البارت 63
مابعد الألم
ضحيه لمن لايرحم
بقلم زهراء الحسناوي
،،،،،،،،،،،،،،
قبل لا نبدأ نقرأ 🌹🌹
البارت هذا شرحت بي هواي نقاط اذا اتجاوزها راح تبقى مبهمه وعليها الف علامة استفهام
لذلك شرحت بالتفصيل حتى كلشي يوضح عدكم❤️
.......
قالت.. هل وجدت غيري؟؟
قال،، لاوقت لدي لابحث
عن غيرك بعدما افترقنا
مازلت غارق في رحلة
بحث عن نفسي المفقودة
فأنتِ الوحيدة القادرة
على أن ترديني الي
كنت اظن أن تاخذي بيدي
معك لكنك اخذتي قلبي
وافلتي يدي
قالت،، توقعت أن تنساني
أو وجدت من تنسيك اياني
قال،، لقد اخذتي مني كل شيء لم
تبقي لغيرك شيئاً احبه فيه
وهل تظني أيضاً أن المسافة
بيني وبينك تحسب بالأمتار تحسب بالأيام والدقائق؟؟
كل ساعة تحمل ستون دقيقة الاساعة فراقك
تحمل ستون نبضة الم 💔
غصون،، بقيت جامده ماتحركت
مغمضه عيوني بكل قوتي
رجفة جسمي مبينه اكيد حس بيه گاعده بسببها
ثواني وبعد ايده عني بعدها دار وجها ونام
اثنينه كنه بموقف لايحسد علي
واكثر شي حسيته هو تعبان بسبب الصار ويه بنته
الليل كله ماگدرت انام ولاگدرت حتى التفت لجهتة بقيت نايمه على جانب واحد للصبح يالله غلبني التعب وغفيت
گعدنه على صوت دگة الباب كانت عمتي تطلب منه يگعد لان عدهم خطار
عدلت گعدتي هو نهض بدون مايباوعلي
گال صباح الخير
اخذ الخاولي وطلع
لزمت راسي الصداع ذابحني ذبح
سندت راسي بثنين اديه
مااعرف شلون غفيت
گمت من مكاني عدلت الفراش
فتحت الكنتور طلعت قفطان مغربي ابيض
امي الف مره وصتني لازم البسه الصبح
اخذت وياه ملابس وخاولي
اريد بس اسبح احس شعري ثكيل من السبراي
شويه ودخلت حوراء الضحكه شاگه الحلگ
بادلتها الابتسامه
حوراء،، صباح الخير چنتنه هههه
غصون،، صباح النور
حوراء،، بشري حمامه لو غراب؟؟
غصون،، ابتسمت گتلها لاهاي ولاهاي
اصعب شعور من تبتسم تبين مابيك شي
محد يشوف شنو بداخلك
وحدك تشوف وشاهد على خراب روحك
حوراء.. والله مبين بومة من وجهج
غصون،، ضربتها بالخاولي
حوراء،، اعذري غصونه تره حقه والله
البارحه ماشفتي اريج شنو سوت بي حقج
انشاءالله اليوم تعوضون
غصون،، حچتها وغمزت
گتلها اريد اروح للحمام اسبح
حوراء،، امجد دخل هسه خل يطلع اذا تردين تنزلين للحمام الجوه يالله
غصون،، لا من يكمل ادخل وراه
وفعلا شويه ورجع مبين سبحان تركناه وطلعنه
حوراء كل شويه وكالت تتسبحون من الصبح
اليشوفكم حسباله اكو شي
مايدرون مكضيها بومه نايمه يم غراب
غصون،، امشي وراها گوة مفتحه عيوني راسي مسطور دخلت گدامي للحمام
تفهمني وين اعلگ ملابسي
كملت سبح وطلعت للغرفه مالگيته
مشطت وسشورت شعري
خليت مكياج خفيف كلش لبست حجابي
انفتح الباب دخلت حوراء
حوراء،، غصون ستعجلي اهلج جوة كاعدين
وين موبايلج؟؟
تعبت من الدرج كلساع اصعد عاد اتصل بيج
غصون،، تذكرت من اتصل بيه ذياب طلعت الخط كسرته وحذفت كل البرامج حتئ الموبايل تركته يم اهلي وصيت امي تخلي مثنئ يشتريلي خط جديد
ومن يجون تجيبلي جهازي وياها
فرحت من اجو اهلي ولاكأن البارحه تركتهم حسبالك سنه مرت عليه ماشايفتهم
نزلت اول ماشافتني عمتي هلهلت
يمها امي و نسوان هواي
سلمت على امي حضنتها احس حضنت الامان كله
