رواية دروب الإِندِثـار الفصل الثالث والثلاثون 33 - بقلم زينب صـلـاح 🤎

بقلمي : زينب صلـاح 🧡

لـ روايـة ﴿ دروب الإندِثار ﴾

في الـ part 29 ♡♡

لا تنسون التصويت + متابعة للحساب + التعليق بين الفقرات ☘️

‏بكُل غرور وكبرياء ونرجسـيه
انـه التوكف الدنيا عليـه ".

•••••••••••••••••••••••••••♕•

حَـسيت للحظة فقدت عقلي مَن الخوف چنت اعتقد تخطيت !! بَـس چان مُجرد اعتقاد واني بعدني اخاف خيالي
كتمت صوتي بأيدي مَن فتَح الاضواء وعلامات القلق مرسومة على وجهة وبنفَـس اللحظة انفتح الباب ودخلن البنات مرعوبات

رنيم- شبيهاااا خالو شكو؟

بَـس هوَ بعده جامد بمكانه ما مستوعب الصار؟ حضنت رنيم خايفة وأحَس گلبي حَ يطلع مَن صَدري
والرجفة مو طبيعية جسمي ينتفض نفض عبالك لزمتني كهرباء؟!

- خفت ظلمه وما شفت هُمام عبالي مو هوَ

رنيم- سارة حبيبتي كافي على كيفچ ويا نفسچ محد حَ يأذيچ واحنه موجودين

- مو مو بيـدي

رنيم- تردين ابقى يمچ؟

ما حَـبيت اقلق راحته وهوَ اكيد تعبان مَن نومة الكراسي بالمستشفى ويريد يرتاح هزيت راسي

- لا ، شربي البنات ماي ونوميهن خطية خافن

هزت راسها بالقبول وطلعت ، باوعتله بعده بمكانه زفر انفاسه بضيق وتقدم گعد مقابيلي!

هُمام- شلونچ؟

- شنو چنت تسوي؟ رعبتني؟

- الصُبـح سحبتچ بقوة ومن صعدتي گلتي وجع ببطني !! خفت مأذيچ بدون قصـد وردت اطمئن على جرحج

- لو مشغل الاضويه على الاقل خوفتني

مرر أيده على زندي وهمس
هُمام- عذريني واهدي جسمچ يرجف!

سحبني شوي شوي وخله راسي على صَدره يداعب شعري بأيده ، ابتعدت بدون ما انطق بشي وتمددت مغمضه عيوني
گال
هُمام- راح ابقي ضوه خفيف

- تمام

غمضت عيوني بَـس أحَس بيّ يتحرك بالغُرفة ، اكيد دا يغير ملابسة !! قليل الأدب يغير علني
كتمت أنفاسي مَن حَـسيت بيّ يمدد بصفي ، قَريب كُلش!

همس
- سـاࢪة؟

ما جاوبت ، سكت فترة ورجع گال
- اعرفچ ما نايمه ، حافظچ اني عويناتي

حَـسيت بصدرِه العاري يلامس زندي وأيده يمررها على خَدي الضربني عليّ
هُمام- جعلها بالكَسر شلون ضربتچ؟ خدچ احمر أذيتچ باوعتيلي بعَين الكره!! كرهتيني ساࢪة؟

ما جاوبت بَـس گلبي يدُگ بقوة! استرسل بتنهيدة
- سارة سكوتچ يتعبني حاجيني

- حتى بَـس احجي يصيرلك سَبب تضربني؟

- لا تعرفين أنتِ شگد ادوسين ببطني واسكت بَـس اليوم اشتعلت شعل لان كليم شافچ سارة وجعني گلبي لان شافچ متت قهر ذبحني ذبح منظرچ وأنتِ داخله بشعرچ الحلو ورقبتچ التشبه المَرمر طالعة والدشداشة دلعة وصدرچ مبين

سنَد راسه على راسي وگال
- مرمرتي حالي يا بويه

- ليش؟ تحبني؟

ضحك وگال
- لا بَس أنتِ زوجتي گدام الكُل وهذا الشي يقلل من قيمتي ويكسر كرامتي واني كُلشي إلا كرامتي

ضحكت
- دا تقلدني؟

- اممم

- وخَر هُمام !!

