رواية فارسي العاشق الفصل الثاني عشر 12 - بقلم بسمة البياتي

_  فارسي العاشق _
( بقلم بسمة البياتي)
_البارت الثالث عشر _

قبول بابا بتحديد موعد زواجي بعد عشر ايام صدمني
انقبض قلبي وروحي شاطت ما اكدر احجي شي ولا اعترض لان اعرف هو هم انحط بموقف محرج من الشيخ

ماما... ادري وين راح نكدر نكمل تجهيزها بهاي العشر ايام على شنو هذولة هلكد مستعجلين

بابا... سجى شسوي فهميني استحيت من الرجال ومكدرت ارفض

ماما.. بقهر هذا هو الصار صار راح اكلف غيداء وداليا يروحون وياها يجهزوها

ريتال... اني حرف مانطقت حاولت اكون قوية وامنع دموعي تنزل لان وضع اهلي اصعب من وضعي

ثاني يوم نسرين اجت البيتنا وجابت مبلغ كولش كبير التجهيزي

وبدت المشاوير والتعب دراسة ودوام وامتحانات وفرات بالسوك

حتى وزني نزل من التعب وذبلت

عمة غيداء وداليا يومية يجن ياخذني للسوك مبقن شي مشترنا الي خلال خمس ايام كملت جهازي

العرس راح يكون بالبيت الظهر يسوون عزيمة والعصر بزفة عادية يجون ياخذوني

ماما وعماتي من عرفوا ماكو حفلة عرس قررو يسوولي حنة ضخمة ويحجزون احسن قاعة

داليا... من باجر راح اخلي مصطفى يشوف قاعة وهو يلتزم باقي التجهيزات

غيداء... خلي نسويها قبل العرس بيومين حتى ريتال لاتتعب

ماما... اي والله خوش فكرة شنو رايج بهذا الاقتراح بنتي

ريتال...تنهدت بكيفكم اليعجبكم سوو

نغم.. رتوتة ليش ضايجة

ريتال... مضايجة بس تعبانة هواية انضغط عليه هاي الفترة هم دراسة وهم طلعات وطبات

سوسن... سودة عليه بنتي حقج تتعبين هما الله يسامحهم حتى منتظروا العطلة

هدى... هاي قسمتها بعد منكدر نعترض

داليا... باجر نروح نحجز فساتين الحنة والعرس ونحجز صالون

غيداء... قبل الحنة اخذيها للصالون حتى تغير لون شعرها وتحف

اليوم بالكلية كاعدين اني ورهف اجة مؤمن يمنا

مؤمن... يابة اشكد تعبان انهد حيلي من ارجع من الدوام يشغلوني حمال اودي هذا واجيب هذاك

رهف...هذا عرس خالك غصباً عليك لازم تتعب

مؤمن... انتي شكو عليج كاعدة مرتاحة واني ابو ابوية مستلك

ريتال... اوف اشكد تتناكرون الخاطر الله

مؤمن... رتو شبيج اشو مو على بعضج

رهف... عادي كل عروسة قبل العرس تتوتر وتخاف

مؤمن... لازم انتي مجربة وتعرفين هذا الاحساس

رهف... وجع شمجربة غير سامعة من البنات

ريتال... اكولك مؤمن خالك حازم عرف اني راح ازوج اخو

مؤمن... تنهدت يعرف راح يزوج بس ميعرف منو العروس

ريتال... وليش متكولولة

مؤمن... جدتي متقبل

ريتال... عادي هسه اكيد يعرف من مرتضى صديقة لو من اقاربكم

مؤمن... كرايبنا محد يعرف انتي نفسها الجان حازم رايدها
وحتى من جيتي على جدي للبيت بيومها جدي كال ممنوع هذا الكلام يطلع برة هاي الغرفة حتى خوالي عادل و وسام هم ميعرفون

