رواية دروب الإِندِثـار الفصل الثاني 2 - بقلم زينب صـلـاح 🤎

بقلمي : زينب صلـاح 🧡

لـ روايـة ﴿ دروب الإندِثار ﴾

في الـ part 1 ♡♡

لا تنسون التصويت + متابعة للحساب + التعليق بين الفقرات ☘️

مثلهُم تنگلُب ضَدي
عِفت شَمسي وضواهَا
ورِحت لأجل شموع
يَا شمعة لتنور دربَك بگدي ؟

•••••••••••••••••••••••••••♕•

شفاه مبتسمه بـ اتساع تعاينلي بشماته وخُبث كرهت نفسي بسبب نظراتهم اللئيمة غضيت بصري وركضت بعيدة عنهم ، گعدت ؏ البلوكه الي بصف باب بيتنا معبسه ومچتفه ايدي فوك صدري بكل حُـزن..

اعاين الاطفال شلون يلعبون واتمنى اكون وسطهم اعيش حالي من حالهم لكن بسبب النقص او كما يگول البعض تشوه انا اعاني من تنمرهم عليه يوميًا طول عُمري الي ما يتخطى الثمان سنوات..

بدون ما احس كانت عيوني تذرف الدموع شهگه تتلو الاخرى بدون توقف الناس تمر تباوعلي بشفقة تزيد حزني..

- منو مبچي الحلوة؟

رفعت راسي ومن لا وعي بس شفته ضحكت امسح دموعي واجاوبة..

- محد

گعد گدامي مقرفص ورفع ايده يمسح دموعي هامس بلطف..

- شلون محد وهالعيون الحلوة تبجي؟!!

عبست وانفجرت ابجي مقهورة ومن كل گلبي من گال "لعيون الحلوة" هزيت راسي عدة مرات انفي وگتله..

- مو حلوات غسق تگلي الحوله مو حلوات

سحب ايدي من وجهي ورجع يمسح دموعي بـ ايده تقرب بايس خدي وگال..

- انتِ تحبين منو وتصدگين كلام منو؟ اني او غسق؟

- انتَ

- لعد ست رنيم اني اگول حلوة وتخبلين وغسق تغار منج

- بس عمو..

- لا بس ولا هُم يحزنون اني شگلت؟

- حلوة

- تخبلين رنيمه

ابتسمت بعفوية اباوعله بادلني الابتسامة يلعب بخصلات شعري ، واحنه گاعدين نفتح الباب وطل بابا من عنده..

رسن- اه هذا كليم هنا!! شوكت رجعت؟؟

گام عمو كليم وحضن بابا بقوة لان كُلش اصدقاء ويحبون بعض رغم فرق العُمر بيناتهم بس صداقتهم تجنن..

كليم- هاي رجعتي ومريت عليكم وشفت رنيم تبچي

تخردل بابا واجه بوسني وحضني..
رسن- منو وياج باباتي؟

نزلت عيوني خجلانه وكليم جاوبه..
- هي وغسق نفس الموضوع

غمز لـ بابا بسكته عباله ما شفت واستنتجت منه انُ ما يضغط عليه ويذكرني ، شالني بابا وباس خدي وگال..

- يـله كليم تفضل

- لا لا ما اريد ازحمكم اجيت اشوفك من الباب واروح

- افااا واني مستحيل اخليك تخطي خطوة بدون ما اضيفك

تنهد عمو كليم ووافق يدخل عافنا بابا ودخل للمطبخ يجهز الضيافة واني بقيت مگابلة عمو كليم واسولفله شلون قضيت الاسبوع الي فات والغي براسه وهو يسمع ويهز راسه..

ركضت للغرفة اجيب دفتري ورجعتله جان بابا موجود ويسولفون..

- عمو كليم عمو كليم

ضحك وفتحلي ايده سحبني وصرت بين رجليناته فتحت الدفتر اراوي وهمست بسعادة..

- شوف عمو مثل ما وعدتك اخذت عشرة من عشرة والمعلمة كتبتلي احسنتِ يا وردة

باس ايدي وطلع من محفضته عشرة ومدها الي بسرعة رفعت عيوني لـ بابا الي هز راسه موافق اخذها ، اخذتها فرحانة..

