رواية فارسي العاشق الفصل التاسع 9 - بقلم بسمة البياتي

_  فارسي العاشق _
( بقلم بسمة البياتي)
_البارت التاسع _

اني مؤمن حفيد الشيخ عگاب وابن اخت حازم  اني يتيم الأب ابوية الله يرحمه مات بحادث سيارة من جان عمري اربع سنوات ملحكت اشبع منه
ابوية يصير أبن عم امي

امي لو شما اوصفها قليل بحقها جانت بعدها صغيرة من ابوية توفى حسب كلام جدي وبيبتي هواية تقدمولها وهي ترفض
كرست حياتها كلها الي ربتني احسن تربية

جدي عگاب هو ابوية الثاني وخوالي عمرهم محسسوني باليتم دللوني فعلاً الله يحبني لان عندي هيجي اهل

حازم خالي اني ويا مثل الاخوان لان تقريباً نفس العمر رابين سوى بس شخصيتنا تختلف هو بسبب دلال جدة خربت اخلاقة

اني ملتزم بصلاتي معندي علاقات ويا البنات جنت دائماً  مخلي امي وجدي بين عيوني واريدهم يبقون رافعين راسهم بيه

امي حلمها اكمل دراسة واخذ شهادة عاليه
اهتميت بدراستي ردت احققلها امنيتها وهذا اقل شي ممكن اقدمة الها

بالعطلة جنت اخذ دروس تقوية للسادس جدي كلف ابن جيرانة ياخذني ويرجعني من المعهد لان طريق بعيد

وبيوم اتصل عليه الولد كال ما اكدر اجي السيارة عاطلة اضطريت اتصل على حازم يرجعني وهاي جانت اكبر غلطة بحياتي

من طلعت شفتة واكف يباوع على بنات

مؤمن... حازم نزل عينك

حازم... ولك شنزل دشوف الجمال خرب شرفك مؤمن ادوم ويا هيجي كيك ومتكول  لعد انت اشكد نذل

مؤمن... حازززززم امشي رجعني ساعة السودة الخابرتك بيها

حازم.... انجب لك بعد يومية اني اوصلك
عليك الله منو هاي ام عيون الحلوة

مؤمن... عرفتة يقصد ريتال ما اعرفها
ولا تعب نفسك البنية ثكلية وعاقلة مراح تباوعلك

حازم... عود انشوف شلون متباوعلي

من هذا اليوم حازم انگلبت احواله خلى عقلة ويا البنية والمصيبة جان شيسوي يجي يحجيلي واني ابقة الوم بنفسي

دمر حياة البنية اشكد احجي وانصح واهدد بس مجان يسمع مني عقلة قافل عليها

بدأت امتحاناتي اشكد جنت قاري بس بيوم الامتحان نسيت كلشي

امتحنت امتحانين واني جوابي زفت قررت بعد ما امتحن واعيد السادس

بالليل جيت خليت راسي بحضن امي وكعدت اشكيلها

مؤمن... هاي اكيد حوبة البنية هيجي صار بيه  الله اليعلم اشكد دعت عليه

نسرين... اوووف يا حازم محد خربة غير امي ومن اريد اكول الابوية على سوالفة متقبل

مؤمن...جدي هم بي صوج ليش ميخطبها اله ويفض السالفة

نسرين... ابوية واعرفة ميقبل يجيب غريبة البيتنا وثاني شي حازم ليل ونهار يصيح احبها واريدها وابوية يتخبل من هاي السالفة

مؤمن عدت السنة وكدرت اطلع معدل دخلت هندسة كيميائية

جنت اعرف ريتال هم بالهندسة بس غير قسم
بس حازم كال ريتال بطلت

جان متعصب ويلوم نفسه يكول اني شلون ملحكتها البيتها حتى اندله شلون هاي الشغلة فاتتني

