رواية دروب الإِندِثـار الفصل الخامس عشر 15 - بقلم زينب صـلـاح 🤎

بقلمي : زينب صلـاح 🧡

لـ روايـة ﴿ دروب الإندِثار ﴾

في الـ part 12 ♡♡

لا تنسون التصويت + متابعة للحساب + التعليق بين الفقرات ☘️

‏✨ گَلبّچ آلطَف مْن وٌرَدهُمَ يّآ وُرَدِتِيّ ✨

•••••••••••••••••••••••••••♕•

سـارة•

جسمي يرجف احس طاقتي كُلها استهلكت ، الصوت الي جان بالغرفة فقط بچيي وصوت استغفار كليم ما جنت اتجرء ارفع عيني واباوعلهم من الخجل ، صــح اني ما مسوية شي خطأ وكل الي صار اجبار وخارج عن أرادتي وطاقتي ما تكفي تمنعه بس جان وضع مُخجل ما گدرت اتقبل معرفته بي..

جان الغضب واضح بصوته وهو يگول..
كليم- صيحح الدكتورة رجعت تعرضت لانهيار عصبيي

بس بعد هذا الكلام صارت صمت رهيب وركضهم لبره خلاني ارفع راسي ، انتفض گلبي من اجاني صوت قسورة وهو يگول..

قسورة- سمعت كلشييي ايهههم ويننن؟

انتفضت بقلق شمرت الغطه وگمت نسيت تعبي ما اعرف القوة منين اجتني وركضت كلشي إلا خواتي قابله بكلشي إلا أذيتهم ، جانت مسرة واكعه وقسورة يحاول يگعدها ركضت احاول اوصللها بس هذا الضابط وگف بوجهي وصاح..

هُمام- غضببب الله ؏ راسججج شعرج طاللع

دفعته ما مهتمه وسمعته يستغفر
سحبت مسرة لصدري..
- مسرة امي وابوي انتِ فكي عيونج فدوة اروحلج كلشي تحملت علمودجن ما عندي طاقة اخسرجن

حسيت بشي صار ؏ راسي بس ما اهتميت وما رفعت راسي اشوف منو ، تقرب كليم وغسل وجهه وضرب خفيف ؏ خدودها يلا بدت تصحى شهگت بروح مفرفحه احضنها لگلبي..

ثواني وحسيتها تبچي وتشد ؏ صايتي بقوة رفعت راسي لدموع الي جانت متجمدة بمكانها وبس فاتحه عيونها بدون ردة فعل ، گلبي نعصر عليها اباوع للناس صافنه علينا..

كليم- خلي ندخل جوه بابا مو خوش گعده هاي

جنت اني احتاج احد يسندني ورغم ضعفي هذا حولت اگوم واسند مسرة الي ما جانت تقبل تبعد راسها من صدري وبس تشهك ، فتحت ايدي بقلة حيلة لـ دموع الي اجت بهدوء مُريب دخلت جوه كتفي..

دخلنا گعدنا ؏ الكرويته حاضنتهن لصدري تعب الدنيا كله فوك راسي..

كليم- ايهم وين؟

قسورة- ما اعرف خالي

كليم- بسيطة حسابي وياه بعدين

تقدم گعد گدامنه وگال..
كليم- بابا مسرة شو عاينيلي

هزت راسها ما تقبل وشددت ايدها ؏ صايتي تحسر وگال..

كليم- كافي بچي عيونجن راحت وما يهونلي والله قسم برب العزة وما انعد من الزلم اذا ما عوضتجن عن كل وجع وأذيه مريتن بيها لا عبالج اني من الگه رنيم خلص ينتهي كلشي!!

ضحك وگال..
كليم- جنت ادور ؏ بنت وحدة وربي دزلي تلاثه غيرها كلجن احطجن بعيوني واسدها عليجن بعد ما اريد اشوف دموع وحدة بيجن خلص ورنيم وعد مني فترة وتكون بيناتنا

رفعت راسها تشهك جان وجهه احمر وعيونها منفوخات وحُمر!! حسيت شي بداخلي برد شعور اكو رجال بحياتنا يسندنا ويخاف علينا رغم غريبات وما صارله يعرفنا غير يومين شعور كُلللش غريب!!

حسيت ولاول مرة بحياتي انُ اگدر اترك القيادة اله وارتاح من التفكير وانُ اني الكبيرة الي تتحمل كُلشي في سبيل خواتها..

