رواية دروب الإِندِثـار الفصل الثاني عشر 12 - بقلم زينب صـلـاح 🤎

بقلمي : زينب صلـاح 🧡

لـ روايـة ﴿ دروب الإندِثار ﴾

في الـ part 10 ♡♡

لا تنسون التصويت + متابعة للحساب + التعليق بين الفقرات ☘️

‏وجهُك
‏ضحكتُك
‏رؤيتك
‏والتواجد معك
‏« حياة أُخرى »

•••••••••••••••••••••••••••♕•

رفعت راسي تاركه القلم البيدي ما اعرف شلون مر هذا السؤال بالي بس دائمًا هيج اني اسئلتي غريبة بس عمو يگول اني احبها نزلت من السرير وتقدمت يمه بس لمحني مد ايده وطفه المُسجل الي جان مشغل بي اللطمية..

رنيم- عمو

مد ايده وخله خصلة من شعري وره اذني ورجعت يشتغل ؏ الحاسبه وهو يگول..
- عيونه بابا

ابتسم وسألته بدون تردد..
- عمو شلون اگدر اطلب شي من رب العالمين

ترك الي بأيده ودار عليّ عاقد حواجبه وابتسامه خفيفة مزينة شفايفه..

- سهلـة ، بس شنو محتاجة؟

- اريد اطلب منه يحفظك الي لان ما عندي غيرك بهاي الدنيا

اباوعله عيونه نملت دموع تقرب باس جبيني وگال..
كليم- روحي جيبي دفترج الحلو داردلج وتكتبين

هزيت راسي مرارًا وتكرارًا بفرح وركض لغرفتي جبت دفتري الي اكتب بي اي شي يعلمنيا عمو كليم ورجعت لگيته ؏ نفس گعدته ومبتسم بعيون مليانه دموع..

هز راسه وگال..
- اقري سورة الكافرون بعد طلوع الشمس يوم الجمعة عشر مرات وبعدها ادعي شنو بالج وان شاء الله راح يستجيب

- بس!!!

- ههههه قابل شنو تردين

- كُلش سهلـة عمو وهمات عگب باجر جمعة وراح اگدر اطلب حاجتي بأقرب وقت

لزم ايدي ثنينهن وباسهن وگال بصوت واثق..
- حتى لو ما سويتي هيج اني مستحيل اعوفج رنيمه انتِ امانتي وقبل لا تكونين امانتي انتِ بنتي وعزيزة گلبي

غطيت وجهي بيديه خجلانه وتعالت ضحكاته بسبب فعلتي الطفولية..

ㅤㅤㅤ
ㅤㅤㅤ
ㅤㅤㅤ
ㅤㅤㅤ

فزيت من شرودي ؏ فتح الباب ودخوله وهو شايل بيده صينية الاكل صديت عنه بحقد ، حطها مقابيلي وگال..

عذاب- وتالي ويه عنادج رنيم وتالي!!

ما جاوبته ، جان بقمة غضبه لان مر اسبوع ؏ الي صار واني ارفض اكل من قهري ، بنفس اليوم الي راحن بي خواتي انهاريت من عرفت هو كاشف كلشي عدا الرسالة..

بيومها اخذني وطلعني من البيت وانتقلنا لبيت ثاني عرفت انُ اني هذا سجني وماكو امل ارجع لحياتي ولا التقي بعمو مرة ثانية ولا راح اگدر اشوف خواتي..

عذاب- بلگوه مصبر نفسي عليج رنيم الشروط والاتفاق ضربتيهن بعرض الحايط وبعدني ساكت لان احبج بس مال تضربين عن الاكل وتأذين نفسج ما اسكت واتعبج والله!

ابتسمت تك خد..
- لا تجيب اسم الله ؏ لسانك القذر كلك خلك واحد سكير شنو انتَ وتجيب اعظم اسم بالكون ؏ لسانك وتلوثه

خزرني ساكت شوي وگال..
- اكلي!

