ضحية لمن لايرحم الفصل السادس وتسعون 96 - بقلم زهراء الحسناوي

البارت62

مابعد الألم

(ضحيه لمن لايرحم)

بقلمي زهراء الحسناوي
....................................

زينب

......

ما الذي يقتل شابه في 24من عمرها يادكتور؟؟

فقر الدم؟؟

حادث؟؟

سرطان؟؟

لايادكتور نحن تقتلنا التعاسه اليأس جرعة زائدة
الكأبه رؤية الأحلام وهي تتحطم 💔

زينب.. اصعب شعور ممكن يمر على الانسان
هو شعورك انك انسان منتهي الصلاحية
تعبان ومثقل من كل شي
حتى ملابسك الي لابسهن تحسهن ثگال عليك

كأن استمراريتك بالعيش فرض
تأدي لااكثر ولااقل

صعب من تشوف كلشي يمشي كدامك
اله انت واگف بنفس النقطه من سنين
لاانت ميت ومرتاح ولا مكمل طريقك ومتناسي كل الصار

مرات افكر لو بنتي وياي يكون هذا حالي؟؟
بنتي التعبت بحملها تعب بس الله يعلم بي

اكو موقف صار مااعرف اشلون نسيته
كل مااذكره دموعي تنزل

جان رمضان صايمه واكرف من الفجر للمغرب
وهنه نايمات محد تساعدني
المغرب اخبز وادخل للبيت شايله صينيه الخبز
وحلگي يابس

جسمي يرجف من الجوع والعطش
صاح الاذان صبيت الاكل وهنه بس يجن ينقلن بالمواعين للسفرة

من الظهر لفيت جدر دولمه وجهزته
من صار وكت الفطور صبيته
حامل ومااكدر اوكف على حيلي ف انزل الجدور بالكاع وابدي اصب الاكل وهنه واكفات ياخذن مني

اخر ماعون رفعته حتى اناوشه لنذيرة فلت من ايدي وكع بالكاع

نذيره.. وعمه العماج وعمة دمج
غبرة وثوله
هذا فطورج تزوهري بي

زينب،، موقف من اذكره بداخلي اگول ربي وكف نذيره بين اديك وكفه طويله لاتشممها ريحة الجنة
بسبب اعمالها

لميت الاكل من الكاع رجعته للماعون الله يحبني جان الماعون بلاستك ماينكسر

بالله العظيم اكل ودموعي يوگعن بالالكل
وكل لگمة ابلعها تنبلع الف غصة وعبرة وياها

مرت علية ايام ابيت منهل شوفوني النجوم بعز الظهر

من طلعت منهم وخاصتا بعد طلاگي من لواء احس روحي طير اتحررت من قفصهم وسجنهم

شويه شويه بديت اتعلم عالصبر
صبر فراگ بنتي
صبر على البلاء

لكن اوقات من تضيگ عليه الدنيا
اذكر ابوي الله يرحمه

واشلون جانت الحياة حلوة بوجودة

اذكر زينب القديمة واسترجع ذكريات الماضي كلها
اذكر حياتنه البسيطة المليانة سعادة وراحة بال
رغم عوزنه وفقرنه بس جنه مرتاحين

اب بوكت المغرب يرجع للبيت بس شوفة طوله عافيه وامان

اخ رغم تصرفاته تحسه سند الك
حزام تشد بي ظهرك من تكسرك الايام

اتذكر احلامي الكنت احلم احققهن وهنا اطلق لدموعي العنان

اذكر قول الله تعالى (اصبر فانك بأعيننا)

اتوكل على الله وانهض من جديد
وبداخلي اكول تجاوزت الاصعب
تجاوزت المرض والفقدان
تجاوزت موت ابوي وتجاوزت موت اخوي
وتجاوزت خسارة بنتي وتجاوزت فقدان صحتي
اكيد اني قويه من الداخل لان تجاوزت كل هاي الصعاب

دائماً اتصل بحسن اسأله عن فطومه يگلي زينه
ويطمني عنها
عرفت منه لواء وحنان دائما مشاكل بيناتهم

