتحرميها منها غصون
تره جاي اشوف الحزن بعيون امج وابوج
بينيلهم انتي مقتنعه بقرارج وفرحانه

تفائلو بالخير تجدوه غصونه
خليج متفائله وانشاءالله ربي يكتبلج من الفرحه نصيب

غصون،، رجعت تمددت بفراشي مالي خلگ لكلشي

بعدها زينب راحت لبيتهم

مر اليوم واني بغرفتي امي تجهز بالجنط هي وحوراء وزينب ومريم
عمتي ام احمد اجت وياها فرح
شويه ورجعت كالت ابني وحده بالبيت مااكدر اتركه وحده

ثاني يوم التمن يمي خالاتي وبناتهن
وزينب ومريم
شغلن ديجي وصارن يركصن
ك جسد موجوده يمهن بس روحي ابد مويمي

باتن يمنه كلهن غرفتي انترست خالتي تسولف ومخليه الضحك بفلس

للساعه ب1كلهن نامن
حسيت روحي اختنگت
لزمت صدري قريت سورة الم نشرح لك صدرك

شوية هدئت بس لزمتني بجيه ردت بس ابجي
فتحت باب غرفتي وطلعت موبايلي بيدي

خايفه من باجر
اكو ندم فضيع احس نفسي استعجلت

بيتنه بي حديقه بس موجبيره زغيره كلش
اخذت كرسي ورحت كعدت
انتجيت بظهري لورة ورفعت راسي للسما اباوع للنجوم
وبداخلي ادعي ربي يسهل اموري ويريحني بحياتي

فجأة اشتغل ضوه موبايلي مخليته صامت
رفعته اباوع منو المتصل بهذا الوقت

اكو رجفه بداخل صدري مااعرف شنو سببها
المتصل سارة عدها رقمي اتصلت بيها قبل كم شهر اسأل عنها
اكو احساس بداخلي يگلي هاي موساره

فتحت خط ب ايد ترجف
الو
كلشي بيه رجع للماضي بمجرد ماسمعت الصوت

كان صوته يرجف بسبب البجي

بحة بصوته فضيعه

يحاول يحجي بس مختنگ

حتى اسمي مانطقه كامل

ينطق كلمة وتختفي البعدها بشهگه
مثل طفل تعبان من البجي واتگطع صوته

بلع ريگه واني اسمع بصمت بدون ولاحرف
ماعدا دگات گلبي

ذياب،، ا اشلون گلبج انطاج هيج تسوين؟؟

غصون،، سكتت ضاعت مني الحروف والكلمات كلها
بداخلي اعرف هلشي حرام لان صرت على ذمة رجال ثاني

بس كنت بحاجه لهذا الاتصال ردت انهي بي
كل شي يتعلق بالماضي

ذياب،، احجي
گولي شي

غصون،، بلعت الغصه وهمست بصوت مواقل من رجفة صوته شنو احجي؟؟
وليش اتصلت

ذياب،، باجر يزفوج اله؟؟

غصون،، ماكدر يتحمل بجه
وجر حسرة طووويله

ذياب،، تدرين شنو اتمنى؟؟

غصون،،...

ذياب،، اتمنى ترجعين يوم واحد يمي
يوم اصلح بي كل اغلاطي
يوم اتمسك بي باسناني بيج ومستحيل اتركج

غصون،، سكتت مااكدر اوصف حالته
وصعب اشرحها

حسراته اليجرهن وحده وره الثانيه

ذياب،، ماجنت افكر يوم ينتهي كلشي بيناتنه
بس گولي كلمة وحدة
خليني اسوي المستحيل حتى ارجعج

بس احجيها وبردي گلبي
احلفج بكتاب الله لاتذبحيني بيدج

لحد هاي اللحظه اقنع عقلي ماراح تصيرين لغيري
حتى ابقى متماسك حتى ماانهار واتخبل

غصون،، اللحظه ردت ابجي

مر بذاكرتي كلشي صار وياي
اتهامة الي وزواجة من نور وتصرفاته وياها من اكون موجودة حتى يحرگ گلبي

