فَجيـعه الدَهر الفصل السادس عشر 16 - بقلم Hind Al taay

#فجيعة الدهر 🦅 🪶

بقـلم هِند الطائي
تصويت+تعليقات بين الفقرات لُطفا

الحلقـه الرابِعه عشَر

ـــــــــــــــــــــــــــــــــــــــــــ
زينب الحوراء

بلعت ريگي ونزلت راسي اخفي دموعي الي تنزل بحرگه وألم وقهر وكسره بس خفيت كل هذني ونطقت :
ــ تمام هُشيم تمام .

عفته بسرعه وطلعت رحت للصاله شفت كنان نايم رحت تقربت يمه اكعده اندسه بأصبعي ماكدر اصيحه بس احجي ابجي باوعلي وهو مفتح عين وگال:
ــ ها زينب ؟

ــ اريد ارجع كنان

ــ اي حبيبتي جان گلتي لهشيم يوصلج

ــ ماريد هو يرجعني اريد انتَ؟

ــ ليش روح اخوها ، هُشيم وين؟

ــ ماعرف .

بهل أثناء طلع هشيم من المطبخ باوعلنا وباوعلي توقع كلت لكنان بس نصدم وتحولت ملامحه للصدمه من كال كنان:
ــ مو هذا هشيم هو يوصلج

گال هشيم:
ــ وين اوصلها؟

ــ للبيت شبيك يمعود

باوعلي هشيم يريد يحجي ومتردد،انتبه النا كنان وگال مستغرب:
ــ شبيكم يمعودين شنو تستحون من بعضكم

تحمحم هشيم وگال:
ــ يلا ميخالف امشي

بلعت ريگي بللت شفايفي وگلت :
ــ كنان ماريد ارجع وي هشيم كلتلك !

عقد حاجبه بأستغراب وگال:
ــ مو مشكله اوصلج أنا خويه بس شنو السالفه اكو شي متعاركين؟

ــ لا قررنا ننفصل

فتح عيونه هشيم وكنان نفس ردة الفعل گال كنان:
ــ ليش احجيلي حبيبتي ضربج ؟ أكسر أيده والله صيح عليج؟ اكص لسانه

باوعت بعيون كنان وگلت مهضومه:
ــ متزوج عليه اقوى من الكل .

گلتها وغمضت عيوني الي يحرگوني ، فرك وجهه ونظرلي اعرف هو يعرف بالموضوع من سمعتهم گال:
ــ سمعتينا ؟

هزيت راسي بقبول ، اشرلي يمه وگال:
ــ تعالي گعدي

ــ اريد اروح

ــ بس گعدي افهمج وشتريدين يجرالج خويه حبيبتي

تأفأفت ورحت گعدت يمه على اعصابي باوع لهشيم وگال اله:
ــ اطلع برا

باوعله هشيم عقد حاجبه:
ــ شنو؟

ــ اطلع برا افهمها.

هز رأسه بحيره وطلع مأيس ، باوعت لكنان تقرب مني حط رأسي على صدره حاضني ما صدكت أحد يطبطب عليه بجيت اشهگ بحضنه تعبت وين ما اروح تنسد بوجهي اختبارك صعب ياربي صعب مسح على شعري باسني براسي لحد ما سكتت يلا بدأ يحجي:

نرجع ليوم الحدث:

ــ قبل سنه ونص نايم بليل ما اسمع اله صوت صياح بنيه حيل قوي ما ركزت بصوتها گبل طفرت اشوف شكو اباوع الصوت من غرفة هشيم بسرعه رحت دفرت البيت ودخلت الگه بنت عمي آسيا وهشيم نايم بصفها وهيه تصيح ولابسه لبس نوم رحت بسرعه دفعت هشيم وشمرت الغطه على آسيا وآسيا تصيح:
ــ يريد يـسويلي شي وخره وخره عني وخره

