بقلمي : زينب صلـاح 🧡
لـ روايـة ﴿ دروب الإندِثار ﴾
في الـ part 25 ♡♡
لا تنسون التصويت + متابعة للحساب + التعليق بين الفقرات ☘️
مِثل الجگاره بكِل وكِت تنراد
نعرف مضرتَك و نحبَك عناد .
•••••••••••••••••••••••••••♕•
لـيث- قسورة تعال دلك راسي ، ايهم جيبلي ماي عطشااااان
هُمام- شبيك ابني؟
لـيث- اوف خالي حبيبي غطيني بردان
نجلاء- يمه جيبله ماي وطفي السبلت برد
خزره قسورة وگام ينافخ طفه السبلت وجابله ماي..
لـيث- شربني ما اگدر اتحرك تعبان
قسورة- لـيث اشرب لا اصبه فوك راسك
نزل راسه بحزن
- شفتي امي شفتي!! اني طالع من الموت وشوف هو شلون يعاملني
نجلاء- لك قسوورة لا تضوجه
قسورة- صار غاليتي ، تعال لك اشرب
شربه واحنه ميتين من الضحك بس خلص كفخه ؏ راسه..
لـيث- امييي ضربني
عمة خزرت قسورة وبوست لـيث..
- يغار منك حبيبي لا تزعل
وهو يضحك بخُبث ويحضن بعمة ، يباوعلهُم
بنص عين!!..
لـيث- خالييي
كليم- گول ابني
- يابه مشتاقلك
ضحك عمو وراح حضنه فرحان برجعته..
لـيث- بَروح جدي بچيت عليَّ؟ اكيد اكيد بچيت شعندك هوَ لـيث واحد وما يتعوض
ايهم- صح عُملة نادرة
لـيث- اش اش معليك لا تغار اني وخالي
ايهم- شو ولي شگد يلغي
كليم- ولكم عوفوا لحد يحاجي ، اي ابني شلون ما اضوج عليك غير البيت مو حلو بدونك
لـيث- يعني بچيت؟
قسورة- يا يابه شگد لح لح
ايهم- البُلب الفتان ارتاحينا منك محد زعل اصلًا ما حسينا بغيابك
لـيث- اتذكر بالمُستشفى واحد گال كل يوم انام بسريرك كأنو أنتَ ايهم؟!!
ايهم- انچب
كليم- هههه عوفوا ما تگدروله
هُمام- لسان دلالات اريد اغم المُستشفى التقبل بيك دكتور
لـيث- مو اغردلك زوج المسيحية
هُمام- تاج راسك لك حيوان
لـيث- هه اصبغ اصبغ تخاف منها مع الاسف راحت الزلم الخشنه
گامله خالو وهوَ صار وره عمو..
هُمام- الادبسز
لـيث- علمني علمني ولو ما فارغ من المسيحية
هُمام- بَـس شوي كليم خلي اربي
كليم- تشُك بتربيتي مع الاسف ما ترجيتها منك
هُمام- طاح حظ هيج تربية خوش
ضحك لـيث متونس ؏ غضب خالو! اشتاقينا
لسوالفه ومرادده وياهُم
روحه حلوة ، راح خالو واخذ سارة وياه واحنه بقينا لان الفجر نطلع للنجف وغراضنا اني ومسرة ودموع هنا
صعدت لغرفتي بعد ما عمو رجع نقل الاغراض من بيت خالو الها ، باوعتله صاعد ورايه ومبتسم ..
- مُمكن سـُؤال؟
كليم- مُمكن ليش مو مُمكن
اشرت داخل غرفتي وضفت
- ليش دزيتهن وهسه رجعتهن؟
ضحك يورث جگاره
كليم- عقلج هسه مؤلف مسلسل ؏ اساس ما اريدج ومن هاي الامور
بَـس الحقيقة اني ما اريدج تحتاجين شي حتى لو أنتِ بعيدة ، بـذاك الوقت ما چانت علاقتچ بـ هُمام قوية وخفت تحتاجين شي وما تگدرين اطلبينه لذلك دزيتهن الچ
ابتسمت..
- بعد ما اروح ابقى هنا
- يا ريت رنيمه يا ريت ، أنتِ ما تعرفين شـيصير بيّ من ترحين ما تعرفين الليل شلون يمر عليّ وأنتِ مو يمي احم اقصد ببيني وتحت جناحي
نزلت راسي خجلانه ، مسح ؏ راسي
- ارتاحي ورانه طريق طويل جوهرتي
- تُصبـح على خير
- أنتِ الخير بناتي
دخلت وهو راح ، غميت گصتي ناسيه اسأله
نبات لو نرجع؟ بَـس للاحتياط جهزت جنطه صغيرة خاف نبات
ورحت نمت متحمسة للقاء! بصعوبة گدرت انام وما فزيت إلا ؏ صوت الباب وعمو يصيح ...
- بناتي يـله بابا گعدي
طفرت مرعوبة خاف تأخرت فتحت الباب
فتح عيونه ودار منطيني ظهره ، بسرعة گلت
- تأخرنا عمو
- لا بابا لا بَـس گعدي صلي وخلي نتوكل
عضيت شفتي بفشلة..
- اسفه عبالي تأخرنا
- وأن؟ ممنوع اطلعين هيج بعد فكري لو كان الطارق واحد من ولد عمتج ما يصير بابا بهاذي الملابس والشعر حرام
لعد هو دين لو طين استغفرالله
- هههه ما تنعاد
هز ايده مبتسم..
- لچ يلـه دخلي
دخلت غيرت منامتي ولبست الشال ، گعدت البنات صلينا وبدلنا وطلعت ؏ صوت عمو بالصالة
كليم- جاهزين؟
- اي عمو بَـس احنه نبات؟
- اني وأنتِ اكيد بَـس نشوف هُمام
طلعنا بعد ما ودعنا الكُل چان خالو يم سيارته واگف هو وسارة..
