رواية دخيله بنت الشيوخ الفصل التاسع عشر 19 - بقلم اوسار

#دخيله_بنت_شيوخ
بارت 4
بقلم نوره ..

عرفت مأذيه نفسهه من درجة اليأس الي وصلت اله
واكيد هم مارحموا بحالها. . واكيد رجعوا لنفس الاذيه

مااعرف شلون لبسنا عبينه .. واخذنه روان ويانه واجرنه تكسي من الشارع ورحنه .. للمستشفى ..

هناك جانوا كلهم خالي ومرت خالي وباسم .. ماتحملت عصبيتي وكلتها بوجها المرت خالي هاا ارتاحيتي هسه من خليتها تنتحر هي دارت وجها وماحجت خالي جر امي وظل يهمس بذانها هي تربيتج من تف عليج وعلى تربيتج امي جانت حالتهه حاله وكلبها مفرفح بس تريد تشوفها .. الميس ..
مخلينها تحت المراقبه اتوسلنه بالدكتور .. كوه قبل نشوفها دخلنه انه وامي .. دخلنه عليهه جانت فاقده الوعي .. امي ماتحملت كعدت بالكاع تبجي تعبت كلش حالتهه حاله وملابسهه كلهه دم .. انه عود قويت نفسي .. بس بداخلي كل شي محطم ومكسور وخليت ايدي على كصتها وتقربت منها ودموعي تطيح على وجهه .. كتلهه ليش هيج لميس شسويتي بعمرج بعدج ورده مفتحه محد يستاهل التسوينه بروحج ..
فتحت عيونها بعد عيني ..كامت امي بضعف وظلت تبجي يمها وتكول الها دمرتج ييمه دمرتكم كله مني  ظلت ميس تسولف بألم كالت ماتحملت رحت بالبستان .. ادور نفط حتى احرك روحي بس ماجنت جريئه لهالحد .. باوعت صار گبالي المخزن رحت فتحته .. وظليت اباوع للغراض لكيت بي مواد .. شميت ريحته عرفته هذا مبيد حشري من جان ابوي يكافح بي الزرع .. من شدة يئسي .. مافكرت بشي جرعته .. وصار الي صار ..
زدت بجي بس مو بصوت عالي مااريد اذيها اكثر
كملت حجيها وكالت .. انه بعد اكو بداخلي .. حب للحياة بس مو هي الحياة
كتلهه ميس انت متندمه
اي اسيل والله متندمه ومااريد اموت مااريد .. مااريد
تخربطت وظل الدم يطلع من حلگهه .. رحت اصيح لاحد اجوا الطبيب والممرضه وطلعنا بره عرفت هي نهايتها ومستحيل بعد تعيش .. اباوع بالوجوه محتاره احساس بداخلي مينوصف عرفت الدنيا موعادله وياي جاي تاخذ مني كل شي حلو .. وتنكيهم نكوه حتى تحرمني منهم .خذت مني زوجي وطفلي وابويه وهسه اختي . وبنفس الوكت شكد تافهه هالحياة وماتستحق واحد يهتم لاي شي بيها .. بقت ميس ليله وحده .. والطبيب يطب ويطلع يكول .. توقعوا كل شي .. بليلتهه ماتت ميس ومات وياهه كل شي حلو يمكن ينتظرها .. بس هي جانت يائسه لدرجه كلش جبيره جنت حييل متحسفه ع طريقة موتها .. ودائما اسمع الي ينتحر .. يخسر الدنيا والاخره كلش تعذبت بموتها وكلما اصفن واكول هي راح تروح للنار .. اتعذب بداخلي اكثر  بس هي ندمت ع السوته ومارادت تموت .. جانت متمسكه بالحياة وتريد تعيش  .. دعيت الله يغفر الها ..
مرت ايام الفاتحه صعبه علينه .. سووها ابيت خالي وعلنوها للناس كالوا قضاء وقدر ماكالوا انتحار ..
بس اكيد الناس تشمشم اخبار من جوه الكاع ..
جنت اريد اكعد وحدي وابجي عليها جنت محتاجه الوحده بهالحظه تعبت كلش وصرت عصبيه ومن اشوف النسوان شلون همهن الاكل ويضحكن ويصنفن ابدي اكطعهن .. تكطيع .. ع جم وحده من كرايبنه ردت اخمشها بالفاتحه لان نرفزتني ويكضني البنات ..
كلت لامي اريد اروح للبيت انه مااتحمل ابقى هنا
عيب ولج الناس شتكول فاتحة اختها وماكعدت بيدها لزمي اعصابج شويه ..
يعني انه اروح انعزل بوحدي عيب  ومو عيب هنه يتمضحكن
ماعليج بيهن ولج كلبي نار انه لاتموتيني وره اختج
لاتأذيني ..
هو بس انت كلبج نار ..
سكتت عن امي جانت حالتهه كلش جان اكو هواي حجي بكلبي اكوله الها انت رجعتيهه انت ضعيفه وماوكفتي بوجه اخوج انت ماحميتيهه وانت وانت وانت .  بس امي بعد مااشردت عمتي ضعفت شخصيتها وبقت بخوف طول عمرها لاتنكشف لذلك جانت خاضعه .. الهم حتى لايأذوها واحنه طحنه بيها وكعت  براسنه وصرنا الضحيه ... لخوفها ولتقاليد وعادات همجيه .. خاصة بالمناطق الريفيه والنائيه البعض يعتبرون الچنه خادمه ... ويعاملوها على هالاساس ... ماردت اثگل على امي فوك حملها واكيد الضنا غالي وماجان بدها يصير هيج رادت تهدي الوضع وبس
اخر يوم الفاتحه رحت لامي جانت بالهول متمدده ونايمه وفد نوب .. متأذايه حتى ماتكدر تكوم كتلهه   امي يله امشينه نرجع للبيت
بقى يومين للخميس خل نبقى بصوت تعبان
ماابقى هنا لوو امووت انه .. اريد اروح للبيت
اسيل لاتتخبلين شجاج فشله من الناس مرت خالج تتوسل بيه نظل للخميس ...
مااريد ابقى هنا كبال ذول هم كتلوها هم السبب
سكتي ولج لاتفضحينه اكثر من هالفضيحه ...
يمه راح اختنكك اريد اطلع منا مااتحمل اشوف ذول
روحي ولي روحي عساج لارديتي ..