اتمنيت ماابتعد عنها ابد
انتبهت وحده من النسوان تبسبس ماعاجبها وهلشي واضح من عيونها
بدت عمتي اتعرفني عليهن
عرفت انو هاي المرة تصير زوجة حماها العمتي ام امجد جانت گاعده ويمها شابه سلمت على امها شو الأم دارت وجها وتگلب بعيونها
بس البنت سلمت عليه من بعيد سلام عادي
حسبالك تعرفني من سنين مبينه اجتماعية
كان سلامنه بدون ملامسه الكل ماخذ الحيطه والحذر لان بوقتها كانت كورونا كلش منتشره ف بداخل البيت وكلنه لابسين كمامات وكفوف نايلون
وكل شويه يعقمون البيت ويدات البيبان
الكل مكممين
النسوان بالغرفة يم عمتي مابيهن 6نسوان
وكل وحده گاعده بمكان بعيد عن الثانيه بس الاسمها ام عماد گاعده بنتها بصفها
بدن يسولفن ويه البنت
وافتهمت من كلامهن وهنه يسألنها عن ابنها
انو الشابه مطلقة وعدها ولد صغير وزوجها ماخذة منها
انصدمت من گالت مطلقه وعدها طفل بسرعه اجت ابالي زينب
بداخلي اكول چا ماتصير زينب مثلها شو هاي مبينه حسبالك اصلا مامتزوجه
مرتبه ترتيب اني عروس مااطلع شي يمها
بعدها امي انطتني موبايلي بدون محد تنتبه خلته بيدي سالتها عن ابوي واخواني
گالت گاعدين بالمضيف مانتاخر نسلم عليج ونروح
كنت مندمجه اسولف ويه امي سألتني عن الوضع بيني وبين امجد گتلها تمام
لفت انتباهي مرت عمهم سألت وكان سؤالها موجه الي
ام عماد،، العروسه شو ماشفنه ابوها شنو جابلها هدية؟؟
غصون،، جليت صوتي وجاوبتها
ابوي اشترالي محبس وامي تراجي واخواني هم ماقصرو كل شخص جابلي شغله
كنت احجي وفخورة بااهلي لان ماقصرو وياي رغم همه حالتهم الماديه موكلش زينه بس حاولو انو مايقصرون گدام عيالي
ام عماد،، ياا جا بس ذني جابوهن الج؟؟
شو انه من عرست عروبه بنتي من انطيتها الهذا المگموع الطلكها
دندشتها بالذهب من ساسها الراسها
غصون،، ردت احجي سبقتني عمتي
ام امجد،، شتسوي چنتي بالذهب وهي الذهب كله
غصون،، المرة ماحجت بس اتكلب بعيونها مبينه مغثوثه على شنو هذا الماجنت اكدر افهمه
امي شويه واترخصت ماقبلت تبقى ع الغده رغم عمتي ابد ماقبلت تروح بس اصرو يرحون
طلعت وياها لمكان معزول مسوي استقبال ثاني غير المضيف
سلمت على ابوي واخواني
خطيه ابوي سلم عليه وانهضم مااتحمل نزلت دموعه
من شفته هيج كانه ردت حجه حتى ابجي حضنته وبجيت
اتمنيت ارجع وياه اتمنيت يطلع كل هذا حلم وبأي لحظة اصحه منه
باس راسي واصاني ادير بالي على عيالي وعلى امجد وصاني اشيل الماضي من بالي واعيش المستقبل بدون حزن
مايدري بالنار التسعر بروحي بس رغم هلشي كنت مبتسمه ماردت ينقهر
َماتاخرو شويه وراحو سمعت واحد من الولد يسأل عن امجد يگلهم الناس تسأل عنه وين راح من الصبح؟؟
رجعت گعدت يم عمتي والاسمها عروبه گامت گالت اروح اساعد البنات بالغده
تقريبا صارت الساعه 11 الصبح واني على نفس گعدتي يمهن احس رجليه تكسرت
شويه وسمعت صوت امجد بالمطبخ بعدها دخل سلم ع الگاعدات نسوان عمه اثنين وخالاته ثلاثه وعروبه دخلت وراه سلمت علي
استأذن منهن وطلع شفته صعد الدرج
استحيت اصعد وراه
ضليت گاعده بمكاني بس احس رجليه خدرن
بعد مااكدر اكعد اكثر اريد بس اتمدد حتى ارتاح
اترخصت وطلعت صعدت للغرفه مالتي
