رواية فصلية ل راهب الفصل الثالث وثلاثون 33 - بقلم zena ali

مرحبا شلونجن يا حلوات ❤️?!

بدون مقدمات نبدي البارت 

.

.

.

.

.

.

.

.

.

غدير

بعدما طلع راهب بقينة كاعدين نسولف والبنات خلن العشة علية اليوم يردن اكلة جديدة سويتلهن اكلة يمنية طيبة كلش اسمهة(برم) خلصنة العشة وكالت ماما ننتظر بابا و راهب وحسن اخيرا بعد ايام راح ننجمع صار هواي ما كاعدين عالسفرة كلنة 

كلت للبنات راح اصعد اسبح وابدل وانزللهم 

سبحت وطلعت من الحمام دخلت للغرفة لكيت راهب كاعد عالجرباية ويشرب جكارة استغربت صار هواي مشايفتة يشربهة علمود حمل ترف مو زين تشم ريحتهة 

نزعت الخاولي من شعري وحاجيتة

غدير:ها راهب اليوم بغرفتي 

............

غدير وهي تندارلة: راهب?

راهب: تلفونج وين?

غدير باستغراب: عالشحن ليش?!

راهب : جيبيه 

استغربت طلبة تلفوني عالشحن مخليتة عالكومدي رحت جبتة وانطيتة الة اخذة مني وبقة يگلب بيه ويباوع علية مدري ليش گلبي كام يوجعني وصدري ضاگ بيه النفس 

راهب: وين السيم كارت?!

من كال هيج احس قالب ثلج وكع علية وگبل عيوني غورگت

غدير: ي..ي..يا..سي..سيم..ك..كا..كارت

راهب: ماريد اعلي صوتي وين السيم كارت 

غدير: ذبيتة

راهب باستهزاء: لان عافج مو اي حقج تذبيه..كام على حيلة وكمل حجي ليش هيج خوية ليش ولج عفتي الدنيا بكبرهة عفتي الزلم كلهة وية هذا المهتلف ولج لييييش

ماعرفت شحجي شنو تبريري الة لان ما تخلوني اطلع واطب?! حقهم الدنيا مدري شلونهة لان ماخلوني اكمل كلية? هم حقهم يخافون علية ومع ذلك ترف حاجت راهب واجة وحاجاني وسألني

.

.

.

.

راهب وهو يدك الباب: غدير 

غدير: هلا خوية اتفضل ميحتاج تستأذن ترا

راهب: ولو زعلان عليج بس شسوي 

غدير: ليش زعلان مني راهب سويت شي يزعلك?!

راهب: تردين تكملين دراسة?!

غدير بقت ساكتة ودنكت 

راهب : ترف كلتلي تردين ترجعين تدرسين ..تردين ?!

غدير بسرعة: اي اريد 

رجعت دنكت وراهب ضحك 

راهب: لعد ليش ما جيتي كتيلي من كنالج اكعدي بعدما خلصتي الثالث جنتي صغيرة وانتي هم ما كلتي لا ولا ناقشتي بالعكس كيفتي حتى تكعدين وتنامين بكيفج ولهسة ما حجيتي ولا طلبتي ترجعين 

غدير: بالبداية اي اخذني الحماس لان تعبانة من الدراسة والكعدة والامتحانات بس الكاتبة زينه علي بعدين تندمت ولهسة اتمنى ارجع وخفت احاجيك بس من قبلت ترف ترجع لدراستهة وجوري هم حتكمل البنات شجعوني اكثر عالدراسة واتفقنة ترف تحاجيك 

راهب وهو يجرهة لحضنة: ولج اني اخوج واني اللي ربيتج لا تخافين مني والدراسة بوكتهة كتلج وخيرتج وانتي ما اعترضتي وتدرين كلش زين ليش كتلج تكعدين بوقتهة مع اني لهسة اخاف عليج وعلى امي وترف اذا طلعتن لو رحتن لمكان تدرين بية مكاني حساس و ابونة هم 