اباوع على هشيم مصدوم هذا بحياته ما لاعب ببنات العالم اباوعله مبين سكران گمت وجريته ضربته بوكسي وبنت عمي آسيا بس تصيح انداريت عليها :
ــ تردين تنفضحين بنت الحلو سكتي

باوعت من الباب طلعت اريد اسده صار بوجهي ضرغام منعس گوه فاتح عيونه عقد حاجبه بأستغراب وگال:
ــ شنو الصوت هذا؟

ــ لا يخوي نتشاقه أنا وهشيم

هز ايده وگال:
ــ عالم نايمه ما تستحون

سكتت ماكدر ارادده بس ارادد يدخل عود يرزل هشيم ونروح بيها عافني وراح سديت الباب قفلته باوعت بالكاع تجاه آسيا وكلت:
ــ خويه تستري وحاجيني شنو السالفه هذا سكران .

نطق هشيم بصوت متقطع :
ــ لا هيه اجتني عليمن تحاجيك حاسبه روحها امي تغطيني وتحضن

ــ اسكت لك خلي نفتهم منها .

هز ايده ووكع بالكاع شلته حطيتخ على جربايه باوعت باتجاه آسيا وكلت:
ــ احجيلي يبت عمي شنو السالفه؟

بدت تحجي :
ــ جنت نايمه كعدت غطيت البنات ومريت من غرفة هشيم كلت اشوفه موجود لولا لأن ردت احاجي بسالفه يحلها الي شفته نايم تقربت غطيته شو جرني عليه و..صار الي صار

ــ شصار؟

كال هشيم:
ــ شصار كلشي ما صار جذابه

صحت بي:
ــ اسكت يمعود فوك شينك گوات عينك

رجعت حاجيتها:
ــ شعندج بغرفته بليل جان تحاجينه الصبح والمن تغطينه ؟ امه اخته ابن عمج صحيح وبحسبة اخوج بس الغلط منج ومنه المن داخله بليل ومغطيته شني مايعرف يتغطه؟

ــ مو كلت خطيه مكشف يمرض

ــ طبه حريشي شلج غرض بي

ــ هسه شراح تسوي فدوه عمامي واهلي إذا يعرفون يذبحوني

ــ شنو سوالج شي؟

ــ اي .

انداريت باوعت لهشيم نايم بسابع نومه بسبب السم فهمت البنيه انو ما راح اعوف السالفه

ــ وفعلا اختصرلج انو ثاني يوم من صحصح هشيم حجالي والغلط منها وجايته وهيج وهو يكول ما سويت شي الها وهيه تكول لا سوالي اتفقنا يخطبها وخطبها بدون حفله ولا عرس عقد عليها كدام الأهل بحجة انو يحبها بس مايكدر يسوي حفله بحكم شغله واجيتي أنتِ من عرفنه بي يريدج شرط انو محد يحجي وإذا احد يحجي يطلك آسيا وهنا الطلاك عدنا عيبه لذلك سكتوا مع انو أنا ما سكتت وتعاركت وياه بس لو ما اعرفه ما اقبل والله خويه اعرفه لمصلحتج وداعت ابوي

نرجع لزينب الحوراء :
باس راسي كنان وگال:
ــ ها وهسه فهمتي؟
خيتي أنا وياج بكلشي تقررينه تردين تنفصلين من هشيم يجرالج تبقين يجرالج

گلت وانا اشهگ:
ــ ليش ما حجيتلي من البدايه جان ما قبلت ليش هيج خليتني اله يعقد عليه يلا حجيت؟
جنت ضد انو بنيه تكون زوجه ثانيه على ضره وتهجم بيت طلعت أنا هسه هاجمه بيتها بنظرها

ــ لا خويه كولي يا الله اعتذر الغلط مني اعتذر وداعتج شتردين يجرالج

ــ يطلگني .

