رواية فارسي العاشق الفصل الرابع وأربعون 44 - بقلم بسمة البياتي

_  فارسي العاشق _
( بقلم بسمة البياتي)
_البارت الخامس والأربعون _

رجعنا من المستشفى الطريق كله هشام ساكت ميحجي وياي اني هم سكتت اخاف احجي وينفجر عليه

وصلنا للبيت هشام اتصل على يزن اجة فتحلنا الباب
فوت السيارة للكراج
نزلت اجة يزن اخذ يامن مني

رؤى واكفة باب المطبخ

رؤى.. ياااا هاي شبي يامن ليش مكعدتيني اجي وياج

ريتال.. دخلت للمطبخ كتلها على اساس لو مكعدتج جان كعدتي

صدوك شعجب من هسه كاعدة

رؤى... كعدت جوعانة من المغرب نايمة شبعت نوم لكيت يزن هم كاعد هو كالي يامن مريض واخذوا للمستشفى

سويت ريوك تعالوا تريكوا وياي

ريتال... الله على النشاط ساعة خمسة صباحاً رؤى كاعدة تتريك

رؤى.. اوووي اليسمعج يكول بحياتها مكاعدة من وقت لوما جنت اكعد من الفجر علمود الدوام لان طريق طويل

هشام تعال اتريك

هشام... تسلمين موجوعان رايح انام

رؤى... اكولج هشام شبي اشو مو على بعضه

ريتال.. تنهدت اووف ضايج لان شافني واكفة ويا عبد الرحمن ابن عادل وزوجتة بشرى

رؤى... يااااا وهذولة وين شفتيهم وشجابهم عليج

ريتال... هذا حظي الاحول هو الجابهم وين ما اروح لأزم اشوف واحد منهم والمصيبة ظلوا يسوالفون ويضحكون واني اريد بس انهزم منهم

يزن... حقة هشام يضوج عبد الرحمن مو يدري بيج مزوجة شكو هالميانة الزفرة هو يقبل زوجتة توكف ويا واحد غريب

رؤى.. روحي احجي ويا وراضي لاتعوفي زعلان

ريتال... هو شكو يزعل مني قابل اني متقصدة اوكف وياهم

رايحة انام عينج على يامن كل شوية قيسي حرارتة
قفلت من ساعة عشرة كاعدة على جرة وحدة للصبح

رؤى... يااا سودة عليه اكول ليش هيجي وجهج ذبلان روحي نامي ولايظل بالج اني يمه

ريتال.. دخلت الغرفة هشام مغمض مدري نايم لو كاعد
نزعت الصاية والشال وتمددت بصفة

هو منطيني ظهرة حضنتة من ظهرة

حبيبي اندار عليه اريد احجي وياك

هشام... ريتال نعسان واريد انام

ريتال... هشام ادري بيك ضايج والنبي الصار غصب عني هما اجو وكفو يمي  وهاي بشرى لزكت اريد افلت منها ما اكدر

هشام... انداريت عليها حجيت بعصبية اني مو كايلج ما اريد تختلطين باي واحد من طرفهم اعوفج شوية اجي الكيج واكفة ويا واحد وهو منطلق بالسوالف والضحك

ريتال...ان شاء الله بعد متتكرر كافي لاتظل زعلان

هشام.. وربج اذا اشوفج واكفة ويا اي شاب من طرف هذيج العائلة اجي افلش راسة كدامج

ريتال... هههههه اوك حبيبي

هشام... لاضحكين مجاي اشاقة

ريتال... بطلت ما أضحك يلا احضني اريد انام نعسانة

هشام... حضنتها مشتاقلج صارلج كم يوم تنامين بعيد عني

ريتال... دفنت راسي بصدره اني هم مشتاقتلك

نمنا اني ويا مكعدنا غير لمن سمعنا باب الغرفة تندك

مابية حيل اتحرك هشام راح فتح الباب دخلت رؤى
رؤى... ريتال هذا يامن شبع بجي عليج عبالة رايحة وعايفتة صارلي ساعه اسكت بي وميفيد

ريتال... باوعت ساعة بالوحدة كمت من الفراش رحت غسلت دخلت لكيت يامن بحضن يزن وطاك من البجي

خليتة بحضني بوستة حجيت ويا حبيبي مرايحة هياتني يمك ليش تبجي

شلع گلبي الحد ما سكت هوايه متنحس لان مريض وماما مموجودة

رؤى جانت طابخة الغدى مسوية تمن احمر ودجاج وسلطة

صبتلنة من شميت ريحة الدجاج نفسي لعبت

اكلت بس تمن

خلصنا الغدى هشام كال راح اروح الاهلي ومناك اطلع ويا اصدقائي

ريتال... اوك براحتك

هشام راح يسبح ويبدل اني ظليت كاعدة ويا يزن و رؤى

رؤى مخلية فونها على ميز الطعام يزن بدون ميدري ايدة طخت الفون وكع بالكاع

رؤى شافت فونها بالكاع تخبلت

يكولها ما ادري بي
وهي اتكول لا انت متقصد توكعة

كلمة منها وكلمة منه رادو يضاربون
رؤى مجلبة بتشيرت يزن وهو لأزم ايدها

هو صح اصغر منها بس اطول واضخم ادري بي اذا ضربها راح تتاذى بس هي الله يسلمها متكعد راحة