جان وجوده عظيم والايام كفيلة تثبتلنا هذا الشي!!

تنهد وگال..
كليم- يلا علمود تاكلن تعبتن اليوم وهُمام اذا عنده سؤال اخلي يجي للبيت بعد ماكو روحه للمركز

هُمام- اي مو اني حايط نصيص

كليم- غصبًا ما عليك يلا نگلعوا خلصوا شغلكم

هُمام- نعم الله عليك

قسورة- حتى اني خالي

كليم- انتَ بالذات واتصل ؏ اخوك بلغه عندي وياه حساب طويل اريد اشوفكم قبلي بالبيت

طلعوا هُمام وقسورة وهو وگف عدل قميصه وگال..
كليم- يلا بابا رتبن نفسجن خلي نرجع للبيت

بس طلع درت ؏ دموع حاوطت خدودها..
- بيج شي؟

دموع- لا

- دموع لا تسوين بيه هيج والله مو حمل اتحمل تعب اكثر من هيج حسن بيه شوي

دموع- ما بيه شي

- اني موجودة دائمًا حتى احميجن لا تفكرين بيوم تكتمين بداخلج علمود راحتي لان بوقتها راح ازعل عليج

هزت راسها بدون ما تجاوبني ، تنهدت وگمت لفيت الشال عدل وطلعنا جان گاعد ؏ الكرسي مقابيل الباب بس شافنا گام ومشه ، صرنا نتبع خطواته لحد ما وصلنا للسيارة بس ركبنا انطلق بينا للبيت..

ㅤㅤㅤ

••••••••••••••••••••••••••••••
ㅤㅤㅤ
ㅤㅤㅤ

مسـرة•

الي سمعته جان ثگيل حيل بحيث حسيت روحي تتخبط بجسمي تريد تطلع ، چان سؤال واحد يتراود بعقلي شلون تحملت سارة وبقت هيج قوية؟

بس صف السيارة عمو كليم نزلنا
فتح الباب بالمفتاح ودخل
بسرعة طلعت اخته عمة نجلاء بس بوجهه خوف!!

هو بسرعة باوع للاحذيه ما عرفت شنو القصد لحد ما گالت..

نجلاء- خويه ؏ كيفك ويه ايهم

كليم- اشش لا تدخلين ام قسورة الي ما يتحمل المسؤولية من هسه عُمره ما راح يصير رجال وايهم مو طفل رجال محامي وواعي غفلته عن هيج شي بالنسبة الي خطأ كبير بعد كم يوم من اطلع من البيت ما أمن عليكم بوجودة لان بكل بساطة مو گد المسؤولية

عافها ودخل خطية اجت بوستنا
وتحمدتلنا السلامة
دخلنا جوه ، جانوا ولدها تلاثتهم موجودين بس عمو كليم ماكو تعجبت وين راح؟

طلع من الغرفة الجوه شايل طفلة يجي عُمرها تقريبًا تلث او اربع سنوات هيج  سانده راسها ؏ كتفه وعيونها تباوع ببراءة النا ما شاء الله جانت جميييلة بشكل ما ينوصف..

گعد ؏ الكرويته بوس خدودها وهي هادئة تبتسمله بهدوء وتغطي وجهه خجلانه..

كليم- هههه الملعونه تعرف تاخذ گليبي بسوالفها

نجلاء- ليش گعدتها خويه توني نومتها

كليم- مشتاقلها ام قسورة من امس ما شايفها طگ گليبي عليها

صار صمت غريب
قطعه ايهم من گال..

ايهم- خالي اعذرني والله غفلة صار الموضوع اجاني اتصال مهم وا..

كليم- اششش صوتك ما اريد اسمعه

ايهم- خالي بس اسمعني والله..

كليم- ما عندي كلام ويه واحد عديم مسؤولية مثلك

گام شايل بنته..
كليم- راح اصعدها يمي ، ام قسورة ديري بالج ؏ الحجية تره نايمه ما گدرت اسلم عليها

نجلاء- بعيوني

كليم- البنات امانة يمج لا ينقص عليهن شي ولا اريد شي يزعلهن تعامليهن حالهن حال ريم لا تصيرين مثل بعض الناس

كتمت ضحكتي بالگوة من بالاخير بسمر ايهم الي وجهه انطعن بقهر شوي ويبجي الواضح حيل يحبون خالهم ويحترمونه..

