رواية دروب الإِندِثـار الفصل الرابع عشر 14 - بقلم زينب صـلـاح 🤎

بقلمي : زينب صلـاح 🧡

لـ روايـة ﴿ دروب الإندِثار ﴾

في الـ part 11 ♡♡

لا تنسون التصويت + متابعة للحساب + التعليق بين الفقرات ☘️

كلُّ اتجاهٍ إلى عينيكِ يأخُذُني
من أين أعبرُ يا كلّ اتجاهاتي؟
‏
•••••••••••••••••••••••••••♕•

مسـرة•

فتحت عيوني وتمغطت بمكان جسمي مكسر لان اعتقد طولت بالنومة جانت سارة ودموع بعدهن نايمات واني عطشانه وما حبيت اگعدهن..

نزلت من السرير واخذت شالي شمرته ؏ راسي شلون ما كان وباوعت للساعة بـ 11 بالليل حيللل هاي شگـد نايمين!! فتحت الباب ؏ كيف ونزلت اباوع البيت هدوء اذا شمرت ابره بي ينسمع الصوت واضوية خفيفة موجودة..

فتحت الاضوية مال المطبخ بس ضربت كصتي واني اشوف مكان لكلاصات صايرات بعيدات وما الوحهن..

طلعت الماي وحطيته بصفي ورفعت جسمي ؏ اطراف اصابعي احاول اوصل بس ماكو انگطع گلبي...

فزيت ؏ فتحت الباب وحسيت عبالك يتعارك وياه هو صفن بوجهي واني صفنت بوجهة جان بعده بملابسه العسكرية مبين توه راجع ، رفع حاجبه وهو يتقدملي..

قسورة- شدا تسوين؟

- مـا ماي

صار صدره بوجهي وريحته كفختني كفخ سديت عيوني وسحبت نفس قوي جسمي يرجف حسيت بـي تقرب اكثر وهمس..

- اموت ؏ الملعبات

فتحت عيوني بحيرة ما فاهمة قصده جان قريب مني حاني جسمه وسانده ؏ الكاونتر وراي ووجهة بوجي و؏ شفايفه ابتسامه مو مريحة..

- شـ شنو!

حط ايده ؏ خصري وعصره..
- ما مرتاحلج لا انتِ ولا خواتج
وبس نلگه بنتنا اطلعن من هذا البيت برضاجن
احسن من الغصب لان ما أأمن ؏ بيبي وامي ورنيم
وياجن

- بس رنيم ويانه من ثمن سنوات شنو الفرق

مرر اصبعه ؏ خدي وگال برهاوه..
- الفرق هسه لگت اهلها وناسها وانتن راح ترجعن للشارع الاجيتن منه

كلمات مثل السچين اخترقت روحي وگلبي دموعي نزلت بقهر ، نظراته تغيرت بسرعة عقد حواجبه وابتعد وهو ينتر..

- مچذب بشي؟ ليش تبچين؟

- مووو احنه القررناااا نكوون بالشاارع يا حضرة الضابط بدال ما تكون ظهر وسند النا يا حامي الوطن جاي تطعن بينا وتسممنا بكلامك لو جان اختيار الاهل بيدنا ما جنت واكفة گدامك هاي الوگفه واسمع كلامك المسموم هذا

جنت احجي منفعله ومحروك گلبي واشر بيدي من خلصت ارجف رفعت عيني بعيونه الجانن حمر ما اعرف شوكت صارن هيج وقبل شوي طبيعيات حسيت بخذلان مو طبيعي وتأكدت وين ما نروح ما راح نرتاح بهاي الدنيا..

- ضنيناكم سنـد صرتلنا مثل المـوس البلبلعوم

صعدت بخطوات تعبانه العن الساعة العطشت بيها وقررت انزل اشرب ماي! بالواقع نزلت وشربت بـس شربت سَـم من الكلمات!!

