رواية ضحيه_ام_جلاد الفصل الخامس والعشرون 25 - بقلم أم احمد

ضحيه_ام_جلاد
ام احمد
الجزء الثاني
الخامس وعشرون
انسان من يفقد امه فقد كلشي حلو وياها حب ام لااطفالها هو سبب نجاحهم ام لاتعوض لا بزوجه ولا بااطفالنه بيومها من عرفت امي ماتت واني جنت سبب بومتتها انهاريت ماظل بيه قوة حتى صوتي ميطلع رحنا دفناها يم اختي زينب وكعدت بين قبرهم ابجي وانوح جان ليغاد قبر غزوان اتمنيت لو صدك اني ميت ولا مار بهيج يوم اني سبب دمار لعائلتي امي واختي ظليت كاعد بين قبورهم يمكن اكثر انسان كرهته هو نفسي  كرهت روحي واتمنيت لو مختطفي قاتلني ليش ظليت عايش ليش مامتت بذاك اليوم
ان تعيش بندم هو شي ياكلك من داخل يضل ينهش بيك الى ان يخلص عليك نهائيا  تعيش حياة لا انت ميت ولاانت عايش تندفن بالحياة وتموت باليوم الف موته
الشي الي خلاني اعيش من جنت مخطوف هو وجه امي
الشي الي خلاني اتحمل المصحه واهواله هو وجه امي
الشي الي خلاني اجرع السجن وعذابه هو وجه امي
الشي الي رجعني لااهلي وخلاني انتقم من كل واحقق العدل هو وجه امي
هسه ماكو داعي للحياة صارت الحياة تخنگ مرت تلث ايام وامي ماكو اطب للبيت اصيح يمه وينج كلشي مات بداخلي انطفى برحيل امي
(ناز) موت فليحه كسر غزوان وكسرني اكثر المرا عاملتني احسن معامله حبتني احتوتني نصرتني ساندتني فليحه مثال المراة الصبورة مكافحه
البيت اظلم الكل يبجي حتى ام امير المرا بجت وشكت زيجها حسيتها لااول مرا صادقه وحزنها جان نابع من داخلها حتى اولاد فهد جانوا يبجون البيت كله دخل بحزن عميق &وره الفاتحه عزل نفسه غزوان واختله لروحه ماعاد يهتم بحواليه نفسيته مكسورة حتى صوته صار مهزوز وبيه كسره نسه ان هو ذاك ظالم قاسي متجبر انحنى ظهره وعيونه ذبلن حتى شعره انترس شيب خلال شهر صار رجل بالخمسين من عمره
وره شهر من وفاة فليحه اجه البيتنا شيخ كاظم ذب علينا بنته بعده لحمه طريه ابنيه بس تبجي ماتسكت ظل غزوان ساكت وذاك اخذه حاصل فاصل وخله وطلع ظلت ابنيه تصارخ وغزوان نفس وگفته ولااتحرك عافها وطلع من سمعت صوت بجي طفل رحت شفتها فاحطه من البجي اخذته واني مااعرف منو هاي لان غزوان ماكال لااحد ان كاظم ذبها علينه حاولت اسكت بيها ماكو فايده رحت عل ام امير والشي الي جمعنا اني وهيه هاي الطفله جبنا اله رضاعه وحليب وحفاظات حاولنا نسكتها الى ان رضعت انشلع گلبنا محد اتجرا ودخل عل غزوان وسالناه هاي طفله منو جنت اتصور هاي بنته من علاقاته وام امير نفس تصوري ولااجى بالنا انها بنت زنوبا لان احنه معرفنا زنوبا شجابت التهينا بوفاته ومرض فليحه هم وفاتها لليل حطينا العشه ودزينا حسين عل عمه يصيحه جان حسين المفضل عند غزوان كلش يحبه طلع غزوان وكعدنا ناكل الكل تباع عليه ونتظر منه يحجي كلمه او توضيح منو هاي ابنيه بس غزوان ظل ساكت ولانطق بكلمه واني وام امير ماتجرانا عل كلام نهائيا راعينا ان هو كاعد ياكل وخفنا بعد ميطلع وياكل ويانه كمل اكل ورجع الغرفته اتفقنا اني وام امير يوم هيه تداريها ويوم اني الطفله جانت مزعجه بشكل ماتنام زين وظاهره عدها مشاكل باامعائها وره يومين اخذتها ام امير عل دكتور وطلع عدها سوء تغذيه انها جانت محرومه من اكل فترة طويله انطانها مغدي وانطانها دوه للغازات بالنسبه الي جنت اتعب هوايه لان علي صغير مو مال طفل وياه بس اتحملت گلت احسن ماذبها ام امير كلها براسي خليني ساكته
مشت ايام واحنه كل تصورنا هاي بنت غزوان الطلفه صارت احسن وبدت تشنش مشكله منعرف شنو اسمها كل هاي فترة محد حجه ويه غزوان ولاهو حجه كل الي بالبيت حبوا الطفله واكثر شخص اتعلق بيها امير يشيلها ويلعبها اما علي فجان غيران منها
مرات ام امير تكول لتروح تطلع بت حرام ومرات تكول بت متعه وحارت شطلعت قصص الها جانت من تحجي تعوج بحلگها ومن تشوف ابنها متعلق بيها تگول حظ گح….
