فَجيـعه الدَهر الفصل الثامن عشر 18 - بقلم Hind Al taay

#فجيعة الدهر 🦅 🪶
بقلم هند الطائي

تصويت+ تعليقات بين الفقرات
الحـلقه السادِسه عشر ..

ــــــــــــــــــ

زينب الحوراء

باوعت لكيت هشيم تنفست حاطه ايدي على راسي عبر بسرعه واجه يمي وكال:
ــ ها حبي شبيج

رفعت راسي ايدي على گلبي الي ينبض بسرعه فائقه وگلت :
ــ صدك تحجي هشيم وكفت گلبي عبالي غير احد

سحبني لحضنه يضحك باس راسي وكال:
ــ يابويه اسم الله على گلبج شحده اليوصلج يابعد عيوني

ابتسمت بخفه اهدي روحي جر ايدي شمها حيل وباسها بقوه وگال:
ــ أنه فرحان ولخلقنا طاير بيج طاير منتظر شوكت يجي يوم ١٢/١٢ شو طول

ــ أنا بالعكس خايفه احس

باوعلي عاقد حاجبه بأستغراب وگال:
ــ ليش خايفه ؟

ــ ماعرف بداخلي خوفه صغيرونه
واشرت بأيدي هلگد

ايديه حاوطن وجهي باوعت بعيونه وهو كذلك وگال:
ــ لا تخافين وأنه يمج !
كلشي سويه عديناه بقت الخطوات الأخيرة عديها بلا خوف لأن انه ماعوفج للچفن

همست:
ــ اسم الله لا تحجي هيج بس قصدي انو حياة جديده وهيج

ــ لا ما راح تتغير حياتج عادي نفس الشي حتى خدامه اجيبلج لا تنظفين ولا تطبخين كلشي ماريد منج بس اكعد واباوعلج

ضحكت وگلت:
ــ شنو أميرة زماني

باس عيوني وكال:
ــ اميرتي وملكتي وروحي وحياتي وحوري وزينبي و وردتي وكلشي بحياتي

ابتسمت بخجل وگلت احاول اغير الموضوع :
ــ يلا هشومي روح روح عيب

ــ شنو العيب؟ مرتي وجايها لا تخليني أخذج واشرد بيج

فتحت عيوني وهو يضحك باس باطن ايدي وحطها على گلبه :
ــ ولج يايابه سودنتيني هسه شسوي أنا ها؟

سويت حركه بشفايفي بمعنى ماعرف گمز يگرص خدودي ويجعص بيه وانا اعيط بهمس لا يكعدون:
ــ لاا عزه و..خر

ضحك وحضني دفعته زعلانه باوعلي وكال:
ــ هااا

دفعت أيده ودرت وجهي اجه من الجهه الثانيه درت وجهي على الجهه الاخرى وهكذا..إلى أن مل وثبت وجهي بأيده وكال:
ــ شو زعلت زينبي الحلوه ؟

ــ وخر وخر هو هيج تگرص بخدودي متت يوجعني والله شبيك ترا انطيتك مجال

ــ يابويه حوريتي انطتني مجال يابويه وانا ماكعدت مثل الحباب ، هسه شسويلك وترضى؟

ــ ماريد منك شي روح روح

ــ لا تعال اغنيلك

گالها ويريد يسحبني لحضنه نترتها :
ــ عمي عوفني چلبت بيَّ

خزرني وسحب ايدي اريد أجرها ماكدر گعدت مستسلمه وهو بدأ يغنيلي ويسرح شعري بأيده:
ــ حبيبي نيتي اگضي وياك عمري
وأتهنىٰ بوِصالك..
يالحُبك فُرات وعذب يجري
من دجله جمالك.

