رواية دخيله بنت الشيوخ الفصل العشرون 20 - بقلم اوسار

#دخيله_بنت_شيوخ
الجزء الثاني
بارت 5

هو شنو بكيفكم تبيعوني شنو هالكد رخيصه اذا كلتي الرافد اكتل روحي مثل ميس

انت مو جاهله سكتي تره خالج عنده استعداد .. يگبعج وياخذج ورافد مايرفضلي طلب ...

يمه شبيج انه بحال زواج لو احنه كلنه بحال زواج هسه مو اختي توها ميته والله الكم خلك ..

ولج هو منين الخلك انه اريد مصلحتج ورافد ربيته وتعبت عليه .. خاف تاخذه وحده منا منا وتشلع بي واحنه نظل مالنه والي اذا خذاج انت احسن ..
ماتشوفين خالج يهوبز على راسنه

والله انت ناطيته مجال انت ضعيفه عمرج كله كضيتي خوف وحتى ماتطدرين تحمينه
خليني انه اوكف بوجه خالي ..

حتى يلزكج بالكاع والله خالج وتعرفينه

كامت امي اخذت التليفون وظلت تحجي وي رافد وانه وصلت المرحله مااهتم لاي شي بعد ..
صح احجي بس بدون خلك
وحتى ايلول نسيته شكد تعذبت على فراگه .. ومن عافني بسرعه بدون ماايقاوم ويرجعني وبعد من تزوج انقهرت اكثر واكثر والغيره عليه حتى وهو بعيد عذبني .. بس بالفتره الاخيره نسيت كل شي واللتهيت بهمي
جانت عدنه خالتي لان امي فد نوب تعبانه وكل شوي تطيح جانت تلوم روحها لان هي  رجعت .. ميس
خالتي وبتها بقوا عدنه .. بتهه اكبر مني بسنتين ..
وبعدها بيومين اجه رافد .. انه بقيت بالغرفه .. مااطلع رفضت فكرت زواجي منه وتفاجئت بجيته بسرعه بس كلتله امي ..
.اندكت الباب . بت خالتي اسمها جنات جانت يمي
بلغرفه راحت فتحتهه ورجعت كالت رافد يريدج ..

