عزيزي القارئ فضلاً وَليس أمراً أضغط تصويت لنشر المزيد من احداث الروايه،
فستان أحمر
تحسين لقمان
صاحت مهره : جهنم تكرفج انتي وياهه ,
لغوه زايده ماريد اخلي صدري
يلعب على حلكج يصمه صم
اكلي تبن وسكتي
و حضري روحج العصر اطلعن ويايه نجدي
انتي واختج هاي هه المنغوليه
صحت بصوت عالي : شنو
مهره : نفس ماسمعتي
وانتي هيو منغوليه غطي وجهج لعبتي نفسي
هم محروكه وهم شكلج يلعب النفس ,
مياده : احترمي نفسج لا تشوفين نفسج شربتيلج قوطية بيره صرتي نجره براسي
ولا تشوفيني ساكته تره اكدر اسوي كلشي
تقربت عليه و جرتني من شعري بكل قوتهه
وصاحت بوجهي : تدرين اكثر شي شنو اضوج منه ذوله الي يتلفسفون ويذبون نعل من حلكهم
اكلي تبن ماماتي خاف مكيفه بأبوج الي منتف اهل ماكو طلعه منا ماكو واذا اطلعين تصفين
بالشارع معليج بالحجي الي سمعتي
من ابوج هذا كله نفخ يسمو نفخ الحبايب ,
وهاي أختج حرگة وجهه علمود يصيرله درس معدل،
صحت بيهه: لج حطي عينج بين الله لج فوك ماهي مريضه منغوليه تكومين تحركين وجهه
ليش ليش هيج لج علمود الفلوس معقوله الفلوس تطغى على الانسانيه الي بداخل الانسان
تقبلين واحد يحرك وجهج ويتشوه هيج تشوه
لج شمسويتلج المكروده ,
ياسمين : اهدي اهدي مياده شيفيد العتاب بعد صار الي صار
صحت بيهه : ياسمين هاي اختي
هاي اختي ياناس يامسلمين ولكم محد يحس بالوجع غير راعيه ولكم حاولو تحسون بيه
وبالوجع الي بداخلي
طلع عندي اخت بكل هاي السنين واني مادري مادري كل الي اعرفه لكتني ماما منى كدام
حسينيه وجسمي مشخط مدمه بعدين جابتني لبيت اشتغل بي خدامه وتاليهه يطلع بيت امي وكله
دعاره وشرب وعرك ولكم اخويه اخويه من نفس الام راد يعتدي عليه وهو مايدري اني اخته
ولكم حسو شويه حسو لخاطر الاسلام •
ذني كلهن اكدر استغني عنهن واتغاضى عنهن تمر الفتره بيه والگه ابويه مشخط ومجرح ومكسر
ليش هيج شنو ذنبي اني فهموني شنو ذنبي وبعدهه يصير الحجي منا ومنا وتطلع عندي اخت
منغوليه فهموني فهموني اريد افتهم شنو ذنبي
ذنبي ان عندي ام بت زنه لو لأن عندي اب فطير
لو لان اجيت لعالكم الوصخ •
ارحموني وكتلكم اكدر اتغاظى وانسى كلشي جوز بس مال اجي والكه اختي المكروده الي ماعرف
كلشي عنهه الكاهه بهذا الشكل حاركيها ومفحيمهه
ماكدر أتحمل والنبي ماكدر
الله الله الله واكبر عليكم •
فوك ضيمهه ومرضهه وقهرهه
انتو النوبه شنو من بشر فهموني ,
اباوع لمهره كعدت على التخم ومددت ولا كأنما كاعده احجي شي
اباوع لنوكيا وياسمين يبجن باوعت لهيماء خطيه ترجف وتبجي بهدوء وبسكوت رحت عليهه
علكيفي جريتهه من ايديهه وحضنتهه بكل قوتي دفنت راسي بحضنهه حيل
يمكن الانسان يكدر يلتقي بالكل بسلام وكلام معبر بس فعلا لقاء الاخت يكون مملوئ بالمشاعر
والاحاسيس , اكو حب داخلي جبير بين الطرفين
صح حضنت ابويه بس من حضنت اختي ماعرف
