رواية فارسي العاشق الفصل الثامن 8 - بقلم بسمة البياتي

_  فارسي العاشق _
( بقلم بسمة البياتي)
_البارت الثامن _

حازم من بعد دخولي للسجن وبالواسطات يلا طلعت ابوية شن الحرب عليه نهار وليل اني ويا مشاكل

من طلعت من السجن سويت تحدي ورجعت وكفت كدام بيت اهل ريتال حتى لايكولون هذا خاف من السجن ونهزم

اجة ولد عليه ما اعرف وين شايفة بقة يرزل بيه ويبيع شرف براسي لزمتة من ياختة وشبعتة بوكسيات ثواني وانگلبت الدنيا عليه

اجة ابو ريتال وفد واحد ويا وشباب المنطقة هم اجوي والضرب صار يجيني من كل مكان
بالكوة طلعت من جوة ايدهم شغلت سيارتي ورجعت للبيت

ابوية واخواني من شافوا وجهي مزورك ومدمه وملابسي مشككة قامت القيامة

اول مرة عبالهم مسوي حادث بس من شافوني ساكت عرفوا الشغلة علمود بنات

شيخ عگاب... يول حازم راح اموت بسببك احسن حل ازوجك واخلص من مشاكلك

حازم... اي زوجني البنية الاريدها واني راح ابطل مشاكل

شيخ عگاب... لو تموت متاخذها وهي كلمة ومتصير اثنين متاخذ غير بنت خالتك

حازم... واذا رفضتها؟

شيخ عكاب... تطلع من هذا البيت بطرك ملابسك الي لابسهن وجيب سويج السيارة وفلس احمر متاخذ لا مني ولا من امك

واخونك اذا انطوك اتبرى منهم  وحتى بيت اخوك عادل ممنوع تروح

حازم... انطيت سويج السيارة الابوية وطلعت جنت حاير بزماني وين اروح ومنو يستقبلني

لليل رحت البيت خالي  بقيت يمهم خمس ايام خالي وزوجتة حسيت وجهم صار ثكيل عليه لان يخافون لا ابوية يزعل عليهم

اني ابن دلال وممتعود على المذلة رضيت بالامر الواقع رجعت للبيت وافقت ازوج هاله بنت خالتي

ابوية وامي جانوا ممصدكين اني وافقت بسرعة تمموا الزواج يخافون لا اغير كلامي

خلال شهر لكيت نفسي مزوج هاله

من رجعت اخذت سيارتي اول شي سويتة رحت المنطقة بيت ريتال

وصلت يم بيت صديقي شفتة واكف بالباب

نزلت سلمت عليه وعاتبته

هاي ليش  اشكد اتصل عليك وانت مجاوب

عبدالله... اعذرني خوية بس ابوية خلى يمين عليه ما اجاوبك من يوم الاخذتني الشرطة وياك

حازم.. عادي معذور كلي شخبار اهل ريتال

عبدالله... حازم انساهم احسنلك خطية الناس باعوا بيتهم وشالوا

حازم... من كالي شالوا تخبلت هاي وين الكيها بعد

بهذا اليوم نار اشتعلت بصدري حتى بجي بجيت

علاقتي بهاله زفت لان ما اطيقها روحي وگلبي يم ريتال

من طلعت النتائج بحثت اسمها وعرفت نتيجتها اني جنت اعرف كل المعلومات عنها

بقيت انتظر شوكت ادوم هي اكيد راح تدخل جامعة ومصيري الكيها

مؤمن ابن اختي مكمل امتحانات لان مجان مجاوب زين قرر يعيد السنة
لو جان داخل كلية جان استفاديت منه

مبقة عندي غير صديقي مرتضى انطي اسمها وهو يدور عليها لان يداوم اهناك

وفعلا خلال مده كالي موجودة بهندسة النفط
كشخت ورحت للجامعة اجة مرتضى دخلني بقيت ادورلها اخير شي شفتها بالكافتريا بهذيج الدقيقة حسيت روحي ردتلي

ريتال.. من شفت حازم متت بقيت جامدة شوية ويوكف گلبي من الخوف

منال.. شبيج اللفات راح توكع من ايدج ليش ترجفين

ريتال... بالكوة حجيت مابية شي عفية خلي نروح منا

مشيت سريع الى ان وصلت للقاعة واني بعدني ارجف وخايفة لو ما عيب من الطلاب اكعد ابجي على حظي

