فَجيـعه الدَهر الفصل التاسع عشر 19 - بقلم Hind Al taay

#فجيعة الدهر 🦅🪶
بقـلم الكاتبه هِند الطائي
تصويت+ تعليقات بين الفقرات

* هذا البارت هديـه لكن ينحسب بارت خامس

الحـلقه الخامِسـه

ـــــــــــــ
زينب الحوراء

وگفت بمكاني ما اتحرك ما سويت اي ردة فعل
خابت ملامح كِنان وهو يشوفني واگفه بدون ما اجي اله ولا حتى احجي نزل أيده ونزلت دمعه من عينه باوع على هُشيـم وگال:
ــ ما تــريدني گتلك يجوز ما تتقبلني وصدك ما تريدني

ـ ركضــت صعدت فوك بدون مقدمات بدون حتى لا اسمع كلامه دخلت الغرفه وسديت الباب گعدت بالگاع دموعي تنزل بهدوء ياربي ليش كل ما احاول اكون قويه يجي شي ويهزمني!..

ـ تعبت من كلشي من شوكت عندي اخ؟
وين جان عني قبل ليش جاي يجبروني على كلشي على عمامي على گعدتي هنا وهسه سبحان الله صار عندي اخ...

ـ رحت على الجربايه حطيت راسي على المخده وما اعرف شلون غفيت...احس بأيد تمسح على راسي فتحت الباب على كيف لگيته كِنان گمزت رجعت ليوره

ـ مشاعر مختلطه خجلانه ما متعوده احد يجي يمي ضايجه ما اعرف ما اعرف اي شي
باوعلي بحزن من ردة فعلي وگال:
ــ لا تخافين أنا اخوج ما راح اسويلج شر !

هزيت راسي بقبول وبقيت بمكاني تنهد بقهر وگال:
ــ ما متقبلتني مو ؟ تكرهيني من عرفتي اخوج أنا ؟ حتى بوجهي ما تباوعين

ـ غمضت عيوني بصبر حتى لا اصرخ لان تعبت
سكت هو هم فجأة نزلت دمعتي وفضحتني ما حسيت غير كنان حاضني وكتفه يهتز ادركت جاي يبجي رفعت ايدي متردده احضنه لولا بس رجعت ايدي ...
ـ يبجي ويقوي بحضنته نزلت دموعي مختنگه كلش اختنكت من الوضع دفعته بكل قوتي وصرخت :
ــ عوفنــي لا تحضـني ديربالك تتقرب هسه جاي مسوي نفســـك اخويه !
وينــك كل هل سنين لو بــس بالاسم !

اجوي على صياحي دخل هُشيــم والولد وراه الكل تجمع عند الباب ماهتميت وكملت كلامي وكنان حتى فكـه صار يرجف من شكد ما متماسك:
ــ وينــك من طلعت ابيــع بنص الطريق ببسطيه وينــك من يهينوني وينــك من نضربت وينــك من نمت ليالي بالمستشفيات وينــك من انام بالليل ودمعتي على خــدي وينــك من أنوكل حقي وينــك من يمنــون عليَّ بالربع وادنگ حتى اشيــله ؟
وينــــك بكــل هذا وينــكم ليش هســه طلعتوا ليــش ماريدكـــم ماريد احــد !

صرخت اقوى بأخر كلماتي ووكعت على الگاع منهاره ابجي اجه كنان حضني وگعد وياي بالگاع وهو يبجي وانا ابجي ابجي واضرب بصدره:
ــ عوفني تعبتوني كلهم تعبتوني ...

گال بصوت بي بحه من البجي:
ــ أنا اســف على كلشي مريتي بي أنا نـذل صحيح ما جنت يمج بس بعــد سندج والله فنه ليوصـلج اموتــه والله اسف ..

ـ بقه حاضني حسيت احد وكأن گلي ابجي كل الي بگلبج طلعي بجيت بجي محد باجي قبل البنات يبجون على بجيتي والولد عيونهم مدمعه ما حسيت اله نايمه بحضن كنان ...