ــ هشومي

ــ عيونه وكليته وگلبه وروحه يابعد روحه

ضميت وجهي بأيدي:
ــ هسه شبيك تخجل بيَّ خليني احجي كلمتين

ضحك وكال:
ــ احجي يالبعدج المفروض محد يحجي احجي

ــ روح هسه حتى اكعد من وقت حتى اروح نجهز لزواجنا

جر خدي باسه بلهفه وكال:
ــ بويه اروح سبع فدوات لكلمتج

ــ شنيه كلمتي شكلت هسه اني

ــ زواجنا لو هيج نغمات الصوت لو ما تنراد

ضحكت بصوت عالي سد حلگي بسرعه شوي من تأكد سكتت وخر أيده :
ــ فضحتينا هجولتينه بت الاوادم

ــ شبيك استهترت شنو نغمات الصوت شعندك تلفوننن ويلا كافي روح حتى باجر نطلع يلا

ــ خوش فكره راح انتظرج بالسياره بره اول ما تكعدين نطلع نجيب البنات ونروح

ــ لا هشيم بليل بارده الدنيا شبيك روح لبيتكمم

ــ ماعندي بيت بس وياج يصيرلي بيت

ــ خلصت؟ يلا روح

باوعلي صفح وكال:
ــ صوجي مو مال رومانسيه ابد

گام وهو يضحك وطلع من نفس الشباك اشرلي بأيده باي وشمرلي بوسه ضحكت وسديت الشباك
وكعدت اكمز من الفرحه احس شئ ببطني فراشات بس ما اعرف تدوملي هلفرحه لولا ..

ـــ
كما قُلت :
عم الفرح لو لاح يومين ويغيب
مثل الورد لحظه يعطر ويشيب..
ــ هِنـد الطائي
ــــ

كعدت ثاني يوم على دگة الباب فتحت عيوني اتثاوب نعسانه كلش مانمت من وكت من وره هشيم گمت اتطوطح فتحت الباب لكيت ساره ابتسمت بوجهه ردتلي الابتسامه بنشاط وكالت:
ــ يلا عروستنا الحلوه خطيبج منتظرج جوه عيني

فتحت عيوني بصدمه وكلت:
ــ شنو بعدني ما مبدله مامسويه شي

ــ هو أجيت حتى اجهزج روحي بوجهج للحمام غسلي وتعالي بسرعه

ركضت على الحمام غسلت وجهي وتوضيت وطلعت لكيتها منتظرتني:
ــ بس اصلي ساره

ابتسمت بهدوء :
ــ حتى وأنتِ مستعجله تذكرتي صلاتج

ابتسمت وگلت:
ــ الصلاة هيَّ جسري الوحيد بين الأرض والسماء شلون اتركها؟ حتى استحي اتأخر عنها رب العالمين كلشي منطيني عوضني بأنسان الحمد لله جاي اعيش اجمل ايام حياتي وياه أخذ اهلي انطاني هشيم رغم ما يتساوى وي اهلي اكيد لكن يجوز اذا عاشوا نعيش بضيم وقهر ، خلاني مستوره وسخر الي قلوب عباده

قاطعتني بكلامي:
ــ شنو سخرلج قلوب عباده مافهمت؟ قصدج هشيم!

ــ مو ضروري يكون معنى الجمله هشيم وبس لا سخرلي قلوب عباده ، محبة الناس الج وقبولج وكلشي حلو بيج ويمدحج الناس بي هاي كلها فضل ونعمه من رب العالمين الي خله بيج قبول بشكلج وكلامج وشخصيتج
لذلك لازم كل يوم عند الصلاة تكولين
اللهم سخر لي قلوب عبادك

ابتسمت وكالت:
ــ حلو كلامج زينب هنيال هشيم بيج

ابتسمت وبديت اصلي اكملت صلاتي وقريت دعاء يسهل امري وبسرعه گمت بدلت ولبست عباتي مال راس وطلعت ما لكيت كنان سألت ساره كالت راح خلصت اجازته ضجت ، طلعت لهشيم لكيته واكف يم السياره اول ما شافني ابتسم تقدم وكال:
ــ طالعه حوريه ، يلا روحي بدلي وتعالي بسرعه صارلي ساعه هنا

