رواية دروب الإِندِثـار الفصل السابع والعشرون 27 - بقلم زينب صـلـاح 🤎

بقلمي : زينب صلـاح 🧡

لـ روايـة ﴿ دروب الإندِثار ﴾

في الـ part 24 ♡♡

لا تنسون التصويت + متابعة للحساب + التعليق بين الفقرات ☘️

‏مثلهم تنگلب ضدي ،
عفت شمسي وضواها
ورحت لاجل شموع
ياشمعه التنور دربك بكدي؟

•••••••••••••••••••••••••••♕•

ضحكت بصوت ناعم
عقيق- ماكو تفضلي؟

هُمام- احم اي تفضلي تفضلي

تقدم وصافحها لو اني احس اشتعلت نار
جمرة بگلبي خزرته ، مسح ؏ ظهري كأنو يطمني
بس شنو المُمكن يطمن گلبي !!

دخلها للاستقبال واني وراهم
گعدت تتحمد بالسلامة وعيونها يكُل
صلافة تباوعله بجُرأة!! وهو يخز بيه من جوه لِجوه
لحد ما ابتسم وگال ..

- شنو ما راح تضيفنا حبيبي!

ابتسم امثل واني لو بيدي اعدمه هنا لحد الان
نار بگلبي لان لزم ايدها ، هي بهَتت
اتعجب اندهش من صلافتها وهي تگله ..

عقيق- شنو تصيرلك؟

هُمام- احم خطيبتي

وجهه صار اصفر ، اعرف غايتها وما الها نية
طيبة بجيتها ، گمت سويت الضيافة
وحطيتها گدامها ابتسم مُجاملة ولو بيدي
انوم لگلاص براسها؏ كمية الوقاحة الشايلتها ..

عقيق- مو صغيرة شعجب؟

كتفت ايدي وجاوبتها بكل هدوء..
- مرات الانسان يكون دارس وواصل وعُمره كبير بَس هو جاهل وهمجي وتصرفاته خطأ والعكس صحيح فـ حبيبي العُمر ما دخله ڪ مقياس وأنتِ هه دراسة وواصلة اكيد فهمتيني؟

هُمام طول ما اني احجي يتحمحم خاف اچفص
ما يعرف بس تطلع اچفص ببطنه !!

عقيق- صحيح حياتي لكن الانسان المفروض ياخذ من مستوى

- اممم شنو نوع المستوى؟

عقيق- الدراسي اكيد والوعيّ مُهم جدًا خو ما هو كبير وواعيّ وفاهم الحياة وياخذ طفلة

- وأنتِ هنا الواعية وخطيبي الفاهم واني الطفلة مو؟
لعد شگد مادية وسطحية وتفكيرج محدود

هُمام- حبيبي عـيب كافي

جاوبته بهدوء بَـس داخلي نار !!
- امامك عليّ عليهِ افضلُ الصلاة والسلام گال
حين سكت اهل الحق عن الباطل توهم اهل الباطل أنهُم على حق!

عقيق- شنو قصدج؟

- قصدي واضح حبيبي المفروض تكون زيارة المريض قصيرة اضافة إلى ذلك واجب احترام اهل المنزل واكو قاعدة ثابته بحياتي
احترم تُحترم
مثل ما اشوف اسلوبج رديء وتلميحاتج صلفـة واجب عليّ اردج حتى احافظ ؏ زوجي وبيتي لان امثالج ما لازم ننطيهُم مجال واذا تشوفيني هادئة للان هذا كُله لان أنتِ دايسة بُساط بيتي غير هذا لااا.

عقيق- اني اترخص

طلعت وما اتبعتها وهو من راد يگوم خزرته رفع ايده وگال ..

- اهدي يابه اعصابج

- صوتـك ما اريد اسمعه هُمام

دخل شفايفه داخل حلگه يحاول يكتم ضحكته
واني احس دخان يطلع من راسي
طلعت ترست طاسه ماي واخذت صابونه وسجينه ودخل للاستقبال وه يباوعلي ما فاهم شي

- انطيني ايدك

مد ايده نترت
- الثانية هُماااام الثانيةة

- هاج عيني بَـس هدي اعصابج

بللت ايده وصرت اغسل بيها بقوة
رفعت راسي اباوعله فاتح عيونة مصدوم..