ـ گعدت العصر ثاني يوم لگيته منومني على رجليه ونايم وهو منتچي على رأس الجربايه نكسر خاطري عليه رجليه اكيد خدرن ونايم بطريقه غلط.. گمت على كيفي توضيت وصليت صلاة الظهر كملت صلاتي ونزعت الصايه ولبست شالي ونزلت جوه

لكيت البنات كلهن باوعتلي ميسنه وگالت:
ــ هلا هلا بزوزه شلونج ؟
ابتسمت وگلت:

ــ الحمد لله

ــ دوم أن شاء الله يلا تعالي ساعدينا خلصت مدة ضيافتج

ضحكت وگلت:
ــ تدللين

صاحت فداء:
ــ ولج ميسنه البنيه ستوها اجت خلي ترتاح

صاحت ميسنه:
ــ شنو كافي ارتاحتت ، باوعتلي وگالت

ــ يلا ارتاحيتي مو زنوبه مو؟؟

تحجي وتغمزلي متت ضحك عليها انتبهت هُشيـم يباوعلي ابتسمت اله خزرني ودار وجهه هذا شبي أوي شعليه بي صار الغده التمينا كلنا كالت بيبي:
ــ يمه زنوبه صيحي لأخيج خلي ياكل

هزيت راسي وگمت صعدت فوك دخلت لكيت كنان بعده نايم تقربت ندسته بكتفه وگلت:
ــ كنان..كنان ...

ماحسيت اله صاح:
ــ روح كنان زنوبتي اختي الحلوه
وگمز يگرصني شلع خدودي بعدين گام يدغدغني متت ضحك وادفع بي واصرخ:
ــ لااا كنان ابو كيان عوفني يبــوو حبيب ساره عوفنـ...

ضربني على راسي بخفه وعاط:
ــ لا تفضحينه يمعوده زنوبه العلم

ضحكت وگتله:
ــ يلا ننزل تره صبوا الغده

گرص خدي وگال:
ــ احلى غده وياج زنوبتي

ابتسمت ونزلنا جوه تفاجئوا من شافونا نضحك گالت نيروز:
ــ اخيرا اخيرا

ابتسم كنان بفرح وگال:
ــ اي رضــت بنيتي

اكتفوا بالابتسامه فرحانين بدينا تاكل رفعت راسي باوعت على هُشيم وعوجت حلگي عود شبي هذا انتبهلي وخزرني بس يخزر أو خرزات مو خزرات تأفأفت انتبه كنان وگال:
ــ شبيج حبيبتي ؟

گتله بهمس:
ــ مابيه شي حبيبي

هز رأسه وكمل اكله ، گالت بيبي:
ــ باجر تعزمون ولدي كلهم حتى يشوفون زينب ويتعرفون عليها

هز رأسه عمي بلال وكال :
ــ صار يمه تدللين ، بس البنات ناخذهن لو نبقيهن يمج!

گالت بيبي بحزم:
ــ سمعوني زين ميســنه ونيروز ما يتحركن منا
يبقون يمي

كال عمي حكيم:
ــ كلشي تريدينه يصير حجيه

باوعت على ميسنه تغمز عود تكلي شوفي وتهز راسها باوعت على الاتجاه الي تأشر عليه شفت رهفاء كاعده بس ماتاكل تگلب بالاكل استحيت اسألها سكتت عوجت حلگها ميسنه وگالت:
ــ بيبي حويره بعدها تستحي شوفي حتى ما جاي تاكل شوفي شوفي

گالتها وهيه تأشر عليه خزرتها متفشله باوعتلي بيبي وگالت:
ــ صدگ يمه اكلي لگمه شني عليمن تستحين خاطبيج

ماحسيت اله صاح كنان:
ــ شحده الي يخطبها افلش عقله قبل لا يفكر

عوجت حلگها بيبي وگالت:
ــ يفلشه هو أبو التفليش بكيفك بت جايه قسمتها چا نوگف قسمتها علمودك

گال هُشيـم بهدوء:
ــ اصلا بعدهي صغيـره حجيه وينها وين الزواج

باوعتله وگلت :
ــ لا اتزوج حتى اخلص منـ...

