رواية دروب الإِندِثـار الفصل السادس 6 - بقلم زينب صـلـاح 🤎

بقلمي : زينب صلـاح 🧡

لـ روايـة ﴿ دروب الإندِثار ﴾

في الـ part 5  ♡♡

لا تنسون التصويت + متابعة للحساب + التعليق بين الفقرات ☘️

‏سوالفِك تزرع فِي مكان الجرح ورد ♥.

•••••••••••••••••••••••••••♕•

فتحت عيوني واحس جسمي بي نحول مو طبيعي مررت عيني ؏ نفسي جنت مغطايه بس ايدي ملفوفات بشاش ابيض ، الغرفة بيضة وريحة الديتول تخنك بيها..

مربوط بـ ايدي صوندة مشكلة بالكانونة إلي بـ ايدي غرفة فارغة بس اني بيها ، طفلة وحيدة اعيش وجع المفروض ما اعيشه..

في سبيل ارضي الناس علمود يرحمون بحالي ويبقون ببيت يأويني وسقف فوك راسي ، بدون ما احس ؏ نفسي لگيت روحي اشهك مثل الغرگان وابجي بوجع..

ايادي احتضنتني حسيت بدفو وحنية بابا ، زدت بجي اقبض ؏ قميصة بقبضة ايدي الصغيرة واسمعه يهمس..

كليم- بسم الله بابا بنياتي بسم الله حاجيني يروحي يوجعج شي؟

- عمووو

- يا بعد عمج وهله ها بابا

- يوجعني ايدييي

سحب ايدي يبوسهم من فوك الشاش ويمسح دموعي بهدوء وعيونه مليانات غضب وحزن..

- ريت الوجع بيه ولا لاحج بابا ريت الحرك بيدي ولا يمس ايدج الترفة وصيتي وصية اخوي وعضيدي

سكتت بس شهگاتي بعدها مستمرة وهوه عيونه خبطت صارت حُمر ، اجه الدكتور ومن بعد ما سمحلنا نطلع وانطانا وصفة عصارة حروق ادهن بيها مكان الحرق كل يوم..

بالطريق نزل جابها عمو ورجع وطول الطريق ساكت بس بين فترة وفترة يذب حسرة شكبرها ، يباوعلي ويرجع يكمل سياقة..

صف السيارة بالباب ونزل فتحلي الباب ، باوعلي يذب حسرات تقدم شالني بين ايدي واني جنت مبندة من الوجع والبجي حطيت راسي ؏ صدره وصافنه..

بس دخلنا للصالة كلها سكتت صافنة علينا وبيبي عيونها حمر مبينه باجيه وجدو عصبي حيل..

جدو- ها وليدي شلون صارت

كليم- تتحسن ان شاء الله صاعد انومها اني

گالها وصعد بيه بدون ما ينتظر جواب مددني ؏ سريري وگعد بصفي..

- راح اگوم اسويلج عشه لا تتحركين من مكانج وجوه لا تنزلين فاهمه بابا؟

- عمو بيبي شبيها

سد عيونه ونطق من بين اسنانه..
- ما بيها ما بيها شي

- جدو عصب عليها لان هي طلبت اسويلها چاي؟

فك عيونه ونتر..
- شلون شلوون!!

- ها

- بلا فهاوة احجي شنو طلبت تسويلها جاي؟

- اي عمو هي بيبي گالت سويلي جاي

دار يصفك ايد بـ ايد وطفر للباب من ردت اگوم دار عليّ وگال..

- جوه اذا نزلتي تتعاقبين گعدي بمكانج

ما گدرت ابقى نزلت وراه مطلعه عين وحدة من وره الحايط واباوعله واكف گدام بيبي يفرفح..

- الله واكبررررررر طفللة يوممم طلفةةة تخلينهااا تصبلج جاي بيا ديننننن بيااا دين نذكر ونقبل طفلة تخدمج

بيبي مدنگه وبس تبچي ، انتفض جدو ما فاهم..
جدو- شنو هذا الكلام كليم؟

- اسأل امي ، ليش يوم ليش هديتي حيلي عليها امانة اخوي هاي ليششش؟

بيبي- بسبببك

- شنو بسببي لا تخبلين قابل گتلج روحي حرگيها وفرفحي الطفلة

رفعت شيلتها تمسح دموعها ، لمحت جُمانة واگفه باب غرفتها وتباوع مبتسمه بشماته ، رجعت عيني عليهم من جاوبته بيبي بكلام ما فهمته..