اجاني شعور رباني كلش حلو واخيرا بعد كل هاي السنين ان كدرت انجمع بشي بسيط
بريئ مضلوم من عائلتي ,
بعدتهه عني علكيفي لكيتهه أدمع اخذتهه من ايدهه وصعدت ليفوك لغرفتي القديمه فتحته
مالكيت صابرين العبده , اذكرت ان هي اصلا جوه
دخلت هيماء علكيفي واني اهدء بيهه
ماعرف شنو احاجيهه شنو اكلهه منين اسولف اكلهه امج وابوج ذبوني بالميتم لو سوالف امج
هيج وهيج ماعرف ماعرف اي شي اي ماعرف ,
كعدته على الجربايه اخذت نفس وكتلهه : اني اصير اختج مياده
ورفعت ايدي اليمنى اشرلهه بيدي عليه واسويلهه حركه دائريه اريد اوضحلهه علمود تفتهم ,
كالت : ختي ختي سمج
ابتسمت بوجهه عرفتهه كاعده تكول اختي انتي شنو اسمج جاوبتهه : مياده مياده اني
هيماء: جن ختي ختي
مياده : اسمج هم جنه وهم حلو ,
اباوعله تبتسم رغم الحرك والتشوه الي صاير بوجهه شكد انقهرت عليهه شنو ذنبهه هاي البنيه
ينحرك وجهه ويصير بحالهه هيج حسبي الله ونعم الوكيل على واحد اذانه اني واختي
اجت عيني على عينهه لگيته كاعده ادمع
مياده :ليش تبجين حبيبتي اني يمج ماراح اعوفج بعد
هيماء :خي ريرا طلعت عع عند ختي
عقجت حواجبي اريد افتهمهه هي تحجي بس كلمات متقطعه بس مامفهوم منهه شي
نزلت دمعتي وياهه رئسا مدت ايدهه ومسحتهه كامت تأشرلي وتحجي : ختي هيي هيي
فرح اني هو واي واي فرحا
مياده : ها ها قصدج انتي فرحانه هواي مو
هيماء : ااي اي اي هو واي واي لي شش ها هاي اول مر مره اشو اشوف
دنكت راسي أتهجىء وياهه شنو تحجي : ليش اول مره تشوفيني
هيماء : اي اي
مسحت دمعتي وكتلهه : ناس ميخافون الله بعدوني عنج لو ماهم
جان اني يمج من زمان وماصار بيج هذا كله ,
هيماء : نف سهم اذوي حح حيل هو واي واي
مياده : حبيبتي اني هم مثلج اذوني هواي بس كل هذا و نصبر ونكول حسبي الله ونعم الوكيل
عليهم واكيد واكيد الله ماراح يتركهم هيج بحالهم اكيد وراهم عقاب ويتحاسبون
وأبويه كريم يسلم عليج ويكول مابقه شي ونلتقي
حطت ايدهه على وجهه وكالت : ما هو مايد ري ري بسا فة وجي
مياده : ماعرف جوز يدري بسالفة وجهج او لا بس هو حيل قلق عليج وخايف عليج ودزني عليج
علمود ابقه يمج واني ابد ماراح اتركج
كالت : جت يم يم انتي من مط مط ضرج
نزلت دمعتي ومسحتهه بسرعه : حسبي الله ونعم الوكيل عليه ماجنت ادري انتي اختي لان جنتي
مبوشه بس انتي ليش تلبسين بوشيه تكدرين تحجيلي شنو سوولج ذوله الجلاب ,
اباوعلهه كامت تباوع منا ومنا وتفر براسهه يمين ويسار كأنما ادور على شي باوعتلي
وكالت : كلا كلام اي كلام ما ما
مياده : ها ها قصدج كلام ماتكدرين تحجين صعب عليج
هيماء : اي اي وقه وقه
واشرتلي بيدهه تكتب بيدهه عرفتهه شتريد
كتلهه : ها ورقه تردين علمود تكتبين بيهه
رفعت ايدهه وسوتلي حركة اوكي , باوعت منا ومنا مالكيت اي ورقه ولا قلم منين اجيب هسه
