رواية فارسي العاشق الفصل الحادي عشر 11 - بقلم بسمة البياتي

_  فارسي العاشق _
( بقلم بسمة البياتي)
_البارت الحادي عشر _

بابا من بلغ الشيخ بالموافقة وحددو موعد المشية اتصل على جدي وخوالي حتى يحظرون

جدي من عرف هي مشية وهي خطوبة كال راح اجيب النسوان هم ويانة

بابا... سجى انتي اتصلي على خواتي وبلغيهن

اني رايح للاسواق ومناك اروح البيت ابوية وانطي خبر

ماما... ماشي براحتك

من طلع بابا ماما اتصلت على عماتي وبقن يستفسرن منو هذا ومنين وليش تنطوها وهي بعدها طالبة

ماما كالتلهن اجت قسمتها وانطيناها

نص ساعة ودخلت علينا عمة داليا عيونها حمر من البجي

داليا.. هاي من كل عقلكم تنطوها الواحد مزوج هاي شبيكم الخاطر الله

ريتال... عمة تعالي اكعدي واني افهمج اهلي مالهم دخل بهذا القرار اني وافقت بارادتي

داليا... ولج شلون توافقين تعرفييييين يعني ششششنو ضره لوحتى مريضة راح تسود عيشتج انتي شنو ناقصج حتى تاخذين واحد مزوج

ريتال.... كمت اشهك واحجي عمة موبيدي لازم اوافق معندي غير هذا الحل حجيتلها على كلام مؤمن حضنتني وبقت تبجي

بالليل من رجع بابا

رافد... سجى اكو مرة من بيت الشيخ اتصلت عليه تريد تحجي وياج كتلها اني هسه طالع  من ارجع اخليها تخابرج

ماما اخذت التلفون وراحت تحجي وياها

اندكت الباب عمو مصطفى راح يفتحة
دخلن عماتي والشرار يطلع من عينهن انصدمنا بيهن هاي شجمعهن سوى بهل ليل

سوسن... شنو هذا الكلام السمعتة من خالة امل هاي صدك راح تنطي ريتال على ضرة

بابا دنك راسة اي صح

سوسن... ليش رافد شنو زايدة عليك لو صرت متكدر على مسؤوليتها وتريد تذبها هاي الذبة

هدى... لا رافد ممقبولة منكدر شلون تشيل خطيتها وتكسر ركبتها

بابا يحترم عمة سوسن وعمة هدى  لان هنا اكبر منه مكدر يرد عليهن

داليا... على كيفكم عليه هاي قسمتها

غيداء... ولج ياقسمة انتي شتحجين

ريتال... من سمعت كلامهن وشفت حركت گلبهن عليه افتخرت عندي هيجي عمات

سجى... رافد احجي الخواتك كلشي ولاضم عليهن شي الموضوع بعد راح وانتهى

داليا... اني راح احجيلهن  

عماتي يسمعن وهنا مصدومات

سوسن... وانت ليش سكتت الهذا الناقص لعد ولدنا وين راحوا ليش مجيت كتلهم حتى يوكفونة عد حده وياخذون حق بنت خالهم

رافد... ولدكم شنو ذنبهم ادخلهم بمشاكل وعداوات ليش اني هين عليه انطي بنتي بهاي الطريقة والله جاي اموت من القهر

عماتي... من شافن وضع بابا وماما سكتن

هدى... رافد الغي كلشي ولاتنطيها شلون تامن عليها بيت هيجي ناس

رافد... ما اكدر اتراجع جدها وخوالها عرفوا اذا هم ارجع الغي كلشي راح يسونها سالفة

واني بعد انطيت كلمة للناس

سجى... هسه بنت الشيخ حجت وياي باجر تجي تاخذ ريتال علمود يشترون ذهب

سوسن انتي روحي وياها واخذي وحدة من البنات وياج اني ما اكدر اروح

عمة سوسن... والله لاكسر ظهرهم بالذهب خلي يوكفولي

الكل ضحكوا بس بقهر

ثاني يوم العصر اجتي عمة سوسن و غيداء حتى يروحون وياي

بدلت وكملت كالوا يلا اجني النسوان

طلعنا شفنا ام مؤمن و نفس البنية الجانت جاية هذاك اليوم

ام مؤمن اكلت عماتي بالسلام اسلوبها هواية حلو وحبابة اني من شافتني كل شوية تبوسني

ام مؤمن... يلا امشوا مؤمن ينتظرنا برة هو يوصلنة

ريتال... صعدنا اني وعماتي ليورا
ام مؤمن والبنية كعدوا ليكدام خطية حتى لانضايق بالمكان

