عزيزي القارئ فضلاً وَليس أمراً أضغط تصويت لنشر المزيد من احداث الروايه،
فستان أحمر
تحسين لقمان
جر السلاح ونزل واني فتحت الباب بسرعه
مياده : حجي حجي اوكف اوكف •
صاح حنظل : مياده رجعي رجعي للسياره خليني اتصافه ويه هذا النگس
صاح حجي مطلك : لك اني نكس اليوم اخلي حليب امك يطشر من خشمك
كلب أبن سطعش كلب ,
مياده : اتعوذو من الشيطان لج مهره مهره نزلي يمعوده واحد راح يكتل الثاني
اباوعله فتحت الباب ونزلت بالكوه تمشي شمرت القوطيه بالكاع
وصاحت : لك حنظولي صاير سبع وتشيل
سلاحك على حجي مطلك لك ياما و رمتك بيدي لك شنو نسيت الوشم واثر الجويات الي صارن
على بطنك نسيت لو لا لك أكدر أسوي اكثر منهن وداعتك وحق الي خلقكك ذب سلاحك وأكل تبن
حنظل : اذيتونه بما فيه الكفايه كوثر البنيه اغتصبتوهه كدام عيني ونعلتوا سلفه سلفاهه
وهسه وين وين كوثر حالياً هي بين الحياة والموت بسبب تعذبيكم وانانيتكم النكسه و زكي
الولد الولد الي اتوسل بيكم تواسيل علمود تعوفو ماتكتلوا كلكم اريد اكبر اريد ادرس اريد اتعلم اريد
اصير طيار وانتو شسويتو ها شسويتوا بكل سهوله ولكم بدون مايرفلكم جفن جريتوا
سلاحكم وانواع الطلقات ذبيتوهن عليه ووينه وينه هسه زكي صار طيار لو وين لا هسه زكي
اندفن ومحد يعرف وين •
واندفن حلمه ويا •
وليش ليش اروح بعيد ولكم اني اني يمكم شسويتوا بيه ها مهره تكولين بطنك لا لا يمهره
مانسيت شسويتي اي مانسيت لج تجبيبن صياخه مال كباب تحمين واحد توجريهن على
النار وتجين تمشين صيخ صيخ على بطني واني اصيح واتوسل بيج وانتي تضحكين واتفلين
ولكم ذنبي ذنبي ان ُ بس ضيعت اهلي من ايدي هذا ذنبي ولكم لو ماضياع اهلي وانتو
جان اني هسه مزوج مزوج وعندي اطفال ومكون عائله بأكملهه كلولي كلولي شكد تستلمون فلوس
ملايين شكد شكد بس وكفوا الكتل والدم ولكم شباب شباب بعمر الورد اندفنت وانتو بعدكم
مستمرين ولكم شنو ذنبه ذنبه شنو ها ها وهسه
ماخذين مياده علمود تندفن
ويه الي اندفنوا قبلهه •
صاح حجي مطلك : ذنبكم انتو تحبون الحياة اما احنه نحب ونعشك الموت ونعشك الدم
حطيت ايدي على خدي مسحت دموعي وصحت بصوت عالي : حبو وتمعشكوا براحتكم
شعلينه احنه الي كاعد يصير بينه •
سعد حبايه راد يفجر ابويه ابويه يروح خلي يروح والناس والناس الي غيرنه شنو ذنبهه
ولكم انتو شنو من تفكير عدكم •
مهره : متردون تخسرون ارواحكم صيروا ويانه
صاح حنظل : طز بروحي تردين هسه هسه اضرب روحي واروح منكم بس اني مو مثلكم جبان جبان
استسلم بسهوله متهمني روحي اني الي يهمني حياة غيري ولكم اذا احجي جرايمكم وحده وحده
الشعر ينط يوگف على حيله •
ما تنحجي ماتنحجي ماتنحجي يامسلمين ياعالم ياكفار يايهود اصيح بعد
حجي مطلك : مياده تروح ويايه والزلمه والي يكول اني ابن ضهر ابوي خلي
يجي ياخذهه مني ,
مياده : حنظل روح روح وداعتك
ارجع اكيد ربك يفرجها
صاح حجي مطلك : امشي صعدي للسياره لا اگرم رجليج تگرم بسرعه يلا
حنظل : باوعلي زين كاعد تشوف الشمس الي فوكاك اقسم بيهه وحق رب العباد اله اجي واخذ
مياده منك وكدامك اخذهه وبذيج الساعه اتفل على هاي لحيتك الي جنهه طفار خيسه