سبحان الله يمكن رب العالمين عمى عينة عن بيتهم

حازم صار مينجرع حتى زوجتة تاركها ويومية مسويلنة طلابة

بيوم كاعدين اجة ابن عمي عادل يركض كال لحكوا حازم تعارك

حازم ضارب ولد على راسة والولد فاقد الوعي

علمود سبب تافه
لان الولد مخلي السيارة شوية قريبة على المكان الحازم يركن بي سيارتة

رادت اتصير شغلة عشائر لان الولد بقة اربع ايام بالمستشفى بالكوة انحلت المشكلة واهل الولد تنازلوا الخاطر جدي

خوالي لزموا حازم شبعوا كتل

اجة حازم كال الجدي اريد اسافر
جدتي كلبت الدنيا مقبلت

جدي بسرعة وافق كاله روح بلكي اخلص من مشاكلك  يمكن الغربة تسويك رجال وتكدر تعتمد على نفسك

حازم عاند مياخذ زوجتة ويا والمسكينة بقت يم اهلها
كال الجدي انت السبب بكل هذا الديصير كتلك زوجني الاريدها انت رفضت

راح حازم التركيا بقة اسبوع ومناك كدر يطلع عن طريق البحر اللمانيا

من داومت كلية بقيت ادور ريتال اريد افهمهة اني مالي دخل بالصار بيها و اريدها تبريلي
الذمة
شفتها كم مرة بس متقربت منها جنت خايف من ردت فعلها

اليوم دخلت للكافتريا شفتها هي وصديقتها واكفات والمكان ازدحام  رحت ساعدتهم 

ريتال.... انت مؤمن اقارررررب حاززززم مووو

مؤمن... على كيفج اهدئي اي اني مؤمن

ريتال.... جمدت شلون بيه اني شوكت اخلص منهم

شتريدون مني عووفوني بحالي الخاطر الله

مؤمن... بس هلمرة سمعيني وبعدها متشوفين وجهي

اني مجاي اسويلج مشاكل

اني اريد اطمنج حازم سافر وبعد متشوفي

ريتال... من كال حازم سافر مي بارد ونزل على گلبي
بس هم بقيت خايفة من هذا مؤمن

وانت هسه شرايد مني

مؤمن... ريتال الله يشهد على كلامي اني مجنت راضي بسوايات حازم واشكد حجيت عليه بس ماكو فائدة

ريتال... اي وبعد كمل

مؤمن... ريتال بروح ابوية اني ممرتاح وضميري ديعذبني الي صار بيج بسببي لان حازم شافج من اجة يوصلني
ابريني الذمة

ريتال... من حلف بروح ابوة انقهرت عليه جان يحجي بصوت مخنوك

روح مؤمن منا طلاب ما اريد مشاكل
ومبري الذمة بس اهم شي خلصت من حازم

مؤمن... ترى حازم مزوج

ريتال...يااا عزاااا بعينة مزوج وهيجي سوى بيه

مؤمن... زوجتة هم ضحية مثلج
ريتال اعتبريني مثل اخوج واي شي تحتاجي اني موجود

ترخص وراح

رهف... اكص ايدي اذا فهمت شي منو مؤمن ومنو حازم

ريتال... اوووووف رهوفة هاي سالفة طويلة

رهف....اموت على السوالف الله عليج احجيلي

ريتال.... خرب انتي نسخة من رؤى

كعدت احجيلها وهي الفطيرة كاعدة تسمعني وتبجي

رهف... سودة عليه كل هذا صار بيج الله لاينطيك حازم

ريتال... ولج هسه اني فرحانه وأخيراً خلصت منه اليوم اشتطلبين اني حاضرة

رهف.... لا مو اليوم باجر تعزميني على ريوك و غدا لان هسه شبعت

ريتال...ههههههه اشكد جوعية اوك يدللوووو

رجعت للبيت واني طايرة من الفرح حجيت الاهلي على كولشي وخطية هما هم ارتاحوا

استمريت بالدوام مؤمن مرات اشوفة بس سلام بينا

ماما دخلت بشهرها راحت دكتورة كتبتلها على عملية قيصرية علمود عمرها ميجازفون ويولدوها طبيعي