وصلت يم غرفة امجد القديمه سمعت صوت عمتي
استوقفني كلامها
ام امجد،،ليش هيج يمه؟؟
اكو واحد يسوي سوايتك هااي بالله؟؟
عريس بصباحيه عرسه الناس تجي تباركله وهو ماكو محد يعرف عنه شي
تالي طلع رايح للگبور
ليش هيج وليدي؟؟
اني اعرفك مؤمن بقضاء الله وقدره تالي هيج تسوي؟؟
يايمة گول ياالله شنو ذنبها بنت الوادم بيوم صبحتها انت عايفها
يوليدي كلنه زرع الله وكلنه يجي يوم ويحصدنه
مثل ماحصد اهلنه واهل اهلنه ومادايم غير وجها الكريم
تصرفك هذا كفر تدري لوماتدري؟؟
غصون،، هي تحجي واني اختنگت
ماسمعت صوته ابد كانت بس عمتي التحجي
اخر شي سمعته گالها كافي يمه تعبان
ارحموني والله تعبان
صدمني كلامه من گال لامه البارحه شفت بوجها
وجه هاله ماجنت اشوف غير هاله بالغرفه
كانه جايه اتگلي خنت الوعد البيناتنه
ثواني وانفتح الباب صارت عيوني بعيونه
متاكده شاف بعيوني خيبة امل جبيرة منه
مثل ماشفت بعيونه انسان ضايع يفتر بالفراغ
تركني ونزل
صدگ انهضمت عمتي طلعت من شافتني كل ضنها توني صعدت سألتني ليش صعدت؟؟
مااعرف اشلون جاوبتها رجليه خدرن بس ارتاح وانزل..
عافتني ولحگت ابنها
دخلت الغرفتي اتمددت ع الجربايه
بهاي اللحظة حسيت شگد ما الكون واسع
مابي مكان الي
اتمنيت يمي زينب الوحيدة الاشكيلها حزني
احس الدنيا حملتني بأثقالها حتئ تهدمني اكثر واكثر
ألم بأعماق روحي
ندم فضيع بداخلي
كنت الوم روحي لان هرولت بأتجاه علاقة خطأ ادور بيها ع الأمان
ادور بيها على حب فقدته ويمكن حتئ ماحسيت بي
ردت انهزم من الماضي
لگيت روحي مصلحه الغلط بغلط اكبر منه
استعجلت وانطيت موافقتي
قبلت برجال عقلة وگلبه دافنهن ويه مرته ومستحيل ينبض گلبه بيوم الي وحتى لو صار هلشي صعب
متمدده بمكاني والتفكير لاعب بحالي واحوالي
احس حراره تصعد براسي وتطلع من عيوني واذني
انفتح الباب دخلت زوجة حماي وسن گالت يالله انزلي يسألون عنج وهم راح نصب غده
گمت عدلت حجابي ونزلت وياها
كانن حوراء وسحر توهن مادات السفره وينقلن بالاكل
عمتي گالت تعاي هنا اكعدي يمي
گعدت بصفها ومن جهتي الثانيه محد يمي كلهن گاعدات گدامي
اجت الاسمها عروبه گعدت بصف امها
ثواني ودخلت سحر زوجة حماي الصغير لازمه ايد اريج بنت امجد تقنع بيها تتغده
الطفله باوعتلي وخزرتني ف گتلها تعاي اروجه اگعدي يمي هذا مكان
اريج،، انجبي انتي حقيرة
غصون،، مثل ضربه واجت على عيوني صدمني كلامها
عمتي زمخت بيها والنسوان صارت يفهموها عيب مايصير هيج تحجي
ولا اهتمت عروبه صاحت الها اجت گعدت بصفها وتباوعلي الطفله بعين غضب
مدت ايدها الجنطتها طلعت موبايلها وانطته ال اريج
عروبه،، اروجه تگعد يمي معليكم بيها
غصون،، حجتها وحطت الموبايل بيد الطفله
عمتي ماسكتت گالتها بعد شويه اله اخلي جدج يأدبج لان ابوج انطاج مجال صايرة تتجاوزين ع الاكبر منج
ام عماد،، شسالفه على كيفج طفله شتفتهم؟؟
ام امجد،، لا تفتهم حتى ماتعيدها بعد
غصون،، عمتي ندستني حتى اكل
گتلها مااشتهي لان قبل شويه تريگنه اني وحوراء
اتقربت يم اذني همست بصوت محد يسمعه غيري
ام امجد،، يعمه خطيه رجلج من الصبح سمع صديقه مسوي حادث لبس وراحله خطيه.