اريد بس الوقت يخلص وارجع للبيت عشت برعب مو طبيعي

اجه الخط طلعت بسرعة صعدت بالسيارة
وصلت للبيت واني قطرة دم مابيه من الخوف

ماما... وجهج ذبلان بدلي وتعالي تغدي

ريتال.. لا ما اريد اكلت بالكلية بس تعبانة اريد ارتاح

بدلت وغسلت دخلت لفراشي واني بعدني ارجف

رؤى... ريتال شبيج مو طبيعيه ابد

ريتال... روحي سدي الباب وتعالي اكولج

رؤى.. كمت بسرعة قفلت الباب وجيت كعدت يمها احجي شبيج

ريتال... ولج حازم اجة للجامعة

رؤى... فتحت عيني وحلكي لا فدوة كولي غيرها عزاااا العزاني

ريتال.... لج راح اموت كوليلي شسوي الهذا حظي الفكر

رؤى... كولي البابا لاتسكتين

ريتال... اياج تكوليلهم بعد شيسوولي اكثر من السوو ما اريدهم يعيشون بقلق خطية هوايه تاذو بسببي

رؤى.. لعد شراح تسوين

ريتال... ما اعرف والله ما اعرف

رؤى... لاتخافين حبيبتي انتي بجامعة كبيرة ميكدر يقترب منج ولايسويلج شي

ريتال... خلي انام شوية راسي راح ينفجر  غمضت عيني اريد انام ما أكدر
.
كمت من فراشي رحت توضيت مديت السجادة صليت ركعتين وطلبت من الله يخلصني من حازم

كمت جبت القرآن كعدت اقرأ فعلا ارتاحيت

شلت القرآن رجعته المكانة وطلعت. من الغرفة دخلت للمطبخ حميت الاكل صبيت وكعدت اتغدا

رؤى... مممم احسج احسن من قبل شوية

ريتال... اني فوضت امري الربي الي كاتبة الله هو اليصير

رؤى... ونعم بالله عفية عليج صيري قوية ولاتخلين واحد تافه مثل حازم ياثر عليج

ريتال... هزيت راسي بالموافقة بدون ما أحجي شي
اكولج ليش متنقلين للمدرسة الهنا اعرفج تنبل نوم ولازم يومية تكعدين من ساعة ستة حتى توصلون للمدرسة قبل الدرس الاول

رؤى... لا ما آريد من يطلع نقل ماما عود انقل وياها

ريتال.. مممممم اوك براحتج

جنت امثل القوة بس بداخلي مرعوبة منه وشايلة هم شلون راح اداوم واخاف هم بعد يجي ويسويلي مشاكل

وفعلاً احساسي بمحله حازم كل يومين صار يجي للجامعة بس ابد محاول يقترب مني او يحجي وياي

اكو معيد ينطينة محاضرات من يشوفني مينزل عينة مني
ونظراتة اتجاهي فاضحتة حتى الطلاب انتبهوا عليه

اني من اشوفة ابقة منزله راسي  ولا اباوع عليه

جنت كاعدة ويا صديقاتي اجتي بنية وكفت يمنا

نور.. ريتال عندي موضوع وياج ممكن نكعد هناك ونحجي

ريتال... استغربت منها هاي منين تعرف اسمي وشتريد مني انحرجت واضطريت اكوم وياها

نور... تعالي هذا مكان فارغ

ريتال... كعدت واني فضولي يقرأ الف

نور... اعرف بشنو تفكرين هسه اكيد اتكولين هاي منو وشتريد مني ومنين تعرفني

ريتال... فعلاً هذا تفكيري

نور... حبي اني نور بمرحلة رابعة  بنت خال استاذ سامر

ريتال... من كالت استاذ سامر عرفت شنو الفلم

اي تفضلي بشنو اكدر اساعدج

نور... بدون لف ودوران بصراحة سامر معجب بيج من اول يوم داومتي بي اهنا وهو قصده شريف بس يريد يتعرف عليج اكثر حتى يتقدملج

ربتال... بس هم مكلتي اني المطلوب مني شنو؟

نور... انطيني رقمج حتى يحجي وياج ويتعرف عليج وانتي هم تتعرفين عليه اكثر او اذا تريدين اني انطيج رقمة

ريتال... عزيزتي اني اهنا جاية ادرس مو اتعرف واسوي علاقات
عيب هاي السوالف هو استاذ واله سمعتة شبقى للمراهقين بهذا تصرفة

نور... لا اكيد انتي فهمتي غلط ترى هو ميدور علاقات بس يريد يعرف بعض المعلومات عنج حتى يجي يتقدملج