كليم- وبعد الج احله هدية اذا نجحتي الاولى

رنيم- وعد واول واحد اگُلك

رُسن- ههههه شوف شوف اول واحد واني ولج

ركضت لبابا حاضنته..
رنيم- هو نعزم عمو كليم واگُللكم سوه

باس راسي وگعدني ؏ رجله منطيني تلفون اندمجت العب بالتلفون واسمع عمو كليم يگول..

- تعبتني امي رسن تزن براسي تزوج وتزوج وإلا بنت اختها

- وانتَ ليش رافض خيي شو وسامة وشهادة تخبل وشغل موجود بيتك هم موجود وجاهز شنو الي منتظره؟؟

رفعت عيني اباوعله تحسر ومسح ؏ جهة گلبه..

رسن- بالك وحدة مو؟

هز راسه بـ اي بدون كلام ونزلت دمعة من عيناه شگد نكسر خاطري عليه ، حجه بابا بقلق..

- يمعود شصاير احجي مو والله قلقتني

مسح ؏ وجهه وتنهد..
- تحب صاحبي رسن تحب صاحبي

- لاه!! گول غيرها

غطه وجهه بـ ايدي وبس اكتافة تهتز فد نقهرت عليّ ما يستاهل عمو كـليم ، بعد لحظات رفع راسه فرك وجهة ومسح عيونه..

- يحبون بعض وهه ذاك السبوع حضرت خطوبتهم

- من شوكت؟

- من زماااان بس چنت منتظر اكون نفسي واروح اخطبها بعدين هُم سوولي سربرايز وتزوجوا

- وعسى ان تكرهوا شيئًا وهو خيرًا لكم وعسى ان تحبوا شيئًا وهو شرًا لكم ، خيي اتكل ؏ الله اكيد بيها الخير من بعدك عنها وشوف حياتك ويه بنت خالتك

- شتحجي انتَ رُسن؟ لبنيه ما هاويها اضافة اعتبرها حالها حال علياء ونجلاء

- خلص شوف غيرها واتكل كبرت تره

ضحك وگال..
- هههه تحسسني شايب يمعود كلها 23 سنة بعدني بسم الله

- وشنو صغير ولك

- لا يابة بس بعدني ما فايتني القطار خلي مو ضروري هسه

باوعلي منتبهه عليّ بكل قوتي غمزلي ضاحك..
- ها ولج؟

- انتَ حباب

- آه رحم الله والديج ما جنت اعرف

- اي مو بابا

رسن- هههههه اي باباتي

ودعنه عمو كليم وطلع وبابا ڪ العادة فرش سُجادته وگعد يقرأ قرآن ويصلي قضاء لـ ماما الله يرحمها..

قبل اربع سنوات توفت ماما ، جانت حامل بـ اخوي لكن الدكتورة منعتها من هذا الحمل وگلتلها خطر عليج و؏ الجنين لكن ماما يبست راسها وخاطرت ومع الاسف توفت بغرفة العمليات واخوي بقى بالخدج اسبوع وهم مات..

حسب كلام بابا إلي لان اني ما اتذكر زين حتى شكل ماما لو ما الصور ناسيته ما اتذكر شي عنها ابد!!

انكسر بابا بعدها وكرس حياته الي وبس ، كل ذكرياتي وطفولتي الحلوة وياه ، رغم الكل راد يزوجه بس هو رفض ما قبل يجيبلي زوجـة اب خاف تأذيتي وبقينا عايشين ؏ ذكريات ماما انا وياه..

بعمره ما ضربني جان يرشدني وينصحني ويعلمني اذا خطأت واذا كررت الخطأ يزعل عليّ وما يحجي ويايه يخليني الوب..

رفع راسه وعيونه الحلوة مدمعة..

رسن- روحي لبسي أزار الصلاة بنياتي

ركضت جبت سُجادتي وأزار الصلاة مالتي وتوضيت فرشتها بعد بابا بشوي وبديت اصلي لـ ماما بعد ما خلصنا سحبني بحضنا وظل يرتل بصوته العذب واني ارتل وراه نفس الشي..