- حاط عينك عليها علمود هيج ما تريد اخذلك بنت اختي

ما عرفت شنو معنى كلامها الخله عمو فجأة ينتفض ويفلش كلشي گدامه جدو يريد يسيطر عليّ ما يگدر حتى عمو عليم طلع من الغرفة يريده يهدء ماكو جان يصرخ بحرگه گلب ويضرب كلشي گدامة واسمع جدو يصيح..

- لا بارك الله بيج خبلتي الولد

وهي تصيحله..
- ولك يوم عسى لساني نكص ولا حاجيه كافي لا تأذي روحك

ايدي الاثنين صارن ينفضن دم واني ويه كل صرخة منه توكع عشرات الدموع من عيوني تمنيت الوجع بيه ولا بي..

وكع منهار منتچي ؏ الحايط وعيونه بالفراغ گعد جدو يمه وسحب راسه لحضنه وباس جبينه..
جدو- اهدأ وليدي حبيبي

عليم- صدك تحجي انتَ گوم گوم دمك راح يخلص

رفع راسه لجدو وهمس وگأنو هموم الدنيا كلها ؏ اكتافه..

- بنتي هاي ، بويه اكو اب يحب بنته ويباوعلها بغير نظرة؟

- اكسر العصه ؏ ظهره العنده غير هذا الكلام بس لا تأذي رويحتك انتَ

رفع نظره الي وابتسم بتعب واشرلي اروحله مشيت متحذره من الاغراض وگعدت ؏ ركباتي يمه بسرعة سحب راسي وباسه..

- صعدي لغرفتي وقفليها عليج وما تفتحين الباب لحد ما اجي خوش بابا

- وين تروح عمو اخذني وياك

قبل لا يجاوبني نتر عمو عليم..
- مو هو رايح يتونس ما تشوفين ايدي!

خزره عمو ومسح ؏ خدي بلطف..
- اضمد ايدي واجيبلج عشه وحلويات واجي ما اتأخر وسمعي الكلام الباب ما ينفتح لحد ما تسمعين صوتي

رد جدو بعتب..
- شنو خايف عليها واني موجود؟

رفع راسه لـ بيبي الگاعدة وتبچي وتون بسكته..
- صرت اخاف عليها من نفسي يا بويه

تنهد وكمل..
- يلـه لغرفتج عزيزة روحي

گمت من مكاني وركضت للغرفة وسويت مثل ما طلب عيني ؏ الساعة واحسب الثواني ثانية ثانية انتظر رجعته حتى وجع الحرك نسيته وانا افكر هسه توجع مثلي؟!!

بـ 11 و5 دقائق نطرق باب الغرفة بخفة ركضت فرحانة برجعته كانت لحظة وتذكرت من گال
(الباب ما ينفتح لحد ما تسمعين صوتي)

بتردد وگفت وره الباب وهمست..
- منو؟

- فتحي الباب احجي وياج

فتحت عيوني بوسع
عمو عليم؟؟؟
بس شنو يسوي هنا؟ وهو مو ويه عمو كليم ليش راجع وحدة؟ وشنو يريد مني؟

- عمو ما يقبل افتح

صار همس بدون صوت ما افتهمت شي منه رجع گال بثقة..
-هو وصاني عليج فتحي الباب

خفت منه ورديت برفض..
- ما افتح

فزيت من دفر الباب وگال بتهديد..
- بسيطة اني الج

اختفه صوته بعدها وسمعت خطواته تبتعد رحت ؏ السرير حاطه راسي ؏ لمخده وسارحه بالفضاء فزيت ؏ حركت المفاتيح بـ باب الغرفة جمدت وحسيت الرعب دب بكل جُزء من جسمي..

نفتح الباب وطل بطوله عليّ ابتسمت بوسع وركضت اله بدون وعي حاضنته ، شالني بدون ما يدفعني مثل كل مرة لان يستحرم وگعد ؏ السري مخليني بصفه..