گلت واني صافنه بوجه بنته..
- تشبه رنيم

صار هدوء اباوعلهم صافنين عليّ رفعت راسي اله جانت عيونه مدمعه و؏ وجهه ابتسامة حزينة..

- اول يوم اجيت بي للملجأ من باعني بابا الهم جانت اول صديقة اتعرف عليها اتذكر حيل تشبه بنتك بس رنيم تگدر تميزها من عيونها

مد ايده بجيبه وطلع محفظته فتحها وسحب صورة منها ومدها الي ، اخذتها مبتسمه وخواتي تقربن يشوفن جان عمرها بالصورة تقريبًا اربع سنوات هيج كلش صغيرة..

كليم- هنا تشبها اكثر

- صح حيللللل

كليم- هههه عندي بعد صور الها من افرغ انزلهن تشوفنهن

هزيت راسي ورجعتله الصورة اخذها وسوه گدام الكل حركة موتتني قهر وفاجئتني انُ الكل متقبل الامر وكأنوا هذا المشهد هواي متكرر گدامهم
رفع صورتها وباسها وبنته من شافته سوه هيج بعفوية سحبتها وهم باستها ضحك وضمها لصدره بقوة وصعد فوك..

نجلاء- حبيبات گومن سبحن وارتاحن جبتلجن ملابس بس كون تطلع ؏ قياسجن

سارة- ليش تعبتي نفسج عمة

نجلاء- فدوة للحنينة لا يمه تعبچن راحه گومن بين ما اصبلجن شي تاكلنه

تونا ردنا نگوم وصدح صوت تلفون ايهم بس جاوب تغيرت ملامح وجهة بقلق..

ايهم- جاي جاي

گام وطلع ورقه من جيبه حطها بيد امه..
ايهم- وصليها لخالي يمه لا تنسين بس يقراها راح يفهمني

توه يريد يطلع وسحبه قسورة بقوة من كتفه..
قسورة- ويننن مولييي؟

ايهم- شغللل شبيكك عوفني

قسورة- ايهم ما مرتاحلك شمسوي؟

تنهد ونتر ايده خزره وجاوب بصوت يرجف..
ايهم- لازم اطلع عندي شغل مهم مو ما ردتوا تعرفون شنو السبب الي خلاني اطلع من المستشفى خلص بعد لحد يسأل

قسورة- شو رجلك ؏ راسك وتحجيلي لا تخليني اتخذ وياك غير اجراء

ايهم- كافي قسور اريد اروح من ارجع احجيلك

قسورة- انتظرك دير بالك ؏ نفسك

هز راسه وطلع يركض باوع  لأيد امه قسورة..
قسورة- انطيني اشوف

اخذ الورقة من ايده وبنفس الوقت نزل عمو كليم جان لابس تراك وشعره مبلل..

كليم- شكو؟

قسورة- ايهم عافلك هاي الورقة وطلع عنده شغل

اخذ الورقة بمجرد فتحها جانت لحظة بس لحظة وحدة واختل توازنه لو ما قسورة يلزمه جان واكع فتح عيونه ؏ وسعهن..

قسورة- خاليي

كليم- اخووووك وين؟

قسورة- ما اعرف گال عنده شغلل

كليم- امشيي امشيي بسرعة

طلعوا وعمة نجلاء وراهم تركض دموعها تصب جان الموقف مرعب لان ما نعرف شنو المكتوب بالورقة بس هبطت عمو ترجمة انُ المكتوب خطير وحياة ايهم بخطر..

نجلاء- خوية بس طمني ابني شبي شنو هاي الورقة

باس راسها وگال مستعجل..
- لا تبچين واني اخوج ابنج راجعلج بس لا تعطلينه وديري بالج ؏ البنات والحجية بين ما نرجع وها خاف اوديلج واحد ياخذ بدلتي واغراضي دزيهن

عافونا وطلعوا يركضون واحنه كلشي ما فاهنين عمة نجلاء رغم تبچي وتشهك گامت قفلت البيبان كلهن الداخلي والخارجي ، گعدت مهدود حيلها راسها رفعته بتعب النا وگالت..

نجلاء- روحن ارتاحن امي وياريت تاخذن ريم يمجن لان خاف تگعد وتخاف لان وحدها

سارة- روحن اني راح ابقة هنا

نجلاء- انتِ بالذات لازم ترحين ترتاحين مو جنتي بالمستشفى!!