غدير : يعني مراح ارجع?! حتلو مثل ترف و جوري بالبيت واروح عالامتحانات

راهب بضحك: ماكلت هيج ..صار تبدي السنه الجديدة واقدملج عالسادس وشوكت ماتردين ترحين انتي وامي للمكتبة او اطلبلج من النت كتب وملازم وشنو تحتاجين ومنا للسنة الجديدة اختاري شتدخلين علمي لو ادبي وشوفي شتحتاجين وبعد الكاتبة زينه علي ماريد اسمع منج كلمة اخاف ماريدج تخافين لا مني ولا من غيري اني اذا اتعصب فلان احبج واخاف عليج ماعندي اخت بالدنيا بس انتي ولج انتي اخر العنگود بنص گلب اخوتج انتي

غدير وهي تبوس ايدة: اروحلكم فدوة اخوتي شعندي غيركم الله يخليك الي يا راهب والله انته احسن اخ بالدنيا كلهة ..اروح اركض للبنات اكللهم 

.

.

.

.

راهب وعيونة حمرة: جاوبيني ولج ردي علية ريحيني بشي ليش غدير ها? ليش عزتي شي وما لكيتيه?! ملابس فلوس كلمة حلوة شو كلة عندج شردتي من واحد مثل هذا??!

ماحسيت الا بحرارة قوية بوجهي ..ضربني

اول مرة بحياتي راهب يمد ايدة علية شكد عصبي ويصير نار بس بعمرة ما مد ايدة علية لا هو  ولا حسن ولا حتى بابا بقيت مدنكة ولا فتحت حلگي حقة شيسوي و شيگول حقة اني الي سويت هيج بروحي اني اللي نزلت نفسي من عين اخوية 

راهب: ماكدر اطلع الي بگلبي مع انة هواي ولا اكدر امد ايدي عليج مو خوف عليج لا والله ما تستاهلين خوفي بس علمود ابونة ..ابوية الرجال الجبير شيخ العشيرة الي الناس كلهة تحبة وتهابة الكاتبة زينه علي وتحترمة ماريد يدنك راسة من وراج حتلو كدامي وحتلو بينة وبين نفسة ولخاطر امي ماريد يصير شي بيهة ولخاطر حسن الي هسة يلا ارتاح وشاف الدنيا ..ماريد اشوفج كدامي ولا لسانج يطخ لساني 

اخذ تلفوني وطلع واني بقيت واكفة بمكاني مافكر بشي ولا ابرر لشي احس عقلي ولساني وجسمي متخدرات كعدت بنفس مكاني وبس دموعي تجري 

.

.

.

.

.

.

.

ترف

نزل راهب من فوك وطلع للحديقة بس احسة مو طبيعي حتى جوري سألتني شكو وكتلهة مادري و ما حجة وياية كلت لجوري تحضر السفرة واني هسة اجيهة و  طلعت وراه لكيتة كاعد مدنك ويشرب جكاير 

ترف وهي تخلي ايدهة على جتفة: راهب 

راهب وهو يطفي الجكارة بايدة: ها 

ترف: صاير شي 

راهب وهو يوكف ويبوس راس ترف: لا ماصاير شي طبي اتعشي ونامي اني طالع 

ترف وهي تلزم ايدة: راهب اني متاكدة صاير شي احجيلي لا تبقى شايل الهم لوحدك صحيح اني زعلانة عليك شوية بس ابقى مرتك وحبيبتك اكعد وسولفلي لو تحب نصعد لغرفتنة?!

راهب: بنيتي ادري زعلانة بس اتحمليني هالفترة وبعدين ارجعي ازعلي وعيونج تعبان

ترف وهي تحضنة: اسم الله عليك من التعب تعال وياية 

اخذتة من ايدة ودخلنة شافتني جوري وضحكت 

جوري بصوت ناصي: راح احضرلكم عشة تعالي اخذيه

سويتلهة شكرا بايدي وصعدنة فوك 

ترف: حبيبي ادخل اسبح وراح اطلعلك ملابس وانزل اجيب العشة 

راهب بتعب: انزلي اتعشي بنيتي اني ماشتهي

ترف: ماكو هيج حجي اني ما ماكلة ومنتظرتك يلا ادخل 

دخلتة للحمام ورحت طلعت ملابس خفيفة وخليتهن بالباب ونزلت اجيب العشة شافتني عمتي خطية ضال بالهة لان راهب ما طب عليهة 

الشيخة فضة: ها يمة راهب شبيه ليش مانزل?!