انتبهت على چفصتي بسرعه عدلت كلامي وگلت :
ــ حتى اخلص من ميسنه

فتحت حلگها ميسنه وگامت تلعلع تندمت گمت ازلغ خدودي:
ــ المن شمسويتلج ستوج اجيتي ششفتني مني هيج صارت حويره؟ أنا اعلمج ابد والله ما ارضى روحي روحي الي يسمعج يگول معذبتها آخ گلبي خويه هُشيم الحگلي راح اوگع

فتحت حلگي على كلامها تحجي سريع ما تنطي بگ گلت :
ــ لا مو قصدي اتشاقه

شو هاي بدلت:
ــ حبيبتي اني هم اموت عليج اعرف تتشاقين

سكتت مصدومه ما ينگدر الهم ابدا گال ثائر منزعج:
ــ دوختوني شنو هاي كافي باعي زينب وحوراء

فتحت عيوني بصدمه وگلت اعدل اله:
ــ قصدك زينب الحوراء ...

عقج وجهه يسوي نفسه منزعج:
ــ افتهمنا تره اسمج مو قانوني شنو زينب الحوراء هيه لو زينب لو حوراء ياعمي رافد هسه ما ناخذ غيبتك بس شكو مسميها زينب وحوراء زين هسه هيه زينب لو حوراء ؟

لزم رأسه عمي بلال وصاح:
ــ ولك دوختنا اسكت انلصم

باوعله ثائر وعوج حلگه ما عاجبه وگال:
ــ حجه المثقف ابوي يابه جاي نتناقش عائله مو مال نقاش خلي اروح اشوف اب ثاني يفتهم

خزره عمو بلال وگال:
ــ شقصدك ولك ما افتهم انا؟

بلع ريگه ثائر وصاح بخوف:
ــ على راسي انتَ أنا الي ما افتهم...

متنا ضحك عليه حيل يسوي أجواء وروحه مرحه باوعلي وگال :
ــ تضحك الفاهــيه

برطمت وگلت:
ــ تره كلها ضحكت شبيك وياي

لطم على خدوده وكال:
ــ هيَّ حتى من تزعل حلوه هذا الشي طبيعي؟
چا شبيها ميسنه من تزعل چنها جبار

ضربته ميسنه بالخاشوگه وگالت:
ــ شعليه شعليه ابو الجگاير

خزرها ثائر گال ضرغام:
ــ ثائر تدخن ؟

باوع ثائر على ميسنه وگالت:
ــ لا اتشاقه شبيكم

تغاضوا عن الموضوع وسكتوا .. كملنا اكل ردت اگوم اساعد البنات گالت بيبي:
ــ لا يمه تعالي گعدي اريدج بحجايه خلي البنات يگومن

عوجت حلگها نيروز وگالت:
ــ بنات البطه السوده

ضحكت عليها اغورها باوعت على بيبي منتظرتها تكمل باوعتلي ومسحت على شعري من وره الشال وگالت :
ــ ليش لابسه شال يمه ؟

نزلت راسي وگلت:
ــ ما اگدر ما متعوده بيبي بعدين حرام ..

ابتسمت وگالت بفخر :
ــ عفيه ببنية الغالي ، يمه أنا أعرف أنتِ شايله بگلبج چي ما نسأل عليج كل هلسنين بس يايمه والله ولدنا ما گعدوا من شگد ما يدورون عليج ...
حتى ما يجون بالبيت بأستراحتهم سألنا هذا خالج گال ماعندي وما اعرف وينها ....

فتحت عيوني بصدمه وگلت:
ــ يمـه أنا بيبي اصلا من الصغر هو گاعده يمهم

ــ اعرف يمه اعرف يچذب لچن أنا ما صدگته ودزيت وليدي هُشيـم لأن اعرفنه هاوي هاي السالفه

عقد حاجبي بأستغراب وگلت:
ــ شنو هاوي؟

ابتسمت وگالت:
ــ بعدين تعرفين حبيبه ، يلا گومي صعدي ارتاحي

گلت بخجل:
ــ لا بيبي عيب خلي اساعد البنات

هزت راسها گمت جاي اروح للمطبخ نضربت بشي رفعت راسي لگيته هُشيـم صاح بيه:
ــ غبيــه ما تشوفين!

