_ فارسي العاشق _
( بقلم بسمة البياتي)
_البارت الرابع والأربعون _
من رجعنا من دوكان قررت بعد بحياتي ما اطلع سفرة بسبب الرعب العشته من جنا اهناك
رجعت حياتي عادية مابيها شي جديد
العصر كاعدة بالمطبخ ويا هشام نشرب شاي اندك الجرس
كام هشام يشوف منو اني ظليت كاعدة بمكاني
سمعت صوت نسوان بالهول كمت داشوف منو
صار هشام كدامي
كال نسوان جايات عليج يريدوج
كتلة شنو جايات خطابة عليه
هشام... خزرتها عيدي هاي الكلمة بعد وشوفي اليجرالج بختج هسه بالنسوان ما اكدر احجي شي
ريتال... هههههه فدوة للمتعصب جاي اشاقة شبيك بوزت
جديات منو هذن
هشام حجة من ورا خشمة جيرانة
روحي عليهن شنو راح اظلين واكفة كبالي
دخلت للهول شفت مرة تقريباً بعمر عمتي
ام هشام وياها بنات اثنين
سلمت عليهن عرفني عن نفسهن ام عامر وجنتها مريم وبنتها اسماء
كعدت وياهن شوية بعدين ترخصت منهن كمت جبتلهن عصير وعندي بتفور قدمتة الهن
ام عامر... من زمان اريد اجي اتعرف عليج بس متصيرلي فرصة مجنت متصورتج هلكد حلوة
ريتال... ابتسمتلها هلا بيج باي وقت وتسلمين هذا من ذوقج
ام عامر.. والله هنيالج على هشام اخلاق وشخصية صارلة سنين جارنة مفديوم طلعت منه العيبة ولا سمعنالة صوت حتى من يطلع ميرفع راسه
ريتال... اكيد هنيالي عليه ربي يحفظة الي
كعدن يسالني عمرج شدارسة اهلج وين من يا عشيرة مبقوا سؤال مسئلوني حسيت روحي كاعدة بجلسة تحقيق
صاح عليه هشام كمت اشوف شيريد
هشام... اني طالع ويا اصدقائي
ريتال.. وشبيك تحجي وياي من طارف خشمك هشام... مابيه شي
ريتال... مممم اوك
طلعت كدامة هو اجه وراية سلم على ام عامر ترخص وطلع
باب الشقة صاير مقابيل الاستقبال لازم يفوت منه يلا يطلع
رجعت كعدت يمهن مرتاحيت البنت ام عامر عينها زايغة ظلت معلكة على هشام من طلع
اسماء.. اكولج حبي انتي شلون تعرفتي على هشام وزوجتوا
ريتال... اني ما اعرفة بس والدي ووالد هشام أصدقاء وعن طريقهم صارت القسمة
مريم.. اهاا يعني هو مشايفج قبل لايتقدملج
ريتال... لا بيوم الاجوي يخطبوني يلا شافني
أسماء... احنا انصدمنا من عرفنا بي راح يزوج لان نعرف بي جان رافض الزواج
ريتال... عقدت حواجبي هاي منين تعرف هشام جان رافض يزوج بس سكتت محجيت شي
امها عبالك قرت افكاري بسرعة حجت
ام عامر... ام هشام مرات جانت تجي تنظف الشقة واني اجي يمها
واكوللها ليش هشام ميزوج هم تجي مرتة ونس ويا وتقوم بطلباتة
جانت اتكول شسوي قطعة من لساني وكعت واني احاول اقنعة وهو رافض
ريتال...اي فعلاً هو جان يرفض علمود دراستة بس اخير شي صرت اني من قسمتة
باوعت على اسماء بيدها حلقة سالتها صارلج اشكد مخطوبة
أسماء... صار عشر ايام
ريتال... اهااا حلوو ربي يتمملج على خير ان شاء الله
ظلوا كاعدين للمغرب يلا راحوا
هشام شوية تاخر اتصلت عليه كالي جاي بالطريق
كعدت بالاستقبال شوية وانفتح الباب دخل
رفعت حاجبي بعد وقت جان بقيت برى