كمت صرت بينهم احير الزم منو

اجة هشام جان هستوة طالع من الحمام عاط بيهم

هشام... جان استحيتوا واحدكم شكبرة وشكدة وعقلة عقل اطفال

لك يزن موعيب عليك تمد ايدك على اختك مو هسه انت رجال البيت وبمكان ابوك وخواتك بامانتك وحمايتك

وانتي رؤى ماستحيتي على روحج من جاي تتعاركين وصوتج واصل السابع جار وين انوثتج ورقتج هاي انتي عود صيدلانية مثقفة بهذا تصرفج شبقيتي للهمج

ريتال.. ههههههه شبعهم رزايل وهما ساكتين محجوا ولا كلمة

يزن راح الغرفتة واني و رؤى كعدنا بالهول

دخل هشام كاشخ ومتعطر

هشام.. اني رايح محتاجين شي اجيبة الكم من ارجع

رؤى... اريد ايس كريم كاكاو وفانيليا جيبلي بطريقك لان گلبي حار

هشام...متعرفين اتكولين لا سلامتك كلشي ما اريد

رؤى.. انت كلت شمحتاجين واني جاوبتك لازم استغل الفرصة

هشام... صار تدللين

وانتي حبيبتي تريدين شي
باوعت عليه حلى بعيني لوبيدي ما اخلي يطلع

اكولك شدعوة هيجي كاشخ وسابح بالعطر

هشام... ههههههه اني دوم انيق لعد تريديني اطلع مخربط

ريتال... رفعت حاجبي ديربالك تتأخر

هشام...رايح الاهلي ومناك اطلع ويا اصدقائي وبعدين امر للشقة يعني لازم اتاخر شويه

ريتال.. اي لو حتى هم حاول لا تتأخر

هشام... الله كريم تريدين شي من الشقة اجيبة الج

ريتال.. اشرتلة تعال شاورتة

هشام... هههههههه ماشي باسني بخدي وراح

رؤى... اكولج رتولتي الحلوة شنو شاورتي هشام شردتي يجيبلج

ريتال... هههههه انتي شعليج

رؤى.. الله عليج كولي مو ترى اطك واموت

ريتال..  اني وزوجي انتي شكو حاشرة روحج والله حلوة  لازم كولشي تعرف

رؤى... اني كاعدة ششششششكو تشاورينة عندج كلام ويا اخذي واطلعي برا بس انتي ورجلج يعجبكم تحركون دمي

ريتال... اباوع عليها وجها صار احمر من العصبيه متت ضحك على منظرها ههههههههه

ولج والله مردت شي شفتج مندمجة بالفون ردت اشوف بالج يمنا لو لا
شاورتة كتلة كولشي ما اريد حبيت اضوج رؤى

