فَجيـعه الدَهر الفصل الخامس عشر 15 - بقلم Hind Al taay

#فجيعة الدهر
بقـلم هِند الطائي

الحلقـه الثالثه عشر

* أعتذر عن التأخير ولكن الظروف أصبحت اقوى ..

ـــــــــــ
زينب الحوراء

وگفت بمكاني متصنمه منو إلي عاقد عليها رجعت بسرعه للغرفه الي بيها ساره اباوعلها نايمه دموعي تتسابق يمكن صح ما حبيته بس تعلقت بي صارت روحي بي أماني الوحيد هو
بقيت كاعده بمكاني لحد ما ندك الباب ودخل كنان مسحت دموعي تقربلي مبتسم حضني يمسح على راسي وگال:
ــ شلونها الحلوه ؟

همست احاول اتماسك:
ــ الحمد لله..

ابتسم وهز رأسه بقبول وراح باوع على ساره غطاها عدل نومتها طلعت أنا رحت للمطبخ اريد أرتب الاغراض جابوهن لكيت هشيم باوعلي كرصني من خشمي بخفه ابتعدت عنه شوي عقد حاجبه بس غلس بديت أرتب الأغراض وهو وياي يريد يساعدني وانا اتجاهله ماحسيت اله جارني لحضنه باوعتل مغتاضه منه عيوني مدمعه گال :
ــ شبيها حوريتي ؟

نزلت راسي رفعه وقرب وجهه من وجهي دغدغني بأنفه نزلت راسي ونزلت دموعي رفع راسي مستغرب وهو يگول:
ــ شبيج حبيبتي منو مضوجج؟

ــ عوفني

ــ تؤ متوهمه أنا اعوفج؟
احجيلي شبيج شو بالله ياهو محاجيج ؟

رفعت عيوني تلاگت عيوني وي عيونه همست بغصه:
ــ اريد نتطلك هُشيم

گلب عيونه بملل وگال:
ــ هرموناتج زادن حبيبتي

ــ ما جاي اشاقه وياك هشيم !

قربني اله أكثر غمضت عيوني اصبر روحي همست:
ــ كافي

ــ اشش ،تعالي راح تخبليني

جرني لوحده من الغرف فارغات حاوط وجهي بأيده شمر شالي فتح شعري نثره بأيده قرب خصله أخذ نفس عبالك الهوه وجاي يستنشقه رجفت بين ايده همس بأذني:
ــ ريحـتج حلوه چنها فرولايه

ــ لا تقشمرني بهذا الكلام

ــ امم حوريتي تتقشمر؟ لا عيوني هيه تقشمرني مو أنا اقشمرها

ــ صح وهسه عوفني ابو النسوان

ضحك من كل گلبه جرني باس خدي بوسه ام الصوت ابتعدت عاقجه ملامحي وانتر:
ــ شبيك شبيك

ــ مو أنا أبو النسوان خلي اراويج ابو النسوان شنو شغله ، بعدين منين جبتيها ابو النسوان؟

ــ تخوني؟ هسه حتى لو ما تحبني عادي بس ما دام وياك تحترمني مادام على ذمتك تحترم البنيه الي عاقد عليها .

رفع خصله من وجهي حطها وره أذني بأصبعه يمسح على رموشي يمرر أيده على خدي وحواجبي نزعجت حسيت يريد يضيع السالفه لزمت ايده بين أيدي وباوعتله وگلت:
ــ هشيم!

ــ عيونه حاله وماله

ــ أنتَ ضام عليه شي؟ گول عادي والله اتفاهم وياك طبيعي

حسيته توتر بعد عيونه عني يضيع عيونه من عيوني تجرئت ولزمت وجهه ثبتته وحطيت عيوني بعيونه وگلت:
ــ احجي هنا احسن من ما اطلع وإذا عرفت ضام عليه شي تنسى زينب الحوراء طول حياتك

گلتها وعفت أيده وطلعت من الغرفه لگيت كنان باوعلي وگال:
ــ زينب أنتِ الافضل ترجعين لأن گعدتج هنا وهيج و

قاطعته بهدوء:
ــ لأ كنان ساره أختي مستحيل اعوفها بهيج شّده ووضع صعب

ابتسم ومسح على راسي :
ــ روح أخوها وعمره

ــ حبيبي فدوه لعيونك

دخلت لساره شفتها كاعده رفعت راسها شافتني رحت كعدت يمها كرصت خدها وگلت:
ــ شلونها الحلوه؟