ــ شكرا ، شبدل مبدله لابسه عباتي وهاهيه

ــ والبوشيه؟

ــ لا تخبلني هشيم تعرف أنتَ انو أنا جنت بس بشغلي اللبس بوشيه من اطلع ماللبس

ــ ماكدر حبيبتي ماكدر يشوفوج هيج عود؟ وجهج يضوي من العبايه وعيونج ويركزون بيج

تحولت ملامحه للعصبيه وكال:
ــ روحي لبسي هذا الي ينزل على وجهج ومايبين شي بس عيونج شسمه؟

ــ شبيك أنتَ شبيك؟

ــ بيه أنتِ روحي لبسيها زينب الحوراء

استغفرت ربي وتعوذت من الشيطان دخلت لاكتني ساره عاقده حواجبها:
ــ شبيج زينب ليش رجعتي

گلت بعصبيه:
ــ لأن حضرة الاستاذ يريدني اللبس النقاب وهو يعرف بس بشغلي جنت اللبسها

ابتسمت وكالت:
ــ تعوذي من الشيطان حبيبتي ولبسيها يغار عليج فـ مايكدر يشوفج هيج تطلعين ياعيني

ــ شيغار ترا عباتي عريضه وطويله وحتى الكعب طويل ما تبين ابدا رجلي بقى بس وجهي والربطه نازله يعني حتى ما مبين شي من جسمي

اجت يمي تمسح على راسي بحنيه وكالت:
ــ زنوبه الحلوه أنتِ شكلج كلش مقبول وجميله ولهذا هو يغار عليج وهم لأن أنتِ مرته وحقه يغار على مرته!
تعوذي من الشيطان وخلي اليوم يعدي على خير ولبسي النقاب

تعوذت من الشيطان وشفتها فعلا ما تسوه رحت لبست النقاب عدلته بينت بس عيوني ماحطيت مكياج طلعت بدون اي شي ابتسمت ساره من شافتني وكالت :
ــ الله يهدي سركم حبيبتي

ــ راح تبقين وحدج سارونه

ــ ميخالف اقفل كلشي وأنتِ أخذي راحتج مو لأن وحدي فـ تتقيدين ترجعين بوقت محدد لا بكيفج عمري

بستها ضحكت وطلعت لكيت هشيم ما باوعتله بس مبين مبتسم فتحت الباب لنفسي قبل لا يفتحه وصعدت هو هم صعد وكال :
ــ انوب طلعن عيونج كارثه شحاطه لرموشج!

ــ شبيك ترا والله هسه انزل ماحاطه شي فوكاها

ــ شبيج عيني شگلنالج

اخذت نفس احس راح انفجر هو هادئ وانا نار من وراه مشينا وهو شغل قصيده :
ـــ أَشتمَك هَوى..
و من غيره أختنك
شما ريِح الوكت صافي
يأ أجَمل اسم بل حب
لا تضن غير اسمَك على اشفافيِ
كافي من العشك
كالُولي كَبرت منكَ ماكلت كافي،
لاجلك سافرت لو نار الدرب والله امشي الدرب حَافي..

بقت تنعاد إلى أن وصلنا وهو حاول يحجي وياي بس ماريد شنو ضجت منه حيل رغم ما سوه شي هواي بس هم ضجت وصلنا گال :
ــ تنزلين تسلمين غير؟

نترت:
ــ طبعا .

