ضحية لمن لايرحم الفصل الثامن وتسعون 98 - بقلم زهراء الحسناوي

مابعد الألم

(ضحيه لمن لايرحم

بقلم زهراء الحسناوي

امجد

كيف لي أن اشرح لك بأني متعب
متعب من الطريق
ومن الناس
والأحلام
وحذري وترددي
وقلة حيلتي
ومتعب أيضاً من الغد وهو لم يأت بعد
ومن الأمس وهو منتهي
ومن الأيام
والوعود
والصبر
وطولة البال
والتعقل والتأني
والغضب
من دون أن تشعر بأنني مبالغ؟؟

غصون،،نايمه بمكاني وعيني على مكانه الفارغ
ابجي بحرگة گلب بدون صوت ابجي على حضي وعلى حالي
عصرت عيوني بقوة واني اذكرة اشلون جان يهمس بأسمها بدون ماينتبه

تركني وطلع بدون ولا كلمه ولاحتى حرف
كانه جاي يوصلي ترة انتي الردتي هيج
من ضحكتي مستهزئه بوضعنه

مااعرف لشوكت بقيت على هذا وضعي
كل الاعرفه روحي تعبانه من كلشي
منهكه حد التعب

احس نفسي جنت اركض بطريق طويل
مهزومه من كلشي
ولمن وصلت لهذا المكان لگيته يشبه كل الأشياء الي انهزمت منها

شوكت افرح؟؟
ولشوكت الحياة تبقى تسرق مني كلشي

راحة بالي
نومة الليل
السعادة
روحي
احلامي
نقائي
ضحكتي
كل هاي الخسائر ماتجي شي يم خسارة نفسي
حتى صرت مجرد فراغ لااكثر

انهاريت من البجي بدون محد يحس بيه
اني الي صلحت الغلط بغلط اكبر منه
اجيت ارمم نفسي ويه انسان كل جزء بروحه متهدم

مر الليل مرور الكرام بدون مايغمض جفني لحظة وحده
الفجر حتى ماگدرت انهض من فراشي ماعندي طاقة اواجه بيها اي شخص وخاصتا امجد مااريد حتى اشوفه

هلكني التفكير ومحاولاتي المستميته حتى
ابني حياة مابيها حزن حتى ارتاح
بس المشلوع گلبه يبقى طول عمرة مكتوب علي الحزن والقهر

الدنيا ظلمة كاعده اباب بيتنه القديم عيني لبستان ال منهل
تعبت من كثر الكعده كمت فتحت باب البيت اريد ادخل
اتسعت عيوني بخوف ورهبه واني اشوف نور وعذراء كدامي هنه الفتحن الباب
كل وحدة عدها انياب طوال مليانات دم بشكل مرعب

من خوفي ركضت الجهة البستان مرعوبه وخايفه
كل لحظة التفت اشوفهن لاحگاتني
فجاة نصدمت بشخص رفعت راسي شفته امجد
دفنت راسي بصدره بكل قوتي
كانه طوق النجاة الي متمسكه بي
شدني الصدرة بقوة

فزيت بخوف اتلفت داير مدايري حسبالك حقيقه جنت اركض وهنه وراي
ولا كأنه مجرد كابوس

دقايق اني على وضعي حتى گوة اتنفس
شكلهن مايروح من بالي

انفتح الباب رفعت راسي صارت عيوني بعيونه
بلحظتها صدك اتمنيت اركض احضنه من خوفي بسبب الكابوس الشفته
دخل وسد الباب وراه
متاكده عرفني من عيوني هواي باجيه

كعد يمي بكل هدوءمنطيني ظهرة دنگت
اثنينه تشوفنه هادئين عكس الصراعات النعيشها بداخلنه

جله صوته

امجد،، غصون

غصون،، احسه بداخله كلام مايعرف منين يبدي بي
ومتردد يحجي خفت يگلي بسبب ضحكتج اتقربت منج

امجد،، اعرف بشنو تفكرين
خلينه نبدي صفحة جديدة غصون
ساعديني وساعدي نفسج حتى نگدر نتجاوز

اعتبري الصار البارحه بداية لحياة جديدة نعيشها اني وانتي
اعتبرينه جنه اموات اثنينه والله سبحانه وتعالى كتب النه نعيش الحياة من جديد

خلينا نعتبر الاحنه بي محنه اني وياج واحد يساعد الثاني حتئ نگدر نتجاوزها

غصون،، سكت ودنگ فرك گصته باصابعه
محتار مايعرف شنو يحجي
بعدها تركني وطلع

من هذا اليوم ابتدت علاقتنه اني وامجد
عاديه حالها حال اي زوجين يمارسون حياتهم الطبيعيه
بس الفرق احنه نمارسها بدون حب ولا لهفه
مشاعر باردة ابرد من الثلج

بمجرد مايصير تقارب بيناتنه واحد يدور وجها ع الثاني
علاقة خاليه من الحب تماما

صرت اني اهتم بكلشي يخصه ملابسه اكله ترتيبه
بمرور الوقت حتى هو صرت احس يعتمد عليه بهواي شغلات

صرت احسه ماعاد اعتزالي مثل قبل اول زواجنه يرجع متأخر من الدوام ينام مايكعد غير ويه وقت العشه يتعشئ ويطلع من يرجع كلنه نايمين