وحازم كطع علاقتة بمرتضى من اني اتصلت عليه وكتلو مرتضى طلب علاقة من ريتال

حازم من سمع اتصل على مرتضى وتعارك ويا

ومرتضى واحد جبان الشيخ من راح على اهلو بقة يرجف من الخوف

ريتال... اوووي شعليه بي يعرف او مايعرف كلها نفس الشي عندي
كومي رهف نعزم بقية البنات على الحنة
جنا طابعين بطاقات وزعتهن عليهن

هم زين بدت عطلة 15 يوم خطية رهف مراحت الاهلها بقت يم بيت جدها علمودي

ريتال... خالاتي وبيبي يجون لو لا

ماما... بس سهى وفاطمة يجن بيبيتج خطية تتعب من السفر متكدر تجي ويكولون هو عرس بنية يجون ياخذوها ويروحون

رؤى...شعجب خالة ميعاد ونسوان خوالي ميجن

ماما... والله ما اعرف اني العليه عزمتهم بقت بكيفهم بعد

رؤى...بهمس خفتآ وراحة يسوون فضل

ماما... شجاي ادردمين

رؤى... هااا لا هيج ماكو شي

ماما... خزرت رؤى

قبل الحنة اجني خالاتي وعماتي  يمنا

جهازي عمة غيداء ونغم ودو البيت الشيخ ورتبوا بغرفتي
مؤمن اجة عليهم اخذهم ورجعهم 

اخذتني خالة داليا للصالون

صبغت شعري عسلي وميشتة هاي اول مرة بحياتي اصبغ شكلي تغير 180 درجة

حفيت كامل وسويت تنظيف البشرتي
فعلاً التغيير بين عليه

من رجعت للبيت ماما حاضنتني وتبجي

المغرب اجت رهف تبات يمي

بابا راح البيت عمة داليا يبقة هناك

داليا... كومي نسوي جسمج بالشيرة

ريتال... فزيت ياااا والله لو اموت اني مرة وحده جربتها ورادت روحي تطلع

نغم... لج كومي لعد بشنو تسوين جسمج

ريتال... اكو مزيل شحلاتة

بالغصب سوولي وشبعت بجي

ريتال... ولكم ما اريد ازوج عوفوني ساعة السودة الوافقت بيها

رهف... من هذا المنبر اعلن للجميع وانا بكامل قواي العقلية سوف اقوم بمقاطعة الزواج بشكل نهائي
وسيتم استبدال عبارة الزواج (سنة الحياة)
الى عبارة  الزواج (مرمطة الحياة)  وشكرا

داليا.. هههههههههه لعد من تحملين وتجيج الم الطلوكة شسوين 

رهف... يماااا  لا عمي ما اريد شحلات حياة العزوبية
دباعي المسكينة صارت طماطاية 
هذا تعذيب مو زواج

رؤى.... ترى جربتها متوجع بس هي رقيقة زيادة عن الأزم

رهف... اني ما اعرف انتي وريتال شلون خوات لو ما بينكم شبه جان كلت اكيد وحدة منكم مبدليها بالمستشفى

رؤى... هم زين مطلعت جبانة مثلها

ريتال... جنت اضحك وياهم بس گلبي ينزف
كلما اذكر بعدلي بس يومين وراح اترك هذا البيت واعوف اهلي بركان يشتعل بصدري

شلون راح اكدر اعيش يم ناس ما اعرفهم حتى هذا فارس كولشي ما اعرف عنه

اني وفارس من يوم جيتة للكلية بعد مشفتة

فارس... من يوم زيارتي للكلية وشفت مكياجها قررت ما ابقيها يم بيت اهلها اريدها تجي جدام عيني