سارة- كلشي ما بيه والرب يلا مسرة اخذي ريم وروحن ارتاحن

هزيت راسي ولزمت دموع من ايدها وصعدنا..
- رايحه اجيب ريم واجي

هزت راسها وراحت للغرفة بقيت صافنة بالغرف! ياهو منهم غرفة عمو كليم؟ نفخت بضوجة واتجهت ؏ اقرب بابا فتحته اباوع جان بيها سريرين وصور ايهم واخو ليث..

سديتها واتجهت للثانية كفختني ريحته ، كشولت وجهي مشمئزة منه من اخر مرة باسني بيها ، دخلت خطوة جوه جانت غرفة نوم بُنية مال عرسان وفوك سريره صورته..

عضيت شفتي كاتمه ضحكتي بالصورة طالع جنه عصفور مهلس اعتقد صورة تخرجه لان بعده صغير ويا دوب عنده شوارب بس نفس خباثته مخنزر ومعبس ما اعرف ؏ شنو گبر..

نزلت الشال ؏ اكتافي ومشيت اباوع للكُتب دائمًا جان عندي شغف للروايات والقصص واحب اسمعهن واعيش قصتي الخاصة
هم يجي يوم ويصير عندي امير خاص بيه يحبني بشكل ما ينوصف ويخاف عليّ من الهوى الي يلامس خصلاتي؟ يحميني من الدنيا ووحوشها!!!

عضيت شفتي واتسللت دمعة من عيني ، همست والغصة بلعومي تجرح بي..
- البنت الي نبذوها اهلها معقولة يحبها غريب وهل يا تُرى بنت الشارع تصنع بيتها بيوم؟

ضحت بقهر ودرت اباوع الصورته وكلماته ما تروح من بالي ابد ما جاي اگدر انساها!

ما مرتاحلج لا انتِ ولا خواتج ، وانتن راح ترجعن للشارع الاجيتن منه ، بنات شوارع شترجى منچن

سحبت الشال وشمرته ؏ السرير بضوجه ورحت استكشف الغرفة بفضول اعرف الشي الجاي اسوي غلط بس اني فضولية شسوي!!

صرت افتح خانات الكنتور وفاتحه حلگي مرتب غراضه اكثر من حياتي عزاا شنو من رجال! اكيد امه مستحيل يكون هو مرتب هيج قليل الادب هذا..

فزيت ؏ طگطگه بره بسرعة طلعت اركض واشوف دموع تباوع بخوف..

دموع- وين صرتي!! خفت!

- جاي ادور ؏ غرفة عمو كليم رجعي جايتج

بسرعة سديت الغرفة وفتحت الي بصفها جانت غرفة هادئه وحلوة ريحة البخور تفوح منها تقريبًا نفَــس مُديل غرفة قسورة الشيطان ، شفتها نايمة مثل الملاك بوسط السرير وداير ما دايرها مخاديد خاف توكع..

جانت اكو زاوية بالغرفة بيها لعاباتها وغراضها..

رحت شلتها ؏ كيفي بس فزت باوعتلي صفنت بوجهي لحظات حتى خفت تنرعب مني لان ما تعرفني هواي! بس حركتها دغدغت گلبي من حطت راسها ؏ كتفي ورجعت نامت..

بست خدها واخذتها وطلعت ، ابتسمت دموع من شافتها حطيتها بنصنا وغطينا بنوم عميق بدون حتى ما ناكل شي!

بعد فترة ما اعرف شگد فتحت عيوني مزعوجه من لمسات ؏ وجهي ، فزيت من شفتها مبرطمه وتحرك وجهي..

- شبيج حبيبتي؟

اشرت ؏ الباب وگالت بهمس ضعيف..
ريم- بابــا

افتريت ادور ؏ شالي ماكو!! سحبت شال دموع لبسته وشلتها بوست خدودها..

- لا تبچيني يا رَوحي حـا اخذج لبابا

طلعت بيها ووگفت من شفته گاعد ؏ الكرويته ويدخن بس شافنا طفر وتقربلنا
اخذها من ايدي وشمها بقوة وهي حضنتهمن رقبته وسكنت..

كليم- خو ما عذبتج بابا؟

- لا عمو مثل النسمه والله

ابتسم وهز راسه بقبول ، سألته بفضول!
- عمو ايهم زين؟

باوعلي وگال..
كليم- الحمد لله جوه نزلي يم اختج اذا تردين لا تتقيدين

- ورنيم؟

ذب حسرة وسد عيونه بقوة..
كليم- اجيبها لا تخافين

اطمئنيت شوي من جوابه نزلت جوه من دخل هو لغرفته جانت وجوهم طبيعية بسرعة گعدت يم سارة منزله راسي لحد ما گال ليث..

