رواية دروب الإِندِثـار الفصل الحادي عشر 11 - بقلم زينب صـلـاح 🤎

بقلمي : زينب صلـاح 🧡

لـ روايـة ﴿ دروب الإندِثار ﴾

في الـ part 9 ♡♡

لا تنسون التصويت + متابعة للحساب + التعليق بين الفقرات ☘️

‏‏فما العمرُ إلا مرحلاتٌ نجوزُها
‏على الشوكِ أَحيانًا وحينًا على الزَّهر.

•••••••••••••••••••••••••••♕•

رحلة زمنية لما قبل ثمان سنوات حيث ارتدى ذلك المنزل البسيط الاسود على اختفاء طفلة صغيرة العُمر ولا يوجد خلفها أثر ليتم تعقبه حتى شاء القدَر!

كليــم•

اجمع بـ اغراضي والفرحة مالية روحي وهذا الشي جان واضح ؏ ملامح وجهي بحيث ما خلص من تشمر وتحشيش اصدقائي ، اخيرًا بدت حياتي تمشي صح ومثل ما اريد..

شگد جنت رافض بنت خالتي بس سبحانه الله الي زرع حُبها بگلبي اي اعترف حبيتها لان جانت أُنثى رقيقة هادئة تستاهل الحُب بس شي واحد مأذيني حيل تغار من رنيم!

رغم اني غير بنتي ما اشوفها بطريقة ثانية! اتمنى تصفي گلبها اتجاه هاي الطفلة حتى صدك ارتاح لان اني مستعد اتخلى عنها وعن حُبي الها ولا اعوف امانة اخوي..

تنهدت بحسرة واجاني صوته من وراي..
هُمام- خيرك عريسنا تتحسر؟

درت عليّ بسرعة تغيرت ملامح وجهة وگال بقلق..
هُمام- رنيم بيها شي؟

- ليش ما تجي وياي تشوفها

- لا كليم فدوة سد هذا الموضوع

- ليش هُمام ليش مو خالها انتَ لك طفلة هاي محتاجه اهل بعد ما فقدت ابوها

- انتَ مكفي وموفي ماكو داعي الي

- زين ليش جاوبني وريح گلبي؟

- بيا عين اباوعلها صدك تحجي انتَ؟ شنو ما تعرف الي صار بيني وبين اختي؟

- شي ماضي هذا ابو الهَمم واختك من تحس بيك محتوي بنتها راح تسامحك ويرتاح بالها وتغمض عينها بقبرها

- ماتت بسببي

گالها وعيونه حُمر عض ؏ شفته يحاول يكتم غضبه ويمنع دموعه من النزول ، رحت گعدت يمه وطبطبت ؏ ظهره..

- هذا قدر هُمام قابل انتَ سويت الحادث متعمد مو هاي انتَ هم وصلت للموت ست اشهر بغيبوبة ليش محمل نفسك ذنب ورنيم من راح تعرف الحقيقة ما راح تكرهك تره گلبها طيب

- شنو؟ لحظة شنو تعرف الحقيقة؟!!

- رُسن ما گللها شلون ماتت امها عبالها بالولادة

نزلت راسي من نطط عيون وضرب ايد بأيد..
- لا يا الله شلون تسوون هيج

- كافي هُمام اطلع من الوهم البي انتَ اختك وطفلها جان هذا يومهم والحادث قدر مكتوب صح جان بينكم خلاف بس انتَ ما متعمد تقتلها ليش ما جاي تستوعب

هُمام- بس اني الزيدت السرعة رغم گلتلي خايفة وهي تحضن نفسها وطفلها وما اهتميت هسه اني السبب لو لااا

- لا اكيد لان جنت بساعة عصبية واكيد ما تريد الموت لاختك

گام وكف بعصبية..
- كافي كليم سد الموضوع لان منتهين منه لبنية يمك مرتاحة واني واثق بيك بس اذا گلت ما اگدر اتحملها يختلف الحجي

اني جان كل نيتي يجي يشوفها وتعرف عندها خال بس هذا عباله انطيها اله..
- شغلة خليها بالك اليوم وباجر وبعد الف سنة خاف تغير قرارك رنيم ما تطلع من بيتي اني من جاي احجي وياك هسه اريدها تعرف عندها خال لا اكثر ولا اقل فـ شيل من بالك بيوم انطيها الك ؏ گص ه‍الرگبة

شلت الجنطة ووصلت للباب واگف..
- مو ما تجي للعرس قسم بالله تنتهي وياك اليوم الدين

عفته يضحك وطلعت نرفزني الغبي..