ترف: لا تخافيت عمة بس تدرين الشغل وتعبان خطية حتى ماقبل يتعشى بس اني لحيت عليه 

الشيخة فضة: اي عفية خلي ياكل غصبا عليه وكليلة الصبح يجيني قبل لا يروح لدوامة 

ترف: صار عمة 

راحت عمتي واجتي جوري 

جوري: ها حبي ناقص شي بالصينية 

ترف: انتي كفو والله اخدمج من يجي حسوني ان شاء الله 

جوري: ماريد اتجاوز عليج انتي اختي الجبيرة وهو حسونتي اني مو حسونة احد 

ترف: هههه طاح حضج ..حسن هم خفارة اليوم?!

جوري: اي للاسف والله مشتاقتلة شوكت يجي باجر 

ترف: هههه كملي عشة وخابريه صبري روحج 

جوري: بدون متكولين حبي 

ترف باستغراب: وين غدير لعد كالت اسبح واجي 

جوري: والله مادري هسة اكمل صبت العشة واصعدلهة

ترف: ماشي 

صعدت وبالكوة فتحت الباب لكيت راهب ينشف بشعرة شافني شايلة صينية يمة خنزر بوجهي واجة اخذهة مني 

راهب: الف مرة كتلج لا تشيلين شي ولا تبقين صاعدة نازلة 

خلة الصينية بالكاع كعد وكعدت بصفة بدة يسوي لفات صغار ويوكل بية واباوع عليه اكل لكمتين تلاثة 

ترف: راهب اكل انته اني شبعت 

راهب: الحمد لله اني هم شبعت عوفي الصينية اني انزلهة بعدين 

عافني وكام للجرباية نام وخلى ايدة على عيونة ,متأكدة صاير شي وميقبل يحجي 

خليت الصينية على صفحة ورحت يمة شلت راسة خليتة بحضني وبقيت العب بشعرة 

ترف: حبيبي احجيلي شصاير وياك 

راهب بقى على نفس نومتة: مصاير شي

ترف: بس شكلك يكول صاير احجيلي راهب لا تبقي بگلبك تتعب و تتعبني 

راهب: جنتي تدرين بسالفة غدير ومحمد?!

بقيت ساكتة ومصدومة شدراه بهالسالفة والموضوع اصلا انسد من شهور شفتحة هسة ومنين عرف اصلا 

راهب : شو سكتي 

ترف: احمم اي عرفت قبل فترة 

راهب: ماشي

ترف: هو هذا الموضوع الي مضوجك?!

ما جاوبني بس وخر و خلى راسة عالمخدة اني محجيت شي بعد كلت اخليه براحتة الكاتبة زينه علي وماريدة يتعصب بس اكيد حجة وية غدير ولهالسبب غدير مانزلت بعد كمت خليت الغطة عليه ونزلت من الجرباية توني اريد ادنك عالصينية وصاح علية

راهب: كتلج لا تنزليهة اني من انزل انزلهة وياية ولا ترحين لغدير 

ما جاوبتة بقيت بمكاني 

راهب: سمعتي شكلت?!!

ترف: سمعت راح اروح لجوري شوية و اجي

راهب: لا تتاخرين

نزلت لكيت جوري مكملة المواعين وتريد تصعد 

ترف: جوري وين عمي وعمتي?!

جوري باستغراب: شربو الجاي وكاعدين بالصالة شوية وينامون ليش?!

ما جاوبت بس سحبتهة من ايدهة ودخلنة المطبخ

ترف: غدير وين?!