- شلون اخليچ تسامحيني؟

دفعته عني وبفضل الاضواء الخفيفة گدرت اشوف ملامح الحَزن بوجهة !!
درت وجهي بدون ما انطق بشي واسمع صَوت حسرته وانفاسه العالية ، صدمني مَن ابتعَد واخذ تلفونه يتصفَح بيّ؟

تقريبًا رُبع ساعة واني فكرة تاخذني والخ ترجعني لحَد ما اجاني صَوت شِـــعار مَن التلفون دليل على وصَول رسالة؟ سحبت التلفون ومن قريت اسمه باوعتله مستغربة بَـس هوَ بعده يتصفَح ما باوع ولا التفَت التفاته بسيطة !!

فتحت الرسالة وچانت عُبارة عن مسَج طِويّل جدًا
-"مسَاء الخَـير مدامتي أُم عَيون شهل
خجلت اسولف وياچ خجلت احط عيني بعينچ وافتحلچ الماضي واسولفلچ حقيقة هُمام وطيش هُمام
صَـح أنتِ ما كنتي بحياتي من اخطأت لكن اني اسف! اسف لان مُمكن ماضيّ يظهر ويكسر خاطرچ واكبر مثال عقيق واعرف زعلچ منها واعرف تغارين وحقچ اني مقدر هذا الشي وما ضايج ولا متضايق مثل ما اني اغار عليچ غصب عني اتقبل غيرتچ واتحملها وافسرلچ وارضيچ بالاجوبة المنطقية اليّ تقنعچ ان شاء الله بعَد ما تقرأين رسالتي راح اكون مستعد حتى اجاوب اي علامة استفهام براسچ
قُصتي وما بيها اني انسان وڪ رجُل عندي احتياجات خاصة ما چنت مفكر ارتبط بعائلة وما مفكر اتزوج بَـس چنت بَين فترة وفترة اتزوج زواج مُتعة لفتَرة مُعينة
مرة اتصاوبت بأيدي وتم نقلي للمُستشفى وهناك اتعرفت على عقيق لان چانت الدكتورة اليّ عالجتني وصرت اتردد لهناك حتى اشوفها ما اكذب البنية عجبتني حيل جميلة صار بيناتنا تبادل ارقام وبقينا نتواصل كُلشي چان تمام لدرجة قررت اتقدملها وسبب التأخير چانت يتيمة وعايشة وحدها وما عندها غير خالها بالخارج وننتظر رجعته! يمكن چان سَبب حتى تبين على حقيقتها بمرور الوقت صارت تبين بيها تصرُفات ما تعجبني وشَكيت بَـس ما حَـبيت اظلمها لحد ما مرة اتجرأت وباستني واحنه داخل السيارة والسيارة مُظللة ما حَـبيت تصرفها وضربتها راشدي ورزلتها بَـس فاجئتني مَن حَـبيت الوضع واخذت أيدي تبوسها هنا عرفتها مازوخية بنية بهذا الجمال ودكتورة ومُستقلة تكون مازوخية؟! حرامات بحق شبابها عمومًا من هذيچ الساعة وقطعت علاقتي بيها بَـس هي چانت هوايه تتردد وتتوسل نرجع واصرارها ما زادني إلا نفور ولعبان نفَـس هاي كُل قصتي ما عندي وياها شي ردتها بالحلال بَـس اليّ كشفته خلاني اشمئز منها ومُستحيل وحدة مريضة مثلها تكون أُم صالحة لأطفالي بالمُستقبل"

باوعتله وما اعرف اعصب او اتقبل الوضع لان چان قبل دخولي الحياته؟ شردت ضايعه بقراري لحد ما گال هوَ

هُمام- سارة والله ما عندي شي وياها وأنتِ اكيد من سمعتينا سمعتي اني شنو اجاوبها وشلون طردتها والله ما تعنيلي شي

