رواية دروب الإِندِثـار الفصل الخامس 5 - بقلم زينب صـلـاح 🤎

بقلمي : زينب صلـاح 🧡

لـ روايـة ﴿ دروب الإندِثار ﴾

في الـ part 4 ♡♡

لا تنسون التصويت + متابعة للحساب + التعليق بين الفقرات ☘️

يعنبر ياتعب ضهري
زرعتك والشمس تلهب
يا أول حصد للروح
مدلل بالگلب تلعب

•••••••••••••••••••••••••••♕•

سيارة الشرطة هواية اصوات الانذار مالتها يطرش بالمكان للحظة خفت وترددت بالرجعة ، ردت ارجع خاف كلشي يصير مو امان وهذا الشي جاي يصير قلقني..

بس طغى خوفي من سُعاد على خوفي من الشرطة واضطريت ابقى اكمل وابيع كلشي علمود ارجع ، ما اشوف غير السيارات صفت ونزلوا كومة ضباط من جميع الرتب..

هناك وعيني وگعت عليّ ، بعده هو هو نفس الشياكه والنظافة والعناية عيني نزلت ؏ حلقه إلي بـ ايده ضحكت وهمست..

- استغنيت عني علمود رضى مرتك اكيد تلزم بيها بـ ايديك ورجليك وسنونك

اشمئزيت منه ودرت عيني بعيد ما أريد احن وارجع لنقطة الصفر ، فززني صوته الي يقترب..

- اخذنه مسح للمنطقة من كم يوم وكلشي نظيف

رفع راسه يشغل جگارته ووڪعت عينه عليّ ابتسم تك خد ودار وجهة ؏ الي بصفة وكمل..

كليم- هو شغلتين شاغلات بالي وشاك بيهن بس اتأكدت منهن وكلشي گدام عيناك كامل ونظيف

رد عليّ..
- ما يجيني منك شغل ما كامل حظرة *** كليم

ربت ؏ صدره وگال..
- ولو ولو بعيني

افترقوا وصار كلام هواية بيناتهم ما اشوفه غير اخذ خطواته إلي ، طلع محفظته وگال..

- بطلين ماي بابا

گلبي لچمني وحسيت بمرورة الكلمة تحتل روحي بعده يگول "بابا" وهو هاي الكلمة ما يستاهلها شگد دعيت عليّ وتمنيت ما يشم ريحة الاطفال طول عمرة لان هضم بابا بقبرة عليّ..

مديتله البطلين بنرفزة باوعلي رافع حاجبه وگال وهو ياخذهن ويمدلي لفلوس..

- اعرفج؟

- عفــوًا!!

- ههه اعرفج؟

- لا سيدي

ضميت لفلوس بقبضة ايدي بقوة وانطيته ظهري رجع گال..

- لا تتأخرين ؏ البيت

درت اريد اجاوبه وهو كمل..
- الوضع مو تمام هنا بنتي وخطر عليج لا تلاسنين عيب

- واتعلم العيب منك؟

رفع حواجبه متفاجئ حديتي بالكلام وياه وقبل لا ينطق بشي واجفص اني اكثر اخذت غراضي وابتعدت عن مكانه اتبع خطواته وهو يبتعد لحد ما ركب السيارة مالته وراح..

جذبني شي ؏ الارض وين هو جان واگف بفضول قاتل رحت وشلته ، جانت محفظته فتحتها واشوف بيها هويته وبطاقته وفلوسه بس الصاعقة الي نزلت ؏ راسي مو هنا..

لا من وڪعت عيني ؏ صورتي واني صغيرة بس ليش؟ شنو سبب حاط صورتي بعده يريد يأذيني ويلچم بابا بقبرة عليّ ، وارجع اگول ليش اني وبابا ما أذينا ليش هيج سوه؟

ما جنت حاسة ؏ نفسي واني دموعي تصب رجعت المكاني وصافنه ؏ صورتي اتذكر طفولتي ويه بابا والفترة الاولى ويه عمو كليم وشلون چان مدللني بس بين ليلة ويوم كلشي تغير..

سديت عيوني وتذكرت كلامه..
- خلصني منها بـ اقرب وقت الزواج قرب ما اريد اشغل نفسي بهيج امور

كزيت ؏ اسناني بحقد العالم كله وهمست..
- حقيـــر

خلصت ورجعت بالطريق صادفت خواتي من شافن حالتي الغريبة تساءلن وشرحتلهن هم طغى الخوف ؏ ملامح وجهن ومن رجعنا سارة نهبطت وهم رجعت سولفتلها...