حط العلاليك ؏ الميز وگال..
- اكو احد صعدلج؟؟

خفت وجاوبته بتكذيب..
- لا عمو

- متأكدة بابا؟ ليش وجهج اصفر؟

مسحت ؏ وجهي بحركة عفوية خلته يبتسم وجاوبته بتعب..

- خفت عليك خفت اخسرك مثل بابا ما عندي غيرك عمو

اجهشت بالبكاء الي خلاه يلمني لصدرة بحنان ويگول بتأكيد..

- بس الموت يبعدني عنج وعن حمايتج وحتى هو احاربه علمودج

- ما تعوفني وحدي اخاف

- لحد قطع الانفاس بناتي

تعب اليوم كله طلع واني بين احضانه غفيت مأمنه ؏ روحي يمه فزيت بعد فترة الغرفة فارغة ، عفست وجهي من حسيت بوجع نزلت من السرير اريد اطلع بس الباب مقفول!!!!

دگيته بقوة خايفة ؏ روحي ، شوي وحسيت حركة بالقفل ونفتح تنفست براحة من شفته عمو..

- صباح الخير بناتي

- صباح النور

گعد ركبه ونص يبعد خصلات شعري عن عيوني وگال..

- صار عندي شغل وطلعت وقفلت الباب عليج وهسه رجعت جنت احجي ويه ابوي وسمعت صوت الباب خو مو من زمان گاعده

- توني گعدت

- يله تعالي دناكل وتاخذين مسكن اكيد جاي تتوجعين

باوعت لأيده وايدي وضحكت ابتسم وقرص خدي يحجي..

- ضحكيني وياج رنيمه

- احنه الاثنين متأذين بأيدينا

ضحك يهز راسه بيأس ، اخذ ايدي ونزلنا جوه صبحت عليهم ورحنا للمطبخ جانت عمة جُمانه هناك بس شافت عمو خزرها طلعت تركض..

شوي ودخلت بيبي تقربت باست راسي وگالت..
- اگعد يمه اني اسويلكم ريوك

- ما يحتاج

- ايدك مجروحة ما تسيطر اگعد يمه

- چؤ عادي

- اسويلك چاي احميلك الصمون

- اني اسويهن

جان يحجي وياها بـ اختصار وظهره الها ما يحجي وياها نكسر خاطري عليها كلش ، حطيت شيلتها ؏ عبونها تبجي وطلعت..

- عمو

- ها بابا

- خطية بيبي لا تسوي وياها هيج

حط صحن البيض گدامي وگال..
- سوالف لكبار لا تدخلين بيها ماشي بابا

- بس..

- انتِ تعرفين شي واني اعرف شي قابل احب حزن امي لو مرتاح للوضع يا بابا

- لعد ليش تسوي هيج؟

- لان سوت شي غلط وعلمود ما تسوي مرة ثانية اضطريت اعاملها هيج

- بس خطية

ابتسم ومسح ؏ راسي وراح جاب كلاص الحليب واجه حطه گدامي هامس..

- اكلي

- وانتَ؟

- اكلت الصبح

هزيت راسي وبديت اكل ، مرت الايام والحرك طاب وجرح عمو تحسن والحمد لله هو وبيبي تصالحوا ورجعت بيبي تعاملني زين مثل قبل بس كل ما عمو يرفض الزواج من بنت اختها تبقى تنتر وياي ومو عارفه السبب..

لحد ما بيوم گاعدين ؏ الغده وگالت بيبي بصوت حازم..

- اليوم اروح اخطبلك هيام

كليم- رجعنا

- والله يا كليم اذا ما قبلت اغضب عليك ليوم الدين ولا انتَ ابني ولا اني امك

- صدك تحجيننن يوم

باوعتلي ونترت..
- عندك شغل وامورك تمام شنو منتظر ما تتزوج وهيام شنو ناقصها وما تريدها لو تنطيني عذر مقنع لو انسى اني امك

سكت عمو بدون جواب احسه ضايع وتحاصر اكثر من گال جدو..