الكل زينين وياي
ماعدا اريج
تعبتني بصورة موطبيعيه صارت تتجاوز بشكل فظيع

من امر من يمها تغمني لو تهمس بكلمة حقيرة
لو تفشلني من احجي

عروبه ابد ماتجي بوقت الي يكون بي امجد بداومه
مرات احسها تعرف أوقات كعدته ويه اهله
بحيث بليل ورة العشه تجي وماتروح لنص الليل

تترك الكل وكل شويه تحاول تخلق حديث بينها وبينه
جنت احس تصرفاتها طبيعيه وماتهمني ابد ولا حتى انتبه الها
بالعكس جنت احبها وماعندي شي وياها محترمتها واعاملها بكل أدب
ماجنت اعرف نيتها شنو

يوميه تجي يمنه مرات اكعد يمها ومرات اتركهم واصعد لغرفتي اقرالي شوية

عمي وعمتي وكل البلبيت يحبوني
حتى نسوان حمويني حبابات كلش
من اشوف تصرفاتهن اذكر تصرفات عذراء
شتان بين الثرئ والثريا

من نكعد نتعشئ لو نتغده عمي يگلهم ادنو خل تجي بنيتي غصونه يمي
من ياكل يشيل من ماعونه يحط فوگ ماعوني

صرت كلش احبه واحترمه العصر من اشوفهم كاعدين بالحديقه هو وعمتي اخذ قوري الجاي واروح اكعد يمهم
حتى عمتي ماتقل عنه بشي انسانه يعجر الكلام عن وصفها

امجد مرات اذا عنده مجال يكعد يقريني
رغم اكو علاقه جسديه بيناتنه بس من يكعد گبالي احسه يتجنب يباوع بعيوني

انتبه للقلم بيده مايستقر ابد احسه يتوتر يتجنب تلتقي عينه بعيني

اكثر المرات من اشوفه تعبان اخذ كتبي واصعد لغرفتي اكعد اقرة
تجي اسيل بنته الزغيرة تكعد يمي هادئه ومحبوبه تنحط بالگلب عكس اريج تصرفاتها وياي عدائيه

شگد مااحاوال اتقرب منها تصدني
عجزت وياها ومااعرف شنو اتصرف

صح اني وياه مابيناتنه لامشاعر ولااحتواء بس اكو مودة

وَمِنْ ءَايَٰتِهِۦٓ أَنْ خَلَقَ لَكُم مِّنْ أَنفُسِكُمْ أَزْوَٰجًا لِّتَسْكُنُوٓاْ إِلَيْهَا وَجَعَلَ بَيْنَكُم مَّوَدَّةً وَرَحْمَةً

فعلا رب العالمين يخلق بين الرجال ومرته موده ورحمه وشفقه حتى لو كانوا هم يكرهون بعض او بالاحرى ما بينهم مشاعر وبرود عاطفي

رغم اني وامجد علاقتنه ابرد من الجليد وابرد من القطب المتجمد الشمالي لكن رب العالمين خلق بينه خلال ثلاث اشهر موده ورحمه

اكثر فترة تعبنه بيها هي اصابته بكورونا انتقلت اله العدوه من خلال احد اصدقائه المهندسين جان مصاب وامجد لامسه وانقل العدوه وبعدها صار واحد ينقل العدوة للثاني إلى ان كل الي بالبيت انصابو ماعداي اني

فكرت بيني وبين نفسي هو الفكر فكر فوك الجبل وعضه الجلب بعدني ما دخلت البيتهم كلهم انصابو واني الوحيده السالمه بينهم ضحكت بيني وبين نفسي حضي كعد هنا الحمد لله وشكر

لبست الكمامه والكفوف ودخلت عليه للغرفته الثانية المحجور بيها خطيه جانت حالته حيل تعبانه اشرلي اطلع يخاف عليه انصاب منه

بس اني مجنت مهتمه لكورونا واحسها بدعه خلقوها الأجانب حتى يخربطون حياتنه

من شافني دخلت يمه
همس بصوت تعبان كال...اطلعي لا تورطينا

عقدت حواجبي.وابتسمت بهدوء ..ليش اورطك لا تخاف ما انصاب عندي مناعة مال سنتين

رمقني بنضره مستهزئه

كملت واني اطلع بالعلاج فيتامين سي وزنك وفيتامين دي ثري وبعد علاج...اي وداعتك شبيك عندي مناعه متشوف كلكم انصابيتو الا اني

تافئف مقهور من وجودي حسيته يخاف انعدي منه لاول مره احس ان اني فعلا مهمه واكو ناس تخاف عليه

اخذت المي والعلاج كال بصوت مبحوح...لا تتقربين خلي على الميز اني اخذه

ابتسمت و وخرت الكمامه من وجهي وهو عاط بيه...لبسيهاااا

كمزت...عزا شبيك كمزتني صدك جذب حتى مناعه ما ضلت عندي

ارتجى على المخده وسند جذعه المتعوب بطرف الجربايه كال.. يابه لا تنصابين انوب تموتين ويكولون هذا يجسح نسوان