حجيت ويا ابوية وكتلو حتى يحجي ويا اهلها ونحدد موعد العرس

اتصلنا بابوها اكثر من مرة مقبل يكول بالعطلة الزواج

جيت يم الشيخ واني شايط نار

فارس... يابة ترى ميصير  كل هذا التأجيل اريد حرمتي

الشيخ.. ها يول اشوفك مستعجل مو جنت مو رايدها

فارس... الوضع اختلف هسه هي على ذمتي واريدها تجي جدامي

الشيخ.. ابوها مو راضي لازم تصبر

فارس... روحلهم من يشوفك ميعترض

الشيخ... ههههههه والله وكعت ومحد سمى عليك

فارس... ابتسمت. لا مو اني التوكعني حرمة

الشيخ... عجل معليه اني انت روح احجي ويا ابوها

فارس... ابو عادل لوين تريد توصل

الشيخ... من تعترف وتكول يابة اريد حرمتي لان ما اكدر اصبر بعد
اني اروحلو واقنعو

فارس... حكيت راسي اوووف ولا اكدر للحجي
اي يابة ما اكدر اصبر بس روح رحمة الاهلك

تحدد موعد العرس صبا من عرفت ضاجت

فارس... يولو شبيج مو انتي رضيتي ليش هسه مبوزة

صبا...  اني صح رضيت بس يبقة الموضوع صعب عليه

فارس... صبا من تجي البنية ما اريد مشاكل كفيلج الله اي مشكلة منج لو منها ما ارحمكم

صبا... واني شعندي وياها حتى اتعارك واغث نفسي وتتعب صحتي  بس هسه اريد اروح ابقة يم اهلي

فارس... هو انتي هذاك اليوم جيتي منهم

صبا... كتلك الموضوع يبقة صعب عليه  ما اريد انغث وانقهر واني اشوفك تحظر للعرس

فارس... عجل روحي

ريتال... اليوم حنتي كعدوني من وقت حتى اتريك واروح للصالون
ام الصالون طلبت منا نجي من وقت لان هوايه احنا
بس ماما وعمة سوسن وخالتي سهى راح يبقون بالبيت الباقي كلهن يجن وياي

وصلنة للصالون استلمتنة بالسرة بس اكثر شي ركزوا عليه

اني لبست فستان ماروني نفش الردن تعلاكة ومكشوف من الصدر والظهر

مكياجي غامق والحمرة مارونية شعري مفتوح وباف من كدام ولبست تاج ورد بلون الفستان

وسوتلي وشم فراشة على كتفي

المكياج ويا لون شعري والفستان غيرني تماماً

ماشاء الله عماتي وخالتي  والبنات هم طلعن يجننن

فساتين البنات كلها دلع لان الحفلة بس نساء وعماتي منعوا التصوير

من كملنا اجة عمو مصطفى وابن عمة سوسن اخذونا للقاعة

دخلت للقاعة المعازيم جايين ماما وعمة سوسن جانوا مستقبليهم

خوات فارس واقاربة هم جايين

نسرين... يولو عين الباردة عليج هاي شطالعة اذا اليوم هيجي لعد بالعرس شطلعين

خجلت من كلامها

كعدوني بالكوشة وبدت الحفلة

البنات وصديقاتي ذبن لحم هههههه

اكثر من مرة كوموني اركص وياهم بالبداية جنت مستحية بس بعدين شوية فكيت وصرت عادي بس الفستان كبير ضوجني

جانت نسرين كل شوية تجي تاخذلي صورة

همست العمة داليا اكولج انتي مو منعتي التصوير وبس بالكاميرا اليمج
اشو نسرين دتصورني

داليا... عادي اجت كالتلي واني كتلها ماشي

استمرت الحفلة والركص وصلنة الفقرة الحنة

اختة رغد هي حنتني نسرين كالت اني ارملة فال مو زين اذا حنيتج

داليا... رتو كومي اجتي المصورة تاخذلج صور

اخذوني الغرفة تابعة للقاعة جانت المصورة تنتظرنا اخذتلي كومة صور وحدي و صور عائلية هم

جنت مشترية فستان ثاني لونة زيتوني مجسم فتحت الظهر توصل النص ظهري بدون ردن من يم الصدر مثل الطوق يتعلك بالركبة

وبي فتحة جانبية توصل للفخذ صح مكشوف بس مريح هههههه

لبستة وهم اخذت صور

رجعنا للقاعة اجتي رهف كومتني اركص  نسيت نفسي وركصت وياهن ذبيت لحم ليشوفني يكول هاي مزوجة عن حب هههههههه

