فَجيـعه الدَهر الفصل الحادي والعشرون 21 - بقلم Hind Al taay

#فجيعة الدهر
بقلم الكاتبه هند الطائي
تصويت+ تعليقات بين الفقرات

الحلقه السابعه عشر لقد اقتربت النهايه....

_________
ساره

بعد مرور الأيام زينب تحضر لزواجها وكل شوي تخابرني تأخذ رأيي بشغله تريد تشتريها فعلا تمنيتلها الخير من زمان ما شفتها هيج فرحانه وطايره من الفرح تمنيت الخير والسعاده تدوملها أنا اني فـ كنان ما مقصر عليه بشي بس اضوج من يفتح موضوع اروح اكعد ببيت اهله بحجة يخاف عليه وحدي من يطلع للدوام واني ارفض بكل مره لان اعرف محد يستلطفني من أهله أبدا .. فزيت من صفنتي على ريحة حرگ باوعت على الطباخ لااا الغده احترك ياربي شسوي لكنان هسه بهل اثناء نفتح الباب ودخل كنان باوعتله ابتسم وفتحلي ايده ركضت احضنه گال :
_ هسه التعب كله انزاح مني هسه ردتلي روحي من ضميتج لگلبي

رفعت راسي اباوعله مبتسمه
سانده راسي على كتفه اجه ببالي سؤال باوعلي وضحك وكال:
ـ گولي شعندج لا تضمينها بگلبج الترف

ضحكت وگتله:
ـ تحبني ؟

أخذ ايدي باسهـا بقوة وشمها وگال وهو يأشر على گلبه:
ـ أنتِ هنا

ـ كلمره تگلي انتِ هنا بگلبي بس گلبك كوستر مو گلب

ضحك بقوة وگال بنبره خلت الفراشات تطير حولي وتحاوطني:
ـ اريد احط گلبج بگلبي ويصيرون واحد بس خايف عليج حتى من خشونه گلبي بترافة گلبج !

سويت حركه بشفتي ما عاجبني وكلت :
_ گلبك خشن!

ضحك من كل گلبه وكال:
_ عفتي كلشي وركزتي على هاي ؟
مو مال رومانسيه سارونتي.

دفعته بخفه اضحك وكلت:
_ هسه عوف الرومانسيه الأكل احترك شلون؟

باس راسي وكال:
_ فدوه ألج ميخالف احطه للحيوانات

ابتسمت وهزيت راسي قابله صدك حط غراضه على صفحه و أخذ الاكل طلع حطه للحيوانات واجه أخذني من أيدي وفرني ضحكت من كل قلبي من توقفت شالني وأفتر بيه ضحكت خايفه لازمته لا اوگع بهل أثناء ندك الباب نزلني يضحك گلت بسرعه :
_ كافي كافي عيب زينب اجت

باوعلي صفح وگال:
_ بعدنه ما مسوين شي

ضربته خفيف على كنفه ابتسم وراح فتح الباب طلعت زينب باوعتلي بسرعه وكالت :
_ ساره شالج هُشيم يريد يدخل الاغراض

_ اي اي هلا بي هسه اروح اللبسه

رحت بسرعه لبست شالي واجيت لكيت هشيم داخل رفع رأسه كال :
_ السلام عليكم خيتي شلونج؟

ابتسمت وكلت :
_ عليكم السلام خويه الحمد لله

ابتسم ودخل الاغراض البقيه وكنان وياه وزينب حاطه رأسها على الكرويته ومغمضه تعبانه ، دخلوا الولد كل الأغراض باوع كنان على زينب الحوراء وگال لهشيم بخزره:
_ اختي تعبت من وراك تعبتها شوف شلون نامت

باوعله هشيم صفح وراح لزينب الحوراء وصل يمها وضل يتلفت بعدين گال :
_ اريد غرفة زينب وين نسيتها

اشرت على وحده من الغرف وكلت :
_ هاي خويه الي على اليمين

هز رأسه بقبول ودنك راد يشيل زينب ما احس اله صوت ضربه باوعت فاتحه حلگي كنان ضرب هشيم بكل قوته رفع رأسه هشيم متألم وصاح بكنان:
_ لك حيــوان شبيك!

باوعله كنان بحقد وكال :
_ تريد تشيلها لك كدام عيني ما تستحي انتَ الحيوان مو أني

باوعله هشيم صفح وكال :
_ بابه استوعب مرتي مرتي هاي مالتي يعني هاهيه

لزم كنان هشيم من ملابسه وكال :
_ شنو هاهيه لك شنو هاهيه لا عبالك خطبتها يعني هاهيه وماكو رجعه لا والله بكيفي شوكت ما تريد ترجع ترجع وغصبا ما عليك

_ دروح روح هذا حجيك اشرب مايه وابلع ريگك و....