هشام... شمرت المفتاح على الميز لو كايلتلي بات جان بتت
ريتال... اهااا حلو اوك تكدر هسه ترجع وتكمل سهرتك
هشام.. جيت كعدت بصفها
لا بعد مابيه حيل شيرجعني
لعد الخطابة الجانوا جايج شوكت راحوا
ريتال... خرب مدلغمة وعود ضايجة من حجة هيجي بالكوة لزمت نفسي ومضحكت هههههه
انت جلبت بالكلمة تريد تضيع عليه سالفة تأخيرك
هشام... هذا يا تأخير ساعة تسعة بعدها مصايرة
ريتال... بلي متأخر وعايفني وحدي
هشام... ليش وحدج مو الخطابة جانوا يمج
ريتال... يبوووووو هاي من كل عقلك انت كلت جاين يردونج
كتلك خطابة جنتتتتتتت اشاقة لاتسويلك سالفة
هشام... تدرين اذا بعد اشاقيتي بهيجي مواضيع شسويلج؟
ريتال.. ممممم اي شسوي
هشام.. اعلكج بمكان البنكة
ريتال... هاي عود صدوك تحجي لو تشاقة
هشام... جربي وشوفي اذا صدك احجي لو اشاقة
ريتال... ياااا عزاااا عايزة تسويها لاتخوفني منك
هشام... ههههههه اشكد جبانة تتوقعين اني اسويها وامد ايدي عليج
ريتال... الحد هسه لا ما اتوقع بس بمرور الزمن الله اعلم
هشام...لاتخافين حبيبتي كتلجياها قبل وارجع اكولها مو رجال اليمد ايده على مرة
بس صدك ريتال اذا كررتي هذا شقاج شهر كامل ما اخليج تطلعين باب الشقة حتى اهلج ما اخليج تروحيلهم
ريتال.. عااا عميييي توبة بطلت كولشي ولا هذا العقاب
بس هسه تعال اني احاسبك
هشام.. بس لا راح ترجع على سالفة التاخير
ريتال... لا مو هاي راح اسالك وجاوبني بصراحة
بنت ام عامر جانت عينها منك لو اني غلطانة
هشام... هههههههههه يعني كعدتي وياهم شوية درستيهم واحد واحد
ريتال... لاتضحك جاوب
هشام... واني شمعرفني قابل عندي علم الغيب الله وكيلج حتى شكلها ما اعرفة
ريتال... احاول اصدكك بس مجاي اكدر
هشام... ههههههه بس للأمانة قبل لا ازوجج جانت يومية ادزلي ماعون اكل بيد ابن أخوها
يجي يكول عمة أسماء دزتة الك ههههههههه
ريتال.... صرت اعصاب ششششفت ومن اسالك اتكولي شمعرفني اذا مو عينها عليك لعد من ازوجت اشو مكامت ادزلك
هشام... ههههههههه من اجيتي كطعتي رزقي
ريتال... من قهري ضربتة على صدرة بثنين ايدي عفتة وكمت
هشام... ههههههههه يمعودة و ين رايحه
ريتال.. دخلت للغرفة واني ادردم عليه اجة يمي وحضني من ورا صار ظهري على صدره
عطت بي وخرررر كطعت رزقك مو
هشام... ههههههه اذا كلما يجون الجيران يمج تسويلج مشكلة من هسه كوليلي حتى اخذج ونروح نعيش بالصحراء احسن من دوخت الرأس
ريتال... اهاا لازم خايف من زيارات الجيران اكيد اكو بعد معجبات والله عبالي فقير بس طلعت بلوة سارة واسماء وبعد الله اعلم
هشام... اي هو خوفج من الفقير
ريتال... ضربتة بعكس ايدي على بطنة جمالة جاي يعترف
هشام... اااخ مجنووووونة متصيرلج جارة
حياتي اني لو اريد هاي وذيج جان ازوجت من زمان ليش تحركين دمج وتضوجين على شي ماله وجود تأكدي اني عيوني متشوف غيرج الوحيدة الگلبي رف الها اول مشفتها هي انتي
