عزيزي القارئ فضلاً وليس امراً اضغط تصويت لنشر المزيد من احداث الروايه
ملاحظه: كونوا بالقرب بعد ساعه يتم نشر بارت جديد
فستان أحمر
تحسين لقمان
جاوبه ثائر : اني مايهمني شصاير بس اني امام الكل وامام القانون مياده مسجله بأسمي
يعني امام الكل اني ابوهه رسمياً •
وهسه اني اجيت اخذهه '
اني وسمعت هيج حسيت راسي اختل توازنه شنو كاعد يصير شوكت ارتاح ماعرف ,
رجعت كعدت على التخم اني ولازمه راسي حجي ناصح دار وجهه عليه وصاح : شبيج بنيتي
حنظل اركض يابه جيبله مي •
ثائر : هاي العرامه مال الساقطات كلش زين أعرفهه
يلا كومي كدامي مصختيهه عاد •
حجي ناصح :ثائر تاكل تبن احسلك الواكف كدامك حجي ناصح برمشة عين مني ارجعك بطن امك
فاهم لو لا احترم نفسك زين •
ثائر : اني محترم نفسي كلش زين بس انت الي لازم تحترم نفسك تحط بنات يمك والله يعلم
بعده مامكمل كلامه رئسا حجي ناصح لف ايده وضربه راشدي بكل قوته،
حجي مطلك : ها ها يمعودين تره حجي ناصح كلش مصخته ثائر اله
الحق لتخلينه نسويه وياك محاكم وشرطه وقانون •
حجي ناصح : لك باوعو منو يحجي بالقانون والشرطه والانضباط كوم لك تافه
انعللك نعل تاليهه تجي انت
تحجيلي بالقانون والانضباط •
جاوبهم ابويه : خصم الحجي لحجي مطلك وثائر بنتي مانطيهه واذا تردون قانون ومحاكم روحوا
اشتكو وحطوا محامين من جيبكم لا راح تأخرون ولاراح تقدمون شي بالنسبه اليه
بنتي مانطيهه لا الكم ولا للقانون •
ثائر : مو بكيفك اخذهه اخذهه وانت عجوز البوم حجي ناصح هذا الراشدي مالتك اعرف شلون احله
وياك اذا انت عندك زلم تهين شوارب
اني عندي زلم تكص روس •
واذا تريد بعيني رمشة عين اسويه وياك بحر مال دم فاهم لو لا •
اباوع لحجي ناصح صم جف ايده عرفته راح يضربه رئسا صاح بي ابويه
كريم : لا حجينه لخاطري عوفه لتنكس ايدك بهذا الوصخ , واسمعني انت الي سواه بيه حجي مطلك
كلش كافي عوفونا بحالنه الله يعوفكم بحالكم وبتنه المنغوليه رجعوهه النه
ثائر : لا بتكم المنغوليه ولابطيخ ولا هاي
الحبشكلات على طاري بتكم المنغوليه اكدر
اسويلهه اي شي اذا متروح ويايه مياده وبقت السالفه يمكم عيوني ,
مياده : اني شنو لعبه بيدكم ليش كاعدين تحسسوني ان اني سلعه بيناتكم
واحد يشمرني على الثاني ماروح لا ويا ثائر ولا ويا مطلك ولا هم يحزنون اني ابقى
يم ابويه وين متردون ترحون روحوا ,
ثائر : معناهه بهذا حجيج كاعده تكليلي اكتلهه او اغتصبهه او موتهه من الدنيا كلهه
هيج تقصدين ؟
حجي مطلك : ترحين ويايه وتصيرين زوجتي معززه مكرمه وها تره هسه انتي مفروض
تسجدين لربج هواي لان حجي مطلك طلبج. •
كمت على حيلي وصحت بي : شوف عيوني اضاهر انتو ميفيد وياكم غير بس هذا التعامل
باوع حجينه لو تزين روحك بالذهب من فوك ليجوه ولو يطلع يصحاق جدي الي ابو ابويه
من الكبر ويكلي شلونج جدو اكلك ماقبل بيك •
وازيدك من الشعر لو تبقى اخر رجال بالعالم مازوجك ،
حجي مطلك : لج احترمي نفسج اضاهر نسيتي الواكف كدامج مو