البنات سوو دائرة وكعدوا واني بقيت بالنص اركص

انتبهت نسرين بعدها دتصور

فارس.. اليوم حنة ريتال اهلها سوها بقاعة صح محبيت الفكرة بس معترضت هي صغيرة من حقها تفرح

كاعد ويا وسام وابن عمي جمال زوج رغد اختي

اتصلت عليه نسرين

الووو.... خوية راح ادزلك صور شوفهن

فارس.. جان صوت عالي يمها بالكوة سمعتها

دقايق وجان اشوف  صور ريتال احتركت عشيرتها هاي شلابسة وشطالعة

فاتح عيوني والعرك صار يزخ من وجهي

وسام... ابو الفوارس وين صافن

جمال... هذا من يوم الخطب كثرت صفناتة

فارس... اسمعهم ومابية اجاوبهم

عفتهم وطلعت اتصلت على نسرين
بس كالت الو صرخت عليها

هاي شمسوية بروحها وشلابسه امشي ستريها لا اجي اكسر القاعة على راسها

نسرين.. اهدء خوية الحفلة بس نسوان

فارس... فرضاً احد صورها الناس كلها عدها موبايلات

نسرين... التصوير ممنوع بس اني صورت علمودك

فارس... سديتة منها واني بعدني مو مرتاح
رجعت اباوع للصورة واني مشعول اهل اهلي صرت اقرب بالصور وباوع على تفاصيلها

شايلة عيون لو غضب بنت الاوادم

ريتال... خلصت الحفلة رجعنا للبيت ميتين من التعب كلها ادور مكان حتى تنام ههههههه

سبحت وذبيت روحي بفراشي كتلهم ياويلة اليكعدني الصبح

رؤى... هو منو راح يكعد دشوفي الكل مسطور من التعب

ريتال... اني معليه بس حبيت انطيكم خبر واحذركم

ثاني يوم جان عدنا عزا بدون ميت ماما فرفحت من البجي عماتي يبجون وياها
بابا كضة اليوم كلة بالاسواق عينة مجابس يجي للبيت

اما اني جنت منتهية عيوني ورمت مجلبة بماما ما اريد اعوفها

رؤى حابسة روحها بغرفتها وتبجي
مجانت اكو اي علامات الفرح بيتنا

فارس... اليوم كاعدين على الريوك جنت اسمع خواتي ونسوان اخوني يسولفون بينهم على حفلة البارحة جنت مركز ويا كلامهم

نسرين... خوية اخاف اشوفك شي وهم ترزلني مثل البارحة

فارس... صار عندي فضول حتى اعرف ششوفني
لا ما اسوي شي الج لامان

نسرين... جيت كعدت يمو وانطيتو موبايلي يشوف التصوير

شغلت الفيديو وحطيتو بيدو

ادحج عليه عيونو نطت لبرى وكصتو صبت عرك

فارس... هو اني شفت الصور اشتعلو اهلي وللصبح مو نايم مو عاد اشوفها تركص

واثوب الابستو مابي مكان مستور لوباقية على الاول احسن

مكدرت ابقة جدامهم كاعد اخذت الموبايل وصعدت الغرفتي
اذا الله ميجذبني عدت الفيديو اكثر من عشرين مرة حفظت كل تفاصيلها

المصيبة مسوية وشم طار عقلي من هالسالفة ما احب المرة التلعب بجسمها

صرت احسب الوكت اريد النهار يخلص ويجي باجر

ريتال... اليوم عرسي اليوم بداية حياة جديدة اما تكون حلوة او تعيسة

اليوم راح اعوف بيت اهلي واترك كل ذكرياتي بهذا البيت سوء كانت حلوة او مرة

ماما سودة عليه متكدر تباوع بوجهي ولا اني اكدر ارفع عيني بعينها

داليا... روحي سبحي حتى تتريكين ونروح للصالون

ريتال... رحت سبحت  سوولي ريوك مكدرت اكل نفسي مسدودة  بالكوة جاملتهم واكلت لكمتين
رحنا للصالون بس اني وعمة داليا