وقبل فترة مكتشف اكو قطعة بيها دهن جوة دوشگ
الجرباية من جهتة هوة
سائلها شنو هذا؟؟

مجاوبته ماادري تالي
جايب القران محلفها وهاي ثاني مرة يحلفها
بكلام الله
ساعتها خايفه ومعترفتله هاي هداية جابتها من العلوية
حتي تهدي بيها ويبطلون مشاكل

شابعها كتل وموديها لهلها
جايين خوالها وابوها يتوسلون بي حتى يرجعها
ماقابل كايللهم تعبت من مشاكلها
ورافض يرجعها

طلبت من حسن يجيبلي فطومه كال
خليها كم يوم واجيبها
اعرف ماتريدني وترفض تجيني
وحسن يستصعب يگلي بنتج رافضتج
فيتحجج عنده شغل لو مايلحگ

كاعده الصبح انگع تمن مال الكبه
صايمة صار يومين مطلوبه صيام واريد اخلص طلبي
اتصل حسن وهاي اول مرة يتصل بيه بهيج وكت
احس گلبي انخمش
والزاد خوفي اكثر من گال جبتلج فطومه وياي

الف فكرة وفكرة اجت براسي مااعرف ليش اتملكني الشعور بالخوف والقلق عليها

نص ساعة واتصل كال اجيت اطلعيلي

جريت عباتي بسرعة وطلعت بين باب المطبخ وباب البيت خطوات احسهن صارن شطولهن

فتحت الباب شفته نزل من جهتة والتفت للجهة الثانية

فتح الباب ودنگ شال فاطمة اللحظات ردت اوگع
من شفت ايدها ملفوفه اباندج ورجلها مجبريها بشاش ابيض

ضربت على خدي بقوة
صخام الصخمج زينب خويه شبيهااا بنتي؟؟

حسن، مابيها شي شبيج وجهج انخطف لونه؟؟

بنتج وكحه وكعت من الدرج قبل يومين
وهل جدامج كلشي مابيها

زينب،، على صوتي العالي طلعت مريم
عيونها تتنقل بين فطومه وحسن

مديت ايدي ردت اشيلها ضمت وجها بصدر عمها
صوتي يرجف
همست يمة فطومة

حسن.. يالله بابا شو خل انطيج لماما خطيه خايفه عليج

زينب،، لازمه قميصه بقوة وتهز براسها ماتقبل
كل حركه منها سجين تنغرس بصدري
اللحظه ردت اوكع بالكاع
خليت ايدي على بنيد السيارة اسند روحي

مريم لبست عبايتها وطلعت مدت اديها بدون كلام
شالتها من حسن
بجت فاطمه تريد ترجع

اباوعلها حالتها ينبجي عليها
ضفيرة مبينه مضفورة من زمان شعرها املح
ايدها الصاحية بيها مثل الوصخ المتراكم

مااتحملت
بجيت كتله حسن هاي بنتي؟؟
ليش هيج هاذريها؟؟

حسن،، زينب تدرين بحنان يم اهلها وامي ونذيرة مريضات
خابرني لواء كال تعال وديها يم امها فترة بين ماتتتحسن وارجع اخذها

التفت الفاطمه مد ايده الجيبه انطاها فلوس حتى تسكت

حسن،، ذني كلهن الج اشتري بيهن وبليل هم اجي اجيبلج كل الحلويات التحبيهن بس ابقي هنا كم يوم واجي اخذج

زينب هو يحجي وهي تباوع بطرف عينها ماقابله
اخذتها مريم دخلتها للبيت ضليت يم حسن
حايره بزماني

حسن،، خويه والله مابيها شي رجلها كسر كلش بسيط وايدها مرضوضه
لو حنان بالبيت اكول هي دفعتها لان اعرف سوالفها

بس هي يم اهلها وفطومه نازله تركض عثرت اوكعت
هذا علاجها مأشر عليهن الدكتور كل وقت بوقته

والخميس اليجي ارجعها للدكتور يجيك وضعها

وهم خابرت يجيبولها حليب مال جاموس
يوميه تنطيها كلاص الصبح واكلاص بالليل
حتى بسرعه ينجبر كسرها

زينب،، شويه وراح حسن همزين عمي بالمحل مالته ومثنئ طالع يشتغل على باب الله لان مايقبلون بواحد من ال منهل يجي يمي حتى لو حسن صح عمي يگول يختلف عن اهله بس مهما يكون هو واحد من اولادهم