سلمت على مؤمن وبقيت ساكتة

  الله يشهد جنت احس نفسي جسد بدون روح

عمة سوسن عدها معميل بسوك الذهب دائما تاخذ منه وشغلاته كلها راقية اخذتنا عليه

سوسن...اختاري اليعجبج ولاتستحين

ريتال... اني بقيت مصفصفة ما اعرف شاخذ

ام مؤمن... اي شي يعجبج بس اشري عليه ميغلى عليج شي

ريتال... عمة انتي اختاريلي مجاي اعرف شختار

رغد ... عليش مستحية كلنا مرينة بهيجي يوم وصار حجي وسوالف لاتخجلين

غيداء... انتوا شصيرون من العريس

ام مؤمن... احنا خواتة اني نسرين الجبيرة وهذي رغد اصغر من فارس

غيداء... اهلا وسهلاً تشرفنا بيكم

نسرين... النة الشرف يبعد روحي

سوسن... رتو شوفي هذا الطقم يجنن اذا يعجبج اخذي

ريتال... فعلاً جان حلوو وثكيل ههههههههه

نسرين طلبت من الولد  يعرضلنة بتوت ومحابس

نسرين... اختاري

ريتال... لا ما اريد كافي الطقم

رغد... انتي راح تصيرين مرتو الفارس ومنرضالج بالشي القليل

رجعن عماتي هنا اخترنلي ست بتوت ومحابس اثنين
واخذت حلقة سادة وحلقة فارس احنا اشتريناها

غيداء... الحلقات عوفوهن اهنا حتى يكتب اسمائكم عليهن والتاريخ

ثاني يوم عمة غيداء وداليا هم اخذوني للسوك اشتريت فستان لونة ذهبي على شكل حورية ومن الصدر هواية مكشوف وردانة شفافة بالبداية مقبلت لان مشلح بس عمة داليا اصرت لازم اخذة  ومناك رحنا حجزنا صالون بهاي اليومين هلكت من التعب هم دوام وهم فرات بالسوك

اليوم اهل ماما يوصلون لان باجر المشية والعقد

داومت للكلية حتى اروح اخذ اجازة الباجر لان خميس 

رهف... اني هم راح اخذ اجازة  حتى اجي يمج من الصبح

ريتال... فديتج ياروحي هم زين حتى تجين وياي للصالون

اني بس عزمت رهف مبلغت باقي صديقاتي لان حفلة عائلية

مؤمن... شعدها مرة خالي مداومة اليوم

ربتال... ترى بعدني مصرت مرة خالك على كيفك لاتحمى

مؤمن... لا اني من هسه راح اعتبرج زوجتو
بس جديات ليش داومتي

ريتال.. هواية عندي غيابات اجيت اخذ اجازة الباجر

رهف... اكولك مؤمن معندك صورة الخالك خلي نشوفها ههههههه رتو وخالك رجعوا الايام زمان راح ينخطبون وهما مشايفين بعض

ريتال.. تنهدت وحجيت بقهر هو اني حظي فكر بقت على هاي

مؤمن... هههههههه لاتضوجين عندي صورتو شوفي

رهف.... اي فدوة وينها

مؤمن... اشو انتي ملهوفة على شوفتو اكثر من خطيبتو

طلعت الصورة اخذت رهف الموبايل من ايدي

رهف... مممممم يشبة جدك شخصية مثلة تعالي شوفي رتو

ريتال...صار عندي فضول اشوفة بس جنت مستحية

رهف... دهاج يمعودة لاتستحين لعد باجر شسوين من راح تشوفي على الطبيعة

ريتال... رهف خلت الموبايل كدامي باوعت عليه فعلاً يشبة الشيخ ملامحة رجولية شعرة مرتب ولحية وشوارب جان لابس دشداشة ابد مجنت اتخيل روحي ارتبط بواحد هيجي لبسه

رهف... شنو رايج بي

ريتال... زين ميتعيب

مؤمن... كولي حلو شنو ميتعيب

ريتال... وانت شعليك اني اكول اليعجبني

رهف.. لا رتو والله هيبة وحلو ملامحة مرتبة دشوفي طولة وضخامتة

ريتال... هسه اني شحجيت اكلتوني صايرين محامين دفاع

مؤمن... يلا امشوا نروح ناخذ اجازة

بهاي الفترة مؤمن هوايه تقرب منا وصرنا اصدقاء
الفرق بينه وبين حازم فرق السماء عن الارض