صح علاقتنه سطحيه بس مرات ماتخله من المزح بيناتنه

حتى مركبنه تمشي بدل ماواگفه بنفس المكان

ابتسمت لا اسم الله عليه وعليك ان شاء الله ماكو هيج شي

رد عليه...هذا مرض لا تستهانين بي

جاوبته لا تخاف عليه

ابتسم ابتسامه عبالك مداينها بس بنفس الوقت بداخلي اكو فرحه لان اشوف علاقتنه شويه بدت تستقر
امجد. .شلون ما اخاف عليج غير مرتي وام بيتي

غصوت،، صفنت ثواني واني اداري جروح الماضي بدواء الحاضر حبيت كلامه مرتي ام بيتي حسيت الي كيان حسيت فعلا اني انثى الي وجود زوجه انزفت مثل كل البنات مو فصليه رايحه بثوبها والعالم تهين بيها ورجال ما معترف بيها وبايعها بتراب..

بلعت ريكي واني اتمتم...ما دام معتبرني زوجتك وام بيتك انت هماتين زوجي وابو بيتي ومن حقي اداريك واوكف بصفك وبمرضك اذا ما وكفت وياك وقت الشده شوكت اوكف وياك

جر نفس عميق وكأنه مثلي يداوي الماضي بالحاضر

امجد...ونعم منج بس اضل خايف عليج وما اريد اجازف بصحتج..

ابتسمت كتله...حبيت كلامك تدري؟؟

همس...

امجد،، واني ما حبيت وجودج هنا تدرين؟؟

غصون،، رفعت حاجب مستنكره كلامه

امجد.. يابه لا تنصابين هسه يالله مو لخاطرج بس منو بعد يداريني

غصون،،ابتسمت. هم صدك هسه اطلع لا تخاف

انطيته علاجه وغصه بداخلي غصه محتويتني من زمان اقارن بين الماضي والحاضر بين رجال صايني ومحترمني رغم الجفاء والبرود وبين واحد دمرني وسلب مني هواي شغلات

حمدت الله وشكرته يبدل من حال إلى حال وفعلا دا احس تبدل حالي من حال الحال واستقر وضعي نسيبا ..

رغم اكو بعض المشاكل لان هو هذا حال الدنيا الدنيا ما تخلص من المشاكل ومحد مرتاح بيها بس يضل املنا بربنا كبير...

العائله كلها مصابه بكورونا او الاكثر هم ملامسين وكلهم محجورين واني الوحيده الي قايمه بالواجب ومساعدتهم بمرضهم

من خلال هاي الازمة كدرت اتقرب منهم واخذ استجابه منهم حسيت بيهم ناس طيبين متفهمين محترمين يستاهلون واحد يتعب وياهم...

بعد فتره تقريبا عشرين يوم صار وضعهم الصحي احسن بعد ما اخذو علاج وابر خابروهم من المستشفى حتى يسوون مسحه جديده ..حتى يعرفون نسبة الاصابات ونسبة الشفاء

وفعلا راحو وطلعت النتيجه سلبيه ماكو اصابه عندهم وتم شفائهم...

وبهاي الفتره للاسف اني وكعت ضهرت عندي أعراض كورونا ومسويت مسحه وطلعت مصابه

وردولي الجميل الحمد لله وداروني وخاصه هو جان ويايه اول باول يساعدني ياخذني للحمام وينطيني علاجي ويلوم عليه يكول...مو كتلج لا تتقربين مني هاي انصبتي شلون تطيبين بعد

جاوبته...مثل ما انت طبت اطيب

رد عليه بحنيه وهمس...بس اني عندي مناعه انتي خاف مناعتج ما تسعفج

ابتسمت بتعب...لا ان شاء الله اطيب كول يا الله

ضحك ...يا الله ان شاء الله تطيبين

خطيه ضل كاعد يمي واني احجي عليه اكله روح لا يصير بيك شي وهو يرد عليه يكول...لا بعد انصبت ما يصير بيه
طلع من البيت وهو يوصي عليه اهله وكل شويه يخابرني ويتطمن عني وتارس الثلاجه فاكهه وجاب كرزات كال لان الفاكهه بيها فيتامينات تساعد جسمج وتنطي مناعه من غير العلاج الي دا اخذه وراجع بيه دكتور اول ما وكعت سوالي مفراس وبين نسبة الأصابه وعلى اثرها انطاني علاج وهو جان مهتم حيل بعلاجي و وقت العلاج

حسيت بحنيته بخوفه عليه عبالك اني شي ثمين عنده ويخاف يخسره رغم علاقتي بي قليله مواقفي وياه قليله بس كدر يثبت نفسه بداخلي

تذكرت يوم الي تقرب مني قبل ثلاث شهور
بيومها تصرفه حسسني اني انسانه مااصلح لكلشي
بجيت هواي وانهاريت بدون محد يحس بيه

من اقارن تصرفاته بالبدايه وياي ويه تصرفاته حاليا احمد الله واشكرة لان زرع بداخلي امل اعيش حياة صحيحه مابيها مشاكل

مر على زواجنه 6شهور علاقتنه بدت تتحسن للاحسن
اسيل كلش تعلقت بيه مرات تنام بحضني ماتقبل تروح تنام بغرفتها