- امك عندها حق وليدي إلى متى نريد نشوف اطفالك ونفرح بيك العمر هم أله حقه

گام باس راس جدو وبيبي وهمس بعدم رضى..
- توكلي حجية

عافنا وطلع بحزن لان ما رايد هذا الزواج بس بيبي طارت طارت من الفرح وراحت تجهز نفسها اخذتني اني وعمة جُمانة ورحنا العصر..

هيام جانت جميلة بكل ما تعنيه الكلمة من معنى نازكه وصغيرة وناعمة حيل ، تعجبت من رفض عمو للزواج منها وهي بكل هذا الجمال والادب جانت تبتسم بخجل وتنصي راسها..

حسيتها تحبه لعمو..

رجعنا جان عمو كليم وعمو عليم گاعدين بالصالة يم جدو ، رحت اركض اله سحبني باس راسي وگعدني يمه بدون ما يسأل ويهتم..

بيبي- شو ما سألت؟

- ؏ شنو يمه؟

- وافقوا لا شو ما مهتم

ضحك مستهزء يهز بيده..
- واضح الجواب من وجهج يوم ما يحتاج اسأل

- زين تحصل مثل جمال وادب هيام؟

- حاجي اني گايل شي بس البنت اني اشوفها حالها حال خواتي وهذا سبب رفضي

- لا لا بعد ماكو راح تصير زوجتك انسى هاي الفكرة

عليم- يعني وافقوا؟

بيبي- يصحلهم احسن من وليدي

جدو- بيها الخير ان شاء الله

اسبوع بس وصارت الخطبة جان كُلشي يمشي بسرعة بسرعة لدرجة خفت افقد عمو بعد ما يتزوج..

جانت هيام بالخطوبة تجننننن وعمو طلع انيق حيل ومن دخل يلبسها الحلقات والذهب حيل لايقين لبعض وثنينهم جانوا خجولين وهادئين..

يمكن جان احساس مو اكثر بس حسيت عمو بده ينجذب الها واغلب وقته اتصال وياها لو يروحلها  وبالشغل حسيت هملني مو مثل قبل..

هذا الشي غلف گلبي بالحزن وتذكرت بابا متحسرة وادركت مستحيل يجي شخص مثله بالكون مهما كان..

بده مستوي الدراسي يتراجع وصحتي تسوء لان بالبيت محد ذاكرني الكل ملتهي يجهز للعرس مال عمو واني صرت اخر اهتماماتهم..

مرة فزيت تعبانه وجسمي يرجف من الصخونة وعظامي توجعني ، رحت لعرفة عمو اريد علاج جان الباب مفتوح ؏ النص قبل لا ادخل سمعته يهمس بحس دافي..

- احـبـج

سكت متحسر شوي وضحك بهدوء ورجع گال..
- الله يطول بعمري واعوضج هيامي

نزلت دموعي ورجعت لغرفتي متمددة بفراشي واحس دموعي جمر تنزل ؏ خدي وتحرك روحي شگد مشتاقه لـ اهتمامه وحنيته عليّ مثل قبل بس تغير وصار يهتم بعروسته وهذا حقه..

ثاني يوم من گعدت ما نزلت جوه احس نفسي غريبة مثل اول يوم اجيت بي لهذا البيت ، بقيت مدده ؏ سريري وعيوني صافنه بالفراغ استرجع ذكرياتي ويه بابا وعمو كليم من يگولي..

- رنيمي ام عيون حلوة

هسه حتى شلونج صرت اتحسر اسمعها منه ، شوي وسمعت خطوات تقترب من باب غرفتي بسرعة غمضت عيوني ومثلت النوم..

جنت طفلة بس عيشتي عيشت كبار..

ريحته سبقت دخوله ، گعد يم راسي ومرر ايده ؏ وجهي بسرعة فز هامس..

- مصخنة!!!

ردت ابجي بس قويت نفسي وبقيت نايمة ومغمضة عيوني رغم طبطب ؏ خدي وگال بقلق..

- بابا تسمعيني حاجيني

لو فتحت عيوني راح ابجي ويبين حزني وكسرتي بعيوني ويفهم ما ردت احسسه بشي ويلوم نفسه عمو كليم ما يستاهل مني هيج يمكن لان اني يتيمة اتحسس بسرعة لان شفت بي الاب الفاقدته..

