عزيزي القارئ فضلاً وليس أمراً اضغط تصويت لنشر المزيد من احداث الروايه،
فستان أحمر
تحسين لقمان
رئسا اجه صوت من ورايه مال مره،
كالت : خطوه وحده تخطيهه اكتلج بمكانج
درت وجهي لكيتهه ام اموري لازمه السلاح موجهته عليه ولازمه ملاك من راسهه
ملاك : مروتج خاله عوفيني والله معليه
ركضت عليهه رفعت سلاحهه للسمه
وضربت طلقه صاحت : كاعده اكلج بمكانج والله والله خطوه وحده ثنينجن اكتلجن ’
وكفت بمكاني وصحت بيهه : عوفيهه شعليهه هي انتو ناس مجرمين ومتخافون الله
ولجهنم ترحون •
ام اموري : غبره ساقطه لج اول ماجيتي مارتاحيتلج بت المطكطك لج تضحكين عليه
اجه حنظل وكف ورايه وصاح : ذبي سلاحج ولا حق الخلقج اسوي طشار بيد ملاك
صاحت بيه،
ام أموري:لج وخري عني خلي اشوفه لهذا الصاير رجال يجي يوكف كدامي
ويحجي ويا ام اموري هيج لك ماما جنك روح تأكد من نفسك رجال لو لا
حنظل : تنجبين وتاكلين تبن رجال وغصبن على الي خلفج
كتلج نزلي سلاحج ماكفاج الي سويتو بالعالم ليش هيج ليش الناس تحب تعيش بخير وبركه
وانتو تجون تفجرون عليهم كل النعم
فوك ضيم الي يحكومنه ضيمكم ماشبعتوا فلوس•
رجعت صاحت : لك شوف عيني ذني سوالف المثقفين نكعهن بخل تفاح واكعد اشرب بيهن منا
لباجر الصبح وتولي عن خلقتي انت وجماعتك لا أخلي شحاطتي تلعب عليك لعب افتهمت لو
بسرعه بسرعه منا يلا •
اباوع لحنظل صم جف ايده بكل قوه والعرك ينزل على جبينه جر سلاحه وجر اقسام وصاح : لج كلبه انتي تغلطين عليه وتسبيني
ماعاش لج الي يغلط على حنظل •
حطيت ايدي على وجهي لان شفته خلاص راح يخلص عليهه
صحت بصوت عالي:فدوه حنظل
اهدء لتنكس ايدك بيهه •
رئسا اجه صوت رجال جبير وخرت ايدي من وجهي لكيته حجي ناصح كال : حنظل افه اني موجود وواحد يغلط عليك
هاي الا اذا جان مارايد حياته ،
اباوع لام اموري جاوبته: حجي ناصح
حجي ناصح: اي حجي ناصح من تشوفيني كدامج تنزلين سلاحج باسرع سرعه عندج
لان تنبتر ايده الي بس يحاول يرفعهه بأتجاهي
رئسا هدت ملاك ودفعتهه على الكاع ونزلت سلاحهه وكالت : امرك امرك حجينه الغالي اعذرني عيناي
ركضت بأتجاه ملاك كومتهه من الكاع حضنتهه وحجي ناصح تقرب بأتجاه ام اموري : اني ماعندي حجايه وياج صيحيلي زلمتج
الي علساس زلمه ،
ضحك وكال : سعد حبايه •
ام اموري : نا نايم اي نايم خطيه مايدري
تقرب عليهه اكثر وكلهه : يحمد ربه ويشكره ان ماصار شي لبتنه مياده واله جان هو بالكبر
وانتي واكفه عليه تبجين •
ام اموري : اعذرنه حجي اعذرنه مانكدر نوكف كدامك العفو يابه شتريد انطيك
بس البنات الي جوه عوفهن ولا تاخذهن مروتك والله نروح بالرجلين
صاح بيهه حجي ناصح : تردين العفو بسرعه تحجيلي مكان كريم كاسيته وين
اباوعله بلعت ريكهه وحطت ايدهه على صدرهه وكالت : شلك بكريم كاسيته اعذرني حجي
باجر عدنه شغل بي ومتواعدين ويه ناس اعتذر هوايه
ماحس اله حجي ناصح يلف عليهه لفه كامله ويضربه راشدي بكل قوه عنده صاح : لج عاهره
احذرج اخر حذر مني لا تنسين الواكف جدامج شنو يكدر يسوي اكدر اهدم البيت
هذا على روسكم من دون مايرفلي جفن
كريم كاسيته اريده وينه