هُمام- السچينه المن؟ بَـس لا تردين تشرحين ايدي

- مو فكرة سيئة ، بَـس اسمع صوت ضحكتك احطها بگلبك هُماااااام لا لا تضحك اششش

- هههههه سكتت كملي الله يهديج

رجعت اغسل بيها من كل عقلي وكُل ما
ارفع راسي اشوف وجهه احمر ؏ گد مو كاتم
ضحكته..

- اش لا تضحك اذبحك والرب

دار وجهه وبَس اكتافه تهتز دفعت ايده
وگلت مقهورة ..

- حتى سمچ ما اشويلك لاااا تضحككك

وهو سكران من الضحك ، رفعت السچين بوجهه وهو بلگوه يحجي مخنوگ من الضحك ..

- الله يهديج ، لج نزليها لا تسويلنا قدر خرب تفكيرج خوش ههههههه

شلت الاغراض وطلعت انافخ عبالك تنين
اجيت اطم نفسي لان بينت اني غرت
والرائد مستمتع وفرحان وصوت ضحكته يرن !!

انكسر خاطري تالي وگعدت اشوي بالسمچه
رفعت تلفوني ، صابني القلق والتلفون يرن بدون اجابه منها !!

باللحظة الاخيرة اجاني صوتها
رنيم- زوجة خالي

- ههههه انچبي ادبسززز

ضحكت بصوت رجعت اسأل
- وين چنتي شگد اتصلت؟

- جوه يم عمة

- عمة لو اخو عمة؟

تنهدت وكأنو هموم العالم كلها بقلبها
رنيم- سارة صار شي واذا ما احجيلج انفجر واخاف احد يسمعني هسه

- جيبي البنات وتعالي تغدن ويانه وسولفيلي

- بَـس!!

- بلا بَـس بلا بطَيخ تعالي وحاجي هُمام لان كُلش مقهور من زعلج تره بس ما يبين

- تمام هسه اجي

سدته واني رجعت اكمل طبخي
رحت فتحت الباب متخصره اباوعله شارد
بالتلفون ومن سمع الباب رفع راسه وابتسم ..

- ريحة السمچ وصلتلي شهلاء

- واحد ملعب مثلك ما يستاهل بَـس شسوي گلبي ما انطاني اخليك بدون اكُل وتموت وتعال يا عمي شيلني

- خرب تفكيرج خوش شبسرعة موتيني لا وتفكر بنفسها بس

- طبعًا قابل افكر بيك؟

- اني مستحوذ تفكيرج ما حاج تفكرين! مدامتي ام عَيون شُهل

رمشت بخجل احاول اتلافى الموضوع
نقذني الباب من اندگ عدل گعدته مستغرب ..

هُمام- منو؟

- البنات عزمتهم يتغدون ويانه وأنتَ استغل
الفرصة وراضي رنيم

هز راسه مبتسم واني رحت فتحتلهن الباب
لميتهن لحُضني ، هي ليلة واحس سنة مفارقتهن
وشوقي ولهفتي عليهن واضحة ..

- دمعتي الحلوة

دموع- سارة اريد ابقى يمج ما اعرف هناك وأنتِ ما موجودة

- اي أمي أنتِ ومسرة تبقن يمي ما ترحن

رنيم- واني بنت البطة السوده؟

- ههههه لا أنتِ ما يصرفلج هنا لازم يم عمج عشتو

رمقتني بنظرة حزن ونزلت راسها ، دخلتهن يم
هُمام تحمدله بالسلامة وهو عينه ؏ رنيم
مسرة ودموع طلعن افتهمن اكو وضع خاص !!

هُمام- تعالي لچ مشتاقلج ام عَيون حلوة

ابتسمت رنيم بحياء وراحت يمه لمها لحضنه
يبوس براسها وخدودها ، وهي هادئة بَـس اگدر
افسر الحزن البيها
رفع راسها وگال مبتسم ..

- زعلج كليم بشي؟ ليش ضايجة ومنطفية؟

ما جاوبت بسرعة باوعلي عباله اعرف ، رفعت
اكتافي بمعنى ما اعرف رجع گال ..