لحظات وحسـيت بيدي نخلعت من السحب عطت وبنفس اللحظة سد حلگي خزرني ونتر..

- لا تگولين كلام اكبر من راسج بعد خوش!

- وخر عني

ضغط جسمه ؏ جسمي متت من الخجل وعيوني دمعت..

- كافي قسورة.

بلع ريك ونزل نظره ؏ شفايفي حسيت بالموت قريب مني وگلبي دگاته تفاقمت وراد يطلع من صدري جنت اتنفس سريع بحيث صدري يصعد وينزل بقوة وشالي واكع ؏ متوني وشعري مبين احوالي تبهذلت من نزل عيونه ؏ صدري الي يصعد وينزل..

- اعيط بس تسويلي شي!

ردت اخوفه بس هالشي ما زاده إلا اصرار ومن عرفته راح يتجرأ عطت بصوت نكتم بشفايفه الي حطهن ؏ شفايفي ريحته چانت مُقرفه سببتلي غثيان..

حسيت برخص مو طبيعي من دفعني ويه فتحت الباب يفرك بوجهة اباوع لـ سارة جانت نظرات الخوف واضحة بوجهة بسرعة ركضت ضمتني بحضنها وصاحت بدون ما تهتم..

سـارة- شسويتلهااااا؟

تقرب رافع ايده ونتر..
قسورة- صوووتج خالي مريض

سارة- شبيج مسرة شسوالج احجي لا تخافين

عين ؏ سارة وعين عليّ جان خازرني بتهديد واني هم خفت واستحيت احجي..

- شفت صرصر وقسورة كتله

برم شواربه وارتفع طرفهن بـ ابتسامة نصر..

قسورة- شفتي!! صرت الهيرو مالتها تالي الليل مو بلا ست مجرة؟

غمزلي بنهاية كلامه الي خله سارة عبارة عن كتلة غضب ما تعرف شلون ترده وخصوصًا احنه غريبات وگاعدات بنص بيتهم..

سارة- شُكرًا ما قصرت حضرة الهيرو

سحبتني وراها للغرفة وبس دخلنا شبعتني ضرب وهي تهمس بصوت ناصي علمود لا احد يسمع...

سارة- شطلعج بنص الليل هاا شطلعج ولج شسويلج هسه انيي اذا اموتج ما يبرد دمي

دموع- شكوو؟

كفختني مخنزرة..
سارة- المن نزلتي؟؟

- والله عطشت ماي ونزلت اشرب وشفته

خزرتني ما مصدكه واني ركضت للفراش وغطيت نفسي احس بس ابقى اكثر يمها احجيلها كلشي صار وتسوي مصيبة لو عرفت..

مررت ايدي ؏ شفايفي ونزلت دموعي النذل الحيوان شلون تجرء وباسني ما خاف الله بيه بنيه ملتجئه اله طالبة الحماية يسوي بيه هيج الله لا يوفقك ويأذيك بعزيز گلبك...

مسحت شفايفي بقوة لدرجة حَـسيت تشگگن من قوة المسح ، ما اعرف شلون نمت واني دموعي ؏ خدي..

فزيت ؏ صوت سارة تنتر مستعجلة..
سارة- گعدن كااافي فشلة من الناس نايمين للظهر

گعدت افرك بعيني بسرعة خزرتني واضح بعدها مزعوجه من تصرفي امس بالليل ، گمت اني ودموع غسلنا جان اكو حمام داخلي بالغرفة
طلعنا لبسنا شالاتنا عدا سـارة الي جانت سافرة بس ڪ احترام حاطته بشكل مهمل ؏ راسها..

رفعت راسي متعجبة بوجود هذا الكم الهائل من الناس وامس ماكو احد..

سارة- صباح الخير

رفع راسهم متفاجئين واحد من الولد نزل راسه ورد بصوت هامس بس قسورة جانت نظراته تخترقنا كلنا ويمه شاب ثاني ابتسم وگال..