ودعت الجماعة وطلعت راجع للبيت فرحان بس اكو بگلبي فراغ ووجع ما اعرف ليش حاس اهلي بيهم شي طول الفترة الماضية اتصل وبكل مرة ينطوني عذر شكل عن رنيم وامي وابوي..

حتى هيام من احجي وياها ترتبك وتغير الموضوع كلشي يأكدلي اكو شي چبير صار وما جاي يحجونه الي..

صفيت السيارة گدام المدرسة ووگفت انتظرها تطلع صارت البنات تطلع واني كل شوي اگول اجت هسه تجي بس ماكو فرغت المدرسة ورنيمه ماكو انعصر گلبي بس قررت ادخل واستفسر..

دخلت للمديرة وهي استقبلتني بالترحيب الحار لان تعرفني قبل كلشي قطعت كلامها وسألت..

- رنيم رُسن ما مداومة اليوم؟

المديرة- سيدي هي صارلها فترة ما تجي وهسه من شفتك گلت اسألك عليها!!

جوابها زيد نار گلبي ، تشكرت منها وفهمتها اني جنت بالشغل ما اعرف سبب غيابها وطلعت للبيت اسوق مثل المخبل..

صفيت السيارة ونزلت اركض المفتاح بيدي يختض بالگوة سيطرت فتح الباب ودخلت اصيح..

- ياااابه

دخلت واشوفهم كلهم متفاجئين من وجودي محد يعرف راح انزل اليوم!! اباوع ابوي وامي موجودين  عليم وزوجته حتى اختي نجلاء جانت موجودة هي وولدها ، رفعت راسي وگلبي حاسني بيها شي...

- رنييييم بابااا انيي اجيتتت

ماكو بس صدى صوتي تردد بأذني رجعت عيني امي وابوي يبچون روحي فرفحت بس ما اريد اسمع خبر مو حلو..

- رنيم وين؟؟

اجه عليم ولزم ايدي ماخذني للكرويته وگال..
عليم- اهدأ وتعال اگعد

نترت ايدي منه..
- شكووو فهمني بنتي وين؟ يابه احجيلك شي!!

ابو كليم- اگعد وليدي ونفهمك

- احجي ما اريد اگعد شنو مريضة؟ نايمه فوك مو؟

نجلاء- خويه بغلاتي عليك اگعد ونحجيلك

گعدت اهز برجلي واباوعلهم واحد واحد يصفنون بوجوه بعض واحد يشمرها ؏ الثاني اخر شي مليت من الصبر..

- احجوااااا عاااد

ابو كليم- لبنية مختفية ماكو

- شـ شنو مختفية؟

عليم- اكيد شردت للشوارع

درت خازرة وامي ردت بـ استنكار..
- لا وليدي رنيم تحجبت وجانت تنتظر جيت كليم بفارغ الصبر حتى تبشره بـ التزامها للحجاب شنو الي يخليها تشرد

گلبي رجف وحسيت نغزات بگلبي مو طبيعية يا روح عمج تحجبتي ومنتظره تفرحيني تالي لا اني فرحت بشوفتج ملتزمة ولا انتِ فرحتي بردة فعلي واخذتي هديتج الواعدج بيها..

مسحت وجهي وحجيت بصعوبة..
- يمتى؟

ابو كليم- صارلها اسبوع قدمنا بلاغ بس ماكو مثل الي نشگت الارض وبلعتها ماكو اثر

نجــلاء•

جانت الكلمات وقعها ثگيل ؏ اخوي السبــع بحيث بنفس اللحظة السمع بيها خبر عزيزته وكع لازم گلبه ومن هاي اللحظة كليم ما رجعتله صحته صارت عنده ذبحة صدرية وگلبه حيل تأذى بحيث شهر هو بسرير المستشفى ما يگدر يگوم..