اريج صرت اعرف طبعها من احجي وياها لو احاول اتقرب منها تتجاوز ماجنت احجي لابوها
وهي هم بوجودة متحجي اي شي لان تعرفه رغم ابد ماضاربها ولايوم شفته عاط بيها بس تهابه وتخاف منه

مثل كل يوم كاعدين نشرب جاي وره العشه
عروبه كاعدة منتجية ع الحايط وبصفها اريج لازمه الايباد مالتها

اني وعمتي ووسن كاعدين بنفس الجهة
كدامي القوري اصب جاي
وامجد كاعد مقابيل عروبه من الجهة الثانيه

عينها بموبايلها مااعرف شنو تكتب
حسيت اكو شي من نظراتها لامجد
انتبهت الموبايله يعتلگ الضوه مخلي صامت

يرفعه يباوع ويرجع يخلي يم رجله بدون مايباوع لاي احد

احس خنگه صارت بصدري بسرعه اجت على بالي نور صرت احس عروبه نسخه من نور

امجد گال تعبان اريد انام وراي دوام ترخص وصعد ينام من وقت
عروبه ضلت عينها وراه

صرت انتبه لتصرفاتها لكلامها لنظراتها
صرت احس هلشي صار يزعجني مو مثل قبل اعتبره شي عادي

اني هم ورة كم دقيقه كتلها عمه اني صاعده انام لان كعدت ويه امجد من الصبح وبعد مااجاني نوم

تركتهم وصعدت اول مادخلت للغرفة مالگيته
عرفته يسبح لان هو متعود مايعرف ينام اذا مايسبح

فضولي اخذني لموبايله اكو احساس بداخلي يگلي اكو شي لاول مرة من بداية زواجنة لهذا الوقت احس اكو لسعه تجوي بصدري

الصار وياي بالماضي كفيل يخليني اعيش الخوف والقلق مرة ثانية

اني اعرف الرمز مرات اشوفه يدگه كدامي من يريد ينطي الموبايل لبناته

ب ايد ترجف خوف على قلق على ارتباك
خايفه مااريد اشوف شي يصدمني مااتحمل لان مابيه بعد اتحمل صدمة جديدة وخاصتا بعد ماشفت امجد صار زين وياي وتغير وضعنه

اول مافتحت الرمز شفت اشعار جايه ع الواتساب
بدون تردد دخلت ع الرسائل
اول محادثه كان فقط رقم بدون اسم

لفت نظري مكتوب حرام عليك

دخلت ع المحادثه كان بيها هواي كلام وفقط مستلمه
بدون مايجاوب امجد

اتسعت عيوني واني اقرة كلامها
احس روحي عرگت وگوة واكفه على حيلي
واني اقرة كلامها تتوسل بي يتزوحها عليه

تگله اقبل اعيش ابيت اهلك بغرفتك القديمة
واخذ غصون تعيش بالبيت الجديد البنيته الها

مالي شغل بيها ولايوم راح ااذيها
هي ابيتها واني ابيت اهلك

وهواي كلام وبصمات
من ضمن البصمات كانت منهارة تبجي بحرگة

تشكيلة منه علي تأنبه وتحملة مسؤليه دمار حياتها وتخليها عن ابنها كل هذا لان تحبه

اسمع وابجي احس نار صعدت براسي
شنو ذنبي اني اعيش العشته بالماضي مرة ثانية

كل الاجه ابالي ساعتها نور فقط
حسيتها رجعت الحياتي وراح ادمرها ومستحيل اسمح بهذا الشي

حراره تطلع من كل مكان بجسمي احس روحي المحترگه
عيوني مااشوف بيهن ولاحتى اشوف شنو گدامي

مسحت دموعي وردت اطلع صار بوجهي امجد

من شاف موبايله ب ايدي لزمني

امجد،، شبيج؟؟

غصون،، بدون مااجاوبه نترت ايدي منه ونزلت واني ناوية افضح عروبه كدام بيت عمها كلهم واطردها هم لان مايوم تصرفت وياها تصرف موزين

دائما اعاملها بكل ادب واحترام تالي هاي جزاتها
جيتها لهنا فقط حتى تلفت نظر امجد الها

نزلت واني مصرة اليوم افضحها
اول مادفعت الباب ماشفتها وماكان احد موجود غير عمتي ااوسن مرت حماي

صوتي يرجف احجي بدون ماافهم على نفسي شنو جاي احجي

سالتها وعيوني ادور بالغرفه وبالممر الي يدخلون منه الها

ع عمه وين بنت حماج؟

عمتي اخترعت من شكلي كامت على حيلها اجت يمي تريد تفهم
دخل امجد راد يسحبني جريت ايدي منه

جنت احس روحي قويه لان كدرت اتجاوز وارجع ابني نفسي من جديد
بس من مريت بهذا الموقف شفت نفسي شگد هشه وبسرعه اتأثر وادمر بكل سهوله

امجد،، كافي غصون نصعد واني افهمج

غصون،، لاتفهمني ولاافهمك
حجيتها والعبرة خنگتني اريد احجي مااكدر
كلامي يطلع متقطع بسبب دموعي

عمتي تسأله مايجاوب واكف يمي يحاول يخليني اهدئ
التفتت شفت عباية معلگه ورة الباب تركتهم ورحت اخذتها ولبستها واني ناويه اروح لابوها اشوفه كلامها
امجد وكف كدامي يمنعني