ــ الحمد لله ، راح تبقين يمي مو؟

ــ اكيد إذا ما اختج توكف وياج منو يوكف وياج لو منتظره أحد غيري ها؟

كلتها وگمزت ادغدغها كامت تضحك ارتاحيت من شفتها تضحك شوي ونامت نمت بصفها بدون ما احس غفيت من التعب حسيت على كنان يغطيني تلفلفت وكملت نومتي ما كعدت اله ثاني يوم على صلاة الفجر كمت طلعت توضيت اريد ارجع اصلي صار بوجهي هشيم باوعلي ورفع أيده وكال:
ــ الحمد لله يارب أصبح على هيج وجه أمنية حياتي جانت الحمد لله

فرحت بس مابينت ثگلت وجهي وردت اروح سحبني من ايدي وگال:
ــ زعلانه الحوريه علينا يايمه بنيتي زعلانه وانا ساكت؟

سكتت اباوعله شو هذا ما احس اله گعد بالگاع يدك وينحب عبالك ملايه ويُلطم ويصيح:
ــ ولكم بنيتي الحبوبه زعلانه طاح حظك كنان
كله بسببك يابويه يا حوريتي

زلغت خدودي وانا اتلفت خاف ساره لو كنان يكعدون :
ــ كوم هشيم كوم خزيتنا

ــ ماكوم ولچ مزاعلتني واسكت يايمه يابويه

ــ كافيي گوم

ــ بشرط

ــ شنو ؟

ــ تصالحيني

ــ اله تگلي الحقيقه يلا

لطم على وجهه وصاح :
ــ ولج يا حقيقه ؟

ــ ترا سمعتكم أنتَ وكنان من تحجون !

سكت گام يباوعلي اجه يمي لزم ايدي وكال:
ــ شنحجي؟ شسمعتي!

ــ اي وعاقد على بنيه أنتَ

ــ منين جبتي هلحجي؟

ــ گلي صح لو خطأ؟ صحيح أنتَ عاقد على بنيه حتى إذا صحيح اعرف شتصرف وإذا تجذب عليه والله ما اشوفك وجهي

بس گلت هيج بلع ريگه وهمس:
ــ صح أنا عاقد على بنيه قبل لا اعقد عليج

نزلت دمعتي بقهر وهضيمه همست بغصه:
ــ منو اعرفها؟

توقفت حواسي من نطق هلكلمات:
ــ آسيا بنت عمي ...

ــــــــــــــــــــــ
سـاره

ما چنت اعرف هاي اخر مره تلمع عيوني بفرح يمكن اخر مره ..بعد الصار وياي حسيت نفسي ثگيله لا أحد يريدني ولا شي هسه شنو حياتي؟
ـ رضا عيون الحياة بالنسبه هو الي كان يخليني اشوف الحياة حلوه وراح..بسبب إهمال امي اهملته إلى أن تمرض بالمرض الخبيث وما نعرف بي لحد ما وكع ليش صغير بعده مو مال گبور ، فقدت كلشي رضا وحياتي وياه
ـ صحاني من التفكير دخولي للشقه الي جابنه الها كنان سندني من جهه وزينب الحوراء من جهه حطاني على الكرسي وركض يجيب منا ويودي منا فرشلي فراش ورتب المكان واجه صاح زينب الحوراء سندتني وحطوني على الفراش
ـ راحت زينب ماعرف وين يمكن وي ابن عمها ..اقصد خطيبها لحد الآن ما مستوعبه زينب الحوراء انخطبت كلشي مر بسرعه
حياتنا تغيرت بلحظات كعد كنان يمي باس راسي وگال:
ــ محتاجه شي بعد ؟

همست:
ــ لا اشكرك تعبتك وياي

عقد حاجبه بأستغراب وگال:
ــ ما بيناتنا هلسوالف ، صرتي مرتي يابويه اسعد انسان على وجه الارض أنا

ابتسمت وگلت بحزن:
ــ بس اهلك ما تقبلوني !