گتله بسرعه ضايجه:
ــ شبيــك انتَ دعمتني شبيك تصيح فوگاها !
والله يا الله

هزيت ايدي وعفته شبي هذا شو صاير فرد نوب رحت للمطبخ لكيت رهفاء ورسيل ابتسمت وگلت:
ــ أجيت اساعدكم محتاجات شي

لاحظت على رهفاء ساكته ... گالت رسيل :
ــ لا عمري ارتاحي

عبست وجهي وگلت :
ــ جاي تحسسوني فعلا خطار !

گالت رسيل :
ــ لا والله بس صدك كملنا كلشي ، تعالي نسولف ..

جرتني گعدنا ورهفاء ساكته عجيبه هلبنيه ما سمعت صوتها بس اول ما سلمت عليه بعدين كلش هادئه گلت موجهه كلامي لرهفاء:
ــ رهفاء أنتِ زينه لاحظت ما اكلتي اليوم!

بسرعه باوعتلي بتوتر ونزلت راسها وگالت :
ــ ااا ..مابيه مابيه شي

عقدت حاجبي مستغربه گالت رسيل تضيع الموضوع :
ــ اي فدوه حوراء گولي لكنان يطلعنا نغير جو حبابه

ضحكت وگلت :
ــ وليش أنا اگول

ــ حتى يقبــل لأن هو ما راح يرفض طلبج اكيد

ابتسمت وهزيت راسي گامت رهفاء وگالت بتوتر:
ــ بنات راح اصعد ارتاح ..

گالتها وراحت ..باوعت على رسيل مستغربه وگلت:
ــ شبيها ؟

گالت رسيل بتوتر :
ــ ما اعرف ...المهم گومي نصعد نرتب الفوك

هزيت راسي بقبول وصعدنا بسرعه رتبنا الفوك
ردت ادخل لآخر غرفه بسرعه عاطت رسيل:
ــ لا اوگفـــي !

فزيت وباوعتلها:
ــ شبيج فززتيني

گالت وهيه تمتمت:
ــ لا مو قـ...قصـدي بـس لا تدخلين لهاي الغرفه

عقدت حاجبي مستغربه وگلت :
ــ ليش؟

ــ غرفة هُشيم ،امشي امشي لغرفتي

جرتني بسرعه ودخلتني لغرفتها استغربت طريقتها كُلش غريبه گعدت على الجربايه وسكتت .. هيه تفتر متوتره باوعتلي وگالت :
ــ حــوراء ديربالج تتقربين للغرفه تمام!

عقدت حاجبي مستغربه وگلت:
ــ شبيــج رسيله ؟ شنو راح اسويلها مثلا

ضربت گصتها وگالت :
ــ تبوگيها قابل بس هيه هلغرفه لا تتقربين منها وخلاص ... بعدين اگلج

هزيت راسي بقبول وگلت:
ــ تمام ، يلا خلي نروح لغرفتنا بعد شكو تعشوا جوه وخلصنا ...

ــ اي يلا گومي

ــ شبيج غير غرفتج هاي المفروض أنا اروح للغرفه الثانيه

گالت بعدم اهتمام :
ــ غرفتي غرفتج ماكو فرق

هزيت راسي مبتسمه وسكتت گلتلها:
ــ راح اروح اصلي واجيج

ـ هزت راسها ساكته طلعت بسرعه بداخلي خوف وغرابه ليش هيج سوت ، دخلت لغرفتي توضيت وصليت دعيت انو اكون بخير لأن ما حاسه بالأمان ...
ـ احس نفسي كلش تعبانه راسي يوجعني حطيت راسي على المخده وغفيت بدون ما احس على روحي...
ـ گعدت باوعت على نفسي نفس نومتي باوعت على الساعه دنيا ليل كلش كل هلوقت نمتي زينب شعندج مو عيب ..
ـ كمت اتعارك وي روحي لحد ما گمت غسلت وجهي وحطيت مرطب من الي محطوطات على الميز وكعدت امشط شعري