- ما اشتهي

فرك وجهة وگال كاز ؏ اسنانه..
- خواتج لو مو بيت كليم لو بحضنه اطلعهن واخذهن وتندمين لا تخليني افقد صبري ويااااج

- ما تگدر

- هههه تتحديني بسيطة

گام يريد يطلع بس اني تملكني الخوف ، خاف يسوي بيهن الي سواه بسـارة؟ بسرعة صحت ..

- راح اكل

باوعلي بطرف عينه وأشر ؏ الاكل وصدك گعدت وبديت اكل وهو گاعد ؏ الكرسي مقابيلي لحد ما خلصت اخذ الصينية وطلع..

تنهدت بتعب وطلعت وراه شفته حط الصينية بالمطبخ وعقد حواجبه من شافني لان طول هذيج الفترة ورغم عايف الباب مفتوح ما چنت اطلع وحابسه نفسي..

- عادي اطلب منك شي؟

ابتسم وتقربلي بلهفة..
- عيوني الج أمري

- اريد سُجادة وأزار صلاة وقرآن

صفن بوجهي ثواني وبعدين هز راسه بالقبول..
- هسه اوصيهم يجيبولج

- القبلة منين؟

سألت بعفوية بس هو بهت وضل يتلفت منا ومنا حك شعره وگال بحرج..

- ما مـا اعرف! هسه اسألج

عافني بصدمتي وطلع ، شنو من بشر هذا القبلة ما يعرفها من اي اتجاه سُجادة وقرآن ماكو بالبيت بيا قوقعة من العالم اني عايشه شنو هذا المستنقع الي دخلتله؟!!

رجعت صعدت وفكرة تاخذني وفكرة ترجعني وين تاليتي اني؟ شنو مستقبلي من كل الي جاي يصير؟ معقولة راح ابقى اسيرة عذاب وهذا يكون قدري؟!!

مجرد الفكرة قشعرت بدني وخلتني ارجف ابتسمت فرحانة واني اعرف هسه خواتي بين ايادي امينة اعرف انُ وصلت لهاي الحالة بسبب ذيج العائلة بس همات اعرف عمو كليم ما راح يعيد غلطته بي ويه خواتي الي دزيتهن اله امانة!!

جان ضميري واصل اقصى مراحلة الاطمئنان بمجرد فكرة وجود خواتي بقربه..

باوعت للباب الي نطرق وبعد لحظات نفتح وجان بيده كيس رفعه وگال..

عذاب- هاي طلباتج رنيمي

گمت بفرحه واخذتهن ، شفته يصفن بالحيطان اخر شي گال..

- من هاي الجهة القبلة سئلتلج

هزيت راسي وگعدت ؏ السرير مبتسمة بفرح طلعت القرآن وعيوني لمعت جان شكله يخبل لون بُني وتطريزه ذهبي متت بي!! والازار هم كُله نقـش ورود ولونه بُني والسبحة خرزه بُني وخرزة بيضه كلش عجبتني التفاصيل..

عذاب- دوم اشوف الفرح ؏ وجهج رنيمي

باوعتله وگلت..
- جنت سعيدة بس من دخلت حياتي دمرتها

- كسري لگلبي بعد كسري بس هم فدوة الج عذاب وگلبـه

گالها وطلع بسرعة نزلت دموعي مسحتهن وركضت للحمام بدون ما اضيع دقيقة وحدة توضيت ورجعت للغرفة فرشت سُجادتي ، اصلي ودموعي تنزل بغزاره رغم التعب جان عندي آمل برب العالمين انُ راح يفتحلي باب من ابوابه الواسعه ويفرجها الي بيوم..

جنت اشبه الصبر بـرمضان!
مثل ما نصوم متأكدين تمامًا أذان المُغرب راح يجي!
متأكدة بيوم راح انال تعب صبري وربي يفرجها الي من حيثُ لا احتسب..

حطيت جبيني ؏ التُربة وانهمرت دموعي گلت بصوت مرتجف..

