فَجيـعه الدَهر الفصل الثاني والعشرون 22 - بقلم Hind Al taay

#فجيعة الدهر
بقـلم الكاتبه هند الطائي

_________________________

زينب الحوراء

صرت مثل المشلوله ما اكدر اصرخ ولا اركض اله ولا حتى اسوي شي بس اباوعله سابح بدمه حبيب عمري والي علمني معنى التقدير والحب حتى وان كنت ما احبه بس على الأقل عرفت معنى إنسان يحبني شنو !
اول شخص ابتسملي اول ما شافني من دون ما ينقص مني
اول شخص دافعلي بحياتي كلها اول شخص رفض اهانتي اول شخص اتقبلني بكل شيناتي وزيناتي اول شخص حسسني انو فعلا مكاني مو الشارع ولا أبيع ببسطيه
كلشي بالنسبه الي تعلقت بي ماحبيته بس تعلقت بي ماحبيته بس نعجبت بشخصيته بشكله بكلشي بي صرت اخاف عليه اكثر ما اخاف على نفسي وعيت على نفسي من حسيت بضربه اجتني على وجهي باوعت ساره تصيح :
_ كومي كومي ولج روحي ويا

باوعت لكيت كنان حط هشيم بالسياره ركضت صعدت بالسياره ليوره حطيت رأسه بحضني صافنه عليه تجمدت كلشي ما اكدر اسوي لا اصرخ لا أتحرك اكتفيت بالسكوت باوعلي كنان وكال :
_ زينب تسمعيني؟

مارديت ولا باوعتله ساق سريع بحيث كم دقيقه وصلنا نزل كمان يصيح للدكاتره حتى يجيبون سديه شاله وحطاه على السديه اخذوا شوي ورجع كنان باوعلي ماكدر أتحرك تقرب من يمي باوعلي وحضني هنا حسيت جبال الدنيا صارت على جتافي چلبت بي وبقيت ابجي انهاريت عشر دقايق أنا ابجي واصيح باس راسي وكال :
_ زينب سمعيني هشيم هسه محتاجج منو الأفضل تكعدين تبجين لو توكفين بجانبه صح صعبه كلش عليج بس محتاجج هو هسه محتاج شخص يوكف بجانبه اله ان نشوف وضعه واوعدج لمن اعرف منو سوه هيج ما اخلي عدل ولكفل زينب بس شدي حيلج وكومي

كلامه صح ما لازم أضعف باوعتله وعيوني غوشن من البجي وكلت بصوت مبحوح:
_ صح كلامك خلي اروحله

هز رأسه بقبول وساندني نزلت من السياره ودخلنا جوه الدكتور كال يريد احد يحجي وياه باوعت لكنان اريد اروح كال:
_ لا حبيبتي ابقي هنا أنا أشوف شيكول واجي اكلج

_ لا كنان لا تجذب عليه اعرف بيك ما راح تكول الي يحجي الدكتور

تقرب حضني وكال :
_ وداعتج شنو يكلي الدكتور اجي اكلج والله بس خلي استفسر منه

تحسرت بقهر وهزيت راسي بقبول كعدت على المقعد وراح كنان وي الدكتور تقريبا ربع ساعه واجه فزيت من مكاني وباوعتله والدموع متجمعه بعيني:
_ ها شنو كال ؟

باوعلي وكال :
_ متصاوب حالته يحتاجلها عمليه بس لا تخافين سهله ان شاء الله

بجيت تنهد وحضني مابيده شي شما يواسيني ماكدر كلبي يوجعني حيل اعز هُشيم صارلي كلشي رغم كنان موجود بس هو اول واحد وگفلي ، هدأني كنان جابلي ماي ولفه توسل راد اكل ابد ماخليت لگمه بحلگي عاد آخر شي نتر بيه ماتحمل :
_ شبيج تريدين تموتين ؟ لا اكل لا شرب شنو راح يموت كلها عمليه وتخلص

باوعتله ساكته ضجت من نتر عليه بس صحيح كلامه اخذت اللفه من ايده خفت منه كلساع يخوزر بيه اكلت لگمتين ورجعتها شوي وگال كنان:
_ خلي ارجعج ترتاحين وباجر هم اجيبج

هزيت راسي برفض :
_ مستحيل اعوفه هو افضاله عليَّ هواي ولازم من يكعد اول وحده يشوفها أنا

قاطعني
_ سمعيني علمود اخذج تحضريله ملابس وترتاحين حتى أعصابج ترتاح تسبحين تكعدين ما طايره المستشفى

_ لا كنان لتحاول أصلا ، مستحيل اگوم

_ ولج بويه شلون وي عنادج تكومين لو اكتلج بنص المستشفى ؟

باوعتله مدمعه هو أنا بيا حال هسه حتى ينتر بيه !
_ شبيك شنو مستثگلني ؟ ترا هو بس يكعد هشيم اروح ويا .