كليم- مَبيت لو ترجعون؟
هُمام- الشغل لفوگ راسي ما اگدر واصلًا ما قبلوا ؏ الاجازة غير يوم واحد تعرف صارلنا هواي گاعدين
كليم- احنه نبات
بهَت خالو يباوعلي ويباوع لعمو رَبت عمو ؏ كتفه
- نظراتـك خيي شنو ما تعرفني؟
- مو بهذا الوضع ابو ريم!!
- وعد ووعد الحُر دين منا لمن نرجع هي بنتي
ضحك خالو مستهزأ
- ومن ترجع؟
- اي؟
- اهووو كليم بات اذا تريد بَـس رنيم ترجع
- واني گلت نبات
سارة- زين ليش ما تخلون رنيم هي تقرر احسن مو؟
بهاي اللحظة ردت استفرد بسارة واشبعها ضرب
لان ثنينهُم داروا عليَّ يخزرون بتحذير!
وگفت وره عمو اتلافى نظراته بعد الي راح احجي
- عمو بعُمره ما ضرني وعُمري خلصته ببيته وگدام عينه وايام اخاف واتمرض او احلم حلم مو حلو وابقى بغرفته وتحت سقف واحد وما ضرني لا بكلمة ولا بنظره!
اريد ابات اريد ازور بابا اريد اگعد بضريح امامي اريد تعبي يزول ما اريد ارجع بسرعة خالو واذا ما تطمئن لان وحدنا تگدر ترجع وحدك وخلي البنات ويايَ اني اثق بيّ
ساد الصمت وما فزيت إلا ؏ سدت باب السيارة بقوة باوعتله ضايج ، دمعت عيوني وحزت بخاطري من نتر ..
هُمام- يلـه سارة ورانا طريق جيبي خواتج بسرعة
مسح ؏ راسي عمو واشر ؏ سيارته ..
- صعدي جايچ
رحت واباوعله يحجي وياه وخالو متنرفز
رجع مبتسم گرص خدي وگال
- يغار مني ههههه
ابتسمت مُجاملة وسكتت ، سندت راسي ؏ الجام واباوع للطريق واني سارحة بـ افكاري شغل لطمية باسم الكربلائي النزلت ؏ الجُرح
نسيتك ثواني...خيالك إجاني
إخذني الشاطي حبك...أريد أعطش و أكتبك
خيالك إجاني
ذكرتك من نسيت و بيّن اخيالك...أثاري انت العزيز الخالني ببالك
حاولة أستقر أسأل عن أحوالك...لقيت النهر قطره بعين شلالك
جمالك قصيده...مينحز وريده
نهر آني اعله دربك...أريد أعطش و أكتبك
خيالك إجاني
دموعي تجري واشهگ ما حاسه بنفسي
صف عمو السيارة ونزل فتح الباب من جهتي
مسح دموعي وغسل وجهي
كليم- صلي على مُحمد بناتي الحلوة اش اش كافي انعل هُمام وعشيرته بچه عيونچ الحلوة
ما حَـسيت غير مد راسه بقلق
هُمام- شبيهااااا؟
كليم- اكفخك تكفخ اذا بعد تزعلها لا تتحيون هُماااام
هُمام- باوعيلي بابا هاي علمودي البچي ههههه هيچ اني عزيز عليج وما ادري؟
لمني لصـدره واني الله ذب عليَّ بچي والشهگه ما تقبل تروح وعمو صار ينافخ ويخزر بخالو هُمام
- زينه اني
هُمام- تجين ويايَ؟
خفت ارفض وبين هذا الشي لان بسرعة بچيت خايفة ارفض ويعاملني نفس مساع وخاف اقبل ويزعل عمو
گال بسرعة يمسح دموعي
هُمام- ما اضوج والله تردين ابقي هنا حبيبتي
نزلت راسي احس دخت
- اني بَـس من اكون ويه عمو احَس بابا موجود احب احس بابا عايش ويايَ بوجود عمو
رفعت راسي واشوف عمو دموعه تنزل ؏ خدوده بسرعة ابتعد يمسح بوجهه وخالو باهت مقهور
خفت خفت كسرت عمو بكلامي وعيوني تعلقت بيّ
هُمام- هيچ تحبينه؟ تنطينه مقام ابوچ؟
هزيت راسي
- مو اني بابا بعد وفاته زارني بالحلم وگال كليم ابوچ الثاني من هذاك اليوم ولحد الان اني اشوف بابا بوجهه بتصرفاته وتعامله الرقيق ويايَ كأني فراشة يخاف يلمسني ويجرح جناحاتي
عمو شي مُقدس بحياتي واسفه اذا كلامي يزعلك بَـس هذا ابويا الرَوحـي
- هنياله
- وهنيالي بيـك خالو اني محظوظه لان عندي خال حنون مثـلك
ضحك وباس جبيني ، دار وصاح
هُمام- يلـه خيي نكمل طريقنا ، واني اروح اطمن سارة تلگينها ميته من الخوف
راح وعمو صعد ساكت بهدوء مُريب كسرته
- شغل اللطمية
- تبچـين وينهد حيلي
- ما ابچي وداعتك بَـس شغلها
تنهد بتعب وشغلها ومع الاسف ما گدرت الزم نفسي درت راسي ؏ الجام بحـيث ما يشوفني
ودمعي يوكع بدون صوت!! لحد ما شفت ايده مادها وبيها كلنس
كليم- اهدي وكافي تعبتيني
- تعبتك؟
- حزنچ ودموعچ يتعبني ضحكي بابا ضحكي وخلي العافية ترجع
- اذكر بابا
- اني ابوچ
ابتسمت رافعه حواجبي بدهشة !! بسرعة باوعلي ورجع عيونه ؏ الطريق يضحك
كليم- حالات خاصة
- شلون يعني؟
- يعني .. من تريدين اكون ابوچ اكون من تردين صديق تسولفيله اكون ومن تردين اخ تشكيله من الي أذوج اكون ومن تردين ام تحجيلها اسرارچ اكون ومن تردين! اكون حـبيب اكون واني الممنون
بلعت ريگ وما اعرف شلون نطقت
- وزوج؟
فتح عيونه مصدوم مني واني مصدومه من نفَـسي حاول يدَارك الموضوع وينتبه الطريق ، تعرق جبينه وصار يمسح ويرجع!! بلع ريگ وگال بصوت بالكاد يطلع..