ومن يضغط ؏ نفسه يمشيله خطوتين ويغمى عليّ لتاع گلب اخوي بفراق رنيم ، مرت سنة وهو يدور عليها كلها گالت ماتت ماكو الها أثر لا بغداد ولا خرج بغداد كل السيطرات جانت تفتش الطاب والطالع لخاطره لان معارفه هوااي..

اجت السنة الثانية واخوي يخلصها بچي الليل كله عليها والنهار يدور ما قطع الامل منها وفوك مصيبته اجيته اني مطروده مذلوله اني وجهالي عيالي طردوني ما يگدرون يتحملون مسؤوليتنا الچبيره..

استقبلنا وعامل ولدي مثل ابوهم الله يرحمه ما نقص عليهم شي ابد ، وبعد ما الكل تقبل اختفاء رنيم عدا هو طبعًا بدت امي تنك وتلح ؏ زواجه..

؏ ابو لبنيه إلى متى تبقى تنتظر بالبداية رفض وانتفض مستحيل وما اعرس لحد ما زاد الضغط شرط بدون عرس وفرح لان ماكو فرح بگلبه وهذا العرس بس حتى يرضيهم..

هيام ما رفضت بالعكس رحبت بالفكرة وصار العرس وتزواج بدون ابتسامة هيام احتوته وواسته ؏ غياب رنيم لدرجة صار اول ما يدخل للبيت يتلفت يريد يلمح ظلها وگدام الكل يحضنها..

جانت الفترة الاولى بزواجه شوي ارتاح بوجوها واحنه هم ارتاحينا من شفنا اكو تحسن عليّ ، لحد بالسنة الثالثة من فقدان رنيم اكتشفنا هيام حامل وبعد شهور عرفنا حامل ببنية..

الفرحة هنا ما وسعتنا بس الي كسرها حزن لـ كليم الي رجع تجدد ووجعنا من گال..

- مو كفو اني ويصير عندي بنت الاولى ضاعت بدون اثر هاي شيصير بيها؟

حتى هيام انكسرت فرحتها ، وبالفترة الاخيرة بديت اشوف غرابة بتصرفاتها ويه عليم وجنت استغفر ربي ما اريد اخذ ذنبها لو ذب اخوي..

ولدت هيام بنية مثل الگمر كليم من شافها صار يرجف عليها رجف وجان اسمها مو بالحسبان ابدًا
"ريم" محد توقع يسميها بـ اسم مقارب لـ"رنيم"

اعترضت هيام واحتجت ومن غيرتها من رنيم صارت تهمل بنتها الشي الي سوه فجوة بينها وبين كليم لان جانت ريم خطة الاحمر ما يسمح لأحد يگلها اوف..

بدأ اهمال هيام لريم وكليم يسوي فجوة لدرجة ما صار سرير واحد يجمعهم هي بغرفتها وهو ينام بغرفة بنته الي هي سابقًا غرفة رنيم..

لحد ما اجه اليوم الي صارت بي الفاجعة الي سببت بموت ابوي وشلل امي وانقطاع كليم عن الحياة تمامًا ..

فاجعة لا بالبال ولا بالحسبان !!

بيوم ظهريه وشمس الصيف تحرك حرك جانت جُمان بيت اهلها وولدي كلهم بالمدرسة وابوي وامي ملتهين بصلاتهم لا يحلون ولا يربطون ، وگفت اطبخ وهيام يمي تسوي بالخضره..

ردت معجون بس جان مخلص..
- شلون سالفة هاي!

هيام- شكو نجلاء؟

- ماكو معجون وياهو يروح يجيب

صفنت شوي وگلت..
- رايحه اجيب من الاسواق واجي

هيام- بعيدة!

- ميخالف اجيب واجي مسافة نص ساعة او ساعة احاول استعجل

اخذت جنطتي وعبايتي وطلعت اسرع بخطواتي وبيدي امسح وجهي من العرك ، نگطع نفسي يلا وصلت للاسواق خذت المعجون وصفنت گلت هو اني طالعة طالعة خلي اخذ احتياجات البيت بطريقي..

بديت اتسوق كلشي محتاجينه ورجعت امشي فحطانه قريب فرعنا وسمعت صوت يصيحلي..

