رواية دروب الإِندِثـار الفصل الثلاثون 30 - بقلم زينب صـلـاح 🤎

بقلمي : زينب صلـاح 🧡

لـ روايـة ﴿ دروب الإندِثار ﴾

في الـ part 26 ♡♡

لا تنسون التصويت + متابعة للحساب + التعليق بين الفقرات ☘️

‏
وهمومي نار بگطن
اطفيها من هَالكتر بذاك الكِتر تشتعل .

•••••••••••••••••••••••••••♕•

فزيت ؏ طرقات الباب ، باوعت لـ مسرة ودموع نايمات واكو ضوء داخل من الشُبـاك !!
اخذت شال لفيته ؏ راسي وتلفوني بأيدي اتصل ؏ عمو بسُرعة جاوبني

- هذا اني بابا

ذبيت نفَـس براحة وفتحت الباب ابتسم وميل راسه بحُب!
- صباح الخير

- صباح النور ، خفت عبالي مو أنتَ!

- جَيـد

- هههه شكو

- ليش بعدچ لازمه التلفون؟

نزلته ميته من الضحك وهو يتأملني مبتسم! مسَح على شواربه وگال
- دوم الضحكات

- بوجـودك

تنهد
- يلـه جهزن نفسچن عازمچن

- تمام

- من تخلصن اتصلن عليَّ قبل لا اطلعن

هزيت راسي بـ اي دخلت گعدتهن بالبداية تململن وبعدين من عرفن معزومات گعدن فرحانات ، غسلنا وبدلنا ومثل ما گال اتصلت عليّ يلـه طلعنا وهو بنفَـس الوقت طلع
من الغرفة الي بصف غرفتنا ؏ اخر كشخة!!

انيق بشكل اختياره للملابس! من چنت صغيرة هو ينسقلي وچنت اموت بتنسيقاته
نزلنا للمطعم واختار هو ؏ ذوقه لان البنات يخجلن من عنده واني اكيد يعرف شنو احب وشنو ما احب ما يحتاج يسألني

كليم- ما بقى شي على الامتحانات شلونها المعنويات

دموع- انيي متحمسة حيل

كليم- ما شاء الله وانتن شو ساكتات

- تعرفني شاطرة

مسرة- سهل سهل شنو هو السادس فد نمونه

كليم- ههههه ما غلط هُمام من گال لسانها اطول منها

مسرة- عمو هوَ لسان شبيكم وياه

كليم- اندري نمونه هوَ لسان!!

مسرة- مو بلـه

ضحك يحرك راسه بقلة حيلة من سوالف مسرة
تحمحم ورجع گال
- مفكرين شنو تصيرون بالمُستقبل؟

مسرة- عمو مو احنه نقرر المُعدل يقرر

كليم- الارادة تقرر أنتِ اذا عندج أرادة وحلم تجيبين المُعدل اليّ تردينه

مسرة- قنعتني عمو

ضحك عاض شفته وباوع لدموع
- وأنتِ دمعه؟

دموع- احب الاطفااال هوايه واتمنى اكون مُعلمة

كليم- حلو اسعي والله يوفقچ

دموع- ان شاء الله

باوعلي رافع حاجبه ضحكت وهمست
- تعرف حلمي

- اعرف دكتورة بيطرية

هزيت راسي فرحانة لان بعده يتذكر حلمي السولفته اله من چنت طفلة صغيرة
استرسل بكلامة وهوَ يشرب الچاي بهدوء

كليم- عبالي تغيرت احلامچ مثل ما تغيرتي أنتِ

- اني متغيرة؟

- جدًا

- شلون؟

ابتسم بلطُـف
كليم- چنتِ طفلة وديعة هادئة أما هسه !! اوف يا هسه شرسة وعيونچ حذرة تحتمين بيَّ بَـس تخافين مني

- أنتَ اماني

- چنت

- ولا زلت اماني للموت ما اثق بغيرك

ابتسم منزل راسه بسرعة باوعت للبنات واشوفهن يسون نفسهن ما يسمعن ويأشرن للخارج ، هز راسه عمو وضحك بخفة
كليم- ملعونات ههه

بَـس خلصنا دفع الحساب وطلعنا اخذنا لسوق قريب لكن هوسه كُلش وازدحام بسرعة لزمت قميصة من الردن باوعلي مبتسم
سحبت مسرة ودموع خليتهن يلزمني خاف نتيه المكان