ريتال.. لعد وسارة مو جانت خطيبتك اكيد هم گلبك رف الها
هشام... سارة اختيار امي صح انخطبنا بس مجان بينا اي توافق ما انكر حاولت اتقرب منها بس بتصرفاتها جانت تخليني ابعد عنها
ريتال... لاتنسى اني هم اختيار أبوك
هشام... صح اختيارة بس من اول لحظة شفتج بيها دخلتي گلبي وتمنيت تصيرين ام بيتي ومن قسمتي والحمدلله هاي انتي هسه بحضني
ريتال...لسانك معسول بسرعة تكدر تقنعني
هشام... اكولج حبيبتي متلاحظين شغلة صغيرة
ريتال.. شنو هي؟
هشام.. من يوم الزوجتج اليومنا هذا مسمعت منج كلمة حلوة بالكذب فديوم اغلطي وكولي حبيبي حياتي عمري حتى لو حبي هم قابل
صح اسمي حلو بحلكج بس مرات التغيير مطلوب
ريتال... خجلت من نفسي والله حقة
باوعت عليه حبيبي تعشيت ويا اصدقائك لو اروح اسويلك عشى
هشام.... طالعة من حلكج مثل العسل
ريتال.. علاقتي بهشام جاي تقوى يوم بعد يوم وتعلقي بي يزيد من يروح للدوام اضوج وابقى انتظر شوكت يرجع
اما علاقتي برهف انقطعت صار عشر ايام من يوم السفرة لا اني اتصل عليها ولا هي تتصل
الظهر نايمين اني وهشام رن فوني اتصال من ماما
فتحت الخط واني بعيني النوم وبالكوة احجي
الووو
ماما..الوو شنو جنتي نايمة
ريتال.. اي والله بس انتي شبي صوتج
من كتلها شبي صوتج كامت تبجي كمت مفزوعة
ماما شبيج ليش تبجين خوما صاير شي
ماما.. ابوية متخربط ويكولون حالتة موزينة
ريتال.. اسم الله عليه شبي
ماما.. والله ما اعرف شبي هسه راح نسافر اني وابوج
اذا تكدرون اريدج انتي وهشام تجون تبقون يم رؤى ويزن
واذا مكدرتوا عادي اخابر داليا تجي يمهم
ريتال... لا لاتخابرين عمة اني ابقى يمهم اطمئني
ماما.. ماشي حبيبتي لاتتأخرين عليهم لان يزن ميكعد بالبيت و رؤى تخاف تبقى وحدها
ريتال... ساعة واكون يمهم امانة من توصلون بسلامة بوسيلي جدو معنده غير العافيه ان شاء الله
ماما.. ادعيلة والله ميتة من الخوف عليه
ريتال... سودة عليه ربي يكومة بسلامة
نهيت الاتصال
هشام..خير شصاير؟
ريتال... نزلن دموعي ماما اتكول جدو حالتة موزينة وراح يسافرون للحلة
هشام... لاتبجين ان شاء الله يكون بخير ويكوم بسلامة
ريتال... امين يارب
اكولك اهلي يريدونة نروح نبقى يم رؤى ويزن
هشام... عادي حبيبتي كومي تحظري حتى نروح
ريتال.. كمت تحظرت طلعتلي جنطة صغيرة خليت بيها ملابس الي والهشام لان ما اعرف كم يوم راح نبقى
رحنا البيت اهلي لكيت بابا وماما مسافرين
ريتال...لعد يامن وينة
يزن... راح وياهم
ريتال... يااااا ليش خليتوا يروح هسه راح يخبل ماما
رؤى.. يمعودة گلب الدنيا بالبجي ميقبل يبقى
هشام... احسن شي عمتي سوتة اخذتة وياها لو موجود ويشوفني ابقى هنا يمكن يطردني من البيت كله ههههههه
ريتال... ههههه اشكد احاول اخلي يحبك ماكو فائدة ميطيقك
رؤى... هشوم زوج اختي الحباب شنو رايك تحن علينا وطلعنا والله ضوجة
ريتال... الناس بيا حال وانتي ادورين طلعة منو اله نفس يطلع وجدو مريض