ـ طولان حيل لو اكصه احسن .. باجر اكول لبيبي تگصه ، جعت انزل لو ما انزل؟

ـ اخذت نفس وفتحت الباب لأن بطني گامت تقرقر من الجوع مايفيد الخجل بعدين منو موجود محد بهليل

ـ نزلت جوه على كيفي دخلت للمطبخ فتحت الثلاجه طلعت اكل سويتلي لفه وگعدت على الطاوله اكل على كيفي
ـ خلصت اكل غسلت ايدي ردت اصعد بس خطرت ببالي فكره !
ليش ما اروح للحدايق البره عندهم حديقه جبيره مادري بستان خلي اطلع واشوف بما انو ماكو احد وارجع بسرعه
ـ ضحكت وصفگت ايدي وانداريت حتى اطلع فعلا طلعت اتمشى على كيفي والهواء البارد يلفحني ضحكت فرحانه نزلت شالي وفتحت شعري لأن ماكو احد
ـ اركض بين الزرع واضحك احس فعلا حُره وفرحانه كلش اول مره افرح هلگد بس أدركت الفرح ما يلوگلي شفت نخله جبيره
ـ تمشيت يمها على كيفي وگفت رفعت راسي اباوعلها الله تمر فوك

اجه صوت من ورايه:
ــ تريديــن نبگ ؟

شهگت وانداريت مرعوبه لگيته ضُرغام بسرعه رفعت شالي مع انو شعري من وره مبين بس على الاقل اغطي من گدام ابتسم وعاد كلامه:
ــ تريدين نبگ انزلج؟

عقدت حاجبي مستغربه وگلت:
ــ شنو نبگ ؟

ضحك وگال:
ــ ماتعرفين تمر تمر بس غير نوع يصير شويه يابس المهم تريدين؟

هزيت راسي بقبول وگلت:
ــ يعني عادي أخذ ؟

ضحك وهز رأسه بمعنى اي :
ــ اكيد عادي أنتِ كلشي الج عادي

ماحبيت اسلوبه ماعرف ليش صعد حتى يجيبلي وفعلا جابلي كم تمرايه ضحكت فرحانه واريد اكلهن صاح بيه:
ــ لا يمعــوده لا

باوعتله مستغربه وگلت:
ــ شنو غير اريد اكل

مسح وجهه وگال:
ــ لا وصخات بيهن تراب

باوعت نظيفات بس تراب قليل ، تقرب أخذهم مني وغسلهم بالماي الي عنده وانطانياهم
ابتسمت وگلت:
ــ شكرا

هز رأسه بأبتسامه اكلتهن بسرعه حيل طيبات مو نفس طعم التمر يابسات اطيب باوعت لگيته صافن عليه گتله :
ــ تريد؟

هز رأسه 'اي' رجعت گلت:
ــ روح جيبلك ما انطي مالاتي

گال بصوت خافت:
ــ لا اريد اله مالاتج

ضميتهن لصدري وگلت:
ــ ماريد مالاتي گوه

ضحك وتقرب مني اشر على ظهري وكال:
ــ خلي اللم شعرج

انتبهت وگلت:
ــ لا عوفه هسه أنا اللمه

ماسمع مني تقرب بدون ما يلمسني اخذ شعري بطرف شالي وعدله بقى هواي واگفه انداريت اباوعله صافن عليَّ ومبتسم:
ــ شبيك ضُرغـام ؟

ــ بيَّ انتِ ... شلونج

استغربت من كلامه وحالته جاوبت :
ــ الحمد لله ، يلا خلي نرجع

گال بسرعه:
ــ لا وين ترجعين تعالي نگعد اسولفلج ونرجع

هزيت راسي بقبول يمكن يريد يحجي عن شي گعدنا جوه النخله باوعلي بحزن وگال:
ــ تشبهيــن وحده اعرفها

