رواية فارسي العاشق الفصل الاول 1 - بقلم بسمة البياتي

_  فارسي العاشق _
( بقلم بسمة البياتي)
_البارت الاول _

يا فارسي تمنيت ان يجعلنى مهمة فى حياته
...و انت جعلت حياتك باكملها ملكى...
تمنيت ان اجد مكان فى قلبه
...و انت سلمت لى مفتاح قلبك بعد ما حفرت اسمى بداخله..
____________

واكفة اني وصديقتي ملاك يم باب المعهد
ننتظر بابا اليوم تاخر علينا مو من عوايده يومية قبل هيجي وقت هو اهنا

ملاك... اوووف شوفي هذا اشكد حلو

ريتال.. نزلي عينج وكافي تبصبصين هسه شيكول علينا

ملاك.. لج عيني مو بيدي تعرفين بيه ضعيفة امام الجمال والاناقة دباعي سيارتو تجنن الله لو خالقني نظارتوو  ولا هلعيشة

ريتال.. ياااااا ليش شبيها عيشتج كولي الحمدلله غيرج يتمنوها

ملاك.. ههههه ضحكتيني شيتمنون الفكر الاني بي يولي اهلي يادوب مكفينا

ريتال... ترى اكو غيركم حسرة عليهم اللكمة ابوج خطية ممقصر بشي

ملاك... اووووي سكتي عيني انتي شكو عليج اشو اهلج مدلليج من بداية العطلة دخلوج بكل الدروس خصوصي واني بالكوة بابا قبل ادخل انكليزي ورياضيات

ريتال... اني مو سالتج اي درس تريدي كوليلي اني اسجلج وياي ومعليج بالفلوس انتي مقبلتي

ملاك... بابا مقبل مو اني

لج باعي طلع صديق مؤمن الويانة بدرس الانكليزي شوفي صديقو ديباوع علينا ويبتسم اروح فدوة ونذر الهاي الابتسامة

ريتال.. كااااافي شبيج هياتة بابا اجه امشي نصعد

ملاك... امشي ولو راح اعوف گلبي اهنا واروح

ريتال..اليوم اني طايرة من الفرح وأخيراً راح نسافر البيت جدي
هاي العطلة ابد مرتاحيت لازم يومية اروح للمعهد اخذ دروس تقوية لان هالسنة سادس وبابا يريدني اطلع معدل
بقة عشر ايام ويبدي الدوام بالكوة قنعت اهلي اخذ استراحة حتى نسافر

اعرفكم بنفسي اني ريتال من تكريت عمري 17 سنة عائلتي صغيرة مو كبيرة عندي اخت وحدة اسمها رؤى عمرها 14 سنة
واخ واحد اسمة يزن عمره 8 سنوات

بابا موظف بشركة النفط وماما مدرسة انكليزي بنفس الاعدادية الاني اداوم بيها

حالتنة المادية الحمدلله زينة
بابا شريك ويا زوج عمتي بسوبر ماركت

عدنا بيت ملك وسيارة حديثة
واهلي مدللينا شنطلب يوفروا النه بس بحدود المعقول

ماما من محافظة الحلة بس صارت القسمة عن طريق خالة بابا لان عايشة بنفس المحافظة الجانت عايشة بيها ماما و تزوجوا
احنا لهجتنا بالبيت نفس لهجة ماما حتى بابا صار يحجي مثلنا

بابا الولد الوحيد الاهلة على اربع بنات ثلاثة اكبر منه و وحدة اصغر منه
عماتي كولهن مزوجات
بيبيتي ام بابا قبل ثلاث سنوات توفت وبقة جدي وحدة

بابا حاول يخلي جدي يجي يعيش ويانه لكن جدو رفض مقبل يترك بيته

عمتي الكبيرة عدها اقارب زوجها مرة كبيرة بالعمر بس بعدها ممزوجه
بابا وعماتي قنعوا جدي يزوجها على الاقل ونس ويا بالبيت وهم تساعده وتهتم بي

وهي المرة كانت موافقة ومرحبة بالفكرة

والحمدلله تم الزواج

اني نسخة من عمتي الصغيرة  ماخذة بياضها وعيوني صفر نفس لون عيونها
وسبحان الله هي اقرب وحده الي معتبرتها اختي الكبيرة و صديقتي

يكولون الخالة والدة هذا المثل ابد مينطبق على  خالاتي مو حنينات خصوصاً خالتي الكبيرة
دائماً تحجي يم بيبي علينا وتنتقدنا الدرجة خلت بيبي من تشوفنا اشكال الكلام تسمعنة
اعرف ماما تنقهر بس تكتم بگلبها
جدو حبيبي احن واحد بيهم من كثر حبه الماما يحبنا على محبتها