ملاك حاضنتني بكل قوه وحنظل واكف يم حجي ناصح يعصر بيده بس يريد يكمز على ام اموري
يكتلهه اباوعلهه فركت بيدهه وباوعت على الدرج الي يودي للسطح كالت : هناك
رئسا صاح حجي ناصح : عبدلله و زيد وحنظل بسرعه روحو نزلو عمكم يلا
راحوا الولد ركض ليفوك وحجي ناصح واكف كدام ام اموري وهي خايفه اسمع ونات بالكاع
باوعت لكيت منير بطحه يون من الوجع
ويكول : انعل يومج ساقطه شلون خليتج تفوتين للبيت,
ردت اجاوبه بس حجي ناصح باوع عليه وتقرب باتجاهه : منير اضاهر ناسيني لتخليني ادوس عليك بقندرتي وأهينك
منير بطحه : عمرك راح يصير بالتسعين وبعدك مامتت
ماحس اله حجي ناصح شال رجله وداس على رجله وين ماهو متصوب
وكله : اياك وبالك تفكر تكمل كلامك وابد لاتنسى تاريخ حجي ناصح
تفل عليه وتوجه بأتجاهنه كال : محتاجين شي بابا
جاوبته واني ابلل شفايفي : فدوه لطولك حجي بس عادي ناخذ ملاك
باوعلهه من فوك ليجوه : وشنو منين تعرفيهه ومنهي هاي البت
صاحت ام اموري: لا عيني كريم كاسيته وانطيته الكم مال ملاك تطلع منا
لاعيني حجي صدقه لربك افركش عليك الشغل واسويه وياك بحر مال دم
حجي ناصح صاح بيهه : انجبي لج غبره تسويهه بحر مال دم ويايه
لج اطيح حظج وحظ الي يطلع وراج سافله
رجع باوعلي وكال : تعرفيهه بتي
كتله : اي اعرفهه وهي ساعدتكم واختهه هناك هي ساعدتني
ملاك : بس فدوه اخاف على امي خاف خالي يأذيهه
مياده : لتخافين حجي ناصح يمج وتخافين على امج ,
حجي ناصح باوعلهه شويه وكال : اخذيهه للسياره امشي بويه امشي كعدن بالسياره
هسه الشباب ينزلون كريم كاسيته ونجي ,
رحنه باتجاه الباب نريد نروح للسياره علمود نركب بيهه مانحس اله صيحات قويه مال رجال جبير
درت وجهي لكيت حنظل والولد الي ويا ينزلون من الدرج ولازمين بيدهم رجال جبير
الدم يجري من جسمه ويصيح ويون وينخي بالله ,
افترت بيه الدنيا اريد اركز ماكدر نفس الكلمات تكررت بالي : ابوج اغتصبني وجبتج للدنيا
بالحرام , ابوج راح يموت مابقه شي "
هزيت راسي وركضت بأتجاهه بسرعه بسرعه واني اصيح : ليش ليش هيج سويت بيه
يابه ليش اني بنتك مياده تسوي بيه هيج •
اسمع ام اموري تشهك وادردم
حنظل صاح: مياده روحي للسياره كاعد اكلج
الرجال بالكوه عايش مروتج
صحت بي : لك اني متت سنين حياتي اندفنت بالميتم وهو مافكر بيه من وره شهوته
اباوعله يريد يحجي يريد يحرك السانه بس مايكدر وجهه ابيض لحيته عاليه الدم يابس
على كصته الشخطات من كل مكان رجليه ذابلات يسحلن بالكاع عرفت ابويه بي شي
نزلو من الدرج واني ابجي بكل حرگه وادك على راسي رحت يمه وفقدت بالصياح لزمته من ياخته
وهو بحضن حنظل " ليش ليش يابه دفنتني هيج دفنه ليش ليش يابه
خليت الي يسوه ومايسوه يصيحولي ساقطه •
بويه اني مياده الي لعبت بيه الدنيا لعب تسمعني لو لا ,
ماسامحك ابد ابد خربت حياتي من وره شهوتك
اجت ملاك تركض باتجاهي تريد تكومني من عنده بس ماكو ماوخرت صحت بيهه : عوفيني عندي
عتاب ويا اريد اعاتبه اريد احجي ويا •
رجعت باوعت عليه وجريته من ياخته ودفنت راسي يم ركبته واني ابجي واجتافي تهتز من اثر