- يا صباح الورد اي هذا الصباح الي يرد الروح

ما نشوف غير عمو كليم ضربه ؏ راسه بقوة..
كليم- تأدب لـيث ، صباح الخير بابا تعالن گعدن گومي ام قسورة جيبلهن ريوك خوية بلا زحمة عليج

گعدنا اني ودموع قريب منه وسـارة راحت تساعد ام قسورة بالمطبخ ، بس ليث ما نزل عينه وبس يوزع ابتسامات..

كليم- استغفرالله گوم بابا روح لجامعتك

ليث- اليوم اغيب خالي صدك جذب اروح بهيج وضع غير ما استحي اني

كليم- ايهم گوم وصل اخوك قبل لا اسوي جريمة هنا گووووم لككك

بس صاح بي طفر من مكانه والولد الثاني هم گام باس راس كليم وگال..

ايهم- اذا محتاجني ابقى خالي

كليم- لا حبيبي روح لشغلك من نحتاجك ندز عليك

اخذ اخو يسحب بي وهذاك عينا علينا بلگوة لزمت نفسي ما اضحك ودموع لازگه بيه خجلانه..

كليم- شلونكم بابا

- بخير عمو

هز راسه متنهد ، دخلت سارة وام قسورة گعدن كل هذا الوقت ما رفعت عيني وباوعتله اتجاهلته تمامًا قطعت سارة الصمت بسؤالها..

سارة- خوية اكو خبر عن رنيم تره يومي بدونها ما ينعد يوم جاي اكل روحي اكل متندمة عفتها واجيت

كليم- حاليًا لا بس بـ اقرب وقت ارجعها لبيتها وعد اخذي مني خاف انتِ صارلج يومين اني ثمن سنوات لا ليلي ليل ولا نهاري نهار وبعد ما وصلت لهذا القرب مستحيل تضيع من ايدي

سكتنا شوي وگال..
كليم- لازم ترحن وياي للمركز تنطن اقوالجن ولا تخافن ايهم راح يكون موجود وياجن ڪ محامي

سارة- اي شي ممكن يساعد برجوع رنيم بأقرب وقت ما راح نقصر بي

كليم- جيد

قسورة- اني اخذهن خالي واتصل ؏ ايهم لا ينشغل بالك

كليم- تحطهن بعيونك قسورة اذا صارلهن شي انتَ اول واحد احاسبه

قسورة- تدلل

ضجت وگلبت خلقتي من عرفت هو راح ياخذنا شگد اكرها وما اطيقة..

جان عمو كليم لابس زيه العسكري بسرعة شرب الچاي واخذ بيريته وسلاحه وطلع مستعجل مـا اعرف شنو سبب!!

گام قسورة وگال بأمر..
- اصعد ابدل انزل الگاچن كاملات

خزرته امه بس ما اهتم عافنا وصعد ، عود خاله وصى بينا!!
ضحكت امه بفشله بوجهنا وسارة گامت تستغفر من شافتنا گاعدات نترت..

- گومن بسرعة لبسن عبيچن

ما ناقشناها رحنا نركض فوك اني ودموع..

ㅤㅤㅤ
ㅤㅤㅤ
••••••••••••••••••••••••••••••

سـارة•

كلشي بكفه ورنيم وفراقها بكفه نمت اي بس ما نمت مرتاحة طول نومتي كوابيس مُرعبة وتفجع الگلب زات همي وتفكيري بيها
شلونها هسه؟ هم ضربها وأذاها؟ نوجعت صرخت بأسمي واني مو يمها..

فزيت من افكاري بصوته المُزعـــج..

قسورة- يلاا فضنها

خزرني من شاف شالي محطوط ؏ راسي بأهمال رفعتله حاجب خازرته ، ضحك تك خد وگال كلام مثل السَـم..

قسورة- بنات شوارع شترجى منچن!!