استغفر ونزلنا راح قبلي دك الباب فتح الباب
ف

تح الباب ضرغام عقد حاجبه بعصبيه هشيم تحمحم ضرغام وكال:
ــ تفضلوا

دفع الباب هشيم وسحبني ودخلنا استقبلونا البنات بالهلاهل استغربت بس لأن راح نجهز عرسنه سألت على بيبي صفيه كالولي بالغرفه رحت دكيت الباب ودخلت لكيتها على سجادتها تسبح ابتسمت رفعت راسها وجهه كله نور واحس راحه من اباوعلها رفعت أيدها وكالت:
ــ يمه هلا بزنيبه هلا گطعتي بيه يايمه

ركضت لحضنها ابجي وهيه تطبطب على كتفي وتكول:
ــ بت الغالي يمه غاليه بت غالي شلونج زنيبه يمه؟

ابتعدت امسح دموعي:
ــ الحمد لله بيبي

ــ خوما هشيييم ضارج ها يمه ؟

ــ لا والله بيبي بس هسه زعل مادري شبي

ــ زعل؟ شني زعل ولج شمسويتله يا طايحة الحظ

ــ ها ها بيبي مو عساس توگفين وياي

ــ علغلط اهمداج انتِ وبيبتج

ــ گلبتي عليَّ..

نفتح الباب واحنا نسولف باوعتله هشيم رجعت درت راسي كال:
ــ السلام عليكم حجيه

فتحت ايدها بيبي تهلي بي ابتعدت عنها :
ــ هلا بيبي هلا يمه شبيك شو لونك مو مثل گبل

ــ متعوب حجيه متعوب

عوجت حلگي ما عاجبني ، گالت بيبي تزيد الطين بله:
ــ اي حگك هاي الطايحة الحظ متعبتك بس أنتَ تعال شنهي تزعل چا أنتَ المره لو هيه ؟

باوعلي خزرني خزره نشليت بمكاني وكال:
ــ لا ما زعلان شنو زعلان هيه تزعل لأن اكلها لبسي بوشيه يده تقبلينها الستر صار موزين؟

باوعتلي بيبي صفح وغمتني:
ــ اها انه اكولن عليج مستوره وخوش مؤه طلعتي موش هينه اهمداج

ــ بيبي شبيج وياي اليوم بس تغمغمين بيه

باوعتلي صفح وتدردم عليه عفتهم وحدهم وطلعت اول ما طلعت نسحبت من ايدي باوعت ميسنه:
ــ خرعتيني الله يخرعج

ــ اوي خرعتها بعد ما اجي يمج هيج تكطعين بيه ولج؟

ــ دسكتي صارن بيه بلاوي

ــ احمم شنو سولفي؟

باوعتلها بضحك وكلت:
ــ امشي روحي للمطبخ وانه وراج بس اغسل

ــ ماشي

راحت وانا صعدت فوك لغرفتي فتحتها اجتني ريحه مو طيبه بسرعه نزعت عباتي وغيرت الفرش ونظفت الغرفه على السريع مسحتها ورشيت معطر هسه يلا صارت ريحتها طيبه
غسلت ولبست عباتي ردت اطلع صارت بوجهي اسيا باوعتلها صفح وكلت:
ــ خير ياطير؟

دفعتني ودخلت وسدت الباب وگالت:
ــ هسه اراويج الخيــر .....

يتبـعع...

ــــــــــــــــــــــــــــــــ
السلام عليكم حورياتي البارت مابي فقرة ساره لأن راح تنتهي قصتها والاهم هسه قصة زينب الحوراء

التأخير الي جاي يصير بسبب دراستي بس أن شاء الله ماكو تأخير ادعوا انزل من وكت حتى اخلص الروايه

تريدون جزء ثاني لفجيعة الدهر؟

حسابي الانستا
h

iz_lii0

قناتي التليكرام

الباقِياتُ الصَّالِحاتُ:

-سُبحــانَ الله
-الحمــــدُ لله
-لا إلهَ إلا الله
-اللهُ أكبـــر
-لا حَول ولا قوة إلا بالله
-سُبحــان الله العَظيــم
-سُبحــان الله وبِحَمـده
-أستَغفِــر الله وأتوبُ إليه
-اللهُمَّ صلِ علّى مُحمد وآل مُحمد