فصلية مرتين ✌ الفصل الخامس والعشرون 25 - بقلم مرتحلة

الكاتبة :

منو چان محسب حساب أن يصير حادث لمهند !؟
أو يروح مصطفى بيها !؟
أو حتى اصلا روان چانت تحب مصطفى لهاي الدرجة !؟؟
محد چان عندة علم على هذا الموضوع ، هذا الموضوع يسمى القدر و ما كتب الله لك فأقبل بنصيبك .
الحادث صار لما چان مهند و مصطفى بطريقهم حتى يروحون للمستشفى و يشوفون روان لان مصطفى چان يبچي و يريدها .
و من گلمو يمشون بالطريق ما حسو غير صار حادث بينهم و بين سايق متهور و غير واعي اصلا !!

روان فقدت وعيها بعد ضربها بكمية من المخدر و كمية ثانية من البنج لا ما فادها الكمية الاولى .
بينما مهند بالمستشفى بغيبوبة وقتية تستمر الى اسبوع ، و البقية بالبيت علمود الفاتحة مال مصطفى .
ريناد و ام مهند و سماح و نور چانو جميعهم موجودين بالبيت و بالهم يم مهند و روان .
..
گعدت روان ثاني يوم الصبح من أثر البنج القوي ، راسها يوجعها و تذكرت موت مصطفى و حادث مهند يلي لهذه ما سامعة اخباره .
صاحت على وحدة من الممرضات تجي تساعدها لان تحس نفسها ما تگدر تتحرك خارت قواها .
ساعدتها الممرضة و راحت اتصلت على ريناد و دموعها ما جفت ابد بس تبچي لان وين ما تروح مسدودة بوجهة و حظها فگر خطية .

**٪٪**٪٪**٪٪**٪٪**٪٪**٪٪**٪٪**٪٪
روان :

روان : الو ريناد تعالي اخذيني لمهند اريد اشوفه فدوة 😭
ريناد : حبيبتي ما نگدر لان عدنا فاتحة و هذا ابن الشيخ موش اي واحد الچان حتى اترك فاتحته .
روان : فدوة گلبي عليچ الله دزي حتى لو فلاح خل ياخذني اله 😢
ريناد : أن شاء الله ... الله يصبرچ 😞

سديت التلفون و ظليت ابچي ، گلت للممرضة تأخذني لغرفة الجهال حتى اطمأن عليهم و اروح .
اطمأنيت عليهم و علاج هناء بعد ثلاث اشهر الجرعة الأولى منه .
گعدت بغرفتي و ظليت منتظرة شي ساعة و ربع يالله اجة فلاح أخذني لمهند ، ظليت الطريق كله بس ابچي و انوح و هو يهدأ بية 😭 .
وصلنا المستشفى و اني جريتها بچي صدگ 😂 ، دخلت اركض للغرفة بعد ما دلوني عليها .
شفته نايم و الأجهزة شلون مربوطة بيه ، گمت اسحل بروحي علمود اروح يمه لان انهزيت من الضعف و من القهر .
بس وصلت يمه لزمت أيده و وگعت بالگاع ، لزمني فلاح و گمت اصيح بس مو بصوت عالي .

روان : ولك مهند !!! .. ولك گوم اني ما اگدر ابقى وحدي هيچ بهاي الحالة و گدام الشمات !!!! .. گوم يا حزام ظهري گوم شيخ گلبي ولك گوم حبيبي اني شنو أسوة بدونك ... ولك گوم احچي وياي ولك شلعت گلبي گووووم ... يا يابة يا بويةةةة ولچ يمةةةةة .. ولكم اني ليش ما عندي حظ !!؟؟؟ ... ولك گوم گلبي انفت فت عليك شلون اني أظل هيچ بدونك ... ولك بس احچي وياي و ارجع نام بس خل اسمع صوتك .. والله احبك و الله اموت عليك و ما اگدر بدونك .. چذب اذا فد گتلك اكرهك و الله اعشقك و اموت عليك .. بس گوم اني شلون بالله وياك ... بس گووووووم 😭 !!!!