همه يتناكرون واني ميته ضحك اباوع لزينب فاتحه تك عين تباوعلهم بأستغراب رحت مديتلها ايدي وكلت :
_ كومي كومي هذول بس يتعاركون خلي نروح للغرفه

هزت رأسها بقبول كومتها باوع هشيم الها وكال بقهر:
_ كعدتي حبيبتي سوده عليه راحت نومتج من وره هذا السگط

كالت بصوت ناصي نعسانه :
_ عادي هسه اروح انام بالغرفه

كال هشيم :
_ اجي؟

ضربه كنان على رگبته ضحك بصوت عالي ، عفناهم ورحنا أنا وزينب الحوراء دخلنا للغرفه باوعتلي وكالت :
_ راح ابدل واجي

_ تمام حبي ابقي اطلع أنا أشوف الغده وإنت بدلي هنا

طلعت من الغرفه رحت شفت الولد طلعوا الظاهر رحت للمطبخ سويت غده من جديد لان ذاك احترك والحمد لله هالمره ضبط غطيت كلشي ورجعت للغرفه لكيت زينب كاعده تقرأ قرآن ابتسمت وكعدت قريب منها اباوع عليها سرحت بتفكيري
هيه هواي تعبت بحياتها من الصغر جانت امي تشد وياها تضربها هواي فقدت عائلتها كامت تبيع بالشارع وهواي عاشت معاناة شنو الي يخليها لحد الآن صابره ؟
أثرني فضولي كملت هيه حبيت اسألها هل سؤال تشجعت وكلت :
_ زينب
باوعتلي منتظره أكمل
_ عادي أسألج سؤال؟

ضحكت وكالت :
_ أكيد عادي سألي

ابتسمت وكلت :
_ انتِ هواي مريتي بمعاناة بحياتج شنو الشي الي خلاج صابره لحد الآن ؟ اكو ناس فقدوا عقلهم من مشكله وحده انتِ صبرتي على مشاكل وهواي سوالف شنو الي خلاج صابره؟

ابتسمت وقدمت ردن الصايه على إيدها وكالت بهدوء:
_ أنا أصبر لأن مؤمنه انو كلشي مريت بي مكتوبلي أعيشه قبل لا انولد وانو الله ما يختبر إنسان بشي إلا وهو يعرف إنه يگدر يتحمل هذا الاختبار
يمكن ما أفهم سبب الاختبار بوقتها وأكول ليش هيج ليش بس أنا أعاني هلمعاناة بس بداخلي شي يخليني أطمئن انو الصبر مو عبث واكيد رب العالمين راح يعوضني كل تأخيره بيها خيره
أصبر لان أعرف رب العالمين ما راح يترك عبده الضعيف بنص الطريق واكيد النهايه دائما احلى وأجمل من ما احنه نتوقع

ابتسمت ورحت حضنتها ضحكت وكالت :
_ ولج شنو نقص حنان

_ اي والله نقص حنان

باوعتلي وكالت :
_ اخويه شنو لعد

ضربتها بخفه على كتفها ضحكنا وعفتها تقره قرآن رحت للصاله حطيت راسي على مخده وماحسيت بنفسي إلا ونايمه كعدت على صوت كلشش قوي ماعرف شنو طك فزيت خايفه سمعت صرخة زينب الحوراء اريد اكوم رجليه ما تعينّي بالگوه صيحت:
— زينب يمه زينب

گمت مادري شلون رجعلي حيلي وكمت ركضت أشوفها وين لكيتها واكعه بالكاع حيلي باد ركضت يمها رفعت رأسها تبجي شافتني چلبت بدشداشتي وتبجي :
— شبيج حبيبتي زينب فدوه رفعي راسج منو يمج شصار ولج گلبي مات احجي

رفعت رأسها تبجي كالت بخوف :
— بزونه دم دم وبزونه

عقدت حاجبي مستغربه وكلت:
— شنو وينها بزونه دم شنو ؟ شبيج زنوبه حبيبتي خاف حلمانه !