البقية كلهن يسوون مكياجهن بالبيت لان يلبسن حجاب وهو اساساً ماكو حفلة

ام الصالون هالمرة سوتلي تسريحة رفع شالت شعري كله وخلتلي تاج ملكي  ومكياجي اختاريت لبناني لان مردت يكون غامق

بدلتي جانت راقية ومستورة مردت يطلع اي شي من جسمي والطرحة بطول الفستان

من خلصت لبست كاب فوك البدلة لان ملابسة حجاب

رجعنا للبيت اول مدخلت عيني ادور على بابا وماما

ماما من شافتني اشكد حاولت تحبس دموعها بس مكدرت

سوسن... سجى لاتبجين كدامها بس تشوفج هي هم تبجي ومكياجها يخرب

سجى... والله موبيدي احسهم راح ياخذون روحي مني

سوسن... اني هم من زوجت نغم  جنت مثلج بس بعدين تعودت

فارس... اليوم من الصبح مخبوصين ابوية عازم الدنيا كلها اكثر من جادر خلينا برة وبالكوة كفوا ذبايح جثير ذبحنا والطباخين من الصبح يطبخون

الحد ما كملوا الغدا هلكنة

اخذوني الولد ابدل لبست قاط كحلي وقميص ابيض ورباط اختاريت لبسي يكون رسمي

وجنت رايح للحلاق عدلت شعري وحددت لحيتي وشواربي
اهتميت جثير بروحي عبالك اول مرة اعرس

وأخيراً صار وكت الزفة ورحنا نجيبها

ريتال... سمعت صوت الهورنات عرفت اجوي لزمت ايد ماما ما اريد اعوفها

صار صوت طلقات يبوووو زاد خوفي
دخلن النسوان يهلهلن اخير شي دخل فارس والشيخ

اجة فارس يمي باسني من كصتي جنت ارجف وبعدني لازمة ايد ماما

الشيخ اترخص من اهلي حتى ياخذوني

بابا اجة وكف يم الشيخ

بابا... شيخ انطيتكم قطعة من روحي بنتي امانة يمكم

الشيخ... بنتك صارت بنتي وغلاتها من غلات بناتي وحفيداتي لاتخاف ابو يزن امانتك محفوظة

بابا... كفووو شيخ والنعم منك
فارس ديربالك عليها

فارس... بنتك بعيوني اطمئن رحت بست ابو يزن من راسة

ريتال... حصنت بابا وغصيت بالبجي وهو هم جان يبجي

بابا... الله يكتبلج بكل خطوة سعادة راضي عليج الاخر يوم بعمري واحمد الله لان انطاني بنية مثلج

ريتال.  كلام بابا ملخني طكيت بجي

حضنت ماما جنت مخلية راسي على صدرها وابجي مثل الطفلة

الكل يبجون على بجينا

حتى يزن اجة حضني ويبجي

الشيخ... صلوا على النبي هي قابل وين رايحة ترى موبعيدة عنكم  اي وكت تشتاكولها تجيكم

فارس... متت قهر عليها وعلى اهلها يمكن اذا الله انطاني بنية مستحيل ازوجها بسبب هذا المنظر

بالكوة اخذناها من اهلها وطلعنة من سمعت صوت الرمي لزمت ايدي قوي

صعدتها بسيارتي ليكدام لان اني اسوق صعدت يمها شغلت السيارة وطلعت طول الطريق بس اسمع صوت شهكاتها وبجيها

فارس... ول ياب كافي عيونج راحت وعد شوكت تريدين تشوفيهم اجيبج

ريتال...رفعت راسي وبعدها الشهكة بيه الله عليك تحجي صدوك لو تشاقة
.
فارس... اني من اكول كلام انفذه وعد بس لازم بالاول تبطلين بجي

ريتال... مسحت دموعي وسكتت

فارس.. وكفت يم باب بيتنا اجني النسوان حتى يساعدوها تنزل جنت اتلفت يمنى ويسرى اخاف احد يشوفها صح مغطيها بس موبيدي ما اريد بشر يشوفها
وهي الله يستر عليها طالعة جنها الگمر بالليلة تمامو