فلاح گام يجر بية و اني لأزمة ايد مهند و بالايد الثانية لأزمة خده ، و اعيط باعلى صوتي و الممرضين و الدكاترة اجو حتى .
طلعتي فلاح و هو يجر بية ، ولكم يا ناس ما تفهمون اني احبه و ما اگدر بدون ما اشوفه والله 😭 .
ظليت ابچي إلى أن هدأني الدكتور و طمأنينة عليه و گال اقل من اسبوع و يگعد هدأت شوية انوب گلت لفلاح يسوي تحويل الي و يخليني اني و جهالي نجي هنا ابقى يمه .
هو خطية سودة علية ما قصر وياي راح سوى اوراق النقل و خلاني اجي يم مهند اني و جهالي الحلوين .
..
فات يوم ، يومين ، ثلاثة ، اربع ، خمس ايام فاتن و ماكو تغير مهند على نفس الحال يگولون من الصدمة .
دا اكل و دخلت الممرضة گالت مهند گعد ، گمت من مكاني و ركضت لغرفته سته گاعد و مخلي أيده على رأسه و يمكن يبچي 😩 .
رحت يمه دخلت ، گعدت على الچرباية و خليت ايدي على رأسه و گمت امسح عليه .
هو بسرعة شال رأسه و شافني و بچى و حضني ...

روان : أنا لله و انا اليه راجعون ... البقية بحياتك 😢
مهند : ولچ راح من اديه عزيز گلبي و ما گدرت اسوي شي يا الله 😭
روان : لا اله الا الله ... لا تبچي الله عوضك براشد و هناء .. ربك ما يضر عبده بقراراته حاشا لله 😞
مهند : استغفر الله .... اريد ارجع للبيت 😖
روان : هسه راح اصيح للدكتور انت احچي وياه .
مهند : بس منه اليابچ هنا لهاي المستشفى !؟
روان : فلاح الله يعطيه الصحه و العافيه هو سوى كل شي و حتى الجهال جبتهم هنا يمنا حتى نگدر نشوفهم و وطمأن عليهم .
مهند : ما چان اكو داعي تتعبين نفسچ و الجهال .

طلعت من الغرفة و صحت الدكتور علمود يحچي وياه مهند ، قبلة يطلعون مهند بعد ما مهند تعارك ويا الدكتور 😂 .
طلعنا بس اهال بقو و گال مهند بعدنا على نفس خطتنا ، اني التزمت بالخطة و سويت نفسي كلش مقهورة 😢 .
اجة فلاح و جاب وياه سيارة و خلانا نصعد ليورة اثنينا 😅 ، مهند چان لازم ايدي و بس يباوع بوجهي ، اني استحيت 🙈 .

فلاح : يمعود البنية بالگوة فاتت سلامات من حملها تريد تكتبها هاي المرة 😉 .
مهند : ولك اووووف ... تدري شنو مسوية بية هاي الگصيرة .. ولك بس كون تخليني انفرد بيها ما تخلص من ايدي ......... بس انه تعبان و هيه نفسة (حالة الحامل بعد الولادة تسمى "نفسة" ) .
فلاح : ولك على كيفك اخوية چاو موش هيچ گلنا !!! .. بعد هيه صغيرة و من شوي تكبر تتحملك مو هيچ فرد موتة تريد تكتبها و تحبلها (تجعلها حامل) مرة ثانية 😏 ... يو انتي شنهو تگولين روان !؟
روان : 😓 .... (بلا رد)
مهند : ها شوف !!! ... السكوت علامة الرضى 😉 .