حسيت بجسمي طار راسي ؏ صدره اسم دگات گلبه القوية وبيبي تصيح..

- ولك يمه شبيها البنت

- ما ادرررررري

احس بالسيارة وسرعتها لكن فضلت ابقى ؏ حالتي وما اگعد ما اريد اشوف شي فضلت الظلام ؏ النور بهاي الدنيا..

اسمع صوت الدكاتره وصوت عمو القلقان صار همس ما گدرت اسمع كلام الدكتور بس رد عمو كليم..

- متأكد دكتور؟

- ههه اي

سمعت الباب نسد وصوت كرسي صار قريب ؏ السرير لزم ايدي وباسها..

- رنيمي باباتي زعلانه مني؟

سكتت وهو كمل..
- قصرت وياج بابا وهيج حتى حجي ما تحاجيني هملتج وكسرت خاطرج ريت الكسر بگلبي يا بعد عمج

بضعف فتحت عيوني واشوفه عيونه حمر ومدمعات حسيت بحرارة نزلت من عيني ؏ خدي ، الدموع إلي داريتها عنه بس شافته وكعت!! رفع ايده ومسح دموعي..

- وگفتي گلبي عبالي صارلج شي شلون اسامح نفسي وشگول لاخوي لو قابلته بيوم گدام ربي

- اريد اروح يم بابا عمو مو گال مو هسه يمتى لعد اروح حيل مشتاقتله

نزل راسه وحطه بين ايدي وجسمه يهتز ، مديت ايدي لازمه ايده وگلت..

- اني احبك وانتَ حباب بس اني مشتاقه لـ بابا ليش تبچي عمو

- اعرفج لو ما مقصر وياج ما تذكرين ابوج

نزلت راسي ساكته لان اعرف كلامه حقيقة وما مكذب بشي فعلًا اني حسيت بغربة ونقص لذلك محتاجة اروح يم بابا واشكيله من كل شخص جرحني وأذاني بعده..

رجعنا للبيت والكُل جان يسأل وقلقان بس اني بعالم ثاني افز ؏ ايد عمو وهو يحثني اكل ، رجع مثل قبل يتابع دراستي واكلي بس نفسيتي بقت نفسها ما گدرت اتحسن واني احس بنفسي ثگيله عليهم ومضطرين يتحملوني..

مره سمعت صوت صياح بخنيك صار عندي فضول فتحت الباب ومديت راسي اباوع غرفة عمو مفتوحة وهو وهيام واگفين وهي دموعها تجري وتهمسله..

- اني الي حق يمك وهاملني وهاي الخطوبة لو تزوجنا شنو تسوي

ضرب وجهة وهمس بعصبية..
- الف شغلة براسي قابل مكيف للوضع اني من الشغل والبيت والاهل وانتِ

- ورنيم

خزرها ورفع اصبعة..
- هنا حدج كل الحجي يخرب اذا ادخلينها بنص موضوع مالها دخل بي حتى الطفلة اني هملتها بسبب زواجنا

- تحبها اكثر مني وتقضي وقت وياها اكثر مني كليم

- ولج بحسبة بنتي شبيكم انتم وياهااا

- بس هي مو بنتك مو بنتك انتَ ما مجبور تعتني بيها

لزم فكها مخنزر عليها..
- هذا الكلام اخر مرة تحجينه واني اخر مرة اسمعه لا تنزلين من عيني

بجت مخنوكه وهو سحبها لصدره يبوس راسها ويهديها ، مسح ؏ فكها ونزل باسه هامس بلطف..

- لا تقارنين نفسج برنيم هي طفلة وبحسبة بنتي وامانتي وانتِ زوجتي وحبيبتي تمام لا تضوجيني منج وازعل عليج

هزت راسها وباست خده..
- صار

ضحك وسحبها لحضنه ، تنهدت ارجع لغرفتي صافنه بالي صار وشگد اني ثگيله عليهم وجاي اتسبب بمشاكل لعمو ويه زوجته وهو ما يستاهل يتعب بسببي..

بس ما عندي مكان الجأ اله غير هنا..

التحق عمو وكثرت توصياته بيه ويحلف بيبي ادير بالها عليّ وتخليني بين عيونها ، گعد گدامي اني جنت گاعدة ؏ القنفة وهو قرفص گدامي حضن وجهي وضحك..