دخلت للبيت ذبيت عباتي وكعدت يمها مديت ايدي
اريد الزمها ماقبلت
صايمه واحس گلبي نشف من القهر مو بس الساني

حتى اهلي مايقبلون اصوم لان اتخربط بس مااكدر
كتلها حتى لو اموت هم اريد اموت صايمه ولا ابقى مطلوبه صيام

تصرف فاطمه ونفورها مني دمر اعصابي
جسمي كله يرجف

الساعه ب 12رجع عمي وجان متفق ويه عياله ياخذهم لكربلاء حتى يزورون

البارحه بليل اجانه وسالنه منو يروح ويانه سيارة جبيره وفارغه بس عيالي يرحون
گناله عمي مانروح بس مريم رادت تروح

من شفت فاطمه هيج كتلها مريم ابقي انتي يمها
واني رايحه ويه عمي ازور
جانت اكو جمرة بصدري تلهب نار

ردت اروح لساگي عطاشه كربلاء
يبرد نار گلي

وفعلا بدلت ورحت ويااهم
طول الطريق واني ساكته

عمي يحجي عن وضع فطومه واني ماعندي طاقه حتى اجاوبه

وصلنه الكربلاء وبمكان بعيد عن الامام
عمي كال خل اشوفلج سيارة توصلنه للباب مال الامام الحسين عليه السلام
لان ماتكدرين تمشين

كتله لاعمي اني اجيت اريد امشي
نزعت شحاطتي خليتها بعلاكه
حوراء اخذتها مني كالت اني اشيلها

مشيت جدامهم
دموعي تنزل حارة تجوي خدي احسها
رافعه اديه ادعي وعيوني من بعيد علئ منارة الامام الحسين عليه السلام

شعور صعب. من تبجي وانت بالطريق ماتحس بوجود الناس اليمرون
داير مدايرك
ماتفكر اشلون الناس تباوع الشكلك ومضهرك
كل التفكر بي تبرد الجمرة القابعة بنص روحك

امشي واذني تسمع بعض اليمرون يگولون خطية الله ينطيها

وصلت الداخل الامام بعد مامرينه بنقط التفتيش
حتى المفتشه كالت الله يجبر خاطرج انشاءالله بدون ماتعرفني واعرفها وبدون حتى ماتعرف شنو مصيبتي

صرت كدام الشباك كعدت على ركبي ورفعت اديه
بصوت يرجف ومسموع

يااالله
يارحمن
يااارحييم
يارب العالمين
بحق صاحب هذا المكان اجبر خاطري
جبرآ انت وليه يااالله ادعووك بعزتك وجلالك
لاتصعب علي حاجة ولاتعظم عليه امر
ولاتحني لي قامة ولاتكسر الي ظهر
وحنن گلب بنتي علي بحقك وبحق حملة عرشك
يارب بحق انبيائك ورسلك لاترد دعائي بحق وجهك الكريم يااااااااالله

جنت فاصله مااحس بوجود اي بشر داير مدايري
فقط اني وكدامي شباك ابا عبدالله الحسين فدوة لاسمه
حسيت ادين على متني شلت راسي عمتي مدنكه عليه تمسح بدموعها

انتبهت نسوان يباوعلي ويندعلي منهن اليبجي وياي ومنهن اليندعيلي بنية صادقه

ردت اكوم اختل توازني صايمه وگلبي فرفح
شكو طاقة عندي احسها احترگت

عمتي لزمتني طلعتني للحضرة كعدتني حوراء شايله ابنها عمي ومثنئ اجو يمي
اباوع العمي قلق عليه كتله عمي مابيه شي

بس افطر ارتاح

ابو مثنئ،، يبويه انتي مريضه وعندج عذر مو زين عليج الصوم يابنيتي

زينب،، ماحجيت ضليت ساكته مدنكه وسانده راسي بايدي كلش دايخه

اصريت ارجع اصلي حتى لو واني كاعده
لابوي واحمد اهديلهم صلاة الزيارة

وفعلا رجعت وصليت واني كاعده
من كملت احس اني موديه شي مني لابوي وهاي كل مااصلي اله احس هلشي واصل
كتله يابويه ياحبيبي ياصديقنه يابو ضحكه الحلوة ووجه السمح
يامتعوب يابويه ادعيلي بجاه بختك ربي يريحني
لو ياخذ عمري لو يخليني اتجاوز الصار واعيش حياتي الباقيه براحة