رجعت للبيت من نزلت من الخط شفت سيارات خوالي يم بابنا

دخلت من المطبخ جانوا بنات خالي ديغسلون مواعين الغدا سلمت عليهن فتت للهول شفت بيبي وخالاتي ميعاد وفاطمة وسهى  ونسوان خوالي اثنين حتى زهرة جاية

سلمت عليهن بس وجه بيبي مجان يبشر بخير مبينة ضايجة

بيبي... امشي بدلي وتغدي وتعالي احجي وياج

ريتال... لعد جدو وخوالي وينهم حتى اسلم عليهم

ماما... كاعدين بالاستقبال روحي غيري ملابسج وبعدين تعالي

اشرت الرؤى تجي وياي دخلت الغرفتي ابدل اجت رؤى

اكولج شكو الوجوه مطمن

رؤى... ولج جدي من عرف راح تاخذين مزوج گلب الدنيا على بابا وماما
وحتى بيبي تخبلت

ريتال... والله خطية بابا وماما ياهو اليجي يلومهم

رؤى.. بس خالو حسين وخالة ميعاد وزهرة ومرة خالو فرحانات ومن شكلهن مشمتات

ريتال..على شنو يشمتون قابل عدوتهم اني

رؤى... جدو من تعصب خالو حسين يكولة شكو بيها واذا مزوج قابل مرة راح تاكل مرة وخاله ميعاد ايدت كلام خالو

وجدو رزلهم رزاله ناشفة

ريتال... هفففف شوكت اخلص من هذا الضيم

بدلت وطلعت شفت جدو سلمت عليه

جدو.. تعالي كعدي يمي

ريتال... استلموني هو وبيبي تحقيق

جدو..خوما احد غاصبج على هاي الزواجة

بيبي... احجي ولاتخافين والله اگلب الدنيا على  راسهم

ريتال... لا والله محد غصبني اني وافقت

جدي... تحسر لعد هذا هو بنتي الله يسعدج

ريتال.. جدو باسني من راسي وراح

بيبي... امشي تغدي حتى خدودج تصير مثل التفاح الباجر

ريتال... هههههه بيبي نسيتي الركية البيضة اشو هسه صرت تفاحة

بيبي... امداج يلغمة بعدج تذكرين

ريتال.  ههههههه والله احب سوالفج حضنتها وهي هم بقت تضحك

ثاني يوم كعدت البيت مخبوص عبالك عدنا عرس مو مشية

اجني عماتي من الصبح ورهوفة هم اجتي ساعة 12 الظهر رحنا اني ورهف وعمه داليا للصالون

سويت مكياج قريب من لون الفستان وتسريحة بسيطة بس من كدام وشعري الباقي مفتوح  وبرمتلي اطرافة وخلتلي تاج ذهبي ناعم كلش

داليا... ما شاء الله حبيبتي والله اخاف عليج من العين طالعة قمر

رهوفة... فارس اذا شافج يبات يمكم

ريتال... ابتسمت بقهر ابد مالي خلك المجاملات روحي معصورة وضايجة

اجة عمو مصطفى رجعنا للبيت

من دخلت الكل يصلون على النبي

بيبي... سجى لبسيها خرزة زركة لاتنحسد

ماما عيونها مورمة من البجي عبالك اليوم عرسي وراح ياخذوني

عماتي هم يبجن وحتى خالة فاطمة وسهى هم دموع بعينهن

يالله معقولة اني حالتي صعبة الهدرجة والكل مقهور عليه

بيبي وخالة امل عاطو بيهم كالوا ليش هلبجي هذا فال مو حلو

من سمعوا هذا الكلام سكتوا

جانوا مرتبين كوشة بالهول رحت كعدت

والزلم يكعدون بالاستقبال هم زين بيتنا كبير لو صغير جان وين راح يكفي

بعد صلاة العصر اجوي اهل فارس

دخلن النسوان كومة بنات واطفال صارت خنكة

نسرين... صلوات على محمد هاي شطالعة يولو

رغد... والله نخاف عليج من العين

رؤى... ولج رتوتة هذ الشيخ ممبقي احد مجايبة الاستقبال والحديقة انترست زلم الشارع انسد من سياراتهم