الانهيار الي صار بيه , ماحسيت اله وهو يكول : سامحيني وسكت
شلت راسي من عنده لكيت دم يوكع من حلكه على لحيته وينكط بالكاع صحت
بصوت عالي : لا لا بويه بويه تسمعني
هزيته حيل مايكعد كمت اعيط بعلو صوتي حسيت عيوني ثكلن باوعت على حنظل
ودموعي تنزل حاره على وجناتي لكيته يبجي رجعت عيوني على ابويه واني مثل الخبله احرك
جسمه بكل مكان منا ومنا بس ماكو اي رد
باوعت على ملاك صحت بيهه : ابويه ابويه شبي ليش مايكعد
حجي ناصح : كومي بنتي كومي اذكري الله تعالو شباب اخذو كريم كاسيته للبيت
اجوي ياخذو من الكاع واني منهاره عليه اركض وياهم واهز بي ماكو ميحجي ابد
كعدت بالكاع يم باب البيت اشيل بالتراب الداير مدايري واطشه على راسي واصيح بعلو صوتي
حسيت الحياة كأنما خلصت واني اريد اخلص وياهه •
كمت على حيلي واني منهاره توجهت بأتجاه منيبر بطحه صحت بي : وين وين سلاحك لك احجي وين سلاحك
ماحس اله واحد دارني عليه وضربني راشدي بكل قوته باوعتله زين لكيته حنظل تفل بالكاع
وصاح : انتي شبيج تخبلتي الرجال مابي شي انطي صبر خليني صابر وعاقل وياج
لا ومحمد اراويج وجهي الثاني اني اشكال شفت وضليت ساكت •
ضربته بصدره وكتله: هو انت شنو شفت بحياتك ها شنو شفت شفت امك تذبك بالميتم وتطلع منه
وتجي لبيت دعاره وتطلع المسؤله عليك امك ها ها شفت بحياتك من ضيم وقهر اكثر منن عندي
شفت كمية الوجع من تنجبر تركص كدام حجي مطلك وهو يتقرب عليه ويمسعني انواع الكلام
ها ها احجي اخرسيت مو •
بعدني مامكمله كلامي ضربني راشدي و كال : ان فكيتي حلكج بحرف واحد افر راسج فر
اجتي ملاك شبكتني وكالت بصوت ناصي : مروتج سكتي كلشي ماكو
وداعتج هسه يصير زين وتشبعين من عنده ياعيوني انتي ,
اخذتني من ايدي للسياره واسمع ام امور تصيح : يلا حجي ناصح اخذ زعاطيطك واشطح
حجي ناصح وحنظل مادري شنو يتراددون وياهه ويحجون وياهه انسانه ماعدهه ذرة احترام لا
للجبير ولا للصغير وصلنه للسياره اني وملاك حرنه نصعد لو نبقه لان سيارات كومه اكو
اجاني صوت من وره خشن كال : خيتي صعدي هنا بهاي السياره بسرعه
اني بلعت ريكي وباوعتله لكيته نفسه الي جان بيت حجي ناصح لابس دشداشه سوده , شفته
عصبي وكالب خلقته فتحت باب السياره وصعدت بيهه بكل هدوء اني وملاك لان البيه كافي بعد
مابيه حيل ان اكعد واتناقش شوفة ابويه اليوم بهذا المنظر هدت حيلي وركصي كدام سعد حبايه
كرهني بالحياة كلهه حطيت راسي على الجامه ودمعتي تنزل على خدي وملاك تهدء بيه وتفرك
بجتفي وتواسيني بس يامواساة تفيد بعد حركت السيارات الكدامنه واحنه بعدنه شويه وانفتحت
باب السايق وصعد بيهه ابو الدشداشه السوده استغربت ان هو شعده هنا صاعد بس الي عرفته
اكيد هاي سيارته مابيه حيل اناقشه واكعد انزل من سيارته حركت السياره واني نمت على الجامه
اريد انسى كلش ماريد لا اب ولا ام اتمنى ارجع لماما منى ولحياتي العاديه بدون مشاكل وبدون
هاي الهوسه كلهه وبدون معرفة الحقيقه لان مرات معرفة الحقيقه تكون قويه ومو اي بشر
يتحملهه من المحتمل اذا عرف الحقيقه راح يدخل بدوامه جديده وهي محاربة الامور النفسيه
