رواية دروب الإِندِثـار الفصل الثالث 3 - بقلم زينب صـلـاح 🤎

بقلمي : زينب صلـاح 🧡

لـ روايـة ﴿ دروب الإندِثار ﴾

في الـ part 2 ♡♡

لا تنسون التصويت + متابعة للحساب + التعليق بين الفقرات ☘️

نتلاگة واضمك
بالمكان الميت بدونك
نتلاگة وتدمع عيني وعيونك.

•••••••••••••••••••••••••••♕•

وگفت بـ باب الملجأ التقط انفاسي بصعوبة حاطه ايدي ؏ صدري وصرت اشهك الهوه شهك بسرعة بعدت النُقاب احاول اخلي انفاسي تنتظم بس حتى لو هي انتظمت ضربات قلبي الي تفزز الميت شلون اهديها!!

دموعي لا زالت تنزل وجسمي ينتفض مثل الفراشة الي لسعت طرف جناحها نار ، احس جمرة توسطت ڪلبي بشوفته..

اخخ يا شوفته فززت كل جرح بيه ومسح عليهن بملح..

بعدني بحالتي وهزتني صرخة من الداخل صرخة خلتني اركض بخبال ، اعرف الصوت اي اي صوت اختي وامي صوت عزيزة روحي الي تحميني بروحهل واني افديها بعمري..

لحد ما وصلت للممر الي يؤدي لغرفة سُعاد واشوف المكان يروج بزلم لابسين اطقم سود رسمية شكلهم يخوف والي رعبني من صار نظرهم عليه رجعت الصرخة بس هالمرة من غرفة المخزن الي تبعد عني بخطوات..

رحت اركض وما احس غير طار جسمي بالهوه من واحد منم حاوط خصري ورفعني ورجعني بمكاني بس صارت رجليه بالارض وابتعد فريت راسه براشدي يسواه..

- ايدددددك القذرةةةة اذااا طختنييي اگطعهاااا

بعدني توني خلصت كلامي ووكعت بالارض من رجع الراشدي الي تقرب يريد يضربني ونفتح باب المخزن وشخص صاح بصوت..

- شجاااي يصيـر؟

دار عليه وعدل نفسه مثل الطالب الي واگف گدام المدير وحجه..

- وحدة طولت ايدها ولسانها وخذت استحقاقها سيدي

ما جنت اشوف الي يقصده لحد ما وخر وشفته جان رجُل طويل بملامح خشنة وعيون حادة ورموش كثيفة ضخم الجسد بفك حاد..

- اممم

همسته خوفتني ، قويت نفسي وگمت انكث بجسمي باوعت لـ باب المخزن ونزلت دموعي ، انتبه لـعيوني وگال..

- تخصج الي جوه؟

- اريد خواتي

رفع حاجبه مدهوش وزم شفايفه وهو يهز راسه كأنو يدارك الموضوع ، بنفس اللحظة طلعت من غرفتها سُعاد وگالت بضحكة..

سُعاد- خلصت شغلك بسرعة باشا عذاب ههههه

عذاب- منو هاي الحلوة؟

بلعت ريك وهي باوعتلي بـ استهزاء..
- الحولة منين اجاها الجمال؟

- هههه اذا هي مو حلوة انتِ الحلوة؟

اباوعلها وجهه انطعن وصار احمر بس ماگدرت تجاوبه بشي ، رجع باوع للرجال الي ضربني وگال..

- هاي انتَ ضاربها هيج؟

ظل يرجف وراسه منزله واني قطرة دم ما بقت بجسمي احس تعبت بعد ما اگدر ، الي جاي اعيشه فوك طاقتي..

رنيم- خواتي وين اريدهن دادا فدوة اريد خواتي

عذاب- دخلي!

اشر بـ أيده للمخزن وابتعد عن طريقي بسرعة رحت اركض وقبل لا اعبره لزم ايدي بسرعة نترتها وخزرته امسحها بطرف جُبتي..

- لا تلمسني

- ڪلبج ما يتحمل المنظر جوه

احس مُعدتي نعصرت وبدون ما اجاوبه ركضت جوه وياريتني ما داخله ياريتني ميته وما شايفة المنظر گدامي..

سارة؟ هاي سارة معقولة؟!!

فقدت بمكاني وبعد ما حسيت بشي!!!

.........................................

وگف عمو ڪليم السيارة گدام باب بيتنا جانت الساعة تقريبًا بـ 8 بالليل ، نزل محمل وياي الالعاب والحلويات..