شهگت امه وصاحت بي..
نجلاء- ولككك الارعن تأدب لا اوصل كلامك هذا لخالك وهو يأدبك

دفعت مسرة ودموع بره وقبل لا اطلع خليت عيني بعينه وحجيت بثبات رغم روحي تحترك..

- لا تنسى عرضك هم جانت بالشوارع يا التعتقد نفسك رجال وانتَ تشمر بكلامك هذا ، وها فكر بيها شوي اني ما عندي اهل وربيت بالشارع حسب كلامك بس يا تُرى رنيم ليش ربت بالشارع بوجــــودك اسم الله

ما انتظرت رده ولا باوعت بوجه امه خلص احنه عايشين بين وحوش والي يدك الباب يسمع الجواب الضعف ماله مكان بهيج وضع..

صعدت وره يمهن وعناد بي لزمت الشال وذبيته ونثرت شعري وخلي شيسوي خلي يسوي الكلب..

دموع- ليش تأخرتي

- لزمته حده وخليته يعرف قيمته واجيت

مسرة- ونروح ويا؟!!

- غصبًا ما عليّ يوصلنا وهو الممنون واشوفه اذا فتح حلگه ويه وحدة بيجن اعرفه بنات الشارع شيسون

دقايق وطلع مثل البارود فتحت الباب وصعد بس صارت عينا بعيني عاط...

قسورة- حطييييي الغضببب ؏ راسججج

جاوبته برود..
- ما احطه

قسورة- حطيييي لا انزلجن وتحلمن اخذجننن

فتحت الباب وجاوبته بنفس البرود..
- عادي اخذ خواتي وأجر تكسي واروح هه بالنهاية بنت شارع هيج موضوع تافه بالنسبة الي

استمر خازرني واني اباوعله ببرود ما مهتمه عصبيته هاي ينگعها ويشرب مايها مو سارة الي تنهز بخزرة او صوت عالي..

قسورة- سدي الباب!

سديته بقوة مكتفة ايدي گدام صدري بأنتصار وهو حرك راسه هامس..

قسورة- سهلة سهلة

حرك السيارة وطلع بينا كل شوي مستغفر مطبق جُملة المؤمن الگوا** ولا يستقر ، فترة من الزمن ووصلنا وهو بنص الطريق هم اتصل ؏ اخو وبلغه يجي..

قسورة- لا اطلعن لحد ما يجي خالي

عافنا وراح والسيارة تموت من الحر حسيت نفسي راح اموع ، شوي وطلع كليم عفية رزانه وثگل ماكو شبه بينه وبين ابن اخته ابددد..

فتح الباب من جهتي منزل راسه ما يباوعلي وحجه..

كليم- بابا جماعتي جوه وكلها زلم مو لائق ادخلين هيج ياريت لو تحطين شالج ؏ راسج واكون ممنون

بسرعة سحبته ولفيته عدل ضامه شعري جوه الصايه لان حتى هو تقيد ما يباوعلي من يحجي ، اتذكر رنيم گالت كلش مُتدين بس ما جنت اصدك لان راسمتله غير صورة براسي..

رفع راسه وابتسم برضى..
كليم- يلا نزلن

نزلنا نتبع خطواته جان المكان يعج بالضباط كل شخص رتبته شكل ، وصوت رجلهم من يضربون تحيه للاكبر منهم يضرب بالراس فتح غرفة دخلنا بيها جان گاعد بيها نفس الشخص الي وصلنا لبيت كليم من تخربط..

گام وصاح..
هُمام- ابو ريم الورد

كليم- ابو الهَمم بشرني شنو الاخبار؟

- لحد الان ماكو جديد بس قربنا ان شاء الله

دار علينا وگال بـ ابتسامة مطمئنة..
كليم- اني عندي شغل ظروري اطلع لا تخافن انتن بأيادي امينة هُمام يصير خالها لرنيم مو غريب وهسه يوصل ايهم ومن تخلصن وناخذ المعلومات الي ممكن تفيدنا ايهم يرجعجن للبيت سالمات

هزيت راسي بدوخه ، رنيم ما ذكرت ابد عندها خال منين اجه هذا!!