كمت متعاجزه ماادري خجلانه اطلع اله .. ماادري شنو الي بيه .. خليت شالي على راسي وطلعتله ..
صار كبالي وظل يباوعلي .. انه لاسلمت عليه ولاشي وكفت اطل عليه من الباب كتله ببرود ها رافد .
تريدني ؟ اقصد تريد شي
هو جرها حسره .. وخله ايده ع الحاط كلي انت موافقه
على شنو
شبيج شنو جاي تسوين نفسج ماتدرين
انت شبيك رافد .. مجاي افتهم عليك ..
لاتخبليني جيت اخذ موافقتج انت موافقه نتزوج ..
ماادري
انت اكيد بيج شي تطلعين الواحد من طوره شنو ماادري .. انت مريضه ولازم تتعالجين ..
وعافني وراح .. طبيت للغرفه جنات سمعت كل شي
كعدت ع الجربايه اجت كعدت يمي .. ولج هو هذا ينرفض جنه حلقومه
تردينه عاجبج اخذي
هههه ولج هو هذا يتفوت امداج هم طبيب وهم حلو تره وانت بوضعج هذا يعني ماادري شگول
كمت من الجربايه ووكفت اتخصرت الها اي ادري تردين تكولين انه مطلكه وبنظره الرافد مريضه نفسيا يعني مخبله وهو طبيب ومامتزوج ولامرتبط يعني انه كلش اوڤر عليه  وبعد شنو احجي
لج لا لاتزعلين مني
ماازعل بس انه اتنرفز بسرعه
كولي ليش رفضتي رافد بعدج تحبي لرجلج ذاك
ماكو حب بداخلي شعور الالم والوجع طغى على اي شعور بداخلي ..
وهسه شراح تسوين
ادري اذا ماوافقت على رافد .. خالي ماراح يتركنه بحالنه وامي تعبانه كلش ماتتحمل خايفه اخسرها بس هي بقتلي .. رايحه احاجي امي
رحت لامي لغرفتها فتحت الباب جان رافد هناك كاعد وخالتي هم
استحيت منه .. ردت اطلع كال تعالي انه راح اطلع
باوعلي وباوعتله وطلع ..
خالتي كالت تعاي حبيبه كعدي
رحت كعدت يمهه كتلهه يمه كولي الرافد انه موافقه عليه بس كليله لايكلي مريضه زين
الله يهديج ييمه الله يهديج
خالتي كالت زين سويتي تره رافد يحبكم وماكو غيره يحميكم ..
اي لازم جاا السنوات الي امي ربته بيها شنو ماتستاهل يردلهه جميلهه وكبرته ودرسته وسوته دكتور مالهه فضل عليه مو احسن من امه الي تركته ..
اشش سكتي ولج شهالحجي انه عمري ماعيرته بتربيتي اله تجين انت تعيرينه والولد ماناكر تره لاتظلين تنعثلين من كيفج
يمه شحجيت هسه انه ماتكليلي ..
حجيج كله غلط الله يساعده شون راح يتحملج ..
انه دوم ماعاجبتج اكوم احسن
كمت من يم امي دوم احنه ع خلاف واضوج اداهرها لان اتعب .. ومااريد احصل اثم لان هي تبقى ام ..
بعدهه من وصل خبر موافقتي الرافد ماطول هواي وراح الخالي وكله ومن رجع خالي خابر امي ورزلها شون تفضلين ابن حماج عليه ومن هالحجي ..
ورزلها وظلت تبجي وتخربطت .. ولو ما خالتي انه ماادري شسوي حتى خالتي تكول هم زين ماعندي رجال جان مايقبل ابقى عدكم هالكد ..
وكل هذا ورافد مااهتم يوم ثاني راح بلغهم وكللهم اذا تحبون تحضرون راح اعقد عقد سيد ..
جنت متعجبه عليه شكد .. مستعجل .. ماافتهمت عليه ..
الصبح خالتي كلتلي خليني انضف وجهج وارتب حواجبج ماقبلت مجنت فرحانه حاسه باهانه جبيره لان اعتبر امي خطبتني الرافد مو هو خطبني
اجه السيد وعقد النا.طبعا لاتبديل ولاشي بملابسي السود.. بعد ماخلصنا رحت اركض للغرفه اجت وراي  جنات كالت خالتي تكول تعاي رافد يصيحلج
شيريد
مادري
اووو جايه  راحت جنات ورحت وراها مراح اخلص اليوم ..
رحت طبيت للهول ..جان  رافد .. واكف .. يم القنفه وكفت يم نهاية القنفه  اجه يمي وسحب ايدي ولبسني حلقه .. باصبعي ظليت ارجف ودموعي طاحن جانت بيده حلقه اله خمشتها منه بدون مااحد

يكولي .. ولبستهه اله .. هو ظل يتحسر وضاج وانه ماتحملت كتلهم وانه ابجي .. بعد تردون شي محد جاوبني امي اصلا جانت تبجي
عفتهم ورحت .. طبيت بالغرفه .. وكعدت ع الجربايه اعصر باصابع ايدي ماادري شسوي ..
لااكو فرح ولاامل ولاابد ..
طبت وراي خالتي .. باوعتلهه ودنكت .. اجت كعدت يمي .. بقيت مدنگه وهي ظلت تحاجيني ..
شبيج اسوله انت مافرحانه.
على شنو افرح خاله الفرح راح وي اهله
شبي رافد وماتفرحين بي ..
مابي شي
ماتحبينه لو فكرج بعده يم رجلج ذاك
باوعتلهه وانه مخنزره .. كتلهه خاله باب گلبي مقفول
وماافكر بشي هسه
بس هسه شراح يگول عنج رافد .. ماتريدني وفكرها يم ذاك ..
شما يكول خلي يكول .. انه ماجبرته يتزوجني خاله عفيه انه مالي خلك كلشي نفسي مسدوده ..
بكيفج خاله انه اريد مصلحتج ورافد خوش

مشكوره خاله مقصرتني ويانه بس انه تعبانه .. والله الله يعلم بحالي الصار بيه مو شويه وانا مو قويه الهدرجه .. حتى اتحمل