تقريبا اكثر من نص ساعه اني كاعده اصلي وادعي لامي واخواتي واخوي امير المسكين
صاح اذان المغرب صليت صلاتي الواجبة
بعدها اجت عمتي كالت يالله يمه هم يالله نطلع صلينه وانتظرنه تكملين حتى نشوف مطعم نتعشه بي

طلعنه هواي ناس المنظر يجنن راحه نفسيه
وخاصتا من طلعت احس لسعة الجمرة البصدري بردت شويه مو مثل اول مااجيت احس اليباوعلي يشوف نار تطلع مني من كثر ماجنت احس روحي محترگه

دخلنه مطعم حجزلنه عمي مكان عائلي

مثنئ راح جابلي كلاص لبن مالح حطه جدامي كال حطيتلج ملح ع اللبن حتى يستقر الضغط عندج

صدك من شربته واكلت يالله شويه ارتاحيت
اكلتلي لكمتين واحس روحي شبعت

بقيت جاعده بمكاني لمن كملو
عمي كال المثنى اخذ امك ومرتك وبنت عمك خاف يردون يشترون شي

كتله عمي كلشي مااريد واني هم مااكدر امشي هواي اتعب خليني يمك

شفته مد ايده بجيبه انطه العمتي فلوس مدري شنو حجه وياها ماسمعته اخذتهن وراحت
ضلينه كاعدين اني وياه نشرب چاي

ثلث ساعه ورجعو عمتي انطتني علاگه شكبرها
كالت هاي صوغه من عمج الج ولامج واخواتج

ماقبلت اخذها بس عمي خزرني حتئ خزرته مليانه حنية دائما نحمد الله ونشكرة الف مرة على وجوده بحياتنه بدل العائلة اثنين برگبته

صديق للصغير قبل الجبير

اخذتها واتشكرت منهم مافتحتها

بعدها رجعنه للبيت ورجعت الخنگة
مااعرف شيصير بحالي من اريد بس احضنها واشم ريحتها وهي ترفض
مو سهله ولاهينه على الام هذا الشي

اول مادخلت للبيت اتلگتني زينه اخذت مني العلاگه فرحانه

ام احمد،، مقبوله الزيارة بنيتي

زينب،، قبل الله عمالج يمه
بشري فطومه اكلت شي؟؟

ام احمد، اي يمه اكلت مريم قنعتها تاكل حتى اطيب رجلها بسرعه

زينب،، امي مو مثل قبل حالها اصعب من حالي
كسرها الوكت ثلث مرات
مرة بيه ومرة ب احمد اخوي والاصعب كسر بيهن
فراگ ابوي

ماجانت تسمي غير رفيج دربي
شكد جانت حالتنه المادية ضعيفه
وبيتنه فقير
بس جنه أغنياء براحة بالنه

صح احمد جانت شويه تصرفاته متعبه
بس بمرور الوقت فهمنه سبب تصرفاته
جان يحس بالنقص والعوز
خاصتا من يشوف الي بعمرة لابسين احسن لبس
وشايلين احسن موبايل وهو محروم من كلشي

من اذكر سوالفه تنعصر روحي عصر

من يوم وفاته وامي خرسه حجيها قليل كلش
مرات تشاركنه بسالفه تخلينه صافنين عليها فرحانين بيها
ثاني يوم تلگاها مطلعه شماغ ابوي وحاضنته وراجعه حالتها اصعب من قبل

زينه فتحت العلاگه بيها علبة حلويات ساهونه ايرانية
وكارتون دهين

وثوب اسود لامي وثلاث شالات الوانهن مختلفه الي ولاخواتي

وكان اكو تراك مشتريته عمتي لفطومه
وقراصات وياه ولعبه مال بنات
اني فرحت بيهن اكثر من فاطمه

مريم تراويها وهي عافت كلشي وعينها باللعابه

اشرت لمريم كتلها خل نسبحها

اتقربت مني مريم شاورتني بدون ماتسمع فاطمه
كالت راح اروح احطلها كرسي بالحمام واشيلها