ــ يجرالج خويه

ــ وهسه اريد احجي وياه على انفراد

ــ الج هاهيه ، هسه اصيحه واروح اجيب غده من بره واجي اخذوا راحتكم هزيت راسي بقبول

گام طلع بسرعه گمت لزمت عباتي لبستها وجفوفي هم ورجعت مكاني گاعده على نار أنا الي اخاف من الحرام واخاف اقهر احد وما بعمري قاهره أحد وانقد الي يتزوجن على راس مره اصير منهم جنت خايفه منها تهجم علاقتي بهشيم طلعت أنا هاجمه علاقتها بهشيم يا حسرتي ما يوم ارتاحيت،دخل هشيم بلهفه يباوعلي عقد حاجبه من شافني لابسه عباتي والجفوف بسرعه تقدم كعد بصفي ابتعدت عنه مسافه گال :
ــ ردتي تحجين وياي حوريه ؟

تحمحمت وگلت :
ــ اي ،اريد احسم الموضوع .

ــ احجي ياروحي احجي كلماتج بلسم على روحي

ــ هشيم أنا ماعمري سويت حرام عدا من اجيت يمكم كمت تلزمني وبسببك كسبت اثام وكم مره أنا هم غلطت الإنسان ما معصوم من الغلط لكن للغلط حدود ، أنا ما بحياتي مفكره انزل على ضره ولا اهجم بيت وجنت خايفه من نظرات آسيا تهجم علاقتي بيك طلعت أنا هاجمه علاقتك بيها شنو ذنبها وهيه تشوف زوجها يتزوج كدام عيونها ؟ شنو ذنبها وهيه تشوف زوجها يحب غيرها شكد ما احبك راح ادوس على گلبي ونهاية الموضوع هسه تجيب سيد ونفسخ العقد رجائا ما اتحمل ابقى دقيقه وحده على ذمتك .

باوعلي ساكت يبلع ريگه مسح عرق جبينه وگال:
ــ مستحيل اعوفج راح اطلگها هيه

فتحت عيوني بقوه وكلت:
ــ إذا تطلكها تحلم احجي وياك ، اريد تكسرني فوك كسرتي تريد تضرب عصفورين بحجر

ضرب أيده وگال:
ــ لج هيه تريد تهجم بيتي وتكسرني والله تعرف احبج ومتعلق بيج بدون ما اشوفج الليل كله حاط صورج وأنتِ صغيره وحاضنهن وانام والله ما متقربلها عمي والله ما متقرب هيه مادري شمسويه وذبتها براسي بعدج ماتعرفيها تفر دول بافكارها لج أنا ما. جاي يمها وانا ما هاويها عمي ماريدها وأنتِ مستحيل اعوفج كل عقلج

ــ وانا شنو دخلني المهم صرت ضره على بنيه مهما يكون وانا مستحيل اقبل هيج كلام .

ـــ أنتِ الاولى والاخيره أنتِ الماتجي بعدج ولا قبلج مره اروحنلج فدوه استوعبي ماكدر اعوفج صرتي بالنفس

ــ هشيم عبالك سهله من اكول طلگني؟
ترا انا تعلقت بيك ولكيت الامان بيك بس ماكدر أكسر بنيه اصلا هسه كسرتها بما فيه الكفايه ولازم من عرفت اكون واعيه واعرف اتصرف واخاف الله بيها شنو ذنبها

ــ ولج بويه غير هيه ذبت روحها صدگيني بروح ابوج صدگيني

نزلت راسي مغمضه عيوني حايره ماريد مجرد افكر انزل ضره على راسها لازم انهي كلشي وبنفس الوقت افكر أنو يجوز فعلا الغلط منها وارجع اكول شنو ذنبها تشوشت حيل تقرب مني رفع راسي يريد يحضني نترت أيده :
ــ كافي هشيم كلت طلگني يعني ليش تخليني اگول لكنان وگوه تطلگني؟
ونرجع اخوان و..