بعدين عافني وگام يسوي غده واني هم شلت سُجادتي واتبعته..

- بابا اساعدك؟

- تسوين الزلاطة؟

- يسسس

- ههههه بس ديري بالج ؏ ايديناتج الحلوة وسوي ؏ كيف

حطيت الطبلة الصغيرونه وصعدت عليها علمود اوصل للكاونتر وبديت اسوي بس كلش بطيئة..

بابا خلص واجه حضني من وره وايده ؏ ايدي ويسولف ويايه ، گال..

- نخلص غده ونگعد ندرس بنياتي الحلوة باجر دوام

- اي

تغدينه وڪ العادة تشاركنه سوه بغسل المواغين چنت احب اشارك بابا بكلشي واحب نسولف وخصوصًا من يسولفلي ؏ ماما او معلومات عامة..

جنت احب اطلع واعرف عندي فضول ناحية كلشي واتسرع دائمًا واوڪع بالخطأ الي بابا دائمًا يحذرني منه..

مرت الايام ڪ سابقاتها بهدوء وسكينة ما تغير شي إلا صحة بابا الي بدت تدهور..

بيومها جنت مبدلة وكاشخة وبنفسه سوالي ظفائر ثنين من الجوانب واني لبست بدلة لونها بنفسجي فاتح وطلعنة للمدرسة استلم النتيجة..

لازمه ايده واطفر واردد بالاناشيد الي حافظتها وبابا يسعل بصوت يابس ، رفعت راسي من قربنه للمدرسة وصارت عيوني ؏ عمو كليم ، شهگت حاطه ايدي ؏ شفايفي وعيوني لمعت..

- عمووو ڪليييم

ركضت اله تاركة بابا لان صارلي فترة ما شايفتة وحيل مشتاقتله ، بس وصلت اله تلقفني بـ احضانه يضحك..

- ههههه روحـه لـ كليم

- مشتاقتلك عمو

نزلني وباس خدي بقوة مكزكز وهو يمسح ؏ ظفايري ويهمس..

- شنو من جمال وترتيب

درت حول نفسي..
- حلووة؟؟

- تخبلين رنيمه

وصل بابا وتصافحوا بعدها گال عمو كليم..
- خير خيي بيك شي؟

رُسن- بعدين بعدين خلي ناخذ نتيجة رنيم اول

گح بصعوبة حاط منديل ؏ حلگه دخلنا واخذت نتيجتي ومثل ما وعدت عمو كليم الاولى وكله عشرات فرح بيه طار من الفرح..

كليم- راح اخذ رنيم اونسها بمُناسبة نجاحها

- دير بالك عليها

- بعيوني خيي

نزل بابا وراح للبيت وهو عدل لمرايه عليه وگال..
- طلبي وتمني

- اممم تشريلي لعابة؟

- وبعد

- حلويات هواااي واممم تاخذني لمدينة الالعاب واممم

- هههههه وبعد

- شكرًا عمو كافي

- تدلل رنيمه الحلوة

جان يوم من الاحلام حرفيًا ما خله شي ما سواه الي العاب كومة وحلوياا ومدينة الالعاب ما بقت لعبة ما صعدني بيها ونسني ونسة عُمر وبالفعل جانت اخر فرحة وسعادة مرت عليه بعدها ايامي صارت عبارة عن
غيمة سودة تمطر هموم وحزن وخذلان كبير !!

................

ㅤㅤㅤ

- گعددددي رنيييم

فزيت مرعوبة من نومي واني اشوف دادا سُعاد واگفة فوك راسي ومخنزرة بوجهي ، اشرت بـ اصبعها ؏ الساعة وگالت بنتر..

- شوفي بيش الساعة وانتِ مخمودة يا الحولة كم مرة گُتلج اذا ما مشيتي عدل اذبج بالشارع وما اسأل عليج ولا يرفلي جفن

طفرت من مكاني ورديت بعجلة..
- لا لا دادا لا تعصبين رايحة

ركضت سبحت ولبست الجُبة والنقاب علمود اخفي عيوني الي ايام وايام اتعرض للتحرش بسببهن لذلك اتحذر واقبط نفسي بالسواد من فوك ليجوه..