دخلت سبحت ودخلت بالفراش غطيت كل جسمي ما جاي يروح من بالي موتني كل ما اگول نسيت وتخطيت يرجع يقتحم حياتي بشكل من الاشكال احس وجع بـ گلبي وعمري كله هذا الوجع ما راح يطيب..

- لو تصير جثه گدامي ما اسامحك

همستها بيني وبين نفسي وجبرت روحي انام ، اليوم كامل بقيت متكأبة وحاسه بفراغ عظيم مغلف گـلبي رغم خواتي احتارن في سبيل اضحك واطلع من هذا الجو لكن عـبث..

ثاني يوم الصبح بدلت وطلع لمكان الشغل مالتي وجان الوضع متأزم اكثر لان دوريات الشرطة كثرانه من بعيد شفته بس شكله يخوف وجهة مطعون وعصبي وصوته يطرش وهذول الي واگفين گدامه يهزء بيهم ساكتين ومنزلين راسهم..

باوعت لمحفظته وگعدت ابيع لحد ما شفت خيال فوك راسي رفعته اباوعله همس بتعب..

- بطل ماي بابا

اريد اخنگة من يگول "بابا" انطيته البطل ودرت سحبت المحفظة راد يروح صحت..

- سيدي

دار وهمس..
- عيني بابا محتاجة شي

مديت المحفظة..
-وڪعت امس منك

اباوعله انرسمت الفرحة ؏ وجهة شمر بطل الماي وفتحها واول شي تفقدة الصورة!! طلعها وباسها دموعي نزلت بصمت ، ليش؟ ليش سوه هيج مو هو الي باعني ليشششش؟؟!!

رفع عيونه الي وگال..
- ما اعرف شلون اشكرج بابا ملكتيني الدنيا وما بيها

بدون وعي همست..
- بنتك؟

- اعز من بنتي

مرد گلبي بكلامه واحس روحي فرفحت ، تحسر ورجعها لمكانها باوع للفلوس وضحك اخذ مبلغ منهن ومده الي ، تراجعت بخطوات بسيطة وگلت..

- رجع فلوسك سيدي ما محتاجتهم

درت ورجعت لمكاني باوعتله بطرف عيني بعده واگف وصافن عليّ وترني واني منا فحطانه من البچي ما جاي افسر تصرفاته شلون سوه بيه هيج وبهذلني وهسه افعاله ما مطابقة ابدددد...

حسيت روحي طلعت من جسمي لحد ما خلصت وبعت كلشي رجعت اركض واتعثر دموعي عشرة عشرة وشهگتي شگت صدري..

دخلت للغرفة افرفر وسارة احتارت بيه تغسل وتهمس بفزع..

سارة- اسم الله الرحمٰن شبيج حبيبتي اهدي بس اهدي

- اريدددد نفسسسس ماكووو

اشهك واضرب ؏ صدري اريد اسحب نفس ماكو الكل تجمع فوك راسي خواتي حاوطني من كل جهة رادن يعرفن يساعدني ماكوو..

اباوع بعيون مليانه دموع وذعر وصوت مسرة يتردد بعقلي..

- راححح تموتت سااارة سوووي شييي وجهة صاااار اززززرك

اخر شي سمعته قبل لا يغمه عليّ شهگة دموع..
- تنفسيي رنيممم تنفسييي

بعد مدة من النوم والكوابيس فتحت عيوني بضياع ما اعرف شگد نمت وشنو الي صار اباوع خواتي نايمات وهنه گاعدات حوليه بس تحركت فزن...

سارة- يا روحي گعدتي شلون تحسين نفسج؟

ساعدني اگعد واني ضايعة اباوع حوليه بضياع هزتني مسرة وگالت بخوف..

- انتِ زينـه؟ بشنو تحسين؟

رنيم- يگول اعز من بنتي لعد ليش هيج سوه؟

سارة- منو؟

فزت دموع وگالت..
- عزا بس لا شفتي؟

نزلت دموعي وهمست بصوت بلگوة يطلع..
- انطيته المحفظة بس تدرين شنو اول شي تفقده؟

ثلاثتهن هزن راسهن بمعنى شنو؟ كملت..
- طلع صورتي الموجودة عنده وباسها!! سألته بنتك وما اعرف ليش سألت جاوبني اعز من بنتي بس ليش يعني ليش سوه بيه هيج اذا اني اعز من بنته؟

سارة- اكيد يچذب

هزيت راسي وهمست ضايعة..
- ليش يچذب وشنو مصلحته هو حتى ما يعرفني انُ اني نفسها البنت الي بالصورة ليش محتفظ بصورتي اذا هو باعني هيج دختتتتتت

صحت بالكلمة الاخيرة لازمة راسي بضياع بچيت بگلب مكسور وخواتي شاركني بدون حيلة حضنه بعض وحدة تواسي الثانية ما عدنه غير مواساتنا لبعض لان ما عدنا اهل بيهم حظ وبخت..