ابن الكلب •
طبكت سياره علينه انفتحت الجامه طلع رجال جبير كال : ها بويه خو مامحتاجين
مساعده شني سيارتكم عطلانه
صاح حجي مطلك : توكل حجي هذ مو شغلك
اباوع للحجي بلع ريكه صعد جامته وراح , صحت بحنظل : باوع حنظل روح وصدك واعتقد
الله ويايه لتخاف عليه روح اني بأمان ,
روح يلا يلا روح ,
اباوعله مركز على حجي مطلك وعيونه تجدح نار والشريان الي بركبته مبين حيل
شويه ونزل سلاحه دار وجهه على السياره وصعد بيهه ,
صاحت مهره : حجي فدوه لطولك هذا
ماريده يتنفس يشكل خطر علينه
باوعلهه وكال : لتخافين هذا جنه فرخ مال دجاج
بس يوصوص معليج امشينه,
باوعلي وصاح : انتي هسه شمي هوى وارتاحي طول الطريق لان بس راح نوصل
حسابي وياج غير حساب بت النگس
صحت بي : ابويه لتغلط عليه واحترم نفسك افتهمت لو لا
ابويه انظف واحس منك •
بعدني مامكمله كلامي اجاني على السريع ولطمني راشدي بكل قوته على حلكي جرني من شعري
وكال : هين هين يبت كريم ان ماجلدتج عدل وراويتج جهنم كدام عيونج
اطلع فلا مطلك •
مياده : اخ اخ شعري شعري بس هده وخر
حجي مطلك : وكرص اي والله
سحلني من شعري سحل للسياره يسب ويلعن بيه فتح باب السياره وشمرني جوه وطبك الباب بكل
قوه , انفتحت الباب الي بصفي صعدت مهره وكالت : يلا يلا الله يساعدك زلمتنه
ذني الساقطات رايدلهن كلب جبير
عاقل ويحب ساقطه رايدلك كلبين حجينه,
كلت بكلبي : جهنم تلمج انتي والحجي مالتج ادبسزز ,
صعد زلمتهه حجي مطلك وتحركت السياره بكل سرعه عبرنه سيارة حنظل وهو بعده واكف
ماعرف شنو منتظر حطيت راسي على الجامه ودمعتي نزلت على خدي لشوكت اضل هيج
ماعرف على الاقل اني جنت مكضيه سنوات حياتي كلهه بالميتم بس بس اختي المنغوليه الي
صارلهه سنين يمهم شنو صاير بيهه وشنو حالهه هسه وشمسوين بيهه هسه
دعيت بكلبي ان يحميهه الي
بالرغم ماشايفته اني بس احسهه مضلومه هواي
مر هواي من الوكت و اني على نفس الحطه ماغيرت اي شي من عندي التعب الي بيه صار
هواي لو غيري ماتتحمله
صدمات كومه عثرات كومه شنو الموضوع ماعرف معقوله اني اول مانخلقت من طين الله كتبلي
هيج وهيج تكون حياتي وبس ,
هم راح ارجع للبصره وهم راح ارجع لياسمين صدك شنو صار بيهه بله شسوت من كعدت الصبح
ومالكتني يمهه بالبيت , صابرين نوكيا شنو صار بيهن ثريه الانسانه الطيبه ,
اني شكد مو مريحه كلساع شكل ثاني ساعه ماريد اروح وساعه اريد اروح
من باب الاشتياق لهذوله الناس , مرات نتعرف على انسان سواء جان زين او شين بسرعه يترك
النه اثر وصعب اي صعب ننسى هذا الاثر ,
بس سؤالي هنا
هم راح يرجعني هذا الاشتياق لرفيق
ولحنظل ولأبويه ؟
تذكرت كلام رفيق من يكول بحر بحر دم لازم كلنه نموت معقوله احنه ألي بهاي الدنيا لازم نموت
ونستسلم بسرعه ولازم مانقاوم
معقوله حجاية رفيق صحيحه ماعرف ماعرف ,
ردت اغمض عيني علمود انام لان الضاهر الطريق مستمر بطوله وبعد وبعد بي , بس حجي مطلك
كال : تنزلون للمطعم تشربون عصير او اي شي
اباوع لمهره رئسا جاوبته
وريحة حلكهه كلهه بيره : حجي عيناي ميبيعون هنا بيره من صدقه لربك