- يعني بعَد ما عقدت عليَّ ما ربطتك علاقة بأي مرة؟

- مَن قبل لا اعقد عليچ مَن فترة دخولچن لحياتنا ما عندي شي

- وعقيق؟

- ماضي سيء ووعد احاول ما اخليها تدخل لحياتنا وتزعلچ

- هُمام اذا كسرتني وخنت ما اسامحك لو تشعل العشرة شمع خلي يكون بعلمك

- اطمئني مكتفي بيچ

اتقرب وأحَس بروحي صخنت من باسني بخَدي ، دنگ هامس بأذني
هُمام- اذا ابوسچ تلعب نفَـسچ؟

رفعت عيوني الذبلانه بعيونه الاتعس مَن حالتي! حطيت أيدي على خده وحركتها بنعومة رفعت راسي وهالمرة اني بادرت وطبعت شفتي على شفته غالقة سُموم افكاري !!

يعاملني مُعاملة سَقي الوردة؟ يمرر أيده الخشنة بنعومة على كامل جسمي يداعبني بأنفاسه مجردني من ذرة المنطق والعقل!
دفعته اسحب الغطا على جسمي فاتحة عيوني ما مستوعبة المرحلة الوصلنه الها مَن مُجرد بوسه؟

هُمام- عذريني استهترت والسَبب شفافچ

- هاي شنو؟!!!

- ماكو شي بَـس لو ما دافعتني چان تممنا زواجنا

خزرته ارجف وصحت
- انيييي مرييييضة

- اش شمدريني ما انتبهت

تقرب ويسحب الغطا يريد يشوف الجَرح واني ما انطي صَبر لحد ما كفخني على راسي وزمخ
- سااااااااارة

اصطكيت بمكاني مَن الخوف خزرته زائد صرخته يساوي رُعب !!! سكتت وهو غيرلي الضماد وساعدني البس واني بداخلي الطم مَن الخجل

- نامي ارتاحي ولا تفكرين بشي كُل الامور خليها عليَّ اني احلها أنتِ بَـس ارتاحي اني استمد قوتي مَن عيونچ

ابتسمت ، دنگ باسني بَين عيوني وغطاني عدل ونام بصفي يلعب بشعري لحَد ما غفيت بـدون ما أحَس على نفَسي

صار يدرسني كُل يوم والكُل شَدد على مسرة لان مستواها مو زين! عمليتي صارت احسَن وعمامي كُل ما اسأل عنهُم يغير الموضوع!

وبهيچ صار ما يبعدنا عن الامتحان غير يوم؟
وقررت بعَد الامتحانات اسولف الـ هُمام كُلشي ونتمم زواجنا لان اعرف راحتي بقُربي منه!

أريد اكون أُم احتاج هذا الشعَور العظيم ..
بَـس ما چنت اعرف القَدر اتخذ قراره قبلي !!

بهاي الليلة خلانا انام وگعدنا من الفجر هوَ يراجعلنا ويسويلنا ريوگ
بَـس الصُبـح چان عنده دوام هوَ وكليم واضطر ايهم ياخذنا وينتظرنا بره للاحتياط خاف كُلشي يصَير!

طول فترة الامتحانات ما تركونا دراسة
وتحفيز
ومرات ياخذنا هُمام يفرنا شوي ويشتري النا ونرجع يدرسنا بوسط شغلة ويجي تعبان
من الدوام يگعد يدرسنا ما تعب ولا مل
بالعكس يفَرح وخصوصًا مَن نرجع ونبلغه
الامتحان سهل واحنه مجاوبين
والكُل وعدنا بهدايا مُختلفة يخفزونا

كليم بلغ جُنيد يتروا ويتأخر ويأجل الموضوع لبعَد الامتحانات علمود رنيم ما تتشوش ويبقى تركيزها للدراسة فقط

اخر يوم اتفاجأنا من طلعنا وچان على غير العادة كليم ينتظرنا بزي الدوام الواضح
طالع مَن شغلة وجاي لهنا ، صعدنا فرحانات لان خلصنا من الامتحانات وتعبها