كمت من يم امي ادور روان وين .. شفتهه كاعده يم بت وحده من خالاتي تشوفها بالتليفون مااعرف شنو اشرت الها تعاي اجت
كتلهه روحي شوفي رافد وين .. خلي يودينه للبيت .. ماا روحي انت كليله ..
وجعاا ان شاءالله لو انت رايحه ولاميس ..
ظلت تباوعلي ومخنزره رخت جريت عبايه ولفيت شالي عدل خليت العبايه ع راسي .. و طلعت
مشيت مسافه وكفت يم الجادر مال الزلم اريد الجح رافد حتى احاجي نسيت كلشي بوكتها بس احس مخنوكه هنا مااجاي اطيق المكان الي بي تعذبت ميس حد الموت ..
بقيت واكفه واتلفت والشمس بعيني دنيا عصر اعرف راح احصلي حجايه بس ماجان يهمني شي ..
شفت واحد ملثم روحه بالغتره اجه من بعيد اقترب يمي عرفته باسم من شفته بكلبي بس ادعي علي عسى اللخ لايهنيك بحياتك
كله منه يسمع حجي امه واذاهه مااحترمها زهكها وكرها بالحياة
وخر الغتره كال شعدج هنا
ماعليك انت اريد رافد
وخري منا عيب زلم هنا ..
كتلك ماعليك اتاني رافد انه ..
ظل يدفع بيه من ايدي يكلي روحي .. وانه مااقبل .