- مو گتلج من تردين تحجين اعتبريني صديقج ولا تخافين من شي احله الج بدون ما اتعبج

گعدت بصفها..
- أمي باوعيلي يلـه حبيبتي احجي شنو صاير؟ لو تردين نبقى وحدنا؟

هُمام- اخذي سارة وصعدي فوك سولفيلها بَـس لا تبقين ساكته وكاتمه مو زين عليج

رنيم- عمو يريد يخطبني

اباوع لـ هُمام بهَت صافن عليها بَـس اني جُملتها الغريبة خرربطتني
تگول عمو يريد يخطبني يعني ما معتبرته غير عمها شلون يريد يخطبها شلون عقلها يستوعب هذا الرجال بغير هيئته المُعتادة الها؟!

هُمام- اهدي لا تخافين بابا شو باوعيلي! هو فتح الموضوع وياج؟

- لا خالو اني سمعته بالخطأ يحجي هو وعمة نجلاء

- اكيد راح يفتح الموضوع ويايه

اباوع لـ هُمام احتار حيرة بين بنت اخته وبين صديق عُمره!

هُمام- مفكره بقرار أنتِ؟

رنيم- لا

هُمام- سهلـة ان شاء الله يمي لا تخافين

رنيم- ما أريد اكسر گلب عمو ما يستاهل بَـس اني مشوشه خالو ما جاي اعرف شنو اريد
هسه اني اتمنى اروح يمه هناك بس ما اگدر اخاف من افكاري واخاف يفاتحني بالموضوع وما اعرف شنو لازم يكون الجواب الصح

- وهذا خطأ حبيبتي إلى متى تتهربين من الواقع هو من الافضل تگعدين أنتِ وياه وتحجون
وهو يعرفج اكثر منه كلنا وراح يعرف شلون يحجي وياج بدون ما تزعلون بعض

- بَـس سارة اني مشوشه حيللل

هُمام- خلص لا تفكرين لحد ما كليم هو يفاتحنا بالموضوع

شوي هدأت وبدينه ننقل السُفرة يم هُمام
تونس ويه البنات وخصوصًا مسرة ام لسان
اكلته اكل بسوالفها وهو يجاريها ويضحك

صعدتهن ينامن بغرفته علمود ياخذ راحته هو
ورنيم اجه عليها قسورة رجعها بعد ماخابرته ..

الموضوع الحچت بيّ رنيم ما انفتح بعد
خصوصًا بعد ما مرت ايام واسابيع
تحسنوا بيه
بَـس البيت حزين بسبب استمرار لـيث ؏ وضعه
ورغم الفترة الطويلة المرت هو ماگعد !!

بيوم گاعدين اني والبنات متجمعين العصر ومندمجين نباوع مسلسل
زهرة القصر اعادة چان
واندگ الباب گمت اريد افتحه وصاحت رنيم بخوف..

- ش شوفي منو قبل لا تفتحين

- لا تخافين اني موجودة

رحت وصحت
- منو؟

كليم- اني بابا

فتحتله الباب..
- تفضل ابو ريم

ابتسم واشر ؏ سيارة هُمام..
- ندخل اني وابو الهَمم خلي الباب وروحي

عفتهم ودخلت مبلغة البنات ورجعنا نتابع
دخلوا وهُمام صاح ..

- ما بقى شي ؏ الامتحانات كم مرة اگول تعوفن المُسلسلات هاي؟

دموع- عمو درسنا خلي نتابع

كليم- المسلسل ما يطير بنتي بس الدراسة اذا رسبتي بيها ما تتعوض!!

راح هُمام طفى الشاشه وگال..
- گدامي للكتُب

رنيم كتفت ايديها بزعل وما قبلن يگومن لان فعلًا احنه قبل لا يجون خلصنا..

كليم- رنيمه!

- مااا تعبت والله واصلًا حافظه المواد وكلشي تسأل راح اجاوبك

هُمام- بلا عناد يله لاحتى المُفاجأة تنحرمن منها

مسرة- شنو هي عمو؟

هُمام- تؤ درسن وبالليل نبلغچن

مسرة- عمو لازم نعرف علمود يصيرلنا واهس ندرس

هُمام- هههه ام لسان يله گدامي للكتُب

حمحم كليم وگال..
- رنيمه نحجي شوي ؏ انفراد؟

رفع حاجبه هُمام..
- لا اكيد

كليم- انجعم خيي لا تحشر نفسك ، ها بابا نطلع بالحديقة نحجي؟

- خالو اطلع

كليم- يولي امشي امشي

اخذها بره يضحك وهُمام دخن من الغيرة بس باوعلي خزرته ..