ضحك وكال : لج ام حلك منين اجيبلج بيره منا نوصل هناك واشبعج انواع من البيره مو تدللين
وغمزلهه بسرعه كلت بكلبي: الله يلعنكم يارب ,
حجي مطلك : تردين عصير مياده او اي شي
مياده : لا ماريد خلينه نوصل وبس لان مابيه حيل اصلا
حجي مطلك : هسه اوصل واسويلج الحيل على اصوله بت الكلب
باوعت على الجامه واني ضايجه من كلشي وضايجه من ريحة البيره الي تكفخ بخشمي شكد
تشرب بيهه وترد ليوره من كبر لهيج ناس اي والله , حركت السياره وبدت مره ثانيه تمشي
ساعه علكيفهه وساعه على السريع بين المراوس وسيارات ازدحام وكومه ,
ضلينه نمشي لحد ماكال : دخلنه البصره ,
مهره : حجي دوسلهه فضني مابيه حيل بعد ,
هسه جايبني من البصره للعماره
علمود هاي الجلبه اي والله
مياده : محد كلج تجين
صاح الحجي : انجبي رعنه لا تراددين
تاج راسج فاهمه لو لا ,
باوعت لمهره تبتستم رجعت راسي ليوره واني تعبانه ماعرف شنو مسويتله مهره ومخليته هيج
يصير بيدهه محبس ,
ضلت السياره تمشي بحدود الساعه او الاقل و وصلنه لمنطقه كلهه شجر وخضار عرفت ان احنه
وصلنه للبيت اباوع لحجي مطلك لكيته يباوعلي من المرايا و يبتسم ,
شلون راح تخلص وياهم ماعرف ماعرف دخلت السياره للبستان باوعت للغرف نفس حطتهن ,
وكفت السياره كدام الباب فتحت الباب ونزلت اول مانزلت طلعت كدامي صابرين
صاحت : ملعونه ساقطه حبيبتي
هلا وميت هلا لج شنو حليانه تعاي تعاي
رحت عليهه بسرعه حضنته وبوسته وخرتني عنهه وكالت : لج عيني شصار وراج
صارت وراج سوالف جبيره جبيره عيناي
ضحكت وكتلهه :شو بس انتي ولج
وين البنات البقيه ,
ضحكت وكالت : رزق ماما كلهن برزق طالعات طلعتهن البارحه بدالي
ضحكت وكتلهه : ولج ولاتوبين من سوالفج ,
دكعدي راحه عاد
كالت : لج مهره وينهه شو ماهي
كاعده ادور راسي علمود اشوفهم وين جان تصيح مهره من السياره : لج بت الجلب تعاي
كوديني خلي انزل •
صاحت صابرين : هاي شنو شاربه ,
ضحكت وكتلهه : يمعوده ريحتهه محد يتحملهه فدوه روحي انتي ,
دفعتني عنهه وراحت عليهه
اباوع للحجي يخابر مدري منو ويتمشى بالبستان وكفت على صفحه انتظر صابرين هي ومهره
اباوعلهه نزلت مهره من السياره بسرعه وتمشت بأتجاهي اسمع مهره ادردم
بصوت ناصي : حبيب امك متقبل من أحاجيك
من سم بكلبك وبكلب امك اي والله , وضحكت ضحكه عاليه
وصابرين ترادده تضحك عليهه : شبي عيني ليش متقبل تحاجي
اباوع لمهره ترفع ايدهه وتضرب راسه
مو بوعيهه ابد تروح منا وتجي منا كالت :
ماتقبل لان ساقطه
وهو كام مايحاجيني ، وهو مايحاجيني مو
اله اعيد طهوره
وطهور الخلفو ابن الزنه •
صابرين ضحكت وكلتلهه : والنعم والله
والنعم منج عيوناتي انتي •
كلت بكلبي : عشتو اي والله لجهنم كلكم ,
دخلن ليجوه ردت ادخل وراهن جان يجي
حجي مطلك صاحني ,
حجي مطلك : مياده تعالي ورايه بسرعه ,
باوعتله شكله عصبي وما ينحمل ابد بلعت ريكي ورحت وراه واني خايفه
اذكرت كلام ياسمين من طالعه للسوبر ماركت من دون علمه وكاتلهه كتله معدله معقوله راح يسوي
ويايه نفس ماسوه ويه ياسمين وصلنه غرفه من الغرف باوعت منا ومنا لكيت كدامي شجرة