- عمو عمو

- روحه بابا گولي

- كُلش سعيدة اني شكرًا الك

- هههههه العفـو حبيبتي

- كل ما انجح تكافئني هيج؟

- اكيد بس كون درجات عالية هااا

- وعد

- بطلتي الشُجاعة

حط الغراض ودك الباب ، دقيقة دقيقتين رُبع ساعة من الانتظار ماكو!! اتصالات وحدة تتلو الاخرة على آمل الرد لكن ما من مُجيب؟!

- وين بابا؟

- لحظة بناتي داشوف

رفع التلفون وحطه ؏ إذنه شوي وگال..
- هاا حجي رُسن يمكم؟

- لا ليش مو بيته؟

مسح ؏ وجهه عمو كليم وگال..
- استغفر الله لا يابه لا مو بيته يمكن لان صارلنه ساعة ندك بالباب وماكو

- وين يروح اكيد نايم وما يسمع

- ان شاء الله خير يـلا في امان الله

سد التلفون ورجع دك الباب بقوة واحس القلق انرسم ؏ ملامحه واني مو اقل منه صح طفلة بس جنت افهم وخصوصًا بابا جان مريض ، سرفن ردان قميصه الابيض وگال..

- راح اطفر وافتحلج الباب

صدُك صعد ؏ الحايط وطفر فتحلي الباب هو دخل جوه البيت واني دخلت الغراض ، سديت الباب ودخلت توني باب الهول وهو طلع من غرفة بابا وجهه احمر وعيونه تصب..

- شبيك عمو؟ بابا وين؟

گعد ؏ ركبه وسحبني لصدره لفيت ايدي على رقبته بقلق وهو دموعه توڪع ؏ كتفي..

- بابا نايم

- اي

گالها بخنگة وابتعد يمسح دموعة ووجهه بس ما اقتنعت..

- اروح اطمن عليه واجي

قبل لا اروح لزم ايدي..
- لا لا عوفي نايم تعالي ويايه امي مشتاقتلج

- لا اشوفه

- لا تعبيني بناتي امشي ويايه

بدون ما اجاوب ركضت مفلته نفسي من بين ايدي صرخ ورايه بس ما رديت اقتحمت الغرفة شفت بابا مدد ؏ السرير وكل جسمه مغطة حتى راسه..

دموعي نزلت وتداركت الموضوع ركضت بعدت الغطه عن وجهه ودرت لعمو كليم..

- ليششش مغطييي وجههه لا يختنكك

دنكت بست وجهه كله جان شاحب وشفايفه بيض صعدت ؏ السرير وتمددت يمه حاطه راسي ؏ صدره الساكن بدون نفس..

اباوع لعمو ڪليم گعد يم الباب وفحط من البچي وعينه ما شالها منه ، لا هو گومني ولا اني گـدرت اگوم احس اطرافي بردت ولساني نعقد وبس دموعي تصب..

بلحظة غمضت عيني وگعدت ؏ بوسات تتوزع ؏ وجهي ، ضحكت گايمة..

- بابا هذا انتَ؟؟

رسن- بهجة روحي رنيم ڪلبي هذا اني ليش هيج ذبلانه

- عفتني ليش رحت يم ماما واخويه وعفتني شلون انطاك ڪلبك!!

نزل راسه وگال..
- اجيت اگلج شي واروح

فزيت لازمة ايده..
- لا لا بابا لا تروح اخذني وياك

- اسمعيني.. اريدج تصيرين ذيبة بنياتي لا تضعفين وتنهارين الدنيا ما تحب الضعيف الجاي صعب حيل صعب بس انتِ گدها

- تعوفني

ابتسم وجهه يشع نور..
- يمج ڪليم ابوج الثاني

- بس اني اريدك انتَ وياه ما اريد بس عمو كليم

- نلتقي بنياتي بس مو هسه

دنك باس جبيني ، فزيت من مكاني اباوع اني بغرفة عمو ڪليم والعرك يكت من جسمي وهو گاعد على السُجادة وبيده قرآن من حس بيه رفع راسه وابتسم تصدق وحط القرآن بمكانه وتقدملي..

گعد يمي وباس جبيني شلون بابا باسني بالحلم بسرعة نزلت دموعي ابتعد يمسح دموعي وگال..

- صارلج اسبوعين ؏ هاي الحالة يمته اسمع صوتج حبيبتي

تنهد بتعب من ما جاوبته وگال..
- روحي اخذي ملابس سبحي وتعالي امشطلج

بدون ما اجاوبه گمت سويت الگال عليه ورجعت يمه گعدت ؏ الارض وهو ؏ طرف السرير وبده يمشطلي واني بالي سارح بالفضاء..