حتى مالحگ يتريگ وياج
غصون،، كل ضنها ماسمعتهم من جانو يحجون هي وياه بالغرفة هزيت راسي كانه اقتنعت بكلامها
ضليت گاعده بمكاني
كلام الطفله كان مثل گلاص ماي بارد صحاني
على نفسي خله الندم ياكلني من الدخل اكثر واكثر
بدن يسولفن عن عروبه وكل شويه ام عماد تگول بنيتي الف واحد يتمناها
تحجي وتجر حسرات عرفت سالفتها مو خاليه
كملن الغده وبديت انقل مواعين ويه حوراء للمطبخ
حماتي الجبيره هي مستلمة الطبخ
هادئه كلش مبينه من ملامحها
عرفت من حوراء نسوان حمويني وسن وسحر هنه الاثنين من بغداد
حبابات بشكل ومرحات كل مايشوفني يضحكن
وسن،، يمه العروس جابت المواعين اگعدي عيني لايشوفج امجد ويخبصنه لان شغلناج
خل يخلص العرس وانام نومه شطولها
واخلي سلاح يم راسي اليگعدني اصكه ولكم تعبت
صار اسبوع اركض وهاي عود ماعازمين
لو عازمين شيصير بحالنه؟؟
غصون،، ابتسمت على كلامها گتلها انطيني اساعدج
وسن،، لاعيني لا متحلفه بيج وره السبعه اني انام وانتي تخدميني اطلع بيج تعب العرس كله
حوراء،، راح تخوفين البت يمعوده
هسه تگول رجعوني لهلي
حجتها وضحكت
عروبه،، ليش هي العدها زلمه مثل امجد تعوفه؟؟
غصون،، فاجئني كلامها بس اخذته من باب المزح لااكثر لان جانت مبينه تشاقة
عروبه كفت رداناتها گالت اني اغسل مواعين رغم سحر ووسن ماقبلن بس هي اصرت
امها رجعت لبيتها بيتهم بصف بيت اهل امجد
وهي ضلت كل شويه وصاحت اروجه تعاي يمي تتعمد تخلي الطفله گدامي كل مااسوي حركه تغمني لو تتجاوز
عمتي كل ماتريد تضربها عروبه تحط الطفله وره ظهرها اتگلها دخلت عندي امانه عمه لتضربيها طفله وماتفهم
اخر شي من رادت تطلع من المطبخ تفلت عليه
اول مارادت تطلع جرتها حوراء من اذنها بقوة
كالتلها والله اليوم اخلي ابوي يچويج على حلگج
گمت اريد امنعها مالحگت شويه ودخل عمي
حاط ايده على راس اريج يمشيها گدامه
ام امجد،، حجي اريدك تأدبها صايرة عرمه وتتجاوز
ابو امجد،، لابويه اروجه خوش مرة وحبابه منا وجاي ماتتجاوز ع الاكبر منها واذا سمعت بيها عايدة هاي تصرفاتها بعد لااعرفها ولاتعرفني ومااريدها تصيحلي جدو بس ذيج بنيتي اخذها وياي وين مااروح لان حبابه
غصون،، يقصد اختها ايناس الزغيرة
دنگت كتله لا عمو اروجه حبابه
اريج،، انجبي معليج
غصون،، حجتها غطت عيونها بثنين اديها وبجت
حتى اني انهضمت عليها اتمنيت اخذها الحضني وافهمها اني ماجايه احرمهم من حنان ابوهم مثل مامفتهمه بس احس اكو احد يقره براسها ويفهمها انو اني راح اخذ ابوهن منهن
ابو امجد،، هاااا اريج؟؟
شنو حجيت؟؟
غصون،، عروبه دنگت شالتها گالتله عمي اني رايحه البيتنه اخذها وياي
ولان همه اهل قبل تاخذ الطفله وياها
ضليت گاعده بمكاني موقف صعب حطيت روحي بي
شويه وكملن البنات تنظيف
حوراء،، اصعدي ارتاحي بغرفتج ماعدنه شي
وهم ماكو خطار متاكده محد يجي الوادم تخاف كلمن ساد بابه وگاعد يخاف ينصاب
بس صديق امجد سيف كاعد يمه بالمضيف وهذا ضرتج الثانية لو مو كورونا هم تلگي مگابل امجد وگاعد
غصون،، صعدنه اني وياها للغرفه
احس امجد يتعمد ينهزم مني