رفعت راسي صافنه بكلامهم الي احتد..
كليم- هُمام شوفلك حل فدوة لعيناك اني مال التحق وبنتي بخطر لو اموت لو اعرف اخسر وظيفتي ما التحق فـ حاجي خلي يفك ياخه عني  وصلت حدها وياه

ربت ؏ كتفه وگال..
هُمام- حلها بسيط روح لشغلك وانتَ راسك بارد

كليم- متأكد

هُمام- واذا اگلك بالليل ارجعلك خبر اليقين

ضحك وحضنوا بعض..
كليم- ما تقصر ابو الهَمم يلا اني اتوكل في امان الله

بس طلع كليم رجع لمكانه وگال بجدية وما ؏ وجهة ابتسامة ولا كأنو قبل دقائق صوت ضحكه واصل لراس الشارع ، گال بهدوء وهو يأشر ؏ الكرويته الموجودة گدام مكتبة..

هُمام- گعدن عيني

شوي ودخل ايهم بيده جنطة متوسطة سوده هم سلم عليّ بحرارة وگعد قريب منا ، رفع راسه وسئل بجدية..

هُمام- منو اقرب وحدة بيكم الها؟

صفنت افكر بسؤاله! ما جانت وحدة اقرب للثانية بيناتنا بالعكس كلنا نفس الشي سرنا واحد وجعنا وفرحنا واحد..

سارة- ما بيناتنا هيج شي كلنا واحد ماكو شي اني اعرف عنها ودموع ومسرة ما يعرفون  وعكس الشي يمهم

هز راسه ودنگ ما اعرف شنو يدون بدفتر صغير..

ارهقنا بالاسئلة مر وقت طويل وهو كل شوي طارح سؤال مختلف مر وقت الظهر وهو مستمر يسئل ويسجل الاماكن الي نعرفها من سُعاد كم شخص شفنا ونعرف الهم علاقة بعذاب اوقات الخطف كلشي كلشي عرف وسجل يمه وايهم جان يحاول يساعدنا نتذكر من ننسى تفصيلة مُعينة
صح تعبنا بس جان كلشي يهون برجعة رنيم النا والباقي مو مهم...

هُمام- ايهم روح جيب لفات وعصير للبنات

ايهم- صار خالي

طلع ، وهذا الضابط گام طگطگ رقبته وتقرب يمنا بيده صور نثرهن گدامنا ؏ الميز وگال..

هُمام- تعرفونهم؟

حَـسيت نفسي گلبت روحي التاعت واني اشوف صور الي حاولوا يعتدون عليّ ميتين بطريقة بشعة رصاص تارس وجهم..

اباوعلهم واحس نفسي بس اني والصور بغرفة ظلمه وكلشي عشته وخلوني اعيشه بذاك اليوم بدأ يعيد نفسه مثل الشريط العطلان ويه كل ذكرى بشعة عشتها احس بسچين تنغرس بگلبي ، اگدر اتذكر لمساتهم البشعة ايديهم القذرة وهي تتمرر ؏ كامل جسمي واني لا حولة ولا قوة..

عشت اليوم بتفاصيله بظرف دقائق..

طفرت من مكاني وصرت اذب بسلة النفايات الموجودة بزاوية الغرفة واسمعه يگول..

هُمام- الله الله انطنها ماي

روحي راحت حسيت نفسي بدت تغيب عن الوعي احس برشات الماي ؏ وجهي واصوات ما واضحه بس كانت للحظات معدودة قبل لا يسحبني الظلام..