- ام قسووورة

من صوته ميزتا هذا هو صوت كليم! درت عليّ واشوفه عاقد حواجبه ، وصلي وگال مستنكر..

كليم- شمطلعج؟!

- خويه احتاجيت كم شغله للطبخ ورحت اجيبهن

- جان اتصلتي بيه اني لو عليم ليش متعبه نفسج والاسواق بعيدة

- ثنينكم بالشغل ما حبيت اوازيكم هاي رحت جبت واجيت

ابتسم وهز راسه..
- لعد وين سيارتك؟

كليم- خليتها يم المصلح واجيت صار بيها صوت ما عجبني باجر امر عليّ الگاه مصلحها..

باب البيت جان ما يطلع اي صوت!! وكليم جاي مشي بدون سيارة ، يمكن كل هاي جانت اسباب علمود رب العالمين يبين النا الحقيقة القذرة الي جاي تصير بهذا البيت من جوه لجوه..

دخلنا البيت يعمه الهدوء دخل كليم لغرفة امي وابوي وطلع عاقد حواجبه..

كليم- ريم يم امي وابوي ونايمين لعد هيام وين؟

- مااعرف خويه جانت موجودة هنا قبل لا اطلع خاف صعدت تنام

- بهذا الوقت!!!!

صعد واني وراه هم قلقني ، دخل للغرفة ووگف جامد جان اقرف منظر ممكن يشوفه اخ لـ اخو ويه مرته بغرفة نومهم اني من صدمتي جمدت بدون حركة بس عيوني تصب وگلبي يرجف ؏ اخوي اخاف يصير بي شي لان محد يگدر يتحمل هيج منظر..

هيام صارت تلف جسمها العاري بالغطه وعليم طفر يلبس بهدومه ويحجي..
عليم- خلي افهمك كليم! لا تتهور!

سحب السلاح وگال بنبره مهزوزه..
كليم- شتفهمني؟

وجوهم بهتت ، لزمت ايده وحجيت اناشغ..
- على بختك خويه ما يستاهلون تضيع نفسك علمودهم

شمر السلاح من ايده ودفعني ، هجم ؏ عليم يضربه ويصيح بلوعه..

- ولكككك اخوووي وتطعننني بشرررفييي شخليتتت للغريببب اموووتك وما يبرررد دممي

دمره دمار صار وجها ما ينشاف اريد اسحبه منه ما اگدر ، كليم جان ضخم حيل وعظمه قوي ، قوتي ما تسوي شي يم قوته..

ما اعرف شلون بغفلة عليم ضربه ووكعه وركض بره راد يلحگه بس ما خليته حضنته..

- عوووفه يولللي لا تضيييع نفسك

دفعني ودار عيونه منططه ؏ هيام الي جان وجها اصفر كركم صار يدفع بيه بره الغرفة لحد ما طلعني وقفلها اسمع صوت ابوي وامي من جوه بس ما اگدر انزل اخاف يقتلها صح تستاهل بس اخوي يضيع..

صار صوت صريخها يجيب التايهه ومن جوه ابوي وامي وريم يصرخون..
نزلت اركض وبغباء كبير مني گتلهم شصار ابوي بمكانه وكع لا ايد ولا رجل..

صرت اصرخ والطم اريد احد يجيني هذاك اليوم جان اسوء يوم بحياتنا ، ركضت افرفح وادك بالباب ايدي راحن..

- كليييم الحك ابوووي ولكك كلييم ابوووي راححح من ايدي

طلع ايدي بيهن دم قفل الباب ونزل يركض گبل نقله بتكسي للمستشفى واني بقيت يم امي الي اشوف وجها كل شوي يذبل وبس تبجي وتون ، لحد ما اجه للبيت بالليل حيله مهدود توه نطق..

- إنا لله وإنا إليهِ راجعون

بعدني ما مستوعبة واشوف امي حلگها نعوج وهم ركضنا بيها للمستشفى طلعت ضاربتها جلطة سببتها شلل نصفي
جانت فترة من حياتنا تحول بيتنا من الهدوء للمشاكل والاعصاب كلشي تغير عدا حُب واهتمام كليم بنته..