لسانها ميبطل حجي بالموزين عل غزوان ومغامراته اني جنت بس اسمع ولااجادلها اعرفها لسانها زفر &وره شهرين بدت ام امير ترجع العهدها القديم وان غاب القط العب يافار وصارت هيه تتحكم بكلشي بالبيت حته بالشغل مال غزوان صارت هيه تديره من خلال عباس واشرف وعادي تلتقي بيهم بالمضيف وابنها امير وياها جانت تريده هو يستلم كلشي من غزوان الي صار حبيس غرفته…  جان گدامي خياريين اما استسلم وارضخ السماح او اقاوم واطلع غزوان من حزنه وكآبته
بيوم الي تاخذ سماح الطفله اني جنت اروح عليه واحاول احجي وياه واخلي علي گدامه يلعب واحسسه ان احنه محتاجيه بس سرعان ما يگوم يطفي الضوا ويروح ينام او يمثل علينا ان هو نايم حته يتخلص مني ومن محاولاتي اغلبها فشلت وياه جنت اتنمى فليحه عايشه وتساعدني وتقوي من عزيمتي وره عدة محاولات فاشله حجه غزوان وسال عل طفله اول مرا يحجي ويسال عل شي گتله بخير لاتخاف عليها صارت ترضع زين وتنام زين
-اريدج تعتني بيها زين خاف يصير عليه شي تداريها مثل بنتج
-لاتگول هيج طولت العمر الك واذا عل بنتك بلا متوصيني هيه بعيوني(اتفاجا وفتح عيونه عليه وابتسم ابتسامه خفيفه او يمكن تهيأ الي ان ابتسم )
-بنتي
-اي بنتك
-مو بنتي هاي بنت زنو…… وخنگتها العبرة
ظليت حايره الصدمه خرستني ولااكدرت اواسيه ظل لساني معگود وره دقيقه رحت حطيت راسه بحضني حسيت بنوع من ارتياح ان طفله مو بت حرام ولابنت متعه وهمين هيه من ريحة زنوبا حبيتها اكثر من قبل وكيفت ان اكو شي احفز بيه غزوان عل رجوع للحياة طلعت منه ورحت عل طفله اخذته وجبتها اله ظل يباع عليها وعيونه كلها دموع
تريد تشيلها
لا مااريدها اخاف اذيها مثل مااذيت امها
غزوان الموت مكتوب علينا وهيه اجلها الهنا انتهى انت مالك علاقه
كافي لادافعين عني اني سبب
استهدي بالرحمن اذكر الله
يا الله ناز تعبان تعبان اريد انام واكعد من هل كابوس اريد اختي وامي
اختك وامك يم ربك وهمه مرتاحين هسه واكيد ميردون انت تتاذه وهيج تسوي بروحك  اخذ شيلها انت خالها
لا مااريدها طلعيها برا
صار صار بس لاتعصب
طلعت ابنيه برا واني احس ان هاي مو اخر محاولاتي وياه شفت ام امير راجعه من بره وتنطي اومر لاام حسنين مدرت بال الها
-عيني خانم مو گلنا لا بس تفرفرين بالطفله وتعليمها عل حضن
-شوفتها ال غزوان
-لويش خانم شنو اشتاق البنته
-مو بنته هاي
- شنو ماسمعت زين
-كتلج مو بنته
-چا بنت منو
-بنت زنوبا وابوها ذبها عل غزوان ميريدها (شهكت )
-يمه بنت العزيزة واحنه عبالنه بت حرام
اخذتها من ايدي وبدت تحضن بيها عبالك مي بارد نزل عل صدرها التفت عليه وكملت
-وج خايبه شلون عرفتي
-قابل رحت عل سحاره وگالت الي هو گلي (عوجت بحگها )
-وشبيج عيني معاجبج خاف سبينا العنب اسود