- خلصت بابا

بلعت ريك وهمست..
- شفت بابا بالحلم

بقا ساكت رجعت همست بتعب..
- يصير اگُلك بابا

غصيت بالكلمة وانفجرت بالبچي بسرعة سحبني مگعدني ؏ رجله وحاضني..

- هو گالج؟

- گال ڪليم ابوج الثاني

- يا عمر ابوج اكيد افرح من تگولينها

كرص خدي وكمل..
- وين فايتلي يصير عندي بنوته تخبل مثلج

- گال راح نلتقي بس مو هسه لعد يمته عمو؟

سكت ما جاوب واني احس اريد اعرف ليش مات بابا طول هذيج الفترة ساكته وما حجيت بس هسه صار لازم اعرف..

- ليش مات بابا؟

- امر الله ولا اعتراض على امر رب العالمين

- شلون يعني؟

- يعني يا بابا هذا يومه وهاي ساعته
ارواحنا امانة من رب العالمين عندنه وهو متى ما شاء ياخذها احنه مو مسؤولين عنها

گام وشالني..
- بعد ماكو اكل وحدنا ما نعزل نفسنا وما نسكت خوش؟

- عمو

- بعد عمج ومن باجر نروح نشتري ملابس العطلة خلصت

- ما اريد

- تعارضيني رنيمي؟!!

وگف بنص الدرج ونزلني صافن بعيوني خجلت منه ما متعودة الاسن بي واطول لساني ، نزلت راسي وحجيت..

- لا عمو مو قصدي بس انتَ تعرف

گعد گدامي ركبه ونص ، لزم حنچي ورفع راسي..

- راسج ما تنزلينا گدام اكبر واحد حتى اني ومن تحجين تحطين عينج بعيني

ابتسمت..
- صار عمو

- وهسه؟

- مالي واهس بالدراسة ما اريد

- بابا انتِ خلصتي نص السنة وبقت الخ شنو تعوفينها وتعيدين من البداية؟ لا رنيم راح داومين وترفعين راس بابا وراسي

- حاضر

- عفية بالشاطرة

اخذ ايدي ونزلنا الكُل جانو گاعدين ؏ السفرة جدو ابو كليم بس شافني نزلت دموعه وگال..

- تعاي بنيتي تعاي يا ريحة الغالي

فلتت ايد عمو وركضت حضنته كُلش احبه لان حنين ويحبني ، رفعت راسي عن طريق الصدفة وشفت عمو عليم اخو عمو كليم خازرني بسرعة نزلت راسي بخوف..

هو وزوجته جُمان حيل مكروهين بس جدو وبيبي وعمو كليم زينين ، واختهم زينة متزوجة ما عندي وياها مواقف هواي بس ما تأذيني تعاملني عادي وبعد وحدة عنده بس متزوجة وابد ما تجي الاهلها ولا شايفتها ما اعرف شنو السبب..

كليم- اكلي بابا لا تصفنين

هزيت راسي وهو صار يلگملي ويمسح شفايفي اذا صار عليها بقايا اكل..

جدو- يمته تلتحق بويه

- عساس هذا الاسبوع حجي بس متردد ما اريد اعوف رنيم

بيبي- يا يمة احنه يمها احطها بطن عيني لا يظل بالك

- اعرف يمه ما تقصرون بس بعد تعرفين امانة رُسن هاي مو قليلة

جدو- بعيوني والله رُسن هم ابني وهاي حفيدتي

ابتسمت الهم بس داخلي مكسور..

جُمان- هههه لا تخاف ندللها ان شاء الله

...
ثاني يوم اخذني للسوق ما جان الي واهس لا بلبس ولا مدرسة بس لخاطر عمو ڪليم رحت وما ردت اضايقه وهو جاي يسوي كلشي علمود يفرحني ويرضيني..

كلشي اختاره ؏ ذوقه ونازك ، صداري ثنين قمصان ثنين احذيه وجنط هم ثنين واخر شي اخذ قرطاسية اشكاال رغم عندي وبعدها بطريقنا شاف حجابات..

- ناخذ؟

- اتحجب عمو؟

تنهد وهز راسه..
- مو هسه من يصير عمرج تسع سنوات يوجب عليج تلبسين وتضمين هذا الذهب الطالع

اخذلي حجابات ثنين نازكات وحلوات ورجعنا جان بيومها فرحان وطاير بيه وحتى اصر عليّ ابدل يريد يشوف الملابس عليّ..

