رواية دروب الإِندِثـار الفصل الثاني والثلاثون 32 - بقلم زينب صـلـاح 🤎

بقلمي : زينب صلـاح 🧡

لـ روايـة ﴿ دروب الإندِثار ﴾

في الـ part 28 ♡♡

لا تنسون التصويت + متابعة للحساب + التعليق بين الفقرات ☘️

‏مو گِلتلك تِلتهي ويّنباگ حِلمك
‏بالچذب چا گِتلي أحِبَّك !

•••••••••••••••••••••••••••♕•

مسـرة•

- يمتى ترجع سارة للـبيت مو تأخرت؟

- طعمرتيت بالسچين مو زين من صحَت كُل هذا التأخير من صالحها حتى ترجع بصحة أفضل

جاوبها وهوَ يناولها قطعة التُفاح القشرها بأيده وكمل
كليم- تاكلينها مقشرة وهي كُل فائدتها بالقشر

رنيم- ما احبه

- حَبي رنيمه حَبي

باوعتلها وهوَ ابتسم ونقر على خشمها ورجع يقصص الفواكه الها تاركها شاردة بكلامة وحركته اللطيفة
بَـس لو اعرف شلون ما تتأثر بحركاته الناعمة والمليانة اهتمام؟!!

رجعنا نتابع المُحاضرة الدينية "مغصوبين" لان مو برضاتنا بَـس اجبار مَن عمو كليم حَـسب كلامه حتى نوعى اكثر على دينه ونتعلم وما نحتاج احد! وأي سؤال يتوجه النا نجاوب

وعمة نجلاء گاعدة بصفي واني سانده راسي على كتفها واكُل بصحن الفاكه القطعة عمو اليَّ ، فزت رنيم واجت دحست نفسها وسطنا وعمو باوعلها مبتسم تقربت تحجي بهمس ويا عمة

رنيم- عمة أريد اسألج فَد سُـؤال؟

نجلاء- گولي ماما

رنيم- باوعي مرة صعدت صينية أكل العمو ومن عرف ما قبل وگال ما يصير اشيل ثگل مو زين عليَّ ومن سألته انحرج وگال سألي ام قسورة هي توضحلج

ابتسمت وهزت راسها وجاوبتها بنفَـس مُستَوى أنخفاض الصَوت
نجلاء- صَـح ما يصير وأنتِ صاعدة بيها درج! تأثر على الرحم ماما ومُمكن مُستقبلًا لا سَامح الله تسببلَچ مُشكلة بالحمل والانجاب

- صدُك عمة؟

رنيم- ولا چـنت اعرف بَـس عمو شلون يعرف هيچ اشياء؟

نجلاء- اي صَـح مو زينه تحذرن ماما وأنتِ رنيمه شنو ما تعرفين كليم ليل نهار غاطس بالكتُب والمعلومات العامة اتحداج هسه تسألين سُـؤال وما يعرفه

رنيم- اعرفه داهية وذكي

نجلاء- هههه مو أگُله تحجي عليك

رنيم- ياااا دا امدح بيّ

عافتنا ورجعت گعدت قريب من رجلي مبسطه تگرط بالفواكه والكرزات وهوَ كُل شوي مادلها العصير ويهمس
كليم- شربي بنياتي

تشرب من ايده ومنتبهه للمُحاضرة غافلة عن نظراته وأهتمامه !! اختي لو غبية لو غبية مُستحيل اكو خَيار ثاني

رفعت راسي وابتسمت مگزگزه من نزلت ريم شعرها هوسه وبيد لازمه مشطها وبيد قراصاتها ، سحبها ونفَـس عادته يشمها من منحرها

ريم- بابا سويلي شعغي (شعري)

- تدلل اميرة ابوها

راح غسل ايدي ورجع حطها گدامه وكُل شوي شام شعرها وبايسه!! حريص يسرحه بخفة أيده خاف يأذيها
گالت عمة..
- والله لو تگصه الها افضل بعدها صغيرة ومتعذبه بيّ

دنگ باس خصلاتها وجاوبها
- يروح ابوچ فدوة لكُل خصلة من شعرچ
اوف ام قسورة اني روحي بشعرها شلون اقبل من كون تنگص أيدي قبل لا اگصه

حنَون وحنانه طاغي على بنته ورنيم بحَـيث نفَـس المُعاملة ما يفرق بيناتهن ومتأكدة لو اكو صلاحية أله ومو حَرام چان مشطلها شعرها وباسها نفَـس ما يبوس بنته !!

سوالها جدولة فرنسية تخبل صحت متعجبة
- الله عمووو من وين متعلمها؟!!!