ㅤㅤㅤ
••••••••••••••••••••••••••••••
ㅤㅤㅤ

مسـرة•

رجف گلبي عليها من وگعت لا تحرك ايد ولا رجل هي هاي الي بقت ساندتنا اذا صارلها شي نضيع ، الضابـط من شاف الوضع تأزم تقرب وسحبها صار راسها ؏ ايده وشعرها نصه طالع ، ضرب ؏ خدها بخفه بعدين رفع راسه الي وهو يمد ايده..

هُمام- حطيلي ماي

صبيت بيده وهو غسللها بس هم ما گعدت زفر بغضب وسحب الشال يحاول يغطي شعرها عباله مُحجبه!!
مد ايده ؏ رقبتها فتح عيونه وگال بدهشه..

هُمام- نبضها ضعيف!!

دموع زاد بُكائها ما اعرف احتار بيها لو بسارة الي ما اعرف شنو السبب اللي وصلها لهاي الحالة وهي القوية الي ما شفتها بيوم نهزت حتى من ضربها عذاب وشوه وجهه ما انهارت بهذا الشكل!!

دخل ايهم وصاح مصدوم..
ايهم- هاااي شصاير هنااا

- عمو فدوة اختي شبيها!!

هُمام- اهدي بابا ، وانتتتَ لا تصفن روح شغل السيارة بسرعةةةة تحررك

شمر ايهم العلاليك من ايده وطلع يركض بسرعة لف الصاية عليها والشال وشالها ، گال..

هُمام- لحگني بسرعةة

طلعنا وراه نركض وهو الخطوة بعشرة ما شاء الله صارت كل الانظار علينا واغلبهم يصحون وراه..

- خيرك ابو الهَمم خو ما صاير شي

ويجاوبهم بأختصار..
- ماكو شي

صعدت اني ودموع وحطها بحضنه وهو ساق وبصفه ايهم المصدوم ما يعرف شنو صاير ، ما تحمل اخر شي وگال..

ايهم- خالي فهمني!!

هُمام- بعدين بعدين مو هسه

اباوعله بالمرايه مخنزر ودمارات گصته ناطه مبين معصب كلش لان حتى جوابه لـ ايهم بنتر بحيث الثاني بعد ما سأل شي ، رفع راسه للمرايه بسرعة نزلت عيني خجلانه من تركيزي المُفرط بي!!

هُمام- شوفي تنفسها بابا

حطيت ايدي الترجف گدام انفها جانت تتنفس بس مو بطريقة صحيحة رفعت راسي دموعي تنزل..
- ضعيف كُلللش ضعيف عمو

هُمام- اهدي بنيتي انهيار عصبي هذا هسه ناخذها للمستشفى وكلشي ما بيها لا تخافين خطية اختج يمج تخوفينها

غمزلي بنهاية كلامه يقصد دموع الي بس دموعها تنزل مالها صوت
رفعت ايدي ومسحت دموعها غصبت ابتسامة ؏ شفايفي وگلتلها حجي جنت اني محتاجة اسمعه من احد...

- لا تبجين هسه تگعد سارة ما بيها شي

دموع- خسرنه رنيم وهسه سارة

- اشش لا تگولين هيج رنيم ترجع متأكدة وسارة ما بيها شي شوي تعبت وهسه تصير زينه

هزت راسها بقبول وسندت راسها ؏ كتفي ، شوي ووصلنا ونفس الحالة نزل لفاها زين بالصاية والشال يلا شالها
جان بزيه العسكري بحيث من شافوا كلها ركضت تساعده وبسرعة دخلوا اختي للغرفة گعدنا بره بخوف وقلق..

گعد گدامنا ايهم وابتسم بلطف مد بطل ماي لـ دموع وگال..
ايهم- لا تفكرين بشي راح تصير زينه ورنيم قريبًا راح ترجع كافي مو زين البچي

هزت راسها بخجل وهي تمسح دموعها بطرف كم عبايتها وبأيدها الثانيه اخذت الماي من ايده ، مدلي بطل ثاني وگال..