- عمو ليش اجينه هنا

- ناخذ صوغه خو ما نرجع ايد وره وايد گدام

- هاا صَـح

يفر بينا وكُل شوي گال "اكو شي عجبچن؟" ونهز راسنا بـ لا
وگف يم مكان بي العاب نُقطة ضعفي عيوني تعلگت بلعابة تجنن تجنن عبالك حقيقية

كليم- حلوة؟

- تجنن

هز راسه وصاح للولد وطلب منه اربعة فتحت عيوني وسألته
- المن عمو؟

- الچ أنتِ وخواتچ بابا وريمه وياچن

ابتسمت فرحانه غطيت وجهي اضحك فرحانة
مشينا مسافة واخذ لـ بيبي شيله تجنن على ذوقه واخذ مبخره مُطرزه ثنين ووياها قماشات ثنين بلون هادئ وگال

- هاي لعماتچ علياء ونجلاء زين لو بعد اخذ شي

- يجنن ذوقك عمو اكيد راح تعجبهن

اخذ لولد عمة نجلاء كل واحد ساعة ماركه
ووياهُم جُنيد وخالو؛!! اخر شي حك راسه بحيرة
گال يباوعلنا

- شنو مُمكن اخذ لبنات شابات شنو يعجبهن أنتن تعرفن اكثر

وحدة باوعت بوجه الثاني ما نعرف وهو بقى يفتر محتار لحد ما لمحت مكان يبيعون بي قلايد
وجذبتني وحده مثل الملاك وعنده جناحات فضية تجذب

- عمو

- هـا عيني

- باوع هاي لقلادة تجنن واحنه البنات نحب هيج اشياء اكيد تعجبهم

- تعاي

اخذني شافها وابتسم وگال
- هنَّ توأم اكيد اذا اخذت لكل وحدة منهن نفَـس الشي راح تعجبهن

- منو هذن؟

- بنات علياء ، حبيبي بَـس غلفلي ثنين من هاي

راح الولد يجهز وهو بعده يباوع للقلايد لحد ما التمس وحدة مثل النجمة ناعممممة كُلس
باوعلي وگال
- تطلع تجنن عليچ

- لا تكلف نفسك كافي

- فدوة الج عزيزتي

والفاجأني طلب يجهزله مثلها اربعة ومن سألته گال
- أنتِ وخواتچ

سكتت ما جادلت لان اعرف ما يسوي إلا الي براسه
بَـس كملنا رجعنا قريب الظهر گال

- دخلن ارتاحن شوي وننزل نتغدا

دخلنا سبحنا لان الجو حار چان ، شوي اتصلت سارة حجينه سوه ومن اتصل عمو ودعتها ونزلنا
بنص الگعده ونغزني گلبي نفَـس ذيچ المرة حَـسيت رَوحـي تطلع من جسمي!!

احتار عمو بيَّ وكُلش خاف بَـس دقائق ورجعت طبيعية
بَـس مو مرتاحة گلبي مغموت حاولت اتجاهل احساسي وفكرت مُجـرد حالة طبيعية تصير من اتعب وعمو جابلي عصير طبيعي وجبرني اشربه

وبالخطأ فلتتها مسرة وگلتله
مسرة- هاي ثاني مرة تصير بيچ

خزرتها بَـس هوَ انتبه
كليم- يمتى صارت اول مرة؟

نزلت راسها هي ودموع خايفات من شافهن هيچ باوعلي بخزره
كليم- رنيمه؟!!

- من چنت بيت خالو صارت

- ليش؟ شنو السبب؟

- أنتَ

فتح عيونه
- اني !!

- اي من دزيت الاغراض مالاتي وخالو تعارك هوَ وسارة تعبت هيج ومن طلعني شميت هوى صرت زينة

نزل راسه مزعوج وبعد ما گال شي!! رجعنا للفندق بعد ما بلغني العصر يجي ياخذني نزور ماما وبابا وجدو ونبقى بقية اليوم بالامام علمود ثاني يوم نرجع ..

سحبت تلفوني واتصلت على سارة شگد رن بَـس بدون جواب!!! قلقت وتوترت خصوصًا بعد ما رجعت اتصل على خالو ونفَـس الحالة!!