هو ضحك وطلع هههههههههه

رؤى... عابتلج انتي ويا زعلت بعد ما احجي وياج

ريتال.. ههههه متاكدة بعد متحجين وياي

رؤى... اي

ريتال... رؤى مدلغمة وكاعدة

اكولج رئاوي

رؤى ساكتة متجاوب

مممممم رؤى يمكن اني حامل

رؤى... كمزت من مكاني كوووووولي والله

ريتال... ههههههه موكلتي بعد متحجين وياي

رؤى... هسه جاوبي تحجين صدوك لو تشاقين

ريتال... والله مدري ممتاكدة عندي نفس الاعراض الصارتلي بهذاك الحمل

رؤى... كومي روحي حللي حتى تتأكدين

ريتال... يااااا وين اروح هاي من كل عقلج

رؤى... اي كوووومي

ريتال... خبلة خوما اروح وحدي من تجي ماما عود اروح

رؤى... كل عقلج اني ابقى انتظر ماما
هسه اخابر عمة داليا تجي تاخذج

ريتال... لج شتخابرين كعدي راحه ما اكدر اطلع بدون علم هشام

رؤى.. من تجي عمة خابري كوليلة اريد اطلع هو اكيد مراح يمنعج

ريتال... تعبانة ومالي خلك خليها على باجر

طلعت رؤى من الهول اني جنت متمددة على التخم

رؤى.. خابرت عمة راح تجي كومي تحظري

ريتال... رفعت راسي مصدومة خررررب لج اني شكتلج ليش متسمعين الكلام

رؤى...هذا الكلام بعد مالة داعي كومي يلا

ريتال... خرب غيرتج صوجي حجيت كدامج

نص ساعة اجت عمة
داليا.. رتولة صدوك تشكين بنفسج حامل

ريتال.. عمة والله ممتاكدة بس هاي الثولة خبصت الدنيا

داليا... اكو مختبر تحليلات قريب امشي نروحلة

ريتال... اليوم سبت منو يكول مفتوح

داليا.. بلي يكعدون السبت

ريتال... زين منو ياخذنا واني شراح اكول الهشام

داليا.. يزن ياخذنا وانتي طلعي الهشام اعذر بس لاتكوليلة على التحليل حتى اذا حامل تسويلة مفاجاة

ريتال... اخذت فوني اتصلت على هشام كتلة اريد اطلع ويا عمة محتاجين كم شغلة نشتريها

كال لعد من جنت موجود ليش مكتولي شمحتاجين اني اجيبلكم

ريتال.. جنا ناسين هسه اذكرنا

هشام.. منو يجي وياكم

ريتال... يزن

هشام... ماشي روحي

ريتال... سديتة منه بدلت طلعنا اني وعمة ويزن من الشارع اخذنا تكسي

نزلنا يم المختبر دخلت ويا عمة

اخذوا مني دم وكالوا انتظري جنت متوترة افرك بيدي

داليا.. هههههه شبيج لاتقلقين اني متاكدة حامل

ريتال... طلعت التحليل وجانت ايجابية يعني حامل يماااااي طرت من الفرح

عمة ويزن باركولي رجعنا للبيت جنت الطريق كلة اني مبتسمة

اول مدخلنا للبيت اجتي رؤى تركض

رؤى.. بشروا حامل لو لا

داليا.. هههههه الهدرجة متلهفة تريدين تصيرين خالة
اي حامل

رؤى.. حضنتني الف مبرررروك ياروحي
شوفوا من هسه اكوللكم محد يبلغ هشام غيري
حتى احصل هدية

يزن.. اشكد طايحة حظ كل هاي الهوسة علمود الهدية واني عبالي فرحانة الاختها راح تصير ام

رؤى.. انت ششششعليك اكيد فرحانة الأختي بس هم لازم احصل هدية

عمة مكدرت تبقى للمغرب وراحت

رؤى تحوص اطب وتطلع تنتظر هشام كل شوية اتكولي خابري هذا ليش تاخر ههههه

صارت ساعة تسعة ونص وهو ماكو

رؤى... انتييييي شلون تقبلين زوجج هيجي يتاخر طالع من ساعة 3 الظهر الله واعلم شيسوي

ريتال... فكرت بكلامها اي والله هذا شعنده من الظهر لهسه صرت اعصاب

يزن... جنية ليش جاي تحرضيها على زوجها صايرة هجامت بيوت الولد وين متاخر

ريتال.. اتصلت  من كال الوووو انفجرت عليه
انت ويييييينك الظاهر، معاجببببك ترجع الله اعلم شدتسوي من الظهر لهسه

هشام... خير شبيج متخبلة عليه وشنو شسوي من الظهر لهسه مو كتلج اروح الاهلي وبعدين اطلع ويا اصدقائي لو لازم كل شوية ابقى اعيد الكلام

ريتال... لاتعيد ولاتزيد ابقى اشكد ميعجبك واذا تريد تبات هم بات باي

سديتة واني صايرة اعصاب

يزن... خزرت رؤى هسه ارتاحيتي

رؤى... يااااا واني شمعرفني هاي بسرعة تصدك كلامي وتتعصب

ريتال... عفتهم ودخلت الغرفتي
نص ساعة دخل هشام سويت نفسي اصفح بالفون

هشام..جيت كعدت بصفة جريت من ايدها الموبايل
يعني كلما اطلع ويا اصدقائي لازم اطلعيها من خشمي

ريتال... شسوي سوي تطلع اتبات براحتك بعد معليه بيك

هشام... اذا معليج بيه لعد شكو ضايجه

ريتال... مضايجة

هشام...اذا مضايجة انطيني بوسة

ريتال... صكيت على اسناني هشام لاتختبر صبري روح من يمي صارلك 8 ساعات طالع هسه يلا اذكرتني

هشام... ههههههه انتي كل وقت ابالي
حبيبتي جنت كاعد بالكوفي ويا الشباب حتى عصام ويانة  واخذنا الوقت بدون منحس

ريتال... تنفست بعمق ما اريد اتعارك ويا بهيجي يوم
هشام اذا بعد هلكد تتأخر  لاترجع للبيت