جوري: صعدتلهة وماجاوبتني وردت ادخل للغرفة لكيتهة قافلة الباب ما لحيت عليهة شصاير?!

ترف بتنهيدة: راهب عرف بسالفة محمد وعالاغلب حجة وية غدير ولهالسبب غدير مانزلت

جوري بصدمة: عزاا و راهب شعجب هادي وساكت

ترف: كولي الحمد لله تردينهة تصير مذبحة تخيلي حسن يدري يگصبنة كلنة والله 

جوري: مادري شكول والله خطية غدير يعني راهب يدري من ينتهي كلشي شهالحظ 

ترف: راهب ساكت كلش وهادي كلش واني ادري بيه ضام كلشي بگلبة وغدير خطية والله كاسرة خاطري ما صدكنة الموضوع انسد وراح ترجع للدراسة 

جوري: زين منو الي كل لراهب ?!! معقولة محمد

ترف: ماعتقد هذا جبان مستحيل يسويهة 

جوري: لعد منو ?! 

الشيخة فضة: شبيجن ليش كاعدات هنا?!

ترف : مابينة شي عمة ,محتاجة شي ?!

الشيخة فضة: لا ماريد شي اني وعمج رايحين ننام ومو تنسين تكلين لراهب يمر علية قبل ميروح للدوام

ترف: صار عمة ما انسى

الشيمة فضة: تصبحون على خير 

ترف و جوري: وانتي من اهلة

راحت عمتي وجوري كالت راح تصعد واني طفيت الاضوية وهم صعدت لغرفتي طبيت لكيت راهب بسابع نومة كلت ماطول نايم اخذت الصينية نزلتهة وغسلت المواعين ورجعت صعدت الكاتبة زينه علي بدلت ونمت بصف راهب اباوع على وجهة خطية مبين كلش تعبان من الشغل وادري موضوع غدير زعلة كلش مادري شلون نمت 

كعدت الصبح لكيت راهب طالع غسلت وبدلت ملابسي ونزلت راهب طالع من وكت كلش هسة يلا ساعه سبعة نزلت جوة كلهة نايمة رتبت البيت شوية حضرت الريوك بقة بس المسح على جوري ماكدر ادنك صارت بثمانية وكعدت عمتي وعمي 

الشيخ حاكم: صباح الخير 

ترف: صباح النور شلونك عمي ماشفتك البارحة من رجعت

الشيخ حاكم: الحمد لله شلونج انتي بنيتي خوما تعبانة?

ترف: الحمد لله بخير الله يخليك 

الشيخة فضة: راهب وين لعد?!

ترف: كعدت لكيتة طالع 

الشيخة فضة: اووف من هالولد مو كتلج خلي يجيني الصبح 

ترف: والله عمة صعدت لكيتة نايم وكعدت ما لكيتة هسة اخابرة واكلة حتى يجي من وكت 

صعدت اشوف جوري لكيتهة حاي تبدل تريد تنزل كتلهة تنزل واني راح اروح لغدير 

رحت لغرفة غدير دكيت الباب ماكو رد ورجعت دكيتة هم ماكو رد دكيت الباب اقوى هم ماكو رد منهة 

ترف: جووري..جوري 

جوري احجتني ركض خطية: ها ترف شبيج

ترف: اكو مفتاح احتياط بغرفة عمتي جيبيه 

جوري: ليش غدير متفتح?!

ترف: اي مجاي ترد واني بديت اقلق

نزلت جوري ركض واجتني هم ركض اخذت منهة المفتاح وكتلهة تنزل يم عمتي وعمي حتى ما يشكون بشي نزلت واني فتحت الباب دخلت لكيت غدير نايمة بفراشهة 

كعدت يمهة : غدير..غدورة حبيبتي..غدير 

احاجيهة مترد علية طبطبت على وجهة هم مترد علية گلبي وكع وهي متجاوبني طلعت من الغرفة ركض 

ترف بصوت عالي: جووري ..جووري 

رجعت اطبطب على وجه غدير رشيت عليهة مي حتى ما رمشت دخيلك ربي ولج غدير شجاج طبت جوري خطية وجهة اصفر 