ضحك من ردة فعلي
كليم- من التلفون علمود لبنيات كُلشي نتعلم

رنيم- هسه شلون أريد مثلها

نزل عيونه عليها مبتسَم وكأنو نظراته نطقت وگالت "تدللين بَـس صيري حلالي" اشر بعيونه على عمة وگال
كليم- خلي ام قسورة تسويلچن تعرف

دموع- اني اول وحدة

طفرت تتلوگ العمة وصرنا نتعارك منو اول وحدة تسويلها وهي تضحك لان صايرة بالنُص وكُل شوي وحدة ساحبتها

دموع- اني الصغيرررة ولازم تسويلي قبلچ

- ما ما اني قبلچ

قسورة- على هذا المنَوال والجَر امي تصير وصلتين وأنتن بعدچن ما متصافيات

بهتت اباوعله عاف كُل المكانات وگعد بصفي!! غمزلي بدون محد يشوفه وگال بهمس

قسورة- اني اتعلملچ واسويها شنو رأيچ

ما اعرف شلون طلعت مني بَـس بعَد طلعت
- انچب

فتح عَيونه خررني چنه ضفدعه بسُرعة طفرت بغير مكان وطول الگعدة هوَ يخزر واني اخزر لحد ما گال عمو وعينه على الشاشه

- عيونكم كافي انتبهوا

عضيت شفتي بـخجِل وصرت اتابع المُحاضرة بدون ما اباوع على الجهة الگاعد بيها ، خلصت المُحاضرة وهوَ گال

قسورة- نزلن الكتُب بالاستقبال بين ما اسبَـح واجي نراجع المواد

كليم- زين تسوي هواي هملن الدَراسة وبعَد اسبوعين الامتحانات

رنيم- وسـارة؟

كليم- شبيها؟

رنيم- شلون تدرس؟

كليم- سهلة بابا منا لأسبوعين جرحها ملتئم كُلش زين واني انبه هُمام يدرسها

سكتنا مقتنعين وصعدنا نزلنا كُل الكتُب والملازم وصرنا نراجع بَين ما اجه هُمام فهيت مثل المطي على شكله اللطيف
صَـح مو اول مرة اشوفه بَـس هاي الفترة اني مستخفة خلي تجي سارة تربيني من اول وجديد!

ربع منتچي على الكرويته واحنه گدامه وبالنُص الكتُب !! شعل جگاره وصار يتصفح فجأة رفع عينه عليّ وگال

قسورة- يا فصل ضاع مُلخصة؟

رنيم- ضاع؟

همست
دموع- تعزينا

قسورة- اي مسرة گالت ضاع مُلخص مال فصل!

- هههه اي ههه صَـح مو دمعه صَـح ضاع بَـس لگينا

قسورة- هـا زين! والمسألة الما فاهمتها وين؟

رنيم- يا مسألة؟ مو كُلشي شرحلنا عمو كليم؟!!

- اي هه صَـح عمو شرحلنا

باوعلي رافع تك حاجب اعتقد لا ما اعتقد متأكدة اكتشف صخمتي چذبتي!! شجاني وچذبت؟؟؟

قسورة- راجعتن؟

دموع- اي قبل لا تجي وكُلشي مضبطين

قسورة- حلو خلي اسويلچن اسئلة

وصدُك سوالنا اسئلة لكُل مادة وبعدنا عن بعض صرنا نركز ونحل وعمو كليم اجه يمنا لليل احنه نحل ايدينا تكسرت يلـه خلصنا ولكُل مادة وقت مُحدد وحتى لو ما مخلصين قسورة يسحب الاوراق
وريم يم ابوها بعالم ثاني ترسم وتلون

قسورة- اجمع الدرجات وانطي مُعدل؟

- اي اي

كليم- على هذا حماسچ مُعدلچ 100 مو؟

- چا والـ 50 شبيها عمو مثل الورد

كليم- هههههه اني بالوزاري اقل الـ 85 ما اقبل وماكو هدية يكون بعلمچ

- گول يا الله عمو تضرب بالعالي واحنه بنات على گد حالنا

ضحكوا واني متحمسة اعرف وقسورة مركز يجمع ويصحح خلص اول شي دموع وما قبل يگول لحد ما يكمل
بقينا على نار بَين ما خلص روحنا طلعت

قسورة- رنيمتنا كالعادة ما يخيب ضني بيها ذكية 94

كليم- عفية بطلة

غطت وجهة خجلانه وهو كمل
قسورة- دمعة 81

صفگن هي ورنيم قانعات وعمو يشجعهن اباوع لـ قسورة يباوعلي كاتم ضحكته فرك وجهة وهمس
- مجرة ما خيبت ضني 55