اخذت سيت الماي والكلنس وطلعت من الملجأ اسابق الرياح بخطواتي عيوني تزرزر بخوف من الي حوليه..

گعدت بمكاني المُعتاد وحطيت ايدي ؏ خدي راح يطيح حظي لحد ما ابيعهن لان اذا رجعت بدون ما ابيعهن كلهن دادا سُعاد تخليني بدون اكل
لثاني يوم مستحيل اقاوم إلا الاكل موو؟ اكيد اي

صار الظهر والشمس عمودية سمطت راسي واني ما باقي إلا القليل ، جعت وعطشت بس ما اگدر اخذ من السيت لان تحسب واذا طلع نقص خلص الله كاتبلي الموت بين ايديها
انوبه مو ايدين چنها ايدين جبار المصلح ايييع

بعت اخر شي وركضت للملجأ فرحانة بس يا فرحة ما تمت اول ما دخلت شفتها لازمة الخيزرانة وواڪع دگ بـ مسرة وذيج تفرفح جواها..

بدون وعي وتحسب ركضت دفعتها عنها ووڪعت ؏ الارض اباوعلها فتحت عيونها ولشطتني بالخيزرانة ؏ رجلي..

- اخخخ دادا

- ووجع العاق الحولة اللقيطة اني دفعينييي!! اعلمج لو ما اعلمج

عافتنا ودخلت وانا ما فكرت بشي غير سحبت مسرة لحضني وبوستها اهدي بيها..

- اشش عُمري اسفة ما لحگت عليج

مسرة بشهگة- والنبي رنيم متت من الحر وحسيت بدوخة لذلك رجعت وهي ضربتني

- ميخالف اهدي البنات وين؟

- بعدهم ما راجعين بـ ..

بعدها ما مكملة وشهگنة ثنينه من نسحبت من ايدها گعدت فوگي وقبل لا استوعب شگت الجُبة من يم الصدر وحطت السكين ؏ صدري..

حسيت روحي طلعت من جسمي ورجعت صرخت صرخة وصلت عنان السماء بـ اسم داحي بابا خيبر..

- دخيللللللللك يااااا عليييييي

مر اول يومي الي بهذا المكان بالي نفس الوجع نفس اللوعة متت وحَييت من جديد..

حسيت روحي فرفحت ، گامت عني تضحك بشماته وانا من النار الي تلتهم روحي ظليت ما اعرف شنـو اسوي اركض منا واركض منا لحد ما وڪعت ما حاسه بنفسي..

فزيت ؏ شي رطب يتمرر ؏ جبيني فتحت عيوني بتعب واني اشوف مسرة وسارة ودموع يمي وحدة تفرك بجسمي والخ تسوي كمادات ودموع اسم ؏ مُسمى بس دموعها تصب وهي تعاينلي..

سارة- اخخ منج اخخخ كم مرة گتلج من تضرب وحدة بينه لا تدخلين محد توڪع بيها غيرج

جاوبتها بصوت يابس..
- لو اني بـمكان مسرة تعوفيني؟؟

تأفأفت والجواب وصلنا ، همست..
- وين سُعاد؟

مسرة- نخمدت عساها ما گعدت

طفرت دموع تكمم حلگها..
- اششش ما تعرفين الحيطان الها أذانات لا تسمعج وتموتنا كافي

سارة- يـلا گومن نامن وراچن گعدة من الصبح

گامن بعد ما بوسني واشوف الليل مد ستارته يعني ساعات صارلي نايمة ، جابت سارة شوربة وگعدت تغمس الخبزة اليابسة بيها وتوكلني لحد ما رجعت نمت تعبانة..

فزيت ؏ رفسة بخاصرتي شغت وشوغتي ذبحتني بلگوة فتحت عيوني اباوعليها لازمة الخيزرانة مالتها ومنططة عيونها عليّ..

- شوف لج اليوم ما طلعتي للشغل فـ مثل الحبابه تگومين تنظفين المكان اريده هيج يلمع يلمع واذا گلتي لا..

حركت خيزرانتها بخباثه بسرعة طفرت من مكاني وهمست..