جفلت على دگة الباب لان ما چانت عادية لفيت الشال واتصلت ؏ عمو رفضه ودك الباب وصاح

كليم- هذا اني فتحي

فتحته وعقدت حواجبي! وجهة اصفر وعيونه حُمر حتى يرجف
- شبيك عمو؟

- لازم نرجع رنيم

- شصاير؟

- ولا شي بَـس شغلي ضروري نرجع يله بابا لا تأخريني

دخلت بلغتهن جمعنا اشيائنا بسُرعة بسُرعة وطلعنا اباوعله ايده ترجف والتلفون خبصنا ما وگف من الاتصالات!
اخر شي ماگدر يبقى متجاهل جاوب وصوته واهن حَزين

كليم- هاا.. احم جاي جاي بالطريق.. لااا گول غيرها استغفرالله أنا لله وأنا اليهِ راجعون.. فهمت مسافة الطريق

سده وشمر التلفون يمسح على وجهة وصار يسوق بسُرعة اكبر
- منو هذا عمو؟ منو توفى؟

- احم بابا مو احد صديق

- خطية شلون مات؟

- ما ما اعرف اووف

- الله يرحمه

سد عيونه وفتحهن بالقبول بدون ما يجاوبني! بعد ما سألته ولحيت خاف يضوج!! سد الجام وفتح التبريد وگال

كليم- نامن ارتاحن ورانا طريق طويللل ومُتعب

بنُص الطريق وغفيت ما فزيت إلا على صوت صرخة مسرة..

- شنووووو هذااا عموو!!!

كليم- اش بابا اش صوتچ

فزيت مسطورة اباوعلها تبچي وترجف من رفعت راسي شفتنا واگفين گدام البيت درت وجهي ووگف الوقت بيه! الشارع يروج بالضُباط!
وخصوصًا بيت خالو طابين طالعين منه

- سـ سـارة

فتحت الباب ومشيت ما حَـسيت غير ايد تسحبني وهو يگول
كليم- بَـس افهمج امشي ندخل

- ماتت مو؟ تقصدها أنتَ مو؟ راحت سارة راحت اختي وينننننن

سد حلگي ونتر
- صوتچ بابا

دفعته ورحت اركض عثرت ووگعت على وجهي صرخت بوجع بَـس ما اهتميت
گمت ودفعته سدوا الطريق گدامي ما يقبلون ادخل وعمو يسحب بيَّ وهُما يتعذرون منه ضربت وجهي وگعدت بمكاني ما عندي حيل

- اختي اختي وين بروح ابوك جاوبنيي

- وداعتچ زينه بَـس أنتِ ما تنطين مجال امشي ندخل

- ما ادخل جاوبني هنا

- بالمستشفى بَـس والله زينه

- اخذني الها

هز راسه بـ لا ضحكت ودفعته من صدره
- تاخذني وأنتَ ممنون كليم تاخذين لو اني اروح وحدي

ابتسم بنص الحَزن خزرته وصحت
- اخذني لاختييي

- اي اي گومي

- لا تلعب تندم

- اخذج والله گومي

هزيت راسي وگمت دخلنا جوه نسيت دموع ومسرة بسُرعة فزيت
- وين دمووع ومسرة

باوعتلي عمة تبچي
- دخلتهن تعاي عمة

دخلت وگعدت انتظر شوي ورجع بيده كلاص ماي
كليم- هاچ شربي

- وتاخذني؟

عض شفته وهز راسه بـ اي شربت لكلاص كُله وگمت
- يله!!

باوعلي بحزن اخذ ايدي باسهن گعدني وگعد بصفي يباوعلي بنظرات حنونه بَـس اني احَس نفَـسي تعبت ودخت!!

كليم- تعرفين احبچ وكُلشي اسوي هوَ المصلحتچ وحتى هسه السويته المصلحتچ لان اتعبين من الانتظار خالي بلاش واني عندي شغل ما اگدر ابقى يمچ ولا اگدر ابقيچ امانه يم شحص لان ما اثق

حطيت ايدي ؏ راسي اغفي
- شـ شسويت أنتَ؟

حط ايده وره راسي ورجعني اتمدد على الكرويته وگال مقهور
- علمودچ

حجيت بوهن
- شـ شسويت أنــتَ كليييم ما راح اسامحك

- يفديچ كليم والله علمودچ

اخر شي سمعته وقبل لا انام بشكل نهائي شفته نزل وباس جبيني بقوووة ، نمت وسارة بگلبي وعقلي تاكل نمت واني ما اعرف اختي وين وشصار بيها نمت وما عرفت كليم يقصد منو من گال انا لله وانا اليهِ راجعون؟؟
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••

هُمـام•

نزار قباني يگول :
هُناك صمتٌ أنيق لا يسمـح
لنا بالبوح مهما كان الوجع !!