- من ارجع نبلش بـ اول خطوة لان انتِ كبرتي وهذا الذهب لازم يتغطه مو بويه

هز راسه جدو..
- اي والله

تنهد..
- ديري بالج ؏ نفسج بنياتي بين ما ارجع لا تعبين رويحتج خوش ما اتأخر اني ان شاء الله

- تروح وترجع بالسلامة

- راح اشتاقلج

- اني هم

- لا تكرهيني لان هملتج اخر فترة وبس ارجع اخذج تشوفين بابا ماشي

ابتسمت بتعب..
- تمام عمو

- بناتي ام عيون حلوة

ضحكت بخفة باس راسي وودع جدو وبيبي وعمو عليم وطلع ، ردت من يجي افرحة وحتى من اروح ازور بابا افرحه وقررت اتحجب ، حجيت لبيبي وطارت من الفرح اشترتلي حجابات يخبلن وبديت التزم بيهن حتى بالبيت گدام جدو وعمو عليم..

كلش فرحت بهاي الخطوة بس ما جنت اعرف انُ جان هذا اخر لقاء بيني وبين عمو كليم ووداعه جان الي للابد مو مجرد التحاق..

•••••••••••••••••••••••••••

احس بوجع فضيع يحيط راسي من كل مكان عيوني احاول افتحهم ما اگدر احس لازكات ببعضهم ما اگدر افتحهن..

بعد محاولات عديدة گدرت افتح عيوني بس مغوشات حيل وماكو شي واضح ، رفعت راسي احاول افهم واميز منو هذا الگاعد مقابيلي..

كحيت بقوة من ريحة الجكاير الخنگتني هزيت راسي بقوة وفتحت عيوني ؏ وسعهم اباوعله گاعد ؏ كرسي مقابيلي حاط رجل ؏ رجل بشكل مستفز وينفخ دخان جگارته فوك بهدوء..

عذاب- گعدت الحلوة

تلفتت حولي مستغربة ردت اگوم وصرخت متفاجئة لا هو لحك يلزمني ولا اني سيطرت ؏ نفسي ووكعت ؏ الارض اني والكرسي المربوطة عليّ ، ضرب راسي بقوة ؏ الارض حسيته نقسم نصين..

ركضلي يرفعني وانا مشمئزة من لمساته لجسمي خزرته بسرعة ابتعد رافع ايدي ويضحك..

- عيونج حلوة لا تخزريني

- شتريد مني ليش اني هناااا

- الصوت ينصه يا حلوة ونحجي بهدوء

- بهدوء وانتَ رابطني مثل الحيوان يا متخلفففف

ضحك وگال..
- لان كلامج صح راح اسكت عن قلة ادبج بالاخير

دنك يفك رجلي وبعدين دار يفتح ايدي شوي وحسيت بنفسه قريب گمت من مكاني بخوف احس گلبي راح يطلع من مكانه..

- اهدي احجي وياج وترجعين ما أأذيج

- عفت طرق البشر كلها بالحجي والتجئت لطرق الحيوانات لان هذا انتَ حيوااان

- لسانج حلو بس اذا استمر هيج ينقطع هـاا

- قطعوا راسك ان شاء الله

- ههههه حلوة حلوة

رجع گعد ؏ مكتبه واشر ؏ الكرسي المقابيله وگال بهدوء وهو عينه بعيني..

- تفضلي مدام گعدي

گعدت واني خازرته لدرجة احس فص عيني راح يوكع من گد ما معصبة وفاتحتهم ؏ وسعهم رجع عيونه ؏ اللابتوب وداره عليّ جان صورة مقسمة بعدة صور قبل لا استوعب گال..

- كلها تتسجل بأسمج وخواتج وياج بشرط؟!!

رجعت اباوع مو بيوت قصور اضافة لشركة ومصنع وهواي امور ما مفهومة ، همست واني اباوعله..

- شنو الشرط؟

ابتسم ابتسامة واسعة خبيثة بيها كل معاني الخباثه والحقارة..

- تتزوجيني ، تصيرين ملكي فقط!

..

وتستمر الحكاية.. 🚬♣

التلي 💙