ريتال.. من نزلت من السيارة هم رجع الرمي  يبوووو عليهم كل شوية مخرعيني

قبل لاندخل للبيت ذبحوا خروف جوة رجلنا غمضت عيني على اساس اني ناقصة افلام رعب

دخلت جوة كعدت وفارس عافنة وطلع

سوسن... اكولج ام مؤمن لعد المصور شوكت ياخذلهم صور

نسرين... لونها تغير ونحرجت هاا والله خية ما ادري

سوسن.. شلون متدرين اني عبالي، ينزلون يم استوديو ياخذون صور بس اشو جيتوا للبيت كلت يمكن المصور هو يجي

ام فارس... لا ماكو وشيسوون بيهن

سوسن... شنو شيسوون بيهن غير تبقة ذكرى من زواجهم

ام فارس...لبست بدلة وسونالها عرس كافي موضروري الصور مقصرنا وياها بشي

سوسن.. وشنو مانة علينا بالبدلة والعرس وليش هذا هم اسمه عرس ترى انتو ماخذين تاج البنات وشسوون قليل بحقها

نسرين... عروستنا تستاهل ماي العين امي موقصدها حبيبية لاتاخذين على خاطرج

ام فارس... اوكفي انتي وليش شبي مو عرس هذا احنا وهذا طبعنا وعاداتنا ودام هي رضت لازم تتعلم علينا وتنسى حياتها قبل

ريتال...هاي شجاي يصير ام فارس شبيها عبالك وحدة متحملة علينا وبس تريد تتعارك

سوسن... واحنا مذابين بنتنا وبعدنا على البر
وعاداتنا التحجين عليها اتشرف اكبر واحد
غيداء اتصلي على الولد يجون يرجعونا

ريتال كومي مالج كعدة بهذا البيت

النسوان التمن على عمتي يهدن بيها وهي قافلة

فارس كاعدين برى اجت نسرين صاحتني اني وابوية

نسرين... الحكوا امي تعاركت ويا عمة ريتال وراح ياخذونها ويروحون

فارس... فزيت شنو ياخذونها شنو جاي نلعب

دخلنا اني وابوية

الشيخ..صاح بصوت قوي هاي شصاير

سوسن... بنتنا وراح ناخذها وانتهى الموضوع

الشيخ... على كيفج بنتي ترى هاي عيبة وجبيرة اذا العروس طلعت نفس اليوم من بيت زوجها

سوسن... احنا ممنطيكم هدية ولافصليه ماسويتوا عرس كلنا عادي جيتوا بدون طبل لو موسيقى طلعتوها من بيت اهلها هم سكتنا كلنا يستحرمون

ومن اجي اطلب تاخذ صورة الحجية تهينة على اي اساس

ام فارس... يمه من مكر النسوان هو منو هانج

الشيخ... ام عاااااادل صوتج ما اسمعة

كملي بنتي شصار

سوسن... اتكول لبست بدلة وسوينة عرس كافي   ولازم تنسى عاداتكم ليش شبيهن عاداتنا

الشيخ... امسحيها بوجهي الحجية اكيد مقصدت واذا على الصور هسه فارس ياخذ حرمتة ويروحون ياخذون صور

سوسن... حجي اخاطرك والخاطر فارس راح امشي الموضوع

مؤمن... اكو  ستوديو هين صورو حلوة هسه اجيبو ياخذلهم

الشيخ.. عجل شتنتظر يلا روح

ريتال.. اجة الشيخ عليه  جنت خايفة وابجي باسني من راسي وحجة وياي

الشيخ.. عليش خايفة وتبجين بنيتي احنا صرنا اهل ماكو مشاكل بينا ان شاء الله

طلعوا هو وفارس عماتي كعدوا يمي بس جان مبين عليهن ضايجات

نص ساعة واجة المصور

اخذتنا رغد الغير غرفة

داليا... كعدي رتو اعدلج المكياج شوفي شصار بيج من البجي

عدلولي مكياجي ونزعوني الكاب

رغد راح يدخل فارس والمصور

دخل فارس من شافني وكف كدام المصور

فارس.. خوية انتظرني ثواني برة

طلع المصور
رحمة الاهلكم غطوها حتى يدخل الرجال

سوسن... شنغطي منها ترى بدلتها مستورة قابل نلفلفها

فارس... غمضت عيني اطلب الصبر
خيتي شعرها طالع شلون تريدين رجال غريب يشوفو

سوسن... مدتشوف الطرحة مغطية نص شعرها عيني اذا متريدون تاخذون صور كولوا ليش كل شوية مطلعيلكم سالفة