اني سكتت لان هذا مو موضوع ينحچي بيه ، مع كل هذا الشقى والسوالف و الضحك مهند مكسور بداخله على مصطفى و مبين من عيونه 😞 .
وصلنا للبيت و الناس لابسة اسود و عمتي مبينة البچي بعيونها هيه و ريناد و سماح و نور .
دخلنا محد يدري أن اني جبت غير المقربين كلش منا لذلك البعض ابتسم الي و البعض سلم علية و عزاني على فقدان ثلاثة 😂💔
صعدت فوگ للغرفة و اشوف شروق واگفة يم باب غرفتها القديم لابسة بوشي لان هيه بعدتها مال الطلاگ .
بقيت صافنة عليها و هيه گامت تبچي و گعدت بالگاع ، صعد مهند وراي و چاو حيل تعبان و انصدم من وجود شروق هنا .
ظل واگف يمي و صافن علينا ، إلى أن تكلمت شروق و هيه تبچي ...

شروق : سامحيني عليچ الله روان .. اني فقدت ابني بسبب شر أعمالي و چنت كلش مأذيتچ بحياتچ و حتى ابنائچ اخذتهم منچ بعد ما تعبني على تربيتهم والله اسفة روان عليچ الله سامحيني و هسه صدگت أن ربچ ما يخلي عباده بشدة يو يخلي الظالم دوم عايش بهناء ... سامحيني حتى گلبي طگ من القهر والله اسفة والله اسفة روان ... تدرين من سمعت ابني مات احس گلبي انخمش (انكسر ، تحطم و تأذى) و گام يوجعني حيل و تذكرت كل أعمالي وياچ و حسيت باحساسچ من فقدتي ابنائچ ... سامحيني الله يخليچ اخاف يجي يوم والله يگلب بية موتت ابنائچ يلي چانت بسببي و يخليني أفقد اعز ما املك و يلي همة ابوي و امي ... بس سامحيني و اروح والله 😭 .

اني اسمع بحچيها و ابچي وياها والله مسامحتها على كل شي سوته وياي و من مشاكل .
رحت عليها حضنتها و خليت راسها على صدري و فادني كوني گصيرة حتى ما اگعد بالگاع 😜 .
مهند مصدوم و گعد بالگاع و خله أيده على رأسه من الصدمة ، اني چنت متوقعة أن شروق ورى كل شي لان سمعت الخدامة ام قيس چانت تحچي وياها مرة بالغرفة مالتها بس ما حبيت اسوي مشاكل .

مهند : روحي الله يسامحچ يا بنت الناس .. بس ما أأمن الچ من حوبت روان .
روان : حبيبتي لا تبچين والله سامتحچ و الله يسامحچ بحق هو الحسين ابا عبد الله يا رب سامحها 😢 .
شروق : والله ما اعرف شنو اسوي !!؟؟؟ ... اشكرچ والله اشكرچ لان سامحتينـ ي 😭 .
مهند : يالله اطلعي لان مالچ گعدوة هنا من البداية ... وابنائي بخير و سميتهم هناء و راشد .
شروق : الله يخليهم الكم يا رب و يحفظهم بحفظه ورعايته 😢

راحت شروق و اني احس احساس غريب مثل كأن ما لازم تروح لازم تبقى لذلك صحت عليها .
دخلت للبيت گلتلها گلبي ما مطمأن على روحتچ گلتلي لا حبيبتي يعني أنه وين اروح غير لبيت اهلي .
راحت و گلبي بعده ، رحت صنجعدت بدلت لبست الوان لان ما يصير النفسى تلبس اسود مو زين .
بس بقيت بغرفتي لان عيب من المطار ، همة لابسين اسود و زوجة الشيخ الوان .
بالليل صعد مهند و باسني براسي و گلي شلونها ام الجهال ، گتله الحمد لله ، گلي بالله حضري روحچ لان أنه محتاجچ .
اني خجلت 😳 ، رحت لبست روب مو و عدلت نفسي و خليت مكياج شوي على السريع .
رحت يم مهند هو شافني و گبل جرني و و و و الخ 😂💔👍 ...