واصيحلج تعاي ساعدني خاف يوكع ماي على التجبيرة مال رجلها

صدك شالتها مريم وشويه وصاحتلي
اول ماشافتني فطومه برطمت تريد تبجي صاحت مااا مااا ترفض ادخل اسبحها
بسرعه طلعت وسديت الباب مال الحمام

كعدت على اول بايه من الدرج اديه على راسي
شسوي مااعرف كل مااحاول اتقدم خطوة
تصرفها يرجعني عشر خطوات لورة

بسبب رفضها الي اني هامله نفسي ومالي خلگ
الكلشي

شويه وطلعت مريم تاخذ منشف جبير تلفها بي
كالت انشلع گلبي خليتها ترجع راسها لوره يالله كدرت اغسل شعرها
كتلها خو ما اتبللت رجلها؟؟

مريم،، لا ماتبللت لان شلتها ع الطبله خليتها بس زينب راح اگلج شي مو تنقهرين فدوة

زينب،، عيوني انفتحت على وسعهن كتلها شبيها
احجي رجلها بيها شي؟؟

مريم،، لا ولج مابيها شي بسرعه وجهج يصير اسود شجاج؟؟

من جاي اغسل شعرها شفت گملة براسها

ماتشوفيني تاخرت والله ثلاث مرات غسلته الها بشامبو خطيه كسرت خاطري
شلل بديهن انشاءالله طفله هاذراتها لا تنظيف لاسبح لاصخام بعيونهن

زينب،، كل التمنيته ابوها كدامي اطلع قهر وظيم گلبي بي
معقوله مامنتبه للطفله وصخه؟؟

معقوله مايشوفها بهذا وضعها؟؟

حسن ماعايش وياهم الرجال من زمان عزل عنهم وشرد منهم
بس انت ابوها اذا موكد مسوؤليتها ليش حرمتني منها؟؟

لبستها مريم التراك الشترته عمتي الها وطلعتها فرشت على رجلها ثوب وبدت تمشط الها وتغنيلها

اغاني طيور الجنة حافظتهن لان امير النهار كله مگابل هاي القناة وكاعد لذلك مريم حفظتهن

ضفرت شعرها ورتبتها شكد طلعت حلوة حتى عينها ماانتبهت الها على كثر ماجنت فرحانة بيها

بعدلها عمليتين تجميل وعينها تصير مثل الثانية مابيها شي باذن الله

مريم رشتلها عطر نيمتها وغطتها كالتلها باوعي للتلفزيون

عيوني شاخصه بس عليها اتمنى اروح انام يمها
بس خاف تبجي

ضليت بمكاني مااصدك شيجيب باجر الصبح
بليل نيمتها مريم يمها ماتحجي ويه مريم بس ع الاقل ماترفضها

ثاني يوم الصبح رحت العمتي حجيتلها كتلها هيج وهيج ومقهورة على بنتي لان مامعتنيات بيها
خطيه لبست عبايتها وراحت
نص ساعه ورجعت جايبه خميرة تقتل الگمل

كالت هذا حطي الشعرها راح كله يروح
شلته انبوب بي مثل الخمرة تنخبط بالماي وتنحط للشعر

اخذته منها وتشكرتها رجعت انطيته لمريم وفهمتها اشلون تخلي لشعر فطومه

انتبهت لفطومة عينها للتلفزيون وايدها الصاحية تحك براسها
نزلت دمعتي بدون مااحس

همست سودة بوجهي عليج يايمة
عشتي اليتم وامج وابوج اثنينهم عايشين

فرشنه الها مفرش بالشمس مريم نزعتها وحطت الشعرها الخميرة

نص ساعه وشلناها للحمام مريومه تنحثل بيها
حمدت الله عندي اخيتي شايله نص حملي وياي

سبحتها مريومه ومشطت شعرها بالشامبو

شويه وطلعتها حطتها بالصاله وبدلتلها

مريم.. ها يعمري ارتاحيتي؟؟
بعد ماكو دوده بشعرج

زينب،، مدنگه فطومه وتهز براسها
جرتها مريم تبوس بخدها وهي ساكته
جا ليش اني ماتريدني؟؟