ثاني يوم الصبح گعدت ورحت وعيوني دور عليّ ماكو مر اسبوع وهو ماكو ، شگد حاولت انكر شعور الاشتياق بس ما گدرت شي بداخلي يريد يشوفه..

كان اب إلي بيوم من الايام ما اگدر انكر انُ اني ما شفت منه شي مو زين غير بيعته إلي وبس..

رجعت بخيبة نفس كل مرة من ايام هذا الاسبوع قبل لا اوصل واسمع لعياط واصل لراس الشارع من خوفي ؏ خواتي ركضت ارجف ، وگفت بالباب مذهولة..

عذاب واگف وحاط ايدي بجيوب بنطرونه الاسود وصافن ؏ اختي الي تتهجم عليّ وتحاول تفترسه من غضبها لولا مسرة ودموع لازماتها..

- سـااارة

الكل صارت عينه عليّ وهو عدل وگفته وعيونه اكلتني تجاهلته ورفعت النقاب تقربت حاضنه وجه سارة..

- اهدي

سارة- دخلي جوه انتِ

- بس

صاحت..
- گلت دخلللللي جوه

هزيت راسي بزعل وسويت مثل ما تريد فترة ودخلت تلوب اباوع لـ مسرة ودموع صافنات عليّ..

- شكو؟

سارة- ماكو ماكو شي لا تفكرين وهذا الخسيس تبتعدين عنه كلللللش

- هو ياهو متقربله شبيج سارة؟

- اي اي تبتعدين ونقابج ما تشيلينه گدامه بعد فاهمه؟

- اي بس شرحيلي سبب حرصج هذا!!

خزرتني ونترت..
- ومن يمتى واني مو حريصة عليجن؟!!

- ما قصدي بس تحذيراتج مبالغ بيها وانتِ تعرفين كل الزين ما راح احجي وياه ولا اتقربله

- حذرتج لا اكثر وكافي سدي الموضوع ، روحي سبحي وتعالي اكلي علمود تنامين وترتاحين

هزيت راسي ناهية النقاش ورحت سويت الي گالت عليّ ، گاعدين ناكل وهمست مسرة..

- شفتي؟

رفعن راسهن ينتظرن اجابتي..
- لا ماكو مختفي بعده

سارة- احسن روحه بلا رجعه

بلعت غصتي وهمست..
- اي

دموع- اني ولا مقتنعه هو باعج سارة فدوة لا تخزريني من زمان واني اگول اكو حلقة مفقودة بالموضوع مستحيل كل حبه والدلال هذا الها ومن هي صغيرة عند ابوها يجي يبيعها بهاي السهولة لا ولأتعس مكان بالعراق خو يحطها بميتم

مسرة- تزوج اكيد راح يفضل عائلته عزيزتي وبعدين جواب سؤالج الاخير باعها علمود يربح بيها فلوس بينما لو حاطها بالميتم ما راح يستفاد شي..

رنيم- بس عمو مو انسان مادي

سارة- هم گالللت صخام عمو من عمه لعماج شنو تفسرين كلامه مو انتِ السمعتي وگلتي هذا الكلام ست رنيم لو اني غلطانه؟

- اي بس هسه دخت اكو شي خطأ سارة حاسة بهذا الشي من بعد ما شفته تغيرت كل نظرتي اله اكو شي بداخلي يصرخ بوجود خطأ كبيررررر ، مع ذلك هذا ما يمنع انُ اني كارهته وحذرة منه

مسرة- تكونين اكبر غبية اذا خليتي يعرف انتِ منو واني من البداية كتلج نغير بالاماكن علمود لا تلتقين بي وتحنيله بس انتِ مصرة

دموع- بنات ؏ كيفكم وياها تره هي هم حقها

سارة- انتِ نجبي وسمعيني سكوتج

گامت دموع زعلانه من سارة واني التزمت الصمت وما حبيت اناقش اكثر من هيج ، ثاني يوم رحت لنفس مكاني مالي نفس بشي..

ما اشوف غير سيارته صفت واصدقائه يتحمدوله بالسلامة احس گلبي انتفض وعيوني غورگت بالدموع ، شبي؟

اباوعله يفر براسه منا لمن وگعت عينه عليّ ابتسم ورجع يحجي ويه صديقة..

لحد نهاية اليوم..