مياده : حجي انت شكاعد تحجي تره انت بعيون البنات لاشيئ عيوني
صاح بعلو صوته : لج اليوم مارحمج اذا ماطلعت روحج للسمه اطلع فلا حجي مطلك بت الجلب
صاح ابويه : لك احترم نفسك اني كريم الكل تحلف بأسمي وبأخلاقي مو تجي انت تغلط عليه
كاعده اجاوبه جان تدخل مره لابسه بوشيه وخرت البوشيه باوعتله لكيته مهره غمضت عينهه
وصاحت : اوي اوي عيني
دخلت بالنص وكامت تسوي حركة السجاجين وصاحت : ولكم عيني كلماً صار رجال وكلما نفخ صدره علكيفكم ماما
برمشة عين امسحكم مسح دطيرو يمه •
ثائر : طلعي منهه مهره سالفة زلم واحنه شلون ناخذ حكنه بيدنه
حجي ناصح : ولكم انتم يازلم ماتكلولي عار على الزلم اذا انتو زلم ولكم مره واكفه بصفكم تهينكم
وانتو مثل مطاية ابو سميه •
كريم : انتو هسه تردون مياده مو واذا مانطيناهه الكم راح تلعبون لعب بهيماء مو يابه •
ثائر : بالضبط هذا الي ردتكم تفهموا عدل
مهره : هسه هي شلونهه كله خلك منغوليه
كريم : انتي من تصيرين زلمه احجي وياج
راد يحجي ابويه يكمل كلامه رئسا صحت : واني هاهي اروح وياكم بس بشرط اشوف اختي
وابويه يبقى هنا ومحد يوصله •
مهره : اوي عيني اوي شوفو الوصخه ام الاسيان كامت تحجي وتتشرط دكلي تبن امي
ترحين و انتي الممنونه وبالنسبه لابوج عسى يروح لجهنم مايهمني •
حجي ناصح : بنتي انتي شنو تحجين شنو ترحين وياهم تخبلتي
حنظل :باوعي مياده هاي السالفه تمسحيهه من بالج ماكو شي اسمه اروح وياهم
شنو كاعدين نلعب احنه •
كريم : اني اشوف قرار مياده صح
صاح حجي ناصح : كريم تالي ماتالي تفكر ادز بنتك ويا ناس دعاره ومنحرفين .,
استغربت من كلام ابويه ليش وافق عليه معقوله بعد كل هاي الامور هو ميريدني خلاص
كال : لان محد يعرف هيماء بس اني
وهيماء رايدله متابعه وعنايه منغوليه ياناس منغوليه تعرفون شنو منغوليه يعني كلشي ماكو
وهذوله يمهم الله يعلم الله يعلم شمسوين بيهه
صفكت مهره
وكالت : شمسوين بيهه عين احلى سيتات نوم كاعدين نجيبلهه وكل هذا ويحجون
علينه والله يالله •
جاوبتهه : اني رايحه وياكم بس مو اليوم لا باجر تجون تاخذوني
حجي مطلك : وشنو مثلا باجر نشتغل عندج احنه تحترمين نفسج وكدامنه
ماعرف شلون اجت عيني على حنظل كاعد على التخم وحاط ايده على وجهه حسيته ميت قهر
بس قراري لازم اخذه لان اختي ماعرف عنه شي صح روحتي مره ثانيه لهناك مجازفه جبيره
بس الكاتبه الله يصير عسى ولعل نفس ماكتبلي ان اطلع مناك جوز ينكتبلي مره ثانيه
رجعت باوعت على ابويه شفته يون من الوجع مادري من وجع الجروح من وجع الدنيا الي لعبت
بي لعب , اكو شغلات عن ابويه اريد اعرفهن اريد اعاتبه ويعاتبني اريد اريد •
رفعت راسي على حجي مطلك وجريت حسره جبيره وصحت : حجي مطلك تريدني اجي وياك ماعندي اي اشكال بس شرطي الوحيد
اكون معززه مكرمه وها باجر تجي تاخذني غير هذا الحجي ماعندي وانت يابه هه ثائر افندي
رايحه وياك بس بالاسم لا ابويه ولا هم يحزنون تكعد وتسكت •
ثائر : لتفكين حلكج زايد ارضي بمقدارج وبس لان مرات الواحد من يطلب هوايه يكوم يمشخت