فكيت حلگي وهُما يضحكون متونسين لويت ثغري وكتفت ايدي
كليم- شدي حيلچ بابا مو خوش حجي هذا

- عمو هاي كُل قدرتي والله هيچ ضغطت عقلي عصرته عصر وطلعت المعلومات

دموع- لو مركزه تجاوبينه الاسئلة بسيطة

- جاوبت وتفكيت ، اصلًا خوش مُعدل واني قنوعة ما احب المُبالغة

قسورة- الما يعرف يرگص شيگول؟ الگاع عوجه

- اففف شنو قصدك

- ولا شي

ردت احجي وقاطعنا صوت تلفون عمو كليم جاوب مبتسم
- هلا خيي.. الف الحمد لله... ها الاخبار الحلوة ان شاء الله منتظرينكُم.. في امان الله

سده وباوعلنا منتظرين يطمئنا
كليم- سارة رجع نظرها الحمد لله بَـس تحتاج عملية ضروري وبعد ما تشفى بشكل كامل ان شاء الله تخضع للعملية والحمد لله بسيطة لا تخافون

تنهدت
- الحمد لله

كليم- خالچ يگول رتبوا البيت باچر راجعين

رنيم- والله؟

كليم- وعيونچ

دموع- الف الحمد لله كُلش مشتاقتلها

- حتى اني صَـح نروح انشوفها بَـس ما اكتفي

قسورة- يلـه بدلن نروح نشوف وضع البيت والنقوصات

اخذنا عمو والبيت يحتاج تنظيف من فوگ ليجوه لان متروك صارله اسبوع واثار الدم بعدها لان ما قبلوا نرجعله
كتبت رنيم مُستلزمات التنظيف وراح قسورة جابهن گال عمو

كليم- دخلن نظفن الجوه واحنه انظف البره مو قسورة؟

قسورة- تأمر خالي

دخلنا انظف وكُل شوي نباوع عليهُم جلفوا الارضية ونظفوا الحديقة وسقوا الزرع
واحنه بسُرعة خلصنا لان كُل وحدة اخذتلها شغلة ، وعمو بعث قسورة يجيبلنا عشاء ويجي

اخر شي عطرت رنيم الـبيت وصارت ريحته تنعش دخل عمو وگال
كليم- بارك الله بيچن وعاشت الأيادي

دموع- اهم شي سارة تجي ترتاح

كليم- بشوفتچن راحتها بنتي ماكو شي مُمكن يعدل نفسيتها ويطيبها غير قُربها منچن

- سارة صارتلنا أُم بوقت چانت هي تحتاج الأُم

كليم- والله راح يعوضها على صبرها وكُلشي سوته

رنيم- ما اعتقد

گالتها بشَرود وعمو كليم ارتبك بسُرعة حمحم وخزرها عدلت گعدتها وگالت تغير الموضوع
رنيم- اريد اگُلك شي!

كليم- أمريني

- ما يأمر عليك ظالم بَـس اني اريد ابقى هنا

عقد حواجبه مستغرب وهي كملت
- أريد أبتعد وافكر زين وهَم أريد اكون قريبة من سارة بوضعها هذا ووعد ورحمة بابا بَـس يتحسن وضعها واقرر ابلغك وأرجع ويـاك مهما كان قراري

كليم- على راحتچ ومثل ما تردين يصَير

رجع قسورة وگعدنا ناكُل ، من خلصنا قسورة رجع للـبيت جاب ريم تبقى يم ابوها ورجع
لان احنه راح نبقى علمود نگعد من وقت نجهز الريوگ وتستقبلهُم الصُبـح.
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••

رنيــم•

فزيت الصُبـح من وقت كُلش چنت متحمسة لرجعت سارة وخالو وكُلش مشتاقتلهُم ، رحت للاستقبال وفتحت الباب بدون ما اطلع صَوت !!

اباوعله متممد على لفَراش وريم نايمه على صدره وهوَ حاضنها بثنين أيدي ..

رحت سبحَت وخلـيت المشفة على راسي وركضت للمطبَخ حطيت الچاي على النار وادندن بصوت ناصي
التفيت وشهگت مخترعة وهوَ ابتسم يحك راسه بحرج لان چان واگف وصافن عليَّ؟ گال بنعومة

كليم- صبـاح الخَير واعتذر لان خوفتچ

- صباح النـور ، لا عادي

- محتاجة مُساعدة؟

- لا غسل وتعال تلگه كُلشي جاهز واني رايحه اگعد البنات

هَز راسه موافق وراح واني صِرت استعجل ما اعرف ليش ردت كُلشي يكون على اكمل وجه من يجي
حَـبيت ارتب واشوفه ينتبه ويگول واحد من اطرأته الحلوة لو يغلس؟ شي بداخلي راد هذا الشي!