الصفاف رجعت باوعت على باب الغرفه رئسا عرفتهه هاي باب غرفة حنظل الي جان بيهه
بلعت ريكي شكو جايبني لهنا يربي
دخل هو قبلي وصاح : دخلي دخلي مياده
حطيت رجلي اليمنى ودخلت علكيفي باوعت لگيت الزوالي مكلوبه واكو دم كومه اجت عيني
على الكرسي الي جان كاعد عليه حنظل رئسا أجتي بالي المواقف شلون اجينه اني وثريه طلعنا
وشلون لكينا يون من الوجع نزلت دمعتي بسرعه
هو رئسا صاح : جيبي الكرسي وكعدي عليه بساع
مياده : حجي بس خليني افهمك مو كلشي صياح وعياط وضرب
جاوبني وهو صاك على سنانه : مياده كلمتي مره وحده ماتصير اثنين بالعجل جيبي
الكرسي وكعدي عليه ,
رحت للكرسي لكيته بي اثار من الدم يابس وجم ذبانه تحوم عليه ,
جريته وكعدت عليه بسرعه كال : اني عمري وحياتي ماحبيت بنيه بكد ماحبيتج ومافد يوم
ضليت ليله كامله افتر وادور على بنيه
بس عليج سويتهه •
صاح بصوت عالي : كاعده تسمعيني مو مو؟
مياده : اي اي كاعده كاعده اسمعك بس فدوه لتصيح صوتك ,
صاح : لج انتي شنو صنم هامج صوتي مايصير عالي وماهامج كلبي الي محترك جد جده
لج بت الكلبي تضحكين عليه لو على روحج ؟
مياده : باوع حجي اذا نريد نحط النقاط على الحروف بس هذا الي اكوله الك
انت عذبتني والله يعلم شسويت بغيري •
صاح : اني اني عذبتج شوكت ولج لج شسويتلج احجيلي اذيتج جرحتج ,
لج اخذتج مناك من امج كلت خطيه ماريد هضيمه تسب وتلعن بيهه بس انتي شنو ألسويتي
ها ها شنو ألسويتي شردتي مني ويه واحد
مايسوه اضفر لج فضلتي عليه ورحتي ويا ,
مياده : رحت ويا لان جنت ادري انُ هو ماسوه الي سويته انت وبعدين اني شردت منك بس لا
عبالك لان مامأذيني لا متوهم شردت منك لان انت انسان ضالم اي ضالم ابويه حابسه يمك
ادك بي ليل ونهار شنو من بشر انت •
اجه وكف على راسي وصاح : اني ضالم اني ابن كلب اني ابن زنه مو لان اغتصبت اشكال من البنات و لا لان عذبت
ابوج لا وانما اني لان حبيتج وخليتج بكلبي
كمت على حيلي
وصحت يي : لتتوقع مني احب حيوان انت حيوان تعرف شنو
بعدني مامكمله كلامي رئساً ضربني راشدي
وصاح : اني حيوان اي لأن حبيتج من كل كلبي
رفعت راسي وصحت بي : ياحب ياحب هذا التحجي عليه وانت تضرب بيه وتهيني وتريد
تنام ويايه بالحرام وحابس ابويه يمك شهور وتشرب وتبلع ياحب ياحب هذا
رحمه لوالديك عوفني عوفني بحالي ,
حجي مطلك : سمعيني زين شغلة اعوفج مسحيهه من بالج وانتي الي وبس
وها ها خاف طلعلج حنظل وانعجبتي بي
وحق الي خلقج طلقه براسه احط •
مياده : انت مخبل انت مخبل مو صاحي
عوفني ماريدك ماحبك لزگه شنو
ضربني راشدي على حلكي وصاح : اسمع كل جلمات الكون اله هاي الجلمه
اذا اسمعهه منج مره ثانيه اشك حلكج شك •
صحت بي : وتحجي عن الحب وانت الفاظك بس كتل وصلخ وذبح عفيه زلم تموت على شك
الحلوك وصلخ الجلود وكص الركب ,•
شال ايده راد يضربني جان يجينه صوت بنيه ناعم
صاحت : لا حجي اوكف اوكف لخاطري
رئسا نزل ايده باوعتله لكيته ياسمين رحت ركض
عليهه ذبيت كل جسمي عليهه ابجي بكل حركه
كالت : اهدي اهدي حبيبتي تعالي تعالي ويايه
صحت : ياسمين اخذيني منا حبابه ماريد ابقه هنا مروتج اخذيني وخلصيني منه