كُل امل مات بگلبي مَن نزلت سيارتي
وشفت ايهم ولـيث سابحين بدمهم
وگاعدين گدام الباب حاطين راسهم بين ايديهُم
من بعَيد شفت سيارة الاسعاف تتقدم وصوت
صافرتها يدگ بگلبي!

دعيت لحد ما عجز لساني نذرت حد الاكتفاء
خطوة اقدمها وارجع عشرة
ما مستعد وقلة اكثر من شفت نظرات الخجل
بعيونهُم نظراتهُم التحجي عدم قدرتهُم حتى
يحمونها او ينقذونها؟

دخلت من الباب الخارجي ونعقد لساني بشوفة
قطرات دماء مُتفرقة ؏ الارض!
قوية گلبي ودخلت بَـس ياريتني ميت وما داخل
ريت عيوني نعمت وما شافت ذاك المنظر ريت رجلي بالكسر يوم الخذتني هذا الصبح وعفتچ وحدچ
لسى كلامها براسي وهي تگول
اني خايفة أنتَ وعدتني ما تعوفني فدووووة

وگعت على ركباتي ما گدرن يحملني واني
اشوفها؟ گلت اشوفها لا لا ما چانت مبينه
حبيبتي چانت مشوهه بدمها!!

صرخت واحَس حنجرتي طگت وصاحت الغوث ضربت رجلي اريدها تعيني واروحلها بَـس وسفه حتى حيلي خاني من شفتها
حتى حيلي راح يا بعد حيل ابو الهَمم أنتِ!!

زحفت زحوف لجثتها اخذتها بحضني بلسان معقود يون وجع على حالها بارده حبيبتي بردانه جسمها ثلج!! احتاريت منين المسها اخاف اوجعها بمكان خاف الچمها بجرح من جروحها؟

ما اهتميت للدم التارس وجها ونزلت
ابوس بيها بكُل جُزء من وجهة
ترفه ترفه شلون تحملت شلون وحدها
شلون واجهتهُم شصار هم صاحت بأسمي؟

نوجعت صاحت اخ واني مو يمها
ولووها بغيابي
اخ لو موجود اخ بَـس لو موجود
چان بچيت حيطان البيت على حالهُم

راحت عيني على الارض وشفت خصله من شعرها
ملخوا شعرها؟ نوجعت؟
واني راح املخهُم واسويهم وصل وصل واشرب من دمهم!! ضميت شعرها بجيبي ومسحت على خدها ..

- والله وكتابه وعزته وجلالته وحق من قلع باب خيبر وحق الانقتل مظلوم بكربلاء وحق مسلوب الكفين وعد زلم وعد ابو الهَمم لـ ام عَيون شهل لأبچيهُم دم واغسل ايدي بدمهُم واخليهُم عبرة لمن اعتبر نامـ ـي اخ يا رَوحـي نامي رغَد

حطيت راسها ؏ الارض وگمت باوعتلها اخر نظرة وطلعت ما اتحمل بعد
مالي راحة بعد لحد ما اقتلهُم بيدي! صار بوجهي قسورة وشفتهُم ينزلون من سيارة الاسعاف ويدخلون

قسورة- وين؟

- ثاري ما ينام ليلة ثاري ينوخذ بنفَس الساعة

- ويـاك رجلي على رجلك

مشيت خطوتين وجمدت بمكاني من صاح واحد
- بعدهااااا عايشه اكو نفَـس ضغيف استعجلوا قبل لا نفقدهااااا

عيني تعلقت بيها لحد ما دخلوها بالسيـارة وانطلقوا!
باوعت لـ قسورة
وكُل ذرة بجسمي ترجف
- عـ ـايشة !!