- اكــون
- هـا؟
- زوجچ اكون زوجچ
عضيت شفتي واحَس اني مو اني
- موافقة
صرخت مرعوبة من لزم بريك بنص الطريق والسيارات صارت تضرب هورنات والناس تصيح
شوي وانفتح الباب بسُرعة وخالو وجهه باهت واصفر من القلق!! صاح مذعور
هُمام- شككككو بيكُم شييي؟
اباوعله بعالم ثاني ولا يم خالو اصلًا ما يسمعه باوعلي وگال
هُمام- شبي؟ احد خابره؟
- هـا؟
- شبيچ بابااااا رحمة للكائنات ركزززي ولكككك كليمممم
كليم- هاا؟
- گرت عينك خرببب بعشيرتك صف السيارة لك شعلونا بالهورنات
راح وعمو حرك السيارة وما صفها كمل الطريق وتلفونه احترك بالاتصالات وما جاوب!!
- متأكدة؟
سكتت خجلانه ضحك يمسح ؏ وجهه يريد يركز بالطريق واني احس وجهي تطلع منه نار گد ما خجلانه؟!!
سندت راسي ؏ الجام مبتسمه وما حَسيت ؏ نفَـسي غير رايحه بسابع نومه !!
بين النايمه والگاعده اسمعه يگول لـ خالو
- لا تصير سَيد براسي هُمام
هُمام- هو غير أنتَ اجيت تموتها وياك كليم لا تصير ارعن شنو تريد تراهق تالي وكت؟
- لا تحشر خشمك
- ما ناوي تحجي؟ شبيكم؟
- من نرجع سد الموضوع
- والله اذا الي بالي
- اي شتسوي؟
- من اعرف تشوف شسوي
فزيت ؏ رگعة الباب عمو فتح الباب ونزل سب بخالو ورجع متنرفز
- شبي خالو؟
- ينعثل وحده
فركت عيوني اريد استوعب بعدها دوخة النومه ما تقبل تروح ، حَـسيت بيده ادخل شعري الطالع
كليم- يلـه وصلنا
نزلت ورحت يم خالو والبنات واني احَس بعدني نعسانه لمني خالو لحضنه
هُمام- هـا حبيبي شبيج؟
- بعدني نعسانه
- ههههه هسه تغسلين وتروح
كليم- شوفلنا فندق زين خليهن يرتاحن بعد وقت
هُمام- امشي نكمل الاجراءات گعدن هنا لا تتحركن
راحو واحنه بقينا
سارة- شصار وياكم بالطريق؟
- هـاا؟
سارة- رنيم استوعبي !!
- هوَ ..
صرت اسولف الصار وهنَّ فاكات حلگهن بصدمة!!
من خلصت ضحكت مسرة تكمم حلگها لان گاعدين بمكان عام !!
مسرة- مو گلت تحبه! گلت لو ما گلت؟
دموع- أنتِ كفو كفو
- انچبن يلـه ترا وافقت علمود لا اكسر گلبه
سارة- مصدگين
- حتى أنتِ ساااارة ترا والله علموده يعني هوَ خطية
سارة- اممم صَـح
- هففف والله والله شبيچچچ !!
سارة- ووجع مو اگلج مصدكه وصَـح بعد شتردين؟
- عبالك تستهزأين!؟
سارة- لا
مسرة- هههه
- نچبي مسرة ، سارة صيحي بيها اضربها ؏ حلگها والله
دموع- مو وياچ دا نضحك ؏ غير شي
- أنتِ وتكچ دا تضحكن عليَّ الادبسزيات مزاعلتچن اصلًا
سارة- اش كافي عَيب صوتچن طالع!
سكتت بَـس مغندبه ومكتفة ايدي اخزر بالرايح والجاي! شوي ورجعوا ياخذونا للفندق وطول الطريق هو وخالو يسألون شنو بيه؟
واني ساكته واخوزر بيهُم ، ضحك خالو ..
هُمام- عوفها اجتها الحالة
- عزااااا حتى أنتَ خالو؟
- يا علي يا ابو الحَسن شمسَوي؟
- دا تستهزأ بيه مثلههههههن !! عمووو مو عَيبب؟
كليم- اي بابا
هُمام- هي ظلت بيها عمو وبابا ما تسكتون لا اگعد اقسملكُم هسه
كليم- انلصم حبيبي
خزره خالو واخذ البنات لگدام خازرنا
كممت حلگي اضحك ؏ سوالفه
- هههه يغار !!