جرتني من الغرفه واني مجلبه بحضنهه مثل الطفل الي مجلب بأمه علمود متروح لمكان او
للسوك جرتني من الغرفه وطلعنه اسمعه
يدردم بالغرفه ويصيح
تمشينه شويه واني ارجف دخلنه الهول وخرتني عن حضنه وكالت : كافي كافي عيوني انتي
كافي هاي الدموع
وخرت عنهه باوعت الهه مسحت دموعي وابتسمت بوجهه اجه صوت
صياح من ورانه
" لج هاي منو هاي مياده عيناي
لج وين جنتبي يمعوده
باوعت الهه لكيتهه نوكيا السمره ضحكت
وجاوبتهه : شويه حبيت اسوي مغامره واطفر منا
حطت التفاحه بحلكهه وكالت : خسران الي يعوف الرزق ويطلع منا كلشي مايفتهم هذا
ردت اجاوبه دارتني ياسمين عليهه وكالت : شلون تسوين هاي السوايه تعوفيني وترحين
مياده : جنت مجبوره ياسمين ابويه ابويه راد يموت
ياسمين : هسه مو وكت اعتاب
واتمزعل عليج بس اكو بنيه
اريدج تتعرفين عليهه •
عقجت حواجبي استغربت منيه كتلهه : منو هاي بس لا هم مجبوره ومشعول جد جدهه
ضحكت وصاحت : هيماء هيماء تعالي ماما حبيبتي
مجرد اسم هيماء انذكر كدامي حسيت كلبي وكع بالكاع ,
طلعت الساني بسرعه بللت شفايفي باوعت منا ومنا لگيت البنات واكفات يمي وياسمين لازمتني
من ايدي اليسرى لزمت مقدمة راسي شويه خايفه
دخلت هيماء لابسه عبايه ومبوشه تبوش ,
استغربت ليش هيج
صاحت ياسمين : ارفعي البوشيه هيماء الكدامج اختج مياده مو غريبه
صحت بياسمين : ليش ليش مبوشه
ووين جانت اختي
ياسمين : تذكرين سالفة الكاميره وبيومهه لكفج الحجي من دخل ودخلت وراه بنيه مبوشه ولابسه
عبايه نفسهه هسه هاي الكدامج
هي اختج هيماء •
حطيت ايدي على وجهي وتقدمت بأتجاهه
صدري يصعد وينزل من الخوف ,
حطيت ايدي على البوشيه مالتهه
ردت ارفعهه جان تضرب ايدي بسرعه
صاحت ياسمين من يمهه : ارفعي البوشيه هيماء هاي اختج حبيبتي يلا يلا ماكو غريب
مارفعتهه ابد وتهز براسه بمعنى لا استغربت ليش اختي هيج اجتي عيني بعين نوكيا لكيتهه تبجي
بهدوء ماعرف ليش اجاني شعور خيبة امل
اجتي ياسمين لزمت هيماء
من جتفهه وكالت: يلا حبيبتي يلا ارفعي البوشيه هاي اختج ماراح تأذيج خطيه حبابه
اباوع لهيماء ترجف رفعت ايدهه ورفعت البوشيه اول مارفعتهه شهكت بوجهه ورجعت ليوره
حطيت ايدي على حلكي ودموعي وحيدهن نزلن
وجه هيماء مشوهه كله محروك ماعرف ماعرف شنو بيهه تبجي وتحاول تصيح تحاول تحجي
بس ماكاعده اعرف شنو تريد
رفعت ايدهه اليمنى تسويلي بيهه حركه مافتهمت منهه
بس لمت اصابعهه وسوت حركه لمهره معناهه نعله ابوج
صاحت ياسمين : كاعده تكلج مهره البارحه
ضربتني وتغلط على ابويه
صحت بصوت عالي بكل قوتي : ولكم انتو شنو من بشر حطوا الله بعينكم ولكم منغوليه منغوليه
تضربوهه وهاي شمسوين بوجهه
صاحت مهره : جهنم تكرفج انتي وياهه
لغوه زايده ماريد اخلي صدري
يلعب على حلكج يصمه صم •
اكلي تبن وسكتي
و حضري روحج العصر اطلعن ويايه نجدي
انتي واختج هاي هه المنغوليه
صحت بصوت عالي : شنو
يتبع .....
لاتنسوا التصويت والتعليق لنشر المزيد،
للمتابعه في الانستكرام: tahsin_luqman
خالص مودتي لكم
تحسين لقمان
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!