كليم- بعَد النتائج المتأكد راح ترفع راسي نطلع سفرة لمدينة الالعاب

دموع- صدُك عمو؟؟

- هههه اي بابا مُكافأة بسيطة هاي

مسرة- والمُكافأة الچبيرة شنو لعد؟

ضربتها خازرتها الثوله ما عندها سيطرة
على لسانها!!
ضحك وجاوبها بحنان

كليم- لا هاي عليَّ خلي افكر بيها بَـس اذا اجه مُعدلچ 55 نفَـس ذاك اليوم ما مشموله

مسرة- يا عمو وشبي المُعدل؟ يجنن

كليم- اني ما يعجبني

عبست مسرة تفكر ، هوَ مد ايده وكرص
خد رنيم الگاعده بصفه
كليم- بشري؟

- ان شاء الله مُعدل عالي

- متأكدة يعني؟

- اممم

باوعلها عاقد حواجبه لان تجاوبه بشرود
ومُختصر وهوَ ما لح عليها
عرفتها تفكر بسالفة جُنيد لان امس اتصل وگال بالليل نجي اني والاهل وهُمام گله هلا بيكُم

وصلنا للباب ونزل ويانا فتح الصندوق الورا تعجبنا من نزل علاليك
وصينية مُغلفة ما عرفت شنو بيها لحد ما گال
كليم- اليوم تعبانات جبتلكُم البسبوسة جاهزة على المرة الجاية أنتو سووها يله تعالن اخذن هاي الجن

فتحت الباب لان المفتاح عندي
وهنَّ راحن اخذن وياه ودخلوهن للمطبخ!
باس رنيم براسها وحاوط خدودها

كليم- كافي بناتي تعبتي نفسچ بالتفكير الكاتبة ربچ يصير ولا اعتراض على إرادة رب العالمين

رنيم- ان شاء الله

راح وهي دخلت تنام حتى ملابسها ما غيرتهن واني ما حَـبيت اضغط عليها لان صعبة عليها تختار يا الانسان الساكن گلبها يا الساكن عقلها

مسرة ودموع همات راحن نامن واني بقيت اعزل بالبيت لان هملنا بما فيه الكفاية وخطية هُمام حتى ملابسه هوَ يغسلهن علمود لا يشغلني عن الدراسة!

وگفت صافنة وضربت جبيني اني همات لازم احجي لـ هُمام كُلشي صَار مَن حقة يعرف الحقيقة لان أحس اكو مشاعر مُتبادلة بيناتنا.

اذا سامح وقَبل راح اكون زوجته قلبًا وقالبًا هاي الليلة ، ابتسامة آمل
انرسمت على شفايفي واني احط
كُل آمالي على حنانه واسلوبه

مسحت دموعي النزلت ومَن كملت
صعدت فوك
سويت عناية خاصة بنفَـسي
مثل ما اكو آمل للرفَض اكو آمل للقبول
وبهيچ حالة لازم اكون مستعدة

لفيت المنشفة على جسمي والثانية
على راسي ورحت للغرفة
شهگت عيوني متسمرة عليّ بصدمة وهوَ
عيونه وكحه ، فصلتني من راسي لأصبع رجلي الصغير !!

مو هذا وقت رجعته لذلك طلعت مطمئنة لميت أيدي اخاف المنشفة تنفتح على گد ما ارجف من الخجل ، درت وجهي
دا ارجع وصاح وراي

هُمام- اوگفي

تسللت برودة بجسمي من لزمني مَن زندي
وسحبني داخل الغرفة وسد الباب
- هُمام فدوة

سحب المشفة من راسي وشمرها نترت
- هُماااام

لزم أذني وسحبني مقربني عليّ
هُمام- مو مانعج من الطلعة بهذا الشكل؟!