تركتهن ودخلت للغرفه اريد بس ابجي
اباوع على روحي بالمرايه

صايرة مثل لوحة رمادية مابيها اي الوان
شاحبة ومبين الموت بيها

من يوم الاخذو مني فاطمه واني على وضعي
الايام متشابهة عندي
اليوم يشبه البارحه وباجر يشبه الايام الي سبقت
مابيهن لاطعم ولاذوق ولاريحة بدون حتى الوان
حياتي يسودها الظلام فقط

تعرفون بيوم السجل لواء فاطمة بإسم حنان
شنو كان شعوري؟؟

كان مثل شعور شخص بترو وحدة من رجلي
وبعدة تحت تأثير الصدمة مامتقبل التغيير الي ابتلى بي فجأة

مرت كم دقيقه واني على وضعي
مسحت دموعي ونهضت
طلعت لكيت مريم مكملة تمشيط الفطومة ومرتبتها

بليل خابرني حسن كال اني جاي
وفعلا اجه وجان محمل اشكال والوان لبنتي
حتى ملابس جدد

حسن، اعذريني تره بالعباس مااعرف قياسها
كتله انطيني لبس مال هيج عمر وانطاني الرجال

شوفيهن صغار كبار عليها حتى اذا صغار اجيبلها غيرهن

زينب،، خيي أسألك سؤال

حسن، اسألي بعد اخوج

زينب، فاطمه ليش هيج مهذورة ابوها وين عنها؟؟

اباوعله سحب جكاره من باكيته ورثها ونفث الدخان لفوگ

حسن،، زينب وروح العلوية وتدرين بيه مااحلف بيها جذب لو علئ كص رگبتي

من يوم مااطلگتي من لواء وهو متغير مرات احس هذا مو اخوي الاعرفه

شكله متغير تصرفاته متغيرة
حنان اقل كلمة تحجي وياه يتعارك وياها
شوفي بهاي السنه كم مرة زعلت وطردها لهلها
ونيته يطلگ

تالي يجون ابوها وخوالها يتوسلون بي بحجة مريضه وخطية

يومية العصر ينزل للبستان
البارحه رحت اشوفة ومن بعيد اباوعله عينه على بيتكم القديم

والله خايف ترجع علي مرضته القديمه واحنه ماصدكنه يتحسن

امي تعرفين وضعها الينطيها كلاص ماي يرحمها
لان ماتتحرك
ونذيرة اااخ يانذيرة

والله متاكد كل الصار بينه هاي حوبتج
دمرتنه ودائما احجيها

زينب،، هو يحجي واني ساكته

بعدها عرفت ابو حاچي ويه لواء حتى يتزوج مرة ثانية لان حنان ماتكدر تخلف بسبب مرضها

بس لواء ساكت مامرجعله جواب
اعرفه يجي يوم ويوافق

تالي سألته عن بنت نذيرة الثانية كال مبتليه ب امي
النهار كله تدفع بيها بالعربانه تاخذها للحمام لوتسبحها وامي مرة جبثرة وعظمها ثگيل
البارحه اتگلي خالي صارت عندي فقرات من كثر ماانحثل ابيبيتي

شويه وراح حسن
راد ينطيني فلوس ماقبلت ومااخذتهن

بليل نايمة وجان اشوف روحي بعالم الطيف
واكفة بضريح الإمام الحسين فدوة لاسمه
وبنص الضريح شجرة مال برتقال مليانه برتقال

واني احوش واوزع للزوار وفرحانه
وكعت برتقاله من ايدي
دنگت حتى اشيلها انتبهت اكو ورقة على جذع الشجرة اتقربت اقرة شنو مكتوب بيها
لگيتة اسمي

توني ردت اقرة شنو مكتوب جوة اسمي فزيت على صوت فاطمه تبجي بصوت عالي وتصيح
زززينب زييينب

طفرنه من مكانه اني ومريم مفزوعين
رفعتها كعدتها بحضني وجها عركان

ابعد بشعرها عن وجها
اسم الله ييمه
اسم الله يروح زينب
يعيون زينب
اسم الله الرحمن بنيتي

مريم جابتلها ماي شربتها ترجف
دقايق هي ترجف وراسها على صدري عيونها مفتوحه وترجف جسمها كله يختض