ضحك يمسح بوجهة
- الحمد لله خالي الحمد لله اكو امل خلي نلحگهُم لازم نخلي حراسة عليها خاف يكملون شغلهُم الناقص

فتحت عيوني ومُجرد الفكرة عبث بقلبي خراب
- بسُررررررعة

ركبنا وانطلقنا بسُرعة جنونية وره سيارة الاسعاف وقسورة طلب حراسة يجون
نزلت اركض وراهُم لحد غرفة العمليات الچانت فاصل بيني وبينها وجعني گلبي وحيلي انهد!
ما اگدر اتحمل بعد ما صار عندي امل؟
ربي تعرف حُبي الها لا تاخذها مني
ربي بعدني ما اعترفتلها ولا عرفتني احبها
وافديها بروحي لا تاخذها مني
صَـح اني انسان عندي اخطاء هواي وقصور
بگد شعر راسي وما استاهل
بَـس سارة بعدها طفلة ما شافت شي من الدنيا
واني وعدت حيدر الكرار قبل يوم
اعوضها عن كُلشي مرت بي لا تاخذها
اريدها.. اريد اعوضها واكون العوض
الي تحمدك عليّ ..

گعدت مُقابيل الغرفة وتحررت دموعي لاول مرة
دموعي اكتفت ونزلت ضربت الارض بقوة
صرخت مفجوع گلبي بيها وبحالها اريد انوجع
اريد احس بيها من أذوها وهي وحدها شصار بيها
اخخخخ الله شصار بيهاااااااا شسووولها؟؟

حضني قسورة وگال
- تصير زينه وازينلك شواربهم بقندرتي مو ابو الهَمم التنزيل دموعه أنتَ تكسر ظهرهُم وتبچيهُم دم

سندت راسي على كتفه واحس تعب العالم
كُله فوگ اكتافي
- احبها اخ يا حُبها يسري بالشرايين راحت قبل لا تعرف شگد احبها راحت قبل لا تعرف هُمام مستعد يسوي كُلشي في سبيل يشوف ضحكتها وترد الروح اله !!

- عين نفسك قوي گلبگ خالي شو بسُرعة استسلمت؟ سارة راح ترجع وتعرف شگد أنتَ تحبها بَـس يا تُرى من ترجع أنتَ ماخذ ثار غربتها ووجعها لو گاعد هيچ تنوح؟

- اخذه

- وأنتَ هيچ گاعد؟

- اطمئن عليها واروح اغربلهُم

- كفو واني بظهرك ، يلـه گوم عيني وارتاح قبل كُلشي

سندني مگعدني على الكرسي راح جاب ماي غسل وجهي وشربني واني صافن بيا طريقة اموتهم؟
بيا طريقة اخذ حقها وشنو الطريقة الاكثر وحشية التفيد حيوانات مثلهُم؟!

مديت أيدي بجيبي وسحبت خصلاتها
شميتهن بقوة!! امس هي بحضني واشم
ريحتها شصار هسه وهي بين الحياة والموت
وما بيدي غير خصلة وگعت بساعة قتلها
ملطخة بدمها؟

ساعة.. ساعتين.. تلاثه..!! چان هذا الوقت اختبار صبر من ربيّ إليّ
بنفَـس اللحظة الاكتفيت بيها ورحت بأتجاه غرفة العمليات مقرر اقتحمها واطمئن وخلي شيصير خلي يصير طلعت الدكتورة بوجها علامات حزن هدت حيلي..

- زوجتي؟ زوجتي عايشه هيَ زينة؟

تنهدت
- عايشة بَـس ما اعرف راح تكون زينة او لا

- شنو؟

- زوجتك تمزق رحمها بسبب الضربات ومع الاسف  ما راح تكون أُم ابدًا

ضربتين على الراس توجع؟ نهد حيلي ما عرفت شنو احجي غير همست بلا وعي
- بَـس تعرف راح تتركني! راح تكرهني لان ما لحگت عليها ههه اني خسرتها

بعد هذا الخبر الختم گلبي بالحَزن مدى الحياة وگعت وطفت الدنيا بعيني وحلفت اطفيها بعيونهُم واقطع نسلهُم ، نسل قذر مثلهُم !!
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••
ㅤㅤㅤ
دمـــوع•

تصدقت سادة القرآن مسحت دموعي الما وگفت دقيقة وحدة من سمعت الخبر لحد الان
مسرة التجأت للنوم ولحد الان شهگتها بصدرها وهي لازمه بلوزة سارة وتشم بيها ، رنيم حال الويل حالها من ناومها عمو كليم وراح تون وهي نايمة
ضجنا منه بَـس وضحلنا هي راح تقيد حركته
وهوَ لازم يروح هُمام منتظره وسارة بخطر!