بَين ما رتبت شكل ميز الطعام اجه هوَ وگعد اخذله نظره على السُـفرة ومد أيده گرص خدي وباَس اصابعه
كليم- تسلم ايديچ بنياتي

- صَرت اعرف اطبخ وكُلشي اسوي

- آه؟

- والله على يوم اطبخلك بأيدي وتشوف

-ما عندي شَك ، أي شي تلمسنه بأيدچ يتجمل يكفي أنتِ مسويته

نزلت راسي بخجل
- رايحه اگعد البنات

مشيت ووصلت الباب وگال
- نشفي شعرچ زين لا تتمرضين

هزيت راسي وركضت گعدتهن وراحن واني بقيت گاعدة امشَط من خلصت رحت لگيتهُم مخلصين بَـس اكو صحن بيّ صموت وداخله جبن ومُربه وبَـس گعدت صبلي الچاي

كليم- تحبين الچاي دافي أنتِ لو غيرتي؟

- احبه دافي

صبلي وكمل
- اي زين لان أنتِ تأخرتي وهسه صار مثل ما تحبين ما يحتاج تضيفيله ماي

- شُكرًا

- يدللن لبنيات

رفعت راسي وصارت عيوني على مسرة الادبسز تتغمز وتعض شفه قليلة الأدب دفرت رجلها من جوه وما اعرف شلون صارت برجله الضربه !!
باوعلي مبتسم وگال ..

كليم- اكُلي معليج بيهن

نزلت راسي ميته مَن الخجل
اكلت وهو توضأ وراح للاستقبال وسـده عليّ! نضفت المواعين وفكرت شنو اطبَخ بالغداء وهَم أريد أبهر عمو هوَ أبد ما متذوق طبخي

رحت دگيت الباب ودخلت ، تصدق وسَد القرآن ورفع راسه مبتسمليّ
كليم- اتصل هُمام جايين بالطَرق

- اي ، أريد مِنك شي؟

- أمريني

- ما يأمر عليك ظالم ، بَـس أريد تجيبلي مسواك علمود الغداء

- نجيبه جاهز لا تعبين نفسچ

- ما تريد تجرب طبخي؟

- هههههه لا لا شلون اذا هيچ اروح اجيب واني الممنون تعالي كتبيلي بمُلاحظات التلفون شنو تحتاجين

ريم بعدها نايمة ، اخذت تلفونة چان حاط صورته هوَ وبنته بالخلفية تجنن وما بيّ رمز
بديت اكتب شنو احتاج واتذكر وبَين فترة وفترة ارفع راسي اباوعله وأشرد بصوته اليّ يجنن وهوَ يرتل بهدوء

حطيته وهمست
- كتبتلك

تصدق وگام شال المصلى والقرآن وتقرب اخذ التلفون يقرأ وابتسامته تتسع شوي شوي
كليم- تسوين حلا؟

- اممم البسبوسة سارة تحبها وأريد اسويها ألها

- شلون تعلمتي؟

كممت حلگي وصرت اسردله
- هاي مرة اشتريناها من الشارع وعجبتنه صَـح حصلنا كتله مرتبه مَن سُعاد لان اخذنا من الفلوس مالاتها
بوقتها چان اكو حجي يبيع وعلمنه شلون نسويها واحنه فطنين بسُرعة نتعلم المُهم صرنا نجمع اي شي تنطينياا سُعاد لحد ما سويناها والكُل انبهر بطعمها وچان اول واخر مرة انجربها

فزيت من ذكرياتي على أيده وهوَ يمررها على راسي
كليم- ماكو اخر مرة بعَد اني موجود أي شي بنفسچ تبلغيني ابيع رَوحـي واشتري الچ

- الله لا يحرمني مِنك

- ولا منچ اللهُمَّ اميين

فزينا على صوت الباب وهوَ ينفتح والبنات يصيحن بأسم سارة عفته وركضت اباوعلها حاضنتهن بَـس مو بقوة خاف يلچمن الجَرح !!