كليم- نحيس بزعني اجته من الله وانفرد بيّ ابو لسان زفر
دخلنا للفندق طلعوا ماخذيلهُم غرفتين وحدة الهُم ووحدة النا للامان
دخلنا سبحنا ونمنا تعبانات علمود من نگعد بَـس نغسل ونتغدا ونطلع نزور الامام وبعدها نطلع للمقبرة
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••
ㅤㅤㅤ
ســاࢪة•
فزيت على صوت التلفون سحبته وجاوبت بدون ما افتح عيني
- الووو
بهمس
هُمام- نايم حبيبي
- امممم
- ام عَيون شهل
- امم
- مدامتي الجميلة
- اممم
- وليدي صحصح مو احاجيك؟ مو صوتك الناعس بهذل احوالي
- هُمااام
- انفاسـه
- اممم شنو تريد؟
- گومي غسلي ورجعي اتصلي لا اجي انعل واشعل شيب الخلفوچ لچچچ
ما سمعت بَـس الطوط طوط باوعت للتلفون وغميت نفَـسي هاي اني شبيه !! غسلت ورجعت اتصلت بسُرعة جاوب
هُمام- مصحصحة لو لا؟
- ههههه ويـاك
- بعد اذا تفتحين خط وأنتِ بهاي الحالة اشگچ
- استحي هُمام استحي المستحه لو بفلوس چان اشتريتلك
- واشتريلچ فد مرة توصاله
- شنو؟
- توصاله تكملين بيها هدومچ لمشلتحه لمطلعتلي تظاريسچ كلها
- أنتَ هم خجلت مرة بحياتك؟
- لا
- مو اگول زايعها كُلش ابو الدكتورات الصلف
- اممم عقيق قصدچ
- هُمام اذبحكككك لا تنطق اسمهااااا
- خوش خوش يلـه گومي گعديهن وبدلن ننزل نتغدا ونروح نزور
طفيته بوجهه بدون جواب ، شوي واجاني مسج منه خليت ايدي ؏ حلگي اضحك مصدومة لأي درجة من السقوط واصل ..
- ابو عَيون شهل بَـس اشوفك اشگك
شگد صلف شگد؟!! رحت گعدت البنات بالقوة سحلتهن غسلن وطلعنا گالن بالامام نصلي
طلعنا لگيناهُم واگفين بالباب لان رنيم بلغتهُم
نزلنا نتغدا وهُمام كُل شوي ذاب كلمة ادبسز ومرات يعوفني ويتحرش بـ كليم ورنيم بزعهُم
كليم- هسه اخذها نروح نتغدا بمكان ثاني
هُمام- اي اي هوَ أنتَ تريد حجه دينك نص ردن
كليم- افضل من ماكو
هُمام- شنو قصدك أنتَ؟
كليم- الفهمته ابو الهَمم
هُمام- بابا عيدي قراراتچ ترا هذا ابو نسوان بَـس گدامج يصلي ويصوم دا يغشچ
مسَج كليم ؏ شواربه وگال مبتسم
- اه؟ تصدگين رنيمه؟
ابتسمت اختي مثل الثوله وجاوبته خلت هُمام يشيل روحه ويدگها بالارض
رنيم- لاا أنتَ خوش رجال واحب ثقافتك الدينية
هُمام- حبتچ حية يا زماله
كليم- هههههه ما تگدرلي
ضحكته وقوره وهادئه ، صار ياكل متجاهل هُمام وهوَ من وحده مل ورجع عليَّ
- شنو هذا حجابچ؟
- شبي؟
- نزعي بابا نزعي
حَـبيت اضوجه گتله
- والله؟
- لچ لچ اخخ سارة روحي للحمام عدلي لا اعدل راسچ براشدي
- ريلاكس بيبي
فتح عيونه يرمش بسُرعة خزرني ، گمت للحمام واني اضحك عليّ وعلى سوالفه
بسرعة عدلت حجابي زين علمود بعد لا يتخربط ويطلع شعري يخزيني هُمام
من رجعت چانوا يدفعون بالحساب ويردون يطلعون البنات راحن يغسلن واني بقيت يمهُم گدام الباب
هُمام- البنات يبقن وياكم انتو مو امان بَـس اعوفكم ترجعون متزوجين
كليم- هههه الله يهديك ابني
هُمام- هاز كاروكي وابنك؟ هااااا هازززه وما ادري؟!!
كليم بَـس يضحك وهوَ مطعون وجهة من القهر
رجعن وگبل طلعنا للامام
دخلنا للتفتيش الرجال وحد والنساء وحد وبس طلعنا لگيناهُم گدامنا
اخذ ايدي هُمام نمشي وعيني ؏ القُبة
عيوني مدمعة واحس بروحي فراشة بحضرة الامام الكرار ابو الحَسنين
نزلت دمعتي ، غمضت عيني وحجيت بداخلي
- أنتَ ابو الايتام واني يتيمة مظلومة مسلوب حقي وبراءتي اريدك تاخذلي حقي من الي مالي سلطة عليهُم مولاي
فتحت عيني من حَـسيت بيّ يضغط ؏ كفي
تقرب باس راسي ومسَح دموعي !!
- عندي امل تحجيلي سارة ايدي مربوطة اريدچ تحجيلي ووعد اني اتصرف
- راح تكرهني
عقد حواجبه مستغرب
- اكرهج؟
نزلت راسي بدون كلام رجع استرسل
- عمومًا الايام جايه ومتأكد راح اخيب املچ لان واضح بعدچ ما تعرفين منو ابو الهَمم
ابتسمت..
هُمام- يلـه روحي زوري
باوعت كليم يسولف ويه البنات ويأشر الهن ويشرح وهنَّ مندمجات
ياوعت للمكان من حولي ، نطقت واحَس من رهبة وجمال المكان نطقت او گلبي چان هاوي هذا الشي ونطقه عن طريق لساني
- اريد اتشيع
ما سمعت منه ، باوعتله عيونه مدهوشه
ابتسمت واخذت ايده
- هُمام اريد اتشيع .. هسه!!
- متأكدة هذا مو لعب ساࢪة؟!
- متأكدة من فترة بالي الموضوع قريت واطلعت ؏ الكتُب العندك وهوايه بحثت بالتلفون وهسه من جمال المكان وحَـسيت الوقت المُناسب لمثل هيچ شي
عض شفته محتار شيسوي باس جبيني وباس ايدي واني متت خجل من الناس تباوع !!