رؤى... هو لان نفسيتي تعبانة ومقهورة اريد اطلع اغير جو
يزن... شلون درب اليسمعها يكول مكطعة نفسها من البجي والخوف على جدو
رؤى... يا كذاب مو من جانت ماما تبجي اني هم بجيت وياها بس انت متكدر اذا متحشر روحك وتحجي عليه
هشام.. اني اكول لو تكومون تتكافشون يكون افضل
راح اطلعكم وامري لله
يزن... اني راح اطلع ويا اصدقائي
ريتال... يزون مو عبالك بابا وماما مموجودين تستغل الفرصة و تتاخر من نرجع اريد الكيك بالبيت واحنا مراح نتاخر
يزن...ترى ميصير هيج قابل اني طفل هشام احجي ويا مرتك خلي تعوفني براحتي
هشام... حبيبي هو اني اذا اطلع ويا اصدقائي وشوية اتاخر الكيها گالبة خلقتها استر على نفسك وارجع من وقت
ريتال... يزن بدون كلام زايد ممنوع تتأخر
يزن.. ماشي
ريتال... طلعنا اني وهشام و رؤى فترينا شوية وبعدها تعشينا واخذت عشى اليزن ورجعنا
اهلي صارلهم يومين مسافرين
جنت كل شوية اتصل على ماما اطمئن على جدو جانت اتكولي حالتة ابد موزينة
الظهر جنت بالمطبخ ويا رؤى اسوي غدا دخل يزن عيونة حمر حجة بصوت مخنوك
كال لأزم نروح للحلة
باوعت عليه من منظرة عرفت جدو بي شي اريده اسالة رؤى سبقتني
يزن شبيك وليش تريد نروح للحلة صاير شي بجدو موو
يزن دموعة نزلن كال جدو انطاكم عمره
ريتال.. من سمعت كلام يزن مبقى بيه حيل سحبت كرسي من ميز الطعام كعدت خليت ايدي على راسي كمت اشهك وابجي
جدو جان ماكو احن منه هوايه يحبنا ونحبه
يزن.. راح اخابر هشام اشوف يكدر ياخذنا واذا مكدر نروح ويا عمو مصطفى
نص ساعة واجة هشام كال اني اخذكم
من شافني ابجي اجه حضني ويهدي بيه
اندكت الباب راح يزن يفتحها ثواني ودخلت عمة داليا وعمو مصطفى
اني و رؤى حضنة عمة ونبجي
مصطفى.. اني وداليا راح نجي وياكم
داليا.. خواتي هم يجن بس مو اليوم يمكن باجر من يرتبن امورهن
هشام.. لعد يلا خلي نطلع حتى نوصل من وقت
ريتال... اني ويزن و رؤى صعدنا ويا هشام
وعمة داليا و عمو مصطفى بسيارتهم
يزن صعد ليكدام واني و رؤى ورا الطريق كله نبجي الله يساعد ماما وبيبي هسه شلون حالهم
للمغرب يلا وصلنا
جانوا ماخذين جدي للنجف دافني وراجعين
اول مدخلنا ركضت ادور على ماما لكيتها كاعدة بالهول يم بيبي وخالاتي وكومة نسوان كاعدات
اول مرة اخذنا من خاطر بيبي خطية جانت بالكوة تحجي بس الدموع تجري
بعدين راحنا على ماما حضناها ونبجي وياها
هذا اليوم كضينا قهر وبجي بيت جدي الله يرحمة انترس ناس
هشام بعد مشفتة بقى برى يم بابا وعمو مصطفى بالجادر
ثاني يوم اجني عماتي وحتى اخوان هشام وابو وأمة هم اجوي بقوا ساعة ورجعوا مكدروا يباتون علمود دوامهم
اني و رؤى مكعدنا دك شغل ويا البنات
جنت بالغرفة طلعت داروح للمطبخ شفت رؤى واكفة باب المطبخ جيت وكفت بصفها
شعندج واكفة اهنا
اشرتلي اسكت
سمعت البنات يحجن على واحد ويتغزلن بي بس منو ما ادري