عفتها لان اعرف اذا اظل احجي راح تزيد ظلت تتمهزا وتفر باايديها دخلت الغرفتي وحطيت الطفله بمهدها شكد انقهرت عليها امها ماتت وابوها اتخله عنها شلون راح تكبر بدون ام ولااب الله يحنن گلب غزوان عليها ويحتويها
خلال اشهر مرت علينا كلها حزن والم تقريبا سنة كامله عل موت فليحه او اكثر جانت جنى بنت زنوبا (هيج سميتها اني اسم )ستوها تمشي وصارت تصيح الي ماما ولاام امير هم ماما صراحه هيه ماقصرت وياها الطفله ودارتها يعني من تتمرض جنا اثنينه نسهر عليها ونخاف عليها يعني صار عدها اثنين امهات بدال وحده وصارت مدلله جانت جنى حلوه مثل امها (همزين مطلعت عل ابوها) وامير كلش اتعلق بيها بحيث اذا احد ضوجها حتى لو اخته يضربها يعني حسيته يحبها من كل گلبه وجان يضل يمشي بيها حتى تتعلم عل مشي بذاك اليوم انتبه غزوان عل جنى جان ابد مشايفها طول هاي سنة الي مضت لان هو جان كله حابس روحه بالغرفه محد يدخل اله بس اني او ام امير وحتى اكله گام داخل الغرفه دخل بحالة اكتئاب من شافها ظل صافن عليها وراح اخذها الحضنه ابنيه استغربت وگامت تبجي منه وتريد تروح عل امير هو ظل حاضنها ويشمها يمكن شاف امه اواخته بيها ابنيه ظلت تصارخ وهو حاضنها الى ان تركها جانت ابنيه مرعوبه منه حسيته مثل الطفل الي جان مضيع امه ولگاها صارت روحه ويه جنى گام يطلع من غرفه ويلاعبها ومن يشوفها نايمه يضل يتامل بيها غريبه حالته حبها ال جنى وبدا يصيح الها زنوبا الكل حوله جان متفاجئ بتصرفه بعد ان مر عام كامل عليه هو حبيس غرفته من شاف جنى تغير 360 درجه وگام يطلع من عزلته بس جنا نشوف تطور بس منعرف هو بعده عايش بالماضي بعده عقله يتصور اله ان امه واخته بعدهم عايشين يصيح مرات يمه وال جنى يصيح زنوبا ان جنت اريده يصحى ويشوف ام امير الي صارت عل راحتها بكل شي صح المرا ملتزمه وكل مقابلاتها بوجود ابناءها بس ناس بدت تحجي وين الشيخ ليش متغيب ام امير جانت تنتظر ابنها يصير 18 ويستلم المشيخه الي هيه تصورها من حقه وان غزوان اغتصبها من ابوه جان امير طويل والي يشوفه يكول اكبر من عمره بس هو عمره 16 سنه مو مال يكون الشيخ ويحكم لهذا جانت سماح هيه بظهره او جانت مسكته العالم وتكول الشيخ غزوان مسافر للخارج وبكيفها هيه واشرف وعباس يلعبون شاطي باطي باكيعان وشغل
(سماح) امور صارت كلها الصالحي غزوان وعزلته خلتني اقوي روحي اكثر واكثر صرت ادير كل امور بس طبعا امور تهريب عفناها مع ان عباس اصر ان نرجع. الها بس اني ماردت ابني يصير مهربجي ويدخل ويه احزاب الي هيه تمول هاي التجارة واكيد ابني يكبر ويصير مثل غزوان لهذا رفضت رفض قاطع ان نستمر بهاي تجارة وبقيت عل شغل العادي  احمي بيه ولدي وعائلتي ماعدت اهتم الغزوان او الناز ماطول مايوگفون بطريقي وابنيه ابد ماتستفزني ودومها تجنبني صح ابنها اكبر منافس لاابني بس اني مراح اتخذ اجراء ضد علي اله اذا حسيته خطر عل ابني