نزلت جوه الجربايه لان هم كل شغلاتهم جو الجرابي ينضمن ,
لكيت صناديك كومه جريت الاول مالكيت بي شي عباره عن زعابيل جريت الثاني طلعلي عباره عن
اوراق كومه جريت صفطه كامله منه مال اوراق حطيتهن على الجربايه ,
دورت على قلم او اي شي اكو , كمت رحت لميز التواليت فتحت الجرار الاول مالكيت بي شي
فتحت الثاني لكيت مجموعه مال اقلام اخذتهن على السريع ورحت على الجربايه جريت الاوراق
وكعدت على الجربايه كتله : يلا تعاي كتبي علكيفج حبيبتي لتستعجلين
واذا ماتردين تكتبين هم براحتج
اشرتلي براسهه بمعنى جيبي الاوراق حطيتهن يمهه عليكفي وهي جرت القلم فتحت القبق وبدت
تكتب:أني اختج حبيبتج هيماء ماعرف شنو صارلج بس اني متأكده الصار وياج شي
بسيط مقارنتاً بلي صار ويايه ,
باوعتلهه لكيته تكتب باليسرى أشرتلي بعيونهه بمعنى اقري الي اكتبه ويايه ,
رجعت دنكت على الورقه وكتبت : هسه اكلج شلون بسيط مقارنتا بلي صار بيه وجوز الله اعلم
الي صار وياج اقوى واكثر وجع من الصار بيه بس ماعتقد اكو وجع اكثر من
وجع الحرك والاغتصاب والتعذيب ,•
نزلت دمعتهه على الورقه وكتبت : هيماء نولدت للدنيا احس بنفسي نقوصات بس
ماجنت واعيه واكدر أعرف شنو صاير ويايه ,
رحت للهول واني شايله صينية الجاي , جاي مهيل ريحته تفوح
لكيت ابويه كريم كاعد على الكاع ومتمدد وكدامه التلفزيون يباوع عادل الامام تمنيت اكعد ويا
واحجي ويا بس للاسف ماجنت اكدر والسبب ثكل بالساني مو طبيعي ,
بس رغم هذا جان ينطيني كل الحنان ماحسسني ان اني مريضه وماكدر اسوي اي شي , الى ان
كبرت وعرفت شنو اني و شنو مرضي وعرفت نفسي منغوليه
اوكف كدام المرايا اباوع على نفسي اشوف خدي ذايب واحس عمري يوصل التلاثين
واني مواليد الفين وواحد •
اريد اكعد ويه ابويه وافهمه واحجي ويا اريد اكله امي وين ليش ماتجيني معقوله ماتحبني ماعرف
ماعرف اي شي عنهه , ابويه هو الي حضني وكبرني على ايده بالرغم ان اني مريضه
واعترف بنفسي مرضي صعب ومتعب •
يوميه ادعي لله يفرجهه عليه ويساعدني بحياتي اليوميه ويشافيني من كل مرض لان تعبت واني
اشوف الي يشوفني ينبذ من عندي او يبتعد عني رئسا او يكرهني او يضل متخوف مني
وللعلم اني ابد ما أذي وما أسوي شي بس بسبب شكلي كمنغوليه انحكم عليه هيج بين الناس ,
اني انسانه طيبه وعلى نياتي مو امدحلج بنفسي واكبر نفسي يمج بس الحقيقه تنگال
كبرت شويه وسولفلي ابويه ان امي هملتني بفترة الحمل وما اعتنت بيه مثل ما اعتنت بأختي
الي ماتت , واقصد بأختي الماتت هو انتي لان جنت كل الي اعرفه ان اختي ماتت وراحت لغير
دنيا وكملي ابويه على سوالفه ان اكو من اقارب امي عدهم منغوليين فهي صايره طفره
ماعرف ماعرف اي شي
بس بيومهه انقهرت وزاد حزني على نفسي وكرهت نفسي وكرهت امي واقاربهم