بابا مقبل تاخذ سونار تشوف جنس الجنين يكول خليها على الله

بيوم الولادة رحت ويا ماما اني وعمة داليا وغيداء

من دخلوها الصالة العمليات شبعت بجي جنت ميتة خوف عليها
والزاد خوفي هي بقت توصيني على اخواني

الحد ما طلعت من الولادة راد گلبي يوكف

بس الله مكسر خاطر بابا ورزقة بولد ثاني

فدوة العينة يجنن وصحتة تمام
دخلت على ماما حاضنتها وابجي وهي بالكوة تحجي وتهديني

بابا هم موجود وجان خايف اجه باس ماما من كصتها

غيداء... شراح تسمون هذا الحلو

ريتال... يامن

بابا... هذا هو اختة اختارت اسمه اخذة كبر باذنة

غيداء... داليا اخذي ريتال ورجعوا اني ابقة يم سجى والطفل هم اخذوا لان ميحتاح حاضنة

رجعنا للبيت واحنا طايرين بي من الفرح رؤى جلبت بي متهدة وبقة من ايد الايد 

يزن كاعد بعيد ويباوع

ريتال.... رحت كعدت يمه وحضنته حبيبي ليش متجي تشوف النونو

يزن... لا ما اريد

ريتال...حبيبي هذا صار اخوك الصغير انت لازم تحبه وتهتم بيه شوفة شلون صغير ومسكين

ترى احنا نحبك انت اكثر بس هذا لان صغير نشيلة

اجة بابا اخذ يزن الحضنه وبقة يحجي ويا شوية يزون فك وراح يم يامن

ثاني يوم ماما طلعت من المستشفى وبيتنا صار هوسة عماتي كلهن اجني

اني كلية مداومت اخذت اجازة ثلاث ايام

وبقينا على هاي الهوسة ناس رايحة وناس جاية
معارف بابا وماما هواية وكلهم اجوي يباركون

عمة داليا بقت يمنا هي تعتني بماما لان احنا منعرف

جنت بالليل اني اسهر على يامن
ماما متكدر بعدها تعبانة من العمليه

اليوم خلصت اجازتي ولأزم ادوم

وصلت للكلية اجوي صديقاتي ورهوفة  سلموا عليه وبقوا يسالوني على صحة ماما والنونو

اخذنا محاضرتين من خلصنة ست رهف جاعت
طلعنة اني ورهف وكم بنية رحنا للكافتريا اشترينا لفات وكعدنا بالحديقة

دنسوالف اجة ولد سلم وحجة وياي

مرتضى... ريتال ممكن احجي وياج

ريتال... انخمش گلبي من شفتة هذا صديق حازم
اي تفضل احجي

مرتضى... اريد احجي وياج وحدنا

ريتال... اسفة اخي ما اكدر اذا تريد احجي كدام البنات

اشو هذا بقة يلح لعب نفسي

رهف... كومي ريتال شوفي شيريد واني اجي وياج

رحنا وكفنا على صفحة

مرتضى... ريتال اني معجب بيج واريد اتعرف عليج

رهف... بله انت من كل عقلك خبصت الامة عبالنا شوف شكو وانت جاي ادور تعارف

مرتضى... رجاءا انتي لاتدخلين الموضوع ميخصج

ريتال... اخي طلبك مرفوض روح شوف غيري

مرتضى... ههههه لازم بعدج تفكرين بحازم بس للاسف عافج وراح

ريتال... اتخبلت من كلامة احترم نفسك ليش شنو بيني وبين حازم حتى افكر بي

مرتضى... هاي منو تحجي، على الاحترام اذا ما فضحتج كدام الطلاب كلها اني فلا اتسمى مرتضى

الطلاب التموا علينا زملائي من القسم اجوي رادو يتعاركون ويا

مرتضى عوفوني هاي الجاي ادفعولها صاحبها جان يومية يجي اهنا وموبس هيج حتى من سافر يخابرني يحجيلي عن علاقتة بيها ولكم هاي الفقيرة لاعبة لعب

ريتال... رادت تصير عركة مرتضى الجبان عافهم وانهزم

اني متت ما اكدر ارفع عيني بعين احد

اجة زميلي كالي امشي اشتكي عليه ليش تسكتين

عفتهم وطلعت اركض

مؤمن... واكف ويا جماعتي اجة مرتضى يمنا لونة مخطوف ما ادري شبي
شبيك!