- اللهم يا منجي يونس من بطن الحوت ويا مخرج موسى من البحر ويا منجي نوح من الطوفان اللهم اسألك ان تُنجيني من ما بُليت به وتفرج عني ضيق صدري وتُخرجني مما اوقعتني بهِ نفسي

مرت الايام والاسابيع وصارت الشهور تمشي ببطئ وخلال هاي الفترة جانت مواساتي الوحيدة هي الصلاة والقرآن الي ختمته اكثر من مرة
بهاي الفترة تغير عذاب حيل صار ينتر ودومه معصب وبدأ يلح ؏ الزواج..

وبكل مرة جنت ارفض واشوفه يزيد غضبه بس ما جان يأذيني او يضربني جان ينزل ويعوفني بس اسمع صوت صريخه وتكسيره يوصلني ويصعدلي تعبانه يهمس..

عذاب- ليش ما تحبيني ليش ما تحتويني تعبت؟

ويكون جوابه الصمت اذا الحيطان تحجي اني احجي لان اخاف يسويلي شي وهو مو بوعيه خصوصًا من يشرب ويفقد كلش حتى الباب اقفله واغلب المرات هيج ويكون كلامه من وره الباب وبنبرة حيل مهزوزة..

ㅤㅤㅤ
ㅤㅤㅤ

الــساعة 30 : 7 بالليل

جانت ايام شهر الخير رمضــان ومن افطر واخلص اكرس وقتي البعدها للصلاة وقرأة القـرآن الكـــريم اندك الباب بوقتها تصدقت وسمحتله يدخل
دخل بيده علاگه سوده حطها ؏ السرير وگال راسم ابتسامة..

- اعرف البنات يحبون هاي الحبشكلات وهم انتِ صايمة واكلج قليل گلت تتونسين بيهن

- عذاب!

- يا گلب عذاب أأمري

تجاهلت كلامه وسألته.
- تالا وين؟

ابتسم وگال..
- شخص ثقه خطبها مني وهي وافقت وراحت تبني عشها الله يوفقها

- امين

- ليش سئلتي محتاجة شي؟

- لا استغربت عدم وجودها

هز راسه ساكته وره شوي گال..
- بعد العيد عندي مُفاجأة الج

رفعت عيني اله بتوتر والقلقني اكثر ابتسامته الخبيثه العابثه الي اتسعت ؏ وجهة..

- مُفاجأة شنو؟

- اذا گلتها تبطل مُفاجأة!!

ضحك بصوت وطلع ، ما جنت اعرف انُ هاي المُفاجأة مسار جديد من حياتي وراح ياخذ الجُزء المتبقي من طاقتي وقوتي ويهدمها..
ㅤㅤㅤ
ㅤㅤㅤ
ㅤㅤㅤ
•••••••••••••••••••••••••••
ㅤㅤㅤ
ㅤㅤㅤ
ㅤㅤㅤ
ســـارة•

عُمري وحياتي ما توقعت اشوف هذا الانسان إلي جنه طول الوقت نذمه وندعي عليّ بسبب فعلته ويه رنيم
انسان بعمري ما توقعت يكون بهاي الرزانه والوقار وشايل بوجهة رحمة وودّ مو طبيعي..

ابتسامة هادئة جانت تزين شفايفه ومخليه رسمة شواربه حلوة وعيونه مدمعات شفافه رجفت ورجع گال يتأكد..

كليم- رنيم؟

- مو اني

ضحك ومسح وجة وگال..
- اعرف اعرف من عيونها بس انتِ جايه عن طريقها مو؟ ليش ما اجت وياج؟

- اني ما اعرف تفاصيل هواي بس دزتلك رسالة اعتقد راح تكون موضحتلك بيها كلشي

بلع ريك بتوتر ورفع عينه للمدعوا بقسـورة وگال بلهفـة..

- شوف الكرفان فارغ واذا لا فرغة بسررررعة

ركض ينفذ الگاله وهو رجع يباوعلي وينصي ما اعرف ليش ما يحط عينه بعيني..