مَن ابتعدن فتحت ايديها إليَّ
- توه نور الـبيت أمي

تقربت لمتني الحضنها تشمني وتمسح بأيديها على ظهري عفتها ورحت الخالو الاخذني بين أيدي حاضني ورفعني عن الارض

هُمام- مَيت شوگ حلوتي

- اني هم خالو هواااي مشتاقتلك

- يفديچ خالچ خوش؟

ضحكت وهوَ حاوطني من جهة ومن جهة ساند سارة ويمشيها لحد ما وصَل يم عمو سلموا على بعض وتحاضنوا عبالك صارلهُم سنوات ما شايفين بعَض ولا كأنو كل يوم عمو يروح يشوفه

دخلنا وسوينالهُم ريوگ سارة أيدها مكسورة ومجبرينها فـ خالو هوَ صار يوكلها وياكُل ، يشربها الچاي ويمسح حلگها خاف ظَل بقايا تزعجها

عمو راح بعَد ما اطمئن وبعث الاغراض الطلبتهُم منه بأيد ايهم وگال وقت الغداء يجي خصيصًا علمود طبخي! طرت من الفَرح ومن صدُك سويت الاكل بحُب واهتمام ومتأكدة هالمرة الطعم راح يفوق الخيال ..

مرر خالو أيده على شعرها وهمَس
هُمام- تبقين هنا لو اصعدچ فوك ترتاحين؟

ساࢪة- من اتعب اگُلك

هُمام- تمام ، رَايح اني اسبح وامدد جسمي مكسر من كُرسي المستشفى

راح وبقينا بَـس احنه اشرتلنا سارة نتقرب منها رفعت أيدها الزينه ومررتها على خَـد دموع وگالت
سارة- سولفلي شنو سويتن بغيابي؟؟

دموع- صليت هوايه ودعيتلچ تتحسنين وترجعيلنا بسُرعة

مسرة- درسنا وضبطنا المواد وحَ ندرسچ هههه

دموع- قسورة سوالنا امتحان شامل وانطانا مُعدل

سارة- حلو وشگد اخذتن؟

- 94

دموع- واني 81

باوعت مقلصة عيونها
سارة- وأنتِ مسرة؟

مسرة- أهم شي السَتـر والعافية

سارة- شگد يعني؟

مسرة- 55 وبكُل فخَر

سارة- لا ربحنا تريد ادرسني وهي تحتاج تدرس

دموع- حايرة بالتلفون والانستا

سارة- اليوم الانستا ينمسَح والتلفون ينسحَب وبعَد الامتحانات يرجعن

مسرة- اهووووو ما ما والله ازاعلچ

سارة- حَرف ما اسمع وكلامي يتنفَذ بالحرف الواحد

- بعدين نحجي بهاي الاشياء هسه أنت مددي وارتاحي بَين ما يجهز الغداء

سارة- طلعن أمي اريد احجي ويا رنيم

بهَتت بقلَـب مقبَوض !! طلعن وسَدن الباب وراهن سحبتني وگعدتني قَريب منها

سارة- سولفيلي شصار بموضوعج

زفرت براحة وسولفتلها كُلشي بالحَرف
سارة- اتمنى من كُل گلبي تختارين الصَح واني متأكدة مثل ما دا اشوفچ گدام عَيوني ماكو انسان حَ يسعدچ ويحبچ مثل كليم واضم صَوتي لصوته واگُلج اخذي خيرة وفكري زَين لان هذا قَرار مصيري مو لعَب أطفال أريد وما أريد

- مرات أحَس احب اهتمام عـ... اءء كليم وافرح وحتى اليوم اتحمسَت حتى اطبق ويتذوق طبخَي وينطيني رأيا ويمدحني بكلماته الحلوة وبنفَـس الوقت ما أگدر اشيل جُنيد من تفكيري وانسى هوَ بيوم مَن الأيام چان حُب الطفولة والشخص الاهتم بيَّ بدون مُقابل بوقت چان غيره يبحث عن فرصة ينهش لحمي بيها ما اگدر انسى بيوم حماني من التحرُش !!

- لازم تقررين بدون كسر واحد منهُم وخلي بين عيونچ قرابتهُم وخطية تدمر علاقتهُم بسَبب تشتتچ وعدم قُدرتچ على الاختيار الصَح

- لا بيوم اليجي جُنيد راح انطي قراري النهائي

عفتها ترتاح وطلعت اتأكد من الاكُل بَـس سمعت دگت الباب رحت اركُض مثل الاطفال فاتحه الباب ضحك على حماسي وقرص خدي بايس اصابعه

كليم- لو اعرف منتظره جيتي بهذا الحماس من زمان جاي

- ومنتظره تنطيني رأيك صَـح كُل إلي تذوقوا طبخَي مدحوا بَـس أنتَ رأيك يختلف ومتحمسة اسمعه