- يرحلچ فدوة بنات المسَيح
ضحكت مكممة حلگي وهو سحبني وين كليم والبنات سولف الموضوع يريد كليم يكون موجود وياخذنا لـ شيخ هنا
كليم- ما شاء الله بابا من الظُلمات للنور الله يبارك بيچ ويثبتچ ؏ طريق مُحمد وآل مُحمد
- شُكرًا
البنات لازمات ايدي وطايرات من الفَرح
اخذونا لـ شيخ صار يحجي قصص ووجهة نوراني
يسولف ويتأكد مني اكثر ومن اسبابي واني اجاوبه ؏ المعلومات الي قريتهن بالكتُب لحد ما طلب مني اردد وراه
وسويت بالاخير مسَح ؏ راسي وگال بوقور ..
الـسَيد- بارك الله بيچ بنتي طريق النور ان شاء الله
سحبني هُمام گدامهُم لحضنه واسمعهُم يحجون اخر شي من عرفه زوجي اتفاجأ وگال
الشـيخ- شلون هيچ ابني باطل الزواج
شفت الضحكه تختفي وحتى ايدي عافها باهت
هُمام- ليش؟
گعد الشـيخ يوضحلنا وهُمام انطعن طعن من القهر عرفت السَبب!!
واكيد هسه يفكر من باسني بَـس الرجفني سؤال
الشـيخ- متممين زواجكم ابني؟
هُمام- لا بَـس..
باوع لـ كليم وتقرب من الـسَيد هامس بـ أذانه وهو يهز راسه بـ اي فاهم..
- لا لا انتو ما تدرون فعادي ابني جدًا عادي لا تفكر بيها
هُمام- رحم الله امواتك طمنتني شيـخ
ضحك بوجهه البشوش وگال
الشيخ- اعقدلك من جديد بما أنُ هي تشيعت؟ لو بطلَت؟
- لا لا بطلَت شنو ، ها سارة موافقة؟
- اي
الشـيخ- وعائلتج بابا؟
- هاي عائلتي ما عندي غيرهُم
هزهز راسه بقبول وبدأ يعقدلنا من جديد باس راسي من اعلنا زوج وزوجة
دخلنا زرنا من بين دموعي وجمالية المكان گدرت اسمع صوت رنيم وهي تهمَس
رنيم- أنتَ ابوي لان اني يتيمة بحُبك لـ فاطمة مولاي دليني الطريق الصَـح وخليني اتخذ القرار البي صالح اليَّ
مررت ايدي ؏ ظهرها
- امين
صلينا والبنات گعدوا گدامي يقرن قرآن منظرهن يخبل يخبل تمنيت تلفوني يمي واصورهن بَـس گلت ما افوتها واطلب من هُمام نصور
طلعنا وفعلًا طلبت من هُمام نصور وهو ما گال لا صورنا صورتين وحدة اني وخواتي ومثل عادتنا المهن لصدري تلاثتهن ووحدة كلنا ويانا كليم وهُمام!
صعدنا بالسيارات وانطلقنا للمقبرة قبل الليل
چان اصعب الطُرق بگد ما بي لهفة بيّ صعوبة اللقاء من بعد كل هذيچ السنوات
نزلنا والمقبرة بيها رهبة مو طبيعية !! دموع بچت وخافت ما قبلت تنزل بقيتها هي ومسرة وقفل هُمام السيارة عليهن
اني ما گدرت اترك رنيم وحدها اعرفها راح تنهار وتحتاجني اكون وياها بهيچ موقف تحتاج اسندها
كليم- اني وياچ
رفعت راسها تباوعله عيونها تصب وشفايفها ترجف دارات وجمدت عيونها ؏ صورة كبيرة بصف قبر صرخت وركضت توكع وتگوم كليم وهُمام يردون يسيطرون عليها ماكو شمرت روحها ؏ قبر ابوها وصاحت تعاتب
رنيم- يا حبيبي يا حبيب رَوحـي مشتاقتللللك بابا گوم استقبلني گوم شوف شسووا برنيمك گوم لااا تبقى ساكت سكوتك ما يروي لهفتي بابااااا
اباوعله بالصورة بعده شاب صغير ضحكته تشبه ضحكة رنيم وعيونه خضر يخبلن كلهن حياة
گعدت يمها امسح ؏ ظهرها
رنيم- سارة حاجي خلي يجاوبني مو اني تعبت والله ليش هيج يتعبني بابا حنووون ما يحب يتعبني ليش هسه ما يفزعلي
والله سارة چنت من اتمرض هو ليله ما ينام ويتلوع عبالك الوجع بيّ لعد هسه ليش ما يگوم اني مو بَـس مريضة! اني متعوبة مكسورة الدنيا كفختني بما بيها الكفاية محتاجتتتتته
- يسمعچ يسمعچ سولفي وياه وكافي بچي
ضحكت من بين دموعها واشرت ؏ الصورة
- شوفي يخبل شحلاته بسرعة بسرعة اخذه الموت مني والله اني ما شبعت منه بعدني حتى ما ادللت عليّ وراح كُلشي ما ارييييد بَـس اتمنى شوفته اريد اشوفه واخدمه عُمري كُله بَـس خلي يرجعلي ضعت خلافك بويه ضعت
كليم منطينه ظهره وبَـس اكتافه تهتز دليل ؏ بُكائه وهُمام حاط ايده ؏ راسه وصافن بالصورة ، عَيــونه حُمر بس ما نزلت دمعة من عينه
شهکت رنيم بحيث كليم دار خايف عليها يمسح بوجهة
كليم- زينه أنتِ بابا؟
رنيم- بابا عطشان!