بعدني ب اول يوم وهج يعاملني اشلون بقية الايام واشلون راح نتراهم على هذا وضعنه؟؟
حوراء ابنها بحضنها تريده ينام
تركتها ورحت للحمام اتوضه هاي اول مرة اتاخر بصلاتي الساعه 2واني لسه مامصليه
كملت ورجعت لگيتها
بعدها تتماطل هي والطفل اتمرغلت وياه بالگاع
نعرفه وكح ماينام اذا مايشلع گلبها
واذا نعس يضل بس يبجي منا لمن يغفئ
كملت صلاة وكعدت يمها
شويه واتصلت بمثنئ تتوسل بي تبات يم اهلها
بعد ليلة
گالها خطيه امي وحدها تشتغل بالبيت مرة جبيرة وماتكدر
الج بس. اليوم وباجر تعاي
ضحكت كالتله امك الماتكدر لو انت؟؟
ذني سوالفك كلهن اعرفهن واصلا عمتي ماتحجي لو ابقى شهر بس كول انت التريدني ارجع
ضحك عليها گاللها الج بس اليوم وباجر ترجعين
اباوعلهم اشلون واحد يتغزل بالثاني بالتليفون
مو حسد والله
بس كسرة خاطر بداخلي
ليش اني ماعشت هيج لحظات؟؟
انتشلني من افكاري صوت حوراء تحجي وياي
حاطه ابنها بحضنها تنيم بي وادگ على متنه تگله اني نعست وانت الگاعد من الفجر بعدك
حوراء،، اگلج صدك خو مازعلتي من حجي عمتي ام عماد تره هي دوم تجفص مايعجبها العجب
چنه مرتاحين منها من چانت زعلانه
غصون،، زعلانه؟؟
وياكم؟؟
انتبهت حوراء رادت تغير السالفه
گتلها احجي على شنو زعلانه ويه اهلج
حوراء بيها طبع كتومه ابد ماتوصل حجي لاعلينه ولاعلئ اهلها
شگد تصير عدنه شغلات ونتفاجئ بيها ماتحجي ولاتنقل السالفه
مرات تگول احسن شعليه بالعالم
حتي من تصير شغله مايگولون حوراء نقلتها
اخر شي حچتلي سبب الزعل بينهم وبين عمهم وعائلته
حوراء،، قبل من چانو امجد وعروبه صغار
ابوي وعمي گالو من يكبرون امجد لعروبه وعروبه الامجد
قبل ماجانو يفكرون بالعواقب
عدهم اهم شي فلانه لعلان
كبر امجد بس طول عمرة چان يعتبر عروبه اخته
بس هي تحبه حب من طرف واحد وكلنه نعرف هذا الشي
عرفنه امجد يحب وحده وچان ليل نهار يسولف بيها ل امي وخابصنه خبص بيها.
يمه هيج حلوة
يمه حبابه
يمه اخلاقها عاليه
يمه ماكو بجمالها
چان مخبوص بسبب حبه لهاله
عمري ماشفت امجد فرحان اكثر من ذاك الوكت
كل مانشوفه يغني
حبيبي امك متقبل من احاچيك
روحي معلگه بيك
تحسي طاير طيور بيها
ابوي من سمع بي تعارك وياه
گاله وبنت عمك المحجوزة الك من زغرها؟؟
وانوب كل العالم تعرف هي الك من زمان
اشلون هيج تسوي وتكسر بختها جدام الوادم
هسه المايخافون الله الف أنه يحطون بالسالفه
ليش ابن عمها مااخذها؟؟
واكيد بيها شي؟؟
بيومها صارت مشكله چبيره بين امي وابوي وامجد
امي من البدايه ماقابله على سالفة عروبه ال امجد
لان تعرف بنات عمي وكحات على امهن
دائما تگول بنات جميلة ماينحطن ابيت
صرنه مانشوف امجد ابد زعل وراح گعد يم بيت جدي
امي الحجيه وماادراك ما امي
لعبت فنون بحال ابوي المسكين
رجعت تهتم بروحها مكياج وترتيب ومخليه الحجي يبلعم وحده حاضن المخده ونايم
النهار كله يفتر وراها يريدها ترضه واحنه نضحك عليهم
امجد يتصل يتوسل بيها يمه حبابه خليج هيج حتئ يقتنع ويسكت
تالي خطيه اخر شي ابوي راح اعتذر من عمي