هشام... لعد وين اروح

ريتال... ابقى يم اصدقائك لو روح الأهلك

هشام... ولج شنو ناوية تحبسيني بالبيت مثل النسوان

ريتال... لا  طبعاً بس كولشي اله حدود عادي تطلع بس مو هلكد تتاخر

هشام... ريتال من انتي بالشقة وحدج اني مستحيل هلكد ابقى برى لان اخاف عليج ما امن اعوفج وحدج هو اني من اروح للدوام بالي يبقى يمج

ريتال... حضنتة بادلني الحضن وباسني من راسي
حجيت بگلبي شعجب مجاب طاري الحمل يمكن رؤى مكايلتلة

طلعنا من الغرفة رؤى تباوع على الوجوه مبين تحس بالذنب عبالها متعاركين ههههه
شبيج ولج

رؤى.. عابتلج صارلي ساعة اكل بروحي كلت بس لا يزاعلون بسببي حتى الموطا الجابها الي انسدت نفسي منها

ريتال... سبحان الله طلع عندج احساس

رؤى همست كلتي الهشام لو لا

ريتال.. لا مو انتي تريدين تكوليلة

رؤى.. فدوة الأختي الحبابة

هشام راح يبدل ملابسة اني و رؤى صبينا عشى

خلينا الأكل على ميز الطعام كعدنا اجة هشام سحب كرسي وكعد بصفي

رؤى... هشوم زوج اختي الحباب

هشام... رؤى اكرميني بسكوتج تعبان هسه لو ما اعرف منو يجي ما اطلع باب الحوش

رؤى.. ياااا هذا شبي، هو ليش منو طلب منك تطلع

يزن...هههههههه يعرف هاي المقدمة وراها طلب

رؤى... يااااا هيجي صارت بسيطة وعود اني ردت اكولك خبر يخليك اطير من الفرح

هشام... ما اصدك انتي تجي منج اخبار مفرحة

رؤى.. اسمعني زوج اختي الحباب بدون مقدمات ولف ودوران ريتال حامل واريد هدية

هشام... رفعت راسي بصدمة ولج جنية تحجين صدك لو تشاقين

ريتال... جنت اكل بهدوء واني مبتسمة

رؤى.. لا ما اشاقة وديربالك تغلس على الهدية

هشام... من فرحتي حضنتها كدامهم ليش مكتيلي من اول ماجيت

ريتال... هههههه ابتعدت من حضنة هذولة كاعدين وهو ماخذ راحتة

هشام... شلون عرفتي انتي حامل

ريتال... رحت ويا عمة حللت

هشام... اهااا يعني من اتصلتي عليه جنتي تريدين تروحين تحللين

ريتال.. اي

رؤى... ابو الشباب شراح تجيبلي هدية على هاي البشارة

هشام... كولي شتريدين واني اجيبة الج

رؤى... خلي افكر بشي يسوى وبعدين اكولك

هشام من فرحتة اتصل على امة و ابو بشرهم

وبهاي الليله تلفون هشام مسكت كل شوية واحد من اهلة يتصل يباركلنة

ثاني يوم هشام الصبح راح للدوام

ساعة 12 الظهر اهلي وصلوا للبيت راحوا سبحوا  وتغدوا من كملوا كعدنا سوا رؤى مكدرت تتحمل اكثر كالتلهم ريتال حامل

ماما رغم حزنها من سمعت الخبر عيونها لمعت من الفرح وبابا هم فرح

العصر اجني عماتي وام هشام وخواتة وصديقات ماما والجيران ياخذون من خاطر ماما
بيتنا انترس

اني جنت كاعدة مثل الاميرة ميقبلون اتحرك من مكاني واساعدهم والله حلو الدلال

عمتي ام هشام جانت طايرة من الفرح كل شوية تجي لاتتحركين لاتعبين نفسج شنو مشتهية اليشوف خوفها يكول عبالك هذا اول حفيد الها

رجعنا اني وهشام للشقة وضعي يوم بعد يوم يسوء نساوتي جداً صعبة اكل ميبقى بمعدتي ولوبيدي بس انام

اخذتني عمة داليا للدكتورة فحصتني كالت الحمدلله حملج قوي وكولشي تمام

هشام جان يداريني مثل ميداري الطفل حتى طبخ ما اطبخ يجيب من برا

اليوم العصر هشام نايم اني جنت متمدد بس منايمة سمعت صوت فون هشام على ميز التواليت كل شوية يوصل مسج على الفايبر كمت جبتة فتحتة دخلت على الفايبر

الرقم الداز ممخزون سويت اظهار الرسائل

اقرأ واني مصدومة هاي سارة تتوسل بي تريدة يجاوبها وكاعدة تذكرة بايام خطوبتهم وطلعاتهم ودازة صورة هو وياها

من االغيرة والقهر بطني مغصتني جيت كعدتة  بعصبيه واني ابجي

كوووووووم جاوب الأميرة سارة ترى كاعدة على نار تنتظر جوابك........

يتبع