مرتضى... تعاركت ويا صاحبة خالك جاي تبيع شرف براسي

مؤمن لزمتة من ياختة ولك يا كلب هاي اشرف منك ليش هي شوكت جانت عدها علاقة بحازم بسيطة اليوم اخلي جدي هو يتصرف وياك

ريتال.. عفت رهف وطلعت اركض دموعي
تنزل عشرة عشرة ياربي شوكت اخلص من الكابوس الأسمة حازم تعبت وبعد مبقت عندي اي طاقة

الطلاب يباعون عليه بستغراب ونصهم اصلاً يعرفون شبيه سيرتي صارت على كل لسان

رهف.. يمعوده بس اوكفي شنو شادة محرك برجلج انكطع نفسي واني أركض وراج

ريتال... رهف عوفيني الخاطر الله

رهف... بس فهميني وين رايحة على منو ادورين دباعي الطلاب كلها صارت تتفرج عليج

ريتال.. حجيت بغصة وبجي شوفيلي مؤمن وينه اريده

رهف.. تعالي اكعدي اهنا واني اروح اصيحة الج

ريتال.. كعدت واني ارجف دقائق وصار مؤمن كدامي

مؤمن.. بحسرة وقهر اوووف ما اكدر ارفع عيني بعينها الله يسامحك يا حازم على هاي سوايتك

ريتال.. وكفت كدام مؤمن
اريدك تاخذني الجدك

مؤمن.. بفزع شنووو شسوين ليش تروحيلة

ريتال... لاتغشم نفسك تعرف كولش زين ليش اريد اروح الجدك
تاخذني لو اشوف غيرك

مؤمن.. ريتال اني راح احجي ويا حازم لاتكبرين الموضوع

ريتال...راح يصير سنتين ونص واني بهذا وضعي وانت اتكولي لاتكبرينة
مؤؤؤؤؤؤؤمن تاخذني لو لا

مؤمن... امشي وامري لله رهف تجين ويانه

رهف... اي اكيد ما اعوف ريتال وحدها

وصلنة المنطقة تبعد عن مركز المدينة بنص ساعة صايرة باطراف المحافظة

المنطقة حلوة وبيوتها كلها ضخمة وكبار
وكفت السيارة كدام بيت كبير وبصف البيت جامع ضخم
تملكني الخوف وصارت رعشة بجسمي

مؤمن.. بنات ابقوا بالسيارة بس انطي خبر الأهلي واسويلكم طريق حتى تدخلون

.. اوك ننتظرك

رهف... شبيج ريتال مبين عليج خايفة اذا تريدين نرجع
وخلي ابوج هو يجي ويحجي وياهم

ريتال.. هاي مشكلتي ولأزم اني احلها
بابا هواية تعب بسبب مشاكلي ما اريده يتاذى اكثر

مؤمن.. يلا بنات انزلوا

ريتال.. نزلنة من السيارة لزمت ايد رهف ومشينا ورا مؤمن
هم زين بالطريق
خليت مؤمن يوكف يشتريلي شال ثاني غطيت بي وجهي حتى اتشجع واكدر احجي براحتي