ليث- شسمج انتِ؟

باوعت لـسارة ردت اجاوبه بس سبقني الغثيث من گال بنبرة سُخرية..

قسورة- اسمها مجرة هه

خزرته ونترت بدون وعي..
- اسمي مسرة

ليث- وين الفرق نفس الشي؟

- تره اسمي حلو ليش تتنمرون عليّ

ليث- لك لك باع الكياته العببب خاليي

قسورة- نچب لا تروح زايد

ضحك ورجع يسأل..
ليث- شگد عمرج؟

- 15

ليث- بعدج صغيرة ، وذيج اختج؟

- دموع؟ عمرها 14

صفن وابتسم بسرعة كفخه ايهم وگال..
ايهم- اصعد ادرس وعوف لبنيه بحالها شنو مدخلها تحقيق

غمزله وگال..
ليث- لبنيه لو اخت لبنيه؟

ما فهمت بس ايهم صاح بي وركض وراه..
ايهم- لاه يا ساقط

صعدوا شويه واختفى صوتهم ، رفعت نظري ورجفت من شفته صافن بوجهي ومقلص عيونه وهو يدخن الشيطان عبالك عرف داخله لغرفته ..

شاورتني سـارة..
سارة- روحي للمطبخ هسه اجيج

نزلت عيني ورحت للمطبخ سمعت صوتها تحجي ويه عمة نجلاء شوي واجت لزمتني من كتفي بقوة مخنزره ونترت..

سارة- اكسر راسج مسرة والله ، قسورة بالذَات تبتعدين عنه

- ما متقربتله اصلًا

سارة- حذرتج وبعد انتِ بكيفج

غيرت الموضوع..
- شنو صار ؏ ايهم؟

سارة- حسب ما فهمت واصله تهديد وحارگين مكتبة خطية

- يااا خطية الله يعوضه

بديت اساعدها لان صاير الليل واحنه ما ندري وخطية سارة ابد ما ارتاحت ، حطت العشه وهمست..

سارة- صيحي دموع ولا تتأخرين!

خزرتني بتحذير هزيت راسي وطلعت اصعد ؏ كيف لان البيت صار هدوء اكيد ينامون من وقت لان الكل دخلوا لغرفهم وبعد محد طلع ، حتى عمة نجلاء راحت يم امها!!

صار عندي فضول اشوف امه لعمو كليم
رنيم هواي حجت بيها سابقًا وجانت تحبها رغم مرة من المرات حسب ما اتذكر مأذيتها..

رفعت عيني الي صارت بعيونه
جان واكف بـ باب غرفته يدخن وساند جسمه ؏ اطار الباب ، بس شافني ابتسم بتلاعب!

سرعت حركتي وردت ادخل للغرفة بس هو صار اسرع مني بسرعة حاوط خصري من وره وبيده الثانية سد حلگي ، صرت ارفس بحضنه اريده يعوفني..

دخل لغرفته وسد الباب دفعني ؏ الحايط وهو بعده مكمم حلگي..

قسورة- داخل غرفتي الحلو!

بعدت ايده ونترت..
- عوفنيي عادد شتريد؟!

نزل عيونه لشفايفي رجفت من تذكرت جرئته ويايه قبل يوم همست بضعف وما گدرت اسيطر ؏ دموعي..

- اعتبرني اختك تقبل احد يسوي بيها هيج؟!

شهگت..
- بداعت امك اعتقني

رفع ايده ومسح دموعي بهدوء ، نظراته ما گدرت افسرهن وهنَّ يتجولن ؏ كامل وجهي..

قسورة- اشش لا تبچين ما أأذيج

- اريد اطلع!