ضحك وكال:
ــ يا اخوان ؟ ليش احنا چنه اخوان؟ ولا يوم اعتبرتج اختي ومتأكد أنتِ هم فـ لا تحجين حجي ما نگدر عليه احنا الاثنين طلاگ ما اطلگ وزواجنا هل شهر استوعبي دارت السنه مال رضا بعد ما عندج حجه وآسيا اطلگها غصبا على الكل لأن أنا من سمعت بيج جايه كلتلها اريد اطلگج وهيه تلعب من وراي عبالها ما اعرف تصاحب وعندي ادله عليها تتكفه شري

ــ استغفر الله هشيم استغفر الله لا تطعن بشرفك حرام شبيك أنتَ تخبلت؟

ــ اي بيج ، هسه گليلي حبيبتي يا يوم بهل شهر يصير زواجنا لازم يوم مميز

ــ يا زواجنا قصدك طلاگنا

ــ تحلمين عمري ، تعالي وياي رتبت اموري وراح تبين الحقيقه لأن عرفت راح تكون ردة فعلج هيج

ــ يا أمور ؟

رفع تلفونه واتصل شوي وانفتح الخط اجه صوت آسيا فتحت عيوني اشرلي اسكتي وگال:
ــ آسيا

ــ ها حبيبي

نزلت دموعي بس كالت ها حبيبي حقها غير زوجها قبلي

ــ انلصمي لج يا حبيبج عبالج ماعرف مصادقه ك**** من وراي كلها وصلتني واليوم حي على الصلاة اطلگج أساسا ما عاقد عليج محكمه بس شيخ لأن اعرفج مو ادميه

توتر صوتها وكامت تتأتأ:
ــ يـ..يا صُـ..صُحبان شبيك هشيم كلشي ماعندي لو بسبب هاي الحيه اصلا زين مني ما كلتلها لحد الآن

فشر عليها فشار قوي سديت اذني وخزرته:
ــ تاج راسج سمعي لج مرتي تسمعج إذا ما هسه تعترفين انت ذبيتي روحج عليه وبليتيني كدام كنان عندج يمي صور محادثاتج وأنتِ دازتهم لـ****چ واخزيج تخزي اخلي اليوم يحيرون على ايد منو تنذبحين كلت بنيه واسترها بس تماديتي

گالت بتلعثم :
ــ لا تجذب ما مسويه شي .

سد السبيكر وكام من يمي مادري شحجه وياها ورجع فتح سبيكر اجه صوتها:
ــ لا عفيه الله يخليك زين بقيني على ذمتك وعادي اتزوجها والله ما احجي بس لا تفضحني ولا تطلكني فدوه اروحلك ابوس رجلك

ــ امشي لج صار ساعه تهددين ، المهم حضري روحج راح اجي اخذج ونروح نطلگ وتفض السالفه هاي العوجه وهسه احجي شسويتي لا فضيحتج على أيدي مثل ما گتلج قبل شويه

بدات تحجي صدمتني بوقاحتها:
ــ اي صحيح اني دخلتله للغرفه وحضنته واني سويت كل هلسالفه حتى يتزوجني لأن اني مو بنيه و..

ــ اشش يلا سكتي وحضري روحج جاي حتى افسخ العقد وإفسخ روحج وياه

ــ لا ..

بعدها ما مكمله سده بوجهه اندارلي وكال
ــ ها هسه عرفتي منو غلطان

سكتت وكلت:
ــ ماعرف .

باوعلي بصدمه ضحكت على شكله نقهرت عليه هو سترها كل هلسنين وهيه شتسوي من وراه كام يدغدغني يضحكني وكال:
ــ هسه شنو شوكت موعد عرسنا ؟

ــ قصدك طـ....

دغدغني وگال:
ــ لچ لا تگوليهاا

ضحكت وگتله :
ــ اممم احنه هسه بشهر ١١ يوم٢٩ خلي يوم زواجنا يكون ١٢/١٢ شنو رأيك؟

ــ هواي خلي يوم ١٢/٢

باوعتله بصدمه وگلت:
ــ لااا هشيم ما الحك فدوه

باسني براسي وگال:
ــ يجرالج هاهيه تاريخ عرسنا ١٢/١٢......