اني بسببه ماكدر اطلع ويه بنات المنطقه لان منغوليه يخافن مني , وبسببه ماكدرت اداوم ابد
وبسببه انحرمت وانحرمت من كومة شغلات
بس كل هذا واكول كلشي يصير وكلشي يرهم
اصبري هيماء عسى ولعل اتشافى بأسرع وقت , بس الحمدلله والشكر على كلشي
شسوي بعد ماتكليلي ,
الى ان دارت بيه الدنيا دوران كلش جبير وطويل اجتي امي وطالبت بيه جان لقاء صعب ومر بعد
كل هاي السنين الي مرت بيه تجي وحده بملابس عاريه اطالب بيه وتريدني صعبه صعبه ,
وبس اني وابويه شنو نسوي ابويه الرجال مكرود مابي حيل احد ولاحول ولاقوه ومايكدر يسوي
اي شي محتار بضيمه وبشغله ,
جابت زلم مادري مادري منين فاتو لبيتنه واخذونه اني وابويه تحت وجود السلاح والتهديد
, وعلى راسهم واكفه امي تصيح
اني بيومهه اصيح احاول احاول اصيح احجي اردد بس ماكو ميفيد صوتي مايطلع الساني
احس بي ثكل كلش قوي ابويه الرجال المسكين يصيح بس ماكو شيفيد شيفيد الصياح ,
اخذونه سحل من بيتنه واختفت اخبارنه من المنطقه بمرور الايام
من شفت اصرار امي ان لازم تاخذني مادري ليش حسيته ان هي تحبني وتريدني وتريد تلمني يمهه
بس بنفس الوكت اسأل نفسي ليش عدمت حياتي وماسوتلي شي ,
كبل اجينه لهنا للبصره وجان الطريق متعب من بغداد للصبره , وابويه اعتدو عليه وهو رجال
جبير يون من الوجع طول الطريق
كرهته اكثر لامي معقوله امي تسوي بيه هيج
معقوله حبهه اليه خلاهه ان توصل بيهه المواصيل ان تجيب زلم وتدخل للبيت وتهجم علينه هيج
هجمه وتلعب بينه لعب وتفردهه حالنه تفردهه ,
بس من وصلنه لهناك تغير كلشي بسرعه عزلو ابويه بغرفه وماعرف شنو صار بيه واني لزموني
بدايتاً من الحبوب وبعدين البيره والشرب وطيحان الحظ •
مافد يوم سويت شي برضاتي كله جبر واذا ماسوي يلعبون بيه لعب وكدام امي هضيمه
انواع الكتل والتعذيب شسوي ماتكليلي جنت كلشي اسوي الى ان وصلت المواصيل بليله من
الليالي جبروني انام ويه واحد اسمه مامون اعتقد واخذ شرفي بكل وحشيه
وبكل جرأه ولا كأنوا اني منغوليه •
اون من الوجع اريد اصيح اريد احجي بس
ماكدر ماكدر مابيدي شي
استغلو مرضي وشافوني ماكدر اسوي شي ,
نزلت دمعه منهه وكالت : وجع وجع عني حيل
مسحت دمعتي وكتلهه : ها قصدج بديتي تتوجعين من الكتابه ,’
هيماء : اي اي ه هذا اقصد ,
مياده : ارتاحي شويه
هزتلي راسهه بمعنى لا , جرت القلم وبدت تكتب ودمعته تنزل على الورقه : شفت بعيني الشين و الزين بس شسوي وين اودي وجهي ,
الحمد لله على كلشي ,
دخلت ياسمين وصاحت : الحلوات هنا كاعدات عيني وبدون ماتكولن اليه ليش
هيج ليش خاينات ,
ردت اجاوبهه بس هيماء كالت : ختي ختي سا فنه شو ويه
ياسمين : ها تقصدين انتي واختج سولفتن شويه
بالعافيه عيوني براحتجن مياده لج شلون
تسوين سوايتج وتعوفيني وترحين تشردين بليله ضلمه ماخفتي ماكلتي هاي الفقيره
ياسمين وين تنطي وجهه من انتي ماكو