الي راح تصير بجسمه نفس ماكاعد يصير بيه
حسيت على ملاك تصيحني تكلي : كومي كومي وصلنه عيوني
فتحت عيوني ووخرت راسي من الجامه مقدمة راسي توجعني حيل صاح هذا الولد : خيتي نزلي
انتي وهاي البت العاريه دخلو ليجوه بسرعه
ولاطلعن جدام الزلم تره هنا مش دبي
باوعتله صفح وكتله : ليش بدبي يطلعون صلوخ وبعدين انت شو متعرف تسولف
ياهي العاريه مو هاي البنيه لابسه ومحتشمه مابقه عليه بس انت
باوعت على ملاك كتلهه : نزلي عيني نزلي دبي طلعت عباره عن صلوخ واني مادري
نزلت ملاك واني وراهه نزلت باوعتله وطبكت الباب بكل قوه عندي اباوعله ضرب الاستيرن
مال السياره ومادري شنو يدردم كلت بكلبي عشتو اي والله هم عاجبته روحه درت وجهي على
البيت ودخلت ليجوه لاكتني رقيه صاحت : هلا وميت هلا بخطار حجي ناصح
عبير عبير لحكي بالميه بسرعه لخطارنه •
دخلت لغرفة عبير وملاك ورايه تتلفت منا ومنا كالت : مياده هنا ثريه
كعدت بالكاع وكتله : تعاي عيوني تعاي كعدي اختج بيت حجي مطلك شابعه
ضيم وقهر تعاي عيوني تعاي تكول زينه بس اني حاسه بيهه •
اجتي كعدت بصفي وخطيه مبين عليهه الخوف والقلق من الي راح يصير بيهه شويه ودخلت
علينه عبير والدولكه ترن رنات ناعمه مال الثلج الي يتحرك بيهه كالت : ياهلا وميت هلا بخطارنه الجديد
اني ابتسمت وكتلهه : واني شلون صرت قديمه لو شنو السالفه
عبير: لايعني اعرفج بس هذا الجمال الي بصفج ماعرفه منو منو
باوعت على ملاك وابتسمت بوجهه : ها ها هاي ملوكه حبيبتي تصير اخت بنيه خطيه
هم تشتغل عند الحجي ومجبوره مثلي •
عبير : اوف اوف على العموم عيوني يارب تنجمعن سوه
ملاك : تسلمين حبيبتي ويجمعج بالنبي انشالله
ابتسمت بوجهه وراحت كعدت عنه شويه
مر الوكت بالقليل والباب اندكت كامت عبير فتحته طلع حنظل شافني
كاعده بصف ملاك كال : مياده تعاي بسرعه
كمت على حيلي واني صدري موجر من التعب والحرگه البيه جبيره
خايفه من الي راح يصير طلعت من الغرفه
علكيفي وتمشيت وراه دخل لباب الصاله و دخلت وراه لكيت ابويه منومي بالفراش ومنزعي هدومه
وباقي بس بالشورت ضليت اباوع عليه وعلى الجروح وعلى الشخطات والتجليخ معقوله هذا
حالك يبويه يصير هيج واشوفك كدامي وماكدر اسوي شي بس يلا حس بالعذاب الصار بيه
رحت كعدت على التخم كدامه
ودمعتي تنزل على خدي خلص كلشي عندي الصبر والقوه والاصرار مابقن غير بس دموعي
دخلت رقيه وبيدهه طاسه متروسه معقم وشايله بيدهه الثانيه علاكه متروسه كطن
اني استغربت منهه راحت باتجاه ابويه بدت اطلع بالكطن وتنكعهه بالمعقم وتمسح بجرحه
شويه شويه وهو يون من الوجع كسر خاطري ويه كل ونه دمعه تنزل
حرك لسانه وكال :اي اي يادنيه يادنيه جنتي شلون حلوه شغيرج عليه
حنظل : ارتاح عمي ارتاح وبعدين تكعد واطيب وتكعد تحجيلنه
كريم كاسيته : لا بويه خليني احجي هسه اخاف اموت ومالحك على كلشي ,
ابويه المرحوم يصحاق كبوز جان يجتمع بيه اني وجارنه اليهودي إلياس يحجيلنه شلون تعرف على
والدتي المسلمه ريحانه يكول حبنه بنيناه علكيف وبكل سلام اي الله يرحمك يابه ويذكرلنه شويه