نزعت الچادر توني اسفطه وشهگت رنيم
گاعده! ركضت الها

- اسم الله شبيچ؟

- ساࢪة؟

دفعتني ونزلت تركض اريد الحگ عليها ماكو!
حضنتها عمة مانعتها تطلع ومن شافتها فقدت
ضربتها راشدي وصاحت بوجهها

نجلاء- كاااافي اصحي على نفسچ وباوعي خواتچ خايفات

وگعت على الارض تون وتبچي
رنيم- اختي عمة اختي شلونها

- والله اتصل وگال بَـس تگعد بلغيها طلعت من غرفة العمليات وحاليًا وضعها مستقر

- والله؟

- وگال بَـس اضبط الاوضاع اجي اخذها تبقى يم اختها

رنيم- بَـس هو‌َ خدرني!!؟

نجلاء- غير ما خليتيله حل ثاني؟ خالج متخربط وسارة خايفين لا عمامها يقتلونها علمود لا تحجي ولازم يروح يسيطر على الوضع ومحتار بيچ

- عمامها؟ ليش مو عذاب هيچ سوى بيها؟؟!!!!

نجلاء- لا ماما عمامها هرجوا المنطقة جايين وجايبين وياهُم زلم سدت المنطقة بحجة غسل العار دخلو بَـس عمامها والباقين ما خلوا لـيث وايهم يدخلون لحد ما طلع عمها سابح بدمها

گعدت بمكاني ابچي ورنيم تضرب على وجهه
- سوده بوجهي يا امي وحدت ولوج الما يخافون الله

نجلاء- يگولون شلون متزوجة شيعي وهي مسيحية الزواج باطل وعلى اساس عايشة وياه بالحرام وخلوا حتى الناس تحجي عليهم

- تشيعتتتت سارررة تشيعتتت هناك بالامام وعقدلهُم الشيخ من جديد الله ينتقم منهم ربي يراويني بيهُم يوم ما اكتفوا يردون يقتلونها الانذال

- رنيم

باوعتلي مكسورة الحيل وفتحت ايدها
گمت من مكاني ودخلت حضنها خايفة
رنيم- اني يمكم ما اعوفكم للموت

- اريد اشوفها اخذيني وياج

- ان شاء الله ، مسرة وين؟

- نامت بَـس خايفة عليها لان ما نطقت بشي اول ما سمعت الخبر نامت

- امشي نگعدها من رخصتج عمة

نجلاء- ماما حبيبتي گومي وصلي على محمد ان شاء الله اختچن ترجع سالمة

هزت رنيم راسها بدون ما ترد احسها حيل ما عندها سندها وسندتني وصعدنا مكسورات
اباوعلها قرفصت گدام مسرة ومسحت على راسها بسرعة فتحت عيونها معناها ما نايمة!!!

مسرة- سـاررة؟

رنيم- يگولون طلعت من العمليات ووضعها مستقر

ابتسمت!
مسرة- اعرف لان اجتني بالحلم وگالت ما اعوفچ ومن مسحتي على راسي عبالي هي والصار حلم

- نحققه من نرجع ما يبقى حلم

رنيم- سارة قوية حترجع اكيد

- اني رايحه اطمئن على لـيث وايهم

باوعتلي رنيم عاقده حواجبها بسُرعة بررت
- ضربوهم هوايه وليث حتى جرحه نزف

هزت راسها بدون ما تنطق بشي! حسيتها ما عندها طاقة لأي شي وهذا حقها تعبت الله يساعدها من مصيبة لمُصيبة وفوگ كُل هذا شايله همي وهم مسرة!

طرقت الباب بتوتر ، اجاني صوته
ايهم- ادخل

فتحت الباب ومديت بَـس راسي ابتسموا ولـيث رفع الغطى على جسمه لان مو لابس قميص!!
وايهم ترك مجموعة اوراق بيده وتقدم اليَّ

ايهم- محتاجة شي؟

- اجيت اطمئن عليكُم شلون صرتوا؟

لـيث- بخير احنه دمعة

ايهم- البنات شلونهن

نزلت دموعي جفل بمكانه وگال
ايهم- ليش تبچين لا تبچين فدوة دموع كُلشي راح يصير احسن

- اختي هاي بل امي

لـيث- بَـس اهدي وان شاء الله ترجع اصلًا خالي گال وضعها مستقر حاليًا

ايهم- والقرآن بيدي اخذچ تشوفينها بَـس عليچ الحسين تمسحين دموعچ

لـيث- مسحيهن لچ ما تشوفينه يرجف راح ينجلط

ضحكت بخجل وهو زمخ بي
ايهم- انچب لـيث!!