لج رؤى شكو وشعندج تصنطين ومنو هذا اليحجن عنا
رؤى... يعني منووو اكو غيرة زوجج يا حلوة
ريتال.. ششنو عزااا بعينهن دخان صار يطلع من اذني من الغيرة بسرعة فتت للمطبخ من شافني سكتن
باوعت من باب المطبخ هشام وولد اقاربنا واكفين بالحوش جانوا يدخلون مسواك
زهرة حجت بصوت عالي حظوظ
جاوبتها بنت عمي اي والله حظوظ
جيت على رؤى اخذتها وطلعنا سالتها هذن شبيهن
رؤى... هههههه مقهورات لان اخذتي هيجي واحد يكولن شلون حظ مطلقة واخذت هيجي واحد
ريتال... اذكرت كلام خالة ميعاد من كالت انتي تاخذبن فضالت النسوان
بس الحمدلله
الله نصرني عليهن
رجعنا للمطبخ ظلينا نشتغل للمغرب احس ظهري راد يطك من الوجع
رؤى.. ريتال روحي ارتاحي وجهج صار اصفر
ريتال.. اي رايحة لان احس بعد ما اكدر اوكف
دورت مكان ارتاح بي ماكو الغرف كلها نسوان
اكو غرفة قريبة من الهول دخلت كعدت بيها جانت خالة فاطمة وعمة غيداء كاعدات بيها
غيداء.. شبيج حبيبتي
ريتال... من الشغل انكسر ظهري
غيداء.. ارتاحي شوية ليش هلكد تضغطين على نفسج ما شاء الله البيت متروس بنات اكيد الشغل مراح يبقى
ريتال... من كعدت مدري شجاني كل دقيقة اتثاوب
اكو مرة كاعدة مقابيلي والنسوان ملتمات عليها
من بين النسوان رفعت راسها باوعت عليه وابتسمت رديتلها الأبتسامة
سبحان الله عليها وجها اشكد نوراني وبشوش ابتسامتها بحد ذاتها طاقة ايجابية
اكو نسوان كامن من يمها سمعتها حجت ويا خالة فاطمة وسالتها عليه
فاطمة... هاي ريتال بنت اختي سجى
ام كرار... ما شاء الله ولا ادري سجى عدها بنية جبيرة بس هاي عليمن هيجي طالعة حلوة
فاطمة... ههههه على اهل ابوها دشوفي عمتها الكاعدة بصفها شلون حلوة
ام كرار... هو اني عبالي بنتها
غيداء... ههههه فدوة العينكم والله خجلتونا عيونكم الحلوة
ام كرار... من كعدتي لهسه تثاوبين اذا نعسانة نامي
ريتال... ههههه لا والله منعسانة بس مدري شجاني
ام كرار كامت من مكانها واجت كعدت بصفي خلت ايدها على راسي وصارت تقرأ عليه
ثواني وعيوني غوشت وختنكت عبالك ايدها على ركبتي خانكتني مو على راسي
بدون شعور دفعت ايدها فتحت الشال وظليت اتنفس سريع
ام كرار... من اول ما كعدتي عرفت بيج مو طبيعيه ولان صوت القرآن برى ظليتي تتثاوبين
فاطمة. فدوة العينج ام كرار يعني شبيها شلون مو طبيعيه
ام كرار... هاي نجمها حيل خفيف وعليها عين قوية وعمل
ريتال.. من كالت عمل رجفت لزمت ايد عمة
غيداء.. دخيلج عمليش وشلون عرفتي
فاطمة... غيداء ترى ام كرار علوية حسينية وابوها واجداها الهم كرامات والمريض من جوة ايدهم يطيب
ريتال.. من الخوف كمت ابجي
ام كرار... لاتخافين بنتي شغلتج سهلة والخاطر هاي دموعج ولان اول ما شفتج حبيتج اني راح ابيتلج واشوف شنو سالفتج
فاطمة تدري بيه ما ابيت الأحد لان هوايه مشاكل صارتلي بسبب هالشي
فاطمة... بعد شتريدين ريتال ولج احنا ونسوان المنطقة نتوسل بيها متقبل تاخذلنة