ماما عدها ثلاث اخوان وأختين

كلهم اكبر منها هي الصغيرة

خالي الكبير حسين عايش بيت جدي
والباقي كلهم طالعين

خوالي وخالاتي ما شاء الله عدهم كومه اولاد وبنات
وحتى بيهم مزوجين

غيث ابن خالي حسين اكبر مني بخمس سنوات
من اروح ما اعرف ليش تبقة عيني تراقبة بس ابد ما اخلي ينتبه عليه لان  اهلي واكفين بعيني مستحيل اخون ثقتهم بيه

حتى غيث اكثر المرات الكي صافن عليه من يشوفني شفتة ينزل عينه

غيث اسمر طوله حلو وجسمة رشيق شعرة اسود ولحيتة خفيفة

اليوم راح نطلع من الفجر لان الطريق طويل بابا اخذ اجازة ثلاث ايام يبقة ويانة يومين ويرجع
واحنا من تخلص العشر ايام يجي علينا يرجعنا

كعدت الفجر بكل نشاط وحيوية طلعت من غرفتي

ماما..هههههه اويلي على هذا النشاط يومية بالكوة تكعدين

ريتال.. صباح الورد بست ماما من خدها
بصراحة كولش متحمسة لان صارلي هوايه مطالعة ليل ونهار ادرس متت

ماما.. صباح العسل ماماتي
هانت حبيبتي هي بس هاي السنة لازم تتعبين لان تحدد مستقبلج

ريتال.. اي اعرف ان شاء الله ما اخيب ضنكم واجيب معدل عالي

لعد البقية وينهم شنو بعدهم مكاعدين

ماما.. ابوج كاعد من زمان وديقرأ قرآن

اما زيوني و رؤى بعدهم نايمين روحي كعديهم

ريتال.. رحت الغرفة رؤى شغلت الضوة وكمزت على فراشها رؤؤؤؤؤؤؤؤؤؤى لج كومي راح نروح ونعوفج

رؤى... رفعت راسي بكسل شوية وابجي من النعاس
ترى حرام شعدنا من هسه طالعين ارررررررررريد انام رجعت غطيت راسي

ريتال.. لج عوبة كومي عود نامي بسيارة

رؤى... انتي ليش هلكد تحبين تروحين اشو هما محد يحبنا حتى بيبي تظل تحجي على ملابسنا وتصرفاتنا عبالك جايين من كوكب ثاني

ريتال... عيب هيجي تحجين ماما اذا سمعتج تزعل

رؤى... اووووي كمت وامري لله وخري من وجهي دفعت ريتال وكمت

هفففف والله ولا احب اروح ما اعرف على شنو هلكد يضوجون منه

ريتال..رحت كعدت زيوني طلعتلة ملابس بدلتلة

اني محظرة كل ملابسي من الليل

متعودين اني ورؤى من نروح ملابسنا لازم طويلة وعريضة وحجاب كامل ورغم هذا كلة هم ينتقدونة يريدون نلبس عباية مثلهم واحنا بصراحة منكدر ممتعودين عليها

وصلنة البيت جدي جانوا جدو وبيبي وبيت خالي ينتظرونا ومسوين غدة سلمنا عليهم ودخلنا جوة
جانت عيني ادور على غيث بس مشفتة

تغيدنا  وكملنة 

مرة خالي..فرغتلكم غرفة ارتاحوا بيها لان العصر الكل راح يجون يسلمون عليكم والبيت يصير هوسه

اني اول مخليت راسي على المخدة نمت

كعدت العصر على صوت هوسه يم راسي باوعت بنات خالاتي وخوالي جايات كمت سلمت عليهم وبوستهم

غسلت وطلعت سلمت على البقية جانوا فارشين بالحديقة وكاعدين يشربون شاي

جدي... تعالي كعدي يمي خايبة سجى بنيتج كلما تكبر تحلى اكثر ديربالج عليها

ريتال... خجلت من كلام جدو خدودي صارت طماطة

خالة ميعاد... يابة وشبيهن بناتنا شنو بس بنات سجى حلوات

جدو... جنج تغارين من بنت اختج شجاب بنياتكم بالطاري شنو اني كايل عليهن موحلوات وما ادري بنفسي

خالة ميعاد... ههههههههه هاي شبيك يابة داشاقة

ريتال.. رفعت راسي وجان اشوف غيث كدامي صافن عليه
يبووو هو اني خجلانة من كلام جدو وهسه هذا صافن بس اويلي صاير احلى من قبل

بابا بقة يومين ورجع واحنا يومية معزومين عندي وحدة من خالاتي وخوالي

صارلنة اسبوع بالحلة اليوم اني و رؤى كعدنا ساعة تسعة من النوم
الكل جانوا كاعدين ومتركين لان متعودين يكعدون من وكت