ورغم كل المصايب الفوك راسنا كليم ما وگف بحث عن رنيم!!

عليم اختفت اخباره وزوجته من عرفت تخبلت حرفيًا رادت تصعد تذبح هيام لو ما كليم يزمخ بيها.....

هيام عاشت مذلولة كليم إلي ما شايفته بعمري يمد ايده ؏ مره وعنده هذا الشي ممنوع منعًا باتًا هسه صار بكل فرصة يدخل يجنزها لـ هيام ويطلع روحه مفرفحة..

بيوم جان اجازة وحاط بنته بحضنه وگاعدين بالصالة يم امي ، عمر ريم صار سنة تخبل عافيتها تجنن وهي حلوة ؏ امها ملامحها ناعمة والعيون كبار ورموشها كثيفة ..

اباوعله ومكسور گلبي وخاطري ؏ اخوي ما ارتاح يرفعها يبوسها بشفايفها ويحط راسه برقبتها ويشمها بشوغة ، ولحد الان زعلان من امي رغم جانت مريضة بس مره فقد..

يضرب بالحايط ويصرخ بلوعة..
- جبرتيننني اتزززوج بنتتت اختججج بسبببكم فقدت بنتتت اخووووي وعضييييدي مالللي وجهه ازورررره شننو اگله ضيعتتت بنتتتك لانن تزوجتتت وهملتهاااااا

كليم الهادئ ابو گلب الطيب الي مهما يصير ما جان يرفع عينه بعين امي وابوي مو يصيح عليها اختلـف جذريًا من الاحداث الاخيرة الي صارت وكمية الصدمات الي جان يعيشها..

جان بالنا انتهت بعد ماكو صدمة اكبر من الي مرينا بي الايام الماضية بس جان للقدر رأي ثاني ولعبة قذرة نحاكت بهذا البيت منو وره ظهرنا اللعبة الي قسمت ظهر البعير والي هدمت ما تبقى من قوة اخوي بل كلنا جانت النا صدمة..

جنت كالعادة خلصت الغده انتظر اولادي يرجعون من المدرسة قسورة وايهم صف سادس صح بيناتهم سنتين بس قسورة تأخر بالتسجيل سنة ورسب بالثالث سنة لان صادف وفاة ابو وكلش تأثر ليث صف رابع وكلهم علمي وشطار..

صليت وخلصت ، سمعت صوت الباب بسرعة رحت فرحانه بيهم دخلوا عليّ واحد وره الثاني باسوا راسي
گال قسورة- وين خالي؟

- بعده ما اجه يوم محتاج شي؟

هز راسه بـ لا وراح للغرفة درت ؏ ايهم وليث..
- شبي اخوكم؟

ايهم- يريد يحجي ويه خالي علمود يدخل السلك العسكري

- واني مو يعرف رافضه!!

ليث- امي ليش انتِ ما تعرفين قسورة اذا حط باله شي يسوي!

تنهدت بتعب اخاف يصيرله شي واموت وراه..
- روحوا غسلوا وبدلوا خلي اصبلكم لگمه اكيد تعبانين وجوعانين

ايهم- لا امي ننتظر خالي منا لذاك الوقت نگعد ندرس شوي

ليث- رايح اشوف بيبي وريم بالاول

ركض ليث لغرفة امي وايهم صعد لغرفته وره قسورة واني گعدت بالمطبخ انتظر رجعة كليم ، نص ساعة وسمعت صوت سيارته
باوعت من الشباك نزل فتح الباب ودخل السيارة ورجع سداه..

تنهدت بقهر ؏ حال اخوي ابو ضحكه الحلوة نسى شلون يضحك ودائمًا حزنان الشي الوحيد اليگدر يضحكه هي ضحكت ريم وذكريات رنيم اخ يا رنيم شسوه فراگها بگلبه..

مرات اشوفه بنص الليل يصلي ويدعي بدموع يلگاها لعد شگد ملچوم گلبه بفراگها..