ريتال.. مسحت دموعي مفهمت يعني شنو تبيتلي
ام كرار انطيني شي من ملابسج
غيداء.. انطيها هذا شالج اللابستة
ريتال... نزعت شالي انطيته الها وخالة فاطمة جابتلي شال ثاني لبستة
راحت المرة بس اني ظليت مرعوبة
باليل خالة فاطمة وعمة حجوا الماما والباقي عماتي كلام ام كرار وشلون اختنكت من قرت عليه
ماما... اعرف ام كرار كلامها كله يطلع صح الله يستر بس منو يسويلج سحر
رؤى... يا خاينة كل هاي الاحداث تصير واني، ماكو على الأقل جان جيتي صحتيني
ريتال.. شوف اني بيا حال وانتي بيا حال
ثالث يوم الفاتحة عماتي مكدرن يبقن رجعن التكريت اني والبنات التهينة لان اخير يوم وناس رايحة جاية
البعد العشى احنا اندك شغل من التعب حتى نسيت ام كرار
واكفين نغسل مواعين العشى وجان اشوفها
ام كرار.. ههههه اشو ما سالتني ولا دورتيلي
ريتال... ههههه اعذريني وربي من التعب والشغل بس باقي اسمي انسى
ام كرار... الله يساعدكم هسه شوفيلي مكان فارغ وتعالي احجي وياج
ريتال.. من كالت احجي وياج كمت ارجف لكيت غرفة فارغة دخلنا كعدنا بيها
رؤى اجتي ويانة
ام كرار.. هاي اختج عادي احجي كدامها
ريتال... اي اختي عادي احجي
ام كرار.. اني البارحة كتلج عليج عين وسحر بس العمل ما جنت متاكدة منه من بيتتلج تاكدت
بنتي عليج سحر تفريق بينج وبين رجلج
انتي شلونها علاقتج بزوجج
ريتال... گلبي يدك سريع
جاوبتها الحمدلله زينة بس خالة منو السوى وشنو مصلحتة
السحر من طرف زوجج وشنو مصلحتهم الله اعلم
والسحر قديم مو هسه شعجب ماجنتي تحسين باعراضة
ريتال... عقدت حواجبي شنو قديم خاله بس اني مصارلي ثلاث اشهر من مزوجة
ام كرار صفنت عليه
رؤى... ريتال اخاف من وقت فارس واهله
ريتال.. خالة اني جنت مزوجة قبل هاي الزواجة وصارلي ثلاث سنوات ونص من انفصلت عنه وفعلاً هذاك زواجي جان كله مشاكل
ام كرار.. لا حول ولا قوة الا بالله
ريتال...زين سؤال منو السوى السحر وشلون
ام كرار.. بنتي هسه انتي مزوجة عوفج من السوى السحر
ريتال... الله عليج خالة كوليلي بداعت اهلي ما احجي شي بس اريد اعرف منو
ام كرار.. السوو نسوان اثنين عن طريق شي بي اثرج
ريتال... منو هنا وشنو هذا الشي
ام كرار.. فكري وشوفي شنو الرايح منج بهذاك الوكت
واكو وحدة من النسوان اكو اثر واضح بيدها هي هاي السوتة الج
ريتال... صفنت منو اكو أثر بيدها عصرت راسي اريد اذكر
لا يا الله هي ماكو غيرها
رؤى.. منو
ريتال.. شيماء اكو مكان خياط بايدها يم وريدها لان من جانت مزوجه وزوجها يضربها وابوها ميقبل تطلق هي رايدة تنتحر وكاصة مكان الوريد بيدها
اذكرت حلقتي الضاعت وهي جانت تلف الدولمة ماكو غيرها اخذتها
ام كرار... بجاه امير المؤمنين علي ينتقم من كل وحدة تهجم بيت غيرها
لاتضوجين الله على الحق وهو ياخذلج حقج
بس هسه لازم ينفتح العمل لان بعدة عليج اذا يبقى حتى ويا رجلج يسببلج مشاكل