اشرت على مكان وأيدها ترجف باوعت فزيت من لكيت بزونه ميته ودم عليها صرخت زينب من رجعت باوعتلها وچلبت بيه اكثر :
— هاي منين اجت؟

كالت بخوف:
— مادري مادري كعدت لكيتها قريب مني ماعرف

مسحت على شعرها وكلت :
_ على كيفج على كيفج كلبج راح يوقف تعالي نطلع بره

هزت رأسها بخوف اخذتها وطلعنا بره حرت شسوي ماعندي تلفون جنت اخذ تلفون كنان هسه كنان طالع كعدتها على الكرسي بالمطبخ انطيتها ماي باوعت شوي هدأت كلت:
_ ها ؟

كالت :
_ وين هشيم ؟

_ طلعوا مادري

باوعتلي تريد تبجي :
_ وعافوني؟

استغربت هيه من شوكت متعلقه بهشيم هلكد بس سويت نفسي اشاقيها:
_ ولج واني ؟ شنو وين رحت ؟

ابتسمت وكالت :
_ لا مو هيج بس شسمه

_ لا عيني الظاهر نزل مقداري يمج

ابتسمت ستوها تريد تحجي اندك الباب باوعتلها وكلت :
_ الظاهر اجوا

هزت رأسها ، اني لابسه شال رحت فتحت الباب لكيته كنان كال :
_ ليش ما كلتي منو ؟

ضحكت وكلت :
_ أعرفك حبيبي ما يحتاج

ضحك وسحبني لحضنه وكال وهو يشم شعري :
_ أمم لا يجوز مو اني

دفعته وكلت :
_ زينب الحوراء هنا عيب ، صدك وين هشيم ؟

_ ذكرتيني يريد يحجي وياها

كلت اله :
_ اي ليش ما خليته يدخل؟

ضحك وكال بخبث:
_ عذبته ساعه أكله اخذها ساعه أكله افسخ الخطوبه ماريدك تصير نسيبي عذبته يلا وصلنه

ابتسمت وكلت :
_ ليش خطيه ؟

باوعلي وقلص عيونه وكال :
_ شو تدافعيله لا تدافعيله دافعيلي بس اني

ضحكت وكلت :
_ ليش انت منو وياك حتى ادافعلك ؟

تقرب رفع ايده يتلمس رموشي غمضت عيوني وهو كال بصوت خافت:
_ انتِ..انتِ وياي

تذكرت فتحت عيوني ودفعته :
_ شسمه مو هشيم يريد زينب خلي أصيحها وصدك تعال اخذ البزونه

عقد حاجبه مستغرب :
_ يا بزونه؟

سولفتله الي صار صفن وكال :
_ شنو شجاب البزونه بالغرفه واحنا دخلنا كلشي مابيها ؟

باوعتله بحيره :
_ ماعرف

_ الله كريم روحي صيحي زينب خلي تطلع لهشيم

هزيت راسي بقبول ورحت للمطبخ شفت زينب باوعتلي كتلها:
_ هشيم يريد يحجي وياج بالباب

ردت بصوت مبحوح:
_ تمام هسه اطلعله

_ تمام حبيبتي

عفتها ورحت لكنان شفته بالغرفه جاي يباوع للبزونه باوعتله بدون ما اباوع الها لان لعبت نفسي كلش باوعلي وكال :
_ ليش دخلتي ؟ طلعي تلعب روحج

_ لا ما جاي اباوعلها بس گُلي وين راح توديها ؟

ابتسم وكال :
_ راح ياكلوها بأيدهم ..

_________________
زينب الحوراء

باوعتلها وكلت :
_ شبيج تخبلني ؟؟

تباوعلي بكل حقد تقربت مني وكالت :
_ اخذتي مني حيوانه يحبني وسويتيله سحوره أكيد واخذتي بس أنا اعلمج اله اخلي حياتج جحيم عساج لا تهنيتي بي

دفعتها وصحت :
_ لج انتِ منو وتحجين وياي هيج هو لو صدك يحبج ما عافج بسهوله ولا تتوقعين ابني سعادتي على تعاسة غيري ! اني مو مثلج

ضحكت وكالت :
_ بسيطه بسيطه اندمج راح تعضين اصابيعج ندم

طلعت وعافتني استغفرت ربي هاي شبيها بس ما انكر راودني الخوف شويه بس بعدين كلت الله يبعدها عني فتحت الباب اريد انزل انصدمت من شفت رسيل تبجي بقوه وواكف كدامها رُفدان مبين كلش معصب مو قصدي أتسمع بس كاللها:
_ شسوي بيج هسه ها ؟ ولج راسي صرت مارفعه من وراج

باوعتله تبجي وتكول :
_ مو قصدي أفشلك والله بس

عاط بيها :
_ بس شنو ؟؟ بس شنو فهميني كافي وهذا تلفونج بعد مارجعه ولو كلتي اريد تلفون اموتج ولخلقج

هزت رأسها وعافها وراح نزلت مستغربه لكيتهم كاعدين باوعت على هشيم اشربي اروح يمه رحت كعدت يمه كال :
_ ها حبيبتي نروح ؟

_ اي يلا

صاح للبنات يبدلون بدلوا وطلعنا رسيل مو على بعضها وجهه احمر من البجي وما تسولف نهائي كعدت ليگدام ونيروز وميسنه ورسيل وره وصلنا للسوك كال هشيم قبل لا ننزل:
_ تنزلون كلشي تردونه اشتروا وبدون صياح وعياط لا حظجن اطيحه عدا مرتي