(ناز)  بعد خروج غزوان من غرفته صارت سلوته جنى ومن يشوف علي ياذيها يعاقبه رغم ان علي يحب ابوه ومتعلق بيه جان الحزن باين عل ابني والغيرة ماخذته من يشوف ابوه يلاعب غيره وهامله
وجود هاي طفله سوت حركه بالبيت اولا امير مهتم بيها زايد  وثانيا علي الي جان يريد يجذب انتباه ابوه اله وثالثا غزوان الي جان يصور هاي اخته زينب حاولت بكل الطرق افهمه انه هاي مو اخته وان هي اسمها جنى بس ظاهر وهو عايش بخياله وان عقله ااباطن الى هسه ممستوعب ان اخته وامه ماتوا كل يوم الصبح اغسل وابدل العلي والجنى وامشط الها شعرها وراها يبدون يلعبون سوا بذاك اليوم قررت اخذ غزوان ونروح للنجف عل قبر امه واخته بس شلون اقنعه حجيت ويه ام امير وكالت ان اشرف يودينا اني كيفت ورحت عل غزوان وحضرت اله ملابسه وبديت اگله نروح لمكان حلو وهو مثل طفل مستسلم الي وممعترض وفعلا طلعنا وكت الضحى الطريق كله غزوان ساكت ابد محجه ولاكلمه ويه اشرف الي جان يحاول بيدي موضوع وياه بس للاسف الصمت هو الرفيق النه لمن وصلنا لقبر زينب وفليحه ظل غزوان واكف ولاتاثر ولابجه ولانطق كلمه ظليت اسقي القبر وقريت قران وعگلت بخور عل قبورهم ورجعنا طريق روحه ورجعه هو محجه ولاكلمه ولافتح حلكه ولابين عليه اي تاثر حسيت ان غزوان مات من يوم الي ماتت بيه امه وهذا الي كدامي انسان اخر محطم عايش بااوهام وتخيلات وماعاد يهتم لاامري ولاامر علي فور رجعونا للبيت هو راح عل جنى يلاعبها
مرت اشهر ماكو تحسن بحالة غزوان يگضي وكته كله ويه جنى وعلي اذا حس بيه ظلينا عل هل منوال تلث سنين واجه اليوم الي يصير بيه امير شيخ وفعلا جان كلشي باايدهم وغزوان مثل طفل بحجم رجل كلشي اتغير وصارت سماح تامر وتنهي هيه وابنها جنت اعرف ان غزوان مجرد ان يصحى راح يتغير كلشي بس مرض غزوان طول ويمكن مراح يشفه منه ابد
الموازين تغيرت وعلي صار يفتهم ويحس ان هو منبوذ من قبل سماح واولادها ومن قبل ابوه الي جان عايش بالوهم
الحياة اطورت ودخول النت وستلايت لحياتنا غير كلشي بينا العمر جان يركض والي عرفته ان بيت عمي جبر امهم ماتت وضاح ازوج وحده من بنات عواد 'خوات غزوان كلهم ازوجوا بدايه 2012 عزلتنا سماح وقسمت البيت هيه واولاده وحد واني وغزوان وعلي وحد اما جنى ظلت ويانه ويجي كل يوم امير عليها يشتري الها نساتل وحلويات ويروح بدت سماح تفكر بزواج ابنها الشيخ وبدت تعرض اله بالفتيات بس جان دومه يرفض
يوم عل يوم خوفي عل علي يزيد جنت اعرف ان سماح تشوفه عدو لاابنها الي كبر وصار شيخ جانت تجينا كل جمعه تزورنا وتروح تطمئن ان غزوان بعده بسباته وتجس نبضنا وتروح بذيج الجمعه دزت عليه بدال ماتجيني دزت حوراء عليه لبست عبايتي ورحت عليها استقبلتني احسن استقبال
-ياهلا باام علي شرفتينا نور بيتنا بطلتج