ريتال... كمت ابجي شلون ينفتح والله خايفة ما اريد افشل بحياتي مرة ثانية
ام كرار... ليش تحتارين ويمج طبيبة
مترد اليروحلها وعلاجها ابلاش
روحي للشريفة بنت الحسن طبيبة المعلولين روحيلها بگلب صادق ونية صافية ماراح تردج
ريتال.. قشعر جسمي من كلامها دموعي نزلت
فدوة الأسمها فعلاً مترد الينخاها ويروحلها
ام كرار.. من توصليلها ادخلي للحمامات الموجودة اهناك خلي تجي وياج بنية ممزوجة تذب ماي على متونج وراسج ومن تكملين البسي ملابس نظيفة
رؤى.. اني ممزوجة عادي ادخل وياها
ام كرار... اي عادي
بعدين توضي ودخلي زوريها وصلي وادعي من گلبج وباذن الله وكراماتها تتخلصين من هذا البلاء
بحق جدها وابيها تطلعين من يمها وانتي مثل الوردة
ريتال.. فدوة الاسمهم الله يسمع منج ان شاء الله
خالة ما اعرف شلون اشكرج
ام كرار.. الشكر لله حبيبة انتي فقيرة وعلى نيتج الله مايتركج
يابنتي ربج يسبب الاسباب ويمكن الصار كله بي صالح الج
لوباقية بهذاك البيت جان هوايه تعبتي بحياتج
حافظي على بيتج الجديد واني شفتلج بشارة حلوة راح تفرحين بيها بس كولي يا الله
ريتال. يا الله
كمت بست ام كرار من راسها
قبل لاتطلع انطتني ورقة بيها ايات كالت خليها بالماي ويومية اشربي منه
راحت ام كرار
اباوع على رؤى صافنة
شبيج وين صافنة
رؤى.. هاي يمكن مكشوف عنها الحجاب هسه لو مبيتتلي اني هم
ريتال... وانتي شكوو هم عليج سحر
رؤى... اني اختج يجوز انعديت منج
ريتال... اي مو هو جرب ونعدبتي مني غميتها وطلعت
باليل شفت هشام كالي باجر من الفجر نرجع التكريت
احتاريت اشلون اكولة اريد اروح ازور ما اريد اجيب طاري فارس والسحر كدامة
رؤى.. عوفي هشام عليه اني احجي ويا
راحت رؤى تحجي ويا جيت وكفت يمهم
رؤى.. هشوم الحباب الوردة عندي طلب زغيروني
هشام... مرفوض
رؤى.. يااااا هو انت شفهمت حتى رفضت
هشام...من المقدمة الكلتيها مبين طلبج يخوف واني تعبان مالي خلكج
رؤى... هسه بس اسمعني بعدين احجي
هشام... الغي وفضيني
رؤى... باجر قبل لانرجع اريدك تاخذنا الشريفة بنت الحسن
هشام...واني وين اندلها فوك تعبي تريدني اظل افتر بالشوارع ادور
رؤى... اليسأل ميتوه بس كول انت متريد تاخذنا لان طائفي متعصب متحب تزور
هشام فتح عينه على كلامها خررب حتى اني انصدمت عزااا بعينج رؤى
هشام... ولج منو هذا المتعصب اي مو الشمر واكف كدامج
ولج ام لسان هسه شحجيت كتلج ما اندل خوما ابتليت على عمري
رؤى... احنا وياك وندليك واذا تهنى نسال الناس
هشام... ماشي تامرين لو اعرف باجر افتر الحلة كلها ماراح أقصر بس المهم تسكتين قبل لا طلعيني كافر من جماعة ابو لهب
رؤى...فدوة الزوج اختي الحنون هو انت وين اكو منك
ثاني يوم ساعة ستة الصبح طلعنا
ماما بقت يم بيبي لان مريضة وبابا وياها كالوا فديومين ونرجع
يامن جبتة وياي
جنا حافظين شوية من الطريق دلينا هشام
يزن... شذكركم بالزيارة
رؤى... شنو شذكرنا مشتاقين صارلنة كومة مزايرين.