وهاهي احنه هم ماعدنه اشكال يمياده باجر باجر سهله هاي
باوع على حجي مطلك ومهره وكال : امشونه باجر النه جيه ثانيه ,
مهره :لج الزمج هناك مو مالزمج واني اعرف شصرف وياج سهله يمياده
ثار : عوفيهه عيوني الساقطات انواع
كام حنظل وصاح : لك تاكل تبن وتنجب صارلي ساعه كاعد وساكت محترمكم ماريد اهينكم
بس اضاهر انتو ابد مو مال احترام سفله •
حجي مطلك : وانت ياهو مالتك اضاهر نسيت الكتل والضرب الي اكلته
مني خليهه ترجيه باذنك من اجي اخذ مياده انت هم وياهه ياحلو •
حجي ناصح : خسه اي والله حجي ناصح موجود وانت تريد تاخذ حنظل اني انطيتك مياده او
سمحت الهه لاجل اختهه ولاجل قرار ابوهه اما حنظل خط احمر وها هاي المره اذا ناقشتني
بسالفة حنظل راح تصير سالفة طلق وقد احذر من انذر
مهره : عيني حجينه شو دمشي ورايه
حجوزات مروتك
ذوله براس بصل يابس ماشتريهم
بس نعثله •
جرتهم من الصاله وطلعت ضليت جامده من مكاني شنو من مره هاي ماعرف شلون عدهه هيج
قوه تقود زلم وتتحرك بيهم منا ومنا ماعرف معقوله اذا صرت مثلهه راح اكدر اعيش بالحياة
لو اضل هيج ضيم وقهر وعذاب •
حجي ناصح : روحي بنتي ارتاحي
بويه رقيه تعاي رجعي كملي شغلج يم عمج كريم كاسيته يلا بويه
وانت كريم اكرمنه بسكوتك مو وكت السوالف ارتاح يازلمه وانت بويه حنظل كوم روح لابو
سميه يلا يلا شوف اوضاع الكاع يلا ماريد زلمه ومره كاعدين وساكتين يلا يابه
ردت اتقرب اروح لابويه اكعد ويه رقيه اداوي
صاح حجي ناصح : مياده بنتي كومي للبنات بسرعه يلا عوفي ابيج يرتاح يلا بويه يلا
باوعت لحجي ناصح ورجعت باوعت لابويه شفت كلام حجي ناصح صح ولازم اعوف ابويه
براحته يرتاح شويه والوكت طويل والليل طويل اكتله ويا , طلعت منهم لكيت الدنيا كاعده تغيم
وتغرب رحت لغرفة عبير دكيته ماطلع احد كاعده ادخل جان تجي من وره
صاحت : تعاي حبيبه ويايه كاعده اخبز بالتنور
عقجت حواجبي
وكتلهه : وين تخبزين خو مو بالزويه وكلش مضلمته
باوعتلي ضحكت وكالت : لا عيوني لا امشي امشي ويايه هسه اعلمج شلو تسوين العجين
دوائر وتكعدين تحطي بالتنور من عيوني ,
مشيت وياهه وكتلهه : مابيه حيل اخبز ومادري شنو خليني هيج
كالت : اي عيوني وزلمتج حزام ضهرج عكبه من تزوجين شتحطين كدامه بس
لا تحطين كدامه هوى •
ضحكت وكتلهه : تره اكو شي اسمه مخبز خارجي اطلعه يجيب بالف على كدنه ونكعد ناكل
وكفت بنص الطريق باوعتلي وغمتني كالت : كبر لفج ماما الزلمه يحب المره الي اداري
واداري بيته بحيث يجي من الشغل يلكه مريته واكفه على التنور اطلعله الخبزه الحاره بس تخيلي
الموقف مو يجي تعبان وروحه مسلوكه من شمس تموز وانتي من الباب تكليله جيبلنه خبز بالف
لا هيج انتي راح تقللين من قيمتج كدامه راح تكليلي شلون او جوز عيوني تكليلي على حجيج
هذا المره اذا متخبز لرجلهه يكوم مايحبهه او تقل قيمتهه عنده
اني اكلج ليش تدرين ليش اي ؟
مياده : طربيني عيوني ليش اي