لـيث- قابل مچذب!!

- بعدهاااا طفلة انچب لا تحرف عقلها

لـيث- هااا عرفت اليوجعك خويه

- اهووو انچب امشي نطلع دموع

لـيث- خو من البداية گول اريد استفرد بيها

- ما اگول مريض واضربك سد حلگك

ضحك يستفزه واني دخلت بوسط ملابسي
من كمية الاحراج !! صح ما فهمت كلامهم بَـس
احس عـيب وهذا لـيث مو راحة
دفعني بخفة ايده يطلعني وهوَ وراي ولـيث
خرب من الضحك

ايهم- استغفرالله الادبسز

- شنو يقصد؟

باوعلي وابتسم بحنان
- يولي ولا تخلين كلامه بالچ ولا تفكرين بيّ ماشي

- تمام

- ننزل نگعد بالحديقة؟ بَـس نسولف!!

- تمام

ردت انزل قبله وگفني وگال بهمس
- احم شسمه ااء امشي وراي لا تصيرين گدامي

- ليش؟

- افضل افضل من تكبرين تفهمين

- ترا اني چبيره!!!!

- احم شگد عمرچ؟

- بعد فترة ادخل خمسطعش

- ما شاء الله

گعد وخله بين المسافة التفصلنا مخده هاي خاصة بالمرجوحه !!
رفع راسه للسماء ساكت
الجو حار بَـس اكو هواء مُنعش والنجوم تلمع
بالسماء السوده

- دموع

- هـا؟

- سارة ومسرة نعرف عائلتهم بَـس أنتِ محد اطلع على أمرچ

ابتسمت على انتباها
- بالعكس مسولفة لعمو كليم اني

- سولفيلي اذا ما بيها احراج؟!

- لا عادي اصلًا ما عندي قُصة مشوقة ، اني الصراحة فتحت عيني بالملجأ حسب كلام سُعاد چانت تنطيني لنسوان بالملجأ ويگدن بيَّ لحد ما كبرت وصارت اطلعني وحدي

- ما گالت على اهلج شي؟

- اممم تگول امم اني بنت حرام..

قاطعني مزعوج
- شنو هذا الكلام؟ أنتِ بَـس لا مقتنعة بهذا الكلام؟!!

- ما اعرف للصراحة لان تگول لگيتج مشموره بالشارع ومن سولفت لعمو كليم وبحث ما حصل شي يخصني فـ ما اعرف عندي اهل او لا وهل كلامها صح او خطأ

- لا يابه استغفرالله لا تفكرين هيچ بعد وشيلي هاي الافكار السامة من عقلچ

من شافني ساكته رجع استرسل بكلام يطيب خاطري بيّ
ايهم- تتوقعين هاي الملامح البيها من البراءة ما يكفي يكونون اهلها ناس سيئين؟ اكيد لا اني متأكد عندچ أب وأُم طيبين مثلچ

- شُكرًا لكلامك ايهم

- هاي الحقيقة آنستي الصغيرة

- هههه مع ذَلك شُكرًا مو الكُل يگول كلمة طيبة بهذا الوقت

- تدللين يابه

گمت افرك بأيدي رفعت راسب وجفلت واني اشوف رنيم واگفه بالشُبـاك وعينها علينا
حتى هوَ انتبه الها ، سدت البردة وابتعدت!!
رجعت عيني عليّ من گال

- رايح اني للمستشفى اكيد خالي يحتاجني واذا سمعت خبر مُفرح اتصل عليچ اول وحدة ماشي

- تمام

- وعديني قبل لا اروح آنستي الصغيرة

- ههه بشنو؟

- ما تبچين واذا سمعت باچيه ازعل واني زعلي ثگيل

- وعد ما ابچي

- عفية يلـه دخلي نامي وللصُبـح الله كريم

دخلت ايدي على گلبي
هاي اول مرة يجمعني حديث مُنفرد وياه؟
نفَـس لطافته ونزاكته بالكلام والاسلوب
بَـس گلبي دگاته غير عن المُعتاد؟
يمكن لان وحدنا؟ اي اكيد لان اني اول مرة اوگف ويا شاب وحدنا؟

فتحت الباب وقبل لا ابرر اشرت على فراشي
- نامي

نفذت الگالته غطيت نفسي وبَـس عيوني
طالعة اشوفها رجعت فتحت البردة وصافنة
بالفضاء !!