.............................................................

بعد مرور سنة و نصف 😊 :-

روان : ولك تعال بكررررر 😠 !!!!
بكر : لا انتي تعالي يا ماما بطيخة 😂 .
روان : ولچ فطومة روحي صيحي لبابا خل يجي يأدب ابنه الما متربي 😡
فطومة : اي ماما هتة (هسه 😂 لغة جهال بعد) الوح لبابا بكتلة بالقندلة (اروح لبابا بكتلة بالقندرة😂)

راحت فاطمة تركض نزلت ابوها و گلتلة أن بكر يصيح لأمه بطيخة هو ظل يضحك و صعد .
لگاها لأزمة بكر من شعره و مخلية الكتاب مال الرياضيات گدامة تقريره و بطنها واصلة لخشمها 😂 .
هناء و راشد گتمو يبچون و فاطمة تهوس بالغرفة و تگمز و فوگها بكر ما يريد يقرأ .
هو چان واگف يم الباب يضحك عليهم و على زوجته يلي صارت حامل مرة ثانية بسببه و راح يطيح حظها خطية 😂💔 .
عافت روان بكر و گامت تبچي مثل الجهال و مهند يضحك عليها و على تصرفها الطفولي هذا .

روان : تعاااال مهند !!! .. شوف جهالك شلون شلعو گلبي وباچر وراي امتحان والله شلون اقرأ هسه بالله 😭 .
مهند : تعالوووو ... بكر و فاطمة عوفو امكم وانزلو يمي ... و انتي شوفي شغلچ ويا الجهال و كرشچ 😂 .
روان : درووووح ... صوچي احچي وياك اصلا و هذا الكرش قابل اني سويته لو كله من وراك 😣 .
بكر : يعني شلون ماما كله من ورة بابا ؟؟ 😮
مهند : ولچ روااااان !!! ... صار المرة المية اگلچ لا تحچين هاي السوالف گدام الجهال بس والله انتي جاهلة اصلا 😵 .
روان : بالله انزل انزل احسن و سد وراك الباب و لد يزعجني دا اقرأ اني للامتحان و اذا صار شي و رسبت اجملك كل المسؤولية 😛
مهند : و اني شعلية اذا انتي صار شهرچ التاسع ويا الامتحانات مال اخير السنة 😌 !!
روان : اهووو ليش ذكرتني 😩 ... اي صدگ !! .. شوكت تأخذ هناء گال الدكتور باچر اخر جرعة و البنية گامت تحرك رجلها حتا و تلعب 😊 .
مهند : هو نفس موعد الحجز مال كل مرة اخذها بيه .. الحمد لله رب العالمين على هاي النعمة و على شفائها 😄 .
روان : اي والله الحمد لله ربي على كل شيء .

نزل مهند و عاف روان بالغرفة ويا التوأم هناء و راشد حتى تنومهم و تقرأ على راحتها لان عدها امتحانات مال اخير السنة .
اخذ فاطمة و بكر و نزل جوة ، خله فاطمة يم بيبيتها و بكر گام بقري بيه امتحان ايضا .
تعرفون أن الامتحانات الشفهية مال المتوسطة تصادف ويا امتحانات الابتدائية ، و روان بالثلاث و بكر بالثاني ابتدائي .
روان بكالوريا و مع أن هيه حامل مصرة أن تكمل علمود ما تفوتها سنة ابد ، صار عمرها ١٦ سنة .
أما بالنسبة لمهند ٣٢ و فطومة ٤ و بكر ٨ و التوأم ٢ 😍 .
ريناد و نور و سماح يجون بين فترة و فترة بس مو طويلة ابد ، مهند يعشق عائلته المكونة من زوجته الحلوة و بكر و فاطمة و راشد و هناء و عباس .
اي يريد يسمي ابنه الجاي عباس لان بعد ما فكر بروان و يلي گالته اله من دعاء و صار مستجاب عرف أن الامام العباس عليه السلام ما يعوف أحد و يلي تريده يسوي .
آمن بيهم و حبهم و گام يأخذها للزيارة هيه و الجهال و أمه و اخواته و أبنائهم كل فترة حتى يجيب الأئمة عليهم السلام الهم .