كلشي انتهى ذياب
الله يبعدك ويسعدك

ذياب،، منو انتي؟؟
مستحيل تكونين غصون الاعرفها
غصون الحبيتها كلشي حلو ونقي بيها

اما انتي حتى صوتج جلد وقاسي

غصون.. القسوة الاني بيها انت واختك سببها
انتو السبب بالخراب البداخلي

اثنينه سكتنه ماصرت اسمع غير صوت انفاسة

اتصالنه دام اقل العشر دقايق
انتهئ بكلمات تحسهن موجودات بگلوبنة
قبل الساناتنه

ماكنه حاسبين حساب يجي يوم راح يكون هذا الاتصال الاخير

كلام اخير نودع بي بعض
بدون مانلتفت للماضي

بدون ماواحد يسلم ع الثاني
بدون غصون بحياة ذياب
وبدون ذياب بحياة غصون

بدون اي كلمة تجمعنه مرة ثانية
حتى لو التقينه من جديد
وحتى لوجمعتنه الصدف. بطريق واحد
راح نلتقي غرباء كانه واحد مايعرف الثاني
عدنه غرباء عن بعض مثل اول مرة التقينة بيها
بذاك اليوم الرحتله فصل بسبب ذنب موذنبي

همست بصوت ادعي بي القوة والثبات
كلشي انتهى بيناتنه تماماً
علاقتنه من الأساس كانت مبنية على انقاض
من المستحيل ينبني فوقها شي حلو

من اليوم أنت بطريقك واني بطريقي

جاوبني بنفس نبرة صوتي

ذياب،، وداعة حبي الج
گلبي مانبض ولاراح ينبض لغيرج
رغم رحتي عن عيني
بس حاضرة بداخلي دائما وأبداً

مو بعيدة عند الله اغمض وافتح
اشوفج كدامي مرة ثانيه
نلتقي من جديد
نعيش قصة حب مامكتوب بنهايتها فراگ
نعيشها بكل تناقضاتنه الي ماتنتهي
لو بس يرجع الزمن

غصون،، انت كلتها لو
وماكو شي يرجع ابد كلشي انتهى
بسلامة ذياب

قبل مااسمع جوابه نهيت الاتصال
وقفلت الموبايل

كتمت صوتي بثنين اديه وصرخت صرخه مكتومه
تصاحبها دموع بحرگة گلب
بعديشش ياذياب بعديش؟؟

بعد مادمرتني انت واختك جاي تحلم ارجعلك من جديد؟؟
ارجع لنفس موطن الالم العيشتني بي؟؟

ثم في نهاية المطاف
كلاهما خسر الكثير الكثير
هو خسر امرأة لم تكن
لتفلت قلبه مهما حدث
وهي خسرت المرأة التي
كانتها قبل أن يكسر قلبها 💔

ياله سخرية القدر
رجعنا غرباء بعد أن كنا اقرب لبعضنا البعض من حبل الوريد
كيف؟؟
متئ؟؟
ولماذا؟؟
كلها أسئلة لم تعد تجدي نفعاً بعد الفراق
اسنلتقي من جديد؟؟
سؤال لايجب طرحه
لأن في طرحه حبآ لم نستطع نسيانه
وفي اجابته املأ ليس علينا التمسك به
حكاية وانتهت كما قدر لها القدر
بغض النظر عمن أخطأ ومن اصاب
بغض النظر عمن أحب ومن تعب من ذلك الحب

حكاية وانتهت
ويا لغرابة القدر الذي يضعنا امام استفسارات
عدة وجب أن ندفنها داخلنا
ونكمل الحياة بتغيرات وجب الاعتياد عليها
أن يتحول الحب في قلوبنا لبرود
والشوق للاشوق
والحنين للاشعور
وان يتحول كل الدفء الذي كان يطوق قلوبنا
لرابط يدعئ.. غرباء..

............

يسعدني متابعتكم لحسابي الثاني نزلت بي اعلان قصة جديده احداثها غير مطروقة سابقا تابعو الحساب حتى يوصلكم الاشعارات من انزل بارت 🌹

Zahra036
لتنسون التصويت ☺️
تصبحون على خير 😘