جوري: شبيج ترف شكو 

ترف ببجي: غدير متكعد جوري ولا ترد علية ركضي جيبيلي عطر من الميز 

جابت عطر واجت رشت على ايدهة وشممت غدير وهم مانطت اي رد فعل 

جوري بعياط: ولج غدير كوومي عاد ..اني نازلة اصيح عميد 

مادري شوكت اجة بس مو وكتة ابد السؤال كمت جبت حجاب وعباية همزين نايمة بتراك مستور لبستهة شالهة ودخل الولد خطية  و وراه عمي وعمتي وعمتي اباوع عليهة وجهة اصفر واديهة ترجف 

الشيخة فضة: شبيهة غدير ترف شصارلهة

ترف ببجي: والله عمة مادري دخلت عليهة لكيتهة هيج 

عميد: ماكو شي صلو على محمد من رخصتك عمي اشيلهة نروح للمستشفى

الشيخ حاكم: مرخوص وليدي 

شالهة عميد واني خليت عليهة العباية ونزل يركض من الدرج راح وياه عمي وجوري وعمتي واني بقينة بالبيت اني حامل وعمتي ماكدرت الكاتبة زينه علي تمشي من الهبطة عاد عمي كللهة تبقى بالبيت وحتى جوري ماقبل على روحتهة بس كلتلة لازم بنية وياهم وخلاهة تروح

بس طلعو اتصلت على راهب ما جاوبني اتصلت مرة ثانية رد

ترف بغصة: راهب الحكنة

راهب: شبيج ترف !

ترف: غدير مادري شبيهة نكعدهة متكعد وعمي وعميد صديقك اخذوهة للمستشفى 

حتى مارد علية سدة بوجهي اكيد راح يتصل على عمي يعرف وينهم توني سديت تلفوني ودخل حسن وعكد حواجبة من شاف حالتي واكفة بالمطبخ و وجهي احمر من البجي 

حسن: شبيج ترف صاير شي 

ترف: غدير اخذوهة للمستشفى حسن غدير متكعد

بعدني ما مكملة كلامي عافني وطلع ركض واني دخلت يم عمتي بالغرفة لكيتهة تقرا قرآن وتبجي كعدت بصفهة واحس بطني بيهة مغص بس ما كلت لعمتي الي بيهة مكفيهة 

.

.

.

.

.

.

.

راهب

ركضت للسيارة ودكيت على ابوية انطاني عنوان المستشفى ربع ساعه و وصلت نزلت ركض سألت الاستعلامات عليهم 

صعدت للغرفة الي انطوني رقمهة (عناية) لكيت ابوية و عميد وحسن وجوري هم واكفين 

راهب: شصاير يابة شبيهة غدير ?

ابوية ما جابوني بس صافن انداريت لحسن

راهب: احجي حسن شبيهة غدير??

حسن: الطبيب يكول بداية جلطة بس تلاحكوهة لو متأخرين جان..

راهب: انته شتكول جلطة شنو!? هاي غدير ولك عمرهة 19سنة منين اجتهة الجلطة 

عميد : اهدا راهب مابيهة شي والله الطبيب طمنة 

حسن: الطبيب يكول ممكن بسبب حالة نفسية او زعل قوي مو شرط بالعمر لو المرض

احس واحد كفخني على راسي (من الزعل) !!!

كعدت بالكاع وراسي بين ادية حسيت بعميد كعد يمي وايدة على جتفي

عميد: صلى على محمد راهب مابيهة شي وداعتك الطبيب طمنة اليوم تبقى حتى ترتاح وان شاء الله باجر تطلع للبيت 

باوعت لابوية بعدة مدنك ومبين تعبان حسن كاعد على صفحة وجوري بصفة تبجي كمت على حيلي رحت لابوية

راهب: يابة ارجع انته للبيت واخذ حسن ومرتة وياك اني راح ابقة هنا يمهة 

الشيخ حاكم: لا بوية ارجع انته لدوامك واخوك خطية هم تعبان صارلة يومين بالدوام اني باقي هنا 