ابتعد سحب شالي من سريره فتحت عيوني متذكرة كمية غبائي! شلون انسى هنا وانطي فرصة مثل هاي واخلي يعاملني هيج؟

لفه ؏ كف ايده وتقربلي لزم فكي بقوة..
قسورة- رجليج اكسرهن اذا دخلتي لهاي الغرفة بعد خوش؟

- قحط هي غرفة ويلا ما ادخل بعد انطيني شالي خلي اولي

قسورة- ولي عزيزتي بس هذا الشال يبقى عندي

- لا بلا انطيني شالييي

- اعصابك حبيبي لا يطگلك عرك ، يلا طلعي

صفنت بوجهة مثل الثوله من گال (حبيبي) ضحك بخفه
لزمني من ايدي ودفعني بره وسد الباب احتاريت شنو اسوي واطلع الحرگه الي بگلبي تفلت ؏ الباب بصوت ما احس غير فتحه منطط عيوني وزمخ..

قسورة- لااا يا زماله

عفته وطگيتها ركضه للغرفة دخلت وطبگت الباب بقوة بحيث دموع كمزت كمزه إلا تخرب ضحك نسيت سالفتي وتمددت يمها خربانه من الضحك..

دموع- شكو شكو؟!!

- ههههه عزااا شلون گمزتي

هزت ايدها ما قابله..
- گومي نزلي للمطبخ خلي ناكل سارة تنتظر

دموع- انطيني شالي

- اخذي من الجديدات الي جابتهن عمة نجلاء لان شالي ناسيه وين حاطته

عفتها ونزلت لگيت سارة سانده راسها ؏ ميز الطعام وصافنه بس شافتني خزرتني..

سارة- هاي كُله تگعدين دموع؟

- هاا اي شبيج غير ما تقبل تگعد

سكتت بس ما مقتنعة شوي ونزلت دموع وگعدنا اكلنا ورجعنا نمنا بحضن سارة كُل وحدة من جهة صح ما غفينا اني ودموع بس نصفن وكُل وحدة تفكر بشي..

ㅤㅤㅤ
ㅤㅤㅤ
••••••••••••••••••••••••••••••
ㅤㅤㅤ

ســارة•

مضت الايام والاسابيع وصارت اشهر تمشي بطئ اذا اگول عاملونا مثل بناتهم اكون مقصرة! بالاخص كليم كأنو يشوفنا رنيم ما قصر بحقنا بشي ابد وامه انسانه طيبة ما تگدر تطلع من غرفتها إلا ما ندر علمود شوي يغيرولها جو يگعدونها بالحديقة ويرجعون يدخلونها لان مريضه وتعبانه!!

حتى قسورة شگد جان فض وحقير اسلوبه صار طبيعي ويانه ، ايهم وليث هذول نسمة البيت وضحكته..

بينما جانت عمة نجلاء رفيقة وام واخت النا بهذا البيت ما حسستنا احنه غريبات ابد وكلش نحبها ونحترمها ، بس لاحظت بنت كليم ابد ما تحجي إلا ما ندر عكس اي طفل بعمرها يكون حرك ووكح هي هادئه وما تحجي!!

بس جان اكو نقص بكل ضحكه تنرسم بوجهنا جان اكو نقص كبير بعدم وجود رنيم بيناتنا
وجان واضح وضوح الشمس خصوصًا ؏ كليم الرجال حتى شربة الماي من يشربها يتحسر وما يكملها يگوم..

اجه رمضان وجان شهر خير بس جان شهر حزن علينا لان بكل لحظة كليم يگول..

كليم- جوعانه عطشانه هسه بنيتي ، سوده بوجه عمج يا كل بناته!!

قبل العيد بكم يوم جانت ايام رمضان الاخيرة وكلنا متجمعين بالصالة
حتى امه جان گاعد بصفها محاوط كتفها وبحضنه بنته..

باس ايد امه..
كليم- شلون تحسين نفسج حجيه؟

ام كليم- نحمده ونشكره

هز راسه ورفع عينه ؏ الولد..
كليم- اول يوم العيد خو ما عندكم شي محتاجكم!

قسورة- عند عيناك خالي

ايهم- بالخدمة حبيبي

ابتسم وباوع ؏ ليث الي جان بعالم ثاني هو ودموع مگعدها يمه ويلعبون بالايباد حيه ودرج ، هز راسه وگال..

كليم- دكتور وهالله هالله وگاعد يلعب ويه الطفلة حيه ودرج شتحجي وياه هذا

جاوب وهو عينه بالايباد..
ليث- احيانًا لازم نرجع صغار يابـه ، واساسًا ما يحتاج اگلك اني موجود وتأمر تعرفني من ايدك هاي لأيدك هاي

كليم- ابني انتَ لا تكبر خليك صغير

رفع راسه وضحك ، اكتشفت من خلال المده الي بقيتها هنا ليث يعتبر كليم مثل ابو وحتى مرات ما اعرف يفلتها او يتقصد يگله (ابويه ، يابه) وكليم يستقبله برحابة صدر
يخاف عليهم من الهوى الطاير وهُما يفدونه بروحهم علاقتهم ببعض تجنن..