امجد.. غصون اهدي خليني اعرف اتفاهم وياج

غصون،، وخر

امجد،، وروح هاله وتراب گبرها عروبه حالها حال حوراء
بس اهدي واكعدي اتفاهم وياج

ام امجد،، فهمني شبيها بنت عمك؟؟

امجد،، مابيها شي حجية

ام امجد،، اشلون مابيها شي ومرتك بهذا وضعها؟؟
احجي لاتخليني البس عباتي واني اروح اشوف هلمگموعه شمسويه

لاخلصت منها گبل ولامن عرست خلصت منها ولاهسه من عرستك خلصت منها

بلوة خو مو بلووة

والله وروح ابوي اذا ماحجيت شمسويه گتلك هسه اني اروح وافضحها كدام ابوها

غصون،، ماكدرت اوكف كعدت بالكاع واديه على راسي
امجد ماقبل يحجي وحلف بروح هاله اذا وحدة من عدنه تروح لابو عروبه راح يتصرف تصرف مايعجب

ضليت على كعدتي وعمتي كعدت تضرب على رجلها تريد تروح تهد عليها

وسن ساكته كاعده بصفي

ماحسيت غير سحبني من ايدي
رغم ماقبلت اصعد وياه بس ابد ماانتبهلي
يمشي ولازمني ماتركني ابد

دخلني للغرفه وسد الباب ماتركني غير لمن كعدني ع الجربايه ونزل بالكاع كعد گبالي

امجد،، يابويه كل هاي دموع تبجيها علية؟؟

غصون،، ماجاوبت درت وجهي عنه اريد اسيطر على دموعي عيوني ماتسكت
همست من بين دموعي اذا تريدها ليش اختاريتني؟؟
ليش مااخذتها من البداية؟؟

امجد،، عمري ماحلفت بروح هاله وهاي اول مرة احلف بيها اليوم
وداعة دموعج وداعة بناتي الي هنة. قطعة من روحي ومستحيل احلفلج بيهن باطل

ماعندي شي وياها
ولا مراسلها
ولا بالي يمها
ولا مفكر اخذها ولاراح اسويها بيوم من الايام
وارجع واعيدها الج من جديد

عروبة حالها من حال وحدة من اخواتي

غصون،، باوعت بعيونه وهمست ليش ماتحضرها لو تطردها؟؟

امجد،، الف مرة حضرت وفهمتها اني مااشوف بيها غير الاخت وبس
موذنبي اذا يومية ترسل من رقم

غصون،، سكتت ودنگت ماجاي يفهم النار المستعرة بداخلي
مااريد تنهدم حياتي بعد ماحسيتها ترتبت وربي ريحني بعد هلتعب والخذلان

مد. ايدة رفع وجهي

امجد،، اگلج شي مو تزعلين؟؟

غصون،، مسحت دموعي واني اباوع بعيونه

امجد،، من شفتج تبجين فرحت

غصون،، باوعتله صفح ابتسم

امجد،، يمكن شميت ريحة غيرة؟؟

غصون،، احس بهاي اللحظه يالله انتهبت على نفسي
دنگت وجاوبته
لا ماغرت على شنو اغار؟؟؟

امجد،، اي واضح ماتغارين

غصون،، كعد وراي تمدد وجرني نمت على ايده
اتمددت بصفه ولاول مرة ابادر واحضنه
دفنت وجهي بصدرة خايفه من فكرة خسارتي اله

طوقته بديه بقوة
حس بية بادلني الحضن

بدون كلام اكتفه بطبع بوسه على جبيني
طول الليل واني على وضعي دافنه وجهي بصدرة
لاول مرة احس بالأمان والاحتواء
شعور كلش حلو
مااريد انحرم منه بيوم من الايام
احس هذا بيتي وملجأي

ثاني يوم صادف خميس وعمي كل خميس هو وعمتي يرحون يزورون الامام الحسين عليه السلام
بس هلمرة عمتي گالتله روح انت اني مااروح سكري صاعد واخاف اتخربط بالطريق

ماراد يروح من سمع بسكرها مرتفع بس هي قنعته مابيها شي وبس تاخذ علاج يستقر

وسن اخذها رجلها هي وسحر من العصر يشترون ملابس
مابقى غيري اني وعمتي بالبيت

بيومها حوراء اجت يمنه
عمتي من شافت البنات طلعن طلبت من حوراء تتصل بعروبه
تجي يمنه

وفعلا اول مااتصلت بيها حوراء ورة عشر دقايق اجت والفرحه بوجها يمكن جانت اكو فكرة ابالها

لاول مرة احس نفسي مااحبها وحاقدة عليها
سلمت عليه درت وجهي عنها تركتهن وطلعت
عفتها مصدومه بتصرفي وياها

طلعت وسديت باب الاستقبال وراي
تركت عمتي وحوراء يمها
اول من بدء الكلام عمتي

بدون مقدمات رزلتها على تصرفها
وحلفت الها تروح لابوها تحجيله عنها

ام امجد،، طول عمري احبج واعتبرج وحدة من بناتي
ماصدگت اعرس وليدي والمه بدل مااشوفة متبهذل
تالي تجين تخربينه هو ومرته؟؟