-البيت منور بااصحابه
-شاي لو قهوة
-تسلمين مااريد شي
-ام علي اني ما بيوم حبيتج واني اعترف الج بهل شي بس مع هذا مااكدر اسبب الج اذيه او احرمج من ابنج مثل ماسوت خالتي بفليحه
-ليش تحرميني من ابني شسويت الج
-هو هذا الي لازم يصير ابنج هسه صغير بس من يكبر راح ينازع ويشارك ابني عل مشيخه (تحجي وهي تتمخطر بطولها گدامي واني جسمي يرجف من خوف من كلامها) وكملت تعرفين عباس واشرف مستعدين كلشي يسون علمودي بس اني مااريد اعيد ماساة غزوان اريدج انت تصرفين
- شلون يعني مافهمت عليج(اتقربت عليه وعيونها فتحتهم عل كبرهم وقربت راسها يم اذاني )
-انهزمي
-انهزم
-اي اخذي ابنج وانهزمي انطيج فلوس واخلي احد يوصلج وين متردين
-ليش اني مماذيتج ولا يوم وكفت بوجهج
-ناز اني جاي ارحمج اني اكدر بكم فلس اتخلص منج ومن ابنج بس گتلج اني مو خالتي واعيد ماساة (تحجي وهي تظاهر بالطيبه) انطيج شهر تختارين مكان الي ترحين اله تردين البصره الناصريه النجف كربلاء الكوت بغداد حته الشمال كله گدامج بس اهنا لا ممسموح الج
-وغزوان شسوين اله
-لاتنسين هذا عم جهال وزوجي مراح اذيه لاتخافين
-واذا سالج عليه وعل ابنه شتگولين اله
-ام علي ام عليوي اني ادبرها ثانيا غزوان هسه بحكم طفل مايدري شكو ماكو لاتخافين مراح اذيه اني كل الي اريده يرجع الحق لاابني ومااريد ابنج يشاركه انت اختاري لو تدخلين انت حرب مو گدها لو تنهزمين
هزيت براسي وطلعت منها ياربي هاي صدك تحجي وشلون بيه اني وحيده هسه ماكو احد يحميني منها لا فليحه ولا غزوان وهيه كلشي باايدها  وجاي تهددني عينك عينك يارب عيني اذكرت كلام وضاح من گلي انت مو گدها لاام امير حسيت بدوخه وردت اوكع كمشت السياج واني انزل من درج هاي اني شسوي شصرف وين اروح مااعرف احد وحتى اذا انهزمت ورايه شراح تگول وتالف عليه كلش عادي تكول انهزمت ويه واحد وتشيع عليه بالموزين الما وصلت الغرفتي تناوشت الباب وسديتها ورايه وكعدت ابجي واگول وينج فليحه تعالي شوفيني شحالي وشوفي غزوان الي صار مثل مخبل وضعنا وراج وهاي حربايه جاي تكلي انهزمي وين انطي وجهي هسه وين انهزم فكرت التجا الوضاح بس شلون هاي تروح تسلط الچلاب مالتها عليهم وتصير مصايب وقتل وشسوي اني بهيج حاله لا عيني خلي ولد عمي عل صفحه اروح عل بغداد احسن شي واخلص من هل عذاب بس غزوان اخاف اعوفه وتاذيه اكيد راح تتخلص منه ظليت افكر وافكر الى ان راسي راد ينفجر من تفكير بس اخر شي عزمت مااطلع اله اخذ ويايه غزوان ماابقيه تحت رحمتها
ثاني گتلها تحضر الي فلوس واني خلال اسبوع راح اختفي بس ماكلت الها ان اخذ غزوان ويايه اكيد مراح ترضى جنت ناويه انهزم بيه واهناك اعالجه واخليه يتحسن وهو راح يرجع قوي وياخذ حقي وحقه منها

ام احمد
كلما اصير زينه انزل الكم بارت لان بعدني مريضه😔😔