صاحت نيروز:
_ شنو عينيي مرتك وحد ؟

ميسنه:
_ اي أكيد وحد انجبي غير مرته

ضحكت وهشيم باوعلي وكال :
_ مرتي سر سعادتي

ضحكنا ونزلنا بلشنا نشتري وكل محل ادخل اله هشيم ما يقبل اله كلشي اشتري اكو شغلات ما احتاجها بس ميقبل والبنات وياي يختارولي وهمه هم يشترون الشغلات الي تعجبهم لحد ما خلصنا رجلي وكعت ما متعوده افتر هلكد باوعت لهشيم بتعب وكلت :
_ تعبت حباب خلي نرجع كافي

هشيم:
_ سوده عليه ناكل ونرجع حبيبتي

رحنا لمطعم عاند ما يقبل يكعدنا اله بمكان مابي احد وماكو كل المطاعم بيها ناس آخر مطعم كالوا صالة العوائل هسه مابيها احد يلا قبل كعدنا باوعلي وكال :
_ شتاكلين عمري ؟

_ اي شي

_ لا شنو اي شي شنو مشتهيه؟

_ كباب

_ تدللين حوريتي

باوع للبنات صافنات علينه ويغمزن كاللهم:
_ نحسدنا

نيروز:
_ عادي على شنو هسه أتزوج واخلي سوچي يدلعني

خزرها هشيم وكال :
_ ولج كدامي ادبسزز

ضحكت وسكتت طلبلنا اكل هوااي بحيث صفنت منو راح يأكله بس البنات ما مستغربات لان الظاهر طريقته هيج كلش احب علاقه هشيم ببنات عمه علاقه طيبه وحلوه ونظيفه المهم
كملنا ورجعنا للبيت وصلنا البنات ورحنا لبيتنا اول ما دخلت نمت بمكاني وراها وداني هشيم لغرفتي نمت ..فتحت عيوني على ريحه سيئه باوعت صرخت من لكيت دم وبزونه ميته بشكل بشع دخلت ساره حاولت تهديني بس أنا تخبلت كلش خفت لحد ما اجوا الولد
صاحني هشيم طلعتله لكيته يم الباب باوعلي وكال :
_ هلا بروحي هلا بحوريتي

ركز بوجهي وكال بخوف :
_ شبيهن عيونج حمر؟ تبجين جنتي ؟

_ بعدين اسولفلك هشيم تعبانه

حضني خليت راسي على صدره غمضت عيوني احس تعبت مادري نخلست من البزونه ضمني لصدره وكأن يشرحلي بهلحضن انو أنا بأمان رفعت راسي وكتله :
_ ليش تريدني ؟

ابتسم وكال :
_ اشتاقيت لمرتي

ابتسمت بخجل ونزلت راسي ضحك باس راسي وكال :
_ خجلت خجلت اروح فدوه لخجلج

_ كافي مايصير هلكد تتغزل عيب ماعندك خوات ؟

_ لا ماعندي

_ وميسنه؟

_ مضاف اليه

ضحكت وكلت :
_ ها جا اله اگلها بسيطه

باسني بخدي شفطه شفط :
_ اروح فدوه لل جا بحلك مريتي

باوعتله صفح ومسحت خدي وكلت :
_ شنو حلك ؟

_ چا شني شفاه؟

ضحكت من كل گلبي وهو يباوعلي مبتسم صافن عليه ضربته بخفه على صدره وكلت :
_ عفيه لا تضحكني هُشيم

_ لا تجرين اسمي هيج يول

_ هُشيم

باوعلي بنظره وكال :
_ دخلي جوه لا ابتلي بيج وشيخلصنه من اخوج

ضحكت واشرتله باي دزلي بوسه بالهوه ركضت اريد ادخل استوقفني صوت طلقه صرخت وانداريت اشوف هشيم واكع ...

يتبع...

___________________________________

شلونه البارت؟ متنوع وأحداثه عدله وي الاثنين ساره وزينب الحوراء والتنزيل مستمر بعد لحد ما تنتهي الروايه .

حساباتي مهمه كلشي انشر بيها خاصه قناة التليگرام

حسابي الانستا

قناتي التليگرام

الباقِياتُ الصَّالِحاتُ:

-سُبحــانَ الله
-الحمــــدُ لله
-لا إلهَ إلا الله
-اللهُ أكبـــر
-لا حَول ولا قوة إلا بالله
-سُبحــان الله العَظيــم
-سُبحــان الله وبِحَمـده
-أستَغفِــر الله وأتوبُ إليه
-اللهُمَّ صلِ علّى مُحمد وآل مُحمد