ايهم- يلا كافي بچي هسه تصير زينه وادخلن تطمنن عليها

حاولت اهدي نفسي واصير قوية لان دموع شگد ما احنه نضعف ونتعب هي هشه كلش ممكن موقف ينهيها واخاف يصير بيها شي اكيد سارة تموتني لان هملتها..

رفعت راسي لنهاية الممر ؏ اثر وقع اقدام بسطالهم القوي وهو يضرب ارضية المكان بثقة ، بس وصل يم الضابط هُمام نتر..

كليم- گتلك بهداي وياهن لا تضغط عليهن هاي وصيتي هُمااام

هُمام- لاا تليص بالكلام وافهم السالفة بالاول

كليم- شصاير؟!

مسح وجهة باوعلنا لجزء من الثانية واشر لعمو كليم يمشي وياه ، وحتى اللئيم قسورة اتبعهم هو واخو ايهم لنهاية الممر واشوفه فترة واشتد الحديث بينهم چانوا اعصاب لدرجة من رجعوا قريب علينا واگفين يصفنون وملامحهم ما تتفسر..

بعد نصف ساعة تقريبًا من الانتظار طلعت الدكتورة وطمنتنا عليها واخر شي گال مبتسمه تباوعلنا..

الدكتورة- المريضة تريد البنوتات الحلوات

بسرعة طفرنا اني ودموع بس وگفنا عمو كليم من گال يبتسم بهدوء..

كليم- اعرف قلقانات عليها وتردن تطمنن وحقجن بس اول ندخل احنه نحجي وياها ؏ انفراد وبعدين تروحن يمها ها بابا!!

- تمام عمو

كليم- بارك الله بيجن بابا ، ايهم ابقى يمهن!

ايهم- صار خالي

دخلوا عمو كليم وهُمام وقسورة وايهم بقا يمنا شوي واجاه اتصال وعافنا وراح يحجي بعيد ، شدني الفضول اعرف شنو صاير درت ؏ دموع..

- ابقي گاعده هنا بس اسمع واجي

دموع- عيبب مسرة بطلي هاي عادتج

خزرتها وگمت ما مهتمه قربت راسي من الباب يلا شوي وضحلي الصوت ، جان صوت سارة وهي تبچي واضح گطع گلبي تگطع..

هُمام- اذا ما تحجين ما راح نگدر نساعد رنيم

سارة- هذاااا شييي خااص بيييه من تعرفههه ما راح يقدمم ولايأخر شيي

كليم- اهدي بنتي ، بس جاوبينا تعرفينهم انتِ مو؟

سارة- اييي اييي

جانت تحجي بجزع روحها تفرفح للحظة ردت ادخل واطردهم خلي يعوفونها بحالة ، بعمري ما شفت سارة بهذا الضعف!!

هُمام- اني شاك بشغلة عيني انتِ بس..

سكت شوي وفززني من گال بتردد..
- اكو اعتداء مو؟

بعد هاي الجملة انهارت سارة تصرخ وتبچي جان كلامها جرح انفتح بنص گلبي..

سارة- ساااومني برنييم گالي لو تقنعينها تتزوجني لو اخلي زلمي يعتدون عليججج رفضتت رفضتت لان رنيم اذا تزوجته راااااح تنتهي حياتهاااا للابد جنتتت احااارب طول عمري علمودهننن علمود ما تنمس شعررره من راسهننن سوووا بيه هيججج لان ما خضعتتت اله ولطلباته مااا انطيتته رنيممم لان يعرف اي شي اگوله رنيمم تنفذه بدون ما تسألل عننن السببب

كليم- صيحح الدكتورة رجعت تعرضت لانهيار عصبيي

انفتح الباب وتجمد قسورة بمكانه من شافني واگفه ودموعي تصب اباوعله عيونه حُمررر ، حسيت خدر صار برجلي واخر شي اتذكره هو صرخته بأسمي وبعدها رحت بغير عالم..

..

وتستمر الحكاية.. 🚬♣

قناة التلي zainab_salah0