كليم- شنو؟
- بابا عطشان احسه عطشان جيبله ماي باباااااا عطشااااان
فتح عيونه وتبهذلت احواله راح يركض وهُمام سحبها لصدره لان تبچي بجزع وتردد "عطشان احَس بيّ عطشان"
رجع كليم من بعَيد يركض برزانه وبيده دبة ماي صغيرة گنبص گدامها وگال
كليم- جبتلچ ماي حبيبتي تعاي نغسل القبر يلـه
گومها وصار يصبلها وهي تغسل بالقبر ومبتسمه براحة نزلت تبوس بـ اسمه حرف حرف وحضنت القبر ما مهتمه لملابسها وهي تتبلل بالماي
رنيم- الف عافية يا رَوحـي أنتَ ، منا وجاي احاول اجيك هوااااي اسفه لان هملتك بَـس تعرف مو بيدي لو بيدي احط فراشي بصفك وانام
رفعت راسها شارده شوي وباوعت لـ كليم
رنيم- عادي اطلـب طلـب؟
كليم- عيوني الچ
مررت ايدها ؏ القبر وکالت
- ما تگدرت تخلي شخص منا يجي كل يوم يغسل القبر بالماي البارد عمو الدنيا حارة عليّ خطية
الرجال ما گدر يتحمل اخذها لخضنه هي تبچي وهوَ يبچي
كليم- اعتبري تم أنتِ ما اطلبين تأمرين
مسح دموعها واسترسل
- الف طلـب مثل هالطلـب
هُمام- يلـه نرجع أنتِ تعبتي
رنيم- لا لا بَـس اقرأ سورة يَس ونروح
هزوا راسهُم موافقين وهي گعدت بصف القبل مطلعة القرآن من الجنطة وبصوت حلو صار ترتل ساعة تبچي ساعة تسكت فرحانة يمه
لحد ما خلصت بوست القرآن ومسحت صورته بيّ وبعدها رفعت جسمها ؏ اطراف اصابعها وبوست صورته
لزمت طرف قميص كليم وميلت راسها
- تجيبني كُل ما اشتاقله مو؟
- تدللين
- تمام اني تعبت اريد انام خلي نرجع
سكتت شوي وفزت
رنيم- ما زرنا جدو!! وماما وين؟
كليم- شوي مسافة منا بَـس باجر ارجعچ اليوم تعبتي كافي
هُمام- اخذهن وياك اني لازم ارجع
سارة- اني ارجع ويـاك
باوعلي مبتسم وهز راسه موافق ودعناهُم هُما رجعوا للفندق واحنه رجعنا لـ للبيت لان ثاني يوم هُمام عنده دوام ولازم يرتاح وخاف يحتاج شي ما حَـبيت اتركه وحده والبنات بين ايادي امينة!
لزم ايدي مبتسم وعيونه ؏ الطريق..
- هُمااام
- هههه عيناه
- دوم صير حباب هيچ لان من تعصب تصير مو حلو
ابتسم يمسح شواربه
هُمام- يعني هسه حلو؟
- اممم ينطلع بيك
- لا يا ادبسزز
كممت حلگي اضحك وهو ؏ ضحكتي يضحك ارجع واگول يسلطن ؏ ضحكتي احسه من صدُك ينتعش !!
هُمام- تعبانه؟
- لا بَـس شوي نعسانه
سحبني خله راسي ؏ كتفي باس جبيني وگال بهدوء
- نامي عيني من نوصل اگعدج
ضغطت ؏ ايده وهو گال بصوت هامس
هُمام- للموت حلوة المَسيح للموت ما اعوفچ
غمضت عيني براحة وفعلًا بَـس بقُربة اگدر انام رغَد بدون ما اخاف صح ما اسيطر على احلامي وهلوستي بَـس الاعرفه اني يم هُمام خلص يعني اني بمكان امان محد يگدر يأذيني
گعدت بعد فترة طويلة مددت ايدي اتثائب باوعتله ساند راسه وصافن عليَّ
باوعت واگف گدام الـبيت دنيا الليل والشارع يصفر ما بي اي بشر
هُمام- شحلوچ وأنتِ نايمة!!
نزلت راسي خجلانه ، رفع ايده مسح خدودي وگال وبصوته فرحة
- سارة من نمتي ما هلوستي بشي
- والله؟
هزهز راسه بـ اي
- الله يقدرني واعرف السبب وره احلامچ اريد اگطعها دوم مو يوم
اعرف لان مرتاحة حاليًا ما حلمتي بَـس راح ترجع لان سبب مخاوفچ موجود وبعدج بداخلچ اكو خوف
سكتت ما جاوبت حرك راسه بأسف وگال وهو ينزل
- يلـه نزلي
نزلنا داخلين للـبيت هو راح سبَح واني رتبت الغرفة وجهزتله ملابسه على السرير ونزلت بسرعة سويت الموجود بيض وبُتيتة وقليت طماطة وسويت الچاي وحتى الاجبان حطيتها خاف ما يعجبه القلي بهذا الوقت المتأخر
نزل بَـس بالبجامه ومنشفه ينشف بيها شعره
گعد وخلاها على اكتافه
هُمام- بس چاي عيني ما اگدر اكل بهذا الوقت المتأخر
- يااا واني تعبت علمودك
- ههههه اتأذه لو اكلت أنتِ اذا ما يضرج وجوعانه اكلي
- حتى لو يضرني همات اكل جوعااااانه
- هههه الف عافية
صبيتله الچاي واني گعدت اكُل انتظرني اخلص وصار يعزل المواعين ويايه ويسولف يضيع السالفة عبالة ما منتبهه
- هُمام رجعهن فوگ ما الوح وما بيه اجيب الكُرسي اصعد
جمد الدم بجسمي من لزك ورايه حاوط خصري بيدي الاثنين ورفعني حطيت لكلاصات بمكانهن ارجف رجعني وباس رقبتي
- نصيرلچ كُرسي مدامتي
- ااء هُمام
- انفاسه
ارتبكت والدمعة احسها بطرف عيني صارت دارني عليّ ومرر خشمه على خدي يشمني بلوعة ، باسني قريب شفتي بسرعة دفعته
- شـ شـبيك؟
فرك وجهة معصب بَـس حاول يبين طبيعي
- رايح خلصي وتعاي
بدون ما يسمع جوابي راح تنهدت براحة
خلصت ودخلت للحمام سبحت واحتاريت بالملابس غميت نفَـسي ستالاف مرة على كمية الغباء الشايلتها خمنت أنُ هو نام لذلك سحبت المنشفة ولفيتها على جسمي وطلعت شعري يقطر
تمشيت ؏ اطراف اصابعي وفتحت الباب
اباوعله مدد وحاط ايده جوه راسه ومغمض
تنفست براحة ودخلت اتسحب ما اريد اسوي
صوت!!