الريوك جان بعده بالكاع كعدنا نتريك

بيبي... المسعدات هسه يلا كعدن سجى بناتج ديربالج ازوجيهن لان يومين ويرجعوهن الج

ماما... ليش هذا الكلام يمه شبيهن بناتي ترى الياخذهن اذا مو هو الممنون هم ما انطي

ميعاد.. حبيبة ترى الرجال يريد ام البيت النادرة مو بنت الدلال التنام للظهاري

سجى.. بربكم ساعة تسعة صارت ظهاري ثاني شي ترى بناتي طالبات ومتعودات على كعدت الصبح

بيبي... هو شيخرب البنبة غير المدرسة البنية اهم شي تصير ام بيت تفيد بيتها و زوجها

سجى... لا يمه انتي غلطانة محد يفيد البنت غير شهادتها

ميعاد.. هو انتي من ازوجتي و زوجج خلاج تكملين كلية عقلج خرب

دشوفي بنتي زهرة من الصبح تكعد تعجن تخبز تطبخ تنظف بهذا عمرها ام بيت ونادرة

بيبي... فدوة العينها زهورة وين اكو مثلها

ريتال.. اسمعهم يحجون حتى نفسي نسدت طلعوا الريوك زقنبوت من خشمي

اجة غيث كعد يتريك ويانة

غيث.. ريتال رحمه الاهلج صبيلي شاي من يمج

ريتال... يبووووو ارتبكت ايدي ترجف بالكوة صبيتلة ونطيتة

خالة ميعاد جانت تباوع علينا ومعاجبها الوضع

ميعاد... اكول زينب ليش مزوجين غيث ما شاء الله كبر مستحق زواج حتى تجي زوجته تهتم بي وتخدمة

ريتال.. خرب هاي شبيها اليوم 
غيث من سمعها غص بالاكل

غيث... سالمين عمة يعني علمود كوب شاي تريدون تزوجوني

زينب.. والله اني هم  دافكر الكيلة مرة وازوجة

ميعاد.. اي بس كون تلكيلة وحدة معدلة مثل جناينج الباقيات

غيث... ساعة السودة الجيت كعدت يمكم
ارتاحوا ولادورون وتتعبون اني من اريد ازوج اني اختار محد يختارلي

زينب.. والله اذا ما اني ارضة عليها واقتنع بيها لو تطلع نخلة براسك ما اخطبها الك

غيث.. اي مو زعطوط كدامج وما اعرف اختار

ميعاد..لا حبيبي حشاك امك تريد مصلحتك لان بنات هال وكت بس ديكور وتنعوص كلشي ميعرفن 

بيبي.. ولك غيوث اني حاطة عيني على وحدة متلوك الغيرك

غيث... اكوم اولي احسنلي حتى ريوك ما اريد

زهرة.. بيبي هي ياهو الأحلى البيضة لو الحنطاوية

بيبي... خايبة هم شايفة ركية بيضة و ماصخة طيبة

زهرة... لا طبعاً تلعب النفس

بيبي... البيضة هم مثل الركية والحنطاوية عسل مينشبع من حلاتها

ريتال... اعرفهم ديقصدونة  كلهن يضحكن ومكيفات على كلام بيبي

ماما باوعت علينا بقهر

رؤى... بيبي حبيبتي سؤال اعرف بيج ذواقة بالاكل منو اطيب گيمر العرب لو الفلافل

بيبي.. خايبة من امداج حتى طعم حلكج متعرفينة طبعا الگيمر اطيب

رؤى. . اي صح بيبي شجاب الكيمر على الفلافل المجولح

بيبي.. ولج رئيووواا شنو قصدج

رؤى... حبيبتي بيبي المعنى بقلب الشاعر

بيبي.. كومي من كبالي لابارك الله بيج وبامج بكد الفصمة وحجيج اكبر من راسج

ماما... اشو زعلتي من رؤى لعد زهرة مو سالتج نفس السؤال لو اني بناتي بنات البطة السودة

بيبي عوجت حلكها وسكتت

ريتال... همست يم اذن رؤى
اكولج هو شجاب الفلافل على الكيمر

رؤى.. ولج ما ادري بس هي هيج طلعت وياي المهم ضوجتهم ورتاحيت

ريتال... هههههه والله احسن مني

رؤى... انتي اذا تبقين على هذا طبعج الناس تاكلج

ريتال... اني جبانة موبيدي من يسمعوني كلام معندي غير السكوت يمكن اذا احد ضربني راشدي انطي الخد الثاني واكوله رحمة الله والديك
ما أعرف اخذ حقي ابد