دخلنة للاستقبال كعدنا

مؤمن.. اخذوا راحتكم بنات هسه تجي امي وجدة

ريتال.. دخلت مرة كبيرة وياها مرة ثانية تقريباً بعمر ماما
سلموا علينا وكعدوا يمنا

مؤمن.. اتصلت على جدي دقائق ويجي من الجامع انتظروا

ريتال... اهل مؤمن ناس طيبين استقبالهم النه حلو مبينين اهل كرم

رهف.. همست قريب مني ريتال
سيطري على نفسج ترى ايدج دترجف

جدة مؤمن.. زارتنا البركة
مؤمن كال انتوا  ويا بالمدرسة

مؤمن.. جدة اسمها كلية شوداج للمدرسة

جدة مؤمن.. واني شمدريني بسمها كلها نفس الشي مو هم تقرأ هناك

الشيخ... السلام عليكم ورحمة الله وبركاته هلا بنياتي كعدوا لاتوكفون

ريتال رهف.. وعليكم السلام رجعنا كعدنا

ريتال.. من شفت الشيخ من الخوف والارتباك شوية وافقد الوعي اني ابد مو جريئة هاي اول مرة بحياتي اخطي هيجي خطوة

باوعت على جد مؤمن رغم الحجاب على وجهي بس ركزت على شكلة
رجال هيبة وشخصية طويل وضخم لحيتة بيضة وجهة نوراني حرامات هذا الرجال ابو حازم

مؤمن.. جدي زميلتي ريتال عدها موضوع تريد تحجي وياك بي وتريدك تساعدها

الشيخ.. هلا بيها يابة ان شاء الله ما اقصر وياها
كولي بنيتي شنو الموضوع

ريتال.. خنكتني العبرة ما اعرف شلون ابدي بالكلام حسيت بالذل
رهف لزمت ايدي قوي جنت فعلاً محتاجة احد ياخذ ايدي ويشجعني غمضت عيني وحجيت

عمي الشيخ راح احجيلك قصتي واتمنى تعتبرني مثل بنتك او حفيدتك وتوكف وياي وتساعدني

الشيخ.. اذا اكدر من هالركبة

ريتال... اني بنية عشت طول عمري بحالي كل همي دراستي وبس كل الاتمنى احقق حلمي وحلم اهلي واروح طب
جانوا الناس كلها تحلف باخلاقي
وحتى مدرساتي يكولولي انت مثال للادب والاخلاق
اهلي دوم راسهم مرفوع بيه وباختي

بس كل هذا تغير بين يوم وليلة صرت حجاية بحلوك الناس

لان شخص ميخاف من الله خلاني براسه

سوا علاقة ويا صديقتي المقربة وصار ياخذ منها معلومات عني وعن اهلي
وهي مقصرت حجتلة كولشي عن حياتي وعن اهلي بالتفصيل اشتراها بالهداية والفلوس

صار هذا الشخص مثل الكابوس يطاردني بكل مكان يومية يوكف كدام مدرستي ومن ارجع للبيت يظل واكف بالركن كدام بابنا

الناس تعاركوا ويا وماكو فائدة يكوللهم اني صاحب بنت ابو يزن وهي تكول تعال حتى اشوفك

بابا رجال فقير ومن اهل الله عايش بحاله معنده اذية على احد
  ولان معنده اخوة وسند

الولد استغل هذا شي وصار يتمادى بتصرفاتة

حتى على الشرطة اتصلنة يومين وهم رجع يضايقني
وصديقتي وين متروح تحجي عليه واتكول ريتال عدها علاقة ويا هذا الولد

من جانوا يجوني خطابة يجون مرة وبعد ميرجعون بسبب الكلام الطلع عليه

الشي الوحيد الي احمد الله واشكره عليه هما اهلي رغم كل هذا الكلام بقوا مصدكيني لان يعرفون اني مستحيل انزل راسهم واخون ثقتهم

وهذا الولد جاب ناس واجة يخطبني بكل وقاحة
بس اني وبابا رفضنا لان مستحيل ارتبط بهيجي بشر وهو حتى مجان جايب اهله ما اعرف منين جايب هذولة الناس

الشيخ يسمعني يهز براسة ومدنك

بابا من قهرة باع البيت وانتقلنة المكان ثاني

حتى حلمي مكدرت احققة من الضيم والقهر مطلعت المعدل الاتمنى ورحت كلية اني ما اريدها

والصدمة لكيتة يندل كليتي

بداية السنة تقدملي معيد واني جنت اريد اخلص من هذا الوحش وافقت
وقبل المشية بايام اتصل ابو الولد على بابا والغى كولشي