فزيت ايدي على گلبي من گال
هُمام- بعد لا اطلعين بهذا الشكل
- ها؟
- تتمرضين ليش ما صحتيلي اني اجيبلچ
- هاا مو ااءء شسمه عبالي نايم!
- جَيد جَيد روحي بدلي مدامتي وتعاي نامي منتظرچ
ركضت للاستقبال بدلت وشعري بس نشفته بالمنشفة وركضت فوك
باوعلي مبتسم ، تمددت يمه بسُرعة سحبني حاط راسي على ايده وگال
- شعرچ مبلل هسه تتمرضين
- نشفته
تنهد ورفع الغطى ؏ راسي تقرب لامني لصدره بقوة ونام بسُرعة واضح تعبان من الطريق !!
شگد بقيت اتحرك ما جايني نوم لحد ما زفر انفاسه مزعوج قيدني بجسمه وگال
- لچ نامي
- طارت النعوسه
- ههههه غضب غضب
- هُمام خلي نسولف
تحسر وگال
- سولفي اسمع
- مو اممم خاف أنتَ نعسان خطية
- اهم شي أنتِ سولفي معليچ
تحركت رافعه راسي اله
- هُمام يعني اني هسه تشيعت لازم التزم بالحجاب؟
- غصبًا عليچ بابا ما عندنا نسوان تطلع بدون حجاب
- اههووو احجي عدل صير مُثقف وخلي نتناقش
- اممم اي ضروري تلبسين وتقتدين ببنات رسول الله الف الصلاة والسلام عليهن
- عباءة همات ضروري البس
- اتمنى بَـس ما اجبرچ تگدرين تلبسين اشياء عريضه وطويلة ما اعترض بَـس اهم شي شعرج وحيدر الكرار انمرد مرد من اشوف شخص يباوعله
- هاي هيَّ منا وجاي التزم بالحجاب واللبس انتبهله بَـس شنو لازم اشتري لان ما عندي
- يابه تدللين اخذچ بيدي واشتري الي يعجبچ
- وطلب بعد
- أمريني
- اريد كتُب اريد اطلع ؏ دينكُم اكثر ما عندي معلومات هواي واريد تعلمني ؏ الصلاة
- تدللين من عيوني باچر اخذ كتُب من قسورة الج والصلاة اسهل منها ماكو
- قسورة؟
- هههه اي الحيوان عنده مكتبة بغرفته كليم چان يعلمهُم وهو يشتري ويطلع عنده معلومات هواي بالدين بَـس مسربت ما مطبق شي من عندهن
- فاجأتني
- ليش؟
- ما مبين عليّ هيچ اني ابد ما استلطفه
- قسورة حنون بَـس هو يظهر عكس شخصيته ما اعرف شبي حيوان
- يولي اكرهه
فتح عيونه وباوعلي مستغرب كأنو يگول ليش؟
- اول ما اجينه چان هواي يسمعنا كلام ويجرحنا وچان حاط دوبه من دوب مسرة كرهنا بعيشتنا
- لا يا ادبسز وكليم يعرف؟
- لا ما يحتاج اني چنت انطي طينته بگصته
- ههههه كفو ذيبة
- هُمام نعست أنتَ؟
- سوالفچ حلوة يهون النعس
باوعت بعينه احوالي تخربطت وهوَ مبتسم
بحركة سريعة نابعة من گلبي
بست شفته ورجعت دفنت راسي برقبته
تحسر وشبگني اكثر
- نامي لا تضغطين ؏ نفسچ
حضنته وغمضت عيني براحة ، بعد فترة
فزيت الهث متعرقه اباوعله واگف يرش عطر وعينه عليَّ من خلال المرايه !!
هُمام- منو اريان؟ عمچ؟
بهَتت صافنه عليّ ومنا سطرت النوم بعدها ما رايحة وهو يحجي بكُل ثقة
هُمام- شنو مسويلچ ليش تگولين ما اتحمل توجعني؟
بلعت ريگي وبَـس دموعي نزلت هز راسه ونزل عايفني عرفته راح يطلع لان لابس ملابس الشغل
ركضت وراه على اخر لحظة توه فاتح الباب وصحت
- هُماااااام
باوعلي بقلق بچيت بقلة حيلة بسُرعة دخل وسد الباب ، فتحلي ايدي
ركضت حضني رافعني اله! سندت راسي ؏ كتفه وهو بحنان يمرر ايده على ظهري يريدني اهدأ والشهگه تروح
- اهدي كافي اش اش سارة
بعدت امسح وجهي
- من ترجع راح احچيلك كُلشي وعد
- ماشي ، هسه اهدي وحضرتلچ الريوك اني اكلي مو ما تاكلين
نزلني وباس راسي ، مسح دموعي وراح
لازم يعرف ما يصير اخدعه اكثر من هيچ
وإلى متى ابقى محتفظة بهذا السُر؟
اول وتالي راح يعرف اذا مو مني
من عمامي الحُقراء واكيد راح يفرون الموضوع عليَّ
دخلت وابتسمت على اهتمامه وحنيته
اول شي دزيت مسچ لـ رنيم اطمئن عليها
وبعدين گعدت اتريك
رجعت هي اتصلت وگلتلها الصار ختمتها
- اذا كرهني حقة رنيم شخص مثل هُمام يستاهل انسانه مثل الورقة البيضة هو اول شخص يكتب عليها مو اني !!