ريتال... القصده شريف ويريد يتقدم ترى مو بهاي الطريقة عندي اهل يروح عليهم
اني اترخص باي

عفتها ورحت يم البنات واني شايطة من القهر استاذ ومسوي روحة محترم وهو فلس ميسوة

منال.. هاي شرادت منج

ريتال.. ولا شي بس حبت تتعرف عليه

البنات اعرف بيهن مصدكن كلامي غلسوا

رجعت للبيت دايخة ومسطورة اوف ياربي الكيها منين ولا منين من هذا حازم العار لو هذا  سامر ما اعرف منين طلعلي مو اني ناقصة

العصر طلبت من بابا ياخذني البيت عمة داليا لان ضايجة

واكيد ست رؤى لازم تحشر روحها وياي

وصلنة البيت عمة

رحنا للمطبخ سوينا شاي وكعك وكعدنا ناكل

داليا... بعده حازم يجي للكلية

ريتال...خليت ايدي على خدي وحجيت بقهر اي والله بعده

داليا... يا بنتي كم مرة كتلج كولي الاهلج لج اخاف يسويلج مصيبة

ريتال.. عفيه عمة لاتخوفيني ترى والله اني مناقصة

رؤى.. اوووف لو اني بمكانج انزع حذائي بنص الكلية واكطعة عليه واخلي فرجة الامة محمد

داليا... ههههههه امه داعية عليه اليوكع بيدج

ريتال.. المصيبة طلعلي واحد جديد جنت بوحدة صرت بثنين

داليا...شنوووو منو هذا

ريتال... حجيتلهم على سامر

داليا... اذا قصدة شريف ويريد يجي شكو بيها اذا قسمة زينة وابن حلال وافقي حتى تخلصين من هذا المصيبة حازم

ريتال... عمة يعني شنو خوما اروح احجي ويا

داليا... لا طبعاً اليريدج يروح يطلبج من اهلج

رؤى... اكولج هو هذا سامر حلو

داليا... الرعنة ادور حلوين

رؤى. لازم حلو  لعد خوما تريدين تاخذ واحد  اجكم وتبقة مكابلة خلقتة ليل نهار حتى تصعد عندها الحموضة

ريتال.. اشو انتي فدمرة رايح الخجل وصايرة متستحين

رؤى... هاي شبيج غير اريد مصلحتج
لاتغلسين جاوبي حلو لولا

ريتال... زين شايل نفسه شكلة عادي

رؤى... لعد حازم احلى منه

داليا... لزمت رؤى من اذنها وانتي حافظة شكل حازم موو

رؤى... شبيكم شادين ويا اذني ياهو التجي تلزمها

الله وكيلج عمة حتى رقم سيارتة حفظتها  هلكد مجان يلحكنة

داليا.... ههههههههه ولا اكدرلج

ريتال... رجعت للبيت وبقيت افكر بكلام عمة فعلاً احسن حل اذا تقدملي سامر اوافق

مر اسبوع ونور كل يومين تجي تحاول تقنعني واني ارزلها

اليوم هم اجتي

ريتال.  كافي ترى مصختوها ترى اروح اشتكي عليه يم العميد

نور.. حبيبتي بس هلمرة سمعيني سامر يريد يدز اهله عليكم بس اريد اعرف جوابج راح توافقين لو لا

ريتال... من كالت هيجي هدأت وسكتت جريت نفس طويل وحجيت رايي من راي اهلي اذا هما وافقوا اني معندي اعتراض

نور... فدوة هذا الكلام الحلوه اليوم العصر هما يمكم

ريتال... لحظة وهما منين يعرفون وين بيتنا

نور... خرب من الفرحة نسيت هاج هاي الورقة كتبيلي العنوان ورقم والدج حتى من يوصلون منطقتكم يتصلون وانتوا ادلوهم البيت

ريتال... لعد خليها على باجر لازم ابلغ اهلي اول شي

نور... ماشي براحتج

ريتال... رجعت للبيت واني خجلانة وحايرة شلون راح اكول الاهلي

ماكو غيرة دلوله منقذتي  اتصلت عليها وبلغتها حتى تجي تحجي ويا ماما

اجت عمة وكعدت ويا ماما وحجتلها

ماما... ما اعتقد رافد يوافق هو يكول ماكو زواج الحد متتخرج

داليا... ريتال راح احجي الامج كلشي هي لازم تعرف

ماما... خير شصاير شنو لازم اعرفة

داليا... ترى هذا حازم بعدة يركض ورا ريتال ويروح للكلية

ماما لطمت على صدرها عزاااااا العزاج سجى ولج ريتال ليش مكلتي

ريتال... ما اريدكم تخافون وتنقهرون شتكدرون تسوولي اكثر من السويتوا
هذا البشر كولشي مينفع ويا