ليش هيج عمه؟؟
اني لو ادري بي مفكر بيج ولو تفكير بسيط جان ماخطبت بنت الوادم واخذتج انتي اله
بس ادري باابني يعتبرج حالج حال وحدة من اخواته

ليش هيج امس صارت بينه وبين مرته طلابه بسببج؟؟

هاي جزاتنه لان نحبج وفاتحين بيتنه الج؟؟
اذا جيتج النه بيها مضرة من هسه اگلج عمه الباب التجيك منه الريح سدة واستريح وبعد لاتجين النه

غصون،، عمتي طردتها بدون ماتحسب حساب اي شي
اسمع حوراء تحاول تخلي عمتي تهدئ وتسكت لان عروبه جانت منهارة اسمع بس صوتها تبجي

شويه وطلعت عمتي شافتني واگفه عرفتني سمعت كل كلامها
تركتني وراحت الغرفتها بقيت واكفه بمكاني
الباب مردود

اسمع بس صوت شهگاتها

حوراء،، ليش هيج سويتي؟؟

عروبه،، ليش ماتگولين ليش حياتج متوقفه ماتمشي؟؟

ليش ماتگولين ليش اخوج رفضني وفضل غريبه على بنت عمه؟؟

غصون،، كملت كلامها بنفس نبرة الحزن ماتكدر تحجي كوة ينفهم منها

عروبه،، من فتحت عيني ع الدنيا واني اسمعهم يگولون امجد لعروبه وعروبه لامجد
كبرت وكبر حبي اله وتعلقي بي
مشاعري كلها جانت متوجهة لامجد

هو كمل حياته وتزوج اله اني واگفه بنفس مكاني عمري ماكدرت اخطي خطوة وحده

حوراء،، بس انتي هم تزوجتي وصار عندج طفل المفروض تنسيه وتعيشين حياتج

عروبه.. حياتيش؟؟
جاوبي ياحياة التحجين عنها؟؟
قبلت بشخص مااحبه في سبيل انسه اخوج
اصعب شي جان عندي من اكعد ادور بوجها وملامحه عن امجد

رجال ابن ناس يحبني ومقدرني صح
بس مو امجد ياحوراء مو امجد
ماكو شي بي يشبه اخوج

ولج خلصت السنين العشتها وياه يوميه اسوي روحي مريضه والاصح متمارضه
بس الله يعلم شگد جنت اوكف كدام المراية احجي وياه واشكيله وابجي احس بي يسمعني

اكثر يوم فرحت بي هو يوم الوصلني خبر موت مرته
گلت واخيرا يمكن الله كاتبلنه ننجمع من جديد

تالي لثاني مرة يختار غيري

غصون،، تحجي بحرگه بصوت عالي
حتى اني كسرت خاطري واتندمت لان هيج سويت

عروبه،، اني الخسرت كلشي بسبب اخوج
وابوي وابوج
لا احتويت ابني ولا اتقبلت زوجي ولاگدرت اعيش حياتي مثل البشر

غصون،، جانت هاي اخر كلمات حجتها وطلعت
بيومها اني وحوراء وعمتي خلصناها ساكتين

من اذكر كلامها انقهر عليها لان ماكو شي اصعب من تحب شخص وتتعلق بي وتبني بمخيلتك كل احلامك الي تتمنه تحققها بوجوده تالي يصير لشخص غيرك
وكلشي حلمت بي ينهد بلحظة

من هذا اليوم عروبه قطعت جيتها النه نهائياً
حتى امجد صار يمنع اريج تروح يمها
بأول ايام جانت تبجي لان متعوده عليها
بس بعدين تعلمت من تضوج ياخذها ابوها يم بيبيتها ام امها كم يوم

من بطلت اريج تروح يم عروبه استقر وضعها
مو مثل قبل
صرت اتعمد اشغل كارتون نشوفه اني واسيل واجيب شغلات كرزات لو نساتل وعصير نتفرج وناكل
عيني منها بالبدايه جانت ماتجي

بعدين شويه شويه بدت تتجاوب
وخاصتا من بديت اهتم بدفاترها ارسم الها ارتبهن
ومرات اقريها

صح مرات ترجع تتجاوز بس احسن من قبل
جانت حتى كدام الخطار تفشلني

كاعده بغرفتي ارتب بملابسه كلهن لونهن اسود
شكد أتمنى يلبس الوان
دائما القوط مالته اسود حتى الدشاديش والتراكات

بعرسنه لبس قميص ابيض وبعد مارجع لبسه حتى انطا لاخو

بليل كاعدين اني وياه بغرفتنه دار بيناتنه كلام هواي من ضمنه سألته لأول مرة عن هاله ماسالته سؤال مباشر بس بينت اله من تلميحي
بسرعه فهم السالفه

امجد،، قصدج بعدني احبها ومشتاقلها؟؟

غصون،، هزيت راسي بمعنى اي

امجد،، صح احبها ودائما جنت احس محد تشبها
بس تخطيت هواي امور بوجودج

مو معنئ كلامي اجيتي انتي بمكانها
لابس انتي مليتي مكان بگلبي خليتيني اتناسئ
الفراغ السببه موت هاله وفقداني الها

صح ماناسيها بس تعودت على غيابها
صح اشتاق الها بس من اشوفج كلشي بيه يهدئ ويرجع لوضعه الطبيعي

الحياة ماتتوقف من نخسر انسان عزيز علينة
بس بنفس الوقت نخسر جزء روحنا من نفقد الشخص الي نحبه

غصون،، بعدها جر حسرة طويله
وقربني لصدرة
ولامرة سمعت منه كلمة احبج وبهذا كلامة حسيت عمري مراح اسمعها

امجد انشغل ببناء البيت مالته يريد نطلع من بيت اهله ونستقر ببيتنا الجديد عيالي رغم ناس طيبين ومحترمين بس حلو الانسان يستقر بيت الوحده ويكون هل شي اله وطن...