كليم- ام قسورة اخذي قياسات البنات وجيبيلهن لبسه للعيد باجر

- ما يحتاج ابو ريم الموجود كافي بعدين نشتري ؏ شنو احنه باقين هنا ما راح نطلع

كليم- اني کلت تجيبلجن يعني تجيب خوش بابا؟

هزيت راسي ما احب اخذ وانطي استحي منه لان فارض احترامه ؏ الكُل ، رجعت گالت عمة نجلاء ..

نجلاء- خوية ليش ما اخذهن وياي

كليم- لااا صارلهن شي ما تشوفين الوضع؟ باجر ياخذج قسورة

قسورة- والشغل خالي؟

كليم- اني ادبرها الك فد ساعة ساعتين كمل وارجع

قسورة- صار

وهيج مشت الايام وصدك راحت ام قسورة وجابت لبستين لكل وحدة منه وشنو تحتاج اي بنية رغم احنه ما نطلب بس هُنا ما مقصرين..

خلال هاي الفترة جانت تصرفات كليم وقسورة غريبة دائمًا محتاطين ومتوترين ما جنه نعرف السـبب وره هذا الشي وهُما هواي كتومين ؏ اي شي يخص شغلهم..
ㅤㅤㅤ
ㅤㅤㅤ
••••••••••••••••••••••••••••••

رنيــم•

يوم العيد !!
اليوم الي كل الناس تبدي بي صفحة جديد وتتسامح وتعيد بفرح اني جان هذا اليوم بالنسبة الي مُرعب بسبب عذاب الي شمر قُنبلته قبل فترة وسببلي اضطراب من الافكار الي اداهم عقلي بكل ليلة احط راسي بيها ؏ لمخده..

رفعت راسي مزعوجه من دخوله بدون ما يطرق الباب وبيده اكياس ، طلع منهن فستان ابيض ساده تفصيله يجنن
فرشه ؏ السرير بحماس وطلع كعب ابيض شفاف حطه ؏ الارض وشال لونه بيج ؏ كريمي هيج شي..

دار عليّ وگال..
عذاب- هذا ذوق تالا يلا حبيبي گومي گدريهن!

- انتَ من كُل عقلك؟

عذاب- اي اميرتي مو گتلج عندي مُفاجأة الج!!

- و؏ شنو اكشخ وابدل احجي الي تريده واطلع

تغيرت نظراته فرك راسه بقوة ، عيونه حُمر رفع اصبعه السبابه وگال بنتر وتهديد..

عذاب- نص ساعة اذا ما تگومين تتجهزين صدگين بيته العمج كليم افجره بالي بي وتعرفين ما عندي لحيه مسرحه

طلع وطبك الباب بقوة جفلتني ، نزلت دموعي بقلة حيلة گمت غصب عني بدلت
تعجبت يعرف قياسي!! وگفت گدام لمرايه كارهه نفسي ولبنيه الي صعدها الي ترتب وجهي..

نترت..
- لا تكثرين

- حاضر مدام

صدك حطت شي بسيط ونزلت بس شافني ضحك بصوت عبالك واحد مخبل ، راد يلزم ايدي بسرعـة حطيتها وره ظهري..

- شدتسوي؟

- اي اي اميرتي جمالج نساني

خزرته غلس وگال..
عذاب- يلا امشي

اتبعت خطواته بـ اكراه جنت بالگوة امشي بالكعب ما متعودة عليّ ، اباوعله متجه لمكان مثل المخزن بـس كلش كبيررر وعليّ حراسة هوااااي بحيث وين ما ادور وجهي اشوف واحد واگف وبيده سلاح..

فتح الباب..
عذاب- دخلي

دخلت مستغربة وتجمدت بمكاني من شفته ؏ كرسي مربط واذا اگول كله عبارة عن دم اكون مقصرة ، هسه تگولون شلون عرفتي اذا هيج اجاوبكم اكو بنية ما تعرف ابوها الروحي!!

شهگت وحسيت صدري نشك ويه شهگتي ، رفع راسه بتعب وبس شافني ابتسـم ذب نفس براحه ، نسـيت كلشي ورحت اركض بس ايدي نخلعت بسبحه قوية صحت بسببها بوجع..