وعمي رجال والله ماكو بطيبة گلبه فقير لايهش ولاينش
گاله قسمة ونصيب واذا الله ماكتب الهم قسمة هذا هو
بس عمتي لعبت فلك بينه
والبنت كبرت
وكله بسببكم كل مايجيها خطاب نرفض نگلهم لابن عمها محجوزه تالي هيج تسوون؟؟
من يومها زعلو ويه اهلي لاهمه يجون يمنه ولااحنه نروح الهم
غصون،، وبعدها خطبتو هاله. الله يرحمها؟؟
حوراء،، اي بس ابوها ماقبل
امجد ياخذها اله تتخرج
جان يحسب يوم يوم والنهار كله فرحان تشوفي
اذكر بيوم الخطوبه مالته
بليل الساعه ب12تقريبا اتذكرت صدريتي ع الحبل
ونسيت ادخلها للبيت
فتحت الباب وطلعت تفاجئت بعروبه كاعده يم امجد بالحديقة وچانت مبينه تبچي
من شافتني مسحت دموعها وطلعت
امجد يعتبرني بوقتها طفله تركني ودخل بدون مايفهمني شتسوي عروبه يمنه نص الليل
ابد ماجاب طاري للسالفه
وثاني يوم صاحلي گال ممنوع تحچين لأي احد الصار البارحه
اني هم سكتت ماحچيت
ابو هاله اصر اله تكمل كلية يالله يتزوجون
اربع سنوات اخوي كانن عندة حسبالك اربعين سنة
ماصدك شوكت ياخذها
وره زواج امجد بسنة تزوجت عروبة
بس چانت دائما تجي زعلانه يم اهلها
تروح شهر لعيالها وتزعل شهرين يم بيت عمي
جانت ذابه الصوج بعمتها تگول عمتي ماتنجرع وماتعاملني معامله زينه
تجي عمتها لبيت عمي تگلهم بتكم موزينه وتتجاوز
وحده تذب الصوج بالثانية
وماتعرفين البركه بيا حباية
تالي طلگوها قبل سنتين
مرات احسها لسه عدها امل بأمجد ياخذها
بفاتحة هاله يالله مرت عمي دخلت البيتنة لان عمامي حجو عليها لان فاتحه وعيب ماتجي
غصون،، تفاجئت بكلام حوراء
اكو احساس بداخلي يگلي هي التحجي براس الطفله
كتلها زين من توفت ام اريج وبنت عمج اطلگت
يعني اخوج ارمل وهي مطلقة ليش ماخطبوها اهلج اله؟؟
حوراء،، ابوي هم هيج حجه ويه امي گالها البنت بعدها تحب ابنج ورايدته وتحب بناته
وفوگ كلشي بنت اخوي
امي ماقبلت گالتله اني من بنات جميلة مااريد
وبدون زعل احجيها الج مثل ماهي
من حجيت ويه اهلي بموضوعج
امي ايدتني بس ابوي گال شنو فرق
هاي عن هاي؟؟
حماتج مطلگه وعروبه هم مطلگه
كتله يابه اني اذا غصون اخذها غير امجد
يمكن اموت لان غصون عاشرتها وعرفت طبعها وشنو هي واعرف هي الوحيده الراح تخاف الله ابنات هاله اكثر من بنت اخوك
بيومها ابوي طلب من امجد يختار بينها وبينج
واخوي اختارج
غصون،، حجت جملتها الاخيره وصارت تلعب بحواجبها
باوعتلها صفح ضحكت وغمزتلي
بعدها حجيت وياها عن اريج
كتلها قبل من توفت امها مو جانت ماتسكت غير يمنه اني وياج ليش هسه اتغيرت؟؟
حوراء،، ،، واني هم متفاجئه بيها
اريج صح طفله بس تفتهم صارلها فترة
كلساعه وكالت اني رايحه يم عمه عروبه العب ويه جهالهم ومرة سمعتها تسولف ويه ابوها اتگلة خل تصير عمه عروبه ماما النه
بس امجد فهما عيب هلحجي وبعد ماتعيدة
غصون،، قصدج هي التقرة براس الطفله؟؟
حوراء.. والله ياغصون على شوفتي لعروبه اشلون بجت بعرس امجد اشوف كلشي يطلع منها
غصون،، بعرس امجد بچت؟؟
حوراء،، شبعت بواجي لسه اذكرها ماتروح من بالي رغم احنه مانحجي وياهم عاندت امها واجت يمنه رادت تشوفه من نزفه على عروسته لغرفتهم