أشر على عَيونه
- مَن هاي العَين قبَل هاي العَين جَوهرتي

اتمشينا وسألت بفضول
- ليش تگُلي جوهرتي؟

وگف وصفَن أشر على عيوني وگال
- هاي العَيون السَبب چانن جوهرات ثمينات بالنسبة إليَّ

- وهسَه؟

- هسه كُلچ صرتي جوهرة كليم يا جوهرتي

دخلنا وهوَ بقى بالمطبَخ يمي لان سارة غفت بالاستقبال وخالو نايم فوگ والبنات گاعدات بالصالة يتابعن مُسلسل!
صار يتصفَح بالتلفون ، مرت فترة مو طويلة وگال بدون ما يباوعلي

كليم- اتصل جُنيد وگال الخَميس عندكُم ان شاء الله

درت اباوعله شارده تقدمت خطوات منه اضطر يترك تلفون ويباوعلي ، فركت أيدي أريد اتجرأ واگولها ومَن بعَد مُعانات نطقت بصوت هامس

- كـ كليم

رفعت عيني وسحَت من الخجل لان نظراته جريئة وحلوة بنفَس الوقَت ما تحَسس المقابيله بالقَرف!
رد وصَوته ناصي وبيّ رجفة حسيت احواله تخربطت

كليم- يا حياته لـ كليم! اسمعچ

- عادي اسولف ويــاك؟

- كُل وقتي الچ

سحَبت الكُرسي وگعدت مقابيله
- جُنيد يعَرف أنتَ عندك مشاعر اتجاهي؟

- لا لان مقَرر اذا اختاريتي تموت هاي المشاعر حتى مُستقبلًا ما يشُك بيچ او يسببلچ مشاكل الموضوع

- واذا اختـاريتك؟

- يعرف ، مو بَـس هوَ لا العالم كُله يعرف كليم يحبچ ويفديچ بروحَه

- ما أريد اكسر گلب اي واحد بيكُم

- عني اطمئني اهم شي عندي وبمُقدمة أولوياتي راحتچ وسعادتچ يعني حتى لو اختاريتي حَ اكون ساندچ وبظهرج وما اعوفچ أبد

دنگت راسي متوترة لازم يعَرف مَن حقة يعرف عندي ماضي ويا جُنيد
- اني اعرف جُنيد من زمان

ابتسم وهَز راسه
- اعَرف سولفلي وگال تحبون بعَض لـذلك قبل لا نروح للنجف گتلج أنتو تحبون بعَض وافقي ما اضوج وأنتِ گُلتي ما تحبينه

- ما چان حُب مُمكن اعجاب بَـس هسَه مشتته لا اكثر وان شاء الله اگدر اتخذ القرار الصح

- ما عندي أدنى شَك بهذا الشي اعَرف شنَو ربيت اني

ابتسمت ونزلت راسي خجلانه
ㅤㅤㅤ

ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••

سـارة•

حَسيت بشي يتمرر على خدودي ورقبتي بنعومة !! فتحت عيوني وآثار النُعاس بعدها بيَّ
چان قَريب وجهة بوجهي عيونه وكحة مركزة على شفايفي وأيده جريئة يحركها على كامل جسمي!

شهگت فازة مَن دفن راسة برقبتي وباسني بقوة للحظة ضعفَت بَـس مُجرد تذكرت شنو صار دفعته بأيدي الزينه ونترت خازرته

- اذا أنتَ نسَيت اني ما ناسية !!

تأفأف ضايج وابتعد يمسح بأيده على راسة
هُمام- يا سالفة عقيق المو راضيّة تخلص وتريحني

- وأنتَ ابو الراهيّ بعَد؟ برأيك كلامها طبيعي؟ هُمام يا تگلي شنو قصدها يا تبتعد عني لان مو طايقة اشوفك !!

هُمام- وأنتِ ليش منفعلة شنو تغارين؟

- لااا

- لعد ما يحتاج هذا الكلام ولا اني مجبور ابرر

- المفروض تحترمني وتحترم اني زوجتك وعندي مشاعر

- تحبيني؟

ضاعت الكلمات مني واني اباوعله ما اگدر اعترف وما اعرف مشاعره اتجاهي صَـح يبوسني ويتقربلي بَـس مُمكن تكون رغبة او لان اني زوجته وهذا الشي مو حرام وهوَ رجال بالنهاية وعنده احتياجات واخاف اكون نزوة!
واخيب اني ومشاعري ، هزيت راسي وضفت