ريتال... اني ارجف الخوف والقلق والتوتر والخجل كلهن انجمعن عليه

رهف... ريتال شبيج بردانة؟

ريتال...ولج راح يغمى عليه ما ادري شبيه

رؤى.. الله عليج رتو تحملي هسه مو وكتها ترى

رهف... امداج هو قابل بيدها

ريتال... عيون النسوان كلها عليه ما اعرف وين اودي عيني

الزلم بقوا كاعدين نص ساعة

هدى... كومي حبيبتي حتى الشيخ يعقدلكم

لبسوني حرام ابيض واخذوني وكفت يم باب الاستقبال

بدا الشيخ يعقد
وصل الدور الي لازم اكول نعم انت وكيلي

الساني انعقد اسناني صارت تنضرب وحدة بالثانية

عاد الشيخ الكلام مرة ثاني واني نفس وضعي

فاطمة... رتو جاوبي

ريتال... اخير شي نطقت نعم انت وكيلي

تم العقد رجعت المكاني والنسوان هلهلو

عمة فارس... يلا وين فارس خلي يجي يلبسها الحلقة

الكل ينتظرون وهو ماكو

رهف... همست يم اذني خطيبج يكول كلها نسوان وين ادخل

ريتال.. خفتاً وراحة يسوي فضل

رؤى..شششنو ميدخل ليش بكيفة نريد انشوفة

داليا... نصي صوتج فضحتينا

رغد جانت تحجي ويا عمة غيداء راح يجي فارس بالكوة قبل يدخل

ريتال... رجفتي زادت ولج رهف جيبيلي شال بسرعة خلي على كتفي وصدري

رهف... انتي صدوك بطرانة ترى هو صار زوجج عادي مو حرام

دخل فارس واشتغلت الهلاهل اني بقيت مدنكة

كعد بصفي محجة وياي ولا كلمة

نسرين جابت علبة الذهب

يلا خوية لبسها الحلقة

اخذ الحلقة واندر عليه واني بعدني مدنكة

داليا... حجت باذنها رفعي راسج ليش مدنكة

ريتال... رفعت راسي صارت عيني بعينة هو صافن حتى ميرمش رجعت دنكت بسرعة

اخذ ايدي حتى يلبسني الحلقة هو هم جان متوتر مبين من حركة ايده

اجة دوري البسة الحلقة بس الي صدمني شفت حلقتة الثانية بهذيج الايدي

مكلف نفسه ينزعها خمس دقائق حسيت بالأهانة بهذا تصرفة 

جنت لازمة ايدة والايد الثانية بيدي الحلقة دالبسها اله لا ارادياً بدون شعور من قهري غرست اظافري بالايد الازمتها

محسيت على روحي غير من رفع راسة مصدوم وخزرني

بسرعة رخيت ايدي لبستة الحلقة وانداريت

رغد...لبسها باقي الذهب

فارس... لا هاي شغلتكم اني راح اطلع

سمعتة حجة بصوت خشن ويا اختة

فارس... جيبولها شي يسترها وخلي هذا اليوم يعدي على خير

ريتال... والنبي انرعبت من كلامة

نسرين...هههههه ها خوية لازم بدت الغيرة من هسه

فارس قبل لايطلع باسني من رأسي وراح

رغد طلبت من رؤى تجيبلي شال تخلي على كتفي

رؤى... رتو شفتي شلون هيبة خرب ببليسة يهز الكاع من يمشي  صح لابس عربي بس كشخة والله حبيتة

رهف... عزاااا بعينج شحبيتي

رؤى... عابتلج حبيتة مثل اخوية شبيج

ريتال... انسطرت هذن يلغن يم راسي واني العبرة خانكتني هم من كلامة وهم من موضوع الحلقة عبالك جاي يهيني ويشوفني عود هو مزوج

بدو البنات يقدمون الكيك والعصائر للمعازيم واني انتظر شوكت تخلص الحفلة بالكوة كاعدة لو ابقة بعد ساعة اكيد راح اتخربط

فارس....اني فارس ابن الشيخ عكاب ترتيبي بين اخواني ثالث واحد اخوية الجبير عادل  واختي نسرين بعدين اني ويجي وراية وسام و رغد وحازم