صار ظل فوك راسي رفعته واشوفه واگف مبتسم..

كليم- شلونج بابا

- تفضل سيدي محتاج شي؟

حك طرف خشمه وابتسم تك خد ، اشر ؏ بطل الماي وگال..

- ممكن ماي؟

طلعت البطل ومديته اله واخذت لفلوس ساكته بداخلي خوف ما اعرف ليش..

كليم- صوتج!

باوعتله واحس گلبي راح يطفر من مكانه خوف ؏ توتر انتظره يكمل ، بلع ريگ وهمس بصوت متروس حنية..

- صوتج يذكرني بنتي

- ليش وينها بنتك؟

دمعت عيونه ، ضحك يتلافى الموضوع ، مسح ؏ شواربه وگال..

- يصير اشتري الباقي منج وتروحين للبيت؟

- ليش؟

- بابا المكان خطر عليج اشتريهم ورجعي ها؟

- ما اريد شفقتك سيدي اصلًا ما بقى شي

- مو شفقة بنتي بس المكان خطر وخاف يمسج شي

- راح اغير مكاني بعد ما اجي لهنا

انتفض..
- لاااا

- خير؟!

- لا لا تغيرين مكانج ابقي ؏ الاقل گدام عيني

- عفوًا؟!!!

- هسه شکلتي ما تبيعيهن الي؟ اريد الماي لـ اصدقائي

تنهدت وهزيت راسي موافقة اخذ الماي وصاح لواحد ينطي الهم وبعدين اخذ لكلنس وهمس..

- يلـه روحي ودير بالج من الطريق گبل للبيت

رحت امشي بسرعة وكل ما التفت اشوفه بعده بمكانه وصافن عليّ لحد ما اختفى وبقيت امشي اكمل طريقي للملجأ..

ما اشوف غير سيارة وگفت معترضة طريقي روحي صارت بعمو كليم من نزلوا ثنين ضخام ملثمين ركضت ارجع خطواتي اله واصرخ..

- عمووووووو

احس روحي فرفحت واصوات اقدامها تنسمع وراي اتعثر بخطواتي واركض ؏ امل الحك ؏ نفسي بده المكان يتضح وهو واكف دخل لسرور لروحي صحت بحس مفرفح...

- عمووووووووو

انتفض ؏ الصوت اباوعله عيونه جحضت وبهت بنفس اللحظة انشلت من الارض وانسحب من ؏ وجهي النقاب وانحط شي ؏ خشمي بس تنفسته بعد ما حسيت بشي...

••••••••••••••••••••••••••

اتمايز عيوني بالمرايه وحدة خضرة والثانية زرگة وهذا سُر تميزي مثل ما يگول عمو كليم ، ضحكت من اجت عيني بعينه وهو يباوعلي رافع حواجبه..

- عمو

- روحه لعمج

- انتَ حباب

ضحك بدون ما يجاوب نزل عيونه يشتغل ؏ الحاسبه رحت اگعد يمه وحطيت راسي وياه اريد افهم شي ماكو..

- شنو هاي عمو

سحب اصبعي من الشاشه وجاوبني وهو يرجع يشتغل..

- شغل بابا

- ضوجة

- نزلي يم امي

- هم ضوجة بيبي لو تصلي لو تسمع اخبار بالتلفزيون واني اضوج

- روحي راجعي دروسج

- راجعت عمو

تنهد وعاف الشغل يباوعلي..
- عندي شغل بابا اخلصه واطلعج

رفعت اكتافي..
- ما اريد اطلع

ابتسم بهدوء ومسح ؏ خدودي بخفه..
- شنو تردين

- تسمعني قصص حلوة وتحجيلي عن بابا ونلعب سوه

تنهد واشوفه محتار ما يريد يرفضلي طلب وبنفس الوقت احس الشغل مالته ضروري..

- انتظرك تخلص

- ما اتأخر عليج خوش بابا؟

گمت من مكاني ونمت بسريره حطيت ايدي جوه راسي اتابع حركاته شنو يسوي! وهو مندمج ينقر ؏ كيبورد الحاسبة بسرعة بديهيه ، جان مانعني من التلفون والتلفزيون اله وقت مُحدد بسبب انُ يضرن عيوني وهم الدراسة ما يقبل اقصر بيها..

بدت عيوني تنسد رغم جنت احارب النعاس علمود لا انام وابقى گاعدة بس ؏ غفلة نمت وبعد ما حسيت بشي..

فتحت عيوني واول شي صار بوجهي عمو كليم عدلت گعدت احاول استوعب ، جان گاعد ؏ الكرسي قريب من السرير ومچتف ايدي لصدره وغافي..