- لا ، بَـس گدام الكُل احنا زوجين ومن تكون مُنفتح ويا النساء اثناء علاقتنا هذا الشي يقلل من قيمتي ويكسر كرامتي وكُلشي إلا كرامتي

- ما ألچ حق تسألين سارة زواجنا على الورق مو مجبور التزم بشي

- اهاا؟ يعني أنتَ همات ما الك حق واذا احب ما راح تتضايق

لزم فكي وضغط بقوة مخنزر
هُمام- لا تستفزيني

- شنو بينك وبَين عقيق؟

- ولا شي

- ههههه لا والله ، الكدامك مو غبية ويمر الكلام هذا عليها
هُماااام عقيق شنو قصدها من گالتلك نسيت أيامنا سوه؟؟؟!!

- ولا شي

دفعته واشرت على الباب
- اطلع اطلللع

عافني وطلع بسُرعة نزلت دموعي ارجف من القهر!! من اجينا لحد الان حاولت ابين طبيعي واحترمة گدام الكُل بَـس ما دا اگدر اتحمل اكثر!!

اتذكر اليوم الصُبـح مَن فزيت على صوت همسات مو قَريب بَـس چان واضح
وخصوصًا مَن وصلني كلام هُمام وهوَ ينتر بهمس بَـس صوته واضح لان خشن

هُمام- اجيتي البيتي غثيتي مرتي بكلامچ ورحتي وسكتت وعبرتها بَـس بمزااااجي وهسه جايتني لهنا بهذا الاسلوب الرخَيص؟

عقيق- الي بيناتنا اكبر مَن أنُ ينتهي بهاي السهولة!

هُمام- أنتِ مريضة؟ ما بيناتنا شي لا تخربطين بالكلام

عقيق- أنتَ تحبني هُمام ما تحبها عيونـك تسولَف

هُمام- ههههه مو اگُلچ مريضة الله يشافيچ شلون احبچ واتزوج غيرچ؟

- مجبووور

هُمام- مو اني ذكر من ذكور هذا الوقت وانجبر على حرمة ما اريدها استوعبي بابا استوعبي وبعَد لا تراويني وجهچ

عقيق- وأيامنا؟ نسيت أيامنا سوه؟

هُمام- ما بيناتنا أيام حتى انساها.. اشش صوتچ امشي براا اش صوتچ ما اسمعه

طردها وسَد الباب ورجع ، جمد بمكانه مَن شافني فاتحة عيوني
غلس وما حجه بَـس اني انتر ويا نتر وهوَ ساكت ما يعلق وبهذا اسلوبه يشعلني شعل اشيل روحي وادگها بسبب برودة وللا مُبالاة.

مسحت دموعي وگمت حاطه أيدي على جرحي سمعت صَوت كليم
وبخُبث سبحت الشال مَن راسي وشمرته متقصَده ادخل هيچ اعرف الرجال يستحرم بَـس اريد اقهر هُمام واعرف هاي نُقطة ضعفه اريد ارجعله نفَس وجع الگلب

بَـس دخلت صار صمت رهَيب!! وكليم دار راسه عني ، طفَر من مكانه وتقدم عليَّ بدون ما يهتم لزمني مَن زندي بقوة وسحبني عطت متوجعة

- اخخخخ بطنييييي

وگف مستوعب بَـس صدره يصعد وينزل بغضب ووجهة ما يتفسَر!! دنگ شالني وصعَد فوگ بقيت ارجف اخاف يضربني

نزلني على السَرير راح قفل الباب ورجع شهگت حاطه أيدي على خدي فاتحة عيوني احاول استوعب هوَ ضربني راشدي؟!!!

هُمام- اني لا گواد ولا مگَررررن واطلعين مفرعة گدام صديقي اذا أنتِ عندچ عاديي اني لااااا
بااااوعيلي لچ أنتِ مو غيرتي دينچ مو وعدتي ربچ تلتزمين بالحجاااب؟ شلون تسوين هيچ اعرفچ عرمة وصلفة وعناد بيَّ سويتي هيچ

- ضربتني؟

- واكسر راسچ اذا تعيدين تصرفات البرابي** هذاااا بَـس بسيطة اني اعرف دواچ

طلع يغلي وينتفض من الاعصاب ورنيم دخلت بعيونها قلق مررت أيدها على خدي
رنيم- ضاربچ؟

- اي

نزلت عيوني مقهورة مَن نفَـسي وتصرفي المو منطقي
رنيم- كليم طلع يخابر بره ما سمع شي لا تخافين ، گومي اغطي خدج بمكياج وننزل عيب منه لان هوَ جاي علمود رجعتچ بالسلامة وبعدين اني احجي ويا خالو