اباوعله وجهه انكلب من العصبيه
_ استغفر الله شبيج زينب شو ماتعرفين تحجين شنو مستثگلج ليش شايلج على راسي ؟ بس هم صوجي افكر بيج

باوعتله دار وجهه عني لزمت ايده وكلت :
_ يلا أخذني ميخالف شسوي بس قبل لا يكعد تجيبني !

هز رأسه بقبول گمنا وصه الدكتور الظاهر يعرفه لان ضل يسولف ويا شوي ورحنا طول الطريق محد حجه لا أنا بيه حيل ولا هو حتى مبين عليه التعب لان هو وهشيم كلش قريبين من بعض ملاحظه هل شي
رجعنا فتحت الباب ساره دخلنا جوه خطيه نزعتني عباتي وجابتلي ماي وكامت تسويلي اكل حتى ما خلتني اساعدها أصلا توسلت بيها كلساع تكول "فدوه الج " "غير انتِ اختي اشيلج بعيوني "
وكفتها وياي ما أنساها دخلت سبحت علما تكمل الأكل وطلعت كنان طالع هو وصلني وراح خلت كدامي الاكل وكالت :
_ اكلي يلا باعي وجهج اصفر

اكلت خاشوكه بالكوه وكعدت باوعتلي ماعاجبها :
_ شنو هاي عود هم أكلتي ؟ تضحكين عليه دكلي اكلي

ابتسمت مجامله وكلت :
_ اكلت والله ما اشتهي

اخذت الخاشوكه من ايدي وكعدت تريد توكلني واذا ما اكل تدغدني موتتني ضحك رغم ساعه اصفن ابجي وساعه تضحكني هيه لحد ما صدك شبعت دفعت الخاشوكه وكلتلها :
_ ونبي شبعت ساره والله هاهيه كافي

باوعتلي بعدم رضا بس سكتت قلقت باوعتلها وكلت :
_ تكدرين تخابرين على كنان ؟

عگدت حواجبها وكالت :
_ منين أخابره ؟

_ شبيج مو كنان اشترالج ذاك اليوم تلفون ؟

ضربت كصتها وكأن جانت ناسيه وتذكرت :
_ اي صحيح والله ما الزمه مادري وين حاطته خلي اكوم أجيبه وأجيج

هزيت راسي كامت جابته واجت طلعت رقم كنان واتصلت ما جاوب من ما جاوب القلق موتني ساره حاولت تهدأني ضليت الوب ماكدر كلساع اجر تلفونها اخابره وما يرد باوعتلها بخوف وكلت :
_ خاف صار بي شي؟

حجت تنفي كلامي بسرعه :
_ لا يمعوده شسالفه تفاولين على الرجال يجوز تلفونه مو يمه او حاطه صامت

سكتت ماريد أتخيل شغلات من عقلي حطيت راسي بين ايدي دايخه مسحت على راسي وكالت :
_ كولي يا الله حبيبتي ان شاء الله مابي شي

نزلن دموعي وانا اكللها :
_ اخاف خاف بي شي اموت وراه والقران ماكدر بيه ولا بي

صفنت بعيوني وكالت :
_ هلكد تحبينه ؟

نزلت راسي وكلتلها :
_ لا ما احبه بس اعزه هو هواي وكفلي

قلصت عيونها وكالت :
_ بس كلامج ودموعج الي ما نشفن كلها تدل على انو گلبج عاشگه لا توهمين روحج مبين على عيونج الحب ياحلو

ابتسمت وكلت :
_ مو مهم إذا احبه لو لا اهم شي يكعد ويفتح عيونه وكتها افكر بهل سالفه

سكتت بس كل شوي تباوعلي عبالها احبه حقها انصدمت شنو خاطبني وباعتبار مرته وما احبه ما راهمه ،بقيت اروح واجي ساعه اكعد ساعه افتر احير شسوي اريد بس كنان يجاوب يطمني وماريد شي بعد والله باوعت لساره وكلت بتردد :
_ عادي اخذ تلفونج ؟

شمرته وكالت :
_ عيب عليج شوكت ما تريدينه كدامج

_ لا هو بس ادك وارجعه

باوعتلي صفح وكامت عافتني وحدي دكيت على كنان ما جاوب دكيت مرتين الثالثه جاوب فزيت من جاوب واخيراً وكلت بلهفه منتظره الأخبار الي تهديني :
_ هشيم شلونه ؟ طلع من العمليه ؟

بهت وجهي من كال بصوت مبحوح :
_ قوي گلبج باللي راح تسمعينه خويه ..