الله يعينكم حبيبه ..
وطلعت ..
مرت كم يوم وانه يااما حابسه نفسي بالغرفه ومن يطلع .. رافد اطلع ومااردت اشوفه ابد ..
مره جنت بالهول معبالي هو موجود .. وطب مكدرت اكوم .. اجه كعد يمي .. كال شونج
وانه مدنكه كتله زينه ..
ليش مااشوفج
مايصدف اطلع واشوفك
وراح تبقين هيج قافله على نفسج .. وبعدين حلقتج وين ليش ماجاي اشوفها بيدج ..
كمت اريد اروح . وكف كبالي كال وين رايحه بعد لهسه . ماخلصت حجيي ..
رافد انه تعبانه اريد اروح ارتاح
بس ردت اكلج راح اخذكم واروح البغداد ..
كول لامي انه ماعليه ..
كلت لامي بس انت معتبرج عود زوجتي واريد اخذ رأيج ..
اي هذا هو بكيفكم اترخص رافد انه تعبانه ..
رحت للغرفه
بعدهه سافر رافد وراها بفتره ..اجت امي كالت  رافد يكول تحضروا اخذكم .. حضرت البيت
اي خوش ..
شبيج تره كلبي خلصان
يعني شتردين متي يمه
رجلج هذا ..منا وجاي عاملي زين تگربي منه اكثر
اي خوش
جنج ماعاجبج حجيي تره فراك اختج مرد گلبي انت لاتأذيني
يمه انه اكثر منج والله والصارلي كبل هم تعبني الله يخليج لاتلحين عليه .. وهي ايدج ابوسها وراسج هم .. فدوه امي والله تعبانه نفسيا وحتى جسديا ومامستعده هسه لاي شي ..
بكيفج .. بس تره رافد  مايستاهل هي المعامله منج
شوفي قابل بابسط شي المثله حقه يفرح بعرسه .. هم بعده شاب ولامتزوج كبل ولا شي وانت كالبه الخلقه ويا ومبهذله روحج
انه من اتحسن وارتاح راح اعوضه والله يخليج بطلي تلمحين وتحسسيني بان انه مطلكه وهو شاب ومامتزوج وتنتقصين مني الله يخليج تره تدمرت ..
الي بيه كافيني
نمت بحضنها ابجي اريد احس بحنانج يمه .
حاسه برافد والي جاي ييسوي بس احس روحي بارده مثل جثه ومخلينها بتابوت ومرت الساعات على وفاتهه مجرده من كل احساس ..
بعدهه هم جتي خالتي .. وبنتهه وعزلنه الغراض وكترناهم وانتظرنه رافد يجي بيومها اجه وانه ماطلعت ولا رحت سلمت عليه ..
اجتي امي وكالت يريدج تعقدين ويا محكمه .. رفضت ماردت اعقد هسه محكمه ..
بوكتها مااعرف ردة فعله بس من ردنا نسافر وطلعت وصرت كباله حسيته مقهور بس ميكدر يسوي شي ..
شافني وتحسر حسيت كارهني مااعرف معتبرني مريضه .. وماادري ليش متحملني طيبه لو رد جميل لامي الربته سنين
سافرنا ويا بس مثل اهتمامه مشفت يمكن الله بعثه النا .. جنت افكر لو متزوجني من الاول .. مجان .. صار كل هذا .. بس ليش رفضني وهسا متمسك بيه ماافتهمت .. ولااالي خلك اتقرب منه خايفه اخسره ونضيع من بعده لان صرت متاكده من حظي العاثر. اي شخص اتعلق بي .. اخسره ..
وصلنا لبغداد .. وطبينه للبيت جان حلو هاديئ ومرتب اكثر وحده جانت فرحانه هي روان ..
بي غرفتين نوم وصاله وهول .. وطابق واحد ..
اول ماطبينه .. كال البيت بسيط وزغير بس هذا الي كدرت احصله ان شاءالله ع الجايات اشوف غيره.. امي كلتله .. عاشت ايدك مااقصرت اهم شي نرتاح بي وان شاءالله نرتاح ..
طبينه بالممر الي بي الغرف كال هي غرفتي جانت ركن والمقابيلهه الكم .. وراح دخل جنطنه بيها وطلع ورحنا احنه طبينه تلاثتنه بالغرفه وامي تخزر بيه .. كالت روحي ودي غراضج بغرفته وتقربي منه
يمه شسالفه خو مااذب روحي عليه
مو رجلج وعقدتوا وصرتي اله واحنه متفقين وحتى ويا خالج بدون لا زفه ولا عرس ولا شي ..
هم خالي والله لعببت نفسي .. شنو يمه ماتريديني
ماتصير الج جاره ..
اي انه مكروها
اباوع للغرفه بيهه 3اسره .. وحمام
ماافتهمت على رافد هو مايريدني يمه لو مايريد يفرض عليه شي بقيت محتاره .. واختاريت ابقى بعيده عنه .. وهو هم قليل يتواجد بالبيت .. ومن يجي ويصدف يشوفني .. اشوف بعيونه نضرات مااكدر افسرهه مرات شي بداخلي يحفزني اتقرب اله بس اكو شي ثاني يمنعني ..
بهالفتره صرت كلش عصبيه واكثر عدوانيه احس بفراغ بداخلي واحس فقدت الهدوء النفسي .. والاحساس بالذنب مرافقني
اكثر شي جان يحسسني بالذنب شلون مااكدرت احمي ميس وشون تزوجت بعد وفاتهه بفتره قليله فقدت الشهيه بالاكل وزني بالنازل .وقلة النوم والارق دمرني . وع اقل شي اضرب روان .. واتعارك ويا امي ..
كرهت كل شي حبيته .. وظليت احس بألام بظهري وبجسمي بس ماافصحت عنها ... بقيت منعزله واذا اختلط وياهم اتعارك .. واتهجم عليهم