- دا تأذيني

- مانعچ لو لا؟

- اي اي

- وليش طلعتي هيچ

- نسيت ملابسي فدوة دا تأذيني

تحسر وتقرب ، الدمعة صارت بطرف عيني
غمض عيونه وسحَب نفَـس
هُمام- شنو هذا العطر؟

- شـ شامبو ماكو عطر عوفني الله يخليك خوفتني

حط راسه برقبتي متجاهل كلامي يمشي شفايفه على رقبتي وكتفي بدون ما يسوي شي
أحَس صار ببطني اعصار من كمية المشاعر اليّ بداخلي!

هُمام- سارة تعذبيني ليش هيچ؟

همسها قريب من مسامعي وباس شحمة أذني عصرت كتفه وبدون وعي منيّ فلت صوت تأثري بفعلته
وياريت ما صَدر لان تخبل دفعني على السَرير وصار يقبلني بكُل مكان اطوله شفايفه وأيده تتجول على كامل جسمي وثاني مرة تصير وقريب من تمام زواجنا ادفعه..

ابتعد اوضاعه متخربطه
شهگت مغطيه نفَـسي من ضرب التيبلام وفلشها..
هُمام- فهميني ليييييش؟

- هُمام!

دار يباوعلي وجهة احمر وعيونه مخنزرة
هُمام- فهميني سارة؟ تلعب نفسچ منيّ لو شنو الموضوع؟ دخيل الكائنات فهميني مو هنا (أشر على راسه) عقللللل ما بقى دمرتيني على گد ما افكر وابرر تصرفاتچ

- حَ اسولفلك بالليل وعَد

- هه سمعت هواي مَن هاي الوعود الكاذبة

- وداعتك اسولفلك اني اصلًا مقررة اسولفلك قبل لا يصير هيچ بيناتنا

- ما يهم

راح سحَب ملابس من الكنتور وسَده بقوة وطلع للحمام !!
بدلت وامسح دمعة توگع الثانية
انفطر گلبي على حالته بَـس لازم يعرف
قَبل أي خطوة لـ تتميم زواجنا افضل

دخل طفى الاضواء وتمدد منطيني ظهرة شهگت مقهورة لان معودني انام على صَدره ومَن ينطيني ظهرة اعرف زعلان لو رافض قُربي!؟

تمددت بمكاني تاركته ياخذ راحته وعلى هدوء الغرفة والامان بوجودة غمضت عيوني وسحبني النوم وما فزيت إلا على صَوت رنيم وهي تصرخ بحَيث صوتها واصلي

رنيم- أريدددد كليمم أريده خالو فدوة صيحله

طفرت مَن مكاني ونزلت اركض أريد افهم شبيها كم مرة اجيت اوگع من الدرج على سرعتي ورعبي عليها
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••

رنيــم•

مساحة واسعة خضره وكُلها ازهار وورود امشي حافية على نعومة الحشيش اليّ يداعب رجليا العارية!
اجاني صَدى مَن بعَيد وهوَ ينادي بأسمي

(رنيم رنيم رنيم رنيم....)

اتبعت الصِوت ورجليا اخذتني لشجرة كبيرررررة واگف يمها شخص وكُل
ما اتقدم تبين ملامحة اكثر لحَد ما تسمرت مكاني فاتحة عيوني
ومكممة حلگي
- بابا ؟؟؟؟!!

فتح أيدي دليل على استقبالي داخل احضانه
واني ما اترددت لحظة وركضت داخله احضانه اشم بريحته الطيبة بشكل مو طبيعي ريحة ما شامة مثلها مَن قَبل !!

رُسن- ملاكي البريء وحيدة ابوها وحبيبته

- بابا يا رَوحـي بابا حبيب گلبي ورَوحـي مشتاقتلك كومة وينك عني وين عفتني ورحت

بعَد وجهي محاوط خدودي ويضحك بحنان
- صَـح رحت وعفتچ بَـس تركتچ يم الاحن مني عليچ

نزلت دموعي فاهمة قصده
- يم ابوچ الثاني باباتي يم عزيز گلبچ كليم

- بابا عمو ي...