من المواقف من تعرف عليهه ومن جابلهه وردة جوري وهي تكله : اريد ورد بعطرك معطر "
وابويه المرحوم جان يخلط بين اليهودي العبري وبين حجينه احنه العادي لان سنواته كلهه
جانت خارج العراق متنقل بين الدول فلسطين والسعوديه
وبالمناطق اليهوديه جان يحجي مشكل •
ضحك وكال :رغم الديانات المختلفه بيناتهم جان حبهم حسب اقوال امي وابويه والمحيطين بيهم
جان حب بي رساله ومعنى للي يعرفوهم اقترحت عليه امي ان يتزوجهه لان جانت
تكله : هنا بالعراق مايصير نضل نطب ونطلع
براحتنه لازم نكون متزووجين
ويابه ولدي تروح ايام وتجي ايام و يتقدم الهه بس يولدي تعرفون بالحياة اكو عارض يطلع كدام
البشر وجان العارض مال ابويه هو ابوهه ماقبل ينطيهه لابويه وحتى اذكر ابويه
كال : يقلد على اسمي يكلي هم يهودي وهم اسمك يصحاق
وضل ابويه يولدي يلولي شلون ياخذ ريحانه لحضنه شلون شلون
يكول كعدت ليالي وايام ابجي علمود احصل ريحانه بعد يهودي وحب مسلمه شنو تتوقعون•
حب مخابيل على كولت جارنه إلياس •
يكول ضليت ليالي وين اروح ماعندي احد جبت امي وابويه هم تقدموا عليهه وهم رفض والدهه
يكول اخر شي جنت اتمشى بمحافظه اسمهه كربلاء الي عرفته ان هاي مراقد دينيه الناس
تزورهم اني دخلت زرت ويه الناس على الواهس بس كلشي ماعرف اشوف هذا الي يدنك بالباب
يبوس مقدمة الباب مال المرقد وهذا الي اشوفه واكف يم شباج المرقد وبيده ملابس يزورهن
بالشباج ويشمرهن فوك على الشباج يكول اني استغربت ليش هيج هاي العالم
كاعد اطلع من المكان جان يوكفني صوت عياط مال نسوان يصيحين بأسماء المراقد
وشفت بعيوني حب جبير بين هاي الناس لهاي المراقد •
يكول اني تفاجأت شنو سبب هذا الحب يكول رجعت لبيتي وكعدت ابحث عن ألاسامي وعن
الاسلام بصوره واضحه الى ان اقتنعت برسالة خاتم الانبياء ودخلت الدين الاسلامي بكل
احترام , وبيومهه صرت فرحان ورحت بلغت ريحانه وهي نفس الحاله فرحتلي
رحت تقدمت عليهه مره ثانيه بس حسيت ابوهه نوعا ما مقتنع اكثر من السابق ضليت اتردد عليه
مره ومرتين الى ان تعاركت ويا اخوهه الجبير وصارت اقتلك ومادري شنو الى ان الحمدلله
الله كتبهه اليه وصارت ريحانه زوجتي
هنا اني وجارنه إلياس مبتسمين على قصة حبهم شلون صارت وشلون بدت وشلون انتهت سئله
جارنه الياس كله : من وره الزواج هم تغير حبكم عن السابق
جان جواب المرحوم لا بالعكس زاد يكول جنه ليل ونهار نتبادل كلام الحب وماحسينه بأي ملل الى ان اجانه كريم كرومي
وهنا يقصدني اني الله رزقهم بس اني
الوحيد الهم كبروني بيدهم بكل خير وبركه وماعتازيت أحد بأي شي جان كل يوميه يعتنون
بيه مثل الورد يوميه يزكوني شويه بمعلومات ثقافيه
كبرت اني وكبرت حياتي وصرت شاب افتهم وواعي على الحياة وطلعوا عليه لقب اصدقائي
واقاربي كريم كاسيته لان يوميه كاسيت جديد مشتري بس للاسف كلهن تكسرن وراحن هيج،
وتمر الايام بيه واني اشوف الحروب تصير هنا واشوف العالم شلون تأذت واسمع صياح الام
من تجيهه جنازة ابنهه ماجان عندي غير بس الدعاء ادعي لله
يولدي مشت الايام بيه الى ان وصولي للتسعينات بدت مغامرات الحب عندي