يزن.. جان اجلتوها غير يوم هسه تعبانين انكسر ظهرنا بالفاتحة
هشام... يمعود اسكت ترى هسه اختك اطلعنا دواعش من جماعة ابو بكر البغدادي
يزن... والله كلشي اتوقع من الجنية موبعيد حتى تبلغ علينا
رؤى.. درت راسي منهم أجاوزكم بأخلاقي ما ارد عليكم
بعد عناء وفرات بالشوارع وصلنا للشريفة
اول مدخلنا كمت ارجف
رؤى كالت اخذوا يامن وياكم وروحوا زورو
اني ورؤى دخلنا للحمامات الماي بارد بالكوة خليت رؤى تذبة عليه كملنا لبست وطلعت رحنا قرينا دعاء الزيارة وزرنا اول مدخلت للمرقد كمت ابجي بشهكة ظليت هواية واكفة بعدين صلينا وطلعنا
يزن وهشام ينتظرونا اشترينا كم حاجة الاهل هشام والعماتي ورجعنا
من طلعت من الشريفة حسيت جسمي صار خفيف لوبيدي اخلي راسي على المخدة وانام
يامن اجة نام بحضني باوعت عليه ماله خلك بس لا راح يتمرض
للمغرب يلا وصلنا للبيت جنا تعبانين ومسطورين
جنا ماكلين بالطريق محد جوعان
بس سبحوا وناموا
اني هم اخذت يامن الغرفة اهلي ونمت
جريتها نومة الساعة عشرة كعدت على صوت يامن يبجي لزمتة صاير نار سخونة
ظل يتقيئ ويرجف
انطيتة علاج وماكو فائدة
ظليت كاعدة اسويلة كمادات للساعة ثلاثة صباحاً
بس اشو هذا كام يفز هو نايم متت خوف رحت ركض على هشام كعدتة
كام وياي من شافة كال خلي ناخذة للمستشفى
بسرعة لبست صاية وشلت يامن
هشام راح كعد يزن حتى يقفل الباب من نطلع
بالمستشفى كتبولة على مغذي وابر راح هشام جابهن
ظليت كاعدة يمة خلص المغذي كلت الهشام روح صيح الطبيب يشوفة حتى اذا وضعة زين انطلعة
راح هشام ظليت وحدي جنت صافنة سمعت صوت وحدة صاحت اسمي
انداريت شفت بشرى زوجة عبد الرحمن ابن عادل اخو فارس
اجت بوستني
بشرى.. يولو لوتدرين شكثر مشتاكيلج شنو هالغيبة
ريتال.. ياعمري انتي الأشوق شلونكم خالة ام قيس وعمو عادل شلونهم
بشرى.. الحمدلله كلهم زينين ودوم يذكرونج بالخير
شسوين هين
ريتال.. اخوية الصغير تخربط وجبنا للمستشفى انتي شسوين
بشرى.. بنتي الصغيرة من البارحة مريضة
ريتال... سلامتها عدها العافيه يارب
اجة عبد الرحمن من شافني اكلني بالسلام يسولف ويضحك هو من قبل ماين عليه يحب يشاقة ويضحك
اني ايدي على گلبي اخاف يجي هشام ويشوفهم اريد بس افلت منهم اشو هذوله مستمرين بالكلام
اجة هشام عاقد حواجبه وكف بصفي كمت ابلعم باوعت عليهم هذا زوجي هشام سلموا عليه
اريد اعرفة عليهم احتاريت ياربي شكوله ما اعرف شلون اجت بالي كتلة
هذا عبد الرحمن ابن خال مؤمن زوج رهف وهاي زوجتة
هشام سلم عليهم عادي هما هم ترخصوا وراحوا أجة الطبيب فحص يامن كال تكدرون تاخذوا انخفضت حرارتة
طلعنا من المستشفى هشام كلمة وحدة محجة وياي شكلة مفوول من العصبيه......
يتبع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!