عبير : لان ياعيوني الزلمه يطلع ويه زلم واكو زلم من النوع الي تمدح بنسوانهم من الاكل والملبس
والشرب والنزاكه عاد هنا رجلج راح يضل ياكل بروحه ليش مو هيج مرتي
مياده : والله انج ملعونه طلعتي مو قليله ولج شلون فكرتي بيهه ماعرف
عبير : تره اني مو شويه عندي هواي شغلات اسويهن لاتغرج كعدتي بالغرفه
بس شسوي مالحك
وصلنه لمكان التنور وكتلهه : ليش ماتلحكين لاشغل ولا اي شي وماعندج جهال
كالت : وابو سميه خطيه غراضه عليه كلهن اني كايمه بيهن
حطيت ايدي على حنجي وكتلهه : اكلج هذا ابو سميه منو قبل شويه حجي
ناصح جاب اسمه وهسه انتي جبتي •
كالت : باوعي ليغاد على الركن باليمين كاعده تشوفين هذا الزلمه الي لابس دشداشه سوده
هذا هو ابو سميه •
باوعت وين ماوصفلتي المكان ولكيته نفسه ابو الدشداشه السوده
, هم لكيته عصبي ويروح بمكانه ويجي منا ومنا اتفاجات من حركاته رجعت باوعت على عبير
لكيتهه تلم بالسعف علمود تشغل التنور رحت افتر وراهه وكتلهه : هو ليش هيج دائما اشوفه عصبي ونار وابد مابي مجال للتفاهم
عبير : ابو سميه خطيه المكرود لعبت بي الدنيا لحد ماكال الله بس وطيحت حظ حظهه
كتلهه : خطيه شمسوي ومشت ويا بالمكلوب
عبير : يمعوده لاشارب ولا بالع بس نكدر نكول هاي الناس الي مو زينه عيني الي طلعتنه هسه
بهذا الوكت فردهوا بيتونه تفرده اريد جاهل مايبجي ماكو اريد شاب مايبجي ماكو
مياده : مافتهمت قصدج
عبير : عيوني من الاخير هذا ابو سميه خطيه رجال على كد حاله فاتو عليه بالبيت مثلمين اي
شي ماطالع من وجوهم منو انتو شتردون لاحس ولانفس منهم بس يصيحون •
الكم مهله اربع ساعات
اطلعون من البيت
والمنطقه مانشوفكم هنا •
وهو رجال على كد حاله يعني من كاعده اكلج على كد حاله كلش يعني خطيه صاحب عربانه يدفع
بيهه بالسوك شيسوي لعد عنده سميه ومريته شلون خو مو يموتون من الجوع
مياده : زين ذوله الملثمين شنو ماتكليلي يعني
شنو شغلهم يفوتون يشيلون العالم ويطلعون
عبير : بضبط هذا شغلهم واكو بيهم لا عيوني يكتلوج بمكانج
مياده : زين ارد اعرف ليش يشيلون العالم يعني شنو من اجل البيت لو شنو غايتهم
شالت السعف من الكاع حطتهن على ضهره وتوجهت بيهن للتنور كالت : من اعلم اني اعلمج
انتي والله ياداده لاعرف ولا هم يحزنون منهو ذوله ماعرف بس ناس تكول
متعاونه ويه الدوله وناس تكول متعاونه ويه الارهاب وتاهت علينه السالفه •
علمي من علمج •
مياده : شوكت نرتاح ماعرف نكضي حياتنه هيج قابل , زين من شالو هو ومرته وين راحوا
عبير : المكرود ماشال بالوكت المطلوب وجانت الضحيه مرته وبنته راحو من عنده
وانلعب بيهم لعب وتبهذل تبهذل خطيه ,
مياده : لحظه عبير شنو يعني راحوا من عنده يعني وين راحوا شنو شصار
عبير : انكتلوا كدام عينه البينه والمره دخلوا عليه بعد اربع ساعات بدون نفس ولا تفاهم ولاهم
يحزنون كبل جروا سلاحهم ورموهم •
حطيت ايدي على حلكي ورجعت باوعتله شفته يروح ويرجع ,
رجعت كتلهه : زين خطيه شلون وصل لحجي ناصح وليش هيج يروح ويرجع اريد
افتهم السالفه عدل ,