دخل وگال..
كليم- شلونج ام قسورة

- هلا خوية حبيبي

تقربت وبست كتفه وهو باس راسي ودنك ينزع بسطاله وگال..
- حبيبــة ابوها وين؟

- هههه نـ

قاطع كلامي دخول لـيث وهو شايل ريم ، گال..
ليث- اجت تگول الله يساعدك بابا

ضحك واخذها يبوس بوجها وهي الملعونة عليها سوالف تلزم خدوده وتبوز شفايفها عود بوسني هنا وهو يكزكز عليها فقط بهاي اللحظات كليم يرتاح وينسى الدنيا كلها..

كليم- شلونها دراستك خالي؟

ليث- سهلة سهلة

مسح ؏ راسه..
- عفية بالسبع ، اخوانك وين؟

- باجر عندهم امتحان جاي يدرسون

باوعلي وگال..
- اي شي يحتاجونه تگولين ام قسورة اذا سمعت غير هذا الكلام ازعل بالله

- اكيد خوية

- المصرف يكفيهم لو لا؟

- يكفي وزيادة وداعت عيونك لا تفكر حبيبي

هز راسه وانطه ريم لـ لـيث وگال..
- اروح اصلي بين ما تصبين الغده اكيد جوعانين ومنتظريني كالعادة

- هههه ما يحله الاكل بدونك

ابتسم مجاملة وراد يطلع دار وگال..
- الحجية صحتها شلونها؟

- الحمد لله

- خليها بعيونج ما اوصيج عليها

- لا توصي حريص

طلع وصعد لغرفته تقرب لـيث وگال بهمس..
- شناوي يسوي بمرته

خزرته ضاربته ؏ كتفه..
- راسك اكسره اذا فتحت هذا الموضوع گدام خالك ولا تدخل امشي صيح اخوانك

- الك الله لـيث المضطهد

خزرته هز ايده وطلع ما قابل شلون بي هذا الولد هو وتصرفاته..

بديت انزل الاكل ؏ السفره ونزلوا قسورة وايهم ولـيث وهيج صارت ريم من ايد لأيد تتنقل الكل يحبها..

بس نزل كليم گاموا قسورة وايهم سلموا عليّ ورجعوا گاعدين وريم بحضن كليم يوكل بيها ما يقبل إلا هو بيده يشبعها وحتى عافيتها حلوة ما شاء الله..

قسورة- خالي!

خزرته بس ما اهتم رجع گال..
قسورة- اريد ادخل السلك العسكري

باوعلي كليم ورجع باوعله..
كليم- اي ليش لا

- بس اني ما قابله خوية ، طلعت من الدنيا بهذول الثلاثه تالي اخسرهم

كليم- گولي يا الله اول شي ، وثانيًا الاعمار بيد الله حتى لو جان گدام عيونج وضامته بصندوك اذا الله كاتبله يموت بهذا اليوم يموت قابل نمنع هذا الشي احنا بس لا تفاولين

- خوية اخاف عليّ

قسورة- امي اني مو طفل ومن حقي اختار الشي الاريده ومقتنع بي وتعرفين ما دام حطيت هذا الشي بالي احققه ومحد راح يگدر يمنعني

كليم- لا تخافين خويه خليها بيد الباري بعده ابنج يدرس ماكو شي فعلي لحد الان

سكتت مجبورة بس گلبي ما مرتاح ، توني وزعت الچاي الهم وسمعنا صوت هيام تصرخ بـ اسم كليم الي اول ما سمع صوتها عيونه صارن حُمر شمر لستكان من ايده وركض فوك..

- ديروا بالكم ؏ ريم واياكم تصعدون فوك مهما يصير

صعدت وراه اركض اريد الحك عليّ قبل لا يذبحها واخسر اخوي ، متت تعب يلا وصلت واني اسمع صوتها يصعد لسابع سما وينزل..

حاوطته حاضنته وابعد بي..
كليم- وخررررري ام قسووورة وخررررري

- بداعتي عليك اهدأ لا يصير بيك شي تولي ما تستاهل

بلگوة سحبته اريد اطلعه وجمدنا بمكانا اثر كلامها..
هيام- اذا ارجعلك رنيم تنطيني حريتي؟

دار عليها وعيونه موسعهن بجمود ، ابتسمت بطرف شفتها وجان وجها شُبه مشوه من الضرب..