- زينه هي بابا؟ ما بيها شي؟

سارة- محتاجتك

رفع عيونه للحظات بعيني مدمعات وحُمر بسرعة دنك راسة يفرك بوجهة ، لحظات مرت بصمت بس توترة يشهد ورجع قسورة..

قسورة- فارغ خالي

كليم- امشي ورايه بابا

لحگته بخطوات بطيئة وعيني تتلفت ؏ خواتي اخاف يصير بيهن شي تندمت لان ما جبتهن ويايه فززني صوت صرير الباب المزعج وهو يفتحة يطلب مني ادخل وفعلًا دخلت..

عصرت الرسالة ومديتها اله..
- كلشي مكتوب هنا اعتقد اختي محتاجة مساعدتك ما عندها غيرك حاليًا تعذبت بما فيه الكفاية اترجــاك ساعدها

كليم- افديها بروحي بس خلي افتهم

گعدت وهو اخذ الرسالة وگعد مقابيلي وقسورة وگف وراه واضح يثق بي كلش لدرجة خلاه يمه وما منعه يقرأ الرسالـة ، انصدمت من شفت دموعه توكع ؏ الورقة وهو يقراها وشفايفه ترجف ما مسيطر ؏ نفسه..

تذكرت رنيم كاتبتلي بالرسالة..
(ظلمته وظلمت نفسي)!

الرجال يحبها اكثر من روحه يرجف ؏ كلمات من حبر ؏ ورقة بس لان منها! حسبي الله ونعم الوكيل من الي جان سبب بوصولهم لهاي الحالة ثنينهم تأذوا...

حط ايده ؏ عيونه وگال..
كليم- اخخ يا بويه يا امانة اخوي

ركض قسورة ترس كلاص ماي ورجع غسل وجهة وشربه وهو يمسح ؏ صدرة..

قسورة- خالي فدوة اروحلك لا يصير بيك شي ما ناقص انتَ وبعدين وصلنالها ما بقه شي وترجعلك بس ؏ كيفك ويه رويحتك

- ولك قسورة بنيتي متعذبة واني انام احسن نومه واكل احسن اكله وهي متحسرة ؏ العيشة ولك بنتي اني تبيع بالتقاطعات بعد ما جانت مدللة ولك بيااااا حقققق هيجج يصير بطفلللة لو اطللللع عليمممم منن گبرة وامثلللل بجثتتته احدددد يگولللل ليشششش؟!!

انهار اخر شي وقسورة حضنه وجهة مطعون ولازم نفسه بالگوة علمود ما ينهار ويه خالة ، گعده يمسح ؏ صدره بسرعة انتفض..

كليم- تندلين المكان؟؟ خواتج وينننن؟؟؟ رنيم كاتبة بالرسالة ليش وحدججج

- مناك ؏ الشارع خفت اجيبهن وياي

كليم- روحح قسورة روحح جيبهن لا يصيبهن شي خليهن بعيونك ، وانتِ بابا تندلين المكان؟؟

- اخربط بس اعتقد مسـرة تنتبه لهيج اشياء

هز راسه وگعد حاط راسه بين ايدي ويذب حسرات بسرعة سحب اللاسلكي وبلغ علمود يطلعون دوريات نروح للبيت نجيب رنيم
اتسللت فرحة بداخلي واخيرًا راح ترجع لحضني ونرتاح سوه..

نفتح الباب ودخلن بس شافني ركضن لحضني يبچن وقسورة دخل ينافخ ووجهة مطعون..

- شكو شبيجن؟

ما ردن علي ،ّ زمخ بينا وهو يتقدم معصب..
قسورة- ست مجرة الي بطول زري چذبت علينا جان هسه لبنيه راجعة الاهلها

سحبه كليم..
كليم- شكو شبيك؟

- باااوع خالي وشوووف منوو هناا

دار علينا الرجال لحظات واتسعت عيونه عرفت السالفة كلها لان من لازمينها ومحققين وياها كذبت عليهم هي خنست وبس صوت شهگتها الخفيفة واضحة ، قبل لا يحجي شي گلت اني..