- لا دادا اگوم اگوم

- اي عفية عليج تفتهمين

طلعت وهي طگ بعلجها وحجل رجلها يرن بالمكان گمت غسلت واحس مكان الحرق موتني ياكل بروحي اكل ، تعصبت وبديت اغسل وانظف بالمكان..

جان عبارة عن شقة بيها خمس غرف للبنات الي مثلنا وكل غرفة بيها خمس او اربع بنات ، وغرفة سادسة لـ دادا سُعاد هاي ممنوع احد يدخللها لا بحضورها ولا حتى بغيابها ممنوع منعًا باتًا..

والشقة هلكانه وتعبانه حيللللل وبمكان بعيد عن البيوت والاسواق اذا ردنا نشتري شي لازم ناخذ الطريق ساعة روحة وساعة رجعة..

خمس ساعات ضبط اني اغسل وافرك لحد ما صارت الشقة صدُك تلمع من النظافة ، توني گعدت اريد ارتاح واشوفها دخلت عليه ونترت..

- سوي اكل بسرعة من الي موجود يـلااا

- اي رايحة

گمت بسكته وبدون ما ارادد وياها بالكلام لان هي حامية عليّ غلطة وحدة تبسطني ومحد موجود من البنات ينقذني من ايديها..

صفنت هو شكو غير بيض وطماطة وبصل وهمزين موجودات ايام تخلينه ناكل خُبز يابس وما تجيب مسواك..

باوعت للساعة قريب الـ 2 الظهر والبنات بعدهن رحت بسرعة بسرعة سويت مخلمة وخدرت چاي ما اعرف منو مسوك بس نعمة..

رجعن البنات كلهن إلا مسرة وسارة ودموع ماكو لحد الان والساعة عبرت الـ 3 ظليت الوب ومفرفحة عليهن ، لبست الجُبة والنقاب وطلعت اركض..

اريد اشوف التقاطعات الي يگعدن بيها خاف صار الوحدة منهم شي ، ما اتحمل افقد وحدة منهم اموت..

ساعة افتر من مكان لـ مكان ادور عليهن وماكو اخاف ارجع ودادا سُعاد تعاقبني ويكون عقابي خالي بـلاش والبنات ما راجعات واخاف رجعن واني هنا افتر بدون فائدة..

گعدت ؏ الرصيف دموعي تصب حتى النقاب لزك ؏ بشرتي جسمي يرجف من التعب مال التنضيف ومن الحرك الي موتني واني ما ماكلة شي من امس بالليل..

- شسوي يا ربي ارحمني وساعدني واحميني من شر سُعاد تعب جسمي من الضرب ، اودعتك خواتي ربي لا تشوفني بيهن مكروه

صار العصر والناس رايحة راجعة واني صافنة ؏ السيارات واناشغ اجاني صوت خلي الرجفة تسري بدمي صوت مُستحيل يطلع من بالي وان مرت اعوام..

- بابا محتاجة مساعدة؟؟

رفعت نظري بحركة بطيئة ووڪعت عليّ!! اي اي هذا هو بشحمة ولحمة هذا ابوي الروحي وصديقي هذا نفسه الي شمرني هاي الشمره ، نفسه الانسان الي اهرب منه عُمري كُله..

هذا عمو ڪليم!!

الي صارل مصدر خوفي بدل الامان
صار جرح بروحي كل ما تمر عليّ ذكرى وياه تهيج جروحي..

فزيت من مكاني احس ڪلبي ؏ گد ما ينبض سريع داخل صدري راح اوڪع مغمى عليه ، نفس نظرات القلق والحنية بس ليش طعني؟ مو اني امانته ليش أذاني..

ركضت وعفته وراي عفت ذكرياتي وياه وعفت شوقي إله وركضت اهرب بخوف اهرب منه ومن نفسي الي ممكن تضعف إله..

كان خوفي من دادا سُعاد اقل من خوفي منه فضلت تعذيبها ؏ معرفته الي..

ورجعت بَـس ياريتني ما راجعة وشايفه ذيج الشوفة ياريت سيارة سحگت جسمي وطلعت روحي ولا رجعت وعشت الي عشته من بعدها..

•••••••••••••••

وتستمر الحكاية.. 🚬♣

انستگرامي 🤎✨