كم مره تجي .. امي تگول رافد يگول خل نطلع نغير جو .. انه ارفض واختار ابقى الوحدي ..

تجيني حالات .. ابجي هواي بسبب وبدونه ..

بعدهه وبيوم  اجت النا خالتي زياره .. من العماره خابرت امي قبلها وراح رافد جابهه من الكراج ..

بقت جم يوم .. وكالت خلي نروح نزور كربلا ونجف .. ورحنا وياهه
وهناك وبالمقبره فرغت كل دمعه بعيني ع قبر ميس .
ورحنه الكربلاء
نزلنه بفندق .. طلعنه الصبح نزور .. كملنه زياره ورحنه كعدنه بين الحرمين .. خالتي وجنات راحوا للسوك بقينه كاعدين انه وامي وروان
كالت لامي .  يمه اريد اروح للسوگ اكو هنا اكسسوارات عجبتني اخذ منهم ..
كتلها بنتر انت ماتشبعين من السوك مو هسا خالتي
ماتعرفين تروحين وياهه ..
ردت عليه انت شعليج بيه تردين الحجه تتعاركين حتى لو يصح بيدج تتعاركين وي الهوا
تلاشينه بالحجي وصاحت علينه امي فشلتونه الناس كامت تباوع سكتن
.ظلت روان . تحوص جوه امي .. لما امي كالت يلا نروح للسوك
كتلها روحن انه مااروح ابقى هنا ..
تخبلتي تبقين بوحدج
اي يمه مالي خلك سوك انه هسه روحن وانه اندل اروح وحدي للفندق ..
ردت عليه امي ..اكعدي هنا احنه نجي ونروح سويه هذا هو السوق ..
خوش يمه روحي
ماتردين اجيللج شي ويا من السوك
كل شي مااريد ..
ماتاخذين الرافد شي ..
لا
موتي راح يصير بسبتج اسيل امشينه رونه ..
راحت امي .. وبقيت كاعده بمكاني .. واباوع للناس .
.