كلماتها ترن بأذني اختي سالتها ليش اجيتي اذا تعرفين روحج راح تموتين من تشوفينه يزفو لغيرج؟؟
جاوبتها بلكت اكدر اكرهه واشيله من گلبي وارتاح
حتى اختي شبعت بجي عليها
وامي حجت وياها فهمتها كلشي قسمة ونصيب
بس هي تحبه كلش واصعب شي من تحب شخص وانت متاكد هو مونصيبك
غصون،، ابد ماحسيت بغيرة من كلامها عن حب عروبه لامجد بالعكس ولاكأن الشخص التحجي عنه صار زوجي ولازم اغار علي حسيته شخص غريب
باوعت للساعه صايره ب2الظهر علاوي غافي واحنه نسولف رادت تشيله تاخذة تنيمة جوة بغرفة عمتي
گتلها خلي يمي
حطيت راسي ع المخده بصفه ماادري بروحي غفيت
لان مانمت البارحه
ماكعدت غير على شعري اتگطع
فزيت شفته كاعد يم راسي ويصيح كون ماكون
عود غصون
گعدت جريته ابوس بي يابعد كون واهلها
باوعت للساعه صايرة ب4العصر يعني نمت ساعتين
لبست حجابي شلته ونزلت يمهم
لگيت حوراء ووسن وسحر بالمطبخ
وحماتي بتول تخوط بجدر مال محلبي
ريحة الهيل تارسه الجو
وسن انطتها مواعين سفري تصب بيهن الحلاوة
حوراء حجت بصوت عالي
حوراء،، بتول صبي ماعون محلبي الغصون تحب
تاكلها وهي حارة ماتحبها تبرد
غصون،، ابتسمت لحوراء مااعرف اشلون اذا راحت باجر راح اكدر بدونها
جريت الكرسي وكعدت اكل
دخل عمي سأل عن امجد
بتول، صعد بغرفتة ينام توة راح صديقة
غصون،، عرفته نايم بغرفته القديمة
مرت ست ايام على زواجنة واحنه على نفس الوضع
بالنهار مانشوفه لو طالع لو نايم بغرفته الثانية
وبليل مايدخل للغرفه اله يروح ينيم بناته ولنص الليل يالله يدخل لغرفتي
يدور وجها عني وينام
بيوم السبعه مالتي عمتي عزمت بس اخواتها وبناتهن وحمواتها واهلي وبيت عمي ابو احمد
اكثر شي اشتاقيت لزنوبه گلبي طك عليها
عمتي رادت تاخذني للصالون رفضت كتلها هنا البنات يرتبوني وسن يوميه هي تمكيجني بليل خاف يجن نسوان يباركلي بس اذا ماكو احد اني ارتب نفسي
وسن سوتلي تسريحه بسيطه ومكياج
طوختلي الحمرة
كل شويه وكتلها خففيها
تضحك تگلي بعد شويه امجد يخففها الج
مااعرف اشلون بدرت مني ضحكة مبينه استهزء بيها
ماحسينه غير امجد فوگ راسنه بالغرفه
الباب مفتوح ولان صوت الديجي جوة مشغلينه وصوته عالي ماانتبهنه من دخل
متاكده سمعها وبنفس الوقت سمعني
فتح الكنتور اخذ ملابسه وطلع
هي ضلت تضرب على خدها متفشله منه لان كلش تحترمه وتستحي من امجد
حتى حجابها متنزعه من يكون موجود بالبيت
ماصدكت شوكت يجون اهلي
اكثر شخص اشتاقيتله هي رفيقة دربي تؤام روحي الشاركتني كلشي بحياتي الحزن قبل الفرح
اترقب جيتها دقيقه دقيقه ماصدكت من سمعت وسن گالت اجو اهلج
نهضت من مكاني وگفت اباب المدخل مال الاستقبال اول ماشفت زينب ابتسمتلي
شمرت روحي بحضنها العبرات صارن يجن وحده وره الثانيه اختنگت ردت بس ابجي
زينب،، عليمن تبجين؟؟
ولج كافي راح تخرب الكحله وترجعين قردة
ضحكت من بين دموعي عليها
كتلها اشتاقيتلج ابجي من فرحتي بشوفتج
رفعت ايدي باستها هاي حركتها دائما تسويها الي بدون ماانتبه
سلمت على امي ومريم تفاجئت عمتي ام احمد جايه وياهم