______________
سـاره

استغربت من كلامه :
_ منو همه ؟

_ ماكو شي حبيبتي

سكتت ماريد أجادل لان هيج هيج مايوضح كلامه فـ سكتت اخذها وطلع لعبت نفسي من الغرفه كلها عفتها وطلعت ما اسمع اله صوت صياح زينب طلعنا وانصدمت وانا أشوفها واكعه وهشيم مليان دم بالكوه صحيتها على زمانها حتى تروح وياهم راحت فعلا رجعت بسرعه للبيت وسديت الباب وقفلته كعدت ارجف خفت من المنظر الشفته ماكو ربع ساعه وحسيت الجام تكسر صرخت كل قوتي خايفه سديت أذني وكعدت بالزاويه ارجف ميته خوف گلبي يدك سريع مرت عشر دقايق ماكو صوت ثاني كمت على كيفي جسمي كله يرجف اخذت تلفوني وايدي ترجف دكيت على كنان دكتين ورد :
_ ها ساره ؟

_ الحكلي كنان الجام تكسر عليه مادري منو ضربه و

قاطعني يصيح :
_ شكو منووو كسره ولج احجييي

رديت بخوف :
_ م..مادري والله مادري هو نكسر احد ضربه كلشي مادري

رد عليه مبين بصوته القلق :
_ باعي حبيبتي راح ادزلج ولد كرايبنا يبقى بالباب علما اجيب زينب واجي ديربالج تتحركين

كلت بتردد:
_ بس كمان ماري..

_ اشش ساره اشش گلبي وبالي وياج لا تخليني اصيح عليج ماكدر راح اجيب زينب واجي بس احسن يجي يم البيت يوكف

مابيدي غير أوافق :
_ تمام

سلم وسده كعدت خايفه حرت شسوي حتى الهي روحي ويروح الخوف علما يجون شويه واندك الباب رجفت خايفه ماكمت اندك مرتين هم ماكدرت اكوم من الخوف كلت هسه هذا نفسه الي ضرب الجام يخطفني كعدت أتخيل شغلات كمت اطكطك صرخت من دك تلفوني مفززني باوعت كنان استغفرت ربي وجاوبت أجاني صوته مبين الخوف عليه :
_ ساره بيج شي وينج ليش ما تفتحين الباب للولد؟

بلعت ريكي هذا الي دزه نسيت جاوبت بتوتر :
_ ها مو خفت افتح الباب عبالي واحد يريد يخطفني

سمعته استغفر وكال :
_ حبيبتي شحده اليوصلج وانا موجود هذا الولد يلا كومي لبسي عبايه وفتحي الباب وهو أصلا مراح يدخل

_ تمام حبيبي

بسرعه رد :
_ شنو؟

سديته بوجه خجلانه كمت بسرعه ناسيه الولد صار شكد يدك بالباب والله عيب لبست صايه وفتحت الباب بسرعه دار وجهه للجهه الثانيه وكال :
_ السلام عليكم خويه

_ عليكم السلام اعتذر والله بس خفت افتحه

رد عليه :
_ مو مشكله خويه أنا هنا اي شي تحتاجينه موجود يم الباب

_ أشكرك خويه والله راح أتعبك هسه كنان راح يجي مسافة طريق ، محتاج شي خلي اجيبلك جاي

ستوني اريد اروح كال :
_ لا خويه اشكرج مايحتاج والله ، هنا أنا راح اوكف يم الباب

تشكرت منه مره ثانيه وسديت الباب شكد عيب واكف يم الباب وديتله ماي تشكر مني كعدت بالبيت انتظرت لحد ما يجون وفعلا اجت بس زينب حال الضيم حالها سوده عليه بقيت أواسيها مابيدي شي غيره
لحد ما طلبت تلفوني انطيتها ورحت للمطبخ اغسل المواعين لحد ما سمعت صرخت زينب ....

يتبــعع...

_________________________________

بنات اعرف كُلش طولت بس جانت فتره صعبه امتحانات ووراها فتره الإعفاء لحد ما علنوا يلا ارتاحيت
فـ الي أسبابي .

ان شاء الله هسه اكدر اكمل الروايه على خير

حسابي الانستا

قناة التليگرام انشر بيها أوقات البارتات
وكلشي يخص الروايه

الباقِياتُ الصَّالِحاتُ:
-سُبحــانَ الله
-الحمــــدُ لله
-لا إلهَ إلا الله
-اللهُ أكبـــر
-لا حَول ولا قوة إلا بالله
-سُبحــان الله العَظيــم
-سُبحــان الله وبِحَمـده
-أستَغفِــر الله وأتوبُ إليه
-اللهُمَّ صلِ علّى مُحمد وآل مُحمد