مريم،، فطومه اشفتي يعمري ليش هيج خايفه؟؟

زينب،، سكتت ماحجت رجعت مرة ثانيه سالتها
جاوبت وصوتها يرعش

فاطمة،، حلمت امشي بشارع بيت جدو
والشارع اظلم وعمه نذيرة حلگها كله دم وسنونها طوال تركض وراي
وزينب واكفه تصيحلي واني خايفه ركضت عليها

زينب،، هي تحجي واني اسحبها الحضني اكثر اريدها بس تهدئ نوبه الهلع العدها

اللحظه الساني وحدة صار يردد
ماخاب من تمسك بكم سادتي
اجه على بالي حلمي
بضريح ابا عبدالله الحسين عليه السلام

نيمتها ونمت بصفها ماحجت ابد ضلت ساكته
بس انتبهت عليها كل شويه تنز

صرت يومية اتقرب منها شويه شويه
مرات ترفض ومرات تاخذ مني وتسكت
بدون ولا حرف

انزرعت فرحه بداخلي من اشوفها تتجاوب وياي
صرت احاول اتقرب منها اكثر
انزل افلام كارتون واخليها اتابعه واكعد يم راسها اضحك لو احجي وهي تجاوب بدون ماتنتبه

بليل اجيبلها نساتل وجبس وعصير كلنه نتابع وياها كارتون
مرات اذا تريد شي وماكو احد يمها تضل تصيحلي بأسمي

من تريد شي صاحت زينب تعاي جيبي هاي الشغله

ويا محله اسمي بلسانها عمري ماتخيلته هلگد حلو
احس شويه شويه رجعت الألوان تنضاف الحياتي

مو مهم عندي تصيحلي ماما المهم هي متقبلتني

شهر كامل هي يمي
ابوها يدزلها غراض بيد حسن
لو من يجي حسن يتصل بي حتى يحجي وياها

كم مرة حاول حسن ينطيني رقمة بحجه انو يتصل على فاطمه بس جنت ارفض

فرحه بداخلي بس الله يعلم بيها
هلمرة قررت احاول اغير من نفسي
يكفي الضاع من عمري
يكفي فاطمه انطتني خيط امل ولازم اتمسك بي

العصر رحت العمتي كتلها عمه اخذيني وياج ل ام محمد احف وجهي

عمتي كلامي صدمها ضلت تباوع بوجهي
حتى كالتلي منج من الشيطان شعجب؟؟

ضحكت بوجها وفعلا اخذتني وياها ل ام محمد
فاتحه صالون ابيتها
حفتلي وجهي كل خيط تاخذة اتگلي خاله مصوفة
من الشعر

عمتي كالتلها من تكملين اصبغي شعرها
بس اني رفضت كتلها لا بس حفافه مااريد صبغ
وصدك بس حفيت ورجعت

رغم تغيير بسيط بس سوة فرق جبير عندي
كل شويه اباوع الوجهي بالمرايه مال المرة

رجعت للبيت حلگي يضحك وحده
كل ماتشوفني عمتي هيج تدعيلي الله يفرحني بعد وبعد

وصلنه للبيت اول شخص ردته يشوفني فطومه
رحت كعدت كدامها كتلها ها اشلوني؟؟

ضلت ساكته جريتها من خدها بستها واخذت نفس ترس روحي
دفعتني تريد تباوع للموبايل ضحكت عليها

قبل جانت اذا ماتريدني تدفعني وتضل تبجي
هسه لا شويه تغيرت احسن من قبل

كلهم فرحانين الفرحتي مريومه كل شويه وكالتلي توني صرت اشوفج أنثى قبل احسج
العگيد ابو شهاب اخرب ضحك عليها

فطوه شالو الجبيرة عن رجلها بس تمشي تعرج تخاف تمشي على رجلها المكسورة

ورة اربع ايام خابر حسن كال باجر اجي اخذها
كل فرحتي اختفت ورجعت مكدرة من جديد

الليل كله حاطتها بحضني ابوس بيها نايمه ماتدري
بوستها بعينها
وبديها
وبكصتها

اريد افتح صدري واضمها يم گلبي جوة القفص الصدري محد يكدر يوصل الها وياخذها مني

ثاني يوم صادف سبت اجه حسن اخذها شبعت بجي
عليها
حسن كال ماشبعتي منها صار اكثر من شهر يمج ابوها هم مشتاقلها خطيه
اخذها واخذ روحي وياها