مياده : يمعوده مو بيدي ابويه راد يموت ويروح من ايدي لازم الحك عليه
ياسمين : وعيني شردتي ويه حنظل الله عليج گولي غمزلج سوالج شي اويلي عليه
جسم يشافي المبتلي •
ضحكت وكتلهه : الولد بيا حال رحمه لربج كافي عليه ضيمه وقهره بحال
جسم بحال صخام ,
هيماء : حح حنظ هو اي ضرب
ياسمين : قصدهه هواي ضربو
مياده : صدك ياسمين اني لحد الان صافنه شلون انطاج كلبج تشاركين وياهم بهيج جرائم
وتحطين ايدج بيدهم بهاي الجرائم كلهه •
ياسمين : اكولج اني سابقا كتلج مو بيدي هذا شغلي ركص ورزق الليل ماكدر استغني عليه
هيماء : كص كص صر هو واي
ياسمين ضحكت ضحكه عاليه وكالت : تكول ترگص الخصر هواي
ضحكت وباوعت على هيماء كتلهه : يمعوده هاي كل البلاوي بيهه هاي ياسمينو مو شويه
باوعت على ياسمين ضحكت وهزت جتف
رئسا كتله : ها ها بعدج تهزين جتف
كالت : لج عيني غير رزقنه عليه ويذبلنه فلوس هواي ماكدر استغني عنه ,
مياده : شوكت تفضين امرج و تستچنين
تقربت على الجربايه وكالت : شنو هاي عيني الاوراق
باوعت لهيماء رئسا سحبت الاوراق الي جانت تكتب بيهن وحطتهن وره ضهره اني استغربت
ليش سوت هاي البنيه هيج ,
ياسمين : شنو مخططين تحتلون الكويت وضميتي الاوراق عليه
ضحكت بسرعه وكالت هيماء : وقه وقه مقري
ياسمين : ها خطيه ورقه مهمه ميصير تنقري يلا عيني براحتجن ,
صدك مياده نسيت اكلج
هاي مهره تكول خلي ينزلن من هسه
لان عدهه خطه تلم بيهه فلوس عباد الله كلهه
كمت على حيلي وكتلهه : نازلات عيني نازلات هو شبقه بيه من طاحظ روحي اي والله
طلعت ياسمين من الغرفه وكامت هيماء
كالت : وقه ها يه حطي هه يم جج
رفعت ايدهه اليمنى وقدمتهه اليه بأيد ترجف اخذتهه منهه وضميتهه جوه المخده
مال جربايتي ,
نزلت البوشيه على راسهه
كتله : ليش تحطين بوشيه على وجهج
كالت : مه مهره زع تز وع
مياده : تقصدين مهره تزوع من تشوفج
نزلت راسهه وهزته بمعنى اي
انقهرت عليهه وعلى حضهه من المصخم
تقربت عليهه وحضنتهه بسرعه كتلهه : لتخافين اني يمج بعد محد يحجي عليج
اريدج سباعيه مو طول اني يمج
ابتسمت بوجهي ونزلت البوشيه كتلهه : انتي تره زينه من ناحية المرض شنو رأيج اعرضج
على طبيب اختصاص
كالت : طبيب علا يعا لجوني
عقجت حواجبي وكتلهه : قصدج هنا اكو طبيب يعالجج
اشرتلي براسهه بمعنى اي , كتلهه : مادري شنو اكول وشنو احجي زين ليش عالجوج
وهم حركوا وجهج وفحموا تفحم
هيماء : لا ن ا ي مه عد عد
مياده : انتي مهمه عدهم
اشرتلي براسهه اي رجعت كتلهه : لعد ليش حركوا وجهج
هيماء : لا ن اك اك و زبون ما ما قب وجي
مياده : حسبي الله ونعم الوكيل عليهم وواكيد مهره حركتج لان اشتكى عليج
هزت براسهه بمعنى اي
مسحت دمعتي وكدت ايدهه ونزلت من الدرج شيصير بعد بينه
ماعرف شوكت نضوك طعم الراحه ماعرف ماعرف
نزلنه الدرج واني اباوع منا ومنا لكيت مهره تلبس عبايتهه وتلف البوشيه بسرعه