ههه ورقة سوده بسواد قلوبهُم ملوثه بقذارتهُم ومنو ومنو رنيم حتى العقل ما يستوعبها عمامي المفروض اني اسند ظهري بيهُم مو بالغريب
رنيم- خالو يحبچ مستحيل يتركچ
ابتسمت بكأبة
- وهو لان اشوف تعلقه بيَّ قررت ابلغه بكُلشي وخلي هوَ ياخذ قراره وحتى لو رفضني اني ما راح ازعل وارجع اگول حقة
- واذا اگلج ما راح يعوفچ
- الله كريم
نهيت الاتصال وگمت اعزل الـبيت ، انفجع گلبي بلحظة واني اسمع صوته يصيح
اريان- الفاجررررة اليوم اذبحچ بيدي عايشه ويه زلمة بالحررررام متزوجتلچ واحدددد شيعيييي
ارتبكت وما عرفت اتصرف واني اشوف الباب شوي وينكسر ركضت اتصل والخوف اكل گلبي من رفض المُكالمة !!
فتحت صوتيه واحجي وصوتي يرجف ..
- هُمام الحگني هُمام خايفة اني خايفة أنتَ وعدتني ما تعوفني فدووووة تعال اجه اجه اريان اجه راح يقتلني
شمرت التلفون بعد ما تأكدت وصلتله ركضت للغرفة وكل شوي واگعه رفعت المندر وسحـبت السلاح
اتذكر من بلغته ما اعرف استعمله وعلمني مسحت دموعي وبست السلاح تأكدت اكو رصاصات وسحبت اقسام بصعوبة
نزلت عاضه شفتي من شفت الباب انكسر ومثل الكلاب المسعورة دخلوا اباوع لـيث وايهم لازمينهُم ومن يردون يفلتون نفسهُم يضربونهُم
دخل اول واحد اريان وراه ثنين اخوانه عيسى وجوزيف
نزل عينه على ايدي وضحك
اريان- صايرة قوية ولازمه سلاح بوجهي
- قوية بزود زلمتي كسار راسك يا كلب
عيسى- صوتچ ما ينسمع عاااار
- هههه اني لو أنتو؟ بعيون صلفة واگفين گدامي والله اليتقرب احط رصاصه براسه بدون ما يرفلي جفن
اريان- تقتلين واحد؟ والاثنين الباقين؟ ههههه صايرة جميلة جدًا جدًا مبهور بيچ اني بَـس ضروري اتخلص منچ مع الاسف
- شعره ما تهز من راسي كلب مثلك ما يگدر يسوي شي غير ينبح
اريان- هسه تشوفين؟
- عبالك اخاف من الموت؟ تخسى أنتِ وهذول الجراوي الوراك لان اعرف بعد موتي راح اروح يم ربي نظيفة طاهرة واعرف راح تلحگوني خلال ساعات معدودة بَـس يا فشلتكُم من الله شلون تحطون عينكم بعينه وشلون تبررون خطيئتكُم؟
اريان- جيبلي هالكلبة
اجه عيسى بـ اتجاهي بسرعة حطيته بأتجاهه ورميت وكع على الارض يتبعثر لازم كتفة
وجوزيف لازمه ، ركض عليَّ اريان بَـس السلاح ما يرضى يرمي شمرته اريد اركض فوك بَـس ما گدرت الحگ
سحلني من الدرج يضرب بيَّ وكُل ما احصل فرصة اضربه حتى لو ميته من الوجع
موتني تموت صرت اشهگ النفَس بصعوبة
وروحي تلوب لان ماكو مكان بجسمي سليم !!
شهگت روحي توجعني من ضرب راسي بالحايط وبنفَـس اللحظة صار تلفوني يرن بطريقة مجنونة وعيسى شافه بوجه متألم
عيسى- خلص عليها هذا اكيد عرف وراجع
اريان- جوزيف جيبلي سچين بسرعة
دايخه ما واعيه جسمي بند من الضرب
اخذ السچين بيد وايده الثانية لفها على شعري ورفعني من الارض بلقوة واگفة ؏ رجلي
اريان- تمنيت ارجعچ واستمتع بيچ مثل ايام الخوالي لكن شاء القدر اذبحچ بيد
رغم رَوحـي جاي تطلع تفلت بنص وجهة
- تخسى ويخسى شاربك اذا طلتني يا حشرة
عيسى- يللللللـه فضنا خلي نوللللي
شهگت عيوني حسيتها راح تطلع من مكانها واني احس السچين اخترقت بطني طلعها ورجع ضربني بكُل قوته ، شمرني تفل عليَّ وطلع !!
صرت اشهگ الموت وحدي؟ بروده
بردت احَس بجسمي صار ثلج والتلفون ما وگف يرن بطريقة مجنونة
تمنيت اسمع صوته لاخر مرة تمنيت بَـس چانت أُمنية فقط ومو كُل الاماني تتحقق ..
..
وتستمر الحكاية.. 🚬♣
قفلة خفيفة لطيفة مو؟؟
البارت البعده ما اعرف يمتى والتأخير بسبب ظروف عندي + مخبوصة بتجهيزات الجامعة 😅🔥
قناة التلي zainab_salah0
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!