بعدها اجت عروبه جانت لابسه فستان احمرحصر ع الجسم وقصير
كل شويه وطلعت من الاستقبال تروح للمطبخ بدون ماتلبس عباية
حتى عمتي انغثت من تصرفها جرت حوراء شاورتها
گالتلها روحي فهمي بنت عمج عمها موجود واولاد عمها هم على ساعه ينزلون من غرفهم وهي تتخطى عريانه
عروبه بعد ماراحت حوراء حجت وياها اجت كعدت وخلت عبايتها على متونها
شويه شغلو ديجي ماكو ربع ساعة وعمتي كالت طفن الديجي راسي صار شكبرة
اكعدن خل نسولف
سألت مريم ليش ماجبتو زينه وياكم
وعدمن خليتوها هي وامير؟؟
مريم،، عمي خلاهم يمه بين مانرجع
غصون،، اخذتنه السوالف اني وزينب سألتني عن وضعي كتلها زين ماحبيت اقهرها اكثر من القهر الهي بي
ماتأخرو ساعة زمان وراحو
صعدت الغرفتي واحس بركان بداخلي
لشوكت ابقى اكذب واكول كلشي تمام
والعكس ماكو شي احسه زين كله خراب بخراب
امجد شفاف الدرجة اشوف جروحة من الداخل
بس اني شنو ذنبي؟؟
الساعه صارت ب12بليل
واكفه كدام المراية واحجي ويه نفسي
لشوكت يبقى هذا حالنه؟؟
فكرة سؤاله عن علاقتنه تضخمت بعقلي
طول النهار امثل كدامهم انو كلشي تمام بيناتنه
الشعور الي اعيشه بليل صعب اشرحه الهم بالنهار
بمجرد مايحل الظلام كل الافكار تتنشط بداخل عقلي
سؤال بعد سؤال يمر ابالي غير طيوف الماضي التهجم عليه فجأة
وكلهم ماعندك الاجوبه عليهن
تعبت من الخذلان بكل مرة
احس اكو انقلاب بداخل روحي ضدي
ضجيج محد يحس بي غيري
انفتح الباب دخل بكل هدوء عينه مني
هادئ عكس المعركه والحروب البداخلي
لاول مرة اشوفة يقفل الباب بالمفتاح
مااهتميت
نهضت من مكاني مستعدة اواجهة
اريد افهم شنو طريقنه؟؟
راح يبقى هذا حالنه؟؟
وصل يمي مايفصلنه غير خطوة وحدة
شگد جنت محظرة كلام احجي بوجها
بس من صارت عيوني بعيونه نسيت كلشي
نظراته ربكتني خلتني مااعرف منين ابدي
بداخلي تراجعت
اول ماردت التفت ايدة لزمت ايدي
زادت دگات گلبي
كلشي صار بلحظات
الوضع بيناتنه كان مثل انسان جريح وفجاة حطو على جروحه ملح
ردت ابجي بس مابجيت لان دموعي ماكانت كافيه
حتى تعبر عن الشعور البداخلي
ماكنت بكامل وعيي
كانه جنت مخدرة من اثر الصدمه
صدمة تصرف امجد وياي فجاة
لأول امرة احس نفسي عاجزة اشرح البداخلي
ماكنت بحالة تسمحلي انهزم
استسلمت اله بكل جوارحي
يتتبع
ضعي اظافرك الحمراء في عنقي
ولاتكوني معي شاه ولا حملاً
وقاوميني بما اوتيتِ من حيلٍ
إذا اتيتك كالبركان مشتعلاً
احلى الشفاه التي تعصي
وأسوأها تلك الشفاه التي دوماً تقول بلئ
نزار قباني
............
صباح الخير ان كان صباحاً 😑
ومساء الخير ان كان مساءاً 😁
طبعا اول شي عرس بنت حماي ومن حيث اني عمة العروس والقائمه بالواجب ف ماالحگ اكتب
وربي على وقت فراغتي اكتبلي شويه
وهم عندي بناء 🤦♀️
وتخيلو الوضع ماتدري تركص لو تدفع عربانه رمل😂
احتمال باجر باذن الله انزل غش 😁
احتمااال مو اكيد😑
البارت القادم مامعلوم شوكت ينزل
فدوة رحتلكم بس خل يخلص العرس وتدللون🌹
تصبحون على خير يا اجمل متابعين ❤️
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!