- ابو الدكتورات ؏ شنو معصب

هُمام- براشدي اسويج وصل وحق هو حيدر الكرار اذا ما تبطلين من هذا اللقب المطلعته اليَّ

- تحسست منه؟ صدُك شنو اخبار عقيق؟

- بأفضل حال تسلم عليج

فتحت عيوني وصرت اكرص بيده..
- اذبحك هُماااام شنو من رجال أنتِ؟!! جاي تلتقي بيها

- مو زوج اني اخلص منج اروح لعقيق هيج الله غاضب عليَّ

- اذبحك اذبحك

- اشتعلوا اهلج كافي چنچ عگربه گرصتج مسمومه

- ابو الدكتورات الصلف

- الله يهديج

گالها وراح للاستقبال ينتظر كليم ..
ㅤㅤㅤ
ㅤㅤㅤ
ㅤㅤㅤ
ㅤㅤㅤ

••••••••••••••••••••••••••••••

رنيـم•

گعد ؏ الكرسي مقابيلي واني بالمرجوحه !!
باوعتله ونزلت راسي خجلانه
زفر نفسه بتعب وگال ..

- تغيرتي هوااي رنيمه

رفعت راسي اباوعله ما فاهمه ، عيونه مدمعات والتعب ينقرأ بوجهة !!

كليم- بنتي چان نومها ثگيل هسه تفز من ابسط شي بنتي چانت تحترم هسه حتى اني ترفع صوتها وتتجاوز عليَّ
بنتي چانت تسمع كلامي هسه ضاربته بعرض الحايط
بنتي من يمته تتصنت ؏ الكلام رنيم؟

تبهذلت احوالي من كلامة وصرت ما اعرف اجاوب..
- شلون عرفت؟

- نسيتي الكاميرات؟

عضيت شفتي عرگانه من الخجل!!
- طلبت منج تحبيني؟ جبرتچ عليَّ؟ حاط سلاح براسچ وكايلج تحبيني لو اموتچ؟

- لا

- هاي هيَّ لعد شيلي كُل كلامي من بالج ورجعي مثل قبل اني عمج وأنتِ بنتي

رفعت راسي متفاجأة وعيوني تتحرك بعشوائية بدون ما ارمش حتى؟
گام يمشي بثگل حط راسه جوه الحنفية وفتح الماي نگع راسه ، گام مسح ؏ شعره ووجهه من الماي ومـد ايده داخل جيبه ساحب باكيت الجگاير والجداحه
ورثله وحدة ورجع گعد گدامي ..

اشر بيده وگال..
- ههه اكو واحد بگلبچ بابا ؟!!

حَسيته خنگني بجُملته ، نزلت دموعي تتسابق منو التوگع اول؟ ابتسم
ابتسم واني اشوف الكسره بعيونه! اخ يا ذيج الكسره الكسرت رَوحـي

كليم- هنياله وهنيال بخته بيچ
حتى بهاي حظي ما گعد لعد يمتى يگعد يمتى ارتاح ثاري مالي راحة بهاي الدنيا بابا مكتوبلي اتعب وربي يمتحن صبري بيچ! أنتِ ابتلاء

- صرت ابتلاء بالنـسبة الـك؟!

- واجمل ابتلاء ، رنيمه؟

- هاا هااا

- جُنيد..

غص بالكلمـة سعل بقوة وضرب ؏ صدرة وكمل..
- جُنيد! جُنيد خطبج مني!

رفع عيونه يرجف ، بچيت ؏ حاله..
- اشش حبيبي لا لا بابا لا تبچين تهدين حيلي ورحمة العزيز
أنتِ بَـس گولي موافقة ووعد بيدي ازفج اله بَـس هاا ههههه اشرط بنتي مو هينة وانطيها بالساهل لازم تكبر شوي بعد وتدرس وتتزوج بعدين موو؟ اشش مو احجي وياچ رنيمه لا تبچين

- لا لا ما موافقة اني

- تحبينه ويحبج شنو المانع؟

- ما احبه والله

- متأكدة لو علمودي؟

- لا اني ما اريد وداعتك عندي ما احب شخص ما عندي شخص بگلبي غيرك
وهذا گلبي اذا بيوم حب ما راح يحب غيرك ماكو احد بالدنيا ضحى علمود ماكو شخص حبني بدون مُقابل مثلك عمو أنتَ غير! أنتَ ابويه واخويه أنتَ صديقي وعمي ، سهلـة عبالك من اشوفك زعلان لان ما ابادلك الشعور؟ ورحمة بابا وداعتك احس رَوحـي تفرفح وتنازع تريد تطلع من جسمي ومن حَـسيت راح اخسرك وأنتَ زعلان احتقرت نفَـسي

شهگت ، عيونه حُمر ومدمعات !!
رفع ايده لوجهي ورجع نزلها بدون ما يلمسني
مرر نظراته عليَّ بحيرة تقدم بگعدته وگال بصوت واهن ..