ــــــــــــــــــــــــــــــــ
سـاره

كعدت لكيت كنان يم راسي يتمتم بأيات وحاط أيده يمسح على راسي ابتسمت وگلت:
ــ شجاي تسوي حبيبي؟

باس راسي بهدوء وكال:
ــ صباح العافيه والطاقه الايجابيه سارونتي ، اقره آيات عليج

ضحكت وگرصت خده ضحك وكال:
ــ ولج شنو بنيه وتگرصين خدي

ــ لاا شنو لعد بس البنات نگرص خدهم حتى الشباب

عضني من ايدي وگال :
ــ ولج يا شباب تعضينهم من ايدهم

ضحكت من كل گلبي صفنت وگلتله:
ــ كنان ؟

ــ كل عمره أمريني عزيزة كنان

ــ اريد اسويلك تسريحه بشعرك

عقد حاجبه بأستغراب وگال:
ــ شلون تعرفين؟ ولازم سبري وسشوار وهاي دوخه

ــ لا عمري ماحتاجهم

ــ چا بالتفال تسوين التسريحه بويه؟

ضحكت وگلت:
ــ لا اريد اسويلك ستوتات

باوعلي بصدمه وگال:
ــ ها؟

ــ شنو عمري؟

ــ شنو ستوتات ولج ششايفتني خليتيني اشك بروحي

ــ حباب

ــ لا شبيج تخبلتي بويه صدك جذب تاليتي اسوي ستوتات عمري راح يطگ الثلاثين

ــ لا تكذب بعدك ٢٧

ــ شباقي؟ على هل سنتين ثلاثه عمي ستري عليه

ــ اهوووو ماتريدني افرح دائما تضوجني

ــ انا اضوجج؟ودائما؟

ــ أقبل اسويلك ستوتات وبعد ما اطلب شي حباب

باوعتله بنظرات بريئه وبسته بخده على السريع وهمست:
ــ ها حباب؟ كناني؟

ــ حتى الدلع ما لايك يلا امري لله عمي سويلي

ــ الله احبك احبك احبك

ضحك وهز أيده يمكن بگلبه يگول شنو هلمخبله نام على رجلي وبديت اسويله ستوتات واثبتهن بقراصات مو لاستيكات لأن ماعندي وهو گبل نام على رجلي كيفت بكيفي اسوي شعره كملته باوعتله طلع حلو والله
دخلت زينب الحوراء باوعت لكنان ستوها رادت تضحك بصوت عالي اشرتلها اشش سكتي وكلت بهمس:
ــ جيبيلي مكياج عندج؟

ــ يا منيلي

ــ ههفف اريد اسويله مكياج

ــ صخام الصخمني تريدين تمكيجين اخويه ؟

ضحكت كل قوتي على ردة فعلها ....

يتبـعع...

20000كلمه🥹♥️...

ـــــــــــــــــــــــــــــــــــ
البارتات بعد هيج يكون طولهم وبعد كم بارت نغلق أبواب فجيعة الدهر...

البارت خفيف لطيف وكلش حلو وساره فقرتها اقصر لأن قصتها قربت تنتهي ..

حسابي الانستا
@hiz_lii0

قناتي تليگىام موجوده بباقي البارتات .

الباقِياتُ الصَّالِحاتُ:

-سُبحــانَ الله
-الحمــــدُ لله
-لا إلهَ إلا الله
-اللهُ أكبـــر
-لا حَول ولا قوة إلا بالله
-سُبحــان الله العَظيــم
-سُبحــان الله وبِحَمـده
-أستَغفِــر الله وأتوبُ إليه
-اللهُمَّ صلِ علّى مُحمد وآل مُحمد