راهب: ميصير يابة انته ارجع للبيت وهم طمن امي واني باقي هنا كوم بوية وانته حسن كوم ودي مرتك للبيت خطية شوف شصاير بيهة يلا خوية كوم 

كام حسن بدون ما يحجي گوم ابوية 

جوري: باجر الصبح اجيب ملابس لغدير واحضرلهة ريوك هم 

راهب: رحمة الله والديج بوية بس لا تتعبين روحج دزيهن بيد حسن وانتي ابقي يم ترف وامي 

جوري: ان شاء الله 

راحو وبقيت بس اني و عميد 

راهب: شجابك وياهم?!

عميد: رحت لبيتكم وديت ثواب الوالدة مسويتة على روح ابوية اول ما طبيت سلمت على الحجي وسمعنة صوت عياط البنات لا يضل بالك صدكني الطبيب كال الحمد لله مابيهة شي لان جبناهة من وكت 

راهب: ان شاء الله خير اخذ راحتك انته عميد هم تعبت وعندك دوام 

عميد: لا تكول هيج راهب ماسويت الا الواجب اني رايح اكمل كم شغلة وارجعلك محتاج شي اجيبلك وياية?!

راهب: سلامتك حبيبي 

.

.

.

.

.

.

.

جوري 

من اجة حسن للمستشفى لحد هسة هو ساكت صحيح ميبين عليه وميبين مشاعرة بس ادري شكد قلقان وكلبة مرفرف على غدير والي لهسة الكاتبة زينه علي مصدومة من الي كالة الطبيب معقولة بسبب الي صار البارحة ولان راهب حجة وياهة على موضوع محمد 

طبينة للبيت تلكتنة عمتي 

الشيخة فضة: ها حاكم وينهة بتي?!

عمي بقة ساكت وطب لغرفتة واندارت عمتي لحسن

الشيخة فضة: اختك بيهة شي حسن?!

حسن: مابيهة شي يمة بس تعبانة وراح تبقى اليوم بالمستشفى حتى نطمن عليهة

الشيخة فضة: لا تجذب علية حسن اختك بيهة شي ,ليش ابوك مايحجي لعد لوما بيهة شي

حسن بتنهيدة: وغلاتج الطبيب كال مابيهة شي تعبانة وتدرين بنات هالوكت مايتحملن هي ترتاح اليوم و باجر ترجع تنور البيت ,جوري اخذي حبوب وجع راس لابوية وحضيرلي ملابس وملابس لراهب اوديهن الة 

جوري: صار,عمة لعد وين ترف?!

الشيخة فضة: والله يمة مادري خطية انهبطت و وجهة جنة ليمونة شوفيهة يمة خاف بغرفتهة اني ضل بالي بس مابية اصعدلهة

جوري: هسة اني اشوفهة 

رحت انطيت حبوب الراس لعمي و وياه ستكان جاي وصعدت لترف اشوفهة واكللهة تحضر ملابس لرجلهة 

دكيت الباب ودخلت 

جوري: تررررررف

.

.

.

.

.

.

.

.

.

شتكولون منو ورة المصايب الي تصير ببيت راهب?!
الي تخمن صح البارت الجاي اهداء الهة🌷

شصاير لترف?!

ردة فعل راهب لاختة جنتو متوقينعهة?!

بنات فدوة لگلبجن ارجع واعيد مو حلوة البنية تتلفظ بالفاظ متليق بيهة ++ القصة كتبتهة ب2018 وجان مثل الترند بوقتهة كلهة تكتب عالفصليات واكثر من مرة عدلت عالقصة بس ماكدر اغير الفكرة الرئيسية فرجاءا الي متحب هيج قصص وتشوفهة ستايل قديم (كرنج) مثل متكولون هالايام لا تقراهة وتسوي سكيب بدون اي غلط وتجاوز
اني احبكم كلكم وكلش افرح بكلامكم الي وتعليقاتكم اللطيفة