خطيه يرجع من دوامه تعبان وبسرعه يروح للعمال الي يشتغلون بالبيت ويشرف على البناء...

الئ ان تم بحمد لله وكمل بناء البيت وضل ياثث بي واحنه نروح ننضفه جنت حيل فرحانه بي ومتحمسه نسيت وياهم الماضي ونسيت الي صار من قبل وبديت حياة جديده

عمتي ما جانت تريد نشيل جانت تبجي على ابنها حالها حال كل ام تتمنى أبنها يضل وياها بس هذه سنة الحياة ولازم كل شخص يستقر

اهتميت حيل بنظافة البيت بعد ما شلنه وصرت متحمسه كل يوم بالسوك اشتري شغلات منزليه حلوه وتحفيات ومتعجبه ممصدكه صار عندي بيت اعتبره وطن ورجال بيد نفسه مو بيد اخته تحركه يمنى ويسرى

دا انظف والبنات ويايه يشتغلن شفته دخل شايل مسواك وفواكه رحت عليه اخذتهن منه بعد ما سلمت عليه

ودخلت للمطبخ دا اعزل بيهن واغسل المسواك واخلي بالثلاجه ما حسيت غير باديين قيدتني من وره انصدمت منه اول مره يمكن هيج يتصرف تصرف وخاصه يعني خارج غرفة النوم

درت وجهي عليه مصدومه ومرتبكه كتله...امجد فدوه البنات لا يجن عيب منهن

باسني برگبتي همس...اشتاقيتلج حيييل اليوم

ابتسمت على كلامه...واني كذلك

رجع باسني مره ثانيه وثالثه ابتعدت عنه بسرعه بعد ما صابتني حاله من الهلع ما اعرف اول مره يصير عندي هذا الشي رغم اني علاقتي بي تحسنت

من شافني هيج كال مستغرب...شبيج

بلعت ريكي بتوتر...هاا لا بس عيب من البنات لا يدخلن

سحب نفس وزفره كال...تمام مثل ما تردين
استغرب من تصرفاته اعرف هو بدة يميل الي ويمكن تصرفاته مجرد واجب يادي والمتاكدة. منه بعده مايحبني بس اكو مودة بيناتنه بس حتى مركبنه ترسي ماتبقى واكفه بنفس المكان

ورة فترة صرت احس بخمول وتعب والنهار كله نايمه
احس راسي مسطور سطر

عمتي والبنات انتبهولي لان النهار كله احس صداع ومبين على وجهي التعب
دائما الشهرية تتأخر عندي لذلك مااحسب ومااهتم

عمتي اصرت اله تاخذني نحلل بالبداية كتلها عمه مااروح لان اني كل مرة هيج
بس هي اصرت لذلك قبلت ورحت وياها اخذنه امجد

حللت وكعدت انتظر امجد كاعد كدامي
بداخلي اكو احساس يگول ماكو حمل بس ماردت اكسر خاطر عمتي وقبلت اجي وياهم

المفاجئه من صاحو باسمي والنتيجه كانت ايجابيه
بلحظه تغير احساسي للفرح
دائما ادعي ربي يرزقني بطفل التهي بي وانسى كل الماضي بوجودة

من بداية الحمل حسيت وضعي موطبيعي ولازم اروح اكشف وفعلا الدكتورة گالت عندج قصر بعنق الرحم لازم تربطين بداية شهر الرابع

تصميم بيتنه كانت غرف النوم بالطابق الثاني لان مساحته صغيرة والطابق الجوة مطبخ وصاله واستقبال وصحيات

امجد اصر ياخذني الأهلي بعد ما ربطت
لان گال اول ايام موزين عليج الحركه خليج فترة يمهم
ضليت هوايه نايمه على الجربايه وبعيده عن الحركة القويه مجرد شغلات بسيطه تخصني اسويها

صرت احس روحي اشتاقله اشتاق اتمدد بحضنه وانام
احسه الامان الجنت ابحث عنه

كل يوم عندي يتطمن عني وعن صحتي ويجيب اشكال وألوان وياه اهلي صاروا يحبو ويرتاحون اله واني كذلك انطره ساعه ساعه

باليلة من الليالي..جنت نايمه على الجربايه واتصفح بالموبايل شفت اجت رساله منه كاتب بيها.