عبير : عيني هذا ابو سميه نوعا ما اتخبل وخطيه من الصدمه يروح ويجي مايكعد ابد من انكتلت
زوجته وبنته كدامه دخل بدوامه كلش جبيره صار مايدخل للبيت ويكعد بي
مثل العالم ويرتاح بي
لا خطيه سكن الشرع شهور شهور وعيني اجه رجال من بغداد لحجي ناصح كال هذا رجال ابو
سميه هيج وهيج سالفته وانتي تعرفين حجي ناصح رجال يخاف الله وحاج بيت الله هواي
اول ماسمع السالفه كبل اجر سياره واخذ جم زلمه من الزلم الي يمه وراحو لبغداد جابو ابو سميه
وخطيه ذيج غرفته ابد مايدخل ويكعد بيهه بس يفتر بالبستان تصير ساعه تلاثه او الاربعه
اطلع احلب البقر مال الديره الكاه يفتر على هاي الفره ويحجي وحده ويأشر وحده
حسب كلام حجي ناصح ان هو خطيه بعده متاثر بموت زوجته وبنته ويسوي تأشيرات يرفع ايده
ليفوك على راسه كانما واحد كدامه يكله ارفع ايدك ليفوك , وهذا عين عينج
رحت يمهه باوعتلهه جابت الشخاطه وشخطت وحدهه وشعلت سعفه من السعفات
كتلهه : مادري شكلج ياعبير حسبي الله ونعم الوكيل على كل واحد ياذي يكتل ويخطف
عبير : خلينه بهمومنه وضيمنه احسللنه ياخيتي
مياده : اي والله ياعبير همومنه كلش كافيه ,
صفنت شويه واني اباوعله شلون تشغل التنور وشلون تتحرك وتجيب صينية العجين وتبدي
تحط العجين بالتنور شويه شويه وتوخر وجهه عن التنور بسرعه تخاف على وجهه
لا يروح يحترك ,
كتلهه : زين خطيه بنته جانت شكد عمرهه الله يرحمهه يارب
باوعتلي وكالت : خطيه يطلع عمرهه 13 سنه بس بعدهه طفله بس انت يلي ملثم الي تفوت
على بيوت العالم شلون انطاك كلبك ترفع سلاحك وتحطه براسهه وتكتله ولكم طفله
طفله شنو من بشر شنو من كلب عدكم ماعرف •
رجعت باوعتله لكيته خطيه يروح ويجي ويأشر بيده ويحجي وي الهوى جريت حسره
من كل كلبي وذبيتهه ,
درت وجهي على عبير كاعده احاجيهه على ابو سميه اريد اعرف ليش هيج هو عصبي اريد
اتعمق بقصته بعد جان اسمع واحد من بعيد يحاول يصيح بأسمي بس ماكاعد يكدر
درت وجهي بسرعه لكيته رفيق
يركض باتجاهي اني استغربت شبي رفيق هيج يركض خوماكو شي ,
وصل يمي وهو يلهث ووجهه كله تراب
كال : م ميا مياده اي اي مياده ح حنظ حنظل اي حنظل
عبير اجتي يمنه بسرعع اباوعلهه خايفه لزمت ايده وكتله : رفيق شنو حاول تفهمني
رفع ايده عصرهه وكام يهز راسه مافتهمت شنو شبي وشنو يريد كتله واني
خايفه: وين حنظل هسه
رفيق : بال بالغر اي اي بالغرفه
عافني بمكاني وركض بأتجاه الغرف مال البستان ركضت وراه اني وعبير وصلنه الغرفه واني صدري
يصعد وينزل من وره الخوف دخل للغرفه رئسا دخلت وراه لكيت حنظل
واكع بالكاع وجسمه كله يرجف كأنما واحد كاعد يهزه ورافع ايده عاصرهن حيل
ويأشر بوجهه منا ومنا ويون مادري بشنو
عبير صاحت بعلو صوتهه : لك حجي يابه
حجي ناصح الحك
حنظل جايته الحاله •
يتبع ....
لاتنسوا التصويت والتعليق لنشر المزيد،
كونوا بالقرب بعد ساعه يتم نشر بارت جديد
دمتم سالمين،
تحسين لقمان
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!