بعدين عرفت هذا البدون ضمير رايح على استاذي وكايلة هاي صاحبتي روح اسال بمنطقتها ومنطي العنوان

حتى بكليتي فضحني

بس الله يعلم بشعوري اصعب احساس من انرفض قبل خطوبتي بايام
حتى اقاربنا الي جانوا متحظرين يجون للمشية من بلغناهم ماكو خطوبة صار عدهم شك والف علامة استفاهم خلوا عليه

تركت دوامي وكعدت بالبيت وهالسنة من رجعت عرفت بي مزوج ومسافر كلت الحمدلله خلصت منه بس هيهات اكدر اخلص
حتى وهو بعيد مخلصت من سمه

عنده صديق بالكلية مخابرة وكايلة هاي جانت عدها علاقة بيه

اليوم الولد اجه يريد مني علاقة ومن رفضت بقة يشوه بسمعتي ويكول هاي التبيع شرف براسنة جانت مصاحبة ولاعبة لعب

سكتت وكمت اشهك وابجي

الشيخ.. هذا الولد حازم ابني؟

ريتال.. اي هو

الشيخ... ما اعرف شحجي وشكول اول مرة اخجل من بشر  بنتي شتريدين اني حاضر

ريتال... ما اريد شي بس خلي ابنك يعوفني بحالي هو بغربة ميخاف من دعوة ام واب محروك گلبهم على بنتهم

مرة الشيخ... انكص لسانة ليدعي على ابني

الشيخ... ام عادل صوتج ما اسمعة لا اهجم البيت عليكم

ريتال... فزيت من صوتة وخفت

الشيخ... بنتي اني راح اخلي حازم يرجع واجي بنفسي اخطبج اله

ريتال... لا عمي انت فهمتني غلط اني ما اجيت حتى انت توافق علمود ازوج ابنك

حازم لو يبقة اخر شخص بالدنيا ما اخذه
اني اريده يعوفني بحالي

الشيخ... يصير خير بنتي

مؤمن... يابة ترى ابن ابو مرتضى هو الحجة عليها اليوم

الشيخ... بسيطة هذا حسابة عندي

ترخصنا منهم ورجعنا للبيت

ماما وبابا بالهم باقي عليه لان متاخرة رجعت
مكدرت اضم عليهم شي حجيتلهم

بابا من عرف رحتلهم محجة شي عافني وطلع عرفت بي زعل مني

ماما... ليش مجيتي طلبتي من ابوج هو يروحلهم بهذا تصرفج لغيتي وجودنا من حياتج

ريتال... ليش مجاي تفهموني والله تعبت عقل مظل براسي مجان عندي غير هذا الحل

شلت جنطتي وكتبي ودخلت الغرفتي  رجعت حبست نفسي بالغرفة

ثاني يوم مداومت

اتصلت على رهف سالتها على الوضع وعلى مؤمن

كالتلي مؤمن هم ماكو اليوم يمكن ممداوم

ريتال... من تشوفي سألي شصار

رهف... ثاني يوم شفت مؤمن جان ذبلان وضايج

شبيك مؤمن البارحة ليش مداومت ريتال تسال عليك

مؤمن... جدي تخربط ومكدرت اداوم
لعد ريتال وين

رهف... خطية صارلها يومين ممداومة تخجل من الطلاب

مؤمن... خلي ادوم ولاتخاف جدي لعب طوبة بمرتضى واهلة
وهو بس يشوفها راح يعتذر منها كدام كل الطلاب

رهف... فدوة العينة والله حبيت جدك شلون شخصية
بس انت ليش هلكد مهموم وضايج

مؤمن... جريت حسرة راح اكولج بس لاتكولين الريتال
جدي يريدني اخطب ريتال

رهف... شنوووووووو

يتبع....

مساء العسل حبايبي

عندي مناقشة صغيرة وياكم
بيت الشيخ لهجتم قريبة من اللهجة الغربية
تريدون اكتب بالهجتهم لو اكمل بنفس الطريقة

تحياتي الكم
بسمة البياتي