داليا.... هسه مو وكت هذا الكلام سجى خلي يجون الناس وسالوا عليهم واذا قسمة زينة انطوها هذا احسن حل

اجة بابا بالليل وماما فتحت ويا الموضوع وحجتلة على حازم
بابا تعصب عليه وكومة رزلني من قهري زعلت ونمت

ثاني يوم الصبح كعدت اريد ابدل واروح للكلية

ماما... ريتال لاداومين اليوم مو راح يجون الناس ابقي حتى تساعديني بتنظيف البيت اني هم اخذت اجازة 

ريتال... هزيت راسي بالموافقة

العصر جهزنا كولشي عمتي الكبيرة هم اجتي  وعمة داليا

اجوي اهل سامر امه واختة ومرة خالة وعمتة

اهلي استقبلوهم ودخلوهم للاستقبال بقوا يسوالفون

داليا... تعالي قدمي الضيافة وياي وسلمي عليهم

عمة شالت صينية العصير واني اخذت الكيك
خفت اشيل العصير لا اكلبه عليهم هههه

من دخلت امه صلت على النبي
سلمت ودخلت واني مرتبكة وخجلانة
قدمتلهم وردت اطلع

ام سامر... وين طالعه تعالي كعدي ملحكنة نشوفج زين

رجعت كعدت يم عمة هدى واني افرك ايد بايد من الخجل

اشكد حجوا ولا ركزت على كلامهم جنت بس اريد اطلع

عمة هدى... همست يم اذني كومي طلعي راح تموعين من الخجل

ريتال... اووف اجاني الانقاذ بسرعة ترخصت وفلتت

طلعت من الباب صارت رؤى وبنت عمة هدى بوجهي

خير شعدكم واكفين اهنا

رؤى... انريد نسمع شيحجون

ريتال... بعدهم ديناقشون القضية الفلسطينية ومن يخلصون يفتحون ملف العراق
مشيت وعفتهم

رؤى...صاير دمج خفيف وتنكتين بركاتك شيخ سامر

ريتال.. خزرت رؤى وجع عفتها ودخلت للغرفة

من راحوا كعدن ماما وعماتي يتناقشن بالموضوع

سجى... مبينين خوش ناس ومحترمين

عمة هدى... اي والله نسوانهم ذهب هوايه حبيتهم

سجى... هذا هو من يجي رافد اخلي يسال عليهم حتى نرجعلهم الجواب

داليا.  هاي شغلة مصطفى هو اليسال ويجيب اصلهم وفصلهم خطية رافد وين عندة مجال

سجى... فدوة العينج ياريت والله

بقة عمو مصطفى يومين يسال عليهم
اني من جنت اداوم يبو ميتة من الخجل منه هو من يشوفني يبقة يوزع ابتسامات

ثالث يوم اتصلوا اهلة على بابا حتى ياخذون الجواب

بابا انطاهم الموافقة حددو موعد المشية بعد عشر ايام لان بابا كال لازم اتصل على جدها وخوالها بالحله حتى يحظرون

من انطينة الموافقة الخبر انتشر بالكلية الظاهر نور حجت الصديقاتها وهنا ماقصرن نشرن الخبر بسرعة البرق

بابا اتصل على جدي
وجدي كال قبل المشية بيوم اني والولد يمكم

بقة للمشية ايام وجان يتصل ابو سامر على بابا

ابو سامر... قبل لا نجي لازم تعرف شي ترى ابني يريد يسافر واكيد بنتك من يزوجها ياخذها ويا

بابا... شنو هذا الكلام لعد ليش  نسوانكم من اجني مكالوا هذا الحجي هسه اني شراح اكول  للناس العزمناهم  حتى يحظرون
 

ابو سامر... اخي ام سامر نست اتكول واني هسه جيت ابلغك وانتوا بعد بكيفكم تقبلون او لا

بابا.... زوجتي من اول يوم بلغت زوجتك اذا تصير القسمة احنا منقبل بنتنا تروح اي محافظة ثانية
وانت هسه جاي اتكولي سفر وغربة
على العموم طبعا منقبل تسافر واعتبر الموضوع انتهى