- لا تحجي شي اني غلطانه ، چنت صاحبة الحق وبفعلتي خليت الحق عليَّ

- مع ذلك ما يصير يضربچ

- رنيم لا تدخلين ابد علاقتچ بخالچ ما تخرب بسبب سوء فهم بيناتنا اني اعرف شلون ارجع حقي

سُكتت مقتنعة گامت وسحبت عُلبة المكياج وصارت تحاول تغطي آثار اصابعة على خدي!
ونزلنا اباوعلها تركض وحدها مثل الفَراشة وعلى وجهة ابتسامة وهي تحظر السُفرة وعرفت السَبب مَن گالت!

رنيم- متحمسة اعرف رأي كليم بطبخَي اول مرة يتذوقة

- راح ينبهر

- ان شاء الله

خلصت اخر لمساتها صاحت للبنات وراحت تصيحهُم لان واگفين بالباب بره شوي ورجعوا بَـس هُمام اعصاب!!
بَـس گعدوا وقبل لا يحجي شخَص بيهم گلت واني منزلة راسي!

- اعذرني خوية ما انتبهت للحجاب واحب اعتذر منَ هُمام على قُلة انتباهي واحراجه بهيچ موقف

كليم- عادي بابا تصير

رفعت راسي وهوَ يباوعلي مصدوم ورنيم رفعت حاجبها بمكر تعَرف اسلوبي وتعَرف راح اخذ حقي بَـس بطريقتي وحتى عقيق وموضوعها راح اخلي يغرد بيّ بدون ما اسأل

سمينا بـ اسم الله وبلشنا ناكُل بَـس عيوني على رنيم الي ما اكلت وعينها على كليم
تعض بشفايفها وتنتظر منه كلمة !! حتى اني وترتني وياها وصرت منتبهه للرجال!

ابتسم ودار عليها رافع حواجبه مبهَور فعلًا ضاف كلامه
كليم- اطيب ما اكلت والله عاشت ايدچ بَـس ها ترا ادمن اكلچ هيچ وما اكُل غيره

كممت حلگها تضحك
رنيم- تدلل واذا ما تزعل عمة نجلاء اصير اني اطبخ الكُم

كليم- يولون طبخي اليَّ بَـس اني

هُمام- اححححممم احم

كليم- صحة حبيبي اشرب ماي ، معليچ بأُم قسورة اني اتفاهم وياها بَـس شَرط هيچ اكُل يفتَح النفَس

رنيم- تمام متفقين

رجع ياكُل وكُل شوي وگال "الله الله" اخر شي هُمام ما اتحمل ونتر
هُمام- كافييي اتزقنب بدون كلام افتهمنا

كليم- هههههه ليش مغثوث؟

هُمام- ما مغثوث بَـس انجعم وكافي لعبتها لنفَـسي

كليم- صَاير نفسية ما تتحمل

هُمام- خوش يله اسكت

كليم- ههههه

زفر متنرفَز ، خلصنا ورحنا بالاستقبال رنيم طلبت منا انروح وهي اتصب الچاي وتجيبه ومسرة ودموع غسلن واعين عنها بَـس صدمتني مسوية بسبوسة!

دمعت عيوني متذكرة حضنتها وبچيت ما متحملة وكليم گال
كليم- ولت هذيچ الايام وأي شي بنفسكُم ومشتهينه بلغوني وتدللون

- ما تقصر خويه

عرفت رنيم مسولفتله انتبهت لـ هُمام مستغرب الوضع بَـس سكت ما علـق على شي مَن خلصنا وحَـسيت نفَـسي تعبت وبطني وجعتني طلبت من رنيم تساعدني اصعد

ما گالت لا صعدتني وغيرتلي ملابسي بتراك عَريض ومُريح انطتني علاجي وخلتني امدد
طفت الضوء وطلعت سادة الباب وراها

تسلل الخوف لـ گلبي من صارت الغُرفة ظلام !! سديت عَيوني وحاولت اتجاهل مخاوفي والعلاج بيّ نسبة منوم فـ غفيت بسُرعة ما حاسه على نفَـسي!

فزيت على شخص يرفـع تشيرتي والظلام بعَده محاوطني بَـس اكو ضوء خفيف انرعبت وكُل الافكار السيئة استوطنت عقلي ما حَـسيت غير صرخت بصوت جرح بلعومي مرعوبة مذعورة خااااايفة !!!

..

وتستمر الحكاية.. 🚬♣

قناة التلي zainab_salah0