قاطعته بعصبيه وكتله : وجانت نتيجة مغامرتك يبويه اني
كال : لا يبنتي انتي نتيجة حب من طرف واحد خلي اكملج بويه اصبري واسمعيني ياعيني
سكتت ورجع يكمل , جنت بأيام الجامعه اني وطلعت شفت بنيه تبيع جامد جنهه طيره بيضه
تخبل قفلت عليهه لازم هاي الطيره توكع بالقفص مالتي ولازم تكون الي وبس جنت اني بالحب
ماتفاهم ابد شلون ما نكول اناني كلش , والله عاد ضليت الحكهه اول ماحل من الجامعه وين متروح
وراهه اني •
ووكعته بالقفص مالتي وكعتهه اي وكعتهه يولدي وهماتين اندليت بيتهه واتعرفت على اهله خوش
عائله طيبه واخلاقهم حلوه وجانت مسيطره عليه بسوالف الحب واني جنت ارهيف مصدكهه بكلشي
الى ان كالت : كريم احنه لازم نتزوج لان اني ماكدر اهلي مايقبلون هيج اطب واطلع وياك
اني جنت نوعا ما مسيطر لان اهلي ناس مثقفه واعيه والله عاد فتحت الموضوع وياهم و راحو
خطبوهه اليه وتم كلشي بخير ماكو اي عارض اهلهه كلش فرحوا ان خطبتهه وراح نتزوج
وكالعاده يولدي من واحد يتزوج تنفخ بطنه بكلمات التهاني والتبريكات جنت فرحان حيل
بيوم عرسي اني واشوف ابويه يروح يجيب الدجاجه علمود يحبسهه بالحمام البره علمود من
تجي هضيمه تدخل يذبحهه جوه رجلهه واني اشوف والدتي تحظر طاسة المي وتحط بيهه تمن
ومن هاي الحبشكلات علمود اول ماتدخل ادوس عليه مدري شنو سوالف الام تعرفوهه بعد يولدي ,
وإلياس جارنه يلبس قميصه المشجر ويجي يوكف كدامي يرتبلي القاط ويهز جتف ويغني
شلونك عيني شلونك
جان يوم حلو ماينسي ابد بس كتلكم بابا الحياة لازم بيهه عارض والعارض مالتي طلعلي بليلة
عرسي رحت لبيت اهل هضيمه جبتهه بموسيقة فرقة ابو عبيسان جان عنده فرقه
يدكون بالتنك وهوساتهم جانت حلوه مو مثل هسه يولدي ,
عاد هي فرحانه واني فرحان اكثر بعد طيرتي وصارت عندي ودخلنه للبيت
وتعرفون سوالف النسوان اطلع الروح
واني روحي طالعه قبل كلشي •
جر حسره وكعت دمعته ومسحه كال دخلت عليهه للغرفه علمود يتم كلشي بخير
اي اي يولدي شويه و تطلع هضيمه مو عذراء شايفين من تمشون بالشارع ويجي واحد يضربكم
سجينه من وره وانتو ماتعرفو منو ورئسا توكعون بالكاع تونون من الوجع هيج صار بيه
بيومهه كعدت يمهه واحجي وياهه : ليش هيج ليش هضيمه بشنو قصرت وياج
اني حبيتج وداريتج على ايدي هيج تسوين بيه ليش شنو ذنبي يهضيمه سولفيلي
كالت : مروتك لا تكول للناس الي بره اروح بالرجلين استر عليه الله يستر عليك
جر حسره وكال : يولدي الحب يعور اي يعور يذبح باوع على
حنظل وكله : يولد حنظل ديربالك تحب اها تره يكتلك انت وعايش
كلنه ضحكنه رجع كال :وشسوي من حبي الهه واني فطير رجال على حالي شسوي
سترت عليهه وضليت اداري بيهه ويوميه يزيد حبي الهه الى ان صارت حامل و اول بطن جنتي انتي يبنتي مياده
شسولفلج ماعرف شنو أكلج بويه بس الله يسامح امج
اني بنفسي لحد الان ماعرف انتي بنتي من دمي ولحمي لو بت الي اغتصب امج
لحد هذا اليوم لاعرفه ولايعرفني ليومي هذا
حطيت ايدي على حلكي دمعتي بسرعه نزلت لان كلماته جانت تجرح وكتله : ابشع منكم ماشفت