- ما جانت عدنا ثقه بيكم كل الي نعرفه انتَ البعت رنيم شلون نرجعها الك؟ بس بعد ما عرفنا الحقيقة ما جان عندنا حل غير انُ نلتجأ الك فـ لحد يحاسب خواتي روحوا حاسبوا الي وصلنا لهاي النقطة وهو اخوووك

ضرب ايد بأيد..
- ليش لوو اخوووي عايش ما بلعتب اذا ما ضيقت الدنيا عليّ بس رب العالمين اخذه قبل لا نتحاسب

بنفس اللحظة اجاه بلاغ دار ؏ مسرة وگال..
كليم- تندلين الطريق بابا؟

باوعت لـ قسورة الي جان خازرها طول الوقت وهزت راسها بـ اي ..

كليم- يلا بابا امشي ويايه وانتَ قسورة اخذ البنات خليهن يم امك وگللها هذول امانة خالي

قسورة- رجلي ؏ رجلك ما اعوفك وحدك

سارة- ولا اني اخلي مسرة تروح وحدها وياكم

فرك وجهة وگال..
كليم- يلا بسرعة الله باليني بعنادكم

مشينا وياهم ورجف گلبي من شفت سيارت سود مسطرة يجن بـ اربعة إلى ست سيارات مليانات زلم لبسهم اسود ومقنعين نصفهم واسلحتهم بيدهم بس طلع ضربوله تحية واكو عندهم ميانة قوية بالسلام وياه..

دفعنا قسورة وگال..
- صعدن بالسيارة وراسج بالارض يلاا

صدك ما كذبنا خبر بسرعة صعدنا وبقوا بالنص ساعة يحجون وكليم اشوفه اعصاب ينتر نتر يهدأ دقيقتين ويرجع يصيح وجهة مطعون حسيته من صدك مـيت قلق عليها ويرجف مشتاق لشوفتها الله يعين گلبـه الي تحمل كل هاي السنوات بس ما قطع الامل بشوفتها مرة ثانية..

اجه للسيارة البيها احنه وصعد بمكان السائق وقسورة يمه سد الباب بقوة وساق..

قسورة- خالي!!

- اسكت قسورة ما اريد اكسر گلبك

- بس خالي هاي القوانين وتطبق ؏ الكُل

- مو بنتي اني التدخل مراكز وطياح حظ هذا هُمام يمسلت

- خلي نلگاها وندبر الموضوع نحله ان شاء الله بس انتَ مريض كافي لا تعب نفسك هواي ضغطت ؏ روحك اليوم

- ما اريد شي من الدنيا غير ارجعها لبيتها وبفراشها الدافي واروح لقبر اخوي بوجه ابيض اگله رجعت بنتك سالمة بس هذا الگ*** هُمام نرفزني عبالك غريبة عليّ ما عنده غيره

قسورة- ههههه صاحبك يمون

- يولي صاحبي منين اجه

- صح صح واني اشهد هههه

خزر قسورة ورفع عينه بالمراية الامامية وگال..
كليم- عذرني يابه

سارة- عادي

هز راسه وكمل الطريق لحد ما بدت مسرة ادلي ؏ طريق الـبيت وكل ما نقترب احس بروحي وجع مو طبيعي من ناحية فرحانة راح ارجع اختي بس اكو شعور سيء بداخلي وكلش خايفة!!

دقائق ووكف السيارة گدام البيت وگال..
- متأكدة هذا البيت بنتي؟

مسرة- اي عمو حتى اسأل سارة ودموع

سـارة- اي اي هو

دار علينا وگال بتحذير..
- اي شي يصير ما اطلعن من السيارة ابقن هنا

هزيت راسي بـ اي وهُما اتفقدوا اسلحتهم ونزلوا صاروا الشرطة ينتشرون بكل مكان ويحاوطون البيت وكل مكان يؤدي للخروج او الهرب واني انتظر بنفاذ صبر ربع ساعة نص ساعة وصار صوت عياط قوي..