بابا سد الموبايل وهو شايط من الغضب
ولكم هسه شكول للناس الاهلي والأهلج هسه يلا اذكروا يبلغوني شنو هاي المصايب النازله عليه ياربي

ريتال.. دخلت الغرفتي واني مفرفحة من البجي ليش هيجي سوى بيه
ليش نور مكالتلي على موضوع السفر شلون راح اداوم

جنت ماخذة رقم نور مسحت دموعي واتصلت عليها

اتصلت اكثر من مرتين مجاوبت بعد ربع ساعة هي اتصلت جانت مرتبكة وبالكوة تحجي

ريتال... ليش هيجي ورطتيني ليش مكلتي على موضوع السفر

نور... هاا ما ادري اني هم مجنت اعرف

ريتال...نور عليج وداعت عزاز گلبج احجيلي الصراحة احسج ضامة عليه شي

نور.... اوووووف ما ادري شكولج راح احجيلج كولشي

البارحة بالكلية واحد رايح على سامر كايلة اني صاحبها واحبها وتحبني بس اهلها وكفوا بقسمتنا ومنطوها الي
واذا متصدك كلامي روح اسال بمنطقتها القديمة الناس كلها تعرف بعلاقتي بيها ومنطي عنوانكم القديم
وهو الولد منطي  السامر معلومات عنج

وسامر رايح المنطقتكم  سال الناس كايليلة اي جانوا ساكنين اهنا

ومن سال على علاقتج بهذا الولد كايليلة منعرف شي بس هو جان يجي يم بابهم وكم مرة تعاركوا وبعدين شالوا

ريتال..  مصدومة من الداسمعة هم حازم اويلي ربي ابتلائك صعب وبعد مبقة عندي طاقة واكدر اتحملة

نور... اني اسفة حبيبتي بس كولشي قسمة ونصيب

يتال... سديتة منها واني ميتة

اجت ماما يمي

ماما... لاتنقهرين بنتي هم زين حجوا من البداية لو مزوجج وجابرج تسافرين شجان كدرنا نسوي

ريتال... عطت بقهر ياسفر هذا ماما
هاي كذبة حتى لايجرحون بابا بالكلام
حازم رايح عليه وكايلة هاي صاحبتي ومنطي عنوانه القديم

ماما اني حتى بالكلية انفضحت اريد اموووووت ياربي اخذ عمري وخلصني
ملخت نفسي لطمت على وجهي ماما لزمت ايدي

سجى... رافد وينك 

دخل بابا يركض اثنينهم كتفوني واني ارفس انهاريت جنت اصرخ بعلوا صوتي

حبالي الصوتية شوية وتتكطع من الصراخ مالتي

تعبت وهدأت غمضت عيني بعد مبقة عندي اي قوة

بابا... لبسيها بسرعة اخذها للمستشفى

ريتال.... حجيت بصوت مبحوح مابيه شي عوفوني اريد انام

بابا طلع بس ماما بقت كاعدة يمي نمت كعدت دنيا مغرب

فتحت عيني شفت رؤى يمي

رؤى... وأخيراً كعدتي ولج والله خوفتيني كل شوية اجي اشوفج تتنفسين لولا

ريتال.. صوتي مبحوح بالكوة ينسمع
منو يمنا

رؤى... جدو وخالة امل وعمة داليا وعمو مصطفى

ريتال... خوما عرفوا شي لا بابا كاللهم يريد يسافر بس عمة داليا عرفت

ريتال... وبابا عرف؟

رؤى... اي ماما حجتلة لان هو عباله انتي تحبين سامر وهيج صار بيج علمودة

دخلوا للغرفة ماما وعمة

ماما... اجت حضنتني شلون صرتي حبيبتي

ريتال... الحمدلله مبيه شي

داليا... كومي غسلي واكعدي ويانة وانسي كلشي ولاتنقهرين

ريتال... باوعت عليهم اني بعد ما اداوم كليه

ماما... لابنتي كولي غيرها ابوج باجر يروح يشتكي على حازم اريد اشوف شلون يدخلونة للجامعة وهو مو طالب