ليش هيج وهسه اني شنو ذنبي ها شنو ذنبي ماكلتوا هاي خطيه مافكرتوا بيه
كال : حقج بويه شتحجين حقج بس هاي كل قصتي حجيتهه الج شبيدي اني رجال على حالي
اروح بدربي واجي بدربي وامشي بصف الحايط شسوي ماتكليلي شسوي , اول ماجيتي للدنيا
كالت امج هي وبالمستشفى : هاي نحطهه كدام الحسينيه مال المختار ونخلص منهه والي يسألك
كلهم ماتت اول ماطلعت للدنيا •
واني جنت مثل المحبس بيدهه واعترف بنفسي كدامج اني غبي ومافتهم بس شنو اسوي يابويه
كتلج لاحول ولاقوه وحب امج جان محتل جسمي بحيث
اذا تكلي اكتل نفسك اكتل نفسي •
عبالي نفس امي ريحانه
بس للاسف من شردت عرفتهه على حقيقته
مرت اشهر من ولادتج واحنه ذبيناج كدام الميتم ماذبيتج كدام الحسينيه وضليت على تواصل ويا
مره اسمهه منى تصير صديقة امج تشتغل هناك وحتى أمج جانت على تواصل وياهه
وره فتره الله زرعلي طفل بطن هضيمه هم بنيه بس للاسف من انولدت للدنيا طلعت منغوليه
بسبب اهمالهه لامج لاتاخذ حبوب مال تشويه ولا اي شي جانت امج حامل بيهه وتشرب بالبسكوت
عني ماريد اشوه سمعة امج كدام العالم الكاعده بس علمود تعرفين الحقيقه
هم رادت تذبهه وتخلص منهه بس اني ماقبلت ووكفته عن حدهه و شردت من عندي
وخلت عليه البنيه •
مياده : شنو اسم اختي
كريم : هيماء اسمهه حليوه وحبابه بس للاسف انخطفت مني منو خطفهه حجي مطلك وامج
وماعرف لحد هذا اليوم شنو يسون بيهه يجدون بيهه او يطلعوه ويه بنات الليل استغفرالله
كمل كلامه وضرب الكاع بأيده رجع كال : شفت الويل يابنيتي تعذبت تعذبت هسه
صدكتو بيه من كتلكم الحب يكتل هذا كتلني وحطمني وكسرني كسر طالبت ببنتي هيماء
بس شصار عود انطوهه لا خطفوني يمهم أشهر وطول هاي الاشهر كتل بكتل عذاب بعذاب
امج تجي تدخل عليه تتفل وتروح وهذا الوليد حنظل شاهد على كلشي ينبتي شسوي
ماتكليلي شسوي •
كاعده اجاوبه بس الباب اندكت حيل بكل قوه
او بالاحرى اندفرت
دخلو زلم كومه من ضمنهم حجي مطلك ورجال لابس دشداشه نيلي وكف حنظل
ووكف حجي ناصح على حيله وابو الدشداشه السوده صاح بيهم : شلون ادخلون أنتو هيج
كمت على حيلي صرت وره حجي ناصح وحطيت ايدي على صدري بلعت ريكي
وقريت سورة الفاتحه بكلبي واني خايفه
حجي مطلك : ان اخذتج تموتين جوه ايدي هل مره
بلعت ريكي وتقدم ابو الدشداشه النيلي
وكال : حجي ناصح انطيني مياده
جاوبه ابويه : وشنو ماوراهه زلم هيج هي تايهه وانطيهه الك منو انت
دار وجه عليه وكال : اها اضاهر انت كريم
اني ابوهه ثائر
حطيت ايدي على وجهي حسيت الدنيا رجعت تفتر بيه شراح يصير بعد شوكت ترحميني
واخلص من كلشي
جاوبه حجي ناصح : مياده ابوهه واحد وهو كريم كاسيته ماكو غيره
جاوبه ثائر : اني مايهمني شصاير بس اني امام الكل وامام القانون مياده مسجله بأسمي
يعني امام الكل اني ابوهه رسميا
وهسه اني جاي آخذهه •
يتبع .....
لاتنسوا التصويت والتعليق •
تفاعلكم ضعيف اشوفه من ناحية التصويت! !
نلتقي الاثنين ببارت جديد وبأحداث قويه،
للمتابعه في الانستكرام: tahsin_luqman
خالص مودتي لكم
تحسين لقمان
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!