امجد،، أليِس مِن حَق مَن يُحِب أن يسكُن فيِ حِضن محبوبِه؟....احبج

مجرد كلمات كانت كفيله تخليني احلق بروحي للسما
من فرحتي حضنت الموبايل وبسته

مر شهر تقريبا على اعترافة بمشاعرة اتجاهي
مر شهر من تخللت كلمة احبج لمحادثتنه
لاول مرة تنصهر ارواحنه وصارت روح وحدة

حسبالك كنه نعرف بعضنه من سنين طويله
دائما اتذكر بداية علاقتنه والبرود البيها
نادرا اسأله ويجاوب لو نكعد ونحجي ب اشياء موذات اهمية

بسبب كسر الحاجز بيناتنه تغيرت هواي أشياء من عاداتي وعاداته اليومية
صرنه مثل شخصين بعدهم ابداية الخطوبه واحد يتعرف ع الثاني

كانت علاقتنه خاليه من كل كلمات الغزل وشبه معدومه فجاة تحولت وصرت اسمعهن منه بفرح

جنت اعتقد كلشي بحياتي يمشي عكس وياي
ماجنت اتوقع العوض بعد كل تعب شفته
راح يكون امجد
اجاني على شكل رساله من خلق العسر جعل له
اليسر ضعفاً

حب امجد نزل على گلبي مثل غيث مطر نزل على سنابل يابسه بعد سنين عجاف

حبه خلاني انسه ذياب وصرت اقارن بينه وبين امجد
امجد احتواني بكل ماللكلمة من معنى

مختلف عن ذياب اختلاف جذري
احسه الملك الغير كل اقداري
من الأسوء للأحسن
ذكرت كلام حوراء بيوم العرس مالتي من شافتني ابجي گالتلي يجي يوم وتبجين على غياب امجد لان ماتعرفين تنامين غير بحضنه

وفعلا اجه هذا اليوم البجيت لان بعيدة عنه
وبنفس الوقت بداخلي شكرت حوراء وشكرت القدر الي خلاه بطريقي

تأكدت انو وجود امجد بحياتي سببه دعاء امي بكل صلاة انو ربي يسعدني ويرزقني بالرجال الي يكون الي. سند بعد الله سبحانه وتعالى

بوجود امجد احس انشرح صدري وتغيرت حياتي كلها
احس بوجودة كلشي اعوج استقام وانعدل
تشافت جروح گلبي واختفت تجاعيد وجهي
ورجعت ابتسم مثل قبل بمجرد مااشوفه

اول ماعرفت بنفسي حامل اندعيت من الله سبحانه وتعالى يرزقني بولد يطلع يشبه امجد خلقاً واخلاقا

يقدر المرأة
يحترمها
يكرمها ويرق لضعفها مايكسر بخاطرها ابد
يسعئ حتى يسعدها ويكون رجال وياها مو عليها
يحميها ويدافع عنها

تعلمت من امجد انو الرجولة افعال
وثبتلي هلشي بافعاله الي تشهدله
عرف يتعامل وياي احتواني واحتويته بنفس الوقت

كأن الله سبحانه وتعالى بعثنا لبعض حتى واحدنا يصير للثاني سند حتئ ننسئ الصار

بعد كلشي مريت بي بحياتي
اليوم اني بخير
بسبب دعائكم ودعاء امي وزينب
دائما اتذكر كلام زينب

انو كل المرينه بي عسر ولابد يجي بعده اليسر
واني متاكده الي اني بي يسر
لان هذا عوض الله سبحانه وتعالى
ماياخذ منك شي اذا مايعوضك ب الأحسن

ذياب وكلشي يخصه صار من الماضي
رجال حرام حتى اذكره لو احجي بي واني على ذمة رجال غيرة
تاكدت من هذا الشي لان ماعاد گلبي ينبض من يذكر اسمة ولاعدت استرجع شريط ذكرياتنه سوه
اقتنعت انو صار ماضي مااتمنئ يرجع ابد

بالنسبه لعروبه من يوم الطردتها عمتي ابد مااجت لبيت عيالي مرات اشوفها بالصدفه حتى سلام ماكو بيناتنه

بالدراسه ماتوفقت بالنجاح لان كل الضروف صارت ضدي
اصابتنه بكورونا ونقلتنه للبيت الجديد وحملي لذلك رسبت

وبنهاية قصتي اتمنى تندعولي يثبت حملي للنهاية
بالنسبه للماضي دائما اردد هذا الدعاء
(ربي لاترجعني إلى ضيق اخرجتني يوماً منه)

واخيرا شكرا الكم على كلامكم الحلو
صح اكو تعليقات ضوجتني بس بنفس الوقت اتعلمت منها اشلون اصلح اغلاطي
شكرا للي اتعاطفو ويانه

مرت اكثر من سنة على كتابة قصتنه اني وزينب
ماكنه نتوقع هيج تعاطف من الناس
اذكر من طلبت منها نكتب القصة باوعتلي صفح مامقتنعه لسه اذكر كلامها من گالتلي وخري عني هو اني صايرة قصة
مااستسلمت وحاولت وياها مرة واثنين إلى ان قبلت

زينب قطعه من روحي ويمكن لو عندي اخت ماراح احبها بكثر زينب ❤️

النهاية

هلمرة اني المحتاجة دعائكم
مايوم طلبت منكم تندعولي اذا ماشفت توفيق الله
بأموري
ربي لايحرمني منكم يااجمل شي صار بحياتي
وامانة تبروني الذمة ❤️