قاطعني يهَز راسه بمعنى اعرف ورفع راسه يباوع ورايا ، بفضول درت وجهي وباوعت چان عمو واگف ومَن باوعناله تقدم النا

أيدي الچانت بأيد بابا شالها وحطها بيد عمو كليم وگال
- هاي امانتي الك ليوم الدين راح اسألك عليها يم الواحد الأحد واذا شكت منك اعرف خوتنا سقطت

كليم- بروحـي احطها

باوعلي ومسَح على راسي
- حطي كليم بين عيونچ وبنص گلبچ

نزلت عيوني على أيدينا المتشابكة ورفعت راسي احجي بَـس انكتمت مَن ما شفت بابا
درت دا أريد اسأل كليم عنه بَـس هوَ الثاني همات اختفى !!

نزلت راسي لأيدي وفتحت عيوني على منظرها تصُب دم بطريقة مُزعجة للنظر
وللحظة شفت الحشيش صار عبارة عن دم والارض الخضره صارت حمره انرعبت وسديت عيوني
أحَس بجسمي ينخض بطريقة قوية وصَوت خالو بعَيد لحَد ما فتحت عيوني شاهگة وارجف واني بحضنه شابگني وگلبه يدگ بقوة!!

صرت احجي بكلام ما مفهوم بَـس كُل
الاحتاجة كليم
أريده احس هوَ الوحيد الأريده بهاي اللحظة ما أريد غيره اني أمانته وهوَ وصية بابا

صاح خالو
هُمام- تعااال للبيت.. اي اي صوتها تعال تريدك ما اعرف شبيها

شددت على ملابسه وصرخت گلبي يوجعني من منظر الدم على أيدي أحَس عقلي فصَل
ماكو دقائق وحَـسيت بنفَـسي انسحب لحضن ثاني

شهگت گلبي يوجعني اباوع لعيونه المليانه قلق
- كليم دم !!

كليم- وين بابا وين؟ ما بيچ شي؟

- شفت بابا أنت هَمات موجود بَـس دم؟ كليم أيدي بيها دم ما اگدر اباوعلها اخاااف

كليم- امشي نغسل

سندني واني ضامه راسي بصَدره وأحَس شخص حط شال على راسي
وهوَ صار يغسل أيدي وبعدين وجهي واخذني للحديقة گعدني بالمرجوحة وقرفص گدامي لازم أيدي يحاول يخفف من رجفتهن

والباقين كلهُم واگفين بعَيد ، مسَح دموعي
كليم- تگدرين تسولفيلي هسه؟

هزيت راسي اسَردله أدق تفاصيل حلمي بالبداية چان مبتسم وفرحان بَـس مَن وصلت للجُزء الاخير من الدم تشكلت عقدة بين حواجبه وشَرد
ما اعرف شنو من جرأة خلتني اشمر روحي عليّ واحضنه

- لا تعوفني

كليم- "مَن كون عافتني صحتي أذا بيوم عفتچ جوهرتي"

هُمام- واني الگواد ابقى اشاهد هذا المنظر والمفروض ابقى ساكت؟؟؟؟

ضحكت امسح بدموعي ومديت أيدي
- تعال خالو

تقدم زعلان حضنت خصره
- أحبّك خالو

هُمام- يفديچ خالچ خوش؟

- خوش هههه

هُمام- شلون صَرتي؟

- زينه

هُمام- شبعتي احضان شلون ما تصيرين زينه وأنتَ هيووو مو كيفت امشي ولي يلـه صارت زينة

كليم- أجيت بعَد ما اروح إلا اشرب چاي من أيديها

هُمام- ولي اشرب ببيتك

- خطية خالو خلي اسويله

هُمام- انچبي خوش؟

- ههههههه

كليم- امشي امشي عندي موضوع ويــاك

اخذه وراحوا للصالة واني بقيت شاردة بحلمي

ما فززني غير صوت سارة وهي تطلب مني اسوي الچاي الهُم
مثل ما طلب مني كليم !!