اجه رافد يمكن شافنه .. اقترب منه وكال شنو شبيكم
درت عليه كتله وديني للبيت رافد ..
يله روحي تحضري علما اشغل السياره
خوش
رحت للبيت امي جانت باللهول .. نايمه ع المندر لان كلش تعبانه ومابيهه حتى تكوم
نزلت كعدت يمهه وقربت وجهي يم راسها وهمست باذنها كتلهه يمه انه رايحه للبيت امشي وياي
نترت بيه كالت روحي
يمه عفيه مو هناك احسن حتى اداريج
ماني بحاجتج روحي
زين يمه بوستهه من راسها كمت ودموعي تهل
رحت صحت روان كتلهه ترخين وياي كالت لا مااروح انت روحي انه ابقى هنا
زين ديري بالج ع امي موتلهين عنها
خوش
طلعت بره شفت رافد منتجي ع السياره ولابس قميص اسود ومبين عليه الحزن ..
كتله يله
شنو بس انت
اي بس انه
مو امج تعبانه مو المفروض تبقين وياهه
مااريد ابقى هنا اختنكت لنتر
ديله امشي صعدي
رحت صعدت بالسياره وكعدت وره ..
وصلنه للبيت رحت شمرت عباتي .. وغسلت وجهي وي دموعي ورحت للغرفه
وسديت الباب وظليت ابجي بس احس تنفست هنا ابجي وحدي وبدون رياء فقدت رغبتي بالحياة .. وحبست على نفسي بالغرفه وحزني جان رفيقي الوحيد .. دخلت بالفراش تذكرت .. ميس من تكول اريد انام ومااكعد
للصبح نمت كعدت ع صوت دكة باب الغرفه كمت من الفراش .. عدلت دشداشتي وشمرت شال على راسي
وفركت عيوني .. وفتحتله الباب ..
كال صباح الخير
صباح النور
كعدتج مو
عادي
راح اروح العمي للسجن كبل جم يوم جان متخربط
اي حيل بي يستاهل كلها بسببه ..
هي شبيج اسيل انت تعبانه تردين ارجع اكتبلج مهديئ انت محتاجته
لا مامحتاجه مابيه شي
زين اذا بقيتي هنا لوحدج ماعليج شي بين مااروح وارجع ..
ماعلي شي روح
عندج تليفون
لأ
زين
مر على امي شوفها ..
اي اكيد بدون ماتوصيني .. هسه اني اروح انت متأكده ماعليج شي هنا لوحدج
اي ماعليه شي روح الله وياك
تره اني جاي اهتم بيج باعتبارج اختي
اي ادري وانت بالفعل اخوي لان امي ربتك ..
اي اكيد يله لعد ديري بالج ع نفسج
راح رافد وانه جنت من احجي ويا كله نتر نوب يكلي مثل اختي عباله مخليه  عيني عليه هف والله ياالله انه بروحي الد نيا طالعه من خشمي
وهذا مدري شبي ..
بعد من اجه ماشفته .. بقيت بالغرفه واذا اطلع مااشوفه هو يسوي النفسه اكل ..
ويغسل ملابسه
ضجت منه من كلي اهتم بيج مثل اختي .. خفت اطلع واسئله شيريد ويكول تتقربلي ..
بقيت حاجزه نفسي بغرفتي والحزن وياي ساعه ابجي ساعه افكر بالجاي شراح يصير ساعه اكول اكثر من الي صار شيصير بعد ويجي على بالي .. مخططات خالي وخايفه لايجبرني ع واحد من ولده
وكومه شغلات تجي ابالي ..
بعدهه اتذكر ايلول حييل شكد نسيته هالفتره جان مأرقني وشاغل فكري وخصوصا بعد مااتزوج شكد حزنت شكد انقهرت شكد عصبت وغرت احس كل هذا راح وتلاشى ومااله اي وجود بعد
وانا على هالحال اندكت باب الغرفه واكيد رافد فتحت الباب ع النص وحاجيته هاا رافد
هاا شونج اليوم زينه
اي زينه شتريد
شااريد .. يعني .. بس لاجيتي ولا سألتي ع امج
ولا عن ابوج
ماعندي ابو وامي باجر اروح الها .. 
ليش تصيحين انت زينه شو فتحي الباب خل اشوفج
ماابيه شي رافد روح منا اريد ابقى وحدي انه تعبانه
وسديت الباب وكعدت ابجي وهو يحاجيني
طلعي شبيج اني اريد اساعدج
قفلت الباب ورحت للفراش وسديت اذني اخذت موقف منه وماادري ليش ..
وراها صار يوم الخميس وبدلت ورحت اله يوديني لبيت خالي اشوف امي ..
من شافني تحسر ..
ماافتهمته وماحجيت ويا بس رحت صعدت بالسياره واجه صعد وحرك
رحت شفت امي تعبانه كلش ع حطتها بس انه مو اقل منها خلصت الخميسيه ع اعصابي .. كرهت هذا البيت .. كلش احس جاي اتعذب بي بمكان ميس ..
بالليل رجعنا وامي ويانه .. بعدهه بايام راح رافد ..
وبعد ماخلص العزاء الناس مارحمتنه ..وظلت تحجي اشكال حجي .. على ميس ناس ماتخاف الله حتى بشرفها طعنوها ..
وقبل لتخلص الاربعينيه خالي ظل يجي يتلوك ويوديهه للطبيب ويجيب الهه العلاج ويتسوك للبيت ويهتم بينه ومن هالحجي ماعرفنا وراه شي ..
بعدهه خلصت الاربعينيه
ورحنه زرنه قبر المرحومه جانت ايام صعبه ماردت امر بيها ولاتمنيتها حتى لاعدائي خنكه ماتنوصف ..
صرت احس حتى الهوه ضدي وكلشي ويا
من رجعنه وبعدها بكم اسبوع .. اجه خالي .. ومرته للبيتنه .. وكعد يسولف ويا امي ..
انه جنت كارهتهم يقتلون القتيل ويمشون بجنازته ..
لذلك ماطلعت ولاسلمت عليه كل مره مااطلع اسلم عليه يجيني للغرفه يرزلني بس هالمره تعجبت مااجه ورزلني
بعد ما طلعوا .. اجت امي .. وتصفك بيديه صفكة ندم شبيج يمه خيرج كتلها
كالت خالج اجه وخطبج لباسم
كتلهه
شنوو باحلامه والله لو يموت كافي ذل كافي تخضعيله يمه حركي روحج ترديني اتبع ميس

هو راح اتحرك .. واخابر رافد يجي يخطبج رافد واتلاحك عليج
وشنو انه رخيصه ترحين تتوسلين  برافد مايريدني هو لاترخصيني يمه
ماكو غير حل لاتعبيني رايحه اخابره وانت هص ولا كلمه
يتبع

اسفه ع التاخير
كملت كتابه وبدل لااضغط نسخ دست قص وكل الي كتبته راح وكعدت اكتب من جديد