ما كسرت بخاطره وسويت كلشي يريده لان احسه مفضل عليه بالبقاء هنا..

من ثاني يوم عمو كليم التحق واني بلشت اداوم بالمدرسة اول يومين الكل زين وياي ويعاملوني حلو حتى عمة جُمان..

باليوم الثالث توني راجعة من المدرسة تعبانة وهلكانه توني دخلت من باب المطبخ ما احس غير ضربه قوية ؏ ظهري..

جُمان- اي ست الحُسن شرفتي واخيرًا

رنيم- ها عمة شكو

جُمان- وعمعامة التعمعم ضلوعج امشي بدلي وتعاي ساعديني

- حاضر

ما ردت مشاكل لذلك رغم التعب ركضت بدلت ونزلت اساعدها وهي بكل فرصة تضربني بقوة ؏ ظهري خسفته خسف لحد ما دخل زوجهي ، فتحت عيوني مصدومة من باسها گدامي..

بسرعة طلعت اركض ودخلت لغرفتي ايدي ؏ ڪلبي بعدني طفلة وشفت العجب شنو منتظرني بالمستقبل؟!

مرت الايام وعمة جُمان من سيء إلى اسوء بس بالخفية مو گدام جدو وبيبي وياريت لو بس هي حتى زوجها جان يضربني ويأذيني رغم اني كل ما يطلبون شي اسوي علمود اتجنب أذيتهم إلي..

بيوم چنت طالعة من المدرسة وشهگت بفرح من شفت عمو ڪليم منتجي ؏ سيارته بزيه العسكري وبين شفايفه جگاره..

بس شافني شمرها بالارض ودعس عليها من فرحتي ركضت متعلقة برقبته واضحك ، بسرعة بعدني عنه وابتسم بأحراج..

- شلونج باباتي

- هسه صرت زينة حيلللل مشتاقتلك

- ههههه تعاي ام لسان

صعدني بالسيارة ومشه واني انفتحت اسردله كلشي صار وياي عدا معاملة عمة جُمان وعمو عليم لان اعرف راح تصير مشكلة وتوڪع براسي ، نزلني يم محل قريب واشترالي انواع الحلويات ورجعنا نكمل للبيت..

- يمتى اجيت عمو

- من الشغل الج بابا ما تشوفين ملابسي

- هاا يعني اني اول وحدة تشوفك

- اي حبيبتي

- عمو

- بعد عمج گولي

- اريد بابا

وگف السيارة گدام البيت والتفتلي متعجب لان حجيتها مهضومة ، هز راسه وگال..

- باجر اخذج اله

- والله؟

- اهم شي لعيون الحلوة ما تبجي طلبي وتدللين

نزلنه وهو گايدني واني اكمز فرحانة راح اخلص من جُمان توه نريد ندخل وگال..

- شلون نسوه هاي

- شكو عمو؟

- نسينا حلوياتج بالسيارة يـله دخلي اجيبهم واجي

هزيت راسي ودخلت ما احس غير عمة جُمان سحبتني من قميصي وجابتني براشدي حطيت ايدي ؏ خدي ونزلت دموعي مصدومة..

- الدايحححةة ويننن جنتتتي شوووفي الساعةةة بيشششش وينن جنتييي احجييي

تهز بيه وتصرخ بوجهي نرعبت واسمع جدو يصيح من جوه بيها وهي ما ترد ، تسحبني من شعري وتضربني بعشوائية بدون ما تفهمني بيبي تريد تاخذني من ايدها ماكو...

بلحظة ما احـس غير عمة جُمان نرفعت مني ونركعت بالحايط وعمو كليم وجهة مطعون ويتنفس بسرعة احس بحرارة ؏ رقبتي من اظافرها.. 

اجه يدور بيه وعيونه ناطه ودمارات جبينه بارزه بشكل مخيف ، همس بغضب..

- هاي اول مرة تضربج لو مسويتها من قبل؟؟

سكتت خايفة ولمحت عمة جُمان بطرف عيني ترجف مرعوبة ، صرخ بوجهي...

- جاوبييييي

- اي عمو اي

- تضربج؟

- اي

مسح وجهه وضحك احس اعصابه تلفت دار ؏ بيبي وگال..

- هاي الامانة يمه؟

- والله يمه ما شفتها ولا رنيم شكت منها قابل اني اشم كفة ايدي ومن اسألها ليش تشتغلين تگول اني اريد اساعد عمة جُمان

فتح عيونه يباوعلي مصدوم..