وجع گلبي ، حطيت ايدي ؏ گلبي ونزلت ادموعي من شفت قسورة وواحد ثاني لازمين كليم منا واحد ومنا واحد وهو وجهة بي دم!! ارتفع ضغطة والكل انخبص بيّ..
بوقتها عرفت اختي ماكو! واي امل برجوعها ويانا مات ويه وگعته هاي..

رجعنا ويه المدعو هُمام كلنا مخذولين وقسورة اخذ خالة للمستشفى لان حالته كلش تخربطت من عرف هي ما موجودة والبيت فارغ ، گلبي حسني مستحيل يطلعنا بدون ما يضبط وضعه ويضمن رنيم يمه للأبد..

صف السيارة گدام بيت مرتب وعالي من هذن لبيوت الزينة بناءها حديث
گال وهو ينزل..

هُمام- نزلن خوية

اتبعنا بتعب واضح وانكسار ، دك الباب بقوة حسيته راح يكسرة رفعت عيني مستغربة مرت دقائق واجانه صوت مره من وره الباب..

نجلاء- منو؟

- اني هُمام!

فتحت الباب وبين ؏ ملامحها الذعر جانت تقريبًا يجي عمرها بنهاية الاربعينات بس شايله حسن وجمال مو طبيعي عبالك بنت العشرين..

نجلاء- شكو خويه بس لا ابني بي شي؟!

هُمام- لا كليم صعد ضغطه واجيت اوصلج امانته وارجع

اشر علينا بنهاية كلامه وتحولت انظارها علينا توها انتبهت..

نجلاء- هلا ماما دخلوا بس خوية كليم شبي ليش صار وياه هيج

- البنات يوضحولج خلي اروح انا يلا في امان الله وابو ريم يگول خلي تقفل الباب ولا تفتحه لكائن من يكون حتى الباب الداخلي

- صار

دخلتنا ودخلت ورانه وصدك قفلت البيبان!
جان البيت جدًا مُبهر وخيالي وريحة النظافة البي تجنن..

گعدتنا بالصالة واختفت لحظات ورجعت شايلة كاسات ماي وعصاير وجهة جان بشوش وعليّ ابتسامة مُريحة للعين..

نجلاء- ولو تعبانات وما اريد ازيدها بس من وين تعرفن ابو ريم؟!

سـارة- ابو ريم منو؟

ضحكت وجاوبتني..
- ياا هههه غير اخوي كليم

- احنه من طرف رنيم

بهتت ابتسامتها وضربت ؏ صدرها..
- لگاها؟!!

ردة فعلها جانت غريبة اكتفيت هزيت راسي بـ لا
رجعت بعد فترة گالت..

- تعلعل اخوي اسنين ؏ شوفتها وينها هسه هي؟

- ما نعرف هو يدور عليها واكيد راح يلگاها

هزت راسي بقبول گالت و؏ وجهة حيرة..
- گومن ماما گومن نامن وارتاحن ويجي ابو ريم ونفتهم منه وان شاء الله ما يصير إلا كل خير

مشت گدامنا واحنا وراها جان الطابق الثاني بي خمس غرف وصحيات ، فتحت وحدة منهن وگالت..

- دخلن وارتاحن لا تفكرن بشي

هزينا راسنا بالقبول وهي طلعت وسدت الباب وراها گعدنا وحضنا بعض ، جنت ضايعة حيل ضايعة ومــا اعرف شنو اسوي وجع بگلبي ؏ فراك اختي غفينا ؏ وضعنا واني من التعب وشوي حسيت بـ اماني نمت ما ادري بنفسي..

فزيت بعد فترة باوعت بصفي دموع غاطة بالنوم ومن الجهة الثانية مسـرة فتحت عيوني من شفت مكانها فارغ وحسيت دگات گلبي تسارعت..

توني وصلت للباب وسمعت صوت صرخة نكتمت !!

..

وتستمر الحكاية.. 🚬♣

الخميس بارت

ان شاء الله باچر انزللكم الاشباه

الانستا راح افتح بي اسك لأي سؤال اجاوبكم!
احبكم 💙