ــ مو مهم

ــ شلون مو مهم ماريد تسوي شي من دون رضه اهلك مايصير ما نتوفق بحياتنا

لزم ايدي باسها قشعر جسمي گال بفخر:
ــ ابوس مرتي الواعيه

ضحكت على ربطه للموضوع وكلت:
ــ ماله علاقه بالوعي عيوني أنتَ بس رضه اهلك اهم من رضاي

ماجاوبني ، دخلت زينب سولفنا شوي وطلعت عافتنا براحتنا حط راسي على صدره ساند كتفي بأيده يمسح على شعري وكل شوي يتحسر حسيته ضام بگلبه قهر مال سنين كلت:
ــ ليش هلگد ضايج ؟

ــ لا عمري ليش ضوجتج ؟

ــ لا ابد

ــ خاف ضوجتج بالغلط اعتذر حبيبتي أنتِ

ابتسمت وگلت:
ــ لا حبيبي بس حسيتك ضايج اليوم

ــ اي والله شغلات شاغله بالي سوالف عمل ، راح. ارجع للدوام صارلي هواي ماخذ اجازه

ــ براحتك

ابتسم وباس راسي وحضني قوي احس عبالك راح اطير منه غفيت بحضنه مأمنه..
گعدت لگيته ما موجود ردت اكوم دخت رجعت كعدت بمكاني اللعب بألعاب رضا لحد ما دخل كنان بأيده صينيه حطها گدامي انواع الاكل خبط ، دجاج وتمن ابيض وسمج وروبه وسلطه وطرشي وخبز وصمون باوعتله فاتحه حلگي:
ــ شنو هاي؟

ــ اكل الج حبيبتي

أشرت بصدمه وگلت:
ــ هذا كله اني اكله؟

ــ اشبع بطونچ بعد بطني وجهالي

ــ منيلك جهال

ــ أنتِ كل جهالي ونساويني بس سكتي واكلي لا شنو اكلي تعاي اوكلج بأيدي

ضحكت وصدك گام يسويلي لفات بأيده ويوكلني بحيث لعبت نفسي اتوسل بي مايقبل اله اكمل الاكل اخر شي عطت:
ــ شبعت والله شبعت ونبي شبعت كنان عمري حبيبي حياتي شبعت عيوني والله

باوعلي وصغر عيونه بعدم تصديق وگال:
ــ صدك لو تجذبين عليه ، خاف بعدج جوعانه اجيبلج بعد؟

ــ لا والله شبعت اكل أنتَ

بدأ ياكل اكل كم لگمه وگام شال الصينيه وغسل واجه بأيده طاسه وبالقاعده صابونه جديده ما مفتوحه حطها گدامي باوعتله وگلت:
ــ شنو هاي ؟

ــ تغسلين عمري تعالي اغسلج

ــ بس أنتَ وكلتني ما توصخت ايدي

ــ ميخالف حبيبتي ، يلا مدي ايدج حتى الصابونه جديده خاف تلعب نفسج ادري بيج

باوعتله دمعت على حنيته حمدت ربي أخذ ايدي يغسلها بعنايه جلفها جلف بالصابونه زلغني تزلغ وغسل وجهي هم وأخذ المنشفه نشف ايدي بعدين جاب كلينس نشف وجهي
عنده صبر وتحمل فضيع اتذكر مره سألته:
ــ شلون متحملني؟

ــ إذا ما اتحملج اتحمل منو يابعد عيوني

رجعني للواقع من بأس ايدي وگال:
ــ الحمد لله

گام شال كلشي نظف المكان دخلت زينب تباوعله وتضحك گالت:
ــ شنو هاي عيني عيني دلال ماتدلل اختك هيج

باوعلها صفح وگال:
ــ هاي سارونتي

گالتله بزعل:
ــ وانا شنو؟

جرها لحضنه يبوس بيها وهيه تضحك شوي وطلع بقيت أنا وزينب نسولف ضحكتني ونمنا سويه من التعب ....

يتبــعع...

1500 كلمه🥹♥️...

ـــــــــــــــــــــــ
* أعتذر عمري هذا الي گدرت عليه لأن ظروفي ما تسمح صارلي فتره احاول اكتب وما اگدر كل كم يوم راح انزل بارت هيج طوله حتى ما اتأخر واختمها وهم انتوا ما تنتظرون .

حسابي الانستا

حسابي التيك توك

قناتي التليكرام مهمه جدا

الباقِياتُ الصَّالِحاتُ:

-سُبحــانَ الله
-الحمــــدُ لله
-لا إلهَ إلا الله
-اللهُ أكبـــر
-لا حَول ولا قوة إلا بالله
-سُبحــان الله العَظيــم
-سُبحــان الله وبِحَمـده
-أستَغفِــر الله وأتوبُ إليه
-اللهُمَّ صلِ علّى مُحمد وآل مُحمد