رهف... همست النغم شكلنة راح ننطرد من ورا امج

نغم... هههههه لج سكتي وخليها اليوم قافلة عليهم

رؤى... فدوة العينها بردت گلبي بيهم

فارس... صفنت شسوي ياربي اعصابي تلفت

طلعت للمصور شفتوا رجال جبير
خوية من تاخذ الصور امانة الله ما أريد احد يشوفهن

دخل المصور واخذلنة لقطات جثير اني بس اريدو يخلص روحي طلعت

ريتال... كملنا صور فارس طلع ويا المصور بقيت بنفس الغرفة لان جانوا ديصبون عشى

نسرين... جيت يم داليا اخذوها فوك الغرفتها جهزوها لان بعد شوية الزفة

ريتال... من كالت جهزوها والزفة فزيت اذكرت كلام عماتي من كعدن يعلمني على هاي الليلة اني صح قبل عندي معلومات بس من حجنلي بالتفصيل انرعبت

اخذوني فوك تفاجئت البيت عبارة عن مشتمل  كامل غرفتين ومطبخ وهول وحمامات

دخلت الغرفتي جانت حلوة وذوقها راقي

ساعدوني البنات انزع البدلة وفكولي التسريحة

نغم... رتو ليش متروحين تسبحين وتخلصين من هذا السبري البراسج

ريتال... ياريت والله لان راسي ثكيل

رحت سبحت ارتاحيت جوة المي ورتخت اعصابي لبست البرنص وطلعت

داليا... لبسي هذا

ريتال... فتحت عيني لا عمة ما اكدر

داليا... رتو ميصير لازم تلبسي

ريتال... جان سيت نوم ابيض صح طويل بس بي فتحات جانبيات النهاية رجلي ومن الصدر والظهر مكشوف لبستة واني ميتة خجل
نشفولي شعري وشسوروا

نسرين اجت جابت احرام صلاة ابيض كالت من يجي فارس تصلون انتي ويا

ريتال... رحت اتوضيت

نسرين... يلا بنات تعالوا راح يصعد فارس

ريتال... من سمعت اسمة لزمت ايد عمة لا فدوة عمة لاتعوفيني

داليا... حبيبتي عيب خوما ابقة اهنا

ريتال... طلعوا وعافوني شلت لاحرام لبستة اريد استر نفسي

اقل من دقيقتين انفتحت الباب ودخل فارس بهذيج للحظة گلبي راد يوكف

فارس... بعدني ضايج بسبب الصور جنت بس اريد يخلص هذا اليوم على خير

صارت وكت الزفة
من فتحت الباب وشفتها مغطية نفسها ضحكت على سوالفها جانت خايفة  وترجف
محجيت وياها شي اخذت الدشداشة وطلعت توضيت وبدلت

فارس.. تعالي انصلي فرشت السجادة وهي تصلي  وراية

ريتال... جنت مرعوبة منه هم زين طلع بدل برة وكفت اصلي ورا هنا ركعتين بس اشو هذا يطول بيهن قريت نص القرآن وهو بعدة واكف

الحد ما خلصنة يمكن مبقيت اية مقريتها خرب لعد اني من اصلي ليش بسرعة اخلص عبالك واحد يركض وراي

من كملنة بقيت بالاحرام منزعتة رحت لجهة السرير الثانية ما اريد اكون قريبة منه

فارس... يولو شكلج راح تعبيني اليوم يابنت الحلال الناس منتظريني برة لاتشلعين گلبي

ريتال... حجيت بصوت يرجف ليش شمسوية اني  اجة يمي واني بس ادور مكان انهزم بي......

يتبع