عقدت حاجبي مستغربه وگتله:
ــ منو؟

تنهد بضيق وگال وهو صافن على السماء:
ــ وحده حبيتها بس راحت

انقهرت عليه حيل گلت بفضول:
ــ وين راحت؟

ــ يم رب العالمين

شهگت وحطيت ايدي على شفايفي بصدمه وگلت بحزن:
ــ اسفه والله بس تفاجئت ...الله يرحمها أن شاء الله لا تزعل والله تحب غيرها عادي

أنا گلت هيج وهو مات من الضحك بحيث گام يگح ادركت چفصتي وگلت:
ــ بالغلط قصدي يعني عادي عادي

بقى دقايق يضحك شويه يلا سكت وگال:
ــ ضحكتيني وانا مهموم

گلت :
ــ لا تضوج الدنيا هواي تشيل الناس هموم حاول ما توگف عند اي هم أو حزن

باوعلي بأعجاب وگال:
ــ تحجين وكأن اربعينيه

ابتسمت وگلت بحزن:
ــ مو مهم العمر المهم الظروف هسه أنا ظروفي مال وحده عمرها 14 ؟
لا بعدني طفله بس شنسوي للحياة عوجت وياي

هز رأسه وگال:
ــ هيه هيج الحياة مو عادله

كلت وان اقاطعه:
ــ بس اكو رب عادل يعدل كلشي بالحياة

گال :
ــ بس هم مرات ادعي ومايصير أو مرات اريد شي ومايصير ويصير لغيري

گلت بهدوء:
ــ أوّل شي لازم تعرف إن الله يسمع كل دعاء وماكو دعاء يضيع بس الاستجابه مو شرط تجي بنفس الشكل او الوقت اللي نريده رب العالمين عنده حكمه أكبر من تفكيرنا ..
ومرات ينطينا شي مختلف عن اللي طلبناه لأن اللي نريده مو بالضروره يكون خير إلنا مثل ما الطفل يريد شي يضرّه وأهله يمنعوه...

أما الشي الي تريده يصير لغيرك فهاي مو معناها إن الله ناسيك بالعكس! يمكن الله يريد يعلمنا إن رزق كل إنسان موزّع بحرص وإلك شي مختلف أو أحسن بانتظارك ...

الإمام علي 'ع' يگول:'قد تُبطأ عنك الإجابه ليكون أعظم لأجر السائل وأجزل لعطاء الآمل'

باوعتله لكيته مبتسم يباوعلي گال :
ــ كلش حبيت كلامج غير نفسيتي بعد كلما اضوج اجي يم حورتي هنيال كنان على اخت مثلج

ابتسمت وگلت:
ــ بكل وقت موجوده ، أنا هم هنيالي على كنان

ابتسم وگال:
ــ بسرعه حبيتي بعدج ما شايفه خيره من شره...

ابتسمت وگلت :
ــ اتمنى يكون هيج تفائلوا بالخير تجدوه ..

ابتسم وتقرب حتى يگومني ..

ما حسينا غير صوت صيــاح كلش قوي :
ــ لحگواا يهل الديـــره بيت شيــخ عــواد ولدهُم تتمعشــگ هنــا .....

يتبــع ..

2600 الف كلمه 🥹♥️...

ــــــــــــــ
البارت كلش خفيف هالمره
اتمنى ما تگولون قصير لأن اصلا هذا بارت هديه لأن البارحه نزلت الكم بارت واليوم هم نزلت وباجر هم على الموعد يعني ثلاث بارتات وره بعض !
اتمنى تقدرون تعبي بدون ما تگولون قصير
لأن سهرانه فقط حتى اكمللكم الروايه على خير ...

تابعوني على حساباتي انشر كلشي بيهن

حسابي الانستا

حسابي التيك توك

قناتي التليكرام

الباقِياتُ الصَّالِحاتُ:

-سُبحــانَ الله
-الحمــــدُ لله
-لا إلهَ إلا الله
-اللهُ أكبـــر
-لا حَول ولا قوة إلا بالله
-سُبحــان الله العَظيــم
-سُبحــان الله وبِحَمـده
-أستَغفِــر الله وأتوبُ إليه
-اللهُمَّ صلِ علّى مُحمد وآل مُحمد