- تقبلين تصيرين مَخطـوبتي؟!

- شـ شنــــو؟!!!!

- ما اطلب اي حقوق منچ ما اعاملچ بأي اسلوب يضايقج لكن اسمحيلي
ولو لـفترة قصيرة من الزَمن تكونين مَخطـوبتي على سُنة الله ورسوله ، مو والله انترسنا حرام! اريدچ تشوفين كليم ثاني مُختلف عن الي تعرفينه ، ها شنو رأيچ؟

- بَـس!!

- لا تتسرعين فكري الج مُدة واخذي راحتچ فكري ومن تتخذين قرارچ مهما كان اني راح اتقبله! هـاا؟

نزلت راسي ضايعه بَـس من باوعتله وهو مليان امل!! هزيت راسي بـ اي ..

- تمام

- بيوم الي تقررين بيَّ اذا موافقة گولي اسمي مرري اسمي من بين شفافچ واذا لا .. اني افهم افهم

- تمام

- هههه رَوحـي دخلي درسي

- وأنتَ؟

- وياچ بابا داخل يم هُمام

دخلنا جوه واني شعوري بين الاعراف ساعة اريد اضرب نفسي ؏ كمية الغباء واني انطي موافقتي
وساعة اگول لا محد يستاهلني غيره محد راح يحبني مثله
وابو المثل يگول اختار الي يحبك لا تختار الي تحبه أنتَ !!

سارة- رنييييم

- ها هاا شبيچ؟

دموع- هوهو صارلنا ساعة نحاجيچ وأنتِ بغير عالم

گمت سديت الباب ورجعت يمهن..
- جُنيد خطبني من عمو

مسرة- عزااااا وأنتِ شنو گلتي؟

سارة- الاصَـح كليم شنو گال؟

- يگلي اذا تحبينه وافقي واني ازفچ اله بيدي

دموع- لا هسه من صدُك عزااااااا مو يحبچ لو اني غلطانه؟!!!

سارة- هيج بسهولة؟

- ما يريدني اكرهه مَستعد يزوجني بيده ولا اكرهه عمو يعني هو شسمه اووووف يحبني بَـس ما يريد يجبرني عليّ

دموع- وافقتي؟

- لاا

سارة- افضل اني جُنيد ما داخل عقلي من چنتي تسولفين عنه وعن زياراته الج وأنتِ تبيعين اضافة هو اختفى فجأة وظهر فجأة يمتى حبج؟ قصته ما تدخل للعقل

مسرة- من الاخير حبيبي سارة ما مرتاحتله تحسه سخـيف

سارة- بالضبـط

سكتت اباوعلهن ، قلصت عيونها سارة وگالت بشك..
- اكو بعد شي؟

- عمو طلب ايدي ، خطبني!!

سارة- هنا اني اصيح عزااااااا العزاج رنيم

مسرة- رفضتي؟

- لا

فتحن عيونهن وشهگن..
دموع- وافقتييييي؟

- طـ طلـب مني فرصة خلال الخطوبة وشسمه.. اذا اقتنعت نكمل واذا لا ما يضغط عليَّ

مسرة- هاي هنا ابصملچن اذا ما تحبه تعالن تفلن بگصتي

- تره احبه اني منو گال ما احبه!!

دموع- يااااا لعد شكو تدلعين ؏ الرجال

- احبه بَـس مو الحُب الحُب الي هو يحبنياه عادي

سارة- وشنو راح يصيـر؟

- ما اعرف يمكن هسه راح يحجي ويه خالو عزاا خجلااانه..

هُمام- رنيييييييييم

- صُخام الصخمني يا گاع انشکي وبلعيني سارررة ضميني ضميني فدوووة

سارة- ههههه شمسويه أنتِ وخايفة؟

- استحيييي

هُمام- رنييييييم تعاااي نزلللي

گمت العن واسب بنفسي وايدي موتتها بالتگرص
لحد ما وصلت للاستقبال ، عمو ماكو !!
وخالو نظراته بحث اخر خلاني اتيه طريقي ما اعرف شنو اسوي ..