ما سألت ولا حجت شي عرفتها ما تريد
تضغط عليَّ وتعرف مَن ارتاح اني
بنفسي حَ أروح واحجيلها كُلشي وبالتفاصيل

رتبت الصينية وحطيت قطع بسبوسه واخذتها الهُم ، اول ما قدمتله همس بحيث ما يسمعه خالو

كليم- سُلمت يداكِ صغيرتي

ابتسمت على كلامه ولطافته الدائمة ويايَّ
ورحت قدمت الـخالو وگعدت بصفه
جذبني كلامهُم بخصوص جيت اهل جُنيد

كليم- احم اي اتصل قبل لا تتصل أنتَ وگال فَد ساعة ساعتين يمكم

هُمام- عن نفَـسي ما قابل جُنيد ما ينعاب رجال وشغول ووگفاته حلوة بَـس رنيم بعدها صغيرة مااريد ازوجها وحتى لو صارت فقط خطوبة والزواج الله كريم

رفعت عيوني اباوعله هز راسه بدون ما
يعلق وعيونه شارده بقلق
باوعت لـخالو بعَد ما مسَح على راسي

هُمام- قررتي؟!

- اي

نزلت راسي وترخصت اطلع وهُما عرفوا
ما اريد احجي هسه وتركوني على راحتي
بلغت سارة علمود انجهز الضيافة
بَـس اني چنت بغير عالم ، فزيت مَن صفنتي على سارة وهي تحاوط خدودي بيديها

سارة- هُمام مرة گالي الضايع يلگه جوابه بالقرآن ، عوفي مَن أيدچ وروحي
متأكدة ربي راح ينطيچ الاجابة وراح يريح بالچ

سويت مثل ما گالت فعلًا رحت توضأت
وفرشت السُجادة وصليت ركعتين لوجه الله وقريت قُرآن
حَـسيت بشي مسَح على گلبي بحَيث برد گلبي وارتاحيت بشكل مو طبيعي !!

رحت طلعت من جنطتي الدفتر الچنت
اكتب بيّ أي شي يگوله عمو
واتذكر مرة علمني على اخذ خيرة إمام زماني "المهدي" (عجل الله فرجهُ) بالسبحة ، وفعلًا بَـس دورت بين الصفحات لگيت الطريقة!

﴿ناخذ خرز بنية عشوائية ونصلي على محمد وآل مُحمد تلث مرات ونطلع منها اثنين اثنين لحد اخر شي اذا بقت وحدة الخيرة زينة واذا ثنين مو زينة﴾

سويتها وكُلي آمل للطَريق الصَـح
بهذا الوقت سمعت بيهُم اجوا..

صفنت وگلبي يدگ بقوة "بقت خرزتين"!!
يعني مو زينة؟ ابتسمت وحَـسيت هاي رسالة ثانية من بعَد حلمي بـ بابا ..
حسمت قراري بعَد هاي الاشارة وتأكدت ماكو احسن من كليم إليَّ

صَـح بعدني ما احبه مثل الحُب البداخله اليَّ بَـس هوَ ابوي الرَوحـي وانسان مقامة بگلبي ما مُمكن يعلو عليّ
اتسعت ابتسامتي متذكرة جُلمة بابا بالحلم
"حطي كليم بين عيونچ وبنص گلبچ"!!

كليم عزيز بابا وعزيز رَوحـي.!

گمت وأحَس منتعشة ومتحررة مَن الحمِل السكن گلبي مَن فترة والفضل الاول لربي ومن ثُم بابا وخيرة صاحب گلبي وزماني إمامي المهَدي "عجل الله فرجهُ"

طرقت الباب وبعدها دخلت سلمت على عمة الاكلتني بالسلام والبنات چانن حيل لطيفات
باوعت الجُنيد وحَـبيت اخصمها من البدلية ابتسمت وحطيت أيدي على صَدري وگلت

- شلونك خوية؟

بهَت! وصار هدوء بالمكان اتجاهلت الموضوع ورحت گعدت بصف خالو وحاوطت أيده سانده راسي على كتفه
ومن الجهة الثانية كليم گاعد