نتر بي عموو..
كليم - ايددددك اكسرهاااا عذااااب لااا تلزمهاااا

ضحك الثاني بلا مُبالاة وگال وهو يسحبني وراه..
عذاب- اني لو جنت بمكانك فلا اهدد

كليم- واكسر راسك حيوان

صرخت من ضربه واحد واگف وراه..
- لا يضررربه لا يضرببه عذاااب

عذاب- روحه لعذاب

- لا تخليهم يضربونه

عذاب- صار

گالها يباوع لعيوني بهيام حسَيت عقله بي شي تصرفاته مو طبيعية ، دارني وهمس قريب إذني بكلمات مثل السَم..

عذاب- تردين عمج يعيش؟ وقعي ؏ هاي الاوراق وكوني زوجتي وها الشيخ جاي بالطريق علمود يعقدلنا

باوعتله بحزن..
- ما اريدك عوفني

عذاب- اعوفج بس اخذ كلشي حلو منج عمج عائلته خواتج!!

ميلت راسي اباوع لـ عمو اخذت القلم بيد ترجف وهو يگول..
عذاب- افضل حل اميرتي

صاح عمو..
كليم- لا توقعين بابا رنيمه حبيبتي لا توقعين

ايدي ترجف واني لازمة القلم بيها عيوني تسيل دموعها بكثافة ، معقولة اكو انسان يوقع ؏ تدمير مستقبلة!! اي اني راح اسويها بس تحت التهديد تحت الامر الواقع علمود شخص..

اجاني صوته التعبان خلاني ارفع راسي واباوعله مقهورة عليه ومقهورة ؏ نفسي وموقفي الحقير..

كليم- لا توقعيين اياج تسوينها

تقدم من وراي حسيت بخطواته وحرارة جسمه الضخم الي خيم عليه واني عيوني ما وڪعن من الانسان الوحيد الي اموت علموده ، مربط ؏ كرسي ووجهة من الدم ما مبين وجسمه كذلك مشطب وينزف..

اجاني صوته ڪ فحيح الافعى من وره وقريب أذني..
عذاب- توقيعج مقابل حياته لا تفكرين زايد انتِ الخسرانه بكل الاحوال

عيني ؏ السلاح الي مثبت براسه واباوعله من سمع الكلام تحرك بقوة وصاح..

كليم- تثقين بيه مو؟؟ لا توقعين لاااااا توقعععين ما عليج بييي خلييج وياااي

ما احس غير الي لازم السلاح ضربه بطرفة ؏ راسه وخله الدماية تطافر منا ومنا شهگت وشمرت القلم اريد اطمن عليه وقبل لا اخطي خطوتين نسحبت من ايدي بقوة..

عذاب- وين؟؟

- الله يخليك بس اشوفه بسسس اطمن عليه الله يوفقك والله اوقع واوافق بس لا تضربووونه لاااا تضربوونه

عذاب- بسرعة ما عندي اليوم كله انتظرج

هد ايدي بسرعة ركضت گعدت ؏ ركباتي گدامه وامسح ؏ وجهة..

- انتَ زين؟!!

رفع عيونه الذبلانه بصعوبة وقطرات من دمه صارت توڪع ؏ ايدي وملابسي..

كليم- تثقين بيه؟

- اكثر من روحي

كليم- يا عزيزة روحي يا امانتي الغالية حضنيني

گالها يرجف والدموع مغرگه عيونه ورغم هو محرم عليه وبكل مرة ما جان يقبل احضنه او يلزم ايدي بالحرام ويخاف عليه من الهوه إلا اني حضنته بقوة وبچيت بحرگة ڪلب..

همس يم اذني..
- شما يصير راسج لا ترفعينه وعيونج غمضيهن

- عمـ...

بعدني ما مكملة كلمتي وحسيت بالطلق صار ينزل ؏ المكان مثل زخ المطر بليلة عاصفة رجفت روحي واني احس المكان راح يوڪع فوك راسنا شوي وحسيت الطلق هدأ ورطوبة غرگتني ، صوت انفاسه السريعة خفت وجسمه تصلب..

بعدت روحي عنه ووگف النفس بريتي ؏ شكله ..

..

وتستمر الحكاية.. 🚬♣

قناة التلي zainab_salah0 نزلت بيها مشهدين من مُستقبل القصة 💙