اسبوع ماشفتها حسيت روحي راح ارجع نفس حالتي الاوليه لان النهار كله ابجي عليها وبليل احضن هدومها وانام على ريحتها

بليل كاعده اتصل بيه حسن كال فطومة خبصتني تريد تجي يمكم

شايفين ميت من سنين وكالوله راح ترجع للدنية؟؟
هاي جانت حالتي
فرحه ماتنوصف
بنتي صارت تشتاقلي
صح ماتكول اخذني يم امي
بس بجيها تريد تجي يمنه معناها اشتاقتلي

ثاني يوم جابها يمي حسن اول ماركضت المريم كلش تحب مريم
دنكت حضنتها مابادلتني عينها على مريم

اهم شي عندي هي كدام عيني املي برب العالمين كلش جبير
لابد يجي يوم واسمع كلمة يمة بلسانها

ماراح اگطع املي ابد

صار حسن يجيبها يمي ثلاث ايام بالاسبوع
والباقي يم ابوها
كل مايجي يكلي اني شنو مبتلي بيكم

ياماخذ بنتج يامرجعها
يحجي ويضحك
حسن اخوي الماجابته امي
ابد مااعتبره من ال منهل
يختلف عنهم قلباً وقالباً

الحمدالله بعد سنين طويلة اخذت صحتي وعافيتي واجمل ايام عمري راحت بذيج السنين الخلصتها ابيت منهل

گدرت اتحرر من تفكيري السلبي
الحزن البداخلي بده يزول مع مرور الايام
حاليا اني بخير والحمدلله واكثر شي يفرحني من ادخل للقصة واقرة تشجيعكم وكلماتكم الحلوة

فهمت وايقنت انَو لكل باب مفتاح ولكل مشكلة حل
كان لازم من البداية ادور على مفتاح همي وحزني واتخلص منهم للابد بدل ماادفن نفسي واني عايشه

الصبر والإيمان بالله تعالى
وايماني انو راح يجي يوم وتحن بنتي وترجعلي كان هذا مفتاح الصبر عندي

صح اتذكر الصار بالماضي من تعب وقهر وحزن
بس بفضل الله وذاك الحلم الحلمته بضريح الامام الحسين واني اوزع برتقال للزوار
انطاني قدرة على التجاوز

اروع انجاز يكدر يحققه الشخص
هو قدرته على التجاوز
تجاوز تفاصيل الماضي
تجاوز مأساة مريت انت بيها لولا لطف الله بيك
ماكنت عايش لهذا اليوم
تجاوز حياة كاملة قصة بكافة احداثها
تجاوز اشخاص كان الهم مكانة بمركز گلوبنة
اروع قصة هي القصة الي نصنعها الانفسنا
اروع انجاز هو كدرت اوكف على حيلي من جديد
كدرت اتخلص من لحظات العجز والضعف الكنت
معيشه نفسي بيها

اروع انجاز كدرت احققه هو تخلصي من الماضي
كدرت اتحرر من ذكريات بيت منهل الي قسمت ظهري نصين

مرات مانشعر بالوقت الضايع من عمرنه الا بعد فوات الأوان والا بعد مانخسر خسارة عظيمة وماكو اعظم من خسارة نفسك

لهنا وانتهت حكايتي بكل تفاصيلها
شكرا لتعاطفكم وياي
وشكرا لكلامكم الحلو
واشكر كل انسانه دعتلي بظهر الغيب
لتنسوني دائما من دعائكم
اختكم زينب

.............

مساء الورد والياسمين عليكم بنات
بالنسبه لبارت غصون كم يوم وينزل لان اهواي احداث بي وراح اختصر هواي منه حتى مااتاخر عليكم

وهم دائما انزل بوكس اسئله ومنشورات تخص القصص على حسابي الانستاا
اليحب يتابعني اهلا وسهلاً اتشرف بالكل 🌷

هذا يوزري
zahraa_alhussnawi

زهراءالحسناوي