بالدراسة كملت السادس معدلي جان قليل مقدمت كلية
استلمت الشغل ويا ابوية وعادل

اني وعادل و وسام ذراع ابوية اليمين يعتمد علينا بكلشي
حالة ومالة كلو مسلمو بيدنا

الشيخ من صغرنا علمنة الالتزام بالدين والاحترام الناس كلها تحلف باخلاقنة

بس الوحيد يختلف عنه هو حازم من هو صغير يدور مشاكل واذا نحجي ويا امي تزعل

الحد ما كبر بقة على نفس وضعو هوايه حاولنة نعلمو ونوعي بدون فايدة

بعمر  22 سنة ازوجت اخذت بنت عمي اسمها صبا زواج تقليدي

صبا حلوة مابيها شي يتعيب بداية زواجي جانت احلى ايام

من اول شهر صار عدها حمل

ومن ولادت اجة الطفل معوق حمدت الله ومعترضت على حكمتو

ابني صار عمره سنة صبا بدت تتعب ويومية مريضة ومن خلال المرجعات والفحوصات طلع عدها سرطان الثدي

صبا من عرفت تخبلت ليل ونهار تبجي قررنا نسفرها خارج العراق حتى تتعالج اني مكدرت اروح وياهم امها واخوها راحوا وياها

علاج صبا طول اكثر من سنة وتم استئصال واحد من ثديها والحمدلله راح المرض ورجعت زينة بس شكلها تغير بسبب العلاج وحالتها النفسية ادهورت خصوصاً بسبب منظر صدرها

ابني  كلما يكبر حالتو تسوء  صبا من رجعت تخلت عن مسؤوليتها اتجاه ابنها

الله يوفقها اختي نسرين هي جانت اداري ومتكفلة بي

صار عمر وليد ثلاث سنوات الله اخذ امانتو

بهاي الفترة صبا تغيرت صارت انسانة ثانية ماكو شي يهمها غير صحتها هملتني واذا اطلب حقوقي اتكولي اني بسبب الزواج تمرضت جنت بيت اهلي  مثل الوردة

تعبت من العركات وياها والمشاكل جانت كل جم يوم تروح الاهلها تبقة ايام اهناك

اني رجال واريد حقي الشرعي بس لا حياة لمن تنادي

حازم جان متخبل علينا يريد وحدة وابوية رافض

تعبنة منو ومن مشاكلو ازوج وبقة على نفس وضعو

اخير شي سافر

وبيوم ابوية وكع علينا وتخربط بعدين عرفت اكو بنية جاية شاكية من حازم وهي نفسها الجان يحبها

الشيخ طلب من مؤمن يزوجها

ومؤمن رافض ويتوسل بابوية

جنت بالجامع اقرأ قرآن اجة الشيخ يمي وصدمني بطلبو راد مني اني ازوجها

عيوني صعدت الراسي
شلون اخذها وحازم يحبها وهي لوما منطيتو عين مجان جلب بيها

ابوية من سمع هذا كلامي زعل مني

بالليل اجتي نسرين تبجي وتتوسل بيه حتى اوافق عليها اتكولي ابني يتيم لاتجبروا وتكسرون خاطرو

بعد ملحة وضغط من ابوية واخواني وافقت
و جانت صبا هم موافقة

اني صح قبلت بالبنية بس بقة گلبي ممرتاحلها ومشمئز منها اني طبعي شكوكي ما اعرف شلون راح اكدر اتقبلها

اليوم الخطوبة تم العقد بيني وبينها

بالعركة يلا قبلت ادخل البسها الحلقة واشوفها

جنت متاكد هي حلوة

بس من شفتها انصدمت بيها جانت اكثر من حلوة وصغيرة
هاي اهلها شلون قبلوا ينطوها المزوج

كعدت بصفها واني مو على بعضي حتى كصتي عركت

وبنفس الوقت تعصبت من شفت جسمها طالع

لبستها الحلقة ايدها ناعمة اني بشرتي حنطية من لزمت ايدها شفت نفسي اسود يم بياضها

وهي الله يسلمها من لبستني الحلقة ما اعرف شبيها استغربت من تصرفها نبتت اظافرها بيدي خزرتها

قبل لا اطلع طلبت من اختي تنطيها شي تستر نفسها بي 

رجعت كعدت يم الزلم واني بعدني عركان شكلها انطبع براسي

خلصت الحفلة سلمنا على الزلم وطلعنة رحت يم السيارة اريد افتحها متنفتح

عصا السويج بيها

اباوع اخواني ولد عمي خربانين ضحك

وسام...هههههههههه يولو العريس دايخ ومسطور

فارس... انجب لك شبيكم تضحكون

وسام... عجل اذا مو دايخ شوكفك يم سيارتي ههههههههه

فارس... باوعت للسيارة هههههه هاي صدك سيارة وسام حكيت كصتي

وهذوله بعدهم يضحكون

عفتهم ومشيت انعل يومج شسويتي بيه واني عود جنت مرايدج.......

يتبع