ريتال... ماما هذا قراري النهائي وما اتراجع عنه رجاءا لحد يناقشني بي

تركت كليتي وكعدت بالبيت انطويت على نفسي

جنت حتى اخجل ارفع عيني بعين اهلي بسبب الاذية السببتها الهم

تعودت على حياتي بالبيت صرت اقضي معظم وقتي بالشغل لو اقرأ روايات

ماما هلايام ما اعرف شبيها كثرت طلعاتها ويا عمة داليا وعمة غيداء

من جنت اسالهم يكولولي نروح للدكتورة خفت لا ماما مريضة وهما ضامين عليه

سالت عمة داليا وحلفتها تكولي اذا اكو شي  هي حلفت كالت لاتخافين امج مبيها شي

بعدها بفترة اجت عمة داليا علينا

داليا... بنات عندي موضوع وياكم

ريتال.  خفت احجي عمة شكوو

داليا.. ولج شبيج خايفة

ربتال... صار شهرين ونص ممرتاحتلكم احس اكو شي

داليا... اي اكو بس شي مفرح

رؤى... اي شنو هو

داليا.. امكم حامل

اني و رؤى وحدة باوعت بوجه الثانية

داليا.. شكو شبيكم صفنتوا شنو مفرحانات

ريتال... هههههههه رافد وسجى ولايكعدون راحه

داليا... ههههههه اي عيني من حقهم بعدهم شباب

رؤى... لعد ليش قبل مجانت تريد وهسه يلا اذكرت تخلف من كبرنا

داليا... ابوكم يريد ولد ويا يزن

ريتال... جريت حسرة حقة ميريد بنات هو شحصل مني غير المصايب

داليا... لا مو هذا السبب لاتكولين هيجي
بس هو مقهور يكول اني لو جان عندي اخوان مجان هذا العار حازم هيجي سوى بنتي يريد سند الكم واليزن

ريتال... فدوة العينة اشكد شايل قهر بگلبة
بس فرضاً اجت بنت شلون

داليا.. كل اليجي من ربنا نعمة المهم الصحة وتمام الخلقة

رؤى... ان شاء الله يطلع ولد

... أمين يارب

ريتال بديت اهتم بماما مجنت اخليها تمد ايدها على اي شي خطية جانت تعبانة من الحمل والدوام

اجت العطلة الصيفية هلمرة علمود ماما مطلعنة اي مكان

بدت سنة دراسية جديدة اهلي بالكوة قنعوني ارجع اداوم

رجعت داومت بس جنت مستحية من نظرت الطلاب الي بس الحمد لله محد حجة شي

طلاب المرحلة الأولى هاي السنة احسن بهواية من هذيج السنة

صديقاتي من المرحلة الثانية اجوي سلموا عليه عادي وراحوا اني محبيت ارجع اختلط بيهم حتى لا يرجعون يذكروني بسامر

حتى سامر هالسنة مشفتة

تعرفت على صديقة وياي بقسمي اسمها رهف بنية تنحط على الجرح يطيب هي من كركوك وببت جدها اهنا
باقية يمهم علمود كليتها

رهف صارت صديقتي المقربة

حازم ابد مشفتة

صارلنة شهر انداوم

رهف.. رتو جوووووعانة امشي ناكل

ريتال.. وشبيج تصيحين هو انتي يايوم اجيتي مو جوعانة يمكن بيت جدج ميطبخون

رهف... عابت فشلتيني اني احب الاكل شسوي

ريتال... بخت تاكلين ومتسمنين اني حتى العشى تاركتة صارلي قرن اخاف اسمن ويخرب جسمي

رهف.... هسه امشي راح تبقين تلغين

ريتال... الكافتريا جانت ازدحام رهف من شفتها شوية وتبجي هههههه

اجة ولد كال محتاجين شي اني اجيبة الكم

رهف.. اي عفيه جيب لفتين كص ولحم بعجين وعصير انطتة الفلوس وراح

ريتال....امداج علمود كرشج راح تزحفين

رهف....شزحف هو خوش ولد وعندة رجوله محب نوكف بوسط الشباب

ريتال.. ما اعرف وين شايفتة

اجة الولد جاب الطلب تشكرنة منه وطلعنة من الكافتريا

كعدنا ناكل دقائق وصار نفس الولد كدامنا

ريتال... اشتغلت رحمة الله ارتاحيتي ست رهف

...ممكن احجي وياج ما اخذ من وقتج اكثر من خمس دقائق

ريتال... انصدمت جاوبتة بعصبيه تفضل احجي اسمعك رهف ابقي كاعدة

.... ريتال شعجب مذكرتيني اني جنت اخذ دروس تقوية وياج بنفس المعهد

ريتال... فتحت عيني اي اذكرتة

انت مؤمن كرايب حااااااااازم مووو.....

يتبع....

بعد بارتين وراح تعرفون منو فارسها العاشق ❤️
تحياتي