- رنيم والله هوَ بَـس واساني وگال رايح للمستشفى واذا سمعت خبر حلو ابلغچ

- تمام

- ما راح تنامين

- لا نامي أنتِ اني ما نعسانه

بقيت صافنه بقفاها لحد ما تمكن النوم مني وما گدرت اقاوم بعد خصوصًا اني ما ارتاحيت من سفر الطريق المُتعب لخبر سارة المُفجع !!
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••

(الكلام منقول من لسان ايهم عَن طريق دمعة)

وصلت وكُل فكري بيهُم ، انطيت اسم سارة
للاستعلامات وبَـس عرفت الغرفة الموجودة بيها
استقليت المصعد ضاغط ؏ رقم الطابق
المتواجدة بيّ!

چان اكو ضباط اثنين واگفين بصف الغرفة
عرفتها هي هنا ، سلمت وتوني اسأل على خالي
وشفته جاي من بعيد فارض هيبته
وحضوره على المكان وامارات الغضب واضحة
على ملامحة الهادئة!!

بَـس وصل وانتبه على وجودي سأل
واحَس روحه طالعة!
كليم- اخوووك وين؟

- ليش مو هنا؟

- من صبر ايوب الهي من صبر ايوب

- شصاير خالي قلقتني؟!!

- اخوك السَبـع بدل ما يهدي النفَوس حاش براس هُمام وهسه هُما الاثنين فص مَلح وذاب ويا خوفي من اختفائهُم

- وين يختفون؟ خالي مو السمعته منك عمها بَـس طالع منا مسوي حادث ومتوفي؟

- اي اي بَـس اكو بعد عمامها ثنين مختفين من غير ولد عمها نفسهُم الضربوكم ومنعوكم ادخلون

- اعذرني خالي بَـس الي يجي من ايده الله يزيده اصلًا ما اتوقع غير الثار من خالي ليش قليل السووا بزوحته بغيابه؟

- اخ يا عقلكم لك ابني أنتَ مو محامي لو منطينك الشهادة زينه؟

سكتت وهوَ استرسل بغضب
- يضيعون ويضيع حقهم وتضيع رتبهم وشغل السنوات كلها
احنا الله كرمنا بالعقل ليش نتحيون وما نستعمله شنو مخلينا زينه براسنا؟ من خرب بيكم اذا عندكم عقول كل واحد بگد البغل وما تعرفون تتصرفون تصرف بيّ حظ

سكتت شحجي واني جاي اترزل نيابتًا عن خالي هُمام وقسورة؟! نتر بصوت مزعوج

كليم- اتصل عليّ شوفه وين صاروا؟

بدون ما ارادد اتصلت ماكو لحظات وفتح الخط اشرلي خالي افتح المايك! اجاني صوته يلهـث ..

قسورة- هـا؟

- وين أنتَ؟

- جاي اتونس ، شعليك احجي شتريد؟

كليم- أنتَ زمال؟

قسورة- خالي هذا أنتَ؟

كليم- وبَـس اشوفك اطيح حظك على تجاهل اتصالاتي اما هسه نجي للاهم أنتَ وين؟

- بشغل

- **** أنتَ وشغلك وا****

درت وجهي خجلان لان خالي نزل دوسه ونص بالغلط اباوع للضُباط الواگفين كاتمين ضحكتهم بصعوبة!!

قسورة- هوب هوب خالي شسالفة هوَ هيچ

كليم- تحجي لا أربيك من جديد لك

قسورة- احم احنه بـ*******

كليم- دز الموقع اليَّ وانتظر من اوصل اطيح حظك ساقط

سد الخط وخزرني غير اعرف خازرني اني ليش؟ رزلني اني ليش؟
مشيت اريد الحگه وجذبني ركض الدكاتره لغرفة وگفيت بين نارين اريد ابقى ويا خالي خاف يحتاج شي وبين اطمئن على سارة واطمن الـبيت !!

..

وتستمر الحكاية.. 🚬♣

قناة التلي zainab_salah0