- ها خالو؟

- دسدي الباب وتعاي

سديته وگعدت قريب منه ، هز ايده وگال ..

- هل اني خروف؟

- حشـاك خالو

- اني عندي گرون بابا؟

من كُل عقلي باوعت لراسه وهو فتح عيونه متخبل..
- تتأكدين رنيم تتأكدين عنديييي لو لا؟؟؟؟

- لا شسمه خالو هاااي شبيك!

- أنتِ ليش من كيفچ تتصرفين؟ يمتى انخطبتي يمتى وافقتي شنو جُنيد شنو كليم ترا فريتي عقلييي

- مو هو خطبني

هز ايده وگال ساخر..
- يا هوَ حددي ، كليم لو جُنيد؟!

- ثنينهُم

- ايييي اييي احجي اسحب الكلام منج بالقوة احجي المقتل خلي اشوف وافهم رجلي وين راسي وين

بخجل صرت اسولفله كُل الكلام الصار بيني اني وعمو كليم وهو يستمعلي معصب
من خلصت خزرني ،..

هُمام- رنيم احترميني احترمي وجودي فدوة لعينج لا تخليني اطلعن طوري لا كليم ولا غيره بعد تحجين وياه يصير موضوع تگولين عندي خال مسؤول مني تحجون وياه

- صـار

- واذا نعاد الموقف؟

- ما ينعاد

- لا هوَ اذا انعاد معناها اني صدُك خروف

كممت حلگي اخفي ضحكتي هز ايده وگام
فتح الباب ووگعت سارة بحضنه هي والبنات
صفن بيهن يستوعب اخر شي لزم سارة وغمها بنُص گصتها ونتر..

- اذا اختهن الچبيره مسربته شنتظر من الاصغر منهن

سارة- ابو الدكتورات ما عاجبتك؟

اردف بقهر..
- هو ما قاهرني غير أنتِ عاجبتني

ضحكت بدلع خلته يبتسم ، بنفَـس الوقت ارتفع صوت تلفونه يعُلن عن مُكالمة ..

جاوب
- ها عضـيدي؟.. برَوح ابوك صدُك هههههه جاي جاي فرحتني الله يفرحك يلـه

سده وباوعلنا فرحان..
- لـيث گعد

- الحمدُ لله الف الحمدُ لله تستاهل عمة رجوع ابنها بصحة وسلامة

سارة- اي والرب

هُمام- يلـه رايح اني اشوفه ديرن بالجن ؏ نفسچن والباب ما ينفتح لأي شخص غير المعارف فقط مفهوم؟

سارة- اني موجودة لا يبقى بالك

هُمام- مدامتي اللبوة

ضحكت سارة خجلانه وهو راح!! فرحني صلحهُم خفت يبقون زعلانين من بعض
وفرحة العمة حيل لان لـيث گعد ، گعدنا ندرُس ننتظر رجوعهم والمُفاجأة ..

ارتفع صوت تلفوني يعلن عن مُكالمة!! ابوي الرَوحـي جاوبته بسُرعة ..

- عمو

- يا بعَد عمامچ كلهُم

- شلونه لـيث؟

- زين وخال لـيث هم زين

- هههههه راح ترجعونه؟

- ان شاء الله راجعين صحته تمام التمام

- الف الحمدُ لله

- جهزي نفَسـچ جوهرتي

- لـشنو؟

- اوفي بوعدي الچ ، اخذچ للنجف نزور احبابنا الراحلـين

..

وتستمر الحكاية.. 🚬♣

واخيرًا راح نشوف لقاء جوهرة كليم بـ ابوها 💙

هلا گلبي شلونكُم؟
اريد اسولف وياكُم بخصوص التفاعل والله تفاعلكُم يزعل
أنتو تردون بارت طويل وتردون التزام بالتنزيل بَـس ما تتفاعلون وانا والله اي واهس للكتابة ما عندي وأبد لا تتفاجأون لو بلشَت اتأخر لان بصعوبة جاي اكتب ما عندي واهس انا ما اجبركُم بَـس أنا هم ما مجبورة اكتب واتعب نفسي على اللا شيء على شنو اكتب وتفاعل ماكو؟
اذا نفس التفاعل عذروني بعَد

قناة التلي zainab_salah0