×׶¶×׶¶×׶¶×׶¶×׶¶×׶¶×׶¶×׶¶×׶¶×׶¶×׶¶×׶¶×׶¶

في الليل ١٢:٠٨ :-

روان : اااخ مهند گوم فدوة گوم بطني عاااا يمةةةةةةة راح اموت ااااااااااااه .. ولكم مو وجع هذا ما ينحمل يبوووو 😨😭 .
مهند : خير ان شاء الله خير بس اصبري هسه اجي خل اجيب امي 😫 .

نزل مهند يجيب امه بينما روان تصرخ من الوجع لان اول مرة تجيب طبيعي لان بالتأكيد صار الأحداث مال الدرج .
مما أدى إلى عملية قيصرية سريعة بالمستشفى لانقاذ التوأم خطية ، صعدت ام مهند و شافت روان تبچي و يمها فاطمة و بكر يبچون هم من الخوف عليها و التوأم هم يبچون من صوت البچي 😂 💔
لبيتها حجاب و عباية و گومتها ، رأساً صار ماي جوة روان ، مهند مات من الخوف عليها بس امه گامت تهلهل .

ام مهند : گلللللللوش 😄 ... وگع ماي راس الولد و خير ان شاء الله 😊 .

اخذوها للجدة أو القابلة المأذونة أو شوف شنو اسمها انتم 😅 ، ظل مهند و بكر برة و فاطمة هم .
راشد و هناء اتصل مهند لريناد و اجت بقت يزعم ، ورة شوي طلعت امه و بيدها ابنه سماه عباس و أخذه من أيدها .
اذن و أقام باذاناته و باس رأسه ، أخذته و دخلت ام مهند يم روان علمود ترضعه .
دخل مهند و باس راسها و خدها و حضنها و هيه هم بچت من الفرح ، و رجعوا للبيت و الكل فرحان بيهم .

¢¢€€¢¢€€¢¢€€¢¢€€¢¢€€¢¢€€¢¢€€¢¢€€¢¢€€¢¢€€¢¢€€¢¢€€¢¢€€¢¢

روان : (مهما تكون قصتي حلوة و جميلة و بيها ضرب اقل من غيري يمكن 😂 ، لكن لا تتمنون أن تكونون فصليات لان الله سريع الاستجابة إلى مطالب عباده و يمكن تتحقق و تصيرين فصلية بس مو مثل قصتي و تروحين ضحية شخص سوى جريمة و ما يستاهل ابد و تنهانين و تنضربين يومية ... لحد تگول مو اني و اني مو هيچ لان الكل يتمنى هذا الشي و هاي الحقيقة بس الحقيقة الصح هي أن الفصلية مجرد خدامة و للضرب و تفريغ الأعصاب مو للحب بس اني رزقني ربي بوجود مهند بجانبي مو شخص آخر من وين ما چان 😊 ... في امان الله و رعايته 💝)

" الى هنا انتهت قصتنا بامان الله و حفظه 😘 💟 ."

الكاتبة ✍ :- فاطمة البحراني ✌
تاريخ الانتهاء من الكتابة :- {2018/5/7}

#اسمح باقتباس اي لقطة من قصتي و لكن ليس جميع ما كتب في القصة و اعني بهذا القصة كاملة من دون اعطاء اسمي عليها 🚫 .

💋💘❤💓💕💖💗💙💜💝💞💟💟💞💝💜💙💗💖💕💓❤💘💋.
شكراً لكم على حسن المتابعة و دعمكم المستمر
💋💘❤💓💕💖💗💙💜💝💞💟💟💞💝💜💙💗💖💕💓❤💘💋.