علياء- شنو رنيم ما تعرف على شنو جايين؟

هُمام- بلي تعرف

علياء- لعد شنو هذا الكلام

هُمام- علمي علمچ خوية بلغتها وگلتلها تفكر وترجعلنا خبر اليوم

دار باوعلي
هُمام- فهميني بابا

- اني ما موافقة

جُنيد- ليش رنيم؟ مو هذا حلمنا جاي اوفي بوعدي القطعته الچ قبل سنوات

خزره خالو ما قابل على كلامه الجريء وگدام الكُل
ربَتت على أيده وجاوبت جُنيد
- وأنتَ گلتها قبل سنوات !! قبل لا تختفي من حياتي فجأة قبل لا انضج قبل لا ارجع العائلتي اما هسه اني ما موافقة چنت طفلة ومشاعري مشاعر طفلة ضايعة تريد أي شخص يحتويها ولو چان اي واحد غيرك چنت حَ اتعلق بيّ لان چنت احتاج الامان والعُطف مَن الكُل وهسه اني واعية وتفكيري واعي اكثر واعرف الصح من الخطأ

جُنيد- وهيچ مشاعري لعبة بأيدچ؟

- يعني من تركتني واختفيت چنت تلعب بمشاعري؟

- اضطريت لان والدي توفى ومن رجعت أنتِ اختفيتي

- الله يرحمه

عيونه حزينه وأيده ترجف
- فكري ما مستعجل اخذي راحتج بالتفكير وا...

قاطعته
- فكرت واختاريت الشخص المُناسب اليَّ

درت اباوع الـ كليم منزل راسه وساكت ومَن سمَع كلامي باوعلي متفاجأ!!!
دنگت راسي العب بأصابيع خالو وكملت

- خالك كليم طلب أيدي قَبل لا أنتَ تشوفني وتعرفني وطول هذيچ الفترة اني افكر واختياري للأبد حَ يكون كليم لان كليم قبل رَوحـي وقبل كُلشي بحياتي

رفعت راسي والانظار كُلها عليَّ وخالو ما تدخل أبد بقى يشاهد بصمت
جُنيد عيونه صارت حُمر وعيونه تنتقل بيناتنا اني وكليم

جُنيد- ليش ما بلغتني خالي؟

كليم- ردت رنيم تقرر بدون اي ضغط

جُنيد- ههههه قصدك الضغط مَن ناحيتي لان اني مثل الغبي سولفتلك كُلشي وعرفت شلون تسحبها الناحيتك وتخليها تختارك

قسورة- اوزن كلامك جُنيد وتأدب

كليم- اش لحد يدخل نفَسه

جُنيد- كسرتني وما راح اسامحك على كسرة گلبي

صار الخفت منه! گام يريد يطلع حجيت بصوت عالي
- اذا اكو شخص ما لازم تسامحه فهو اني لان طول الفترة الفكرت بيها أنتَ أنُ كليم چان يقنعني ارفضك هوَ چان بالواقع يقنعي اقبل بيك وما يكون عقبة بطريقي اذا اريد اوافق عليك بَـس هذا اختياري اني

طلع بدون ما يجاوب وكليم طلع ورا وامه خطية گعدت تلوب عليّ
تخاف يصير بينه وبين خاله مشاكل والبنات وجهن صار اصفر من القلق على اخوهن
كرهت نفَـسي ونزلت دموعي

مسحهن خالو وگال
- عين العقل أبد لا تتندمين! اني بضهرچ

هزيت راسي شوي ورجع كليم وجهة مغيم عليّ الحَزن
كليم- ما يقبل يرجع يريد يروح وياخذجن

علياء- چان طاير وهوَ جاي حبيبي وليدي

كليم-ما اعوفه وغلاوتچ ما يرتاحلي بال لحد ما اطيب خاطره

ودعونا وطلعوا واني ما حَـبيت اتواجه ويا أي شخص ركضت بفراشي وتغطيت سارحة بأفكاري وما فززني إلا صوت مسَج من التلفون
بدون ما ادخل شفته دازلي مَن الاشعارات

كليم "وتسأليني ما الحُب؟ الحُب
أن أكتفي بكِ .. ولا أكتفي منكِ أبدًا"

..

وتستمر الحكاية.. 🚬♣

قناة التلي zainab_salah0