طالع الصبح!! يعني اني نايمه هنا من امس وبسببي ماگدر يگعدني وينام ، كسر خاطري وحسيت بالندم لان اضغط عليّ فوك شغلة..

تحركت انزل من السرير وصدر صوت فززه ، فرك وجهة بقوة وهمس..

- صباح الخير رنيمه

عيونه حمر وداير مدايرهن سواد من التعب وقلة النوم ، رديت..

- صباح النور عمو

ابتسم وكرص خدي..
- غسلي ونزلي راح اجهز الريوك

طفرت للحمام وصحت بصوت..
- انتظرنييي اساعدككك

وصلني صوت ضحكاته وبعدها نسد الباب غسلت وفرشت اسناني ورحت لغرفتي بدلت وكملت ونزلت اركض اريد اساعده..

وگفت متفاجئة من شفت عمو كليم لازم اخو من ياخت قميصه ويهز بي واسمعه يهمس..

- لك الله ميززك وسواك بشر وانطاك عقل يا حيوان ليش تخليني اهينك؟

- شنو غايتك منها تريدها الك لو شنو؟

عض شفته وضربه بخفة ايده راشدي وهمس بروح محترگة..

- يلعن عقلك انعل ابو تفكيرك الوصخ ياكلب لا تلوثها بـ افكارك

راد يحجي عمو عليم وصارت عيونه عليّ وضحك بخباثه..

- اذكر القط يقوم ينط هههه

دفعه عمو متنرفز وصاحلي..
- تعالي بابا

رحت يمه گعدت ؏ الكرسي وهو صار يحط الريوك گدامي ، مشى عمو عليم للباب وقبل لا يطلع گال..

- وكلها وكلها خلي تكبر بسرعة وتفيدك

ما حسيت غير عمو شامر الخاشوگة عليّ اجت براسه بس يا جبل ما يهزك ريح طلع يضحك ، استغفر عمو وگعد يشرب بالچاي وسارح..

- عمو

- ها بابا

- شبيك؟

هز راسه بمعنى ماكو شي ، مشت الايام بعدها رتيبه بدون تفاصيل مهمة سوى ألحاح بيبي ؏ عمو بالزواج من بنت اختها الامر إلي احدث ضجة بالبيت بسبب رفض عمو لهذا الزواج..

وزاد الطين بلّه كلام عمو عليم الواضح بوجود وحدة داخل گلب عمو وهذا يخلي يجن ويوصل بيهم للضرب والغلط وكان عمو عليم يستفزة بضحكاته وبعد نهاية كل مشكلة يهمسلة بنفس الجُملة..

عليم- جاي تأكدلي شكوكي يا ابن امي وابوي

ثوران ، غضب ، عدم تفاهم ، اضطراب!

وبعد كل هاي الاحداث ساء الامر من ناحيتي والنظرات والتعامُل اختلف وبالاخص من بيبي إلي بعمري ما توقعت تأذيني..

بيوم جنت گاعدة العب بالصالة يمها وكل شوي اباوعلها وارسللها ابتسامة على آمل ترجع تحبني مثل قبل وتتقبلني..

- گومي صبيلي چاي

باوعتلي احاول استوعب رمشت ودنگت راسي بدون ما اناقشها بصعوبة الطلب ركضت للمطبخ احاول انفذ طلبها..

جنت جاهلة عن الخطورة لكبيرة بالامر وجاهلة اكثر عن خطورة الوحوش العايشين ويايه ، مشغولة اسوي الجاي إلي صخمت ولطمت بي وبحركة سريعة شفت القوري يوكع عليه هو والماي الحار..

صرخة فرت مني وصلت عنان السماوات ، افرفح واركض انفخ بشكل عشوائي احاول اخفف من إلم احتراق جسدي الهش الضعيف..

اصوات متداخلة ما اعرف مصدرها لـ اي وحش من وحوش هذا البيت إلي تسبب بهاي حالتي ، لحظات واحتضن ضعف جسمي جسد ضخم قوي رفعت عيوني بصعوبة اشوف بسبب الدموع..

لكن وقبل لا اوكع بـ ايده جثة لا حولة ولا قوة شفته منقذي ابوي الروحي محتضني وعيونه متروسه ذعر وغضب همستله قبل لا اغيب عن الواقع..

- لا تعوفني بابا

..

وتستمر الحكاية.. 🚬♣

راح استمر بالقصة لحد بارت 10 اذا بقى التفاعل هيج راح اضطر اوقف القصة لان ماكو شغف للكتابة بس حَـبيت انطيها فرصة وما اظلمها 💙