شفت مره تأشرلي .. عيوني تغوش .. ماعرفتها ظليت اباوع الهه .. شفت بصفها واحد معقوله انساه ..
عرفت خاله حمديه منه .. ايلول رحت يمهم ماكدرت افشل خاله حمديه شفت ايلول   وبصفه بنيه  نايمه بحضن مره ثانيه اتذكرتهم كلهم شايفتهم عرفت انسام وامها كلهم شايفتهم من تزوجنا اجو تباركوا النا .سلمت بس على خاله حمديه .. ورجعت ولا حتى باوعت لايلول ..
من رجعت. جانت امي وروان راجعين كتلها يله يمه نروح .. ومشينه جان الجو بي هوا بارد .جريت النفس  احس دخل بريتي .. وانه على هالحال .. شعوري
من شفت ايلول ماكو جان اي احساس بد اخلي .خاصة من شفت  زوجته ويا اقتنعت بانه صار ملك غيري وهنا حسيت بالقوه لان ماغرت ولاضعفت ولااي شي مجرد ذكريات قديمه اجت ابالي ..
عبرنه الشارع للسايد الثاني ... ومشينه بصف المحلات وشفت .. سبح عجبني تذكرت رافد حبيت اخذ اله شي بعد ما فرغت كل شي بداخلي يخص ايلول ..
جانت امي وروان سابقاتني بالمشي .. سحبت امي من عبايتهه ..  دارت عليه كالت هاا كتلهه اريد .. اشتري
كالت الله يهديج يمه ..
باوعتلهه ضجت من حجايتهه لان تحسسني بان انه مخبله .. خنزرت كتلها مااريد امشي نروح
ردت عليه ولج اسيل مو احس گلبي خلصان وگوه جاي امشي. . على رجليه لاتأذيني اخذي التردينه ييمه ولج كافي عليه شوفة اختج .. بالكبر
انقهرت من حجيهه گتلهه يمه اريد من هي السبح واشرت ع المحل جان بعد خطوات .. كالت يله امشي .. رحت اباوع السبح .. شفت وحده  فيكه .بيضه كرستال ابيض ناصع والشواهيد مالتهه .. سود مصقوله من عدة جوانب .. وبيهه سلسلتين لونهم  ذهبي. اخذته اله وضميتها بالجنطه ..
رحنه للفندق .. طبت امي .. للحمام بقينه انه وروان
جان تباوعلي وتكلي .. المن هي السبحه الي اشتريتيها ..
معليج شغله ماتخصج ..
عرفت اشتريتيها لايلول عبالج ماشفتج جنتي يمهم
روان انت شنو ناويه على موتج مو اطلع الحرگه بيج هنا تره مااتحمل ..
سكتت عني وراحت ..
امي خابرت على خالتي كلتلها جينه للفندق ..
بعدها بوكت الغدا امي تعبت .. انه نزلت اجيب الغده وحجينه
عفته ورحت جبت اكل .. ورجعنه للفندق وبيومها رجعنه البغداد ..
ماشفت رافد ولااطيته السبحه بقيتها يمي
امي جانت تعبانه ومثل كل مره تزور القبر تتخربط .. وتنام بالفراش بس هالمره .. كلش صارت والحمدلله بقت خالتي يمنه ونقلوهه للمستشفى .. هي ورافد
وبقت يمهه ..
بقينه الوحدنه انه روان وجنات ..
جان وكت ظهر .. ورافد ماكو .. وجنات نايمه طلعت من الغرفه اسمع صوت روان .. بالصاله وساده .. الباب بس صوتها .. كانها جاي تحجي وي ولد وغزل وكذا فورت دمي .. طبيت عليهه .. شافتني سدته
كتلها وي منو تحجين
ماعليج ..
مو سمعتج .. تحجين وي ولد
اي جاي احجي انت ماعليج
جيبي التليفون موصوجج صوج رافد جابه الج ..
جيبي ..
وخري تليفوني ماعليج انت عليج بسوادينج ..
انه اله اربيج ولج عمرج توه 14سنه .. وتخابرين ولد خمشته التليفون منها قاومتني .. خرمشتهه وطلع دم منها .. وظليت اضرب بيهه اطلع قهري.. الى ان اجت جنات خلصتها مني .. اخذتها وتريد تطلع .. من الصاله وكفت يم الباب كامت تصيح وهي تبجي ..
اله اكول الرافد عليج شفتي ايلول بكربلا .. واشتريتيله سبحه ورحتي .. نزلتي شفتي مره ثانيه وحاجيتي
رحت اركض وراهه شفت رافد .. كبالي .. وسمع كل شي .. خليت ايدي على حلكي راحت وكفت يمه وظلت تحلفله .. بانها شافتني يم ايلول .. ظل يهدأ بيها وانه بقيت صافنه ..
اجه صوبي ودخلني بالصاله .. بقينه وحدنه ..
اباوع العيونه تجدح نار .. گلي صح الگالته
گتله اي ..
يتبع ..
هلاو طبعا اسفه والله طالعه مو بالبيت 😔وكوه كدرت احصل نت وانشر وكوه كتبت هم لان كلش هوسه يمي تقبلوا اعتذاري وتحياتي