هيام- جنت اعرف معلومة مثل هاي راح الزمها نقطة ضعف الك تفيدني بيوم

راحلها ولف شعرها ؏ ايده وضربها راشدي بقوة..
كليم- شــدا تخربطييين هيااام اذبحج والله وما يرفلي جفـن

هيام- اعرف منو الخطفها شفته بعيوني هذول واذا ما تصدك كيفك هههه

شمرها ؏ السرير وسحب سلاحه حطه براسها..
كليم- نطقي قبل لا افرغه براسج

هيام- لو تموتني ما احجي لحد ما تنطيني كلمة رجال واخذ حريتي احجيلك كل الي اعرفه

تقربت ولزمت ايده..
- خويه لا تضيع نفسك وفرصتك انُ تلگه رنيم عوفها تولي ربك يعاقبها انطيها حريتها المعدومه وحدة مثلها ما عندها حرية بعد ما اهلها تبروا منها وخسرت دنيتها قبل اخرتها

نتر شعرها وضم السلاح بخصره ، سحب كرسي وگعد گدامها..

كليم- بعد ما تحجيلي كل الي تعرفي الج مطلق الحرية بس يا ويلج ويا سواد ليلج اذا عرفت جاي تلعبين وكلامج كذب لو ادفنين نفسج هم احفر الارض واطلعج

عدلت نفسها تضحك..
هيام - ماكو كذب بالموضوع كل الحقيقة گدام عيونك

كليم - احجييي

گعدت مرجعة شعرها ليوره وحاطة رجل ؏ رجل وسانده جسمها ليوره ؏ ايديها بكل صلافة..

هيام- بيوم جنت ملتحق اجيت اني بطلب من خالتي وبتت هنا وبالصدفة طلعت اشرب ماي وشفت اخوك طلع شايلها وهي لا أيد ولا رجل من شافني ارتبك وخاف وبقى يتوسل ما احجي لأحد للصراحة جانت فرصة حتى اخلص منها وهيج جان اول سر يجمعني اني وياه ههه

طفر عليها خانگها وعيونه منططه..
كليم- وينهاااا هسسسه

هيام- ما اعرف والله بس اخوك يعرف

دفعها وگال..
كليم- عار ؏ هيج اخو شوفي لج راح اطلع من ارجع اذا لگيتج هنا اذبحج ؏ القبلة واشرب من دمج وها قبل لا تولين انتظري

طلع وهي اباوعلها طايرة من الفرح
رجع دخل بيده اوراق وقلم شمرهن عليها
ونتر..

كليم- وقعي اوراق طلاگج وتنازلج عن ريم

عوجت حلگها وبدون تردد وقعت وهي تگول..
- عشتو خفتًا وراحة مالي خلك اربي

مصدومة بيها وبصلافتها هيام ما جانت هيج شغيرها اخذ الاوراق وتفل عليها..

كليم- رايح اجيب السيد واجي مكانج لا تتحركين منه حاليًا

وصدك بيومها كليم جاب السيد طلگها شرعًا وقانونًا واخذ بنته منها للأبد وهيج طلعت هيام من حياتنا ..

وبدت رحلة جديدة بحياته ، يدور ؏ عليم بـ أمل انُ يوصله لـ رنيم بس للأسف جان كلشي ضد اخوي بهذا الموضوع..

بيوم اتصلوا عليّ وانطوا خبر وفاته
انقهرنا عليّ اني وامي لان مهما يكون هو اخوي وابنها بس ما شفت حزن بعيون كليم بس ؏ موضوع رنيم لان منا ونقطعت اخبارها نهائيًا...

نجلاء- شلون مات؟

جاوبني بــدون اهتمام..
- سكران وسوه حادث

دار عليّ وعيونه حزينه..
- راح قبل لا يرجعلي بنتي شلون الگاها بعد!!

تقربت وحضنته بسرعة شهك يبچي وجسمه يهتز اخوي القوي هزته حادثة رنيم وبعدها وما لگه علاجه إلا بوجود بنته ...

..

وتستمر الحكاية.. 🚬♣

البارت الاثنين

الاشباه هاي الايام انزلهم

الانستا راح افتح بي اسك لأي سؤال اجاوبكم!
احبكم 💙