العصر كاعدين كلنا بالحديقة
اكو شجرة تين رحت  ادور تين مستوي لان اني من عشاق هاي الفاكهة

باطراف الحديقة  ساكية مال مي وبالحافات مسفط طابوق للزينة والاشجار بنص الساكية

خليت رجلي على حافة الطابوق ومديت ايدي اكعطع تين
سمعت صوت شي تحرك جوة الشجرة باوعت على جهة الحايط وجان اشوف حيه من الفزة والخوفة

اريد اكمز رجلي التوت والطابوق تحرك

محسيت روحي غير نايمة بالساكية 

الكل انتبهوا على صوت الطبة

اني بس اريد اكوم ما اكدر لان طين ومي ايدي ورجلي تزلك صار شكلي عبالك طامسة بعلبة نوتيلا

جدو... الله الله بوية شجاج ولكم روحوا كوموها 

ماما والبنات اجوي يركضون ديكوموني واني لساني مخيط من الخوف بس اريد انهزم من الحيه

بيبي.. عمة العماج والله هاي الشجرة راح اكصها من وراج شنو مشايفة السوك متروس تين كون كسر برجلج فلشتي الطابوك

جدو...عاط بيبي تسكتين لا اضرب الصينية براسح عجوز مخرفة

ريتال... ديكوموني ابجي وأشر على مكان الحية
اخير شي نطقت حيييييييييية هناك

بسرعة كوموني والولد ركضوا يدوروها لان اختفت

ماما... صخام ولج خوما لدغتج

ريتال..هزيت راسي بمعنى لا
جنت اشهك وابجي من الموقف والخوف

عمار... لك غيث شفتها دخلت بهذا الزرف

غيث... خرررب هاي انهزمت

بيبي... يبوووووو صخام بوجهي هسه تجي تلدغني

رؤى... هههههههههه هسه جنتي خايفة على الطابوق
بيبي صارت بيب بيب طبت تركض جوة رجعت شابة ههههههه

ريتال.. رحت سبحت وبدلت ملابسي اجت ماما يمي

ماما... شبيج ليش تبجين اكو شي يوجع

ريتال... بس خابري بابا خلي يجي يرجعنا

ماما... اني هم كلت اليوم اخابره حتى يجي يرجعنا

ريتال... هوايه انغثيت من بيبي كدام الكل رزلتني بدال متخاف عليه خايفة على حديقتها

وهي بهذا اليوم بقت كاعدة على الكرسي تخاف تنزل رجلها للكاع

باليل كاعدة ويا رؤى بالمرجوحة بالحديقة
اجة غيث كعد يمنا
تفاجئنة من تصرفة هاي اول مرة يسويها

غيث.. احم ريتال لاضوجين من كلام بيبي ترى هي ويا الكل هيجي محد يخلص من لسانها

ريتال.. مدنكة راسي،وافرك بيدي هااا لا عادية مضايجة

رؤى... هاي بيبي ما ادري جدو اشاف بيها واخذها

ريتال.. كرصت رؤى حتى تسكت

غيث... ههههههههه مو يكولون الحب اعمى وبيبي مينخاف عليها كدرت تصيدة

رؤى... والله مو بس اعمى اثول هم

غيث... ههههههههههه خرب عرضج منو الاثول بس لا جدو

رؤى.... لا لا قصدت الحب

ريتال... اني صافنة على رؤى وغيث خرررب هاي على منو طالعة بس لا ورثت لسان بيبي وخالة ميعاد صحاني من شرودي صوت غيث

غيث...اكول ريتال هم تحبين تعيشين هنا

ريتال... ارتبكت من سؤالة حرت شجاوب

هاااا والله ما ادري

غيث... يعني اذا صارتلج فرصة تجين تعيشين اهنا تقبلين لو ترفضين

ريتال... يمكن سخنت من الخجل
تشجعت وجاوبتة
اي عادي الحلة حلوة اكيد اقبل

غيث ابتسم وتنفس براحة عافنة وكام

رؤى... شبيج وجهج صار طماطة اشو مرتاحيت السؤال غيث اكيد ورا سالفة

زهرة... شعدكم كاعدين اهنا وغيث شيسوي جان كاعد يمكم ترى عيب تكعدون يم ولد غريب

رؤى... غيث ابن خالنة مو غريب وثاني شي هو اجة كعد يمنا مو احنا كعدنا يما روحي حاسبي وكوليلة هذا الكلام مو جاية علينا

زهرة... يااااا هاي شبيج اكلتيني بكشوري قابل شحجيت اني
عافتنا وراحت 

ريتال... هفففف شوكت نرجع طكت روحي منهم

ثاني يوم اجه بابا رجعنا

بدا الدوام وبدت معاناتي الحقيقية.......

يتبع....