- تشتغلين؟

- هاا

- ووجعااا شنو جانت تشغلج

- انظف البيت عمو وو

- كملييي لا تأتأينننن

- تخليني اخبز مرات تگول علمود تتعلمين

حسيته شاط وفقد راح يركض ؏ جُمان بس بيبي وگفت بوجهه..

- بداعت ابوك يا يمه تعوفها فشلة من اخوك تمد ايدك ؏ مرته خلي هو يحاسبها من يجي

- منووو قوووة عينهااا عليناا غير اخووي السبعع بس سهلة ومحمد ودينه هذا الشارب مو عليه اذا ما طلعت ضربج لرنيم من بين عيونج يا مرة اخوي

سحبني من ايدي فوك واني بس صوت نشغاتي تطلع دفعني جوه الغرفة وركع الباب شمر السلاح ؏ السرير وصاح متخصر..

- رنيم بيج شي لا عمو احد مأذيج رنيم لا عمو مدلليني رنيم جُمان تأذيييج لا عمو ماكو منها يابه رنيم شلووون اسلوبهممم يخبل عمو محسسيني بيتي مووووووو هذااااا كلامجججحج

حطيت ايدي ؏ اذاناتي وتراجعت بخوف صار يروح ويرجع بالغرفة وهو يكمل..

- يابه امانة رُسن تأذت اخخخ يا القهر ولج ليييش ما حجيتيليي شييي ليشش سكتتتتي

- عموو

- اششش صوتج ما اسمعه مقهور منج ومن كذبج عليه من يمته وانتِ تكذبين بابا من يمته وانتِ ما تحجيلي وجعج

- بابا

ما اعرف شلون طلعت مني بس جان الها أثر كبير عليّ بحيث جمد مكانه وظهره الي تقدمت واخذت ايده بين ايدي وهمس..

- بابا اهدأ

باوعلي وشفايفه يرجفن..
- هاي الي؟

- بابا گال ڪليم ابوج الثاني ومحد بمعزة بابا ويستاهل الكلمة غيرك

مسح دموعه وقرفص گدامي ضاحك..
- بعد ابوج وعشيرته متوجعه شو اشوف؟

ظل يعاين للمكانات المجروحة بيها ويستغفر جاب عدة الاسعافات الاولية وگعد يعقمهن ويحط عليهن لاصق جروح من خلص باس جبيني وکال..

- توضي وتعالي نصلي

ركضت لغرفتي اخذت ملابس ورحت بدلت وتوضيت ورجعت لغرفة عمو كليم
دگيت الباب بس ما سمعت جواب ، دخلت لازمه بيدي سُجادتي والأزار اجاني صوت ماي من الحمام يعني جاي يسبح!!

ركضت فرشت سُجادتي وسُجادة عمو كليم ولبست الأزار ، رحت لميز المرايا مالتا وحطيت من المسك مالته توني رجعته وطلع لابس تراك اسود وينشف بشعره بس شافني ابتسم..

- شنو هالريحة الحلوة!

- اخذت من ريحتك عمو

- فدوتج بابا فدوتج الريحة وصاحبها

ضحكت فرحانة ورحت گعدت ؏ السُجادة ثواني ولحگني هو وبدينا نصلي..

اعشق هاي اللحظة ويه عمو كليم ، من خلصنا لفلي وگال..

- تقبل الله بناتي

- منا ومنكم صالح الاعمال

ابتسم يهز راسة..
- خلي نقرأ الدُعاء اني اقرأ وانتِ رددي ورايه

- تمام

رفع ايده واني سويت مثل وبده يقرأ بصوت هادئ وبطيء علمود الحك اردد وياه..
جان يوم ثلاثاء بوقتها واحنه ؏ طول الاسبوع متعودين بكل يوم دعاء او حديث مخصص اله..

تونا خلصنا وشلنا السُجادات ما احس غير صار صوت عياط جوه بالبيت اباوع لـ عيونه صارت حُمر ، حط السُجادة ؏ السرير وراح للباب وقبل لا يطلع رفع ايده وگال يحذرني..

- تقفلين الباب وتحطين كتبج وتگعدين اذا كسرتي كلمتي حسابج عسير

بقيت ساكته واباوعله بخوف همس بغضب..
- فاهمممهه!؟

- اي عمو اي

هز راسه وطلع ساد الباب وراه ، حطيت ايدي ؏ ڪلبي بخوف من الي راح يصير واعرف ما راح تمر السالفة مرور الكرام بين عمو كليم وعمو عليم بسبب الحية جُمان..

..

وتستمر الحكاية.. 🚬♣

الانستا راح افتح بي اسك لأي سؤال اجاوبكم!
احبكم 💙