مهره : ها عيني ساقطتنه فضيني يلا يلا بسرعه خلي نطلع راح يجينه ياسر شعله
عقجت حواجبي وكتلهه : عيني منو هذا ياسر شعله ووين نولي
غمتني وصاحت : لج بت الجلب اني شاربه بيره بحدود قوطيتين ومصحصحه
انتي شنو شبيج ماتكليلي لخاطر الله,
كتلهه : هسه اني شكتلج
نوكيا السمره : اكلج مهراوي اليوم مابيه حيل
واحد البارحه توجعت حيل ماريد
لا رجال ولا هم يحزنون
باوعتلهه وغمتهه باوعت عليه وكالت : بسرعه وره باب الهول عبايه وبوشيه بسرعه لبسيهن
يلا ياسر بالطريق
رحت على باب اخذت من وراهه البوشيه والعبايه رحت لمهره كتلهه سويلي البوشيه ماعرف
جرتني من راسي ولبستنياهه بسرعه , اخذت العبايه لبستهه شلون ماجان
سمعنه هورن بالباب صاحت : اجه اجه زلمتنه
هلا وميت هلا يلا يلا ولجن ساقطات ,
كدت ايد هيماء وطلعنه من بالباب بالطريق وكتلهه لمهره : هسه اكو واحد يجدي هسه ويه وكت الاذان
صاحت : لج ماما الرزق يكثر هسه بهيج وكت لان يحضي حلة طلاب المثقفين طلاب العلم
عيوني كليات ومدارس نربح خير من الله
وانتي تعرفيهم خطيه
ينبعون حنان عيوني
كلت بكلبي خرب يومج شكد استغلاليه يعني شلون مخططه للوكت بشكل كلش دقيق ,
طلعنه من البيت وماشفت حجي مطلك كلت بصوت ناصي وينه العاشق الولهان شو ماهو
عشتو يحبني تهي بهي ,
صعدنه بالسياره وحده وره الثانيه ومهره صعدت بالصدر كالتله : عيني الله بالخير صدقه لربك
تعال ليله ليلتين شو بنات وموجودات حضرتك تروح على دلال الساقطه
هي اصلا سوده مفحمه الله
يخلصني من اعداء الشغل •
ضحك ضحكه عاليه وكال : اي والله تعبان دايخ اريدلي وحده من الوره تذوبني ذوبان السكر
ضحكت علكيفي وكلت بكلبي عشتو يكول سكر من كبر لهيج حلك
مشت بينه السياره وهذا ياسر شعله مطلع اغنيه مكطنه مثله وهاي بصفه رافعه
البوشيه وادخن بالجكاير وترد ليوره •
وكفت بينه السياره وكال ياسر شعله : مهراوي الخطه تكول التقاطع ذاك عليه اربع خطوط
مرتبه مال كليات حكوميه واهليه وخمس خطوط مال مدارس اهليه شوفي شغلج يعيوني انتي
مهره : بوساتي الك ونورني بالليل ماما
يلا بنات نزلن ماما
وفدوه تعال بعد ساعه
ونص بين مالم جم فلس
فتحنه الباب ونزلنه
حرك ياسر شعله سيارته بسرعه
واحنه كاعدات نعبر الشارع
جان تطبك علينه دوريه مال شرطه لونه اخضر
واحد منهم
صاح بالسماعه مالته : اوكفن بمكانجن أنتن مطَوقات حالياً
مهره صاحت : الي تفتح حلكهه منچن اترسه اتفال
اني أحجي وبس •
وكفت بمكاني وصدري يصعد وينزل من الخوف
اول مانزل الشرطي رئسا
صاح : كدامي بسرعه بسرعه للسياره
يتبع ...
لاتنسوا التصويت والتعليق •
وتفاعلكم من ناحية التصويت كلش ضعيف؟ !
للمتابعه في الانستكرام: tahsin_luqman
خالص مودتي لكم
تحسين لقمان
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!